នាយកដ្ឋានរតនាគារជាតិ បានរៀបចំកិច្ចប្រជុំបូកសរុបការងាររបស់រតនាគារទូទាំងប្រទេសប្រចាំខែឧសភា ឆ្នាំ២០១៧

នៅថ្ងៃទី១២ ខែមិថុនា ឆ្នាំ២០១៧នេះ អគ្គនាយកដ្ឋានរតនាគារជាតិ បានរៀបចំកិច្ចប្រជុំបូកសរុបការងាររបស់រតនាគារទូទាំងប្រទេសប្រចាំខែឧសភា ឆ្នាំ២០១៧ ក្រោមអធិបតីភាពលោក ជូ គឹមឡេង រដ្ឋលេខាធិការ ក្រសួងសេដ្ឋកិច្ចនិងហិរញ្ញវត្ថុ ដើម្បីពិភាក្សាលើ៖

១-ត្រួតពិនិត្យការងាររបស់រតនាគារទូទាំងប្រទេស ដែលបានអនុវត្តក្នុងខែឧសភា ឆ្នាំ២០១៧
២- លើកទិសដៅសម្រាប់ការអនុវត្តការងារក្នុងខែមិថុនា ឆ្នាំ២០១៧
៣- ដោះស្រាយបញ្ហាប្រឈមនានា ដែលរតនាគារទូទាំងប្រទេសជួបប្រទះ៕

ក្រសួង​ពាណិជ្ជក​ម្ម រៀបចំ​សិក្ខាសាលា​ពិគ្រោះ​យោបល់​អន្តរក្រសួង​ស្តីពីរ​​បាំង​ពាណិ​ជ្ជកម្មសេ​វានៅ​កម្ពុជា

ក្រសួងពាណិជ្ជកម្ម បានសហការជាមួយអង្គការ GIZ នៃប្រទេសអាល្លឺម៉ង់ រៀបចំសិក្ខាសិលាពិគ្រោះយោបល់អន្តរក្រសួងស្តីពី របាំងពាណិជ្ជកម្មសេវានៅកម្ពុជា ដោយផ្តោតសំខាន់ទៅលើវិស័យសុខាភិបាល និងទេសចរណ៍ជាចម្បង ដើម្បីគាំទ្រដល់គម្រោង “ការផ្តួចផ្តើមសមាហរណកម្មអាស៊ាន (IAI) ក្នុងក្របខ័ណ្ឌទីផ្សារអាស៊ានតែមួយ” នៅថ្ងៃទី០៩ ខែមិថុនា ឆ្នាំ២០១៧។
សិក្ខាសាលានេះ ប្រព្រឹត្តទៅក្រោមអធិបតីភាព លោកស្រី តឹករ៉េត កំរង រដ្ឋលេខាធិការក្រសួងក្រសួងពាណិជ្ជកម្ម និងមានការចូលរួមពីមន្ត្រីអន្តរក្រសួង តំណាងអង្គការ GIZ តំណាងសភាពាណិជ្ជកម្មអឺរ៉ុប និងតំណាងដៃគូអភិវឌ្ឍ ដែលកំពុងបម្រើការងារនៅក្នុងវិស័យទេសចរណ៍ និងសុខាភិបាល។
នៅក្នុងឱកាសនោះ លោកស្រីរដ្ឋលេខាធិការ បានលើកឡើងពីសារៈសំខាន់នៃសេវាពាណិជ្ជកម្ម មានដូចជាធុរកិច្ច សំណង់ អប់រំ ហិរញ្ញវត្ថុ សុខភាព និងទេសចរណ៍ សម្រាប់ការអភិវឌ្ឍ និងជំរុញកំណើនសេដ្ឋកិច្ចជាតិ។ លោកស្រីសង្ឃឹមយ៉ាងមុតមាំថា សិក្ខាសាលាពិគ្រោះយោបល់នេះ នឹងនាំមកនូវការសន្ទនាកាន់តែផុសផុល កិច្ចសហប្រតិបត្តិការ ការផ្តួចផ្តើមនិងយុទ្ធសាស្រ្ត ដើម្បីកំណត់អត្តសញ្ញាណរបាំងអាទិភាពចំពោះពាណិជ្ជកម្មនៅក្នុងសេវាសុខាភិបាល និងទេសចរណ៍ សម្រាប់រាជរដ្ឋាភិបាលធ្វើការចងក្រងគោលជានយោបាយជាតិ សំដៅជំរុញការអភិវឌ្ឍពាណិជ្ជកម្មនៅកម្ពុជា។
សូមបញ្ជាក់ថា គម្រោងការផ្តួចផ្តើមសមាហរណកម្មអាស៊ាន (IAI) គឺជាកិច្ចសហការរវាងរដ្ឋាភិបាលនៃប្រទេសអាស៊ាន (កម្ពុជា ឡាវ មីយ៉ាន់ម៉ា និងវៀតណាម) ជាមួយរដ្ឋាភិបាលនៃប្រទេសអាឡឺម៉ង់ ដើម្បីជួយលើកកម្ពស់សេវាសុខាភិបាល និងការចល័តពលករជំនាញនៅក្នុងតំបន់។ គម្រោងនេះ មានទឹកប្រាក់សរុបចំនួន ៦លានអឺរ៉ូ ហើយត្រូវបានអនុវត្តន៍ដោយអង្គការ GIZ ចាប់តាំងពីខែសីហា ឆ្នាំ២០១៥ ហើយនឹងបញ្ចប់នៅខែមិថុនា ឆ្នាំ២០១៨ នៅក្នុងកិច្ចប្រជុំឧត្តមមន្ត្រីសេដ្ឋកិច្ចកម្ពុជា ឡាវ មីយ៉ាន់ម៉ា និងវៀតណាម៕

