ទេសរដ្ឋមន្ត្រី គន់ គីម៖ ស្ថានភាពគ្រោះមហន្តរាយនៅកម្ពុជា មិនមានកម្រិតធ្ងន់ធ្ងរនោះទេ ខណៈជំនន់ទឹកភ្លៀងបង្កឡើងដោយឥទ្ធិពលព្យុះណូរូ បានថមថយ

(ឧត្តមរមានជ័យ)៖ ទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានបញ្ជាក់ថា ស្ថានភាពគ្រោះមហន្តរាយនៅកម្ពុជា មិនទាន់មានកម្រិតធ្ងន់ធ្ងរខ្លាំងនោះទេ ខណៈជំនន់ទឹកភ្លៀងដែលបង្ក ដោយឥទ្ធិពលព្យុះណូរូ (Noru) ក៏បានថមថយច្រើន ហើយរាជរដ្ឋាភិបាលអាចគ្រប់គ្រងសភាការណ៍បានទាំងស្រុង។

ការបញ្ជាក់បែបនេះរបស់ទេសរដ្ឋមន្ត្រី គន់ គីម បានធ្វើឡើងក្នុងឱកាសដែលលោក បានអញ្ជើញជាអធិបតីភាព ដឹកនាំនាំកិច្ចប្រជុំប្រចាំខែ ក្រុមការងារគណប្រជាជនកម្ពុជាខេត្តឧត្តរមានជ័យ នៅព្រឹកថ្ងៃទី៣០ ខែកញ្ញា ឆ្នាំ២០២២នេះ ដោយមានការចូលរួមពីសំណាកប្រធានក្រុមការងារបក្សខេត្ត ក្រុង ស្រុក ឃុំ ភូមិចំណុះទាំងអស់ក្នុងខេត្តឧត្តមានជ័យ។

ជាមួយនឹងស្ថានភាពគ្រោះមហន្តរាយធម្មជាតិនេះ ទេសរដ្ឋមន្ត្រី គន់ គីម ក៏បានបទបញ្ជាឱ្យរដ្ឋបាលខេត្ត ស្រុក ឃុំ ភូមិ និងលេខាធិការដ្ឋានគណៈកម្មាធិការគ្រប់គ្រងគ្រោះមហន្តរាយទូទាំងប្រទេស បន្តការយកចិត្តទុកដាក់តាមដាន សភាពការណ៍ដោយឈរលើស្មារតីត្រៀមលក្ខណៈជានិច្ច អនុលោមតាមការយកចិត្តទុកដាក់ខ្ពស់របស់ប្រមុខរាជរដ្ឋាភិបាល ចំពោះអាយុជីវិត និងទុក្ខលំបាករបស់ប្រជាពលរដ្ឋព្រោះអាជ្ញាធរ គឺតួនាទីឪពុកម្តាយ។ ក្នុងន័យនេះបន្ទាប់ពីទឹកស្រុកវិញ ត្រូវពិនិត្យស្តារឡើងវិញនូវការខូចខាតផ្លូវលំជនបទនានា និងហេដ្ឋារចនាសម្ព័ន្ធចាំបាច់ផ្សេងៗទៀតជាបន្ទាន់។

ទេសរដ្ឋមន្ត្រី គន់ គីម បានបន្ថែមថា គិតមកថ្ងៃនេះ ស្ថានភាពអាកាសធាតុនៅកម្ពុជា មានភាពធូរស្រាល សម្រាប់ស្ថានភាពទឹកជំនន់នៅតាមបណ្តាលខេត្តផ្សេងៗដែលកំពុងរងគ្រោះបាននឹងកំពុងស្រកចុះជាបណ្តើរៗ ហើយប្រជាពលរដ្ឋែលជម្លៀសឱ្យរស់នៅលើទីទួលមានសុវត្ថិភាពមួយចំនួនអាចវិលមកលំនៅដ្ឋានវិញជាបណ្តើរៗផងដែរ។

នាឱកាសនោះ ទេសរដ្ឋមន្ត្រី គន់ គីម ក៏បានពាំនាំនូវការសាកសួរសុខទុក្ខ និងក្តីស្រឡាញ់ពីសំណាក់សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់សមាជិកបក្សនៅគ្រប់ជាន់ថ្នាក់ និងប្រជាពលរដ្ឋទូទាំងខេត្តដោយសម្តេចទាំងទ្វេរបានចាត់ទុកប្រជាពលរដ្ឋទាំងអស់ ជាសមាជិកក្រុមគ្រួសាររបស់សម្តេចទាំងពីរ ដោយផ្ទាល់ និងបានចាត់ទុកថាទុក្ខលំបាករបស់ប្រជាពលរដ្ឋកម្ពុជាគ្រប់រូប គឺជាទុក្ខលំបាករបស់សម្តេចទាំងទ្វេរ និង ទុក្ខលំបាកនៃមហាគ្រួសារខ្មែរទាំងមូលដែលជាអាទិភាពត្រូវដំកល់ខ្ពស់បំផុត។

