Wednesday, February 09, 2022

បទវិភាគអន្តរជាតិ៖ សង្រ្គាមផ្ទុះ ឬមិនផ្ទុះឡើង គឺអាស្រ័យលើលោក ពូទីន

(ម៉ូស្គូ)៖ ប្រធានាធិបតីបារាំង លោក អែមម៉ានុយអែល ម៉ាក្រុង បានបំពេញទស្សនកិច្ចទៅកាន់ទីក្រុងម៉ូស្គូ កាលពីថ្ងៃចន្ទសប្ដាហ៍នេះ ដើម្បីបើកកិច្ចពិភាក្សាជាមួយ ប្រធានាធិបតីរុស្ស៊ី លោក វ្ល៉ាឌីមៀ ពូទីន សំដៅព្យាយាមបន្ធូរបន្ថយភាពតានតឹង និងបំបែកភាពជាប់គាំង ពាក់ព័ន្ធនឹងការបង្កើនសកម្មភាពយោធារបស់រុស្ស៊ី នៅក្បែរ តំបន់ព្រំដែនអ៊ុយក្រែន។

ខណៈកិច្ចពិភាក្សារវាងលោក ម៉ាក្រុង និងលោក ពូទីនចាប់ផ្ដើម នៅឯទីក្រុងវ៉ាស៊ីនតោនឯណោះវិញ រដ្ឋបាលប្រធានាធិបតី លោក ចូ បៃដិន នៅតែបន្តព្រមានពីលទ្ធភាព ដែលរុស្ស៊ីអាចនឹងប្រើកម្លាំងយោធាលើអ៊ុយក្រែន នៅពាក់កណ្ដាលខែកុម្ភៈនេះ។ ជំនួបរវាងលោក ពូទីន និងលោក ម៉ាក្រុង មិនទាន់អាចសម្រេចបានលទ្ធផលជាដុំកំភួន អ្វីឡើយ តែយ៉ាងហោចណាស់ លោក ពូទីនផ្ទាល់បានអះអាងថាឱកាសសម្រាប់កិច្ចសន្ទនា ឬដំណោះស្រាយការទូតនៅតែមានជានិច្ច។

បើតាមលោក ពូទីន កិច្ចព្រមព្រៀងទីក្រុងមីនស្កិ៍ ដែលជាកិច្ចព្រមព្រៀងសន្តិភាពកំពុងជាប់គាំង ដើម្បីផ្សះផ្សាជម្លោះនៅក្នុងតំបន់ដុនបាស់ (Donbas) នៃភាគខាងកើតប្រទេសអ៊ុយក្រែន គឺជាដំណោះស្រាយតែមួយគត់សម្រាប់វិបត្តិអ៊ុយក្រែន ហើយកិច្ចចរចា Normandy នៅជុំបន្ទាប់ ត្រូវធ្វើយ៉ាងណាឱ្យអ៊ុយក្រែនគោរព និងអនុវត្តតាមកិច្ចព្រមព្រៀងទីក្រុងមីស្កិ៍។ កិច្ចចរចា Normandy មានប្រទេសចូលរួមដូចជា បារាំង, អាល្លឺម៉ង់ រុស្ស៊ី និងអ៊ុយក្រែន។

ពិតមែនទៅ លោក ពូទីន ត្រូវបានក្រុមអ្នកជំនាញមើលឃើញថាជាមនុស្សម្នាក់ ដែលតែងតែរក្សាទុកជម្រើសនៅក្នុងដៃជានិច្ច ដូច្នេះសង្រ្គាមផ្ទុះ ឬ មិនផ្ទុះឡើងគឺវាអាស្រ័យលើរូបលោកទាំងស្រុង។ ដោយឡែក ជុំវិញវិបត្តិអ៊ុយក្រែននេះដែរ ប្រធានាធិបតីអាមេរិក លោក ចូ បៃដិន និងអធិបការបតីអាល្លឺម៉ង់ លោក អូឡាហ្វ សូលស៍(Olaf Scholz) ក៏បានបើកកិច្ចពិភាក្សានៅក្នុងទីក្រុងវ៉ាស៊ីនតោនផងដែរ ដើម្បីស្វែងរកចំណុចរួមមួយទប់ទល់ជាមួយរុស្ស៊ី។