គ.ជ.ប បើកការរាប់​សន្លឹកឆ្នោត​ឡើងវិញ ​នៅការិយាល័យ​បោះឆ្នោត​ចំនួន២៣ ​ស្ថិតក្នុង​ឃុំដូង​ ខេត្តស្វាយរៀង​

នៅថ្ងៃទី១២ ខែមិថុនា ឆ្នាំ២០១៧នេះ គណៈកម្មាធិការជាតិរៀបចំការបោះឆ្នោត (គ.ជ.ប) បានបើកការរាប់សន្លឹកឆ្នោតឡើងវិញ នៃការិយាល័យបោះឆ្នោតចំនួន២៣ការិយាល័យ ស្ថិតក្នុងឃុំដូង ស្រុករមាសហែក ខេត្តស្វាយរៀង នៅស្ដីការរបស់ខ្លួន។

ការរាប់សន្លឹកឆ្នោតនៅឃុំដូង បានបង្ហាញថា គណបក្សសង្គ្រោះជាតិទទួលបាន ២,៥៩៩សំឡេង រីឯគណបក្សប្រជាជនកម្ពុជាទទួលបាន ២,៥៩៦សំឡេង គណបក្សប្រជាជន ក៏ប្ដឹងទៅ គណៈកម្មការខេត្តរៀបចំការបោះឆ្នោត (PEC)។ ក្រោយការរាប់នៅ PEC គណបក្សប្រជាជនកម្ពុជា កើនបាន៦សំឡេង រីឯគណបក្ស សង្គ្រោះជាតិ កើនបាន២សំឡេង ពោលគណបក្សប្រជាជនកម្ពុជា ជាអ្នកឈ្នះ។

គណបក្សសង្គ្រោះជាតិ ក៏បានប្ដឹងសុំរាប់សន្លឹកឆ្នោតឡើងវិញ ហើយបានបើកការរាប់នៅម៉ោង ៨៖០០នាទី ព្រឹកថ្ងៃទី១២ ខែមិថុនា ឆ្នាំ២០១៧នេះតែម្ដង និងមានការអញ្ជើញចូលរួមសង្កេតមើល ពីក្រុមសារព័ត៌មានជាតិ-អន្តរជាតិ តំណាងគណបក្សនយោបាយ និងអ្នកសង្កេតការណ៍ជាតិ អន្តរជាតិផងដែរ៕

លោក​ ទិន ពន្លក​ អញ្ជើញបើកសិក្ខាសាលា​ បើកគម្រោងស្តីពី​ ការអនុវត្ត​កម្មវិធី​តម្រង់ទិស​គោលនយោបាយសម្រាប់ការអភិវឌ្ឍបៃតងនៅកម្ពុជា

នៅថ្ងៃទី១២ ខែមិថុនា ឆ្នាំ២០១៧ នៅសណ្ឋាគារសូហ្វីតែល លោក ទិន ពន្លក អគ្គលេខាធិការនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច.) បានអញ្ជើញចូលរួមជាអធិបតីបើកសិក្ខាសាលាបើកគម្រោងស្តីពី ការអនុវត្តកម្មវិធីតម្រង់ទិសគោលនយោបាយសម្រាប់ការអភិវឌ្ឍបៃតងនៅកម្ពុជា ដែលបានសហការរៀបចំដោយអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាព តាមរយៈនាយកដ្ឋានសេដ្ឋកិច្ចបៃតង និងវិទ្យាស្ថានអភិវឌ្ឍន៍បៃតងសកល (GGGI)។

លោក ទិន ពន្លក បានឲ្យដឹងថា សិក្ខាសាលានេះមានគោលបំណងចែករំលែកគោលបំណងរួមរបស់កម្មវិធី ភារកិច្ចត្រូវអនុវត្ត និងវិធីសាស្រ្តអនុវត្ត ការវាយតម្លៃលើសក្តានុពលអភិវឌ្ឍន៍បៃតង ព្រមទាំងប្រមូលយកធាតុចូលពីសិក្ខាកាមចូលទៅក្នុងការអនុវត្តកម្មវិធី។

