នៅរសៀលថ្ងៃទី៥ ខែកក្កដា ឆ្នាំ២០១៥ ដែលជាថ្ងៃទី៤នៃការស្នាក់អាស្រ័យបំពេញការងារនៅប្រទេសជប៉ុន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញចូលរួម ក្នុងពិធីបើកសិក្ខាសិលាផ្សព្វផ្សាយ ស្តីពីអំពីសក្តានុពលវិនិយោគនៅកម្ពុជា ដែលរៀបចំឡើងដោយអង្គការពាណិជ្ជកម្មក្រៅប្រទេសជប៉ុន។ អង្គសិក្ខាសាលានេះក៏មានការចូលរួមពីអ្នកវិនិយោគទុនជប៉ុន ទីក្រុងគីតាគ្យូស្យូ ខេត្តហ៊្វូគុអូកា និងក្រុមអ្នកវិនិយោគរបស់ប្រទេសកម្ពុជាប្រមាណ ២៥០នាក់។
តំណាងថ្នាក់ដឹកនាំ នៃអង្គការពាណិជ្ជកម្មក្រៅប្រទេសជប៉ុន និងថ្នាក់ដឹកនាំខេត្តហ៊្វូគុអូកា បានសំដែងនូវការវាយតម្លៃខ្ពស់ ចំពោះកិច្ចសហប្រតិបត្តិការលើគ្រប់វិស័យ នៃប្រទេសទាំងពីរមានការរីកចំរើនយ៉ាងឆាប់រហ័យបំផុត។ តាមរយៈសុន្ទរកថាគន្លឹៈនោះដែរ ថ្នាក់ដឹកនាំនៃអង្គការពាណិជ្ជកម្មក្រៅប្រទេសជប៉ុន និងថ្នាក់ដឹកនាំខេត្តហ៊្វូគុអូកា បានសំដែងនូវការវាយតម្លៃខ្ពស់ ចំពោះវត្តមានរបស់សម្តេចតេជោនាយករដ្ឋមន្រ្តី នៅក្នុងក្នុងអង្គសិក្ខាសាលានៅពេលនេះ នឹងរួមចំណែកយ៉ាងសំខាន់ ដើម្បីបញ្ជាក់ពីការប្តេជ្ញាចិត្តរបស់រាជរដ្ឋាភិបាលកម្ពុជា ចំពោះមុខអ្នកវិនិយោគជប៉ុនដែលមានបំណងទៅបណ្តាក់ទុន នៅក្នុងប្រទេសកម្ពុជា ដែលមានសក្តានុពលដ៏សំបូរបែបនោះ។
សម្តេចតេជោ ហ៊ុន សែន បានថ្លែងសុន្ទរកថាគន្លឹៈទៅកាន់សិក្ខាសាលាដើម្បីផ្សព្វផ្សាយ ស្តីអំពីសក្តានុពលវិនិយោគនៅកម្ពុជា ក្នុងខ្លឹមសារដ៏មានអត្ថន័យបំផុត។
បន្ទាប់មកសម្តេចតេជោ ហ៊ុន សែន និងគណៈប្រតិភូជាន់ខ្ពស់រាជរដ្ឋាភិបាលកម្ពុជា អញ្ជើញទស្សនាក្រុមហ៊ុនមនុស្សយន្ត យ៉ាហ្កាវ៉ា ស្ថិតក្នុងទីក្រុងគីតាគ្យូស្យូខេត្តហ៊្វូគុអូកាប្រទេសជប៉ុន។
វត្តមាននៃការអញ្ជើញដល់របស់សម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់រាជរដ្ឋាភិបាលកម្ពុជា ត្រូវបានការធ្វើគារវកិច្ចស្វាគមន៍យ៉ាងស្និតស្នាលរ៉ាក់ទាក់បំផុត ពីសំណាក់ថ្នាក់ដឹកនាំ មន្រ្តី បុគ្គលិកក្រុមហ៊ុនមនុស្សយន្តយ៉ាហ្កាវ៉ាជាច្រើនរូប។
ក្រុមហ៊ុននេះមានអាយុកាល១០០ឆ្នាំមកហើយ គឺបង្កើតឡើងនៅឆ្នាំ១៩១៥ និងមានទុនវិនិយោគប្រមាណ ២៧៨ពាន់លានយ៉េន និងមានកម្មករសរុបចំនួន ១៥ពាន់៣៣៣នាក់។ ជាមួយនិងការផលិតផលរបស់ខ្លួនដែលបាន ផលិតបាននោះ ទឹកប្រាក់ដែលក្រុមហ៊ុនលក់ចេញមានទឹកប្រាក់ ៤ពាន់២លានយ៉េនជប៉ុន។ ការងារចម្បង របស់ក្រុមហ៊ុនគឺការផលិតនូវម៉ាស៊ីនបញ្ជាចលនា ដែលសន្សំសំចៃថាមពល ផលិតមនុស្សយន្ត ប្រព័ន្ធវិស្វកម្ម