ឯកឧត្តមឧប​​នាយករដ្ឋមន្ត្រី ​ហោ​ ណាំហុង​ បញ្ជាក់អំពី​​បញ្ហាផែនទី​ និងព្រំដែន​​ជាមួយ​​ប្រទេសវៀ​ត​ណាម! ​ ​និងសង្កត់​ធ្ងន់ថា​ ក្រោយការ​ផ្ទៀងផ្ទាត់​ផែនទី នឹងធ្វើ​ឲ្យអ្នកដែល​កំពុងសង្ស័យ​មានភាព​ជ្រះស្រឡះ

ឯកឧត្តម ហោ ណាំហុង ឧបនាយករ​ដ្ឋមន្ត្រី រដ្ឋមន្ត្រី​ក្រសួងការ​បរទេស និង​សហប្រតិបត្តិការអន្តរជាតិ បានថ្លែង​នៅក្នុងពិធីផ្ទៀង​ផ្ទាត់ផែន​ទីពីអង្គការសហប្រជា​ជាតិនៅ​ព្រឹកថ្ងៃទី២០ ខែសីហា ឆ្នាំ២០១៥នេះថា  ផែន​ទីបោន​ខ្នាត១/១០០.០០០ ដែល​ព្រះករុណា​ព្រះវររាជបិតា ព្រះបរមរតន​កោដ្ឋ តម្កល់​នៅអង្គការសហប្រជាជាតិ​នៅឆ្នាំ១៩៦៤ ហើយអង្គ​ការសហ​ប្រជាជាតិបាន​ប្រាប់ថា ជាងមួយ​ខែហើយ​នៅ New York  ផង ហ្សឺណែ​វផង រកមិន​ឃើញ​ផែនទីបោនខ្នាត ១/១០០.០០០ ដែលកម្ពុជា​បានស្នើ​សុំខ្ចីទេ គឺឃើញ​តែផែនទីUTMខ្នាត១/១០០០០០ ដែល​បារាំងផលិត​ឡើង។ នៅវិទ្យាស្ថាន​ភូមិសាស្រ្ត បារាំង ផលិត​ផែនទីបោន​ខ្នាត១/១០០០០០ និងUTMខ្នាត១/១០០០០០។

ឯកឧត្តម បានបន្ថែម​ថា ប៉ុន្តែអ្វី​ដែលកម្ពុជា​យើងប្រើរ​ហូតមកដល់​សព្វថ្ងៃ ប្រើប៉ុន្មាន​ទសវត្សរ៍មក​ហើយ ហើយ​បច្ចុប្បន្នកំពុង​តែធ្វើការកំនត់​ព្រំដែនវៀត​ណាម តាមផែន​ទីបោន​ខ្នាត១/១០០០០០ ។ ប៉ុន្តែអ្វី​ដែលអ.ស.ប រកឃើញ​គឺផែនទី UTMខ្នាត១/១០០០០០ ផែននេះ​ធ្វើនៅឆ្នាំ១៩៦៤ នៅឆ្នាំ១៩៦៤ជាសម័យ​ដែលព្រះករុណា​សីហនុ ជាព្រះប្រមុខរដ្ឋ​ទទួលស្គាល់ផែនទី UTMខ្នាត១/១០០០០០នេះហើយ ទើបយើង​ទទួលផែនទីនេះធ្វើ​ការផ្ទៀង​ផ្ទាត់ ។