សិក្ខាសាលានេះផងដែរក៏មានការចូលរួមពីមន្រ្តី និងអ្នកជំនាញការតំណាងឱ្យក្រសួង-ស្ថាប័ន វិស័យឯកជន អង្គការ និងដៃគូអភិវឌ្ឍន៍ចំនួន២៥ សរុបចំនួន៦៥នាក់។ កម្មវិធីតម្រង់ទិសគោលនយោបាយសម្រាប់ការអភិវឌ្ឍបៃតងនៅកម្ពុជា នឹងផ្ដោតសំខាន់លើការពង្រឹងដំណើរការធ្វើគោលនយោបាយជាតិ និងផែនការវិនិយោគ និងតម្រង់ទិសអាទិភាពគោលនយោបាយដើម្បី គាំទ្រដល់ការប្តេជ្ញាចិត្តរបស់រាជរដ្ឋាភិបាលលើគោលដៅអភិវឌ្ឍន៍ដោយចីរភាព (SDG) ការចូលរួមចំណែករបស់កម្ពុជា នៅក្នុងអនុសញ្ញាក្របខណ្ឌអង្គការសហប្រជាជាតិស្ដីពីការប្រែប្រួលអាកាសធាតុ (NDCs) ព្រមទាំងគោលនយោបាយជាតិពាក់ព័ន្ធនឹងអាកាសធាតុ និងការអភិវឌ្ឍបៃតងរបស់កម្ពុជា៕

លោកឧបនាយករដ្ឋមន្រ្តីប្រចាំការ ប៊ិន ឈិន ថ្វាយសារលិខិតថ្វាយព្រះពរ សម្តេចព្រះមហាក្សត្រីក្នុងព្រះរាជពិធីបុណ្យចម្រើនព្រះជន្មយាងចូល៨២ព្រះវស្សា

លោកនាយករដ្ឋមន្រ្តី ហ៊ុន សែន ថ្វាយសារលិខិតថ្វាយព្រះពរ សម្តេចព្រះមហាក្សត្រីក្នុងព្រះរាជពិធីបុណ្យចម្រើនព្រះជន្មយាងចូល៨២ព្រះវស្សា

អភិបាលខេត្តកំពង់ឆ្នាំង អញ្ជើញជាអធិបតីក្នុងពិធីចែកអំណោយកញ្ចប់​អាហារស្រាយ​បួសខែរ៉ូម៉ាទន​ ជូនប្រជាពលរដ្ឋ​ ជាសាសនិក​ឥស្លាមចំនួន​ ១.៥០០គ្រួសារ​

លោក ឈួរ ច័ន្ទឌឿន អភិបាលខេត្តកំពង់ឆ្នាំង នៅព្រឹកថ្ងៃទី១១ ខែមិថុនា ឆ្នាំ២០១៧ បានអញ្ជើញជាអធិបតីក្នុងពិធីចែកអំណោយកញ្ចប់អាហារស្រាយបួសខែរ៉ូម៉ាទន ជូនប្រជាពលរដ្ឋ ជាសាសនិកឥស្លាមចំនួន ១.៥០០គ្រួសារតាមរយៈ មជ្ឈមណ្ឌលអប់រំនិសិ្សតមុស្លីមនៅកម្ពុជានៅវិទ្យាស្ថានអាន់នូរី ស្ថិតនៅភូមិច្រករមៀត ឃុំអូរប្ញស្សី ស្រុកត្រឡាច ខេត្តកំពង់ឆ្នាំង ។

អភិបាលខេត្តកំពង់ឆ្នាំង បានស្នើឱ្យអាជ្ញាធរគ្រប់លំដាប់ថ្នាក់ ពង្រឹងការផ្តល់សេវា និងដោះស្រាយ សំណូមពរដែលជាតម្រូវការចាំបាច់ជូនប្រជាពលរដ្ឋអោយបានទាន់ពេលវេលា ព្រមទាំងជំរុញអោយអាជ្ញាគ្រប់លំដាប់ថ្នាក់ត្រូវបន្តពង្រឹងអនុវត្តគោលនយោបាយភូមិឃុំមានសុវត្ថិភាពអោយបានល្អប្រសើរស្របតាមគោលនយោបាយរបស់រាជរដ្ឋាភិបាល។

ជាកិច្ចបញ្ចប់ លោកក៏បានផ្តាំផ្ញើដល់ប្រជាពលរដ្ឋអោយខិតខំថែរក្សាសុខភាព កុំធ្វើចំណាកស្រុក ខុសច្បាប់ ត្រូវចូលរួមគោរពច្បាប់ ចរាចរណ៍ផ្លូវគោកថ្មី និងសូមអប់រំកូនចៅអោយខិតខំរៀនសូត្រ និងជៀសអោយឆ្ងាយពីគ្រឿងញៀននិងអំពើអបាយមុខផ្សេងៗដែលសង្គមស្អប់ខ្ពើម៕

លោកនាយករដ្ឋមន្រ្តី ហ៊ុន សែន អញ្ជើញជួបប្រតិភូរដ្ឋមន្ត្រីនៃសន្និសីទអន្តរជាតិទេសចរណ៍

នៅព្រឹកថ្ងៃទី១២ ខែមិថុនា ឆ្នាំ២០១៧នេះ មុននឹងអញ្ជើញបើកសន្និសីទអន្តរជាតិស្តីពី ទេ​សចរណ៍ ប្រកបដោយនិរន្តរភាព និងទីក្រុងបេតិកភណ្ឌលើកទី១ លោកនាយករដ្ឋមន្រ្តី ហ៊ុន សែន បានអញ្ជើញជួបសំណេះសំណាល និងពិភាក្សាកាងារជាមួយ ប្រតិភូរដ្ឋមន្ត្រីដែលអញ្ជើញមកចូលរួមក្នុងសន្និសីទអន្តរជាតិស្តីពីទេសចរណ៍នៅទីក្រុងសៀមរាប។ ក្រុម ប្រតិភូនេះគឺដឹកនាំដោយលោក John Ameratunga រដ្ឋមន្ត្រីក្រសួងអភិវឌ្ឍន៍ទេសចរណ៍ប្រទេស ស្រីលង្ការ។

