Tuesday, September 06, 2016

ទស្សនវិភាគ៖ "ចេតនាប្រើពាក្យហែរញត្តិ ដើម្បីបំផ្ទុះចលនាបដិវត្តន៍មហាជន"

គណបក្សសង្គ្រោះជាតិ មិនប្រកាន់យកជំហជាគណបក្សប្រឆាំងក្នុងវប្បធម៌នយោបាយប្រជាធិបតេយ្យ ជាមួយនឹងការទទួលស្គាល់លក្ខណៈសម្បត្តិព្រះរាជាណាចក្រកម្ពុជា ជា "រដ្ឋឯករាជ្យ អធិបតេយ្យ" បន្តិចសោះឡើយ។ បើទោះបីមេដឹកនាំគណបក្សសង្គ្រោះជាតិ តែងតែបរាជ័យជានិច្ច ក្នុងការសុំអន្តរាគមន៍ឲ្យបរទេសលុកលុយចូលក្នុងកិច្ចការផ្ទៃក្នុងកម្ពុជា ក៏ដោយ ប៉ុន្តែគោលបំណងធំចំបងរបស់លោក សម រង្ស៊ី និងលោក កឹម សុខា គឺ "ការបំផ្ទុះចលនាបដិវត្តន៍មហាជន"។ មេដឹកនាំបក្សប្រឆាំងបែបទុច្ចរិតនេះ តែងតែញុះញង់ប្រជាពលរដ្ឋឲ្យងើបបះបោរឡើង ដោយយកគំរូចលនាមហាជន នៅហ្វីលីពីន ព្រមទាំងចលនាបដិវត្តន៍ពណ៌នៅបណ្តាប្រទេសអារ៉ាប់ និងនៅប្រទេសអ៊ុយក្រែន។
ការសាកល្បងទ្រង់ទ្រាយធំនៃ "ការបំផ្ទុះចលនាបដិវត្តន៍មហាជន" របស់គណបក្សសង្គ្រោះជាតិ គឺព្រឹត្តិការណ៍ក្រោយការបោះឆ្នោតរដ្ឋសភា ឆ្នាំ២០១៣ ដែលមានប្រទេសមហាអំណាចមួយនៅពីក្រោយខ្នង។ ទីបំផុតត្រូវបរាជ័យ ដោយសារភាពអត់ធ្មត់របស់អំណាចរដ្ឋដឹកនាំដោយសម្តេចតេជោសែន ក្នុងការគ្រប់គ្រងពេលវេលាមួយសមស្រប ទុកឲ្យកំហឹងឆេះឆួលរបស់អ្នកគាំទ្រគណបក្សសង្គ្រោះជាតិ ដែលដុតរោលដោយលោក សម រង្ស៊ី និងលោក កឹម សុខា ធ្លាក់ចុះបន្តិចសិន ប្រសើរជាងប្រើកំហឹងទល់កំហល់នាំឲ្យប្រជាជាតិធ្លាក់ក្នុងវិនាសកម្ម។
ប៉ុន្តែលោក សម រង្ស៊ី និងលោក កឹម សុខា នៅតែចិញ្ចឹមចិត្ត "បំផ្ទុះចលនាបដិវត្តន៍មហាជន" តាមដំបូន្មានរបស់ចៅហ្វាយបរទេស ក្រោមលេសមួលបង្កាច់ថា "កម្ពុជាវិលត្រឡប់ទៅរបបផ្តាច់ការ ផ្ទុយពីកិច្ចព្រមព្រៀងទីក្រុងប៉ារីស"។ ដើម្បីសម្រេចបំណងនៃ "ការបំផ្ទុះចលនាបដិវត្តន៍មហាជន" មេបក្សប្រឆាំងដ៏ទុរយសទាំងពីររូបនេះ រិះរកបង្កើតព្រឹត្តិការណ៍ឲ្យមានការប្រមូលផ្តុំ និងដង្ហែក្បួនដែលពួកគេធ្លាប់បានធ្វើនៅក្រោយការបោះឆ្នោត២០១៣។ ទិដ្ឋភាពជាក់ស្តែង បានបង្ហាញថា ៖
- ឧបាយកលប្រើមធ្យោបាយ "បាតុកម្ម" គឺអស់លក្ខណ៍ ព្រោះមិនបំពេញល័ក្ខខ័ណ្ឌកំណត់ក្នុងច្បាប់បាតុកម្មដែលរដ្ឋធម្មនុញ្ញតម្រូវ។
- ការប្រកូកប្រកាសឲ្យអ្នកគាំទ្រមកជួបជុំនៅមន្ទីរបក្ស ក្រោមលេស "តាមដានការវិវត្តន៍នយោបាយ" ក៏ទទួលបរាជ័យ ព្រោះចុងក្រោយមានមនុស្សមិនដល់៥០នាក់មកប្រមូលផ្តុំ។
- បន្ទាប់មកប្រើមធ្យោបាយ "ហែរញត្តិ" ថ្វាយព្រះមហាក្សត្រ បង្កប់នូវភាពមិនប្រក្រតីដែលកំពុងតែត្រូវប្រឈមនឹងការទទួលខុសត្រូវចំពោះមុខច្បាប់ជាធរមាន។
