លោក Tillerson គឺជាអ្នកការទូតអាមេរិកថ្នាក់ខ្ពស់បំផុតដែលមកបំពេញទស្សនកិច្ចនៅក្នុងប្រទេសថៃ ចាប់តាំងពីរដ្ឋប្រហារឆ្នាំ២០១៤ បានធ្វើឱ្យទំនាក់ទំនងរវាងមិត្តភាពជាយូរឆ្នាំនេះមានភាពតានតឹង ហើយបានមើលឃើញការទំនុកបម្រុងរបស់ចិនមកលើទីក្រុងបាងកកជាមួយនឹងការលក់អាវុធដ៏ច្រើនសន្ធឹកសន្ធាប់ និងកិច្ចព្រមព្រៀងផ្នែកហេដ្ឋារចនាសម្ព័ន្ធ។
ថៃគឺជាប្រទេសមួយក្នុងចំណោមប្រទេសជាច្រើនទៀតនៅតំបន់អាស៊ីអាគ្នេយ៍ ដែលទទួលស្ថានទូតកូរ៉េខាងជើង និងទទួលផលប្រយោជន៍ពាណិជ្ជកម្មទ្វេភាគីដ៏មានតម្លៃជាមួយនឹងរបបឯកោមួយនេះ។
បើយោងតាមក្រសួងការបរទេសរបស់ថៃបានឱ្យដឹងថា កាលពីឆ្នាំ២០១៤ ប្រទេសទាំងពីរបានធ្វើពាណិជ្ជកម្មរួមគ្នាដែលមានទឹកប្រាក់ចំនួន ១២៦ លានដុល្លារអាមេរិក ដែលកើនឡើងជិត៣ ដង ចាប់តាំងពីឆ្នាំ២០០៩ មក។
បើយោងតាមលោកស្រី Susan Thornton ដែលជាឧបការីរងក្រសួងការបរទេសសហរដ្ឋអាមេរិកទទួលបន្ទុកកិច្ចការនៅតំបន់អាស៊ីបូព៌ាបានឱ្យដឹងថា ប៉ុន្តែអាមេរិកចង់ឱ្យថៃបង្រ្កាបក្រុមហ៊ុនរបស់កូរ៉េខាងជើងដែលប្រើប្រាស់ទីក្រុងបាងកកជាមជ្ឈមណ្ឌលពាណិជ្ជកម្ម ដោយយកកិច្ចការធុរកិច្ចជាជួរមុខ។
លោកស្រី Thornton បានបន្ថែមថា លោក Tillerson នឹងពឹងពាក់ប្រទេសថៃផងដែរ ដើម្បីរឹតបន្តឹងនូវតម្រូវការទិដ្ឋាការចំពោះជនជាតិកូរ៉េខាងជើងដែលចូលមកក្នុងប្រទេសថៃ និងត្រួតពិនិត្យមើលបេសកកម្មការទូតរបស់ខ្លួន។
ប្រមុខរបបយោធាថៃ លោក Prayut Chan-O-Cha បានសម្តែងនូវក្តីរីករាយ ខណៈដែលគាត់ទទួលស្វាគមន៍បេសកជនសហរដ្ឋអាមេរិកមកកាន់វិមានរដ្ឋាភិបាល។
បន្ទាប់ពីជំនួបរបស់ពួកគេ អ្នកនាំពាក្យរដ្ឋាភិបាលថៃបាននិយាយថា ប្រទេសថៃបានត្រៀមខ្លួនជាស្រេចដើម្បីធ្វើកិច្ចសហប្រតិបត្តិការ និងផ្តល់នូវការគាំទ្ររបស់ខ្លួនក្នុងការដោះស្រាយវិបត្តិនៅឧបទ្វីបកូរ៉េ ដោយគាត់បានបន្ថែមថា ប្រទេសថៃកំពុងតែអនុវត្តន៍តាមការបង្កើននូវការដាក់ទណ្ឌកម្មរបស់អង្គការសហប្រជាជាតិលើទីក្រុងព្យុងយ៉ាង។
ការដាក់ទណ្ឌកម្មទាំងនោះអាចធ្វើឱ្យកូរ៉េខាងជើងអន្តរាយទឹកប្រាក់ចំនួន១ ពាន់លានដុល្លារអាមេរិកក្នុងមួយឆ្នាំ។
ដំណើរទស្សនកិច្ចរយៈពេលមួយថ្ងៃរបស់លោក Tillerson បន្ទាប់ពីវេទិកាថ្នាក់តំបន់ក្នុងទីក្រុងម៉ានីល ជាទីកន្លែងដែលអតីត CEO នៃក្រុមហ៊ុន ExxonMobil បានសាទរចំពោះការដាក់ទណ្ឌកម្មថ្មីៗលើរបបកូរ៉េខាងជើងចំពោះការបង្កើនផលិតអាវុធនុយក្លេអ៊ែររបស់ខ្លួន។
ការដាក់ទណ្ឌកម្មទាំងនេះត្រូវបានគេធ្វើឡើង ក្នុងការឆ្លើយតបទៅនឹងការបាញ់មីស៊ីលសាកល្បងឆ្លងទ្វីបចំនួនពីរលើកកាលពីខែមុន។
លោកស្រី Thornton បានថ្លែងមុនដំណើរទស្សនកិច្ចថា ស្ថានភាពមានទាំងល្អមានទាំងអាក្រក់ ដែលអាមេរិកកំពុងតែទាមទារប្រទេសថៃផងដែរ ឱ្យទទួលយកជនភៀសខ្លួនកូរ៉េខាងជើងបន្ថែមទៀត។
ប្រទេសថៃគឺជាកន្លែងឆ្លងកាត់ជាយូរមកហើយសម្រាប់អ្នករត់ចោលស្រុក ដែលធ្វើដំណើរជាជួរឆ្លងកាត់ប្រទេសចិន បន្ទាប់មកចូលទៅក្នុងប្រទេសឡាវ ឬក៏កម្ពុជា និងថៃ ជាទីកន្លែងដែលពួកគេស្វែងរកទីជម្រកនៅឯស្ថានទូតកូរ៉េខាងត្បូង។ ប៉ុន្តែស្ថានភាពនេះ គឺមិនបានទទួលស្គាល់ពួកគេជាផ្លូវការថា ជាជនភៀសខ្លួនឡើយ។
ក្រុមអ្នកវិភាគបាននិយាយថា ប្រទេសថៃទំនងជានឹងមិនផ្តាច់ទំនាក់ទំនងរបស់ខ្លួនពីកូរ៉េខាងជើងឡើយ៕
ប្រភព: AFP ចុះថ្ងៃទី០៩ ខែសីហា ឆ្នាំ២០១៧
No comments:
Post a Comment