មួយរយៈពេលចុងក្រោយនេះ អាល្លឺម៉ង់ដែលមានទំនាក់ទំនងល្អជាមួយរុស្ស៊ី បានទទួលរងការរិះគន់យ៉ាងខ្លាំងពីសំណាក់បណ្ដាប្រទេសជាសមាជិក NATO និងអ៊ុយក្រែន ចំពោះការស្ទាក់ស្ទើរក្នុងការបញ្ជូនសព្វាវុធឱ្យទីក្រុងកៀវ។ យ៉ាងណាក៏ដោយ ទាំងសហរដ្ឋអាមេរិក និងអង្គការ NATO ធ្លាប់បានបញ្ជាក់ថាពួកគេនឹងមិនបញ្ជូនកងទ័ព ទៅកាន់អ៊ុយក្រែន ដើម្បីជួយប្រយុទ្ធជាមួយរុស្ស៊ីនៅក្នុងករណីផ្ទុះសង្រ្គាមនោះទេ។ ប៉ុន្តែ ទីក្រុងវ៉ាស៊ីនតោន និងសម្ព័ន្ធមិត្ត NATO បាន និងកំពុងបង្កើនការបញ្ជូនកងទ័ព និងសព្វាវុធ ទៅកាន់តំបន់អឺរ៉ុបខាងកើត ជាពិសេសតំបន់បាល់ទិក និងប៉ូឡូញ។

គួរបញ្ជាក់ថា កិច្ចចរចានាពេលកន្លងមករវាងអាមេរិក និងរុស្ស៊ី រួមទាំង NATO មិនទាន់បំបែកភាពជាប់គាំងសព្វថ្ងៃបានឡើយ។ រុស្ស៊ីបានដាក់សំណើទាមទារមួយចំនួនទៅកាន់បក្សសម្ព័ន្ធយោធា NATO ក្នុងនោះរួមមានទាំងការទាមទារឱ្យកងទ័ព NATO ចេញពីប្រទេសប៉ូឡូញ, អេស្ដូនី, ឡេតូនី និងលីទុយអានី ដែលសុទ្ធតែធ្លាប់ជាដែនដី អតីតសហភាពសូវៀត។ បន្ថែមពីលើនេះ រុស្ស៊ីក៏បានទាមទារជាលក្ខណៈផ្នែកច្បាប់ផងដែរឱ្យ NATO បញ្ឈប់ ឬបោះបង់ចោលសកម្មភាពពង្រីកឥទ្ធិពលយោធាក្នុងតំបន់ អឺរ៉ុបខាងកើត និងអ៊ុយក្រែន រួមទាំងធានាកុំទទួលយកអ៊ុយក្រែនជាសមាជិក NATO ឱ្យសោះ។ ប៉ុន្តែ សំណើទាំងនេះត្រូវបាន NATO បដិសេធ៕

ប្រភព៖ Sky News (ថ្ងៃអង្គារ ទី០៨ ខែកុម្ភៈ ឆ្នាំ២០២២)

ដោយ៖ Fresh News



បទវិភាគអន្តរជាតិ៖ «អាមេរិកប៉ុនប៉ងយកបញ្ហាតៃវ៉ាន់ធ្វើជាលេស ដើម្បីទប់ស្កាត់ការអភិវឌ្ឍរបស់ចិន ពិតជានឹងទទួលបរាជ័យជាក់ជាមិនខាន»

(ប៉េកាំង)៖ នៅថៃ្ងទី ៧ ខែកុម្ភៈ រដ្ឋាភិបាលអាមេរិកបានសម្រេចចិត្តថា នឹងលក់ «សេវាកម្មវិធីគ្រាប់មីស៊ីល Patriot» និង «គម្រោងឃ្លាំមើលសមរភូមិ» ក្នុងតម្លៃប្រហែល ១០០លានដុល្លារអាមេរិកទៅឱ្យចិនតៃវ៉ាន់។ នេះជាលើកទីពីរដែលបានលក់អាវុធទៅឱ្យចិនតៃវ៉ាន់ បន្ទាប់ពីរដ្ឋបាលអាមេរិកបច្ចុប្បន្ន បានឡើងកាន់មុខតំណែងមក។ ក្រុងវ៉ាស៊ីនតោនបានល្មើសម្តងហើយម្តងទៀត នូវពាក្យសន្យាខាងនយោបាយដែលមិនគាំទ្រឱ្យ «តៃវ៉ាន់ឯករាជ្យ» និងយកបញ្ហាតៃវ៉ាន់ធ្វើជាលេស ប៉ុនប៉ងជ្រៀតជ្រែកកិច្ចការផ្ទៃក្នុងរបស់ចិន ជាច្រើនលើកច្រើនសា ទង្វើដ៏អាក្រក់របស់របស់អាមេរិកបែបនេះ បានបង្ហាញយ៉ាងពេញលេញថា សហរដ្ឋអាមេរិកគឺជាអ្នកបំផ្លាញធំបំផុតនូវសន្តិភាព និងស្ថិរភាពនៅតំបន់ច្រកសមុទ្រតៃវ៉ាន់។