- ឥឡូវប្រើមធ្យោបាយ "ហែរញត្តិ" ដាក់ទៅស្ថានទូតប្រទេសហត្ថលេខីនៃកិច្ចព្រមព្រៀងសន្តិភាពក្រុងប៉ារីស ដើម្បីឲ្យប្រទេសទាំងនោះដាក់សម្ពាធមកលើរាជរដ្ឋាភិបាលកម្ពុជា បើទោះបីកន្លងមកធ្លាប់ធ្វើពីរបីដងរួចមកហើយ តែគ្មានប្រទេសណាគេអើពើ។
"សម្លេង យើង" សូមបញ្ជាក់ថា រដ្ឋធម្មនុញ្ញ ទទួលស្គាល់សិទ្ធិធ្វើញត្តិ តែនីតិវិធីប្រគល់ញត្តិ គឺស្ថិតក្នុងក្របខ័ណ្ឌច្បាប់ ហើយម៉្យាងទៀត រដ្ឋធម្មនុញ្ញ ទទួលស្គាល់តែការប្រើសិទ្ធិធ្វើញត្តិដាក់ជូនអង្គការជាតិតែប៉ុណ្ណោះ ពោលគឹ ពុំបានទទួលស្គាល់ការធ្វើញត្តិទៅឲ្យអង្គការអន្តរជាតិ ឬរដ្ឋាភិបាលបរទេសឡើយ ព្រោះវាប៉ះពាល់ដល់ឯករាជ្យភាព និងអធិបតេយ្យភាពកម្ពុជា។
លើសពីនេះទៀត ថ្វីត្បិតតែគណបក្សសង្គ្រោះជាតិ ដឹងច្បាស់ណាស់ថា ញត្តិឲ្យបរទេស វាគ្មានប្រយោជន៍ក្តី ក៏បក្សប្រឆាំងនេះ ត្រូវតែធ្វើតទៅទៀត គឺយ៉ាងហោចណាស់ក៏ជា ការបង្កើតព្រឹត្តិការណ៍ទាក់ទាញចំណាប់អារម្មណ៍ពីមហាជន ក្រែងលោអាចជួសជុលស្ថានភាពដុនដាបរបស់ខ្លួនបច្ចុប្បន្ន។ គំនិតបង្កើតសេណារីយ៉ូនេះ ពិតជាទទួលបានការគូសវាសផ្តល់ឱវាទពីចៅហ្វាយនាយបរទេស ដែលមានជំនាញឯកទេសខាងបំផ្លាញសេចក្តីសុខប្រជាជាតិដទៃ ដោយគេនៅតែសង្ឃឹមថាយ៉ាងហោចណាស់ ក៏បានរូបភាពពីវិធានការផ្លូវច្បាប់របស់អំណាចរដ្ឋយក ទៅបកស្រាយបំភ័ន្តក្រោមពាក្យពេជន៍ឆ្កួតលីលានូវរបស់ដែលហៅថា "ការរំលោភលើសេរីភាពបញ្ចេញមតិ, សេរីភាពប្រមូលផ្តុំ, សេរីភាពដើរហើរ ..."។
ការខិតខំបង្កើតព្រឹត្តិការណ៍ គឺដើម្បីហុចដងឲ្យអង្គការសិទ្ធិមនុស្សនិន្នាការប្រឆាំង និងអ្នកស៊ីឈ្នួលនិយាយភាសាខ្មែរឲ្យវិទ្យុបរទេស បំពងសម្លេងវាយប្រហាររាជរដ្ឋាភិបាល។ អតីតកាលរបស់កម្ពុជា ក៏ដូចជា បច្ចុប្បន្នភាពពិភពលោកនៅបណ្តាប្រទេសអារ៉ាប់ និងប្រទេសអ៊ុយក្រែន ដែលសន្តិភាពត្រូវបានបំផ្លាញជាថ្នូរនៃការស្រមៃចង់បានប្រជាធិបតេយ្យពិតបែបលោកខាងលិច និងបែបសហរដ្ឋអាមេរិក គឺគ្មានអ្វីក្រៅពីមហាវិនាសកម្ម។ ដូច្នេះ ទ្រឹស្តី "ការពារប្រសើរជាងព្យាបាល" គឺជាចាំបាច់ ត្រូវអនុវត្ត ទោះក្នុងតម្លៃណាក៏ដោយ។ នីត្យានុកូលភាពរបស់រាជរដ្ឋាភិបាល ផ្តល់ដោយរដ្ឋធម្មនុញ្ញ គឺត្រូវតែទប់ស្កាត់រាល់ឧបាយកល "បំផ្ទុះចលនាបដិវត្តន៍មហាជន" មិនឲ្យងើបរួច។ វិធានការណ៍នេះ មិនមែនជាការភ័យស្លន់ស្លោរទេ តែជាការប្រុងប្រយ័ត្នខ្ពស់ ក្នុងសមត្ថភាពគ្រប់គ្រងមិនឲ្យចលនាបដិវត្តន៍ពណ៌បែបណាមួយ ដុះពន្លកនៅលើទឹកដីកម្ពុជា បំផ្លាញសន្តិភាពរបស់ប្រជាជាតិយើងជាថ្មីម្តងទៀតបានឡើយ៕
អត្ថបទដោយ៖ សម្លេងយើង








លិខិតមិត្តអ្នកអាន៖ អ្វីទៅជាចេតនាពិតប្រាកដ ក្នុងការហែរញត្តិរបស់បក្សប្រឆាំង?