ឯកឧត្តមឧប​នាយករដ្ឋម​ន្ត្រី ហោ ណាំហុង បាន​ពន្យល់​បន្ថែមថា«  យើងយក​ផែនទីបោនខ្នាត១/១០០០០០ ដែលយើង​ប្រើកន្លងមកជា​ច្រើនទសវត្សរ៍ទៅ​ហើយនេះ យើងធ្វើក្រដាស​ថ្លាដែលយើង​ដាក់ពីលើច្បាប់​ដើម មិនមែនCopyទេ ហើយ​គេគូសព្រំដែនច្បាស់​ខ្លាំងណាស់។ រាជរដ្ឋាភិបាល​ឆ្នាំ១៩៦៤ ទទួលស្គាល់​យ៉ាងច្បាស់​ថា ព្រំដែន​កម្ពុជាជាមួយវៀត​ណាម តាមផែន​ទី១៨សន្លឹកនេះ ហើយ​យើងមាន​ផែនទីទាំង​អស់ចំនួន២៦​សន្លឹក តែយើង​យកមក​១៨ផ្ទាំង ដើម្បី​ឲ្យស្របតាម​១៨សន្លឹកអ.ស.ប ពុំមាន​អ្វីខុសគ្នា​សោះ ហឹ្នង​ចង់ឲ្យជ្រះស្រឡះ​ពីអ្នកខ្លះកំពុងតែ​មានការសង្ស័យ​មានការធ្វើ​សកម្មភាព​នានា»។

បញ្ហានេះ​ដែលពីមុន​មកយើងមិន​និយាយ សម្តេចតេជោលោក​មានប្រសាសន៍​ខ្លះថា  លោកបណ្ឌិត សុខ ទូច មានជំរាប​ជូនខ្លះ តាមផែន​ទី១/១០០០០០ ដែលយើង​ថាកម្ពុជា​ឆ្នាំ១៩៦៤ជារាជរដ្ឋាភិបាល​របស់ព្រះបរមរដ្ឋ​កោដ ទទូលស្គាល់​ខ្សែព្រំដែន​តាមបន្ទាត់ ដាក់ដាំ មានន័យ​ថាខ្មែរយើង​នៅខាងលើ ហើយដាក់​ហ៊ូត នៅខាង​ក្រោម មានន័យ​ថាវៀត ណាមនៅ​ខាង​ក្រោម ហើយនៅក្នុង​ចន្លោះធំ មានទំហំ៥០គីឡូម៉ែត្រ​ការ៉េទោះជាផែន​ទីបោនខ្នាត​១/១០០០០០ គូសយកដាក់​ដាំ ដីជាង៥០គីឡូម៉ែត្រការ៉េ​ឲ្យទៅវៀត ណាមក្តី ហើយ​ផែនទីUTMខ្នាត១/១០០០០០ ដែលទទួល​ស្គាល់ដោយរាជ​រដ្ឋាភិបាល​ឆ្នាំ៦៤ នោះក៏ទទួលស្គាល់​នៅបន្ទាត់ដា​ក់ដាំ ហើយ​ថ្ងៃនេះយើងបាន​ឃើញហើយក្នុង​ការបញ្ចាំងឃើញ​ថាផ្នែកដាក់ដាំ ចូលទៅទៅវៀត​ណាម គឺយើងមិនទទួលស្គាល់​យើងនៅតែតវ៉ារហូត​ដល់សព្វថ្ងៃនេះ តវ៉ាដោយ​សារយើងយោង​តាមការ​សំរេចរបស់អគ្គ​ទេសាភិ​បាលវៀតណាម-បារាំង នៅទីក្រុង​ហាណូយ នៅឆ្នំា​១៩៦៤អគ្គទេសាភិបាល​ប្រទេស​កម្ពុជា ប្រទេសបារាំង​បានដាក់​វួច យកខ្សែ​ដាក់វួចមាន​ន័យថា​ពីខាងក្រោមចូលមក​ដីវៀត ណាម ខាងក្រោម ដើម្បីដី៥០គីឡូយើង​ធ្វើការតវ៉ា។