លោក John Ameratunga បានសម្តែងនូវការអបអរសាទរចំពោះ លោកនាយករដ្ឋមន្រ្តី ហ៊ុន សែន ចំពោះលទ្ធផលនៃការបោះឆ្នោតក្រុមប្រឹក្សាឃុំ សង្កាត់ និងសម្តែងនូវការអបអរសាទរចំពោះសន្និសីទអន្តរជាតិស្តីពីទេសចរណ៍ ប្រកបដោយនិរន្តរភាព និងទីក្រុងបេតិកភណ្ឌលើកទី១ នៅទីក្រុងសៀមរាប នេះ ។ លោក បានមានប្រសាសន៍ថា កម្ពុជានៅពេលនេះមានទេស​ចរប្រមាណ៥លាននាក់ ដែលនេះ បានឆ្លុះបញ្ចាំងពីការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា។

លោកនាយករដ្ឋមន្ត្រី ហ៊ុន សែន ក៏បានស្វាគមន៍ប្រតិភូទាំងអស់ ហើយលោក បានមានប្រ​សាសន៍ ថានេះជាកិត្តិយសណាស់ដែលកម្ពុជាបានធ្វើជាម្ចាស់ផ្ទះនៃសន្និសីទនៅលើទឹកដីអង្គរថ្ងៃនេះ។ ទន្ទឹមនឹង នេះដែរ លោក ហ៊ុន សែន បានបញ្ជាក់ថា កាលឆ្នាំ១៩៧៩ ទឹកដីនៃខេត្តសៀមរាបនេះ មិនមានការរីកចម្រើន និងមិនមានមនុស្សរស់នៅច្រើនទេ។ នៅឆ្នាំ១៩៩៣ ទីនេះក៏នៅតែមានបញ្ហាប្រឈមដោយ នៅមានខ្មែរក្រហមលបឆ្មក់វាយនៅឡើយ។ ទីនេះជាសមរភូមិសង្រ្គាម។ ទីក្រុងសៀមរាបបាន ចាប់ផ្តើម ដោយមានសណ្ឋាគារចាស់ៗតែ២ប៉ុណ្ណោះ តែពេលនេះយើងមានសណ្ឋាគាររហូតដល់ទៅ១៥០ នោះ មិនរាប់បញ្ចូលផ្ទះសំណាក់ផង។ ទេសចរណ៍យើងចាប់ផ្តើមពីចំនួនសូន្យ រហូតពេលនេះយើងមានទេសចរ ប្រមាណ៥លាននាក់។ នេះគឺដោយសារប្រទេសជាតិមានសុខសន្តិភាព រួមជាមួយនយោបាយបើកចំហរជើងមេឃរបស់រជារដ្ឋាភិបាលកម្ពុជា។

លោកនាយករដ្ឋមន្រ្តី ហ៊ុន សែន បានបន្តថា ឥឡូវនេះ កម្ពុជាកំពុងតែជំរុញការអនុវត្តនូវការនាំចេញនៅនឹងកន្លែងដូចជាដំណាំកសិផលនានាទៅកាន់សណ្ឋាគារដើម្បីបម្រើឱ្យវិស័យទេសចរណ៍។ ការជំរុញ ការនាំចេញនៅនឹងកន្លែងគឺមានអត្ថប្រយោជន៍សំខាន់ណាស់ ក្នុងការសុវត្ថិភាពម្ហូបអាហារដល់ភ្ញៀវទេសចរនិងក្នុងការលើកតម្កើងកសិផលកម្ពុជាដើម្បីពង្រឹងជីវ​ភាព​ប្រជាពលរដ្ឋឱ្យកាន់តែប្រសើរឡើង៕

លោកនាយករដ្ឋមន្រ្តី ហ៊ុន សែន អញ្ជើញជាអធិបតីបើកសន្និសីទអន្តរជាតិទេសចរណ៍

នៅព្រឹកថ្ងៃទី១២ ខែមិថុនា ឆ្នាំ២០១៧ នេះ លោកនាយករដ្ឋមន្ត្រី ហ៊ុន សែន បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកសន្និសីទអន្តរជាតិស្តីពីទេសចរណ៍ប្រកបដោយនិរន្តរភាព និងទីក្រុងបេតិកភណ្ឌលើកទី១ ក្រោមប្រធានបទ «ការអភិរក្ស និងការការពារទីក្រុងបេតិ​ក​ភ័ណ្ឌ»។