មន្ត្រីបក្សប្រឆាំងនៅតែប្រកាន់ជំហរ មិនព្រមគោរពតាមការសម្រេចរបស់អាជ្ញាធរមានសមត្ថកិច្ចក៏ដូចជាសាលាក្រុងភ្នំពេញ ដែលហាមប្រាមមិនឱ្យ ប្រមូលផ្តុំមនុស្ស ហែរញត្តិទៅដាក់នៅតាមស្ថានទូតនានាក្នុងក្រុងភ្នំពេញ។ ការចចេសរឹងរូសហែរញតិ្តផ្គើនប្រឆាំងនឹងអាជ្ញាធរ ពីសំណាក់បក្សប្រឆាំង បានធ្វើឱ្យអាជ្ញាធរក្រុងភ្នំពេញសម្រេចដាក់កម្លាំងយាមល្បាត និងបិទផ្លូវមួយចំនួន ដើម្បីរក្សាសន្តិសុខសណ្តាប់ក្នុងរាជធានីភ្នំពេញ ព្រោះអាជ្ញាធរដឹងថា បក្សប្រឆាំងគឺមានគម្រោងទុច្ចរឹត បង្កើតព្រឹត្តិការណ៍អាចឈានដល់ហឹង្សានានា ក្នុងការដង្ហែរក្បួនរបស់ខ្លួន ដោយមិនមែនគ្រាន់តែដង្ហែក្បួនធម្មតានោះទេ ប៉ុន្តែពួកគេបានធ្វើការកេណ្ឌប្រជាពលរដ្ឋ មកពីតាមបណ្តាខេត្តនានា ហើយបើទុកឱ្យបក្សប្រឆាំងកេណ្ឌប្រជាពលរដ្ឋ និងសកម្មជនរបស់ខ្លួន ធ្វើការដង្ហែក្បួននោះ គឺនឹងធ្វើឱ្យស្ថានភាពចរាចរណ៍កាន់តែអាក្រក់ជាងការបិទផ្លូវរបស់សមត្ថកិច្ចទៅទៀត។
ទោះបីជាមានការអះអាងពីមន្ត្រីជាន់ខ្ពស់គណបក្សប្រឆាំងថា ពួកគេបានដាក់ញត្តិទៅតាមស្ថានទូត មួយចំនួនក្នុងរាជធានីភ្នំពេញរួចរាល់ហើយក៏ដោយ ក៏ប៉ុន្តែមកដល់ពេលនេះ គេមិនទាន់ឃើញមានការឆ្លើយតប ពីខាងស្ថានទូតណាមួយថា យ៉ាងណានោះទេ។ មួយវិញទៀត សកម្មជន និងប្រជាពលរដ្ឋមួយចំនួន ដែលត្រូវបានបក្សប្រឆាំងប្រកូកប្រកាសឱ្យឡើងមកហែរញត្តិនៅភ្នំពេញ គឺហាក់នៅមិនទាន់ដឹងច្បាស់នៅឡើយទេ ពីគោលដៅពិតប្រាកដក្នុងការហែរញត្តិ របស់បក្សប្រឆាំង ដោយគ្រាន់តែលឺមន្ត្រីបក្សប្រឆាំងនិយាយថា ការហែរញត្តិនេះគឺដើម្បីឱ្យប្រទេសម្ចាស់ហត្ថលេខីកិច្ចព្រមព្រៀងទីក្រុងបារីសដឹងថា ប្រទេសកម្ពុជា កំពុងដើរឃ្លាតចាកពីស្មារតី នៃកិច្ចព្រមព្រៀងទីក្រុងបារីស។ ដូច្នេះតើអ្វីទៅ ជាចេតនាពិតប្រាកដ ដែលអ្នកចូលរួមសកម្មជនបក្សប្រឆាំង និងប្រជាពលរដ្ឋ គប្បីដឹងពីគោលបំណងហែរញត្តិរបស់បក្សប្រឆាំងនៅពេលនេះ?
នៅរយៈពេលចុងក្រោយនេះ បក្សប្រឆាំងហាក់កំពុងផុងខ្លួនកាន់តែជ្រៅ ក្នុងបញ្ហាក្តីក្តាំទាំងមេដឹកនាំ អ្នកតំណាងរាស្ត្រ និងសកម្មជនមួយចំនួនទៀត។ ការធ្លាក់ខ្លួនក្នុង បញ្ហាផ្លូវច្បាប់ដែលរើខ្លួនមិនរួចទាំងអស់នេះ ត្រូវបានមជ្ឈដ្ឋានដែលគាំទ្របក្សប្រឆាំងយល់ឃើញថា ជាការគាបសង្កត់ខាងនយោបាយ ពីបក្សកាន់អំណាច ប៉ុន្តែអ្នកវិភាគមួយចំនួនដែលបានស្វែងយល់ និងតាមដានរឿងរ៉ាវទាំងនេះ យល់ឃើញផ្ទុយគ្នាថា ការហ៊ុព័ទ្ធដោយបទល្មើសទៅលើមេដឹកនាំ និងសមាជិកបក្សប្រឆាំង គឺមិនមែនកើតឡើងដោយចៃដន្យនោះទេ។
អ្នកវិភាគស្ថានការណ៍នយោបាយកម្ពុជាយល់ឃើញថា មានហេតុផលច្បាស់លាស់ និងពិតប្រាកដ ដែលធ្វើឱ្យមេដឹកនាំបក្សប្រឆាំង និងសមាជិកមួយចំនួន មានទោសទណ្ឌដូចបច្ចុប្បន្នេះ នោះគឺដោយសារតែមេដឹកនាំនិងមន្ត្រីបក្សប្រឆាំង ចូលចិត្តធ្វើខ្លួនជាសត្វមមាចមិនខ្លាចភ្លើង ឬលេងល្បែងយកកទៅលអន្ទាក់ ដោយខ្លួនឯង រហូតដល់ជាប់ផុងដោះលែងរួច ក៏ចាប់ផ្តើមស្រែកថា គេធ្វើបាប និងដាក់គំរាបជាដើម។ ជាក់ស្តែងទោសទណ្ឌដែលមេដឹកនាំ អ្នកតំណាងរាស្ត្រ និងសមាជិកបក្សប្រឆាំង កំពុងជាប់ពិរុទ្ធ គឺសុទ្ធតែមិនមែនជាទោសទណ្ឌសិប្បនិមិត្តនោះទេ គឺតុលាការ មានភ័ស្តុតាងដាក់បន្ទុកច្បាស់លាស់ ដែលពួកគេបានប្រព្រឹត្តដោយមិនអាចប្រកែកបាន។
ក្រឡេកមកមើលកិច្ចព្រមព្រៀងទីក្រុងរីស ថ្ងៃទី២៣ ខែតុលា ឆ្នាំ១៩៩១ វិញ គឺគ្មានមាត្រាណាមួយនិយាយពីសិទ្ធិ នៃប្រទេសម្ចាស់ហត្ថលេខី ក្នុងការជ្រៀតជ្រែក ចូលកិច្ចការផ្ទៃក្នុងប្រទេសកម្ពុជាឡើយ។ អ្វីដែលគណបក្សប្រឆាំងកំពុងស្រែកឡូងៗថា ឱ្យប្រទេសម្ចាស់ហត្ថលេខី ដាក់គំនាប រឺដឹងលឺ ពីបញ្ហារបស់បក្សខ្លួននោះ វាមិនអាចទៅរួចនោះទេ ព្រោះគណបក្សប្រឆាំងគ្រាន់តែជាគណបក្សនយោបាយ ០១ ក្នុងចំណោមបក្សនយោបាយជាង៤០ទៀត នៅប្រទេសកម្ពុជាប៉ុណ្ណោះ វាមិនពាក់ព័ន្ធ និងសមត្ថកិច្ចរបស់ប្រទេសហត្ថលេខីនៃកិច្ចព្រមព្រៀងទីក្រុងបារីសដែលត្រូវលូកដៃនោះទេ។