ឯកឧត្តមឧបនាយករដ្ឋម​ន្ត្រី ហោ ណាំហុង បានមាន​ប្រសាសន៍ប​ន្ថែមថា ក្នុងការកំនត់ព្រំ​ដែនខ្ញុំសូម​ជំរាបឯក​ឧត្តម លោកជំទាវ នឹងអស់​លោកលោក​ស្រី ឲ្យច្បាស់យើង​មិនមែន​គ្រាន់តែយកតាម​ផែនទីបោន​ខ្នាត១/១០០០០០ មួយមុខ​គត់ទេ គឺយើងយក​ច្បាប់អន្តរជាតិមក​និយាយទៀតទោះ​ជាបារាំង​ទទួលផែន​ទីបោនខ្នាត១/១០០០០០ ជាព្រំដែន​ជាមួយវៀត​ណាម ជាមួយឡាវ ក៏ប៉ុន្តែការ​ចរចា យើងតែង​តែលើច្បាប់​អន្តរជាតិ។ ឧទាហរណ៍ ទឹកទន្លេដែល​ជ្រៅ គឺត្រូវយកខ្សែបន្ទាត់​នៅពាក់​កណ្តាល នៅលើផែន​ទីគេហៅថា តាវវេច កន្លែងណា​ដែលកប៉ាលបើកមិនបានយើង​ត្រូវកាត់យកពាក់កណ្តាល​ម្នាក់នេះជាច្បាប់​អន្តរជាតិ។ ដូច្នោះសូម​ឲ្យឯក​ឧត្តម លោក​ជំទាវ នឹងអស់លោក​លោកស្រី យល់ច្បាស់​អំពីការខិត​ខំតស៊ូរបស់រាជរដ្ឋាភិបាល​ព្រះរាជាណា​ចក្រកម្ពុជា​បច្ចុប្បន្ននេះ​ក្នុងការកំណត់​ព្រំដែនជាមួយ​ប្រទេស​ជិតខាង។

ហើយ​ជាមួយប្រទេស​ថៃ ឯកឧត្តម លោកជំទាវ នឹងអស់លោក​លោកស្រី ឃើញស្រាប់​ហើយតែ៤.៦គីឡូម៉េត្រទេ យើងចំណាយ​ពេលជិត២​ឆ្នាំក្នុងការតវ៉ា នេះជាច្បាប់​ដែលយើង​ត្រូវតែ​តវ៉ា ហើយឥលូវ​ជាមួយវៀត​ណាម ៨ខែហើយនេះ ។ ខ្ញុំសូម​បំភ្លឺតែប៉ុណ្ណឹង​ជូនឯ​កឧត្តម លោកជំទាវ នឹងអស់​លោក លោក​ស្រី ឲ្យស្ងប់​នូវអារម្មណ៍ និងកា​រសង្ស័យ៕

ផែន​ទីពី​អង្គការ​សហប្រជា​ជាតិក្រោយ​ការផ្ទៀង​ផ្ទាត់​ជា​មួយផែនទី​របស់រាជរដ្ឋា​ភិបាល បង្ហាញយ៉ាង​ច្បាស់ថា​ ពិតជាមានខ្សែ​ព្រំដែន​ដូចគ្នា​បេះបិទ!

 រាជរដ្ឋាភិបាលកម្ពុជា បានបញ្ចប់នូវមន្ទឹលស័ង្សយ និងបានបញ្ជាក់យ៉ាងច្បាស់អំពីភាពត្រឹមត្រូវរបស់ខ្លួនក្នុងការប្រើប្រាស់ផែនទីបោនខ្នាត១/១០០.០០០ ក្នុងការបោះបង្គោលព្រំដែនជាមួយប្រទេសវៀតណាម គឺក្រោយពីការផ្ទៀងផ្ទាត់ជាមួយផែនទីច្បាប់ដើម UTMខ្នាត១/១០០.០០០ ចំនួន១៨ផ្ទាំងរបស់អង្គការសហប្រជាជាតិ ជាលទ្ធផលបានបញ្ជាក់យ៉ាងច្បាស់ថា ផែនទីទាំងពីរប្រភេទនេះ មានខ្សែព្រំដែនដូចគ្នាបេះបិទ គឺក្នុងន័យថា ផែនទីដែលរាជរដ្ឋាភិបាលបាននិងកំពុងប្រើ ជាផែនទីត្រឹមត្រូវ មិនមែនជាផែនទី

