តំណាងភាគី កម្ពុជា និងអង្គការសហប្រជាជាតិ ចេញសេចក្តីប្រកាសព័ត៌មានរួម ទាក់ទងនឹងសាលាក្តីខ្មែរក្រហម

ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តីរដ្ឋមន្រ្តីទទួលបន្ទុក ទីស្តីការ​គណៈ​រដ្ឋ​មន្រ្តី និងជាប្រធានក្រុមការងាររបស់រាជរដ្ឋាភិបាលកម្ពុជា ទទួលបន្ទុកសាលាក្តី​ខ្មែ​រ​ក្រ​ហម និងឯកឧត្តមឯកអគ្គរដ្ឋទូត ដេវិត សេហ្វ័រ អ្នកជំនាញការ​ពិសេសរបស់​ឯកឧត្តម​អគ្គ​លេខា​ធិការ ទទួលបន្ទុកសាលាក្តីខ្មែរក្រហម នៅ​ថ្ងៃ​នេះ​ បានចេញ​សេចក្តី​ប្រកាសព័ត៌​មាន​រួមគ្នាមួយ​ បន្ទាប់​ពីបានពិភាក្សាការងារជាមួយគ្នា ប្រកបដោយផ្លែផ្កា នៅទីស្តីការគណៈរដ្ឋមន្រ្តី វិមាន​មិត្តភាព។

សេចក្តីប្រកាសព័ត៌មានរួម បានបញ្ជាក់ថា បន្ទាប់ពីបញ្ចប់​កិច្ច​ពិភាក្សាការងារ​ ភាគីទាំងពីរ​បានបង្ហាញជំហរបន្តការគាំទ្រពេញទំហឹងរបស់ខ្លួនចំពោះកិច្ចសហប្រតិបត្តិការ ក្នុងការអនុវត្ត​រាល់ខ្លឹមសារច្បាប់ នៃ​អង្គជំ​នុំ​ជម្រះ​វិសមញ្ញនៃ​តុលាការ​កម្ពុជា​ អ.វ.ត.ក និងកិច្ច​ព្រម​ព្រៀងរវាងរាជរដ្ឋាភិបានកម្ពុជា និងអង្គការសហប្រជាជាតិ ដើម្បីបំពេញអាណត្តិតុលាការ និងអនុវត្តនីតិវិធិរបស់អង្គជំនុំជម្រះវិសាមញ្ញក្នុងតុលាការកម្ពុជា។

សេចក្តី​ប្រកាសព័ត៌មាន​រួម​ ក៏​បាន​បញ្ជាក់​ដែរថា​នៅចុងបញ្ចប់នៃកិច្ចប្រជុំ ភាគី​ទាំង​ពីរ ក៏​បាន​​ធ្វើ​កំណត់ហតុនៃ​ការ​យោគ​យល់គ្នាមួយ ត្រូវបានចុះហត្ថលេខា ទាក់ទងនឹងការដាក់​ឱ្យ​ដំណើការមជ្ឍមណ្ឌលតម្កល់ឯកសារច្បាប់កម្ពុជា (Legal Documentation Centre) ដែលអគារ​ត្រូវបានសាងសង់ក្រោមជំនួយហិរញ្ញវត្ថុរបស់រដ្ឋាភិបាលជប៉ុន។

អត្ថបទ៖ ច័ន្ទ ទេវី

លោកជំទាវ ជូឡុង សូមួរ៉ា ភរិយា ឯកឧត្តម សម រង្ស៊ី ត្រូវបានតែងតាំងជា អ្នកនាំពាក្យបម្រុង រដ្ឋសភាជាតិ នីតិកាលទី៥

យោងតាម​សេចក្តីសម្រេច​របស់រដ្ឋ​សភា​ជាតិនៃ​ព្រះរាជា​ណាចក្រ​កម្ពុជា​ ដែលបាន​ចុះហត្ថលេខា​ដោយ ​សម្តេច​ពញាចក្រី ​ហេង​ សំរិន​ ប្រធាន​រដ្ឋសភា ​កាលពីថ្ងៃទី ​១៨​ ខែមីនា​ ឆ្នាំ២០១៥ បានឲ្យ​ដឹងថា ​លោកជំទាវ ​ជូឡុង ​សូមួរ៉ា ​អនុប្រធាន​គណៈកម្មការកិច្ចការបរទេស សហប្រតិបត្តិការ​អន្តរជាតិ​ ឃោសនាការ ​និងព័ត៌មាន​ ត្រូវបាន​តែងតាំង​ ជាអ្នកនាំ​ពាក្យបម្រុង​នៃរដ្ឋសភា​ជាតិ ​ដោយក្នុងនោះ​ ឯកឧត្តម ​ឈាង ​វុន ​ប្រធាន​គណៈកម្មការ​កិច្ចការបរទេស​ សហប្រតិបត្តិការ​អន្តរជាតិ​ ឃោសនាការ ​និង​ព័ត៌មាន​ ជាអ្នកនាំ​ពាក្យរដ្ឋសភា​ នីតិកាល​ទី៥នេះ។

នៅក្នុង​សេចក្តី​សម្រេច​ដដែលនោះ​ បានបញ្ជាក់ថា​ អ្នកនាំពាក្យ​នេះ​មានតួនាទី​ និងភារកិច្ច​រៀបចំ​ឯកសារ​ផ្សព្វផ្សាយ​ព័ត៌មាន​ និងធ្វើការ​បំភ្លឺជូន​សាធារណជន​ ចំពោះ​ព្រឹត្តិការណ៍ ​និង​សភាព​ការណ៍​នយោបាយ​ជាតិ​ និង​អន្តរជាតិ​សំខាន់ៗ​មកលើ​រដ្ឋសភា ​នៃ​ព្រះរាជា​ណាចក្រ​កម្ពុជា​។ ក្នុងករណី​អ្នកនាំពាក្យ​ជាប់បំពេញ​បេសកម្ម​ក្រៅប្រទេស​ អ្នកនាំ​ពាក្យ​បម្រុង​ត្រូវទទួល​ភារៈកិច្ច​ជំនួស៕

អត្ថបទ៖ ច័ន្ទ ទេវី

នាយក​រដ្ឋមន្ត្រី​កម្ពុជា ស្នើឲ្យ​អាមេរិក​ជួយ​ឲ្យ​ចប់​កម្ម​វិធីជួយ​ស្ត្រី រហូត​ដល់ឧត្តម​សិក្សា

ចេញផ្សាយថ្ងៃ: ( ២៥ - មិនា - ២០១៥ )
ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី បានស្នើឲ្យសហរដ្ឋ អាមេរិក ជួយដល់កម្ពុជាឲ្យចប់ចុងចប់ដើម លើកម្មវិធីគាំទ្រការអប់រំក្មេងស្រី ឲ្យបន្តការសិក្សា រហូតដល់ថ្នាក់មហាវិទ្យាល័យ ដើម្បីក្មេងស្រីក្រីក្រនោះ អាចមានលទ្ធភាព បន្តការសិក្សា នៅ ថ្នាក់ឧត្តមសិក្សា។ ការថ្លែងរបស់ សម្តេចតេជោនាយករដ្ឋមន្ត្រីពេលនេះ នៅក្រោយ៤ថ្ងៃ នៃដំណើរ ទស្សនកិច្ច របស់លោកជំទាវទី១ សហរដ្ឋអាមេរិក មីសែល អូបាម៉ា  មកកាន់ ព្រះរាជាណាចក្រ កម្ពុជា។

