រាជធានីភ្នំពេញ ថ្ងៃទី១៣ ខែកុម្ភៈ ឆ្នាំ២០១៥
-ឯកឧត្តម Kim Woen Jin ឯកអគ្គរដ្ឋទូតសាធារណរដ្ឋកូរ៉េប្រចាំនៅកម្ពុជា
-លោកស្រី Baek Sook Hee តំណាងទីភ្នាក់ងារសហប្រតិបត្តិការអន្តរជាតិកូរ៉េប្រចាំនៅកម្ពុជា
-ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ និងអន្តរជាតិ
-បងប្អូនប្រជាពលរដ្ឋ ក្មួយៗយុវជនស្ម័គ្រចិត្តកាកបាទក្រហម កាយរិទ្ធកម្ពុជាជាទីស្រលាញ់!
ថ្ងៃនេះ ខ្ញុំមានសេចក្តីសោមនស្សរីករាយ ដែលបានមកចូលរួមក្នុងពិធីបញ្ចុះបឋមសិលាដើម្បីសាងសង់អគារមជ្ឈមណ្ឌលហ្វឹកហ្វឺនជំនាញអាកាសចរស៊ីវិល ដែលជាជំនួយរបស់សាធារណៈរដ្ឋកូរ៉េ ក្រោមកិច្ចសម្របសម្រួលរបស់ទីភ្នាក់ងារសហប្រតិបត្តិការអន្តរជាតិកូរ៉េ(KOICA)។ ក្នុងនាមរាជរដ្ឋាភិបាលកម្ពុជា ខ្ញុំសូមសម្តែងនូវអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនកូរ៉េ ដែលបានផ្តល់ការឧបត្ថម្ភគាំទ្រជាបន្តបន្ទាប់ ចូលរួមចំណែកដល់ការអភិវឌ្ឍប្រទេសកម្ពុជា ជាពិសេសដល់គម្រោងដ៏មានសារសំខាន់នេះ ដើម្បីឆ្លើយតបទៅនឹងតម្រូវការនៃការអភិវឌ្ឍវិស័យអាកាសចរស៊ីវិលនៅកម្ពុជា។ ជាមួយគ្នានេះ ខ្ញុំក៏សូមសម្តែងនូវការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងមន្ត្រីគ្រប់លំដាប់ថ្នាក់នៃរដ្ឋលេខាធិការដ្ឋានអាកាសចរស៊ីវិលកម្ពុជា ដែលបានខិតខំ បំពេញភារកិច្ចរបស់ខ្លួន ជាពិសេសដែលបានធ្វើកិច្ចសហប្រតិបត្តិការនិងការសម្របសម្រួលយ៉ាងមានប្រសិទ្ធភាពជាមួយភាគីកូរ៉េ ធ្វើឱ្យគម្រោងនេះលេចចេញជារូបរាងឡើង។ នេះគឺជាហេដ្ឋារចនាសម្ព័ន្ធថ្មីមួយទៀត ក្នុងចំណោមហេដ្ឋារចនាសម្ព័ន្ធនានាដែលចាំបាច់សម្រាប់ការអភិវឌ្ឍវិស័យអាកាសចរស៊ីវិលកម្ពុជាឱ្យកាន់តែប្រសើរឡើង និងប្រកបដោយចីរភាព ខណៈដែលអាកាសចរណ៍ស៊ីវិលពិភពលោកមានតួនាទីយ៉ាងសំខាន់ ក្នុងសកម្មភាពអភិវឌ្ឍសេដ្ឋកិច្ចនៅលើសកលលោកយើងនេះ។
ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ និងអន្តរជាតិ
ដូចដែលយើងទាំងអស់គ្នាបានដឹងហើយថា ហេដ្ឋារចនាសម្ព័ន្ធសង្គម សេដ្ឋកិច្ច និងរូបវន្តនានា ព្រមទាំងធនធានមនុស្ស ត្រូវបានបំផ្លិចបំផ្លាញដល់ឬសគល់ ដោយរបបប្រល័យពូជសាសន៍ ប៉ុល ពត ដ៏ឃោឃៅ។ ក្រោយថ្ងៃរំដោះ ៧មករា១៩៧៩ ដែលបានប្រសូតចេញពីកម្លាំងសាមគ្គី ពលីកម្មយ៉ាងធំធេង និងការតស៊ូយ៉ាងស្វិតស្វាញរបស់ឥស្សរជនស្នេហាជាតិ ជាពិសេស សម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាយើងបានខិតខំស្តារ និងកសាងប្រទេសលើគ្រប់វិស័យពីបាតដៃទទេ ដោយដៃម្ខាងខិតខំទប់ស្កាត់ការវិលត្រឡប់មកវិញនៃរបបប្រល័យពូជសាសន៍ប៉ុលពត និងដៃម្ខាងទៀតខិតខំកសាងនិងជួសជុលជាបណ្តើរៗ នូវហេដ្ឋារចនាសម្ព័ន្ធរូបវន្តនានា ដូចជាផ្លូវថ្នល់ ស្ពាន សាលារៀន មន្ទីរពេទ្យ ប្រព័ន្ធធារាសាស្ត្រ វត្តអារាម និងវិហារសាសនា ជាដើម ឱ្យមានការរីកចម្រើនលើគ្រប់វិស័យដូចសព្វថ្ងៃនេះ នៅក្នុងនោះរួមមានវិស័យអាកាសចរស៊ីវិលផងដែរ។
ស្របពេលដែលវិស័យអាកាសចរស៊ីវិលពិភពលោក កំពុងមានការរីកលូតលាស់យ៉ាងខ្លាំង ដែលតាមការព្យាករណ៍របស់អង្គការអាកាសចរស៊ីវិលអន្តរជាតិ (ICAO) ក្នុងរយៈពេល២០ឆ្នាំខាងមុខ អត្រាកំណើនប្រចាំឆ្នាំរបស់វិស័យនេះមានប្រមាណ ៤,៧% ឬកើនឡើងចំនួនទ្វេដងនៅរយៈពេល១៥ឆ្នាំខាងមុខ វិស័យអាកាសចរស៊ីវិលកម្ពុជាក៏មានការរីកចម្រើនគួរឱ្យកត់សម្គាល់ផងដែរ ដោយបានចូលរួមចំណែកយ៉ាងសំខាន់ដល់ការអភិវឌ្ឍនៃវិស័យជាច្រើន ជាពិសេសការដឹកជញ្ជូន និងទេសចរណ៍។ ជាក់ស្តែង នៅឆ្នាំ២០១៤ អ្នកធ្វើដំណើរតាមផ្លូវអាកាសមានចំនួនប្រមាណ៥លាននាក់ គឺកើនឡើងចំនួន ៩% បើប្រៀបធៀបទៅនឹងឆ្នាំ២០១៣ ដែលមានអ្នកដំណើរត្រឹមតែ៤,៦លាននាក់។ ជាមួយគ្នានោះ ក្នុងឆ្នាំ២០១៤ មានជើងហោះហើរចំនួន ៥០.១៨៨ជើង គឺកើនឡើងចំនួន ៦,៤% បើប្រៀបធៀបទៅនឹងឆ្នាំ២០១៣ ដែលមានចំនួន ៤៧.១៧០ជើង។ តាមស្ថិតិរបស់ក្រសួងទេសចរណ៍ ៥០% នៃភ្ញៀវទេសចរមកទស្សនាកម្ពុជាធ្វើដំណើរតាមយន្តហោះ ដែលនេះបញ្ជាក់ឱ្យឃើញយ៉ាងច្បាស់នូវតួនាទីស្នូលរបស់វិស័យអាកាសចរស៊ីវិល សម្រាប់ទ្រទ្រង់ការអភិវឌ្ឍនៃវិស័យទេសចរណ៍ ដែលបានក្លាយជាក្បាលម៉ាស៊ីននៃកំណើនសេដ្ឋកិច្ចនៅកម្ពុជា។ ទេសចរណ៍កម្ពុជា បានរួមចំណែករហូតដល់ប្រមាណជា ១៦% នៃផលិតផលក្នុងស្រុកសរុប (GDP) និងបានបង្កើតការងារជូនប្រជាជនដោយផ្ទាល់ជាង ៥០០ពាន់ និងដោយប្រយោលរាប់សិបពាន់ផ្សេងទៀត កាលពីឆ្នាំ២០១៣កន្លងទៅ ខណៈដែលមានភ្ញៀវទេសចរបរទេសប្រមាណ ៤,២លាននាក់ បានចូលមកទស្សនាកម្ពុជា។ នៅឆ្នាំ២០១៤ ចំនួនភ្ញៀវទេសចរបរទេសមាន ៤,៥លាននាក់ ហើយចំនួននេះត្រូវបានព្យាករណ៍ថានឹងកើនឡើងដល់ចំនួនប្រមាណ ៧-៨លាននាក់ នៅឆ្នាំ២០២០។
ជាការពិត ការរីកចម្រើននៃវិស័យទាំងនេះនឹងមិនអាចកើតមានបានឡើយ ប្រសិនបើគ្មានគោលនយោបាយដ៏ត្រឹមត្រូវរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាពិសេសគោលនយោបាយឈ្នះ-ឈ្នះរបស់សម្តេចតេជោ ដែលបាននាំមកនូវសន្តិភាព សុវត្ថិភាព និងសន្តិសុខពេញលេញលើផ្ទៃប្រទេសដូចសព្វថ្ងៃនេះ ដែលមិនធ្លាប់មានពីមុនមកក្នុងរយៈពេល៥០០ឆ្នាំចុងក្រោយ នៃប្រវត្តិសាស្ត្រកម្ពុជា។
ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ និងអន្តរជាតិ
ដើម្បីរក្សា និងជំរុញបន្ថែមនូវការរីកចម្រើននៃវិស័យអាកាសចរស៊ីវិល ក្រៅពីការបន្តធានាឱ្យបាននូវសុខសន្តិភាព និងស្ថេរភាពនយោបាយ ព្រមទាំងសុវត្ថិភាព សន្តិសុខ និងប្រសិទ្ធភាពនៃប្រព័ន្ធនាំផ្លូវអាកាស ធនធានមនុស្សនៅក្នុងវិស័យនេះចាំបាច់ត្រូវមានការបណ្តុះបណ្តាលជំនាញជាមូលដ្ឋានច្បាស់លាស់ ហើយត្រូវមានកម្មវិធីអភិវឌ្ឍសមត្ថភាពជាប្រចាំ ស្របទៅតាមការវិវត្តន៍ជាក់ស្តែងរបស់វិស័យនេះ។
ក្នុងន័យនេះ គម្រោងសាងសង់មជ្ឈមណ្ឌលហ្វឹកហ្វឺនអាកាសចរស៊ីវិលនៅកម្ពុជា ពិតជាមានសារៈសំខាន់ខ្លាំងណាស់ ដើម្បីចូលរួមចំណែកដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការអនុវត្តយុទ្ធសាស្ត្រចតុកោណដំណាក់កាលទី៣ និងផែនការយុទ្ធសាស្ត្រអភិវឌ្ឍន៍ជាតិ២០១៤-២០១៨ ដែលក្នុងនោះរួមមានការបន្តយកចិត្តទុកដាក់ជាពិសេសលើការបណ្តុះបណ្តាលធនធានមនុស្ស ប្រកបដោយចំណេះដឹង និងជំនាញបច្ចេកទេសខ្ពស់ផងដែរ។ ខ្ញុំសូមចាត់ទុកមជ្ឈមណ្ឌលនេះ មិនត្រឹមតែជាថ្នាលសម្រាប់ការបណ្តុះបណ្តាល អភិវឌ្ឍនិងការផ្ទេរចំណេះដឹង ចំណេះធ្វើ និងបទពិសោធន៍លើជំនាញអាកាសចរស៊ីវិលជូនមន្ត្រីជំនាញកម្ពុជាប៉ុណ្ណោះទេ ប៉ុន្តែថែមទាំងជានិមិត្តរូបដ៏ថ្លៃថ្លានៃទំនាក់ទំនងជាមិត្តភាព និងភាពជាដៃគូសហប្រតិបត្តិការល្អ រវាងសាធារណរដ្ឋកូរ៉េ និងព្រះរាជាណាចក្រកម្ពុជាផងដែរ។ ខ្ញុំសង្ឃឹមថា ភាគីមិត្តកូរ៉េនឹងបន្តជួយដល់មជ្ឈមណ្ឌលនេះបន្ថែមទៀត នាពេលអនាគត ដើម្បីប្រែក្លាយទៅជាថ្នាលបណ្តុះបណ្តាលនូវគ្រប់ជំនាញពាក់ព័ន្ធនឹងអាកាសចរស៊ីវិល។
ជាថ្មីម្តងទៀត តាមរយៈឯកឧត្តម Kim Woen Jin ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា និងលោកស្រី Baek Sook Hee តំណាងទីភ្នាក់ងារសហប្រតិបត្តិការអន្តរជាតិកូរ៉េប្រចាំកម្ពុជា ខ្ញុំសូមថ្លែងអំណរគុណយ៉ាងជ្រាលជ្រៅដល់រដ្ឋាភិបាលនិងប្រជាជនកូរ៉េ ដែលតែងតែងបានជួយដល់កម្ពុជាក្នុងសកម្មភាពអភិវឌ្ឍសេដ្ឋកិច្ច និងសង្គមកិច្ចជាច្រើន។
ជាទីបញ្ចប់ ខ្ញុំសូមជូនពរឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ និងអន្តរជាតិទាំងអស់ សូមមានសុខភាពល្អ ទទួលបានជោគជ័យគ្រប់ភារកិច្ច និងមានសុភមង្គលក្នុងក្រុមគ្រួសារ។
ខ្ញុំសូមប្រកាសបើកការដ្ឋានសាងសង់មជ្ឈមណ្ឌលហ្វឹកហ្វឺនអាកាសចរស៊ីវិលនៅកម្ពុជា ចាប់ពីពេលនេះតទៅ។
សូមអរគុណ!