កិច្ចប្រជុំមន្រ្តីជាន់ខ្ពស់ និងសន្និសីទអន្តរជាតិខាងលើនេះ គឺជាឱកាសជំរុញឱ្យអន្តរជាតិមើលឃើញ កម្ពុជាជាប្រទេសមានសក្តានុពល ផ្នែកវប្បធម៌បេតិកភណ្ឌសម្បូរបែប ដែលទាក់ទាញទេសចរណ៍ និងដៃគូអភិវឌ្ឍន៍ផ្សេងៗ មកចូលរួមអភិរក្សថែរក្សាបេតិកភណ្ឌ និងធនធានវប្បធម៌ ក្នុងនោះមានដូចជា អង្គការ UNWTO, UNESCO, PATA រួមទាំងអង្គការដៃគូពាក់ព័ន្ធជាច្រើនទៀត។ កត្តាទាំងនេះ កើតចេញដោយសារប្រទេសកម្ពុជា មានសុខសន្តិភាពស្ថិរភាពនយោបាយ និងមានការអភិវឌ្ឍលើគ្រប់វិស័យ ទើបធ្វើឱ្យទេសចរណ៍មានការកើនឡើងរហូតជាមួយនឹងកំណើននៃចំនួនទេសចរអន្តរជាតិ នៅលើសកលលោកចំនួន ១,២៣៥លាននាក់ ក្នុងកំណើន ៣.៩% នៅឆ្នាំ២០១៦ ដែលក្នុងនោះទេសចរណ៍តំបន់អាស៊ីប៉ាស៊ីហ្វិកទទួលបាន ៣០៣លាននាក់ ក្នុងកំណើន ៨.៤% កម្ពុជាទទួលបានទេសចរអន្តរជាតិចំនួន ៥លាននាក់ ក្នុងកំណើន ៥%។ ក្នុងរយៈពេល៣ខែ ដើមឆ្នាំ២០១៧ កម្ពុជាទទួលបានទេសចរអន្តរជាតិជាង ១.៥លាននាក់ ក្នុងកំណើន ១២%។ តាមការរំពឹងទុកនៅឆ្នាំ ២០១៧ កម្ពុជាអាចនឹងទទួលបានទេសចរអន្តរជាតិប្រមាណ ៥.៤លាននាក់ និង៧លាននាក់ នៅឆ្នាំ២០២០។

នៅក្នុងពិធីបើកសន្និសីទព្រឹកមិញនេះ ប្រមុខរាជរដ្ឋាភិបាលកម្ពុជា បានមានប្រសាសន៍ថាសន្និសីទ និងកិច្ចប្រជុំអន្ដរជាតិនេះគឺជាវេទិកាសំខាន់សម្រាប់ការពិភាក្សានិងផ្លាស់ប្តូរបទពិ​សោធន៍​ក្នុងចំណោមស្ថាប័នជាតិនិងអន្តរជាតិអ្នកជំនាញនិងអ្នកស្រាវជ្រាវដើម្បីដាក់ចេញនូវវិធានការថ្មីនិងគោលដៅសម្រាប់ការធ្វើពិពិធកម្មផលិតផលទេសចរណ៍និងការណែនាំការអភិវឌ្ឍប្រកបដោយចីរភាពនៃបេតិកភណ្ឌនិងទេសចរណ៍វប្បធម៌នៅកម្ពុជា។ លោកនាយករដ្ឋមន្រ្តី ហ៊ុន សែន បានការកោតសរសើរចំពោះ លេខាធិការអង្គការ UNESCO, UNWTO, សមាគមអាស៊ីប៉ាស៊ីហ្វិកទេសចរណ៍ (PATA) និងសាកលវិទ្យាល័យ Sunshine Australia សម្រាប់កិច្ចសហការយ៉ាងជិតស្និទ្ធជាមួយរាជរដ្ឋាភិបាលកម្ពុជាក្នុងការរៀបចំកិច្ចប្រជុំនេះនិង សន្និសីទអន្ដរជាតិលើទឹកដីអង្គរដែលជាបេតិកភណ្ឌល្បីល្បាញលើពិភពលោក។

នៅក្នុងស្មារតីនេះប្រទេសកម្ពុជាគាំទ្រចំពោះ  «ការអភិរក្ស និងការពារទីក្រុងបេតិកភ័ណ្ឌ» ដែលផ្តោតលើចំណុចមួយចំនួនដូចជា៖ ១-ការស្វែងរកឱកាសនិងបញ្ហាប្រឈមជាមួយនឹងគោលបំណងដើម្បីលើកកម្ពស់ភាពជាដៃគូយុទ្ធសាស្ត្រ និងកិច្ចសហប្រតិបត្តិការលើវិស័យទេសចរណ៍និងវប្បធម៌ ដើម្បីពង្រីកការភ្ជាប់បណ្តាសា្ថប័ន ក្នុងចំណោមរដ្ឋជាសមាជិកACD។ ២-ពិភាក្សាអំពីម៉ូដែលភាពជាដៃគូថ្មីនិងតួនាទីនៃអភិបាលកិច្ចល្អក្នុងការគ្រប់គ្រងការការពារការអភិរក្ស និងការអភិវឌ្ឍនៃទីក្រុងបេតិកភ័ណ្ឌប្រកបដោយចីរភាពនិង ៣- ណែនាំការស​ម្រេចចិត្តនិងសេចក្តីថ្លែងការណ៍នៅក្នុងគោលបំណងដើម្បីលើកកម្ពស់ការអភិវឌ្ឍប្រក​បដោយចីរភាពនៃវិស័យទេសចរណ៍និងវប្បធម៌។