ដែលជាប់ចំណាត់ថ្នាក់ទី១លើទីផ្សារពិភពលោក។ រោងចក្រដ៏ទំនើបនេះបានផលិតនូវមនុស្សយន្តសំរាប់ឧស្សាហកម្ម មនុស្សយន្តសំរាប់ផលិតបរិក្ខារអេឡិចត្រូនិច និងមនុស្សយន្តសំរាប់សុខាភិបាលជាដើម។ បន្ទាប់ពីបានតាមស្តាប់យ៉ាងយកចិត្តទុកដាក់ពីការឧទ្ទេសនាម ស្តីពីនិរន្តរភាពនៃសកម្មភាពវិនិយោគ និងសកម្មភាពនៃការផលិតមនុស្សយន្តរួចមក សម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់រាជរដ្ឋាភិ បាលកម្ពុជា អញ្ជើញទស្សនាខ្សែសង្វាក់ផលិតកម្មក្នុងក្រុមហ៊ុន។
សូមបញ្ជាក់ថា នៅក្នុងការចូលរួមចំណែកដល់ការអភិវឌ្ឍសេដ្ឋកិច្ច និង ការរីកចំរើនរបស់ប្រទេសកម្ពុជា ប្រទេសជប៉ុនបានបំពេញនូវតួនាទីយ៉ាងសំខាន់ ក្នុងដំណើរការនៃការពង្រឹងសុខសន្តិភាព និងឯកភាពជាតិរបស់កម្ពុជា នឹងក៏ជាដៃគូដ៏សំខាន់ដែលបានផ្តល់ហិរញ្ញប្បទានយ៉ាងច្រើន ក្នុងការចូលរួមអភិវឌ្ឍសេដ្ឋកិច្ច សង្គមនៅកម្ពុជា។ ចាប់តាំងពីខែធ្នូឆ្នាំ២០១៣ ប្រទេសទាំងពីរកម្ពុជា ជប៉ុន បានតម្លើងឋានៈនៃទំនាក់ទំនងរបស់ខ្លួនក្លាយទៅជាដៃគូយុទ្ធសាស្រ្ត ដើម្បីបន្តពង្រឹងនិងពង្រីកវិសាលភាព នៃកិច្ចសហប្រតិបត្តិការឲ្យកាន់តែទូលំទូលាយបន្ថែមទៀត ក្នុងគោលដៅជំរុញកិច្ចអភិវឌ្ឍន៍កម្ពុជា ឲ្យកាន់តែមានកម្រិតខ្ពស់ និងប្រកបដោយចីរភាព តាមរយៈការផ្តល់ហិរញ្ញប្បទានអភិវឌ្ឍន៍ផ្លូវការ និងការបង្កើនវិនិយោគទុនរបស់ជប៉ុននៅកម្ពុជា។
បន្ទាប់ពីបានអញ្ជើញទស្សនាក្រុមហ៊ុនមនុស្សយន្តយ៉ាហ្កាវ៉ារួចមក សម្តេចអគ្គមហាសេនាបតីតេជោ ហ៊ុន សែន ប្រមុចនៃរាជរដ្ឋាភិបាលកម្ពុជា និងគណៈប្រតិភូជាន់ខ្ពស់រាជរដ្ឋាភិបាលកម្ពុជា អញ្ជើញទស្សន កិច្ចទៅកាន់រោងចក្រចំរាញទឹកស្អាតហៃហ្ការី ទីក្រុងគីតាគ្យូស្យូខេត្តហ៊្វូគុអូកាប្រទេសជប៉ុន។ រោងចក្រផលិតស្អាតនេះ បានបង្កើតឡើងនៅឆ្នាំ១៩៧០ រហូតមកដល់ពេលនេះមានអាយុកាល៤៥ឆ្នាំមកហើយ។ តាមការឲ្យដឹងពីមន្រ្តីគ្រប់គ្រងបច្ចេកទេសបានឲ្យដឹងថា ការបង្កើតឡើងនូវរោងចក្រនេះ គឺដើម្បីផលិតទឹក កខ្វក់ជាច្រើននៅក្នុងតំបន់នេះ។
ពីដំណាក់កាលមួយទៅកាន់ដំណាក់កាលមួយ រោងចក្រនេះបានធ្វើការ អភិវឌ្ឍសមត្ថភាពរបស់ខ្លួន ក្នុងការចំរាញទឹកកខ្វក់ក្នុងតំបន់នេះមានសភាពល្អប្រសើរជាលំដាប់ រហូតមក ដល់ឆ្នាំ២០០៦ ទឹកប្រើប្រាស់នៅក្នុងតំបន់នេះបានផលិតដែលមានគុណភាពខ្ពស់លើអត្រាប្រមាណ ៩៩,៨% ដែលប្រជាពលរដ្ឋប្រើប្រាស់ដោយមិនមានបញ្ហាអ្វីកើតឡើង។ នៅក្នុងកិច្ចសហប្រតិបត្តិការជាមួយនិងប្រទេសកម្ពុជា រដ្ឋាភិបាលជប៉ុនតាមរយៈថ្នាក់ដឹកនាំទីក្រុងគីតាគ្យូស្យូ ខេត្តហ៊្វូគុអូកាប្រទេសជប៉ុន បានទទួលមន្រ្តី និងនិស្សិតកម្ពុជា មកសិក្សានៅទីនេះពីការបំណិតទឹកស្អាត ពិសេសនៅក្នុងអង្គភាពរដ្ឋាករ ទឹកកម្ពុជា។
