នៅរសៀលថ្ងៃច័ន្ទ ទី១៧ ខែសីហា ឆ្នាំ២០១៥នេះ ព្រឹទ្ធសភាបានបើកសម័យប្រជុំពេញអង្គ លើកទី៧ នីតិកាលទី៣
ក្រោមអធិបតីភាពរបស់ ឯកឧត្តម នៃ ប៉េណា ប្រធានស្តីទីព្រឹទ្ធសភានៃព្រះរាជាណាចក្រកម្ពុជា។
នៅក្នុងសម័យប្រជុំពេញអង្គនោះ មានសមាជិកព្រឹទ្ធសភាចូលរួមចំនួន៤៧នាក់
ហើយរបៀបវារៈមានតែ មួយគត់គឺពិនិត្យ និងសម្រេចលើរបាយការណ៍របស់ក្រសួងមានសមត្ថកិច្ច
អំពីករណីឈ្មោះ ហុង សុខហួរ សមាជិកព្រឹទ្ធសភា មណ្ឌលភូមិភាគទី៤។
សម័យប្រជុំពេញអង្គនោះធ្វើឡើងអនុលោមតាមមាត្រា១១១ថ្មី
(ពីរ) នៃរដ្ឋធម្មនុញ្ញ និងប្រការ៤២ នៃបទបញ្ជាផ្ទៃក្នុងព្រឹទ្ធសភា និងអាស្រ័យដោយមានសំណើពីសមាជិកព្រឹទ្ធសភាចំនួន
១១រូប (ច្រើនជាងមួយភាគដប់) ព្រឹទ្ធសភាបានអនុម័តដំណើរការប្រជុំជាសម្ងាត់។ ដោយអនុវត្តតាមមាត្រា
១០៤ថ្មី នៃរដ្ឋ ធម្មនុញ្ញ មាត្រា១២ និង១៣ នៃច្បាប់ស្តីពីលក្ខន្តិកៈសមាជិកព្រឹទ្ធសភា
ព្រមទាំងប្រការ ៦៤ និង៦៥ នៃបទបញ្ជាផ្ទៃក្នុងព្រឹទ្ធសភា អង្គព្រឹទ្ធសភាបានដំណើរការបោះឆ្នោតជាសម្ងាត់
ដើម្បីបញ្ចេញមតិផ្អាក ការ ឃុំខ្លួន ការចោទប្រកាន់ ឈ្មោះ ហុង សុខហួរ សមាជិកព្រឹទ្ធសភា
មណ្ឌលភូមិភាគទី៤ ហើយជាលទ្ធផល គឺផ្អាកសូន្យសម្លេង និងមិនផ្អាក៤៧សម្លេង។
បើយោងតាមមាត្រា ១៣ នៃច្បាប់ស្តីពីលក្ខន្តិកៈសមាជិកព្រឹទ្ធសភាបញ្ញត្តិថា
ក្នុងករណីទាំងអស់ខាងលើ នេះ ការឃុំខ្លួន ការចោទប្រកាន់សមាជិកព្រឹទ្ធសភាណាមួយត្រូវផ្អាក
ប្រសិនបើព្រឹទ្ធសភាបញ្ចេញមតិឱ្យ ផ្អាក តាមមតិភាគច្រើនបីភាគបួន នៃចំនួនសមាជិកព្រឹទ្ធសភាទាំងមូល។
ឆ្លងតាមលទ្ធផលនៃការបោះ ឆ្នោតខាងលើនេះ ព្រឹទ្ធសភាបានបញ្ចេញមតិ មិនផ្អាក ការឃុំខ្លួន
ការចោទប្រកាន់ឈ្មោះ ហុង សុខហួរ សមាជិកព្រឹទ្ធសភា មណ្ឌលភូមិភាគទី៤ឡើយ។
