ដោយ ពង្ស សុក្រឹត្យ
ថ្មីៗនេះ រឿងរ៉ាវពុករលួយនៅក្នុងគណបក្សសង្គ្រោះជាតិ បានបែកធ្លាយ ដោយសារទំនាស់ផលប្រយោជន៍ របស់ក្រុមមន្ត្រីដែលទទួលបន្ទុក ទុកដាក់លុយរបស់គណបក្ស ក្នុងការចាយវាយ ឬយកទៅប្រើប្រាស់ជាប្រយោជន៍បុគ្គល។
កន្លងមក លុយដែលទទួលបានពីប្រភពនានា ដូចជាការរៃអង្គាស ពីប្រជាពលរដ្ឋ ក្រីក្រ ពីតំណាងរាស្ត្រដែលបានជាប់ឆ្នោត តែអត់ទាន់មានប្រាក់ខែ ឬលុយដែលបានដើរសុំគេពីក្រៅប្រទេស ត្រូវបានគណបក្សប្រឆាំងមួយនេះ បន្លំភ្នែកប្រជាពលរដ្ឋ និងសកម្មជននៅក្នុងបក្ស ថាជាមូលនិធិសង្គ្រោះជាតិ ហើយថាយកមកដើម្បីជួយបាតុកម្ម ឬជួយជនរងគ្រោះដោយទឹកជំនន់ ជាដើមនោះ គឺត្រូវបានមន្ត្រីជាន់ខ្ពស់មួយចំនួននៅក្នុងគណបក្សមានការតូចចិត្ត និងលួចបង្ហើបប្រាប់ថា មនុស្សមួយចំនួនដែលកាន់លុយ មូលនិធិសង្គ្រោះជាតិ បានយកទៅចាយវាយ និងប្រើប្រាស់សម្រាប់តែក្រុមខ្លួនមួយចំនួនតូចដែលស្និតនឹងមេបក្ស និងមេបក្សទាំងពីរ ប៉ុណ្ណោះ។ ជាក់ស្តែង លុយមួយភាគធំរបស់មូលនិធិ ត្រូវបានមេបក្សទាំងពីរចែកគ្នាទិញឡានទំនើបជិៈផ្ទាល់ខ្លួនម្នាក់មួយ ដែលពាក្យសាមញ្ញ ហៅថាជា « ដង្ខៅបាតុកម្ម » ។
ជាការផ្ទៀងផ្ទាត់ព័ត៌មានខាងលើ យើងក៏បានឃើញព័ត៌មាន ដែលចុះក្នុងទំព័រខាងមុខនៃសារព័ត៌មាន រស្មីកម្ពុជា ថ្ងៃអង្គារ ទី០៣ ខែធ្នូ ឆ្នាំ២០១៣ មានចំណងជើងធំៗថា « មន្ត្រីជាន់ខ្ពស់ គណបក្សសង្គ្រោះជាតិទម្លាយអំពើពុករលួយ លុយមូលនិធិសង្គ្រោះជាតិប្រមាណ១០ម៉ឺនដុល្លារអាមេរិក » ផងដែរ។ នៅក្នុងអត្ថបទ បានបញ្ជាក់ច្បាស់ថា ផ្ទៃក្នុងរបស់គណបក្សសង្គ្រោះជាតិកំពុងតែមានការរង្គោះរង្គើ និងបែកបាក់ ដោយសារតែថវិកាមូលនិធិសង្គ្រោះជាតិរបស់គណបក្ស ដែលបានមកពីសប្បុរសជននាពេលកន្លងមក ត្រូវបានចាយវាយ និងយកទៅប្រើប្រាស់មិនចំគោលដៅ ជាពិសេសថវិកា ប្រមាណ១០ម៉ឺនដុល្លារអាមេរិក បានបាត់ រកមុខមិនឃើញទៀតផង។
បន្ថែមលើនេះទៀត វិទ្យុខ្មែរប៉ុស្តិ៍ បានផ្សាយកាលពីថ្ងៃទី០៧ ខែវិច្ឆិកា ឆ្នាំ២០១៣ ដែលមានលោកហ្គារី ជាប្រធានសាខាគណបក្សសង្គ្រោះជាតិ ប៉ែកខាងជើងប្រចាំរដ្ឋកាលីហ្វ័រញ៉ា ប្រកាសថា ឈប់ទទួលជំនួយឲ្យគណបក្សសង្រ្គោះជាតិ តាមរយ:វិទ្យុខ្មែរប៉ុស្ដិ៍ ហើយ ដោយសារតែការមិនទុកចិត្តគ្នា នៅក្នុងរឿងថវិកាជំនួយពីប្រជាពលរដ្ឋនៅអាមេរិកនេះឯង។