ក្នុងនាមជាសេនាធិការរបស់រាជរដ្ឋាភិបាល ទេសរដ្ឋមន្ត្រី គន់ គីម បានណែនាំឱ្យក្រុមការងារដោះស្រាយតម្រូវការនានា ជូនប្រជាពលរដ្ឋស្របតាម ស្មារតីនៃទស្សនវិស័យវិមជ្ឈការ និងវិសហមជ្ឈការ របស់រាជរដ្ឋាភិបាលជូនដល់ថ្នាក់ស្រុក និងឃុំ ដោយមានការសហការជាមួយរដ្ឋបាលខេត្តដោយចាត់តាំងអភិបាលរង និងប្រធានមន្ទីរវិស័យនានាសម្រាប់ ធ្វើការងារតាមក្រុង ស្រុក និងមូលដ្ឋានចំណុះ។

ឆ្លៀតក្នុងឱកាសនោះដែរ ទេសរដ្ឋមន្ត្រី គន់ គីម ក៏បានក្រើនរំឮកដល់អាជ្ញាធរមូលដ្ឋាន ត្រូវសម្រួលឯកសារនានា ដែលធានាដល់ការងារចុះឈ្មោះបោះឆ្នោតរបស់ប្រជាពលរដ្ឋនៅក្នុងមូលដ្ឋានខ្លួន ដើម្បីធានានូវសិទ្ធបោះឆ្នោតរបស់ប្រជាពលរដ្ឋគ្រប់ៗគ្នាដែលជាគោលនយោបាយប្រជាធិបតេយ្យរបស់រាជរដ្ឋាភិបាលកម្ពុជា។

លោកក៏បានកោតសសើរចំពោះសកម្មភាពក្រុមការងារយុវជនគណបក្សប្រជាជនកម្ពុជាកន្លងមក ដែលមានភាពសកម្មក្នុងការចុះជួយគាំទ្រដល់ប្រជាពលរដ្ឋពេលមានទុក្ខលំបាក ដោយបន្តបាននូវវប្បធម៌ចែករំលែក និងសូមបន្តនូវសកម្មភាព និងវប្បធម៌ដ៏ផូរផង់នេះរបស់ខ្មែរ ហើយការចូលរួមរបស់យុវជន គឺជាកត្តាចម្បងក្នុងការអភិវឌ្ឍប្រទេសជាតិ៕

រាជរដ្ឋាភិបាលកម្ពុជា បានចេញសេចក្តីសម្រេចលេខ ៦៦ សសរ ចុះថ្ងៃទី២៩ ខែកញ្ញា ឆ្នាំ២០២២ ស្តីពីការតែងតាំងសមាសភាពគណៈកម្មាធិការរដ្ឋាភិបាលឌីជីថល

 

អ្នកវិភាគចៅចាក់ស្មុក៖ ក្រុមចលនាមាតាធម្មជាតិនិងគូកនកំពុងបន្តអនុវត្តផែនការបដិវត្តន៍ពណ៌នៅកម្ពុជាជ្រកក្រោមស្លាកបរិស្ថាននិងធនធានធម្មជាតិ

ជាថ្មីម្តងទៀត ជនបរទេសឈ្មោះ អាឡិច ហ្គន់ហ្សើលេស ដាវីតសុន មេចលនាមាតាធម្មជាតិក្រៅច្បាប់ បាននិងកំពុងបញ្ជាសមាជិករបស់ខ្លួននៅក្នុងប្រទេស ឱ្យធ្វើសកម្មភាពក្រោមរូបភាពផ្សេងៗជ្រកក្រោមស្លាកអ្នកស្រឡាញ់ធនធានធម្មជាតិ បានបង្ហាញក្រយ៉ៅ«មេបដិវត្តន៍ពណ៌របស់ខ្លួន»យ៉ាងច្បាស់ក្នុងការយកបញ្ហាបរិស្ថាននិងធនធានធម្មជាតិជាឈ្នួនញុះញង់ដុតកំហឹងប្រជាពលរដ្ឋដើម្បីបំផ្ទុះបដិវត្តន៍ពណ៌តាមផែនការទុច្ចរិតរបស់ពួកគេដែលបានរៀបចំជាយូរឆ្នាំមកហើយ។ តាមរយៈវិទ្យុអាស៊ីសេរីដែលជាឧបករណ៍ បំពងសំឡេងឃោសនាដាច់ថ្លៃរបស់ក្រុមប្រឆាំងនិងចៅហ្វាយនាយបរទេសរបស់ពួកគេផ្សាយនៅយប់ថ្ងៃទី២៩ ខែកញ្ញា ឆ្នាំ២០២២ បានញុះញង់សាជាថ្មីឱ្យប្រជាពលរដ្ឋកម្ពុជាផ្លាស់ប្តូរ ប្រព័ន្ធនយោបាយកម្ពុជាបច្ចុប្បន្នដែលជាការញុះញង់បដិវត្តន៍ពណ៌មិនអាចប្រកែកបាន។ 