ក្លែងក្លាយ ដូចការចោទប្រកាន់របស់គណបក្សប្រឆាំងនោះឡើយ។

តម្លៃដ៏បរិសុទ្ធ ជាភាពត្រឹមត្រូវរបស់រាជរដ្ឋាភិបាលលើការប្រើប្រាស់ផែនទីក្នុងការងារបោះបង្គោលព្រុំដែនជាមួយប្រទេសវៀតណាម ត្រូវបានបង្ហាញជូនសាធារណជន ជាតិ និងអន្តរជាតិ តាមរយៈការធ្វើពិធីប្រគល់ ទទួល និងផ្ទៀងផ្ទាត់ផែនទីពីអង្គការសហប្រជាជាតិ នៅវិមានសន្តិភាព នៅព្រឹកថ្ងៃទី២០ ខែសីហា ឆ្នាំ២០១៥នេះ ដោយមានការចូលរួមពីតំណាងគណបក្សនយោបាយនានាទាំងគណបក្សក្រៅរាជរដ្ឋាភិបាល និងគណបក្សកាន់អំណាច សមាជិករដ្ឋសភា នៃគណបក្សសម្លេងភាគច្រើន សមាជិករដ្ឋសភាគណបក្សនៃសម្លេងភាគតិច សមាជិកព្រឹទ្ធសភា នៃគណបក្សប្រជាជនកម្ពុជា      និងគណបក្សសមរង្ស៊ី តំណាងឧត្តមក្រុមប្រឹក្សានៃអង្គចៅក្រម តំណាងនៃរាជបណ្ឌិតសភាកម្ពុជា និងទីប្រឹក្សារាជរដ្ឋាភិបាលដែលជាជនជាតិបរទេសមួយចំនួន ក្រោមក្រសែភ្នែកអ្នកសារព័ត៌មានជាតិ និងអន្តរជាតិប្រមាណជាង២០០នាក់។

ក្នុងពីធីប្រគល់ ទទួល និងផ្ទៀងផ្ទាត់ផែនទីពី អ.ស.ប កាលពីព្រឹកមិញនេះ គេបានសង្កេតឃើញលោកស្រី Mereani Keleti Vakasisikakala ប្រធានស្តីទីនៃបណ្ណាល័យអង្គការសហប្រជាជាតិ យូរផែនទីក្នុងវ៉ាលីខ្មៅមួយចងខ្សែ និងបិទជិត មកប្រគល់ជូន ឯកឧត្តមឧបនាយករដ្ឋមន្ត្រី ហោ ណាំហុង និងបានថ្លែងសន្ទរកថាខ្លី ថា លោកស្រីបាននាំយកផែនទីច្បាប់ដើមទាំងនេះមកពី អង្គការសហប្រជាជាតិប្រគល់ជូនកម្ពុជា តាមការស្នើសុំរបស់រាជរដ្ឋាភិបាល ដើម្បីការផ្ទៀតផ្ទាត់។

បន្ទាប់មក ឯកឧត្តមឧបនាយករដ្ឋមន្រ្តី ហោ ណាំហុង ប្រធានគណៈកម្មការចំពោះកិច្ចសម្របសម្រួលការងារទទួល ប្រគល់ និងផ្ទៀងផ្ទាត់ផែនទី បានឡើងថ្លែងសុន្ទរកថា ជាមួយនឹងការថ្លែងអំណរគុណ ដ៏ស្មោះរបស់រាជរដ្ឋាភិបាលកម្ពុជា ជូនចំពោះ ឯកឧត្តម បាន គីមូន អគ្គលេខាធិការអង្គការសហប្រជាជាតិ ដែលបានចាត់តាំងមន្ត្រីពីររូបរបស់ខ្លួន មានលោកស្រី Mereani Keleti Vakasisikakala និងលោក Keiichiro Okimoto នាំយកផែនទីច្បាប់ដើមមកកម្ពុជា។