ថ្លែងនៅក្នុងពិធីប្រគល់​សញ្ញាបត្រ​គ្រូបង្រៀនកម្រិត​ឧត្តមជំនាន់ទី១៩ ​និងសញ្ញាបត្រ​គ្រូបង្រៀ ន កម្រិតមូលដ្ឋាន ​ឯកទេសភាសាបារាំង-ខ្មែរ ជំនាន់ទី១៦ នៅវិទ្យាស្ថាន​ជាតិអប់រំ នាព្រឹកថ្ងៃទី ២៥ មីនានេះ សម្តេចតេជោ ហ៊ុន សែន បានស្នើសុំឲ្យសហរដ្ឋអាមេរិកពង្រីកកម្មវិធី ជួយ ក្មេង ស្រីតាមរយៈ​គំរោងផ្តល់ឱកាសឲ្យសិស្សស្រីបានសិក្សា ឬ  Let Girls Learn ៤ឆ្នាំ បន្ថែមទៀត ដើម្បីបន្ថែមលទ្ធភាព​ក្មេងស្រីក្រីក្រ​ទាំងនោះ​ អាចបញ្ចប់ការសិក្សានៅថ្នាក់ឧត្តម តាមរយៈការ ពង្រីកវិសាលភាពពី ៦ឆ្នាំ ឲ្យដល់១០ឆ្នាំ។

គម្រោង Let Girls Learn គឺជាគម្រោង ដែល​ត្រូវបាន​​គាំទ្រ ដោយ​ស្ថានទូត​​អាមេរិក​តាមរយៈ             ទីភ្នាក់ងារសហរដ្ឋអាមេរិកសំរាប់ការអភិវឌ្ឍ USAID ដោយជ្រើសរើសក្មេងស្រីក្រីក្រ និង​ជួយ​ពួកគាត់ឲ្យបន្តសិក្សា នៅថ្នាក់​អនុវិទ្យាល័យ រហូតដល់វិទ្យាល័យ ។

សម្តេចតេជោ បានគាំទ្រនូវ​យុទ្ធនាការ លើការផ្តល់ឱកាស​ឲ្យសិស្សស្រី​បានសិក្សា រឺ Let Girls Learn របស់​សហរដ្ឋអាមេរិក​ដែលនឹងផ្តល់ឱកាស​ច្រើនដល់ស្រីក្រីក្រ​អាចបន្តសិក្សា​ ប៉ុន្តែ​សម្តេច​​តេជោ បានបញ្ជាក់ថា អាមេរិកបានទំលាក់ការទទួលខុសត្រូវ​ទាំងស្រុងលើការ​សិក្សា​នៅ​ ថ្នាក់មហាវិទ្យាល័យមកក្រសួងអប់រំទៅវិញ។ សម្តេច ទទូចឲ្យអាមេរិកធ្វើការងារនេះ ឲ្យ​បាន ចប់ចុងចប់ដើម ជួយឲ្យដល់ថ្នាក់មហាវិទ្យាល័យ។​

ទោះបីយ៉ាងណា​ក៍ដោយ សម្តេចតេជោ​ ហ៊ុន សែន និងសម្តេច​កិត្តព្រឹទ្ធិបណ្ឌិ​ត​ បានសំរេច​ប្រើប្រាស់​កញ្ចប់ផ្ទាល់ខ្លួន ដើម្បីផ្តល់ជូនក្មេងស្រីទាំង ១០ ដែលកំពុងសិក្សា​នៅវិទ្យាល័យ​បាគង ខេត្តសៀមរាប ដើម្បីបន្តការ សិក្សានៅថ្នាក់ឧត្តម​ ដោយសម្តេចនឹងផ្តល់​ថវិកា​១៥០០​ដុល្លារ​អាមេរិក ក្នុងមួយឆ្នាំ ជាមួយនឹងការស្នាក់នៅអន្តេវេសិកដ្ឋាន និងសំភារៈសិក្សាមួយ​ចំនួនទៀតផងដែរ។

គួរបញ្ជាក់ថា នៅក្នុងឱកាសជួប​សំណេះ​សំណាល​ជាមួយក្មេងស្រី នៅវិទ្យាល័យហ៊ុន សែន បា្រសាទ​បាគង នៅជាយក្រុង​សៀមរាប ខេត្តសៀមរាប ព្រះរាជាណាចក្រកម្ពុជា លោក​ជំទាវទី១ សហរដ្ឋអាមេរិក Micchelle Obama  បានអំពាវនាវឲ្យក្មេងស្រីកម្ពុជា បន្តការរៀន​សូត្រ​ក្នុងសាលា ដើម្បីជំរុញ មានភាពស្មើគ្នា និងដើម្បីផ្តល់ឲ្យក្មេងស្រីទទួល​បានសំលេង​មួយ​នៅក្នុង សហគមន៍ នៅក្នុងប្រទេស។ លោកជំទាវទី១ សហរដ្ឋអាមេរិក បានអះអាងថា នៅ​ទូទាំងពិភពលោកមានស្ត្រី​ប្រមាណ៦២លាននាក់មិនបានទទួលការសិក្សា​ ដោយសារមូលហេតុសេដ្ឋកិច្ចនិងវប្បធម៌។

តាមការវាយតំលៃរបស់ក្រសួងអប់រំ យុវជន និងកីឡា បានឲ្យដឹងថា       អត្រាក្មេងស្រី និង​ក្មេង​​​ប្រុសចូលរៀននៅថ្នាក់បឋមសិក្សាមានកំរិតប្រហាក់ប្រហែលគ្នា ប៉ុន្តែអត្រាចូលរៀន​របស់​ក្មេងស្រីនៅថ្នាក់អនុវិទ្យាល័យ និងវិទ្យាល័យមានចំនួនទាបជាងក្មេងប្រុស រហូតដល់​ថ្នាក់​ឧត្តមទៀតសោត ក៍កាន់តែមានចំនួនតិចតួច ទាំងនោះដោយសារកត្តាសេដ្ឋកិច្ច កត្តា​គ្រួសារ និងកត្តាវប្បធម៌ជាដើមជាឧបសគ្គដ៍ធំ៕

 

ឯកឧត្តម​បណ្ឌិត​សភាចារ្យ សុខ អាន អញ្ជើញ​បើក​កិច្ច​សន្ទនា ស្តីពីការ​ជំរុញ​ក្រម​សីល​ធម៌ ផ្នែកធុរ​កិច្ច ការ​អភិ​វឌ្ឍខ្លួន ការរស់​នៅដោយ​ក្តីរីករាយ

ចេញផ្សាយថ្ងៃ: ( ២៥ - មិនា - ២០១៥ )