អាឡិចបានថ្លែងថា៖«វិធីដោះស្រាយបញ្ហាបទល្មើសព្រៃឈើគឺត្រូុវតែផ្លាស់ប្តូរប្រព័ន្ធនយោបាយបច្ចុប្បន្ន។ ដរាបណាមានប្រព័ន្ធនយោបាយដូចសព្វថ្ងៃ គ្មានសង្ឃឹមទេសម្រាប់ព្រៃឈើ»។ ការនិយាយប្រកបដោយកំហឹងនិងការញុះញង់របស់ជនបរទេសរូបនេះបានឆ្លុះបញ្ចាំងយ៉ាងច្បាស់ពីចេតនាអាក្រក់ដែលជនរូបនេះជាមួយបក្ខពួករបស់ខ្លួនជាយុវជនមួយ ចំនួនតូចទទួលបានការបង្វឹកស្ម័គ្រស្លាប់និងធ្វើសកម្មភាពប្រទូស្តរ៉ាយនឹងច្បាប់ មានចំពោះកម្ពុជា។ ពួកគេមិនមែនជាះ្នកស្រឡាញ់បរិស្ថាននិងធនធានធម្មជាតិពិតប្រាកដដូចដែលពួកគេតែងតែស្រែកក្តែងៗនោះទេ តែធាតុពិត ពួកគេកំពុងធ្វើអាជីវកម្មនយោបាយលើធនធានធម្មជាតិ។ សកម្មភាពរបស់ពួកគេពិតជាបង្កប់ដោយរបៀបវារៈទុច្ចរិត និងបានធ្វើវិទ្ធង្សនាប្រឆាំងនឹងកម្ពុជា យ៉ាងពិតប្រាកដ។ លើសពីនេះ សកម្មភាពបែបអនាធិបតេយ្យរបស់ក្រុមនេះបាននិងកំពុងឆ្ពោះទៅរកការប្រើប្រាស់កម្លាំងពលរដ្ឋក្នុងការផ្តួលរំលំរាជរដ្ឋាភិបាលកម្ពុជាស្របច្បាប់ និងផ្តួលរំលំប្រព័ន្ធនយោបាយដែលកម្ពុជាអនុវត្តបច្ចុប្បន្ន។ កម្ពុជាជាព្រះរាជាណាចក្រដែល ព្រះមហាក្សត្រទ្រង់ប្រតិបត្តិតាមរដ្ឋធម្មនុញ្ញ និងតាមលទ្ធិប្រជាធិបតេយ្យសេរី ពហុបក្ស ហើយរបបនយោបាយកម្ពុជាដែល កំពុងអនុវត្តគឺប្រជាធិបតេយ្យសេរីពហុបក្ស។ 

អាឡិច ហ្គន់ហ្សើលេស ដាវីតសុន ជាជនជាតិអេស្បាញត្រូវបានគេដឹងថាជាជាអ្នកសមគំនិតក្នុងអំពើញុះញង់ និងបានធ្វើសកម្មភាពបង្កជាបទល្មើស និងបំផ្លាញប្រទេសកម្ពុជា និងកាលពីខែឧសភា ឆ្នាំ២០២២ ត្រូវបានតុលាការកំពូលសម្រេចតម្កល់សាលដីកាសាលាឧទ្ធរណ៍ រាជធានីភ្នំពេញដោយសម្រេចឱ្យមេចលនាមាតាធម្មជាតិក្រៅច្បាប់នេះជាប់ពន្ធនាគារ ២០ ខែ ក្រោមការចោទប្រកាន់ពីបទ «សមគំនិតក្នុងអំពើញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ជាមួយ ក្រុមសកម្មជនមាតាធម្មជាតិរបស់ខ្លួនប៉ុន្មាននាក់។ ដោយមកសម្ងំនៅកម្ពុជាជាច្រើនឆ្នាំក្រោមឆ័ត្រនៃអង្គការមាតាធម្មជាតិ ដែលក្រោយមកបានប្រកាសរំលាយខ្លួនឯង បន្ទាប់ពីត្រូវបានអាឡិច យកទៅប្រើប្រាស់ដើម្បីផលប្រយោជន៍ផ្ទាល់ខ្លួន អាឡិច មានទំនាក់ទំនងយ៉ាងជិតស្និទ្ធជាមួយក្រុមគណបក្សប្រឆាំង និងតែងតែធ្វើសកម្មភាពបម្រើឱ្យនយោបាយរបស់ក្រុមប្រឆាំងដើម្បីសម្រេចមហិច្ឆតាអំណាច។ ដោយសារតែទង្វើទុច្ចរិតរបស់ជននេះហើយ បានជាអាជ្ញាធរកម្ពុជាបានបណ្តេញ អាឡិច ហ្គន់ហ្សើលេស ដាវីតសុន នេះចេញពីប្រទេសកម្ពុជានៅឆ្នាំ ២០១៥ និងត្រូវបានចោទប្រកាន់នៅចំពោះមុខតុលាការពីទង្វើបំពានច្បាប់របស់ខ្លួន។ 