ឯកឧត្តមឧបនាយករដ្ឋមន្ត្រី បានមានប្រសាសន៍ថា ក្នុងនាមរាជរដ្ឋាភិបាលកម្ពុជា « ខ្ញុំសូមផ្ញើនូវសេចក្តីអរគុណចំពោះ សហប្រជាជាតិ ដែលបានអនុញ្ញាតឱ្យកម្ពុជាខ្ចីផែនទីច្បាប់ដើម UTM ខ្នាត 1 / 100.000 ទាំង ១៨ ផ្ទាំង និងបានបន្ថែមថា កម្ពុជាទទួលស្គាល់ថា អង្គការសហប្រជាជាតិបានខិតខំប្រឹងប្រែងស្រាវជ្រាវរក ទាំងនៅទីស្នាក់ការកណ្តាលអង្គការសហប្រជាជាតិនៅទីក្រុងញ៉ូវយ៉ក ទាំងនៅការិយាល័យអង្គការសហប្រជាជាតិនៅទីក្រុងហ្ស៊ឺណែវ តាមការណែនាំរបស់ ឯកឧត្តម បាន គីមូន រួចហើយ ប៉ុន្តែមិនបានរកឃើញផែនទីដែលបោះពុម្ភដោយវិទ្យាស្ថានភូមិសាស្រ្តឥណ្ឌូចិន ហើយដែលត្រូវបានជឿថា អតីតព្រះវររាជបិតា ព្រះបរមរតនកោដ្ឋ បានយកទៅតំកល់នៅអង្គការសហប្រជាជាតិនៅក្នុងឆ្នាំ ១៩៦៤  ប៉ុន្តែបានរកឃើញផែនទី UTM ខ្នាត 1 / 100.000 នៅក្នុងបណ្ណាល័យ ឌែក ហាម៉ាស្កស្កូល (Dag Mammarskjöld Library) នៅអង្គការសហប្រជាជាតិ។ 

ក៏ប៉ុន្តែ ឯកឧត្តមឧបនាយករដ្ឋមន្ត្រី ហោ ណាំហុង បានមានប្រសាសន៍ថា ទោះជាផែនទី UTM ទាំង ១៨ ផ្ទាំង ដែលនឹងត្រូវប្រគល់នៅពេលនេះ មិនមែនជាផែនទីដែលស្នើដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្នុងលិខិតចុះថ្ងៃទី ៦ ខែកក្កដា ឆ្នាំ២០១៥ ផ្ញើជូនឯកឧត្តម បាន គីមូន ដើម្បីស្នើខ្ចីផែនទី Bonne ខ្នាត 1/100.000 បោះពុម្ភដោយវិទ្យាស្ថានភូមិសាស្រ្តឥណ្ឌូចិន ដែលប្រជាពលរដ្ឋកម្ពុជាទាំងអស់បានដឹងគ្រប់ៗគ្នាថា ត្រូវបានយកទៅតំកល់នៅអង្គការសហប្រជាជាតិ នៅក្នុងឆ្នាំ ១៩៦៤ ដោយអតីតព្រះវររាជបិតា ព្រះបរមរតនកោដ្ឋ ក្តី ក៏ប៉ុន្តែឯកឧត្តម បានបន្តថា ផែនទី UTM ខ្នាត 1 / 100.000 ទាំង ១៨ ផ្ទាំងនេះ ដែលត្រូវបានតំកល់ទុកដោយរាជរដ្ឋាភិបាលកម្ពុជានៅឆ្នាំ១៩៦៤ នឹងអនុញ្ញាតិអោយយើងផ្ទៀងផ្ទាត់ជាមួយផែនទី Bonne ខ្នាត 1 / 100.000 ទាំង ១៨ ផ្ទាំង ក្នុងចំណោមផែនទី Bonne ខ្នាត 1/100.000 ចំនួន ២៦ ផ្ទាំង ដែលរាជរដ្ឋាភិបាលកម្ពុជាបានប្រើប្រាស់ច្រើនទសវត្សរ៍មកហើយ  ហើយដែលកំពុងប្រើប្រាស់ក្នុងការបោះបង្គោលព្រំដែនរវាងកម្ពុជា និងវៀតណាម សព្វថ្ងៃ។