នៅមជ្ឈមណ្ឌលសន្និបាតនិងពិពរណ៌កោះពេជ្រ នាល្ងាចថ្ងៃទី២៤ ខែ មិនាឆ្នាំ២០១៥  ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្ដី រដ្ឋមន្រ្ដី​ទទួលបន្ទុក​ទីស្ដីការ​គណៈរដ្ឋមន្រ្ដី បានអញ្ជើញបើកកិច្ចសន្ទនា ស្ដីពីការជំរុញ ក្រមសីលធម៌ផ្នែកធុរកិច្ច ការអភិវឌ្ឍខ្លួន ការរស់ដោយ​ក្ដីរីករាយ និងការ ប្រកាសបើកទិវា Yoga អន្តរជាតិ ដែល រៀបចំដោយអង្គការ The Art of Living ។
ឯកឧត្តម Dinesh K. Patnaik  ឯកអគ្គរដ្ឋទូត​ នៃសាធារ​ណ​រដ្ឋ​ឥណ្ឌា​ប្រចាំព្រៈ​រាជាណា​ចក្​រកម្ពុជាបាន​ថ្លែងថា៖ ការរៀបចំ ​កម្មវិធី​នេះឡើង​នៅក្នុងប្រទេស​កម្ពុជាគឺក្នុងបំណង បង្រៀនឲ្យមនុស្សគ្រប់រូប​ឲ្យស្គាល់ពីមេរៀនជីវិត រស់នៅ ដោយប្រកបដោយ សុខសន្ដិភាព និង សុវត្តិភាព កុំឲ្យមានស្រ្ដេសនៅក្នុងជីវិត ពិសេស​ប្រជាពល​រដ្ឋកម្ពុជា​ដែលឆ្លង កាត់ភាពនៃ របបប្រល័យពូជសាសន៍ប៉ុលពត  តាមរយៈធ្វើបទបង្ហាញរបស់ ​ព្រះគ្រូ Sri Sri Ravi Shangkar ដែលជា​មេដឹកនាំ​លក្ខណៈសាសនា និងជាមនុស្សធម៌ដ៏​ល្បី​ល្បាញ ប្រកបដោយ​ទស្សនវិស័យ​ផ្តោតលើពិភពលោក មួយដែល គ្មានអំពើហិង្សានិងគ្មានស្រ្តេសហើយគំនិត​ផ្តួចផ្តើម​របស់​ព្រះគ្រូ រួមមាន ការដោះស្រាយជម្លោះ ការកាត់បន្ថយ ស្រ្តេស ការកាត់ បន្ថយភាពក្រីក្រ និងការសិក្សាសម្រាប់​ទាំង​អស់គ្នា ដើម្បីចែករំលែកនូវ ទស្សនាទានបែបទស្សនៈ វិជ្ជាចំពោះ ជីវិត ដែលគាត់បាននិងកំពុងផ្តល់ដល់​ពិភពលោក​អស់រយៈពេលជាង៣០ឆ្នាំមកហើយ។
ថ្លែងបើកកិច្ចសន្ទនា ឯកឧត្តមបណ្ឌិតសភាចារ្យ សុខ អាន បានមានប្រសាសន៍បញ្ជាក់ថា៖ កម្មវិធីដែលរៀបចំដោយ អង្គការ The Art of Living នាពេលនេះពិតជា​មានសារៈ​សំខាន់ណាស់ សម្រាប់ប្រជាជនកម្ពុជា និងពិភពលោក ជា ពិសេស​នៅក្នុង​បរិបទ​សង្គម​បច្ចុប្បន្ន ដែលទាមទារឱ្យមានល្បឿនលឿន និងផ្តល់សារៈសំខាន់លើការងារ ការប្រកួត ប្រជែង និងភាព​ឥត​ខ្ចោះ។ នៅក្នុងសង្គមដែលប្រែប្រួលលឿនបែបនេះ បច្ចេកវិទ្យា និង​សាកល​ភាវូប​នីយ​កម្ម មិនត្រឹម​តែ​ផ្តល់កាលានុវត្តភាពថ្មីៗប៉ុណ្ណោះទេ ប៉ុន្តែថែមទាំងនាំមកនូវបញ្ហាប្រឈមនានាផងដែរ នៅពេលដែលមនុស្សនៅពាស ពេញ​ពិភព​លោកបាននិងកំពុងស្វែងរកតុល្យភាពមួយរវាងការងារ និងជីវិតរស់នៅ។បើតាមរយៈ​លទ្ធផល​នៃការសិក្សា​នានាបានបង្ហាញ​ថា ស្រេ្តសគឺជា​មូលហេតុ​ចម្បង​បំផុតតែ​មួយគត់នៃអវត្តមានពីការងារ ដែលស្មើនឹង ២ដងនៃ អត្រា បុគ្គលិក មានជម្ងឺ ឬ​រងគ្រោះ​ថ្នាក់។ ស្រ្តេសបាន​ក្លាយ​ជា​បញ្ហានៃគោលនយោបាយ​សុខភាពសាធារណៈ ដែលចាំបាច់​ត្រូវមាន​ដំណោះ​​ស្រាយ​រួមគ្នា ដោយបុគ្គល គ្រួសារ សហគមន៍ អង្គការ រដ្ឋាភិបាល និងសង្គម ប្រសិនបើយើងចង់ បាន​កម្លាំងការងារ​មួយ​ដែលមានប្រសិទ្ធិភាព។
ឯកឧត្តមបណ្ឌិតសភាចារ្យក៍បានបញ្ជាក់ដែរថា៖ ក្រោយពេលរំដោះបើទោះបីជាសន្តិភាព​ស្ថេរភាពនិងសេរីភាពត្រូវបានស្តារ​ ឡើងវិញបន្តិចម្តងៗ​ក៏ដោយក៏ប្រជាជន​ ដែលរស់រានមានជីវិតរួចផុតពីសោកនាដកម្មនេះបានទទួលរងការប៉ះទង្គិចផ្លូវចិត្តដែលបានធ្វើឱ្យប៉ះពាល់យ៉ាងខ្លាំងដល់សុខភាពផ្លូវកាយនិងផ្លូវចិត្តរបស់ពួកគាត់ដែលបន្សល់ដោយរបបប្រល័យពូជសាសន៍ប៉ុលពតនិងសង្រ្គាមស៊ីវិលជាងបីទសវត្សរ៍កន្លងមកនេះ។ ឯកឧត្តមសង្ឃឹមយ៉ាងមុតមាំថា ជាមួយនឹងវត្តមាន របស់អ្នកចូល​រួមរាប់រយនាក់​មកពីសាកលវិទ្យាល័យ ក្រុមហ៊ុននិងសាធារណជនទូទៅ ព្រឹត្តិការណ៍ថ្ងៃនេះនឹងជួយលើកកម្ពស់ វិធី សាស្ត្រប្រតិ​សកម្មឆ្ពោះ​ទៅរកសុខភាព​ល្អនិងការរស់​នៅប្រសើរជាង​ មុនដែលនឹងចូលរួមចំណែកក្នុងកិច្ចខិតខំប្រឹងប្រែងរបស់រាជ រដ្ឋាភិបាល ក្នុងការកសាងកម្លាំង​ពលកម្មដែលមានសុខភាពល្អបរិបូរណ៍ និងការកាត់បន្ថយភាពក្រីក្រ។

ឯកឧត្តម​​បណ្ឌិត​សភាចារ្យ សុខ អាន អញ្ជើញ​​ជាអធិបតី​​ក្នុង​​ពីធី​​ប្រកាស​​បើក​​ទី​វា​យោគៈ​​អន្តរជាតិ​​ដែល​រៀប​ចំ​​ដោយ​អង្គការ The Art of Living