ខណៈដែលក្រុមប្រឆាំងបានអនុវត្តផែនការបដិវត្តន៍ពណ៌ពេញបន្ទុកក្រោមអង្គការចាត់តាំងនយោបាយ «ខ្មោចបក្សសង្គ្រោះជាតិ» ពីឆ្នាំ២០១២ ដល់ឆ្នាំ២០១៧ អាឡិច ដែលបានបណ្តុះបណ្តាលយុវជនមួយចំនួនតូចឱ្យវង្វេងវង្វាន់ជាតិសាសន៍ខ្លួននិងស្ម័គ្រស្លាប់ដើម្បីខ្លួន បានបើកសមរភូមិញុះញង់លើផ្នែកធនធានធម្មជាតិនិងបរិស្ថាន ដោយបានដុតកំហឹងប្រជាពលរដ្ឋតាមរយៈការផ្សព្វផ្សាយព័ត៌មានបំភ្លៃ បំផ្លើស បំប៉ោងនិងបំភ័ន្តទាក់ទងនឹងតំបន់អារ៉ែង កោះកុង ព្រៃឡង់ ទំនប់វារីអគ្គិសនីសេសាន ស្ករអំពៅជាដើម។ សកម្មភាពទាំងនេះបានគាំទ្រឱ្យផែនការបដិវត្តន៍ពណ៌របស់ក្រុមប្រឆាំង និងដែលត្រូវបានចូលរួមសហការពីសមាគមនិងអង្គការក្រៅ រដ្ឋាភិបាលមួយចំនួនដែលទទួលជំនួយដើម្បីជំរុញលើផែនការបដិវត្តន៍ពណ៌រួមមានសមាគមសេដ្ឋកិច្ចក្រៅប្រព័ន្ធ (IDEA) របស់ វន ពៅ សមាគមសម្ព័ន្ធកសិករកម្ពុជា (CFCC) របស់ ថេង សាវឿន សមាគមយុវជនកម្ពុជា (CYN) ដែលអង្គការនេះមានសមាជិកភាគច្រើនជាអតីតអ្នកដែលត្រូវបានបង្វឹកដោយផ្ទាល់របស់អាឡិច អង្គការស្ពានសន្តិភាព ចលនាផ្សេងៗទៀតនិងម្ចាស់ជំនួយរបស់ពួកគេមួយចំនួនផងដែរ។  

ដូច្នេះ វាមិនមែនជារឿងចំឡែកឡើយ! សកម្មភាពទាំងឡាយរបស់អាឡិច និងសមាជិកនៃចលនាមាតាធម្មជាតិក្រៅច្បាប់របស់ពួកគេដែលបាននិងកំពុងបន្តធ្វើនេះ គឺជាសកម្មភាពញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបញ្ឆេះកំហឹងប្រជាពលរដ្ឋ និងបំផ្លាញទំនុកចិត្តប្រជាពលរដ្ឋមកលើការដឹកនាំរបស់រាជរដ្ឋាភិបាល ហើយដែលគោលដៅសំខាន់របស់ពួកគេគឺបម្រើឱ្យមហិច្ឆតានយោបាយរបស់ក្រុមប្រឆាំង ជាពិសេស ទណ្ឌិត សម រង្ស៊ី និងគូកនដែលតែងតែអំពាវនាវឱ្យមានការផ្លាស់ប្តូររបបដឹកនាំតាមរយៈការងើបបះបោររបស់ប្រជាពលរដ្ឋ ខណៈផែនការឧបឃាតផ្តួលរំលំរដ្ឋាភិបាលរបស់ខ្លួនជាច្រើនត្រូវបានបរាជ័យជាបន្តបន្ទាប់។ ទោះបីបរាជ័យជាច្រើនដង ក៏ក្រុមប្រតិបត្តិករបដិវត្តន៍ពណ៌មិនបោះបង់ផែនការឡើយ។ ពួកគេខិតខំស្វះស្វែងរកវិធីសាស្ត្រផ្សេងៗដើម្បីអនុវត្តផែនការរបស់ពួកគេ ដោយមិនខ្លាចញញើតអ្វីបន្តិចឡើយ។ ពួកគេតែងតែប្រើប្រាស់វិធីសាស្ត្របំពាន និងធ្វើជាជនរងគ្រោះតូបនីយ កម្មដើម្បីទាញសមានចិត្តពលរដ្ឋខ្មែរ តែតាមពិតជាការសម្តែង និងជាការអនុវត្តនូវផែនការបដិវត្តន៍ពណ៌របស់ខ្លួនប៉ុណ្ណោះ។ 