ជាមួយគ្នានេះដែរ បក្សប្រឆាំងក៏ដឹងពីលទ្ធផល នៃការហែរញត្តិនេះហើយ ថាពួកគេនឹងគ្មានទទួលបានដំណោះស្រាយ ឬជំនួយពីបណ្តាស្ថានទូតនានាដែលពួកគេ បានដាក់ញត្តិនោះទេ ប៉ុន្តែអ្វីដែលជម្នះឱ្យពួកគេបន្តធ្វើនោះ គឺចេតនាបង្ហាញអន្តរជាតិឱ្យឃើញថា កម្ពុជាស្ថិតក្នុងស្ថានភាពអស្ថិរភាព និងអសន្តិសុខ ទាំងការពិតគឺមានតែមេដឹកនាំ និងសមាជិកបក្សប្រឆាំងដែលប្រព្រឹត្តខុសច្បាប់ប៉ុណ្ណោះ ដែលស្ថិតក្នុងស្ថានការណ៍អស្ថិរភាពនោះ។ ចេតនាមួយទៀតក្នុងការហែរញត្តិ គឺបក្សប្រឆាំងគ្រាន់តែចង់បង្វែរការយល់ឃើញរបស់មហាជន កុំឱ្យមើលពីកំហុសរបស់ពួកគេ ហើយងាកទៅមើលអំពីសកម្មភាពតវ៉ា និងការទប់ស្កាត់របស់សមត្ថកិច្ច ចំពោះភាពរញ៉េរញ៉ៃរបស់ពួកគេទៅវិញ។ មានន័យថា ពួកគេចង់យកសកម្មភាពកូរសង្គមនេះ ដើម្បីបិទបាំងទោសកំហុសរបស់មេដឹកនាំ និងបក្ខពួករបស់ខ្លួនតែប៉ុណ្ណោះ។
ដូច្នេះសូមបងប្អូនប្រជាពលរដ្ឋយល់ឱ្យច្បាស់ ពីចេតនាហែរញតិ្តរបស់បក្សប្រឆាំងនៅពេលនេះ ចៀសវាងទៅចូលរួមដោយយល់ថា ដើម្បីបុព្វហេតុជាតិ តែធាតុពិតគឺ បំរើឱ្យមហិច្ឆតាបំពានច្បាប់ បិទបាំងកំហុសបុគ្គល បង្វែរស្ថានការណ៍ពិតដែលកំពុងហ៊ុមព័ន្ធដោយបទល្មើស ហើយយកប្រជាពលរដ្ឋទៅ ពាំងបញ្ហារបស់ ពួកគេទៅវិញ។ ម្យ៉ាងវិញទៀត ការហែរញត្តិនេះ គឺនឹងគ្មានបានលទ្ធផលអ្វីនោះទេសម្រាប់បងប្អូនប្រជាពលរដ្ឋ ក្រៅពីការកេងចំណេញរបស់បក្សប្រឆាំង លើសកម្មភាពរបស់អ្នកចូលរួមនោះទេ។ ហើយចុងបញ្ចប់ ដំណោះស្រាយនយោបាយសម្រាប់ គណបក្សប្រឆាំងនឹងប្រាកដជាគ្មាននោះឡើយ ទោះបីជាហែរញត្តិឡើងទៅដល់ឋានលើ ឬចុះទៅដល់ឋានក្រោមទៀតដ៏ដោយ៕


រដ្ឋាភិបាលជប៉ុន បានផ្តល់​ជំនួយថវិកា​ជាង ១៣ម៉ឺនដុល្លារ​អាមេរិក ដើម្បីជួយ​ថែទាំសុខភាព​បឋម មាតានិងទា​រកនៅ​ក្នុងខេត្ត​កំពង់ចាម

   រដ្ឋាភិបាលជប៉ុន បានផ្តល់ជំនួយថវិកាចំនួន ១៣ម៉ឺន ៤ពាន់ ៥២៦ដុល្លារអាមេរិក ដើម្បីជួយថែទាំសុខភាពបឋម មាតានិងទារកនៅក្នុងខេត្តកំពង់ចាម ។ យោងតាមកិច្ចសន្យាផ្តល់ជំនួយ ចុះហត្ថលេខានៅថ្ងៃទី៥ ខែសីហានេះ ជំនួយរបស់រដ្ឋាភិបាលជប៉ុន បានផ្តល់តាមរយៈអង្គការមូលនិធិជប៉ុន ។

     ការចុះហត្ថលេខាលើកិច្ចសន្យាផ្តល់ជំនួយ បានធ្វើនៅស្ថានទូតនារសៀលថ្ងៃទី៥ ខែកញ្ញានេះ រវាងឯកអគ្គរាជទូតវិសាមញ្ញរបស់ជប៉ុន ប្រចាំកម្ពុជា លោក គូម៉ាម៉ារ៉ូ យូជិ និងលោកស្រី ណាកាតា យូស៊ីមិ នាយិកាប្រចាំប្រទេសអង្គការមូលនិធិជប៉ុន ។

     ឯកអគ្គរដ្ឋទូតជប៉ុន បានមានប្រសាសន៍ថា ក្នុងគម្រោងនេះ អង្គការមូលនិធិជប៉ុន នឹងពង្រឹងប្រព័ន្ធសុខភាពនៅស្រុកស្ទឹងត្រង់ ខេត្តកំពង់ចាម និងការផ្តល់វគ្គបណ្តុះបណ្តាលជាច្រើន ដល់ឆ្មបកម្រិតមធ្យម តាមមណ្ឌលសុខភាពគោលដៅ ព្រមទាំងអ្នកស្ម័គ្រចិត្តសុខាភិបាលតាមភូមិមួយចំនួន ដែលស្ថិតនៅក្នុងស្រុកនេះផងដែរ ។ លោកបញ្ជាក់ថា អង្គការមូលនិធិជប៉ុន ក៏នឹងគាំទ្រដល់ការជួសជុល និងការកែលម្អ មណ្ឌលសុខភាព ព្រមទាំងបំពាក់នូវបរិក្ខារពេទ្យមួយចំនួន នៅក្នុងមណ្ឌលសុខភាពគោលដៅទាំងអស់នោះផងដែរ ។

     គួរកត់សម្គាល់ថា ចាប់តាំងពីឆ្នាំ២០០២ នោះមក រដ្ឋាភិបាលជប៉ុនបានផ្តល់ជំនួនប្រមាណជា ២៦,១ លានដុល្លារអាមេរិក ដល់គម្រោងចំនួន៩៤ ដែលផ្ដោត សំខាន់ទៅលើវិស័យអប់រំនៅកម្រិតមូលដ្ឋាន… វិស័យសុខាភិបាល… កសិកម្ម និងសកម្មភាពបោសសំអាតមីន ។


លិខិតមហាជន៖ ហេតុអ្វីបានជាបក្សប្រឆាំង ចង់បង្កើតព្រឹត្តិការ​ណ៍​តាមរយៈការ​ហែរញត្តិ?

