ឯកឧត្តម សុខ សូកាន បេក្ខជនតំណាងរាស្ដ្រគណបក្សប្រជាជនកម្ពុជា
មណ្ឌលខេត្តតាកែវ បានដឹកនាំយុវជនស្ម័គ្រចិត្តគណបក្សប្រជាជនកម្ពុជាគ្រប់ថ្នាក់
រួមមានថ្នាក់កណ្ដាល ថ្នាក់ខេត្ត ថ្នាក់ស្រុក និងថ្នាក់ឃុំ ភូមិ
ចុះធ្វើយុទ្ធនាការ ឃោសនាតាមខ្នងផ្ទះ ដោយអនុវត្តទៅតាមផែនការ
ដែលបានគ្រោងទុក គិតចាប់ពីថ្ងៃទី ០៤ ខែ កក្កដា រហូតដល់ថ្ងៃទី ២៦ ខែ កក្កដា
ឆ្នាំ ២០១៣ ដែលជារយៈពេលដ៏ក្ដៅគគុក នៃយុទ្ធនាការឃោសនាបោះឆ្នោត ជ្រើសតាំងតំណាងរាស្ដ្រនីតិកាលទី
៥ ឆ្នាំ ២០១៣។
គិតមកដល់ត្រឹមថ្ងៃទី
១៣ ខែកក្កដា នេះ
ក្រុមយុវជនស្ម័គ្រចិត្តគណបក្សប្រជាជនកម្ពុជាដែលដឹកនាំដោយឯកឧត្តម សុខ សូកាន បានអនុវត្តការងារសម្រេចបានតាមផែនការ ៥០%
ហើយក្នុងចំណោមក្រុងស្រុក ទាំង ១០ ទូទាំងខេត្តតាកែវ ក្នុងនោះមាន: ស្រុកសំរោង អង្គរបូរី ព្រៃកប្បាស បាទី
និងស្រុកត្រាំកក់ ដោយក្នុងមួយស្រុកៗ ក្រុមយុវជនបានចុះទៅដល់ឃុំគោលដៅចំនួន ០៤ ដែលស្មើនឹងភូមិយុទ្ធសាស្ដ្រចំនួន
១៤ ភូមិ។ ដោយឡែកក្រុង និងស្រុកចំនួន ០៥ ទៀត កំពុងបន្ដអនុវត្តយន្ដការឃោសនាតាមខ្នងផ្ទះ យ៉ាងសស្រាក់សស្រាំ។
ផ្អែកតាមលទ្ធផលក្រុមការងារបានសង្កេតឃើញថា យុវជនមានការចូលរួមយ៉ាងច្រើនសន្ធឹកសន្ធាប់
លើសពីការរំពឹងទុក។ ចំណែកប្រជាជន ក៏មានការពេញចិត្ត អាណិត
ស្រលាញ់ ជឿទុកចិត្តមកលើ សម្ដេចតេជោ ហ៊ុន សែន និង
បន្ដការគាំទ្រមកលើគណបក្សប្រជាជនកម្ពុជា បន្ដទៀត ព្រោះពួកគាត់យល់ថា
មានតែគណបក្សប្រជាជនកម្ពុជាទេ ដែលនៅជាមួយប្រជាជនគ្រប់ទីកន្លែង គ្រប់កាលៈទេសៈ
ជាក់ស្ដែងដូចដែលក្រុមការងារយុវជនបានទៅដល់
ពិសេសបានពាំនាំនូវការសាកសួរសុខទុក្ខ និងសេចក្ដីនឹករលឹកពីសំណាក់ថ្នាក់ដឹកនាំកំពូលទាំង
៣ របស់គណបក្ស គឺ សម្ដេចតេជោ ហ៊ុន សែន សម្ដេចអគ្គមហាធម្មពោធិសាល ជា ស៊ីម និងសម្ដេចអគ្គមហាពញាចក្រី ហេង សំរិន។
ទន្ទឹមនឹងការសាកសួរសុខទុក្ខ ក្រុមការងារបានប្រើប្រាស់វិធីសាស្ដ្រនៃការឃោសនា
គឺផ្សព្វផ្សាយពីគោលនយោបាយកម្មវិធីនយោបាយរបស់គណបក្ស
សមិទ្ធផលរបស់គណបក្ស តាមរយៈការប្រើឧគ្ឃោសនសព្ទ
ការនិយាយដោយផ្ទាល់មាត់ជាមួយប្រជាជន។ ក្រៅពីនេះ នៅមានការចែកខិតប័ណ្ណរបស់គណបក្ស
និងការបង្រៀនគូសសន្លឹកឆ្នោត ដល់សមាជិកបក្ស ក៏ដូចជាអ្នកគាំទ្រ៕
អត្ថបទៈ ក្រុមការងារយុវជន ខេត្តតាកែវ