លើសពីនេះទៀត កម្ពុជាគាំទ្រយ៉ាងពេញលេញចំពោះយុទ្ធសាស្ត្រផ្តួចផ្តើម «ខ្សែក្រវាត់មួយផ្លូវមួយ» ដែលជាក្របខ័ណ្ឌគោលនយោបាយឈ្នះ-ឈ្នះរបស់ប្រទេសចិនដែលបានគ្របដណ្តប់នៅលើខ្សែក្រវាត់សេដ្ឋកិច្ចផ្លូវជំនួញសូត្រ និងសតវត្សរ៍ទី២១ផ្លូវជំនួញសូត្រសមុទ្រនេះដោយសារតែយើងជឿថាគោលនយោបាយធំនេះនឹងជួយលើកកម្ពស់ការអភិវឌ្ឍនៃវិស័យទេសចរណ៍។ ដូច្នេះតាមសន្និសីទនេះ នឹងទទួលបាននូវការចែករំលែកចំណេះដឹង ជំនាញនិងបទពិសោធន៍យ៉ាងរស់រវើករួមនឹងសេចក្តីថ្លែងការណ៍សម្រេចលើ «វិស័យទេសចរណ៍ប្រ​កបដោយនិរន្តរភាពនិងជាទីក្រុងបេតិកភ័ណ្ឌ» ដែលបានគាំទ្រដោយ UNESCO និង  UNWTO ដើម្បីរួមគ្នាកសាងអនាគតមួយប្រកបដោយនិរន្តរភាពសម្រាប់វិស័យទេសចរណ៍និងវប្បធម៌៕

កិច្ចប្រជុំដៃគូសន្ទនាសហប្រតិបត្តិការ អាស៊ីលើកទី២ នឹងផ្តល់គុណតម្លៃបន្ថែមដល់កិច្ចសហប្រតិបត្តិការដែលមានស្រាប់ លើវិស័យទេសចរណ៍អន្តរជាតិ និងសាកល

ក្រសួងទេសចរណ៍បានឲ្យដឹងថា កិច្ចប្រជុំដៃគូសន្ទនាសហប្រតិបត្តិការអាស៊ីលើកទី២ (2nd Asia Cooperation Dialogue Meetings) នឹងផ្តល់នូវគុណតម្លៃបន្ថែមដល់កិច្ចសហប្រតិបត្តិការដែលមានស្រាប់ក្នុងក្របខណ្ឌនៃកិច្ចសហប្រតិបត្តិការវិស័យទេសចរណ៍តំបន់ អន្តរជាតិ និងសាកល។

“កិច្ចប្រជុំដៃគូសន្ទនាសហប្រតិបត្តិការអាស៊ីលើកទី២ នឹងពិភាក្សាស្វែងរកយុទ្ធសាស្ត្រគន្លឹះ និងយន្តការចាំបាច់ដើម្បីជំរុញវេទិកាដៃគូសន្ទនាសហប្រតិបត្តិការអាស៊ីកាន់តែមានប្រសិទ្ធិភាព សំដៅផ្តល់នូវគុណតម្លៃបន្ថែមដ៏មានសារៈសំខាន់ ទៅលើកិច្ចសហប្រតិបត្តិការនានាក្នុងវិស័យទេសចរណ៍តំបន់ អន្តរជាតិ និងសាកលលោក និងស្ថាប័នអន្តរជាតិក្នុងវិស័យទេសចរណ៍” លោក Bundit Limschoon អគ្គលេខាធិការកិច្ចប្រជុំដៃគូសន្ទនាសហប្រតិបត្តិការអាស៊ីលើកទី២ បានថ្លែងនៅក្នុងកិច្ចប្រជុំថ្នាក់ឧត្តមមន្ត្រីទេសចរណ៍នៃដៃគូសន្ទនាសហប្រតិបត្តិការអាស៊ីលើកទី២ ដែលដឹកនាំដោយលោក ទិត ចន្ថា រដ្ឋលេខាធិការក្រសួងទេសចរណ៍ នៅថ្ងៃទី១១ ខែមិថុនា ឆ្នាំ២០១៧ នៅសាលសន្និបាតសុខាសៀមរាបរីសត ខេត្តសៀមរាប។

កិច្ចប្រជុំមន្រ្តីជាន់ខ្ពស់នេះ នឹងពិភាក្សាលើសេចក្តីថ្លែងការណ៍រួមរបស់រដ្ឋមន្រ្តី ACD (Statements and Resolutions) និងឯកសារពាក់ព័ន្ធសំខាន់ៗនានា ដើម្បីដាក់ឆ្លងក្នុងកិច្ចប្រជុំរដ្ឋមន្ត្រីដៃគូសន្ទនាសហប្រតិបត្តិការអាស៊ី ACD នៅរសៀលថ្ងៃទី១២ ខែមិថុនា ឆ្នាំ២០១៧។