 ផែនទីចំនួនទាំងអស់១៨ផ្ទាំងពីអង្គការសហប្រជាជាតិ ត្រូវបានធ្វើការផ្ទៀងផ្ទាត់ ជាមួយផែនទីបោនខ្នាត ១/១០០.០០០ ម្តង១ផ្ទាំងម្តង១ផ្ទាំង ដោយមានធ្វើ កាល់គៀ តាមបែបបុរាណ និងសម័យបច្ចេកវិទ្យា  គូសផ្តានចម្លងចេញជាគំនូសខ្សែព្រំដែនពីផែនទីដែលរាជរដ្ឋាភិបាលប្រើប្រាស់ បញ្ចាំងបង្ហាញជូនអ្នកចូលរួម ដោយដាក់ផែនទីរបស់អង្គការសហប្រជាជាតិពីលើ គឺខ្សែព្រំដែន បានបង្ហាញយ៉ាងច្បាស់ថា ផែនទីទាំងពីរប្រភេទនេះ គឺមានខ្សែព្រំដែនមានដូចគ្នាបេះបិទ ។

 

 ដូចអ្វីដែលរាជរដ្ឋាភិបាលជឿជាក់អំពីការប្រើប្រាស់ផែនទីត្រឹមត្រូវ ពិតប្រាកដរបស់ខ្លួនសម្រាប់ការងារបោះបង្គោលព្រំដែនជាមួយប្រទេសវៀតណាម បន្ទាប់ពីផ្ទៀងផ្ទាត់ផែនទីរួចមក ឯកឧត្តមទេសរដ្ឋមន្ត្រី វ៉ា គឹមហុង ប្រធានគណៈកម្មាធិការកិច្ចការព្រំដែនកម្ពុជា បានធ្វើសេចក្តីសន្និដ្ឋានថា ផែនទីទាំងពីរប្រភេទដែលកកម្ពុជាយើងយកមកបង្ហាញជូននេះជាផែនទីដែលត្រឹមត្រូវ មិនមែនផែនទីក្លែងក្លាយនោះទេ បើទោះជាផ្ទៀងផ្ទាត់ផែនទីបោន ជាមួយផែនទីUTM គឺដូចគ្នា ។ ដូច្នេះ ខ្សែព្រំដែនដែលយើងយកមកប្រើក្នុងការធ្វើព្រំដែនជាមួយប្រទេសវៀតណាម ជាខ្សែព្រំដែនត្រឹមត្រូវ អត់មានក្លែងក្លាយ អត់មានខុសពីច្បាប់ដើមទេ ។ ជាមួយគ្នានេះ ឯកឧត្តមទេសរដ្ឋមន្ត្រី វ៉ា គឹមហុង ក៏បានធ្វើការអំពាវនាវផងដែរថា « អំពីបញ្ហាព្រំដែន បញ្ហាខ្សែព្រំដែន ចាប់ពីពេលនេះទៅ សូមបញ្ចប់ទៅ កុំឲ្យកិច្ចការហ្នឹង (សំដៅលើការបង្កបញ្ហារាំងស្ទះ ការចោទប្រកាន់របស់ក្រុមប្រឆាំង) ធ្វើឲ្យផ្អាកការងារបោះបង្គោលព្រំដែនខ័ណ្ឌសីមារវាងប្រទេសយើងទាំងពីរ គឺថា ប្រទេសប្រសិនបើគ្មានព្រំដែន គ្មានបង្គោលព្រំដែនទេ គឺ ប្រទេសជាតិនឹងនៅតែមានបញ្ហាទៅថ្ងៃក្រោយ»៕