សហរដ្ឋអាមេរិកបានអះអាងថា សេចក្តីព្រាងច្បាប់ស្តីពីការលក់អាវុធទៅឲ្យតៃវ៉ាន បានធ្វើឡើងលើមូលដ្ឋាននៃអ្វីដែលហៅថា «ច្បាប់ទំនាក់ទំនងជាមួយតំបន់តៃវ៉ាន់» ដើម្បីជួយតៃវ៉ាន់ឱ្យឆ្លើយតបនឹងអ្វីដែលហៅថា «ការគំរាមកំហែងក្នុងតំបន់»។ ប៉ុន្តែតាមពិតទៅ មិនថានិយាយពីវិស័យហេតុផលច្បាប់ ឬក៏លេសសម្រាប់លក់អាវុធក៏ដោយ ក៏សុទ្ធតែអាចឃើញថា ពាក្យទាំងនេះរបស់សហរដ្ឋអាមេរិក គ្មានភស្តុតាងអ្វីទាល់តែសោះ រហូតដល់បានបំភ្លៃការពិតទាំងស្រុង។

ទីមួយ៖ អនុលោមតាមសេចក្តីប្រកាសរួម ៣ ច្បាប់រវាងចិននិងអាមេរិក ជាពិសេសសេចក្តីប្រកាសរួម «១៧ សីហា» អាមេរិកទទួលស្គាល់ថា នៅលើពិភពលោក មានប្រទេសចិនតែមួយ តៃវ៉ាន់ជាចំណែកមួយរបស់ប្រទេសចិន ដែលមិនអាចកាត់ផ្តាច់បាន រដ្ឋាភិបាលសាធារណរដ្ឋប្រជាមានិតចិន ជារដ្ឋាភិបាលស្របច្បាប់តែមួយគត់របស់ប្រទេសចិន។ អាមេរិកគួរគោរពគោលការណ៍ប្រទេសចិនតែមួយ និងសេចក្តីប្រកាសរួម ៣ ច្បាប់រវាងចិន និងអាមេរិក។ នេះគឺជាមូលដ្ឋាននយោបាយ នៃទំនាក់ទំនងរវាងចិន និងអាមេរិក។

ទីពីរ៖ ការពិតបានបញ្ជាក់ម្តងហើយម្តងទៀតថា ប៉ុន្មានឆ្នាំចុងក្រោយនេះ ស្ថានការណ៍នៅច្រកសមុទ្រតៃវ៉ាន់ កំពុងប្រឈមនឹងភាពតានតឹងជុំថ្មីមួយ មូលហេតុពីឬសគល់ គឺ ដោយមកពីអាជ្ញាធរតៃវ៉ាន់ប៉ុនប៉ង់ «ពឹងផ្អែកទៅលើអាមេរិក ដើម្បីស្វែងរកការចង់ឱ្យតៃវ៉ាន់ឯករាជ្យ» ម្តងហើយម្តងទៀត ដោយឡែកមនុស្សមួយចំនួនរបស់អាមេរិក មានចេតនាប៉ុនប៉ង «ទប់ស្កាត់ការអភិវឌ្ឍរបស់ប្រទេសចិន» ដោយយកបញ្ហាតៃវ៉ាន់ធ្វើជាលេស។ មួយផ្នែក រដ្ឋាភិបាលអាមេរិកប៉ុនប៉ងប្រើសន្លឹកបៀតៃវ៉ាន់ ដើម្បីទប់ស្កាត់ការអភិវឌ្ឍរបស់ប្រទេសចិន មួយផ្នែកទៀត អាមេរិកបានញុះញង់ឱ្យស្ថានការណ៍នៅតំបន់ច្រកសមុទ្រតៃវ៉ាន់ មានភាពតានតឹង ដែលធ្វើឱ្យតៃវ៉ាន់ចងជាប់ជាមួយនឹងអ្វីដែលហៅថា «យុទ្ធសាស្ត្រឥណ្ឌាប៉ាស៊ីហ្វិក» របស់អាមេរិកនិងឆក់យកផលប្រយោជន៍ផ្ទាល់ខ្លួនយ៉ាងច្រើន ពីការលក់អាវុធទៅឱ្យតៃវ៉ាន់។