លោក ទិត ចន្ថា រដ្ឋលេខាធិការក្រសួងទេសចរណ៍ ក៏បានបញ្ជាក់បន្ថែមថា កិច្ចប្រជុំ និងសន្និសីទអន្តរជាតិនេះគឺជាឱកាសជំរុញអោយអន្តរជាតិមើលឃើញថា កម្ពុជាជាប្រទេសមានសក្តានុពលផ្នែកវប្បធម៌បេតិកភណ្ឌខ្លាំងក្នុងការទាក់ទាញទាំងទេសចរ និងដៃគូអភិវឌ្ឍន៍ផ្សេងៗ (ដូចជា អង្គការ UNWTO UNESCO PATA) រួមទាំងអង្គការពាក់ព័ន្ធជាច្រើនទៀត មកចូលរួមអភិរក្សថែរក្សាបេតិកភណ្ឌ និងធនធានវប្បធម៌៕

លោក ឃឹម ប៊ុនសុង ជួបសំណេះសំណាល និងថ្លែងអំណរគុណ ជាមួយបេក្ខជនក្រុមប្រឹក្សាឃុំ-ថ្នាក់ដឹកនាំភូមិ ព្រមទាំងជម្រុញឱ្យចុះតាមផ្ទះដើម្បី ថ្លែងអំណរគុណ សមាជិកទាំងអស់ដែលបានបោះឆ្នោតឱ្យគណបក្សប្រជាជនកម្ពុជា

សៀមរាប៖ ​នៅ​ព្រឹក​ថ្ងៃអាទិត្យ ​ទី១១ ​ខែមិថុនា ​ឆ្នាំ២០១៧នេះ ​នៅ​ស្នាក់​ការ​គណបក្សប្រជាជន​កម្ពុជា ​ស្រុក​ស្រីស្នំ ​លោក​ ​ឃឹម ​ប៊ុ​ន​សុង ​សមាជិក​គណៈកម្មាធិការ​កណ្តាល ​និង​ជា​ប្រធាន​គណៈកម្មាធិការ ​នៃ​គណបក្សប្រជាជន​កម្ពុជា​ខេត្តសៀមរាប ​បាន​ជួប​សំណេះសំណាល​ជាមួយ​បេក្ខជន ​ក្រុមប្រឹក្សា​ឃុំ ​មេភូមិ ​និង​ក្រុមការងារ​ចុះ​ជួយ​ឃុំ ​ស្រុក​ស្រីស្នំ ​ខេត្តសៀមរាប​។

ក្នុង​កិច្ច​ស្វាគមន៍​របស់​លោក ​ម៉ក់ ​សំ​ភារ  ​ប្រធាន​គណៈកម្មាធិការ​នៃ​គណបក្សប្រជាជន​ស្រុក​ស្រីស្នំ ​ក៏បាន​លើកឡើង​អំពី​សកម្មភាព​ការងារ​កសាង ​និង​ពង្រឹងពង្រីក ​សមាជិក​បក្ស​នូវ​ទូទាំង​ស្រុក​ព្រមទាំង ​បាន​បញ្ជាក់​អំពី ​ចំណុចខ្លាំង ​និង​បញ្ហា​ប្រឈម​នៅ​តាម​មូលដ្ឋាន​។ ​លោក​បាន​គូសបញ្ជាក់​ផង​ដែរ ​ពីក​ត្តា​សំ​ខាន់​ៗ ​ដែល​ធ្វើឱ្យ​គ្រប់បណ្តា​ឃុំ ​ទូទាំង​ស្រុក​ស្រីស្នំ ​ទទួល​បាន​ជ័យជម្នះ ​ក្នុង​ការបោះឆ្នោត​ជ្រើសរើស​ក្រុមប្រឹក្សា​ឃុំ ​សង្កាត់ ​អាណត្តិ​ទី៤ ​ដែល​ជា​មូលដ្ឋាន​គ្រឹះ ​ឆ្ពោះទៅ​កាន់ការ​បោះឆ្នោត​ជ្រើសរើស​តំណាងរាស្ត្រ ​អាណត្តិ​ទី៦ ​នៅ​ឆ្នាំ២០១៨ ​ផង​ដែរ ​។

ថ្លែង​សំណេះសំណាល​នោះ ​លោក ​ឃឹម ​ប៊ុ​ន​សុង ​ក៏បាន​ធ្វើ​កោតសរសើរ ​និង​សាទរ​ចំពោះ​លទ្ធផល​ក្នុង​ការបោះឆ្នោត​ក្រុម​ប្រឹ​ក្សា​ឃុះ ​អាណត្តិ​ទី៤ ​ដែល​ធ្វើឱ្យ​គ្រប់​បណ្តា​ឃុំ ​ក្នុង​ស្រុក​ស្រីស្នំ ​ទទួល​បាន​ជោគជ័យ ​ដែល​ជា​យុទ្ធសាស្ត្រ ​ឆ្ពោះទៅ​រក​ជ័យជំនះ​លើ​ការបោះឆ្នោត​ជ្រើសតាំង​តំណាងរាស្ត្រ ​អាណត្ត​ទី៦ ​ឆ្នាំ២០១៨ខាងមុខ ​ហើយ​លទ្ធផល​ទាំងនេះ​ក៏​កើតឡើង​ពី​កិច្ច​ខិតខំ​ប្រឹង​ប្រែ​របស់​អស់លោក ​លោកស្រី​នៅ​មូលដ្ឋាន ​ដោយមាន​កិច្ចសហការ ​សាមគ្គី​គ្នា​បាន​ល្អ ​និង​គោរព​បាន​នូវ​គោលនយោបាយ ​របស់​គណបក្សប្រជាជន​កម្ពុជា ​អនុសាសន៍​របស់លោក ​ហ៊ុន ​សែន ​ប្រធាន​គណបក្សប្រជាជន​កម្ពុជា ​និង​ជានា​យក​រដ្ឋមន្ត្រី​នៃ​កម្ពុជា ​។

