នៅព្រឹកថ្ងៃទី ២៣ ខែកញ្ញា ឆ្នាំ២០១៥ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានអនុញ្ញាតឲ្យលោកស្រី រូណា ស្ម៊ីត ដែលត្រូវបានតែងតាំងជាអ្នករាយការណ៍ពិសេសថ្មី ពីស្ថានភាពសិទ្ធិមនុស្សនៅកម្ពុជារបស់អង្គការសហប្រជាជាតិ ចូលពិភាក្សា និងសំដែងការគួរសម។
ការចូលជួបឯកឧត្តមបណ្ឌិតសភាចារ្យ សុខ អាន គឺ លោកស្រី រូណា ស្ម៊ីត មានគោលបំណង២ ទីមួយ គឺដើម្បីណែនាំខ្លួនទៅកាន់សមាជិករាជរដ្ឋាភិបាល ស្ថាប័ន និងអង្គការសង្គមស៊ីវិល មួយចំនួនដែល លោកស្រី ត្រូវតែធ្វើការ ដើម្បីប្រមូល ព័ត៌មាន ពិតនៃកម្ពុជាមុននឹង មុនពេល ដែលលោកស្រី ត្រូវរាយការណ៍ ទៅទីស្នាក់ការធំ របស់អង្គការ សហប្រជាជាតិ ទទួលបន្ទុក ផ្នែកសិទ្ធិមនុស្ស យ៉េណូវ៉ា នៅសប្តាហ៍ ក្រោយ ។ គោល បំណងទី២ លោកស្រី មកចង់សុំ ស្តាប់មតិ យោបល់ ពីឯកឧត្តម ឧបនាយករដ្ឋមន្ត្រី បណ្ឌិត សភាចារ្យ សុខ អាន អំពីដំណើរការនៃការបង្កើតច្បាប់នៅប្រទេសកម្ពុជា។
ឆ្លើយតបនឹង លោកស្រី រូណា ស្ម៊ីត ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា រាជរដ្ឋាភិបាលកម្ពុជាបាននឹងកំពុងធ្វើការទៅលើកំណែទម្រង់គ្រប់ វិស័យទាំងអស់ដើម្បីផលប្រយោជន៍ប្រជាជន នឹងប្រទេសកម្ពុជា ហើយក៏ស្របទៅតាមនីតិវិធីនៃការគោរពសិទ្ធិមនុស្សផងដែរ។ ដោយឡែកអំពីនីតិវិធីក្នុងការធ្វើច្បាប់នៅកម្ពុជាឯកឧត្តមបណ្ឌិតសភាចារ្យ សុខ អាន បានបញ្ជាក់ថា ជាទូទៅក្រសួងសាមីជាអ្នកធ្វើពង្រាងច្បាប់ ហើយត្រូវឆ្លងកាត់មកទីស្តីការគណៈរដ្ឋមន្ត្រី ដែលមាន២ក្រុម ធ្វើការពិនិត្យទៅលើពង្រាងច្បាប់នីមួយៗ ថាតើវាមានការប៉ះពាល់យ៉ាងណាខ្លះទៅលើការងារសង្គម។
ឯកឧត្តមបណ្ឌិតសភាចារ្យ សុខ អាន បានបន្តថា ក្នុងក្រុមទាំង២ ដែលមានក្រុមប្រឹក្សាអ្នកច្បាប់ និងក្រុមប្រឹក្សាសម្រាប់ទទួលបន្ទុកផ្នែកសេដ្ឋកិច្ច វប្បធម៌ និងសង្គម នឹងធ្វើការពិភាក្សាលក្ខណៈបច្ចេកទេសទៅលើច្បាប់នោះ បន្ទាប់មកឆ្លងទៅអន្តរក្រសួង ហើយក្រោយពីមានការប្រជុំអន្តរក្រសួងរួច នឹងមានការពិនិត្យដោយ ឯកឧត្តមបណ្ឌិតសភាចារ្យ សុខ អាន មុនពេលដែលបញ្ជូនទៅប្រជុំពេញអង្គគណៈរដ្ឋមន្ត្រី ដើម្បីធ្វើការពិភាក្សា ហើយបើសិនជាត្រូវមានការអនុម័ត គឺសម្តេចតេជោ ហ៊ុន សែន ដែលជាប្រធានអង្គប្រជុំ នឹងអនុម័ត ក្នុងអង្គប្រជុំ មុននឹងបញ្ជូនទៅស្ថាប័ននីតិបញ្ញាត្តិ ដែលមាន រដ្ឋសភា និងព្រឹទ្ធសភា និង ក្រុមប្រឹក្សាធម្មនុញ្ញដើម្បីធ្វើឲ្យច្បាប់នោះសមស្របទៅតាមគតិយុត្តិ និងដើម្បីកុំឲ្យប៉ះពាល់ទៅលើច្បាប់ណាផ្សេងទៀត។
លោកស្រី រូណា ស្ម៊ីត បានថ្លែងអំណរគុណដល់ការពន្យល់ដ៏ក្បោះក្បាយ របស់ឯកឧត្តមបណ្ឌិតសភាចារ្យ សុខ អាន អំពីដំណើរការនីតិវិធីនៃការធ្វើច្បាប់នៅប្រទេសកម្ពុជា។ ឯកឧត្តមបណ្ឌិតសភាចារ្យ សុខ អាន ក៏បានបង្ហាញយ៉ាងច្បាស់ថា ប្រទេសកម្ពុជាដែលបានធ្វើសច្ចាប័នជាច្រើនទៅលើសទ្ធិសញ្ញា នឹងកិច្ចព្រមព្រៀងដែលទាក់ទងទៅនឹងការងារសិទ្ធិមនុស្ស។ ឯកឧត្តមបណ្ឌិតសភាចារ្យ សុខ អាន បានលើកឡើងថា បើប្រៀបធៀបនឹងប្រទេសនានាក្នុងតំបន់អាស៊ី គឺប្រទេសកម្ពុជា បានធ្វើសច្ចាប័នច្រើនណាស់ ដែលទាក់ទងទៅនឹងការងារសិទ្ធិមនុស្សនេះ។ ឯកឧត្តមបណ្ឌិតសភាចារ្យ សុខ អាន បានគូសបញ្ជាក់ថា ការប្រតិបត្តិរបស់កម្ពុជា គឺបង្ហាញពីសុឆន្ទៈដ៏ល្អរបស់រាជរដ្ឋាភិបាលកម្ពុជា ក្នុងការគោរពសិទ្ធិមនុស្សក៏ដូចជាការពារ និងដើម្បីបំរើផលប្រយោជន៍ប្រជាជន និងគោរពសិទ្ធិមនុស្សផងដែរ ដែលស្របទៅតាមសទ្ធិសញ្ញា និងកិច្ចព្រមព្រៀងអង្គការសហប្រជាជាតិ ដែលរាជរដ្ឋាភិបាលកម្ពុជា បានធ្វើសច្ចាប័នកន្លងមកនោះ៕