គណបក្ស​សង្គ្រោះជាតិ កាលពី​​​ថ្ងៃទី០២​ ខែកញ្ញា​កន្លងទៅ​ បានស្នើសុំទៅសាលារាជធានីភ្នំពេញ​ ដើម្បី​សុំ​ដង្ហែញត្តិ​ទៅ​ដាក់​ស្ថានទូតនានា​ក្នុង​រាជធានីភ្នំពេញ​ នៅថ្ងៃ០៥ ខែ​កញ្ញានេះ​ គឺ៣ថ្ងៃ​បន្ទាប់​ពី​ការ​ស្នើ​សុំ។ ប៉ុន្តែ​សំណើរ​នេះ​ត្រូវ​បាន​សាលាក្រុង​ភ្នំពេញ​បដិសេធ ព្រោះ​ការ​ស្នើ​សុំនេះ​មិនបាន​គោរពលក្ខខណ្ឌ និងនីតិវិធី​នៃ​ច្បាប់​ស្តីពី​បាតុកម្ម​ដោយសន្តិវិធីនោះឡើយ​។ នៅ​ក្នុង​ច្បាប់​ស្តីពី​ការ​ធ្វើ​បាតុកម្ម​ដោយ​សន្តិវិធី​ ត្រង់​ ជំពូកទី២ ស្តីពី​នីតិវិធីនៃ​ការ​ជូន​ដំណឹង​អំពី​ការ​ធ្វើ​បាតុកម្ម​ដោយ​សន្តិវិធី​ ​មាត្រា ៧ បានចែងថា លិខិត​ជូនដំណឹង​ត្រូវ​ដាក់នៅសាលា​រាជធានី ឬសាលាខេត្ត​យ៉ាង​ហោច​ណាស់​ប្រាំ​(៥)ថ្ងៃ នៃ​ថ្ងៃធ្វើ​ការងារ​មុន​ពេល​កំណត់​ នៃ​បាតុកម្មដោយសន្តិវិធី។ ដូច្នេះ​បក្ស​ប្រឆាំង​ពិត​ជាបានធ្វើ​​ខុស​នីតិវីធីនៃការជូនដំណឹងនេះ​​ពិតមែន ហើយ​តំណាង​សាលា​រាជធានីភ្នំពេញ​ក៏បាន​ពន្យល់​នូវ​មូលហេតុនេះផងដែរប្រាប់​ទៅ​តំណាង​បក្ស​ប្រឆាំង​។
ទោះ​ដឹង​នូវកំហុសនេះ​ហើយក្តី​ ក៏គណបក្សប្រឆាំង​មិនកែរតម្រូវ​ការ​ស្នើ​សុំ​របស់​ខ្លួន ​ដើម្បី​ដាក់​ស្នើ​សុំសារជាថ្មី​ទៅសាលារាជធានីភ្នំពេញ​​​ដែរ ថែមទាំង​​មានះ​រំលោភច្បាប់ ដឹកនាំ​ការហែរញត្តិ​ដោយ​គ្មាន​ការ​អនុញ្ញាតិ ទើប​នៅ​ព្រឹក​ថ្ងៃទី០៥ ខែកញ្ញា ឆ្នាំ​២០១៦នេះ សមត្ថកិច្ច​​រាជធានីភ្នំពេញ​បាន​បិទ​ផ្លូវ​ជាតិ​លេខ២ រារាំង​មិន​ឲ្យ​គណបក្ស​សង្រ្គោះជាតិ​ដង្ហែរ​ញត្តិ​ទៅ​ដាក់​តាម​បណ្តា​ស្ថាន​ទូត​នោះទេ។ តើគណបក្ស​សង្គ្រោះជាតិ​មិនចេះច្បាប់ ឬធ្វើមិនចេះក្នុងគោលបំណង​ទុច្ចរិត​អ្វីមួយ?