បន្ទាប់មកនៅរាត្រីថ្ងៃទី៥កក្កដា ឯកឧត្តម កែនជី គីតាហាស៊ី អភិបាលក្រុងគីតាគ្យូស៊្សូ បានរៀបចំនូវ ពិធីពិសារអាហារពេលល្ងាចជាមហាកិត្តិយសជូនសម្តេចអគ្គមហាសេនាបតីតេជោ ហ៊ុន សែន និងគណៈប្រតិភូជាន់ខ្ពស់រាជរដ្ឋាភិបាលកម្ពុជា។ ឯកឧត្តម កែនជី គីតាហាស៊ី អភិបាលក្រុងគីតាគ្យូស៊្សូ មានប្រសាសន៍ថ្លែងនូវអំណរគុណយ៉ាងជ្រាលជ្រៅ និងសូមសំដែងនូវការធ្វើគារវកិច្ចយ៉ាងកក់ក្តៅបំផុត ក្នុងនាមថ្នាក់ដឹកនាំនិងប្រជាជនទីក្រុងគីតាគ្យូស៊្សូ ជូនចំពោះវត្តមានដ៏ឧត្តុង្គឧត្តមរបស់សម្តេចតេជោនាយករដ្ឋមន្រ្តី និងគណៈប្រតិភូដែលបានចំណាយពេលវេលាដ៏មានតម្លៃ អញ្ជើញមកទស្សនាដែនដីដ៏ពិសិដ្ឋនេះ។
ក្នុងពិធីដ៏មានអត្ថន័យនោះដែរ ឯកឧត្តមអភិបាលក្រុងមានប្រសាសន៍ថា នេះគឺជាលើកទី១ ហើយដែលមេដឹកនាំប្រមុខរដ្ឋាភិបាលនៃប្រទេសមេគង្គ ដែលបានអញ្ជើញមកធ្វើទស្សនកិច្ចនៅតំបន់នេះ ដែលនោះបានបង្ហាញឲ្យឃើញពីការយកចិត្តទុកដាក់បផុត ពីសំណាក់សម្តេចតេជោនាយករដ្ឋមន្រ្តី ចំពោះទំនាក់ទំនងជាប្រពៃណីនៃប្រទេសយើងទាំងពីរកម្ពុជា-ជប៉ុន។ ក្នុងពិធីទទួលទានអាហារពេលរាត្រីនោះដែរ ឯកឧត្តមអភិបាលក្រុង បានជំរាបជូនសម្តេចតេជោនាយករដ្ឋមន្រ្តីពីទំនាក់ទំនងនៃទីក្រុងគីតាគ្យូស៊្សូ ជាមួយនិងប្រទេសកម្ពុជា ពិសេសការរួមចំណែកបណ្តុះបណ្តាលធនធានមនុស្ស។
ជាមួយគ្នានេះឯកឧត្តម បានគូសបញ្ជាក់ពីសក្តានុពល កំណើនសេដ្ឋកិច្ច និងជីវភាពរស់នៅរបស់ប្រជាពលរដ្ឋរស់នៅទីក្រុងគីតាគ្យូស៊្សូ ជូនសម្តេចតេជោនាយករដ្ឋមន្រ្តី និងគណៈប្រតិភូបានស្វែងយល់ផងដែរ។ ជាការឆ្លើយតបសម្តេចតេជោនាយក រដ្ឋមន្រ្តីមានប្រសាសន៍ថ្លែងនូវអំណរគុណយ៉ាងជ្រាលជ្រៅបំផុត ជូនចំពោះថ្នាក់ដឹកនាំនិងប្រជាពលរដ្ឋទីក្រុងគីតាគ្យូស៊្សូ ដែលបានទទួលបដិសណ្ឋារកិច្ចនិងស្វាគមន៍យ៉ាងកក់ក្តៅបំផុត ចំពោះវត្តមានរបស់ សម្តេចនិងគណៈប្រតិភូរាជរដ្ឋាភិបាលកម្ពុជា មកកាន់ទីក្រុងដ៏ស្រស់បំព្រងនេះ។
សម្តេចតេជោនាយករដ្ឋមន្រ្តីក៏បានគូសបញ្ជាក់ពីភាពជាអ្នកជិតខាងល្អ នៃទំនាក់ទំនងកិច្ចសហប្រតិបត្តិការនៃប្រទេសនិងប្រជាជនទាំងពីរ ដែលបានឈានដល់ភាពជាដៃគូយុទ្ធសាស្រ្ត ហើយនៅពេលខាងមុខថ្នាក់ដឹកនាំ ទាំងពីរនឹងខិតខំជំរុញទំនាក់ទំនងនៃប្រទេសពីរ ឲ្យឈានដល់ភាពជាដៃគួយុទ្ធសាស្រ្តទូលំទូលាយ៕