ទម្រង់ដែលពួកគេបានប្រើប្រាស់ក្នុងការតវ៉ាដូចជាការប្រើប្រាស់ផ្កា ក្តារមឈូស ស្លៀកពាក់សម្គាល់ពណ៌ ស ឬខ្មៅ និងការប្រើប្រាស់ឧបករណ៍ផ្សេងៗ គឺសុទ្ធសឹងតែបានដកស្រង់ចេញពីឧបសម្ព័ន្ធនៃសៀវភៅ «ពីរបបផ្តាច់ការទៅប្រជាធិបតេយ្យ»សរសេរឡើងដោយ ជីន សាប ដែលជាសៀវភៅទ្រឹស្តីបដិវត្តន៍ពណ៌ដែលគេបានយកទៅប្រើប្រាស់ក្នុងការផ្លាស់ប្តូររបបនៅអឺរ៉ុបខាងកើត មជ្ឈឹមបូព៌ា និងអាស៊ី។ ក្រុមខ្មោចគណបក្សសង្គ្រោះជាតិ និងសមាគម អង្គការក្រៅរដ្ឋាភិបាលជាគូកនរបស់ខ្លួនក៏បានយកទ្រឹស្តីនេះមកអនុវត្តនៅកម្ពុជាផងដែរ ប៉ុន្តែត្រូវបានទប់ស្កាត់បានទាន់ពេលវេលាធ្វើឱ្យក្រុមជនក្បត់ជាតិខ្លះត្រូវបានចាប់ខ្លួនចោទប្រកាន់និងជំនុំជម្រះក្តី និងក្រុមប្រតិបត្តិករបដិវត្តន៍ពណ៌ខ្លះបានរត់គេចខ្លួនទៅក្រៅប្រទេស។ ដូច្នេះ អ្វីៗដែលក្រុមអង្គការ សមាគម រួមនឹងក្រុមប្រឆាំងខ្លះបាននិងកំពុងធ្វើជាការបន្តអនុវត្តផែនការបដិវត្តន៍ពណ៌ ផ្លាស់ប្តូររបបដឹកនាំតាមបែបមិនប្រជាធិបតេយ្យដូចដែលពួកគេបានធ្វើម្តងរួចមកហើយនៅឆ្នាំ ២០១៣ និងដើមឆ្នាំ២០១៤ និថបន្តបន្ទាប់មកទៀត។ បដិវត្តន៍ពណ៌ដែលមិនអាចលើកលែង ឱ្យបានឡើយ និងដើម្បីបុព្វហេតុសុខសន្តិភាព និងការអភិវឌ្ឍ របស់កម្ពុជា ពលរដ្ឋទាំងអស់បាននិងកំពុងចូលរួមយ៉ាងសកម្ម ជាមួយរាជរដ្ឋាភិបាលក្នុងការទប់ស្កាត់ បង្ការ និងបង្ក្រាបផែនការបដិវត្តន៍ពណ៌។ ប្រមុខរាជរដ្ឋាភិបាលបានប្រកាស ជាច្រើនលើកច្រើនសារួចមកហើយថា នឹងមិនអនុញ្ញាតឱ្យក្រុមជនមួយក្តាប់តូចបំផ្លិចបំផ្លាញសុខសន្តិភាពនិងការអភិវឌ្ឍរបស់ជាតិកម្ពុជាដែលរកបានមកដោយពិបាកនេះបានទេ៕ 

ដោយចៅចាក់ស្មុក 

រាជធានីភ្នំពេញ ថ្ងៃទី៣០ ខែកញ្ញា ឆ្នាំ២០២២

#ចលនាមាតាធម្មជាតិ #ក្បត់ជាតិ #អាឡិច #បដិវត្តន៍ពណ៌

សម្តេចតេជោ ហ៊ុន សែន៖ ១០ថ្ងៃធ្វើដំណើររាប់ម៉ឺនគីឡូ នឿយកាយតែសប្បាយចិត្ត

(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅព្រឹកថ្ងៃសុក្រ ទី៣០ ខែកញ្ញា ឆ្នាំ២០២២នេះ បានអញ្ជើញធ្វើដំណើរមកកាន់ខេត្តសៀមរាប ដើម្បីជួបសំណេះសំណាលជាមួយប្រជាពលរដ្ឋស្ម័គ្រចិត្តរើសំណង់ចេញពីតំបន់អង្គរ ទៅកាន់ភូមិរុនតាឯក ដែលនឹងធ្វើឡើងនៅថ្ងៃស្អែក។

ជាមួយនឹងដំណើរអញ្ជើញមកដល់ខេត្តសៀមរាប សម្តេចតេជោ ហ៊ុន សែន បានរំលេចសារនៅលើហ្វេសប៊ុកអំពីភាពមមាញឹកនឹងការងារ ក្នុងពេលប៉ុន្មានថ្ងៃចុងក្រោយនេះទាំងការងារនៅក្រៅប្រទេស និងក្នុងប្រទេស។

សម្តេចតេជោ ហ៊ុន សែន បានគូសរំលេចថា រយៈពេល១០ចុងក្រោយនេះ សម្តេចបានធ្វើដំណើររាប់ម៉ឺនគីឡូម៉ែត្រ។ ការងារនេះនឿយកាយ តែសប្បាយចិត្ត ព្រោះបានបំពេញការងារបម្រើជាតិ និងប្រជាជន។

សម្តេចតេជោ បានគូសបញ្ជាក់ដូច្នេះ «ដំណើរដ៏វែងឆ្ងាយដែលគ្មានពេលឈប់សម្រាកបានក្លាយជាទម្លាប់តាំងពីអាយុតិចរហូតអាយុច្រើន។

ជាកិច្ចការដែលចាំបាច់ដែលតម្រូវឲ្យធ្វើដោយខានមិនបាន។ ភ្នំពេញ.ញូយ៉ក.ឡាហាវ៉ាន.តូក្យូ.ភ្នំពេញ. សៀមរាបប្រើរយៈពេល១០ថ្ងៃចម្ងាយរាប់ម៉ឺនគីឡូម៉ែត្រជាមួយការងារយ៉ាងច្រើន។ នឿយកាយតែសប្បាយចិត្តព្រោះបាន ធ្វើការបំរើជាតិនិងប្រជាជន»។

សូមបញ្ជាក់ថា កាលពីថ្ងៃទី២៨ ខែកញ្ញា កន្លងទៅនេះ សម្តេចតេជោ ហ៊ុន សែន ទើបនឹងត្រឡប់ពីបំពេញការងារនៅក្រៅប្រទេសរយៈពេល៨ថ្ងៃ ដោយបានអញ្ជើញទៅកាន់ក្រុងញូវយ៉ក សហរដ្ឋអាមេរិក ដើម្បីចូលរួមកិច្ចប្រជុំមហាសន្និបាតអង្គការសហប្រជាជាតិលើកទី៧៧, បំពេញទស្សនកិច្ចផ្លូវការនៅប្រទេសគុយបា បន្ទាប់មកអញ្ជើញចូលរួមបុណ្យសពលោក អាប ស៊ីនហ្សូ អតីតនាយករដ្ឋមន្ត្រីជប៉ុន នៅទីក្រុងតូក្យូ ប្រទេសជប៉ុន។