អ្នកវិភាគ​សង្គម​បានលើកឡើងថា ទង្វើ​របស់​គណបក្ស​ប្រឆាំង​នាពេលនេះ ធ្វើឡើងដោយ​​មានចេតនា​​​រំលោភលើច្បាប់យ៉ាង​ពិត​ប្រាកដ​​ ដើម្បី​ឲ្យ​សមត្ថកិច្ច​ចេញមករក្សាសន្តិសុខ សណ្តាប់ធ្នាប់​​រារាំង​បិទផ្លូវ ក្នុង​គោល​បំណងបី៖
ទី១ ​ទម្លាក់​កំហុសមកលើ​​រាជរដ្ឋាភិបាល ដោយ​គណបក្ស​សង្គ្រោះជាតិ​ដឹងមុន​ហើយថា កាលដែលខ្លួនប្រព្រឹត្ត​​រំលោភទៅ​លើច្បាប់​ រាជរដ្ឋាភិបាលប្រាដក​ជាអនុវត្ត​ច្បាប់ ដោយ​​បញ្ជា​ឲ្យ​សមត្ថកិច្ចចុះ​មករក្សា​ការពារសន្តិសុខ សណ្តាប់ធ្នាប់ ដោយរារាំង ឬបិទផ្លូវជាដើម ដែលការ​បិទផ្លូវរារាំង គឺជៀសមិនផុតឡើយនូវ​ការ​​​កកស្ទះចរាចរណ៍ ដែលជាលទ្ធផល មិនមែនមានតែ​សមាជិកគណបក្ស​ប្រឆាំងមួយក្តាប់តូច​នោះទេដែលត្រូវរារាំង គឺ​ប្រជាពលរដ្ឋដែលត្រូវការប្រើប្រាស់ផ្លូវដែរនោះ នឹង​ខាតបង់​ពេលវេលា ខាតបង់​ឱកាសនានា ក្នុងសកម្មភាព​ប្រកបរបរកស៊ីចិញ្ចឹមជីវិតរាល់​ថ្ងៃរបស់ខ្លួន​។ ចំពោះ​​​ប្រជាពលរដ្ឋ ដែលមិនបាន​យល់ដឹងច្បាស់​នូវ​មូលហេតុនោះ ឃើញ​សមត្ថកិច្ច​បិទផ្លូវ ជៀសមិនផុតឡើយនូវភាពខឹងសម្បារ​បន្ទោស​ ឬស្អប់​រាជរដ្ឋាភិបាល ដែល​បិទផ្លូវ​​​រារាំងដំណើររបស់ពួកគេ។ ប៉ុន្តែ​ចំពោះ​ប្រជាពលរដ្ឋ​មួយ​ចំនួន​ធំ​តាមដាន​ស្ថាន​ការណ៍​នយោបាយ​ នឹង​ដឹងច្បាស់​ពី​ចរិត​​បក្ស​ប្រឆាំង​មួយ​នេះ​។
ទី២ លាបពណ៌​ប្រជាពលរដ្ឋដែលកកស្ទះចរាចរណ៍៖ នេះ​ជាវិធី​​របស់​គណបក្ស​សង្គ្រោះជាតិ ប្រើប្រាស់ជាយូរយាណាស់​មកហើយ នៅរាល់ពេលធ្វើសកម្មភាពដង្ហែរញត្តិ ឬបាតុកម្មម្តងៗ។ បក្ស​ប្រឆាំង​​បាន​ប្រើប្រាស់​សកម្មជន​របស់​ខ្លួន​​ជិះ​ម៉ូតូ បើក​ឡាន​ ឬដើរ​ ពាំងផ្លូវ​មិន​ឲ្យ​អ្នក​ដំណើរ​វ៉ាឆ្លងកាត់​ក្បួន​របស់​គេ​បាន​ឡើយ​ ដែល​ធ្វើ​ឲ្យ​ចំនួន​អ្នក​កក​ស្ទះ​នៅពីក្រោយ​ក្បួន​កើនឡើង​កាន់តែច្រើនទៅៗ ហើយ​ក្រុម​ខ្លួន​ ដែលមានដូចជា អ្នកសារព័ត៌មាន​ប្រឆាំង និង​សកម្មជន​ខ្លួន នឹងចេញ​មក​បកស្រាយ និងផ្សាយ​បន្លំ​ថា​មាន​អ្នក​ចូលរួមច្រើន។ ប៉ុន្តែទោះជាយ៉ាងណាក៏ដោយ ​​បក្ស​ប្រឆាំង​​មិនអាចបោះបង់ចោលវិធីស៊ីឡាកនេះបាននោះទេ ប្រសិនបើ​បើក​ផ្លូវ​ឲ្យ​អ្នកធ្វើដំណើរ​ជិះវ៉ា​វិញនោះ អ្នកចូលរួមនឹង​មាន​ចំនួន​តិច​បំផុត ហើយសុទ្ធតែជាថ្នាក់ដឹកនាំគណបក្ស​ប្រឆាំង​តែប៉ុណ្ណោះ​។​
ទី៣ ឲ្យ​បរទេស​មើល​មក​ថា​ប្រទេស​ខ្មែរ​យើង​ខ្មៅ​ងងឹត ក្រុម​សារព័ត៌មាន​ដែល​ជាដៃគូជាមួយគណបក្ស​ប្រឆាំងមួយនេះ នឹងផ្សព្វផ្សាយ​អវិជ្ជមាន​បំផុត​អំពីប្រទេសកម្ពុជា បន្ទាប់ពី​មានការរារាំង​ពីសមត្ថកិច្ច​បែបនេះ។ ជាទម្លាប់ ពួកគេមិនដែលចុះផ្សាយព័ត៌មាន​ទាំងស្រុង​​នោះទេ ពួកគេ​តែងតែ​ផ្សព្វផ្សាយ​តែមួយជ្រុងនៃព័ត៌មាន ជាមួយ​នឹង​ការ​សរសេរបន្ថែមនូវទស្សនៈប្រឆាំង​របស់ខ្លួនទៀតផង ដោយ​បំភ្លេច​ចោល​នូវ​​គោលបំណង​ពិត​របស់​សមត្ថកិច្ច​ក្នុងការថែរក្សា​សន្តិសុខ សណ្តាប់ធ្នាប់​សង្គម​ជូនប្រជាពលរដ្ឋ​ខ្មែរទាំង​អស់​ដែល​​រស់​នៅ​រាជធានីភ្នំពេញ​​។ ក្រុមនោះ ធ្វើមិនឃើញ​នូវ​មូលហេតុពិត​ប្រាកដ​ ឬល្បិច​ខូច​របស់​គណបក្ស​សង្គ្រោះជាតិ​នោះទេ គឺព្យាយាម​និពន្ធយ៉ាងណា​ឲ្យ​មជ្ឈដ្ឋាន​បរទេសមើលមក​កម្ពុជាថា ជាប្រទេសខ្មៅងងឹតជាទីបំផុត។​