ដូច្នេះ ការដែលគណបក្សសង្គ្រោះជាតិលើកថា គណបក្ស គ្រោងនឹងលើកឡើងពីអំពើពុករលួយ និងអត្រាការប្រាក់ខ្ពស់ក្នុងការប្រើប្រាស់ជំនួយរបស់អង្គការ មូលនិធិរូបិយវត្ថុអន្ដរជាតិ (IMF) នៅកម្ពុជាប្រាប់ដល់ប្រធាន IMF ដែលកំពុង តែបំពេញទស្សនកិច្ចនៅកម្ពុជា គឺជារឿងមួយដែលចម្លែក ពីព្រោះសូម្បីតែការគ្រប់គ្រងថវិកានៅក្នុងគណបក្សតូចមួយរបស់ខ្លួន ក៏មានការប្រព្រឹត្តិអំពើពុករលួយទៅហើយ។ វាមិនខុសពីពាក្យចាស់ពោលថា ខ្លួនឯងជាចោរ បែរជាស្រែកឲ្យគេជួយចាប់ចោរ ទៅវិញនោះទេ។
ប្រជាពលរដ្ឋ និងសកម្មជនទាំងអស់ ដែលបានលះបង់ថវិកាផ្ទាល់ខ្លួនប្រចាំខែ ជូនគណបក្សស្នើសុំ ឲ្យមានការបំភ្លឺពីប្រធានគណបក្សទាំងពីរ។ យើងក៏ស្នើសុំឲ្យបងប្អូនប្រជាពលរដ្ឋអ្នកគាំទ្រគណបក្សសង្គ្រោះជាតិទាំងអស់ ទាំងក្នុង និងក្រៅ ប្រទេសដែលបាន លះបង់ថវិការបស់ខ្លួនមេត្តាចូលរួមដាក់ញត្តិប្តឹងទៅអង្គភាពប្រឆាំងអំពើពុករលួយ ដើម្បីវែកមុខជនដែលប្រព្រឹត្តិអំពើពុករលួយយកមកផ្តន្ទាទោសតាមច្បាប់។
ម្យ៉ាងវិញទៀត លុយមូលនិធិ ដែលជាញើស ឈាម របស់ប្រជាពលរដ្ឋ និងសកម្មជនរបស់ខ្លួនបានប្រមែប្រមូល បែរជាបាត់ មិនដឹងមុខបែបនេះបានធ្វើឲ្យសកម្មជនគាំទ្រទាំងអស់ បាត់បង់នូវជំនឿទាំងស្រុង ដែលបក្សសង្គ្រោះជាតិតែងតែស្រែក ក្តែងៗថា បក្សខ្លួននឹងបំបាត់អំពើពុករលួយក្នុងសង្គម នៅពេលដែលខ្លួនឈ្នះឆ្នោត។
ជារួម ការដឹកនាំប្រទេស គឺដូចគ្នា ទៅនឹងការគ្រប់គ្រងគ្រួសារមួយ ឬគណបក្សមួយផងដែរ។ ប្រទេសជាតិមួយរុងរឿង រឹងមាំទៅបាន សង្គមមួយទទួលបានការអភិវឌ្ឍន៍ លុះត្រាតែមេដឹកនាំប្រទេសនោះមានបទពិសោធន៍ មានសមត្ថភាពពេញលេញ ក្នុងការកសាងប្រជាធិបតេយ្យ និងអភិវឌ្ឍប្រទេសជាតិ។ ផ្ទុយទៅវិញ វាជារឿងមួយដែលគ្រោះថ្នាក់ខ្លាំងណាស់ ប្រសិនបើគណបក្សសង្គ្រោះជាតិមកដឹកនាំប្រទេស ព្រោះបក្សដែលគ្មានប្រវត្តិក្នុងដឹកនាំតែងតែមានការបែកបាក់ផ្ទៃក្នុងជាប្រចាំ ជាពិសេសគឺគ្រាន់តែ គណបក្សតូចមួយគ្រប់គ្រងមូលនិធិរបស់ខ្លួនមិនបាន និងមានអំពើពុករលួយរាប់ម៉ឺនដុល្លារទៅហើយ ដូច្នេះគណបក្សសង្គ្រោះជាតិមិនអាចមកដឹកនាំប្រទេសជាតិបានទេ៕