បន្ទាប់ពីបំពេញទស្សនកិច្ចលើដំណើរដ៏វែងឆ្ងាយនោះភ្លាម នៅថ្ងៃបន្ទាប់ គឺថ្ងៃទី២៩ ខែកញ្ញា ម្សិលមិញនេះ សម្តេចតេជោ ក៏បានអញ្ជើញជាអធិបតីប្រារព្ធទិវាជាតិអន្តរសាសនាប្រយុទ្ធប្រឆាំងការជួញដូរមនុស្ស។ នៅព្រឹកថ្ងៃទី៣០ ខែកញ្ញា សម្តេចតេជោ ក៏បានអញ្ជើញធ្វើដំណើរតាមឧទ្ធម្ភាគចក្រមកកាន់ខេត្តសៀមរាប ដើម្បីជួបសំណេះសំណាលជាមួយពលរដ្ឋស្ម័គ្រចិត្តរើសំណង់ចេញពីតំបន់អង្គរទៅកាន់ភូមិធម្មជាតិរុនតាឯក។

ក្នុងវេទិកាជាតិអន្តរសាសនាប្រឆាំងការជួញដូរមនុស្សនៅថ្ងៃម្សិលមិញ សម្តេចតេជោនាយករដ្ឋមន្ត្រី បានគូសរំលេចពីភាពមមាញឹកនឹងការងារ និងបានលើកឡើងថា ជានាយករដ្ឋមន្ត្រីសម្តេចគ្មានសិទ្ធិ ឬត្អូញត្អែរនឹងការនឿយហត់ចំពោះការងារនោះឡើយ។

សម្តេចតេជោ ហ៊ុន សែន ចាប់តាំងពីថ្ងៃទី២០ ខែមិថុនា ឆ្នាំ១៩៧៧ ថ្ងៃផ្តើមដំណើរតស៊ូរំដោះជាតិចេញពីរបបប្រល័យពូជសាសន៍ប៉ុលពត បានក្លាយទៅជាឥស្សរជនផ្សារភ្ជាប់នឹងជោគវាសនាជាតិ និងប្រជាជន ហើយបានយកជីវិត កម្លាំងកាយ និងបញ្ញាញាណទាំងមូលទៅពលិកម្ម ដើម្បីជាឧត្តមប្រយោជន៍ជាតិ និងប្រជាជន។

កិច្ចខិតខំប្រឹងប្រែង និងការលះបង់ដោយឥតលក្ខណ្ឌរបស់សម្តេចតេជោ ហ៊ុន សែន បានធ្វើឱ្យជាតិកម្ពុជារួចផុតពីភ្នក់ភ្លើងសង្គ្រាម ងើបចេញពីគំនរផេះផង់នៃភ្លើងសង្គ្រាម ក្លាយជាប្រទេសមានការអភិវឌ្ឍ និងចម្រើនលូតលាស់។ ប្រជាពលរដ្ឋងើបចេញពីភាពវេទនាដោយសារភ្លើងសង្គ្រាម រស់នៅប្រកបដោយសេចក្តីសុខ និងវិបុលភាព៕

វិភាគអន្តរជាតិ៖ តើនរណាទទួលផល ពីការផ្ទុះបំពង់ឧស្ម័ន Nord Stream?

(វ៉ាស៊ីនតោន)៖ បន្ទាប់ពីមានហេតុការណ៍ផ្ទុះបំពង់ឧស្ម័ន Nord Stream 1 និង Nord Stream 2 នៅក្រោមបាតសមុទ្របាល់ទិក ដែលផ្គត់ផ្គង់ឧស្ម័នចេញពីរុស្ស៉ីឆ្ពោះទៅកាន់ អាល្លឺម៉ង់ កាលពីថ្ងៃអង្គារដើមសប្ដាហ៍នេះ ក្រុមមន្ត្រីអឺរ៉ុប និងណាតូបានយល់ស្របដូចគ្នាថា «ការផ្ទុះនេះជាទង្វើបំផ្លិចបំផ្លាញដោយចេតនា» ពោលគឺមិនមែនកើតឡើងដោយ ចៃដន្យនោះទេ។ ការផ្ទុះដែលធ្វើឱ្យលេចធ្លាយឧស្ម័ននេះបានកើតឡើងនៅក្បែរកោះ ប៊នហូម (Bornholm) របស់ដាណឺម៉ាក នៅក្នុងតំបន់សមុទ្របាល់ទិក។

