មន្ត្រីជំនាញដែលកំពុងអនុវត្តគម្រោងវារីអគ្គីសនីស្ទឹងតាតៃ
ដែលមានទីតាំងស្ថិតនៅក្នុងខេត្តកោះកុង បានបញ្ចេញប្រតិកម្មខ្លាំងៗ
តបទៅនឹងអត្ថបទបំភ្លើសរបស់សារព័ត៌មាន The Cambodia Daily
ដែលបានចុះផ្សាយកាលពីថ្ងៃទី ១៩ វិច្ឆិកា ឆ្នាំ២០១៤ (ជាភាសាខ្មែរ) និង ថ្ងៃទី ២១ ខែ វិចិ្ឆកា ឆ្នាំ ២០១៤ ស្តីពីគម្រោងវារីអគិ្គសនីស្ទឹងតាតៃ ដោយមន្ត្រីជំនាញរូបនោះ
បានរិះគន់ចំៗថា The Cambodia Daily ផ្សព្វផ្សាយមិនគោរពឲ្យបានត្រឹមត្រូវតាមវិជ្ជាជីវៈ
និងផ្សាយព័ត៌មានភូតកុហក
ដែលអាចនឹងនាំឲ្យប្រជាពលរដ្ឋទូទៅមានការភ័ន្តច្រឡំ។
មន្ត្រីជំនាញ បានឲ្យដឹងថា គម្រោងវារីអគិ្គសនីស្ទឹងតាតៃ នៅក្នុងខេត្តកោះកុង មានកម្លាំង ២៤៦
មេហ្កាវ៉ាត់ បច្ចុប្បន្នកំពុងស្ថិតក្នុងដំណើរការសាកល្បង គឺមិនទាន់រួចរាល់សម្រាប់ដាក់ឲ្យដំណើរការជាផ្លូវការនៅឡើយទេ ហើយថា គម្រោងនេះ គ្រោងនឹងដាក់ឲ្យដំណើរការនៅចុងឆមាសទី១
ឆ្នាំ ២០១៥ ខាងមុខ។
មន្ត្រីរូបនេះ
បានបន្តថា « ដូចនេះ រាជរដ្ឋាភិបាលមិនមានការបាត់បង់ប្រាក់ប្រមាណ ៧៤លានដុល្លារអាមេរិក ដូចដែលសារព័ត៌មាន The Cambodia Daily បានចុះផ្សាយនោះឡើយ
» ហើយរូបគាត់ក្នុងនាមជាអ្នកជំនាញ ដែលសិក្សាផ្ទាល់អំពីបញ្ហានេះ
សូមបដិសេធព័ត៌មានដែលបានចុះផ្សាយ ដោយគ្រាន់តែយោងសំដីរបស់ លោក ជា ស៊ីថា
អនុប្រធានក្រុមហ៊ុន Brightway Group ដែលនិយាយដោយគ្មានមូលដ្ឋាន
និងខ្វះការទទួលខុសត្រូវ ។
និយាយជារួម
មន្ត្រីជំនាញរូបនេះ បានសំដែងនូវការសោកស្ដាយជាខ្លាំងចំពោះសារព័ត៌មាន The Cambodia Daily និងថាសារព័ត៌មាននេះ បានចុះផ្សាយព័ត៌មានរបស់ខ្លួន
បំពុលសាធារណមតិ ដោយពុំបានធ្វើការផ្ទៀតផ្ទាត់ឲ្យបានត្រឹមត្រូវជាមុន»
ក្នុងបំណងបង្ខូចកិត្តិយស និងសេចក្តីថ្លៃថ្នូររបស់រាជរដ្ឋាភិបាល។
បើទោះបីជាមន្ត្រីជំនាញរូបនេះ
មិនបានទាមទារឲ្យសារព័ត៌មាន The Cambodia Daily ធ្វើការផ្សព្វផ្សាយកែតម្រូវអត្ថបទរបស់ខ្លួនឡើងវិញក្តី ប៉ុន្តែ
សារព័ត៌មានមួយនេះ គួរគប្បីបញ្ឈប់នូវការភូតកុហក សាធារណៈមតិ ដោយមន្ត្រីជំនាញបានបញ្ជាក់
ថា បរិមាណអគ្គិសនីដែលបានមកពីប្រភពវារីអគ្គិសនី តែងតែមានការប្រែប្រួលតាមបរិមាណទឹកដែលមានជាធម្មតា។
ដូចនេះ ដើម្បីបំពេញតម្រូវការអគ្គិសនីជាក់ស្ដែងឲ្យបានគ្រប់គ្រាន់នូវរដូវប្រាំង អាចធ្វើឲ្យមានការលើសនូវរដូវវស្សា។
ហេតុនេះ មន្ត្រីជំនាញ បានចាត់ទុកចេតនាដែលភ្ជាប់ការលើសអគ្គិសនីនៅរដូវវស្សាជាមួយការអះអាងរបស់
The Cambodia Daily ពីការ ខាត បង់ថវិការរដ្ឋដល់ទៅ ៧៤លានដុល្លារអាមេរិក
គឺជាការសន្និដ្ឋានមួយដែលបំរើឲ្យនយោបាយក្រុមប្រឆាំង
និងពុំបានគោរពនូវវិជ្ជាជីវៈរបស់ខ្លួន៕