ចេញផ្សាយថ្ងៃ: ( ២៥ - មិនា - ២០១៥ )
នា​រសៀលថ្ងៃ​ទី​២៤ ខែ​មីនា ឆ្នាំ២០១៥ នៅ​មជ្ឈមណ្ឌល​កោះពេជ្រ ឯកឧត្តម​បណ្ឌិត​សភា​ចារ្យ សុខ អាន ឧបនាយក​រដ្ឋមន្ត្រី រដ្ឋមន្ត្រី​ទទួល​បន្ទុក​ទីស្តីការ​គណៈរដ្ឋមន្ត្រី បាន​អញ្ជើញ​ជា​អធិបតី​ប្រកាស​បើក​កម្មវិធី «កិច្ចសន្ទនា​ជាមួយ​ព្រះគ្រូ Sri Sri Ravi Shangkar ស្តីពី​ការ​ជំរុញ​ក្រម​សីលធម៌​ផ្នែកធុរកិច្ច​ការអភិវឌ្ឍ​ខ្លួន ការរស់​នៅដោយ​ក្តី​រីករាយ និង​ការ​ប្រកាស​បើក​ទិវា Yoga អន្តរជាតិ» ដែល​ជាកម្មវិធី​សហការ​រៀបចំ​ដោយ​អង្គការ​The Art of Living និង​ស្ថានទូត​នៃសាធារណៈរដ្ឋ​ឥណ្ឌា​ប្រចាំ​ព្រះរាជាណា​ចក្រ​កម្ពុជា។
ថ្លែង​ក្នុង​កម្មវិធីនោះ ឯកឧត្តម​បណ្ឌិត​សភាចារ្យ សុខ អាន មាន​ប្រសាសន៍​ថា ខ្ញុំ​គិត​ថា កម្ម​វិធី​ដែល​រៀបចំ​ដោយ​អង្គការ The Art of Living នេះ​ពិត​ជាមាន​សារៈ​សំខាន់​ណាស់​សម្រាប់​ប្រជា​ជនកម្ពុជា និង​ពិភពលោក ជាពិសេស​នៅក្នុង​បរិបទ​សង្គម​បច្ចុប្បន្ន ដែល​ទាម​ទារ​ឱ្យ​មាន​ល្បឿន​លឿន និង​ផ្តល់សារៈ​សំខាន់​លើ​ការងារ​ការ​ប្រកួត​ប្រជែង និងភាព​ឥត​ខ្ចោះ។ វា​គឺ​ជាកម្មវិធី​ពិសេស ព្រោះ​ថា នៅ​ជាមួយ​យើង​ទាំង​អស់​គ្នា​នៅ​ទីនេះ យើង​មាន​វត្តមាន​របស់ ​ព្រះគ្រូ Sri Sri Ravi Shangkar ដែលជា​មេដឹកនាំ​លក្ខណៈ​សាសនា និង​មនុស្ស​ធម៌ដ៏​ល្បី​ល្បាញ​ប្រកប​ដោយ​ទស្សនវិស័យ​ ផ្តោតលើ​ពិភពលោក​មួយ​ដែល​គ្មាន​អំពើ​ហិង្សា និង​គ្មាន​ស្រ្តេស (stress) ហើយ​គំនិត​ផ្តួចផ្តើម​របស់ព្រះគ្រូ រួមមាន ការដោះ​ស្រាយ​ជម្លោះ ការ​កាត់​បន្ថយ​ស្រ្តេស ការកាត់​បន្ថយ​ភាព​ក្រីក្រ និង​ការ​សិក្សា​សម្រាប់​ទាំង​អស់គ្នា ដើម្បី​ចែក​រំលែក​នូវទស្សនាទាន​ បែប​ទស្សនៈវិជ្ជា ចំពោះ​ជីវិត​ដែល​គាត់​បាន និង​កំពុង​ផ្តល់​ដល់​ពិភពលោក​អស់រយៈ​ពេល​ជាង​៣០ឆ្នាំ​មក​ហើយ។
ឯកឧត្តម​បណ្ឌិត​សភាចារ្យ សុខ អាន បាន​មានប្រសាសន៍​ឲ្យដឹងថា តាមរយៈ​នយោបាយ​ឈ្នះ-ឈ្នះ​ដាក់​ចេញ​ដោយ​សម្តេច​តេជោ​នាយករដ្ឋមន្រ្តី ហ៊ុន សែន ដែល​បាន​បញ្ចប់​ទាំង​ស្រុង​នូវ​រចនា​សម្ព័ន្ធ​នយោបាយ និង​យោធានៃរបបខ្មែរ​ក្រហម​នៅ​ឆ្នាំ​១៩៩៨ ប្រទេស​យើង (កម្ពុជា) បាន​និង​កំពុង​ទទួល​នូវ​សន្តិភាព សន្តិសុខ និង​ស្ថិរភាព​នយោបាយ​នៅ​ពាស​ពេញ​ផ្ទៃ​ប្រទេស​ដែល​មិន​ដែល​ធ្លាប់មាន​នៅក្នុង ​ប្រវត្តិសាស្រ្ត​៥០០ឆ្នាំ​ចុងក្រោយ​របស់កម្ពុជា។
ជាមួយ​នឹងស្ថានភាព​អនុគ្រោះ​ទាំង​នេះ រាជរដ្ឋាភិបាល​បាន​ឈាន​ទៅរៀប​ចំគោល​នយោ​បាយ​ផែនការ និង​យុទ្ធសាស្រ្ត​នានា ដើម្បី​លើក​កម្ពស់​ជីវភាព​រស់​នៅ កាត់​បន្ថយ​ភាព​ក្រីក្រ និង​ធ្វើ​ឱ្យ​ប្រសើរ​ឡើង​នូវ​សុខភាព​ផ្លូវកាយ និង​ផ្លូវ​ចិត្ត​របស់​ប្រជាជន​ជាបណ្តើរៗ ដើម្បី​លើក​កម្ពស់​សេចក្តីសុខ​របស់​ប្រជាជន រាជរដ្ឋាភិបាល​បានធ្វើ​ការវិនិយោគ​យ៉ាង​ច្រើនទៅ​លើ​វិស័យ​សុខាភិបាល​សាធារណៈ និង​មជ្ឈមណ្ឌលកីឡ។
សេចក្តី​ប្រកាស​ព័ត៌មាន​របស់​អង្គការ Art of living បាន​ឲ្យដឹងថា អង្គការ Art of living ប្រចាំ​នៅ​កម្ពុជា ជាអង្គការ​មានប្រភព​ដើម​មក​ពីប្រទេស​ឥណ្ឌា​មិនរកកម្រៃ និងផ្តល់ការ​ធ្វើ​លំ​ហាត់​ប្រាណ​ដែលមិន​ត្រឹមតែធ្វើ​ឲ្យ​មាន​សុខភាព​ល្អទេ តែនឹង​ជួយធ្វើ​ឲ្យមនុស្ស​ចេះ​គ្រប់​គ្រង​សតិអារម្មណ៍​បាន​ល្អផងដែរ។ អង្គការ Art of Living មាន​វត្តមាន​នៅ ១៥៤ ប្រទេស​ទូទាំង​សកលលោក រួមទាំង​កម្ពុជា​ផងដែរ៕

ឯកឧត្តម​​បណ្ឌិត​​សភាចារ្យ សុខ អាន បាន​​ដាក់​​ចេញ​​អនុសាសន៍​​១២​​ចំណុច​​ក្នុង​​សន្និបាត​​ប្រចាំ​ឆ្នាំ​​របស់​​ក្រសួង​​អប់រំ