សូមបញ្ជាក់ថា បញ្ហាតៃវ៉ាន់ជាបញ្ហាសំខាន់បំផុតនិងរសើបបំផុត ក្នុងទំនាក់ទំនងរវាងចិន និងអាមេរិក។ បុរេលក្ខខណ្ឌសម្រាប់ឱ្យទំនាក់ទំនងរវាងចិន និងអាមេរិកវិលត្រឡប់ទៅរកផ្លូវអភិវឌ្ឍន៍ ប្រកបដោយភាពរឹងមាំនិងសិ្ថរភាព គឺ អាមេរិកចាំបាច់ត្រូវបញ្ឈប់ការប្រាស្រ័យទាក់ទងជាផ្លូវការ ជាមួយអាជ្ញាធរតៃវ៉ាន់ភ្លាម ទោះតាមទម្រង់ណាក៏ដោយ មិនបញ្ចេញសញ្ញាខុសឆ្គងណាទៅកាន់ពួកបំបែកបំបាក់ ដែលចង់ឱ្យតៃវ៉ាន់ឯករាជ្យព្រមទាំងបញ្ឈប់លេងកលល្បិច ដែលនិយាយផ្សេងធ្វើផ្សឹង។

សហរដ្ឋអាមេរិកចាំបាច់ត្រូវគោរពតាមគោលការណ៍ចិនតែមួយ យ៉ាងពិតប្រាកដ លុបបំបាត់ផែនការលក់អាវុធទៅឱ្យតៃវ៉ាន់ភ្លាម បញ្ឈប់ទំនាក់ទំនងខាងយោធាជាមួយតំបន់តៃវ៉ាន់ ក៏ដូចជាបញ្ឈប់ការប្រើប្រាស់ពួកបំបែកបំបាក់ ដែលចង់ឱ្យតៃវ៉ាន់ឯករាជ្យដើម្បីបំផ្លាញផលប្រយោជន៍របស់ចិន។ បើពុំនោះសោត ចិនមុខជានឹងចាត់វិធានការដ៏ត្រឹមត្រូវ និងខ្លាំងក្លាដើម្បីគាំពារយ៉ាងមុតមាំនូវអធិបតេយ្យភាព និងផលប្រយោជន៍សន្តិសុខរបស់ខ្លួនជាក់ជាមិនខាន។ ប្រទេសចិននឹងធ្វើដូចអ្វីដែលខ្លួនបានសន្យាយ៉ាងដាច់ខាត!៕ (#CCFR Comment#)

ដោយ៖ Fresh News






កិច្ចប្រជុំពិភាក្សា រៀបចំកែសម្រួលសមាសភាព ក្រុមការងារចុះជួយសង្កាត់ទាំង៧ នៃក្រុងពោធិ៍សាត់

ពោធិ៍សាត់៖  លោក ជាវ តាយ សមាជិកគណៈកម្មាធិការកណ្តាល គណបក្សប្រជាជនកម្ពុជា ប្រធានគណៈកម្មាធិការគណបក្សខេត្ត និងជាប្រធានក្រុមការងារចុះជួយក្រុងពោធិ៍សាត់ នារសៀលថ្ងៃទី០៧ ខែកុម្ភៈ ឆ្នាំ២០២២ នៅស្នាក់ការគណបក្សខេត្ត បានដឹកនាំកិច្ចប្រជុំពិភាក្សា រៀបចំកែសម្រួលសមាសភាព ក្រុមការងារចុះជួយសង្កាត់ទាំង៧ នៃក្រុងពោធិ៍សាត់ ក្នុងនោះក៏មានការចូលរួមពី ប្រធាន អនុប្រធានក្រុមការងារ ប្រធាន អនុប្រធានគណបក្សសង្កាត់ និងសមាជិកក្រុមប្រឹក្សាក្រុងទទួលបន្ទុកសង្កាត់ជាច្រើនផ្សេងទៀត។