ខណៈការស៊ើបអង្កេតកំពុងធ្វើឡើង ទាំងសហរដ្ឋអាមេរិក រួមទាំងបណ្ដាសម្ព័ន្ធមិត្តអឺរ៉ុបរបស់ខ្លួន មិនបាននិយាយចំឈ្មោះជនសង្ស័យណាមួយទេ ហើយថែមទាំងបញ្ជាក់ទៀត ផងថាវាហាក់ដូចជាលឿនពេកដែលទម្លាក់ការសង្ស័យលើរុស្ស៉ីថាជាអ្នកនៅពីក្រោយទង្វើបំផ្លិចបំផ្លាញនេះ បើទោះជាក្រុមមន្ត្រីអឺរ៉ុប និងអ្នកជំនាញលោកខាងលិចភាគច្រើន ដាក់ការសង្ស័យខ្ពស់ជាងគេលើរុស្ស៉ីក៏ដោយ។ បើតាមក្រុមអ្នកជំនាញ គេត្រូវការពេលវេលារាប់ខែ ដើម្បីវាយតម្លៃ និងជួសជុលការខូចខាតនៃបំពង់ឧស្ម័នទាំង២នេះ ហើយ វាជារឿងដ៏ស្មុគស្មាញបំផុត ក្នុងការឆ្លើយនឹងសំណួរថាតើនរណាជាអ្នកនៅពីក្រោយការបំផ្ទុះបំពង់ឧស្ម័ន Nord Stream 1 និង Nord Stream 2 នៅក្នុងបរិបទដែលភាគី ពាក់ព័ន្ធកំពុងការចោទប្រកាន់ និងទម្លាក់កំហុសដាក់គ្នាទៅវិញទៅមក។

ថាតើនរណានៅពីក្រោយការផ្ទុះនេះ គឺពិបាកឆ្លើយខ្លាំងណាស់ តែព្រមពេលជាមួយគ្នា ពិតណាស់វាប្រាកដជាមានអ្នកទទួលបានផលចំណេញពីទង្វើបំផ្លិចបំផ្លាញនេះ? ពិតមែនទៅ មានតួអង្គជាច្រើនអាចជាប់សង្ស័យ ដោយមិនមែនមានត្រឹមតែរុស្ស៉ីម្នាក់ឯងនោះទេ ទាស់នៅត្រង់ថារុស្ស៉ីត្រូវបានគេសង្ស័យខ្ពស់ជាងគេ ដោយសារតែសង្រ្គាមនៅអ៊ុយក្រែន។ ក្រុមមន្ត្រីអ៊ុយក្រែនបានចោទត្រង់ៗ តែម្ដងថា «ទង្វើវិច្ឆេទកម្ម ឬការបំផ្លិចបំផ្លាញដោយចេតនា» លើបំពង់ឧស្ម័ន Nord Stream 1 និង Nord Stream 2 គឺជាយុទ្ធសាស្ត្រមួយរបស់រុស្ស៉ី ក្នុងការប្រើប្រាស់ឧស្ម័នជា អាវុធបំផ្លាញសាមគ្គីភាព និងការគាំទ្ររបស់អឺរ៉ុបចំពោះអ៊ុយក្រែន នៅមុនរដូវទឹកកកចូលមកដល់។ «ការលេចធ្លាយឧស្ម័នទ្រង់ទ្រាយធំបែបនេះច្បាស់ណាស់ថាជាផែនការ វាយប្រហារភេរវកម្មបង្កឡើងដោយរុស្ស៉ី និងជាសកម្មភាពឈ្លានពានប្រឆាំងនឹងសហភាពអឺរ៉ុប»។ នេះជាការលើកឡើងរបស់ទីប្រឹក្សាប្រធានាធិបតីអ៊ុយក្រែន លោក មីខាយឡូ ប៉ូដុលយ៉ាក់ (Mikhaylo Podolyak)។

ក៏ប៉ុន្តែ មានចំណុចគួរឱ្យសង្ស័យចំពោះការអះអាងបែបនេះ នោះគឺនៅត្រង់ថារុស្ស៉ីទំនងជានឹងទទួលផលតិចតួចប៉ុណ្ណោះ ហើយអាចនឹងបាត់បង់ឥទ្ធិពលទាំងស្រុងលើអឺរ៉ុបតែម្ដង ប្រសិនបើមូស្គូបំផ្លាញបំពង់បង្ហូរឧស្ម័នរបស់ខ្លួនឯងចោល។ បានន័យថាជាយុទ្ធសាស្ត្រល្អ លោក ពូទីន មានតែត្រូវទុកបំពង់ឧស្ម័នទាំងនេះដោយចង់បិទ ឬបើកតាមតែចិត្តរបស់ លោកដើម្បីដាក់សម្ពាធ ឬមានឥទ្ធិពលលើការសម្រេចចិត្តរបស់អឺរ៉ុប។ បំពង់ឧស្ម័ន Nord Stream 1 និង Nord Stream 2 ត្រូវបានកាន់កាប់ក្រោមគម្រោងរួមគ្នារវាងក្រុមហ៊ុន រុស្ស៉ី Gazprom និងក្រុមហ៊ុនអឺរ៉ុបជាដៃគូចំនួន៤ ដោយក្នុងនោះ Gazprom ក្ដាប់ភាគហ៊ុន ៥១ភាគរយ។