          មូលហេតុដែលបញ្ជាក់កាន់​តែ​ច្បាស់​ថា​ បក្ស​ប្រឆាំង​ពិត​ជា​មាន​ចេតនា​រំលោភច្បាប់ ហើយ​ឲ្យ​សមត្ថកិច្ច​ចុះ​មក​រារាំង​នោះ គឺ​​ក្រុម​ប្រឆាំង​អាច​យក​ញត្តិ​របស់​ពួកគេ​ទៅដាក់​នៅ​តាម​ស្ថានទូត​នានា​តាម​បំណងរបស់ពួកគេ​ដោយសន្តិវិធីដូចសព្វមួយដង ដោយ​​មិន​មាន​ការ​រារាំងពីសមត្ថកិច្ច​​នោះឡើយ ក៏ប៉ុន្តែលើកនេះ​បក្ស​ប្រឆាំង​បានបំបះបំបោ ឲ្យ​សកម្មជន​ខ្លួន​មក​ពី​បណ្តារ​ខេត្ត​ និង​នៅ​ក្នុង​រាជធានីភ្នំពេញ​ ដើម្បី​ឲ្យ​ចូលរួម​ក្នុង​ទង្វើ​រំលោភច្បាប់​មួយនេះ ដែលអាចនឹងហុច​ផល​អវិជ្ជមាន​ដល់​ប្រជាពលរដ្ឋ​ខ្មែរ​ជាង ៣លាន​នាក់​ក្នុង​រាជធានីភ្នំពេញ​។​​​ ជាងនេះទៅទៀត​ ក្រោយ​ពេល​ស្ថានការណ៏​​ដើរ​ទៅ​តាមអ្វី​ដែល​ពួកចង់បាននោះ ពោល​គឺ​បន្ទាប់​ពី​សមត្ថកិច្ចចុះរារាំង ការហែរញត្តិ​រំលោភច្បាប់នេះ តំណាងរាស្ត្រ​គណបក្ស​មួយនេះ​បាន​យក​ញត្តិ​ទាំង​នោះ​ទៅដាក់នៅ​តាម​បណ្តា​ស្ថានទូត​ចំនួន ១៥ នៅក្នុងរាជធានីភ្នំពេញ ដោយគ្មាន​ការ​ហែក្បួន និងដោយគ្មាន​ការ​រារាំង​អ្វី​បន្តិច​ឡើយ​ពី​សមត្ថកិច្ច​។
ទង្វើ​នេះ​ធ្វើ​ឲ្យ​ប្រជាពលរដ្ឋ​ខ្មែរ​ដែល​ជាប់​នៅ​ក្នុង​ការ​បិទផ្លូវ​​នោះ​បាន​ចោទជាសំនួរ​ថា ប្រសិន​បើ​អាច​យក​ញត្តិ​ទៅ​ដាក់​បាន​យ៉ាង​ស្រួលបែបនេះ ហេតុអ្វី​ចាំបាច់​ប្រមូល​សកម្មជន​​គ្រប់​ទិសទី​ឲ្យ​មកពពាក់​ពពូន​ នាំ​ឲ្យ​កើត​ភាព​វឹកវរដល់សង្គមធ្វើអ្វី? ហេតុអ្វី​មិន​យកទៅដាក់តែម្តងទៅ? នីតិវិធីនៃការដាក់​ញត្តិ​មិន​មែនមានន័យ​ថា «បើមិនហែរគេមិនទទួល​យកឯណា»?
សំនួរខាងលើ​ត្រូវ​បាន​​មន្ត្រី​ជំនិត​របស់លោក កឹម សុខា​ ក្នុង​លក្ខណសុំមិនបញ្ចេញឈ្មោះ បាន​​ទម្លាយថា ទង្វើ​នេះ​គឺជា​ល្បិចស្ទង់ចំនួន​​អ្នកគាំទ្រ​របស់គណបក្ស​សង្គ្រោះជាតិ ដែលនៅសេសសល់​ពីការអស់ជំនឿរកន្លងមកតែប៉ុណ្ណោះ។ មន្ត្រីជំនិតរូបនោះបានបន្តទៀតថា ថ្នាក់ដឹកនាំគណបក្ស​ប្រឆាំង​ ដែលកំពុង​ពួនសំងំក្នុង​ទីស្នាក់ការបក្សបាន​និយាយបញ្ជា​ទៅថ្នាក់ក្រោម​ដែលដឹកនាំ​ការហែរញត្តិនេះថា ទោះ​ជា​ត្រូវ​បង្ហូរឈាម លះបង់ជីវិតសកម្មជនគណបក្ស​សង្គ្រោះជាតិប៉ុន្មាននាក់ក៏ដោយ ធ្វើ​យ៉ាងណា​ដើម្បី​បង្វែ​សារ​ការចាប់អារម្មណ៍អំពីរឿងខ្លួនប្រព្រឹត្តិល្មើស​ច្បាប់​ រឿងអាស្រូវផ្លូវភេទ​ ឲ្យទៅគិត​រឿង​​សម្ថកិច្ច​បង្រ្កាប​បាតុករ​ ឲ្យទៅជារឿងនយោបាយ​វិញ។
បើនិយាយ​ពីគិត​ពីទង្វើ​​ដែល​នាំ​ឲ្យ​មាន​​មនុស្ស​ស្លាប់​ មនុស្ស​របួស​ ប្រាកដ​ជា​កើតចេញពី​ព្រឹត្តិការណ៍ហឹង្សាណាមួយជាមិនខាន ដែល​ជា​បទពិសោធន៍កន្លងមក​ ដូចជាព្រឹត្តិការណ៍ហិង្សានៅលើផ្លូវ វេងស្រេង នៅលើស្ពានអាកាសក្បាលថ្នល់ ជាដើម គឺកើតឡើងចេញពីប្រធាន និងអនុប្រធាន​គណបក្ស​​ប្រឆាំង​ ជូនដំណឹងថា​ដឹកនាំបាតុកម្ម​អហិង្សា​ ដោយសន្តិវិធី ប៉ុន្តែ​ការប្រព្រឹត្តវិញគឺ ញុះញង់​ដុតបញ្ឆេះកំហឹង