 
ឯកឧត្តម​បណ្ឌិត​សភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រី​ទទួល​បន្ទុក​ទីស្តីការ​គណៈ​រដ្ឋមន្ត្រី​នាព្រឹក​ថ្ងៃទី​២៤ ខែ​មីនា ឆ្នាំ​២០១៥ បាន​កោត​សរសើ​ចំពោះ​ការរៀបចំ​សន្និបាត​បូក​សរុប​ការងារ​ប្រចាំ​ឆ្នាំ​របស់​ ក្រសួង​អប់រំ​យុវជន និង​កីឡា ដោយ​ចាត់​ទុថា ជាវេទិការ​ជួបជុំ​សម្រាប់​ប្រមូល​ផ្តុំ​នូវ​ធាតុ​ចូល ដើម្បី​កែទម្រង់ និង​លើក​កំពស់​ការបណ្តុះ​បណ្តាល​ធនធាន​មនុស្ស។
ក្នុង​ឱកាស​អញ្ជើញ​ជាអធិបតី ក្នុង​ពិធី​បើក​សន្និបាត​បូក​សរុប​លទ្ធផល​ការងារ​ប្រចាំ​ឆ្នាំ របស់​ក្រសួង​អប់រំ​យុវជន និង​កីឡា ដែល​ប្រព្រឹត្ត​ធ្វើ​នៅ​វិទ្យាស្ថាន​បច្ចេកវិទ្យា​កម្ពុជា​ឯកឧត្តម​ បណ្ឌិតសភាចារ្យ សុខ អាន បាន​មាន​ប្រសាសន៍​ថា ការ​ជួបជុំ​គ្នា​ថ្ងៃ​នេះ គឺ​ជាព្រឹត្តិការណ៍​ដ៏​មាន​អត្ថន័យ​យ៉ាងជ្រាល​ជ្រៅ​ឆ្លុះ​បញ្ចាំង​ឱ្យ​ឃើញ​ នូវការ​បន្ត​យក​ចិត្ត​ទុក​ដាក់​ខ្ពស់ របស់​រាជ​រដ្ឋាភិ​បាល ក្នុង​ការ​អភិវឌ្ឍ​វិស័យអប់រំ​យុវជន និង​កីឡា​នៅកម្ពុជា។ ព្រឹត្តិការណ៍​នេះ​ក៏​ជាវេ​ទិ​កា​ដ៏​ល្អ​សម្រាប់​អ្នកជំនាញ​អ្នក​ស្រាវជ្រាវ និង​អ្នក​ពាក់​ព័ន្ធ​ដទៃ​ទៀត​ក្នុង​វិស័យ​អប់រំ ផ្លាស់​ប្តូរ​យោបល់ និង​បទពិសោធន៍ ព្រម​ទាំង​ការអនុវត្ត​ល្អៗ​សម្រាប់​ជា​ធាតុចូល ក្នុងការ​បង្កើន​ប្រសិទ្ធ​ភាព​ថែមទៀត​នៃការ​អនុវត្តគោល​នយោបាយ និង​ផែនការ​យុទ្ធសាស្ត្រ​វិស័យ​អប់រំ យុវជន និង​កីឡា ព្រមទាំង​សម្រាប់​លើកទិស​ដៅ​ការងារ​របស់​ក្រសួង​ក្នុង​ឆ្នាំសិក្សា​ថ្មី​ ឱ្យបាន​កាន់​តែ​ប្រសើរ​ ដើម្បី​ឆ្លើយ​តប​ទៅនឹង​តម្រូវ​ការ​ថ្មីៗ​នៃ​ការ​អភិវឌ្ឍ​ធន​ធាន​មនុស្ស​ ប្រកប​ដោយ​គុណភាព​ខ្ពស់​ទាំង​ចំណេះ​ដឹង ចំណេះ​ធ្វើ គុណធម៌ និង​សីលធម៌។
នៅ​ក្នុង​ការរៀបចំ​សន្និបាត​បូកសរុប​ការងារ ​ឆ្នាំ​២០១៣ ឆ្នាំ​២០១៤ ថ្ងៃ​ទី​២៤ ខែ​មីនា ឆ្នាំ​២០១៥ នេះ​ក្រសួងអប់រំ​យុវជន និង​កីឡា បាន​សំរេច​ដាក់ចេញ​នូវគោលនយោបាយ​ចំនួន​៧ ចំនុច​ដើម្បី​ពង្រឹង​វិស័យអប់ នៅ​កម្ពុជា​រយៈពេល​៤ឆ្នាំ។ ឯកឧត្តម ហង់ ជួន ណារ៉ុន រដ្ឋមន្រ្តី​ក្រសួង​អប់រំ​យុវជន និង​កីឡា​បានលើក​ឡើង​ក្នុងសន្ទរកថា​ថា ​ការដាក់ចេញ​នូវ​គោល​នយោបាយ​ទាំង ៧​ចំណុច​នេះ គឺ​ដើម្បី​បង្កើន​លទ្ធភាពទទួល​បានការអប់រំ​នៅ​កម្រិត​មធ្យម​សិក្សា និង​ក្រោយ​មធ្យម​សិក្សា​ប្រកប​ដោយ​គុណភាព។ គោល​នយោបាយ​ទាំង៧ ចំណុច​នោះ​រួមមាន ការ​អប់រំ​លើ​កុមារ​តូច ការអប់រំ​ថ្នាក់​បឋម​សិក្សា ការ​អប់រំ​ថ្នាក់​មធ្យម​សិក្សា និង​អប់រំ​បច្ចេកទេស ​ការអប់រំ​ថ្នាក់​ឧត្តមសិក្សា ការអប់រំ​ក្រៅ​ប្រព័ន្ធ ការ​អភិវឌ្ឈ​យុវជន ព្រម​ទាំង​ការអប់រំ​កាយ និង​កីឡា​ផងដែរ។
ឯកឧត្តម ហង់ ជួន ណារ៉ុន ក៏​បានបញ្ជាក់​បន្ថែម​ទៀត​ថា ការ​ដាក់​ចេញនូវ​គោល​នយោបាយ
ទាំង៧ ចំនុច​របស់​ក្រសួង​អប់រំ​នៅពេល​នេះ គឺ​សំដៅ​ផ្តល់​ការយក​ចិត្តទុក​ដាក់​លើការ​បំ​ពេញ​ការងារ​គណនេយ្យភាព និង​លទ្ធភាព​ច្បាស់លាស់ ដើម្បី​ឆ្លើយតប​ទៅ​នឹង​យុទ្ធ​សាស្រ្ត​ចតុ​កោណ​ដំណាក់​កាល​ទី​៣ របស់​រដ្ឋាភិបាល និង​អាទិភាព​អប់រំ​នៅក្នុង​ផែន​ការយុទ្ធ​សាស្ត្រអ​ភិវឌ្ឈន៍​ជាតិ ២០១៤​-​២០១៨​។