បន្ទាប់លោក លោកស្រី ក្រុមការងារចុះជួយសង្កាត់ បានមានមតិចូលរួមនោះរួចមក លោក ជាវ តាយ បានថ្លែងនូវការកោតសរសើរ ដល់មន្ត្រីក្រុមការងារគ្រប់ផ្នែក គ្រប់ថ្នាក់ ដែលបានខិតខំទាំងកម្លាំងកាយ កម្លាំងចិត្ត និងសម្ភារៈ ចុះបំពេញការងារនៅក្នុងមូលដ្ឋាន បង្កលក្ខណៈឱ្យមានភាពកក់ក្តៅជូនប្រជាពលរដ្ឋ ស្របពេលសភាពការណ៍ប្រទេសព្រួយបារម្មណ៍ អំពីការរីករាលដាលជំងឺកូវីដ១៩។ លោកថ្លែងថា គោលបំណងសំខាន់ ក្នុងកិច្ចប្រជុំនាពេលនេះ ផ្តោតសំខាន់ពិភាក្សាអំពីរចនាសម្ព័ន្ធក្រុមការងារចុះជួយក្រុង និងសង្កាត់ សម្រាប់ឆ្នាំ២០២២ ដើម្បីរៀបចំធ្វើផែនការចុះមូលដ្ឋានប្រចាំសប្តាហ៍ និងប្រចាំខែ លើកស្លាករបស់គណបក្ស នៅតាមសង្កាត់ និងការដោះស្រាយបញ្ហាប្រឈមតាមមូលដ្ឋាន។


លោកបានថ្លែងទៀតថា សមាសភាពក្រុមការងារចុះជួយសង្កាត់ទាំង៧ នៃក្រុងពោធិ៍សាត់ ដែលកន្លងមកត្រូវបានប្រធានគណៈកម្មាធិការគណបក្សខេត្ត និងគណបក្សក្រុង រៀបចំរចនាសម្ព័ន្ធត្រឹមត្រូវ លើការងារចាត់តាំង គ្រប់គ្រង និងដឹកនាំ បានចូលរួមសកម្មភាពកម្មវិធីនយោបាយនានា ស្តីពីផែនការរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៥ ឆ្នាំ២០២២ខាងមុខ។ ទាំងអស់នេះ គឺជាគុណតម្លៃដ៏ធំធេងមិនអាចកាត់ថ្លៃបាន តែទោះជាយ៉ាងនេះក្តី ក៏យើងនៅតែកែសម្រួលអំពីសមាភាពក្រុមការងារចុះជួយសង្កាត់មួយចំនួន សម្រាប់តម្រង់មុខព្រួញ ឆ្ពោះទៅរកជ័យជំនៈក្នុងការបោះឆ្នោតនាពេលខាងមុខ។


លោកបានបញ្ជាក់ថា កិច្ចការទាំងអស់នេះ ទាមទាឱ្យអនុគណៈដឹកនាំ ប្រធាន អនុប្រធានក្រុមការងារថ្នាក់ក្រុង មន្ទីរ អង្គភាពចុះជួយសង្កាត់ទាំង៧ បន្តជម្រុញសកម្មភាពជាប់ជាប្រចាំ ដើម្បីទទួលព័ត៌មានពីសមាជិក សមាជិកាបក្ស នៅក្នុងមូលដ្ឋាន ដែលពួកគាត់មានតម្រូវការឱ្យជួយដោះស្រាយ អំពីបញ្ហាប្រឈមនានាក្នុងមូលដ្ឋាន។ ជាមួយគ្នានោះ លោកបានផ្តាំផ្ញើសុំឱ្យប្រធានក្រុមការងារតាមសង្កាត់នីមួយៗ ពិនិត្យលើលទ្ធភាព និងសកម្មភាពចុះមូលដ្ឋាន ត្រូវមានផែនការជាក់លាក់ ច្បាស់លាស់ ត្រឹមត្រូវ និងធ្វើរបាយការណ៍ បញ្ជូនមកគណបក្សក្រុងឱ្យបានទៀងទាត់ ក្នុងនោះត្រូវយកចិត្តទុកដាក់ ពិនិត្យតាមដានអំពីសកម្មភាពក្នុងមូលដ្ឋាន ដើម្បីឆ្លើយតបឱ្យបានទាន់ពេលវេលា និងមានប្រសិទ្ធិភាព៕