ឯកឧត្តម​ អ៊ូ​ ច័ន្ទឬទ្ធិ​ ចាត់ទុក​សម្តីរបស់តំ​ណាងរាស្ត្របក្ស​ខ្លួន​ ដែលចោទ​ថារាជរដ្ឋា​ភិបាលប្រើផែន​ទីក្លែង​ក្លាយ​ ថាជារឿង​របស់បុគ្គលនោះ

បន្ទាប់ពីបញ្ចប់ពិធីប្រគល់ ទទួល និងផ្ទៀងផ្ទាត់ផែនទី ដែលកម្ពុជាបានខ្ចីច្បាប់ដើម គឺផែនទីUTM ខ្នាត ១/១០០.០០០ ទាំង១៨ផ្ទាំង​ នៅវិមានមិត្តភាព ថ្ងៃទី ២០ ខែសីហា ឆ្នាំ២០១៥នេះ ឯកឧត្តម អ៊ូ ច័ន្ទឬទ្ធិ សមាជិកសភាមកពីគណបក្សសង្គ្រោះជាតិ ដែលមានចូលរួមក្នុងពីធីនេះ បានមានប្រសាសន៍ទាត់ចោលនូវការលើកឡើងរបស់សមាជិកគណបក្សសង្គ្រោះជាតិដែលថា ផែនទីដែលរាជរដ្ឋាភិបាលបានប្រើជាផែនទីក្លែងក្លាយ ដោយឯកឧត្តមបានចាត់ទុកថា ការលើឡើងទាំងនោះ គឺជារឿងបុគ្គលសុទ្ធសាធមិនជាប់ទាក់ទងនិងគណបក្សទេ។

ការប្រើវិធីបកស្រាយរបៀបដូចសាចទឹកក្តៅដាក់លើអ្នកតំណាងរាស្ត្រ អ៊ុំ សំអាន និងអ្នកមួយចំនួនទៀត ដែលធ្លាប់ចោទមកលើរាជរដ្ឋាភិបាល ថាបានប្រើប្រាស់ផែនទីក្លែងក្លាយនៅថ្ងៃនេះ ឯកឧត្តម អ៊ូ ច័ន្ទឬទ្ធិ បានបញ្ជាក់ហើយបញ្ជាក់ទៀតនៅចំពោះមុខអ្នកសារព័ត៌មានជាតិ និងអន្តរជាតិថា «ការលើកឡើងរបស់សមាជិកម្នាក់ យើងមិនអាចយកជំហរជាគណបក្សទេ គណបក្សសង្គ្រោះជាតិ សូមបញ្ជាក់សារជាថ្មីថា យើងមិនដែលបានចោទដល់រដ្ឋាភិបាលថា ប្រើប្រាស់ផែនទីក្លែងក្លាយទេ គ្រាន់តែបុគ្គលប៉ុណ្ណោះ។ ដូច្នេះសូមបញ្ជាក់អ្នកសារព័ត៌មានឲ្យច្បាស់ថា គណបក្សសង្គ្រោះជាតិ មិនដែលបានចោទរដ្ឋាភិបាលប្រើប្រាស់ផែនទីក្លែងក្លាយទេ»។