គិត​ត្រឹម​ថ្ងៃទី២២ ខែ​មិថុនា ឆ្នាំ​២០១៤ ក្រសួងអប់រំ​យុវជន និង​កីឡា ខិតខំ​កសាង​អគារ សិក្សា​នៅទូទាំង​ប្រទេស ដែល​ក្នុងនោះ​លទ្ធផល​សំរេច​បាន​ទាំងសាលារៀន​ចំណេះ​ទូទៅ សាធារណៈ និង​ឯកជន​សរុប​ចំនួន ១២៨៦៣ ក្នុង​នោះ​រួមមាន សាលា​មត្តេយ្យ​សិក្សា​ចំនួន ៣៦៧៨ សាលាបឋម​សិក្សា​ចំនួន ៧៣៤៦ អនុវិទ្យាល័យ​ចំនួន ១២៩៥ និង​អនុវិទ្យា​ល័យ​ចំនួន ៥៤២។ ចំនែក​ឯ​គ្រឹះស្ថាន​ឧត្តមសិក្សា​មាន​ចំនួន​១១០ ក្នុងនោះ គ្រឹះ​ស្ថាន​ឧត្តម​សិក្សា​រដ្ឋ​មាន​៤៣ និង​គ្រឹះស្ថាន​ឧត្តមសិក្សា​ឯកជន​មាន​៦៧ ដែល​មាន​ទីតាំង​សិ្ថត​នៅ​តាម​រាជធានី ខេត្ត​ចំនួន​១៩។
ចំណែក​សិស្ស​ដែល​បានចូល​សិក្សា​ទាំង​ សាលារដ្ឋ និង​សាលាឯក​ជនពី​មតេ្តយ្យ​សិក្សា ដល់​មធ្យម​សិក្សា​មាន​ចំនួន ៣ ១១២ ៩៦៩នាក់ ក្នុង​នោះ​មាន​សិស្ស​ស្រី ១ ៥២០ ៣១១​នាក់ ស្មើ​នឹង​៤៨,៨%។ រីឯ​និស្សិត​ចាប់​ពីបរិញ្ញាបត្ររង​ដល់​ថ្នាក់​បណ្ឌិត​មាន​ចំនួន ២៤៩ ០៩២នាក់ នារី ១០៣ ៦៦១​នាក់ ស្មើ​នឹង​៤១,៦%។
ជាមួយគ្នា​នោះ​ដែរ ក្រសួង​មានគ្រូ​អក្ខរកម្ម​ចំនួន១​ ២១១​នាក់ ក្នុងនោះ​មាន​ស្រី ៤៨៣​នាក់ និង​មាន​អ្នកចូលរៀន​ចំនួន ២៦ ៦០១នាក់ ស្រ្តី​មាន​ចំនួន​៦៧,៧%។
ឯកបណ្ឌិត​សភាចារ្យ សុខ អាន បាន​កោត​សរសើរ​ និងវាយ​តម្លៃ​ខ្ពស់​ចំពោះ ឯកឧត្ដម លោក​ជំទាវ អស់​លោក លោក​ស្រី ជា​មន្ត្រីអប់រំ​គ្រប់​លំដាប់​ថ្នាក់ សាស្ត្រាចារ្យ លោកគ្រូ អ្នកគ្រូ មាតា​បិតា​សិស្ស-និស្សិត សហគមន៍ សប្បុរស​ជន និង​អាជ្ញាធរ​ដែនដី​ទូទាំង​ប្រទេស ព្រម​ទាំង​អង្គការ​ជាតិ ​និង​អន្តរជាតិ និង​បណ្ដា​ដៃគូ​អភិវឌ្ឍន៍​ទាំង​អស់ ដែលបាន​យក​ចិត្ត​ទុក​ដាក់​លើ​ការលើក​កម្ពស់​គុណភាព​អប់រំ​នៅ​កម្ពុជា តាមរយៈ​កិច្ច​សហប្រតិបត្តិការ​ប្រកប​ដោយ​ប្រសិទ្ធ​ភាព និង​ការចូល​រួម​ចំណែក​យ៉ាង​សកម្ម​ ក្នុង​ការ​បំពេញ​ការងារ​ក្នុង​ឆ្នាំ​សិក្សា​កន្លង​ទៅ​នេះ​ប្រកប​ដោយ​ជោគ​ ជ័យ។
ឯកបណ្ឌិត​សភា​ចារ្យ សុខ អាន ឧបនាយករដ្ឋមន្ត្រី​មានប្រសាសន៍​បញ្ជាក់​ថា ​ការ​ចូល​រួម​ចំណែក និង​ការជួយ​គាំទ្រ​ទាំង​បច្ចេកទេស និង​ហិរញ្ញ​វត្ថុ​ពី​គ្រប់​មជ្ឈដ្ឋាន គឺជា​សក្ខីកម្ម​បញ្ជាក់​ពី​ការយក​ចិត្តទុកដាក់​ខ្ពស់​លើ​ការ​អនុវត្ត «ការ​អប់រំ​សម្រាប់ទាំង​អស់​គ្នា ហើយ​ទាំង​អស់​គ្នា​សម្រាប់​ការអប់រំ» ឱ្យ​កាន់​តែ​ល្អ​ប្រសើរ​ថែម​ទៀត។ ដើម្បី​ជាធាតុ​ចូល​បន្ថែម​លើ​ប្រធាន​បទ​ពិភាក្សា​ទាំង​២១ ដែលក្រសួងអប់រំ​ដាក់​ចេញក្នុង​ឱកាសថ្លែង​បើកសន្និបាត ឯក​បណ្ឌិត​សភាចារ្យ សុខ អាន បាន​ផ្តល់ជូន​នូវអនុសាសន៍​ចំនួន ១២​ចំណុច​សម្រាប់​សមាជិក​អង្គសន្និបាត​ធ្វើ​ការ​ពិភាក្សា​ផងដែរ។ ខ្លឹម​សារ​អនុសាសន៍​ទាំង​នោះ​រួមាន៖
ទី១-ដើម្បី​អនុវត្ត​ឱ្យបាន​សម្រេចគោលដៅ​ អប់រំ​ជាតិ និង​គោលដៅ​សហស្សវត្ស​ដែល​តម្រូវ​ឱ្យ​ប្រទេស​នីមួយៗខិតខំ​រំដោះ​ អនក្ខរភាព​ឱ្យបាន​សម្រេច​ជាស្ថាពរ​នៅ​ឆ្នាំ​២០១៥ នេះ ក្នុង​ក្រប​ខ័ណ្ឌ​នៃ «ការអប់រំ​សម្រាប់ទាំង​អស់គ្នា» ការអប់រំ​ក្នុង​ប្រព័ន្ធ និង​ក្រៅ​ប្រព័ន្ធ​ជា​ការងារ​ដ៏​មាន​សារៈ​សំខាន់។ ហេតុ​នេះ មន្ទីរ​អប់រំ យុវជន និង​កីឡា រាជធានី-ខេត្ត គួរ​ខិតខំ​ថែម​ទៀត ក្នុង​ការ​ជំរុញ​កុមារ​ដល់​វ័យសិក្សា កុមារ​លើស​អាយុសិក្សា និង​កុមារបោះ​បង់ចោល​ការ​សិក្សា កុមារ ​និង​យុវជននៅក្រៅ​សាលា​រៀន ព្រម​ទាំង​កុមារ​និង​យុវជន​ដែល​ទទួលរង​គ្រោះ​ពីការ​រំលោភ​បំពាន ​និង​អំពើហិង្សាជា​ដើម​ ឱ្យ​បានទទួល​សេវាអប់រំ​ក្នុងប្រព័ន្ធ និងក្រៅ​ប្រព័ន្ធ​ឡើង​វិញ តាមរយៈ​ការ​ជួយ​ឧបត្ថម្ភ​គាំទ្រ​ដល់​សិស្ស-និស្សិត​ក្រីក្រ ដើម្បីធានាឱ្យ​បាន​នូវ​ការទទួល​បាន​ការអប់រំ ប្រកប​ដោយ​សមធម៌​។