ក្រៅតែពីរុស្ស៉ី អ៊ុយក្រែន ប៉ូឡូញ ហ្វាំងឡង់ និងប្រទេសក្នុងតំបន់បាល់ទិកទាំង៣ ដូចជាអេស្ដូនី ឡេតូនី និងលីទុយអានី ក៏អាចជាជនសង្ស័យដែរ ដ្បិតពួកគេសុទ្ធតែមាន ទំនាក់ទំនងល្អក់កករជាមួយរុស្ស៉ី និងតែងតែបង្ហាញជំហរប្រឆាំងនឹងការពឹងផ្អែកលើបំពង់បង្ហូរឧស្ម័នរុស្ស៉ី។ តែយ៉ាងណាក៏ដោយ ប្រទេសទាំងនេះតួយ៉ាងដូចជាអ៊ុយក្រែនមាន ភាគរយតិចតួចណាស់ ដែលមានជាប់ពាក់ព័ន្ធ ពីព្រោះថាវាអាចនឹងខាតបង់ប្រយោជន៍ធំ ដ្បិតបើរកឃើញថាជាអ៊ុយក្រែនជាអ្នកនៅពីក្រោយការបំផ្លិចបំផ្លាញ នោះទីក្រុងកៀវ អាចនឹងបាត់បង់ការគាំទ្រពីសម្ព័ន្ធមិត្តអឺរ៉ុបរបស់ខ្លួន។

ដូច្នេះចុះសហរដ្ឋអាមេរិកវិញ? សហរដ្ឋអាមេរិកបានបង្ហាញជំហរប្រឆាំង និងអំពាវនាវជារឿយៗឱ្យប្រទេសអឺរ៉ុប ជាពិសេសគឺអាល្លឺម៉ង់បញ្ឈប់ការពឹងផ្អែកលើការនាំចូលឧស្ម័នពី រុស្ស៉ី។ កាលពីឆ្នាំ២០១៨ អតីតប្រធានាធិបតីអាមេរិក លោក ដូណាល់ ត្រាំ បានព្រមានបណ្ដាប្រទេសអឺរ៉ុបនៅឯមហាសន្និបាតអង្គការសហប្រជាជាតិពីលទ្ធភាពដែលរុស្ស៉ីនឹង ប្រើឧស្ម័នជាអាវុធ។ តែនៅពេលនោះ ក្រុមមន្ត្រីប្រតិភូអាល្លឺម៉ង់បែរជាត្រូវបានគេថតជាប់បង្ហាញកាយវិការចំអកដាក់លោក ត្រាំទៅវិញ ហើយនៅក្រោយសង្រ្គាមអ៊ុយក្រែន ផ្ទុះឡើង ទើបការព្រមានរបស់លោក ត្រាំបានក្លាយជាការពិត បន្ទាប់ពីរុស្ស៉ីកាត់ផ្ដាច់ការផ្គង់ផ្គង់ឧស្ម័នទៅកាន់អឺរ៉ុប។

អ្នកនាំពាក្យវិមានក្រឹមឡាំង លោក ឌីមីទ្រី ប៉េសកូវ បានចោទប្រកាន់ថាសហរដ្ឋអាមេរិក គឺជានៅពីក្រោយការបំផិ្លចបំផ្លាញ ដោយលោកសំអាងថាអាមេរិកដែលជាអ្នកផ្គត់ផ្គង់ ឧស្ម័នធម្មជាតិដ៏ធំមួយដែរនោះ អាចនឹងទទួលបានផលចំណេញជាច្រើនពីការបង្កើនការលក់ឧស្ម័នឱ្យអឺរ៉ុប។ បន្ថែមពីលើនេះ សារព័ត៌មានរុស្ស៉ីក៏បានបង្ហាញពីការគាំទ្រចំពោះ ការលើកឡើងរបស់លោក ប៉េសកូវដែរ តាមរយៈការចេញផ្សាយវីដេអូមួយរបស់លោក បៃដិន ដែលបានថ្លែងកាលពីថ្ងៃទី៧ ខែកុម្ភៈដូច្នេះថា «ប្រសិនបើរុស្ស៉ីឈ្លានពាន អ៊ុយក្រែន នោះវានឹងលែងមានទៀតហើយបំពង់ឧស្ម័ន Nord Stream 2....»។

សហរដ្ឋអាមេរិក បានក្លាយជាអ្នកផ្គត់ផ្គង់ដ៏សំខាន់នូវឧស្ម័ន LNG ទៅកាន់អឺរ៉ុបដែលកំពុងស្ដុកទុកឧស្ម័នប្រភេទនេះ ដើម្បីប្រើប្រាស់នៅរដូវទឹកកក។ ឧស្ម័ន LNG របស់អាមេរិក ភាគច្រើនត្រូវបានផ្គត់ផ្គង់តាមរយៈប្រទេសបារាំង អេស្ប៉ាញ និងហូឡង់ ហើយក៏មានសេចក្ដីរាយការណ៍ដែរថាសហរដ្ឋអាមេរិកមានសមត្ថភាពគ្រប់គ្រាន់ ក្នុងនាំចេញឧស្ម័ន LNG ទៅកាន់ទ្វីបអឺរ៉ុប និងអាស៊ី។ នេះមានន័យថា បើបំពង់ឧស្ម័នរុស្ស៊ីទាំង២ គាំងដំណើរការ នោះអាមេរិកអាចនឹងក្លាយជាអ្នកផ្គត់ផ្គង់ឧស្ម័នដ៏ធំមួយឲ្យអឺរ៉ុបផង ហើយក៏អាចបន្សាបឥទ្ធិពលឧស្ម័នរបស់រុស្ស៊ីនៅអឺរ៉ុបផង៕ (Fresh News)