ដោយឡែកចំពោះ ការចាប់ខ្លួនតំណាងរាស្ត្រគណបក្សសង្គ្រោះជាតិ ដែលថារដ្ឋាភិបាលប្រើប្រាស់ផែនទីក្លែងក្លាយនោះ ឯកឧត្តម អ៊ូ ច័ន្ទឬទ្ធិ យល់ថា «វាជារឿងបុគ្គលម្នាក់ៗ ក្នុងការលើកឡើងជាសិទ្ធិសេរីភាព។ បើសិនណាគាត់ (រាជរដ្ឋាភិបាល) បញ្ជាក់ថាផែនទីមិនក្លែងក្លាយ ហើយផែនទីត្រឹមត្រូវ និងផ្ទៀងផ្ទាត់ទៅគ្រប់ប្រភពអាចប្រើប្រាស់បាន គឺអ្នកដែលចោទហ្នឹងជារឿងមិនត្រឹមត្រូវ»។  សម្តីនេះអាចថាជាការចេញមុខការពារគណបក្ស សង្គ្រោះជាតិនិងមានចេតនាទម្លាក់កំហុសទៅអ្នកតំណាងរាស្ត្រ អ៊ុំ សំអាន ដែលបានចោទប្រកាន់មកលើរាជរដ្ឋាភិបាលនាពេលកន្លងមក។

ឯកឧត្តម អ៊ូ ច័ន្ទឬទ្ធិ បន្តថាជាគោលការណ៍ គណបក្សសង្គ្រោះជាតិ បើកសិទ្ធិសេរីភាពអោយតំណាងរាស្ត្រម្នាក់ៗក៏ដូចជាអ្នកគាំទ្រគណបក្សសង្គ្រោះជាតិ ក្នុងការបញ្ចេញមតិ ប៉ុន្តែកុំយល់ច្រឡំ រវាងជំហររបស់គណបក្ស  និងជំហររបស់បុគ្គលម្នាក់ៗ វាខុសពីគ្នា។

ជាមួយគ្នាដែរ ឯកឧត្តម អ៊ូ ច័ន្ទឬទ្ធិ ក៏បានថ្លែងអំណរគុណចំពោះ អង្គការសហប្រជាជាតិដែលបានផ្តល់ផែនទីដើម្បីធ្វើការផ្ទៀងផ្ទាត់ក្នុងរយះពេលខ្លីមួយនេះ។ ឯកឧត្តមយល់ថាវាជារឿងមួយដ៏ល្អដែលកម្ពុជាអាចផ្ទៀងផ្ទាត់ផែនទី ពីប្រភពទាំងអស់ដើម្បីបញ្ជាក់ពីភាពស្របច្បាប់រឺក៏ភាពត្រឹមត្រូវដែលរដ្ឋាភិបាលបច្ចុប្បន្នប្រើផែនទី។

ទោះជាយ៉ាងណា ការបញ្ជាក់ពីសមាជិកសភាគណបក្សសង្រ្គោះជាតិរូបនេះ នៅតែមិនទាន់អាចឲ្យគេជឿបានពីគោលជំហរពិតរបស់គណបក្សមួយនេះទេ ពីព្រោះកន្លងមក គណបក្សសង្រ្គោះជាតិ មិនដែលបានបកស្រាយថា ការចោទប្រកាន់រាជរដ្ឋាភិបាលប្រើប្រាស់ផែនទីក្លែងក្លាយគឺជារឿងបុគ្គលទេ ប៉ុន្តែទើបតែពេលឃើញការផ្ទៀងផ្ទាត់ផែនទី នៅនឹងភ្នែកស្តែងៗទើបមន្ត្រីគណបក្សនេះ លើកឡើងថា វាជារឿងបុគ្គលមិនទាក់ទងនឹងបក្សទៅវិញ។ ការលើកឡើងយករួចខ្លួនបែបនេះ ហាក់បានធ្វើឲ្យមហាជននៅមានមន្ទិលសង្ស័យ និងមិនច្បាស់លាស់ពីគោលនយោបាយ, របៀបរបបដឹកនាំនៃគណបក្សប្រឆាំងមួយនេះ និងហាក់បីដូចជាទាត់ចោលទាំងស្រុងនូវសំដីរបស់សមាជិកគណបក្សខ្លួនកន្លងមក៕