ទី២-គួរ​បន្ត និង​បង្កើន​កិច្ចសហការ​ល្អ​បន្ថែមទៀត​ជាមួយ​មាតាបិតា និង​អាណា​ព្យាបាល​សិស្ស ព្រមទាំង​អាជ្ញាធរ​ពាក់ព័ន្ធ ដើម្បី​ធ្វើការ​អប់រំ ណែនាំ កែ​លម្អ និង​ទប់​ស្កាត់​បាន​ទាន់​ពេលវេលា កុំ​ឱ្យក្មួយៗ​សិស្សា​នុសិស្ស និង​យុវជន​ធ្លាក់​ក្នុងអំពើ​អសកម្ម​ជាយថាហេតុ​ណា​មួយ សំដៅ​​បង្កើនការ​អនុវត្ត​ចលនា​របស់​កុមារ យុវជន តាម​អនុសាសន៍​ដ៏ខ្ពង់ខ្ពស់ សម្ដេច​តេជោ​នាយក​រដ្ឋមន្ត្រី «កូនល្អ សិស្សល្អ មិត្តល្អ ពលរដ្ឋល្អ»។
ទី៣-លើក​កម្ពស់​ការកសាង​ហេដ្ឋា​ រចនាសម្ព័ន្ធ សម្ភារៈ​បង្រៀន និងរៀន ដើម្បី​ឆ្លើយតប​ទៅនឹង​តម្រូវ​ការ​នៃ​ការ​អប់រំ ជាពិសេស​គប្បី​យក​ចិត្ត​ទុក​ដាក់​ដល់ការ​ផ្គត់ផ្គង់​សៀវភៅសិក្សា​ គ្រប់​មុខវិជ្ជា​ឱ្យ​បានកាន់​តែទូលំ​ទូលាយ​ថែមទៀត សំដៅ​ធានា​ប្រសិទ្ធភាព​នៃការ​អនុវត្ត​កម្មវិធី​សិក្សា​ ចាប់​ពីកម្រិត​មត្តេយ្យ​រហូត​ដល់​ឧត្តមសិក្សា។
ទី៤-គប្បី​ផ្តោត​ឤទិភាពលើ​គុណភាពអប់រំ​ ជាចម្បង។ ក្នុងន័យ​នេះ ខ្ញុំ​សូមលើក​ទឹកចិត្ត​ដល់​ថ្នាក់​ដឹក​នាំ​និង​ មន្ត្រីរាជការ​ទាំងអស់​របស់​ក្រសួងអប់រំ យុវ​ជ​ន និងកីឡា ចូលរួម​យ៉ាង​សកម្ម​ក្នុងការងារ​កំណែ​ទម្រង់និង​អភិវឌ្ឍ​វិស័យអប់រំ​ បន្ថែមទៀត ប្រកប​ដោយ​​ឆន្ទៈ​ពិត​ប្រាកដ ​និងភាព​ជាម្ចាស់ ដោយ​ហេតុថា វិស័យនេះ​គឺជា​វិស័យគន្លឹះសម្រាប់​ការ​អភិវឌ្ឍ​សេដ្ឋ​កិច្ច​ជាតិ និង​ការអភិវឌ្ឍ​វិស័យ​ដទៃៗ​ទៀត។ ដូចនេះ ក្រសួង​គួរ​បន្ត​យកចិត្ត​ទុកដាក់ធ្វើ​វិក្រឹតការ​គ្រូ​បង្រៀន ដើម្បី​បន្តកសាង​សមត្ថភាព​វិជ្ជាជីវៈ សំដៅ​លើក​កម្ពស់​គុណភាព​អប់រំ​បន្ថែមទៀត ដើម្បី​ធ្វើ​ឱ្យ​សិស្ស-និស្សិត​បញ្ចប់​ការសិក្សាទទួល​បានភាព​ប្រកួត​ប្រជែង​ នៅ​ក្នុង​ទីផ្សារ​ការងារ។
ទី៥-ចំពោះ​គ្រឹះស្ថាន​ឧត្ត​មសិក្សា​ គួរ​លើកកម្ពស់​ការ​សិក្សាស្រាវជ្រាវ​ ប្រកបដោយ​គុណ​ភាពខ្ពស់ ដើម្បី​បង្កើន​ប្រសិទ្ធភាព​និង​ប្រសិទ្ធផលក្នុង​ការ​បង្រៀន និង​ផ្សារភ្ជាប់​ទ្រឹស្តី​ទៅ​នឹង​ការ​អនុវត្ត​ជាក់​ស្តែង ហើយ​លទ្ធផល​នៃការ​ស្រាវជ្រាវ​ត្រូវ​ទទួល​ការ​លើកទឹកចិត្តឱ្យ​បោះពុម្ភ​ក្នុង ទិនានុប្បវត្តិ​វិទ្យាសាស្រ្ត ជាពិសេស​ទិនានុប្បវត្តិ​វិទ្យាសាស្រ្ត​ក្នុង​តំបន់​និង​អន្តរជាតិ។​ ដើម្បី​ធានា​ឱ្យ​មាន​គុណភាព​ខ្ពស់​និងការ​បោះពុម្ភ​ផ្សាយ​ជាអន្តរជាតិ ឯកសារ​ស្រាវជ្រាវគួរ​ត្រូវបាន​ត្រួតពិនិ​ត្យ​ដោយ​អ្នកឯកទេស​ឯករាជ្យ​ លើ​ប្រធានបទ​ស្រាវជ្រាវ​នោះ។ លើស​ពី​នេះ អ្នក​សិក្សា​ស្រាវជ្រាវ​គួរ​ប្រកាន់ខ្ជាប់ ជា​និច្ចនូវ​សីលធម៌​អាជីព​របស់​ខ្លួន​ម្នាក់ៗ ដើម្បី​ជៀស​វាងឱ្យបាន​នូវការ​ប្រើប្រាស់​ស្នាដៃ​របស់​អ្នក​ស្រាវ​ជ្រាវ​ ដទៃទៀត ដែលពុំបាន​ផ្តល់​នូវ​ប្រភព​ត្រឹមត្រូវ និង​សេចក្តី​ទុច្ចរិតក្នុង​ការ​សិក្សា​ស្រាវ​ជ្រាវ។ ខ្ញុំមាន​ជំនឿយ៉ាងមុតមាំថា សកម្មភាពនៃការសិក្សាស្រាវជ្រាវ​នេះ​នឹង​ពិត​ជារួម​ចំណែក​ដល់ការ​ផ្សព្វ​ ផ្សាយ​នូវគុណ​ភាព​នៃ​ការ​អប់រំ​នៅ​កម្ពុជា នៅលើឆាក​អន្តរជាតិ។
ទី៦-គួរបន្ត​យកចិត្តទុក​ដាក់​លើការ​កែលម្អ​ ជីវភាព​រស់នៅរបស់​លោកគ្រូ អ្នកគ្រូ និង​សាស្ត្រា​ចារ្យ ព្រម​ទាំង​បុគ្គលិក​សិក្សា​ទាំងអស់ ដើម្បី​បង្កើន​ប្រសិទ្ធភាព​ការងារអប់រំឱ្យ​កាន់​តែ​ប្រសើរ​ថែមទៀត។