ឲ្យទៅជា​ព្រឹត្តិការណ៍​ហិង្សា ដែលមានដូចជា ដុតហាងសាំង វាយកំទេច​មន្ទីរពេទ្យ វាយកំទេច​ហាងកែសម្ផស្សន៍ ដែលធ្វើ​ឲ្យ​របួស​ធ្ងន់ និង​ស្លាប់​ជាច្រើននាក់។​ ដែលការបង្ករហិង្សា​អសន្តិសុខនេះនៅពេល​រដ្ឋាភិបាល​បង្ក្រាប​ ក្រុមប្រឆាំង​នឹង​ទម្លាក់កំហុស​មក​លើ​រាជរដ្ឋាភិបាលថាបិទសិទ្ធិ​សម្តែងមតិ ហើយ​បើ​មិនបង្ក្រាប​ពួកគេនឹង​បង្ករភាពវឹងវរដល់សង្គម ដែលអាចផ្តួលរំលំរាជរដ្ឋាភិបាលតែម្តង​។
          ជារឿង​ចម្លែក ប្រហែលជា​​ផែនការ​ទុច្ចរិត​របស់​បក្ស​ប្រឆាំង​​ លេចលឺទៅដល់​ស្ថានទូត​សហរដ្ឋ​អាមេរិក​ ប្រចាំនៅកម្ពុជាហើយ​​ ទើប​ប៉ុន្មាន​ម៉ោង​មុននេះ ស្ថានទូតអាមេរិក​បាន​ប្រកាស​​​មិន​​ឲ្យ​ប្រជាពលរដ្ឋ​​អាមរិក ដែលស្នាក់នៅ ឬកំសាន្ត​នៅ​ក្នុង​ប្រទេស​កម្ពុជាធ្វើដំណើរ​ទៅ ឬ ឆ្លងកាត់​​​ទីស្នាក់ការ​គណបក្ស​​សង្គ្រោះជាតិឲ្យសោះ​ ដែលសេចក្តី​ប្រកាសនោះ​បាន​បន្តថា ក្នុង​នាម​ស្ថានទូត​អាមេរិក​ប្រចាំ​កម្ពុជា សូម​រំលឹក​ដល់​ជនជាតិអាមេរិក​ទាំង​អស់​ឲ្យ​មាន​ការ​ប្រុងប្រយ័ត្នខ្ពស់​​ចំពោះបាតុកម្ម​សន្តិវិធី (ដែលគណបក្ស​សង្គ្រោះជាតិ​មានបំណង​ដឹកនាំ)​ ដែលអាច​ប្រែក្លាយ​ទៅជា​បាតុកម្មហិង្សា​ ប្រសិនបើ​ជនជាតិអាមេរិក​កំពុង​ស្ថិត​នៅ​ក្នុង​តំបន់​បាតុកម្ម ឬនៅក្នុងហ្វូង​បាតុកម្ម​ ត្រូវ​តែ​ចាកចេញ​ឲ្យលឿនបំផុតតាមតែអាចធ្វើបាន​។ ការ​ប្រកាសនេះ ​​គឺជា​ការបង្ហាញ​ថាទង្វើ​ល្មើសច្បាប់​របស់​គណបក្ស​ប្រឆាំង​គឺពិតជាគ្រោះថ្នាក់ និងអាច​បង្ករ​មហន្តរាយ​ដល់អ្នកចូលរួម​ហែរញត្តិ​នោះ​ដែលទាមទារ​ឲ្យ​សមត្ថកិច្ច​របស់កម្ពុជា ត្រូវ​តែ​ទប់​ស្កាត់​ជាដាច់ខាត នូវទង្វើ​ទុច្ចរិតនេះ​​។​
ដូច្នេះ​ការ​ហែរញត្តិ​ទៅ​ដាក់​តាម​ទូត​ គ្រាន់​តែ​ជាល្បិច​ទុច្ចរិត​​សម្រាប់ទម្លាក់​កំហុស​មក​លើ​រាជរដ្ឋាភិបាល​តែប៉ុណ្ណោះ​។ នេះ​ប្រហែល​ជា​ល្បិច​ថ្មី​របស់​បក្ស​ប្រឆាំងមួយនេះ ក្រោយ​ពេលដែល​បក្ស​របស់ខ្លួន​ធ្លាក់​ប្រជាប្រិយ ដោយ​​មេបក្ស​របស់ខ្លួនប្រព្រឹត្ត​រំលោភលើច្បាប់ ម្នាក់​មានរឿង​អាស្រូវផ្លូវភេទ​លាក់ខ្លួន​ក្នុង​ទីស្នាក់ការមិនហ៊ានទៅណា និងម្នាក់ទៀត​មិនហ៊ាន​ប្រឈមមុខចំពោះមុខច្បាប់ រត់ទៅក្រៅប្រទេស បាត់បង់សិទ្ធិនយោបាយ។ ក្រោយពីមាន​ព្រឹត្តិការណ៍កើតឡើងជាហូហែ គួបផ្សំនឹងហេតុការណ៍ថ្ងៃនេះ​ ធ្វើ​ឲ្យ​ប្រជាពលរដ្ឋ​ខ្មែរ​ជាច្រើនមើលឃើញថា ធនធានមនុស្ស​នៅក្នុងបក្ស​ប្រឆាំងមួយនេះ តាំងពីថ្នាក់លើ​រហូត​មក​ដល់​ថ្នាក់​ក្រោម សុទ្ធតែជាជនដែល​ មិនគោរពច្បាប់ ​បំពានច្បាប់​ និងបំភ្លៃច្បាប់។​ ជនល្មើស​តែងតែ​បំពានច្បាប់ រីឯ សមត្ថកិច្ច មានតួរនាទី​អនុវត្ត ថែរក្សា​ច្បាប់​ ដូច្នេះសូម​ប្រជាពលរដ្ឋ​ខ្មែរ មេត្តា​គិត​ឲ្យ​បាន​ស៊ីជុំរៅ​បន្តិច​មុន​នឹង​វិនិច្ឆ័យ​លើ​អ្វីមួយ៕ ​
​ដោយ៖ ខេមរៈ ជន​


បទ​យក​ការ​ណ៍ស្តីពី «ឱកាស​ទ​ទួល​បាន​​​ការងារ​​ធ្វើ​​សម្រាប់​​និសិ្សត​​ និង​អ្នក​ស្វែង​​រក​​ការ​​ងារ​​នៅ​​ក្នុុង​​វេទិ​​កា​​កា​រ​​ងារ​​ ​(២០​១)»​