ទី៧-ខ្ញុំ​សូមអំពាវ​នាវ​ដល់ស្ថាប័នជាតិ និង​អន្តរជាតិ វិស័យ​ឯកជន និង​អង្គការ​មិនមែន​រដ្ឋាភិ​បាល ដែល​បំពេញ​ការងារ​ក្នុងវិស័យអប់រំ មេត្តា​ពិនិត្យ​លើ​ឤទិភាព​សំខាន់​ក្នុង​ផែនការ​យុទ្ធ​សាស្ត្រ​របស់​ រាជរដ្ឋាភិបាល និងបន្ត​ផ្តល់​ការ​គាំទ្រថែម​ទៀត តាម​សមត្ថកិច្ច និង​លទ្ធភាព​របស់​ខ្លួន​ទាំង​បច្ចេកទេស ហិរញ្ញវត្ថុ និង​សម្ភារៈ។
ទី៨-​ចំពោះគ្រឹះស្ថានឧត្តមសិក្សា គួរ​បន្ដ​កៀរគរ​បញ្ញវ័ន្ដ​កម្ពុជា ដែល​មាន​សញ្ញា​បត្រ​ខ្ពស់ ជាពិសេស​ សញ្ញាបត្រ​ថ្នាក់បណ្ឌិត​ដែល​ត្រូវ​បាន​ទទួល​ស្គាល់​ជាអន្តរជាតិ និងមាន​​បទ​ពិសោធន៍​ខ្ពស់ ​រួមចំណែកដល់​ការ​អភិវឌ្ឍវិស័យ​អប់រំ​នៅ​កម្ពុជា​ប្រកប​ដោយគុណភាព​ខ្ពស់ តាមរយៈ​ការ​បង្រៀន និងការ​សិក្សា​ស្រាវជ្រាវ។
ទី៩-គួរ​យកចិត្តទុក​ដាក់​អនុវត្ត​គោលនយោបាយ ​ជាតិ ស្តីពី​ការអភិវឌ្ឍ​យុវជន​កម្ពុជា សំដៅ​អភិវឌ្ឍ​យុវជន ទាំង​ខាង​ចំណេះ​ដឹង ចំណេះ​ធ្វើ បំណិន​ជីវិត សុខភាព កាយសម្បទា និង​សីល​ធម៌ (Soft Skills) ឱ្យ​ក្លាយ​ទៅ​ជាមូលធន​មនុស្ស ប្រកប​ដោយ​សក្តានុពល និងធានា​បាន​នូវការបង្កើត​កាលានុវត្តភាព​ការងារ​សម្រាប់​យុវជន ជា​ពិសេស​តាមរយៈ​ការបង្កើត​វេទិកា​ស្វែង​រកការងារ​សម្រាប់​យុវជន។
ទី១០-ក្រសួង​អប់រំ យុវជន និង​កីឡា និង​ក្រសួងការងារ​និង​បណ្ដុះបណ្ដាល​វិជ្ជាជីវៈ​គួរ បង្កើត​យន្តការ​សម្រប​សម្រួល ដើម្បី​បញ្ជៀស​ឱ្យបាន​ជាអតិបរមា​នូវភាព​ត្រួតជាន់​គ្នា​នៃ​ការ​ងារ​សំដៅ​ បង្កើន​ប្រសិទ្ធភាព និងគុណភាព​នៃ​ការអប់រំ និងបណ្ដុះ​បណ្ដាល ឱ្យកាន់តែ​ខ្ពស់​ថែម​ទៀត។
ទី១១-ក្រសួង​អប់រំ យុវជន និងកីឡា គួរ​សហការ​ជាមួយ​ក្រសួងការងារ និងបណ្ដុះ​បណ្ដាល​វិជ្ជាជីវៈ ដើម្បី​បង្កើត​ឱ្យមាន​មុខវិជ្ជាស្ពានចម្លង (Bridging Courses) សំដៅ​អនុញ្ញាត​​ឱ្យសិស្ស​ផ្នែកអប់រំ​បណ្ដុះ​បណ្ដាល​វិជ្ជាជីវៈ អាចបន្តការ​សិក្សា​ទៅថ្នាក់ឧត្តម​សិក្សា​បាន។
ទី១២-​គួរជំរុញ​ការ​អភិវឌ្ឍ​កម្ម​វិធី​ សិក្សាជា​ប្រចាំ និងបង្កើនការ​ផ្សារ​ភ្ជាប់ការ​អប់រំទៅ​នឹង​ការអភិវឌ្ឍវិស័យសេដ្ឋកិច្ច​ ឱ្យកាន់តែប្រសើរ​ឡើង​ថែម​ទៀត តាមរយៈ​ការបង្រួម​ឱ្យបាន​ជា​អតិបរមា​នូវគម្លាត​រវាង​ការផ្តត់​ផ្តង់ និង​តម្រូវការ​ជំនាញ​ក្នុង​ទីផ្សារ​ការងារ។ នេះគឺទាមទារ​ឱ្យមាន​ការ​កែទម្រង់ស៊ី​ជម្រៅនៃ​ប្រព័ន្ធអប់រំ​នៅកម្រិត​ឧត្តម​ សិក្សា ជាពិសេស​ការ​ពង្រឹង​ការ​គ្រប់គ្រង​ប្រកប​ដោយ​វិជ្ជាជីវៈខ្ពស់ សំដៅ​ជំរុញឱ្យគ្រឹះស្ថាន​ឧត្តម​សិក្សា​ទាំង​រដ្ឋ​ ទាំង​ឯកជន ផ្តល់​ការ​បណ្តុះ​បណ្តាល​មានគុណភាពខ្ពស់ ដើម្បី​បង្កើន​ផលិតភាព (Productivity) និង​កាលានុវត្ត​ភាព​ការ​ងារ​សម្រាប់និស្សិត​ដែល​បាន​បញ្ចប់​ការសិក្សា អាច​រកការងា​រធ្វើ​បាន។ គុណភាព​នៃកា​រអប់រំ និងបណ្ដុះ​បណ្ដាល​ពិត​ជាជំរុញ​ផលិតភាព ដែល​ជា​កត្តាដ៏សំខាន់​ក្នុង​ការ​ជំរុញកំណើន​ប្រាក់ឈ្នួល និងការ​ធ្វើពិពិធកម្ម​សេដ្ឋកិច្ច សំដៅបង្កើន​ភាពប្រកួត​ប្រជែង​ឱ្យ​កាន់​តែ​ខ្ពស់ ដើម្បី​ទាញយក​ផល​ប្រយោជន៍ជា​អតិបរមា​ពី​សមាហរណកម្ម​សេដ្ឋកិច្ច​អាស៊ាន ដែលនឹង​ចាប់​ដំណើរការ​នៅចុងឆ្នាំ២០១៥ នេះ។
មានចំណាប់​អារម្មណ៍​ក្នុងពិធី​បើកសន្និបាត​ អប់រំ​នេះ​ដែរ លោក​ជំទាវ អាន ឡឺមេស (Ann Lemaistre) ប្រធានក្រុម​ការងារ​វិស័យ​អប់រំ (ESWG) និង​ជា​តំណាង​អង្គការ​យូណេស្កូ​ប្រចាំ​កម្ពុជាបាន​គាំទ្រ និង​កោត​សរសើ​ចំពោះ​ដំណើរការ​កំណែទម្រង់​របស់ក្រសួងអប់រំ​នាពេល​កន្លង​មក និង​បាន​សម្តែង​ការសង្ឃឹម​ថា កម្មវិធី​កំណែទម្រង់​ទៅមុខ​ទៀត​នឹង​បាន​ជោគ​ជ័យ៕