លោក​ ​ឃឹម ​ប៊ុ​ន​សុង ​បាន​បន្ត​ទៀត​ថា ​ឆ្លងតាម​ការ​ចុះ​ជួប​ជាមួយ​បងប្អូន​សមាជិក​សមាជិកា​បក្ស​នៅ​តាម​មូលដ្ឋាន ​រាល់​បញ្ហា​ដែល​អាជ្ញាធរ​មូលដ្ឋាន ​លើកឡើង ​មាន​លក្ខ​ណៈ​ខុស​ៗ​គ្នា​ទៅតាម​មូលដ្ឋាន​។ ​លោក​ ​ក៏បាន​សូមឱ្យ​បងប្អូន​ក្រុប​ប្រឹក្សា​ឃុំ​ទាំងអស់ ​ក្រោយពី​ការបោះឆ្នោត​ក្រុមប្រឹក្សា​ឃុំ ​អាណត្តិ​ទី៤នេះ ​គឺ​ត្រូវ​ធ្វើការ​ពង្រឹង ​ស្មារតី ​ក្នុង​ការ​បំពេញការងារ​បម្រើ​ប្រជាពលរដ្ឋ​នៅ​តាម​ភូមិ ​ឃុំ ឱ្យ​​កាន់តែ​បាន​ល្អ​ប្រសើរ​ឡើង​។ ​ចំពោះ​បងប្អូន​ដែល ​ជា​បេក្ខភាព​ក្រុមប្រឹក្សា​ឃុំ ​ទាំងអស់ ​គឺ​ត្រូវ​ខិតខំ​បំពេញការងារ​ស្នូល​របស់​ខ្លួន ​ក្នុង​ការបម្រើ​ដល់​ផលប្រយោជន៍​របស់​ប្រជាជន ​ដើ​មី្ប​ធានា​និរន្តរភាព​ការងារ​រដ្ឋបាល ​ការ​ផ្តល់​សេវា ​និង​ការអភិវឌ្ឍន៍ ​បម្រើ​នូវ​ផលប្រយោជន៍​របស់​ប្រជាពលរដ្ឋ​នៅក្នុង​មូលដ្ឋាន​។ ​ម៉្យាងទៀត​មន្ត្រី ​ថ្នាក់ដឹកនាំ​ក្នុង​មូលដ្ឋាន​ទាំងអស់ ​ដើរតាម​ផ្ទះ​ដើម្បី​ថ្លែង ​អំណរគុណ​សមាជិក​ទាំងអស់​ដែល​បាន​បោះឆ្នោតឱ្យ​គណបក្សប្រជាជន​កម្ពុជា​។

លោក​បណ្ឌិត ​ក៏បាន​សង្កត់ធ្ងន់​ផង​ដែរ​ថា ​គ្រប់​សមាជិក ​ក្រុមប្រឹក្សា​សង្កាត់ ​និង​មន្ត្រី​រាជការ​ណា ​ដែល​បាន​ធ្វើឱ្យ​មាន​កំហុសឆ្គង​ធ្វើឱ្យ​ប៉ះពាល់​បាត់បង់ ​ផលប្រយោជន៍ ​របស់​ប្រជាពលរដ្ឋ​ក្នុង​មូលដ្ឋាន​គឺ​ត្រូវ​ទទួល​ទោ​សទ័​ណ្ឌ ​ទៅតាមច្បាប់​រដ្ឋបាល​ដែល​បាន​កំណត់​។ ​ក្នុង​នោះ​ដែរ​លោក​បាន​ផ្តល់​ថវិកា ​៩ ​លាន​រៀល ​សម្រាប់​រៀបចំ​ពិសារ​បាយ​សាមគ្គី​ជុំគ្នា​នៅ​តាម​មូល​ដ្ឋាន​រៀង​ៗ​ខ្លួន​៕

លោកនាយករដ្ឋមន្រ្ដី ហ៊ុន សែន៖ អរគុណក្មួយៗ និងចៅៗយុវជន-យុវតី ដែលចូលរួមថែរក្សាការពារសន្តិភាព របស់ប្រទេសជាតិ

លោក ហ៊ុន សែន នាយករដ្ឋមន្រ្តីនៃកម្ពុជា បានអរគុណក្មួយៗ និងចៅៗយុវជន យុវតី ដែលចូលរួមថែរក្សា ការពារ សន្តិភាព របស់ប្រជាជាតិ។ នេះបើតាម Facebook ផ្លូវការរបស់លោកនាយករដ្ឋមន្រ្ដី ហ៊ុន សែន ដែលបានបង្ហោះឱ្យដឹងនៅថ្ងៃទី១១ ខែមិថុនា ឆ្នាំ២០១៧នេះ។
Facebook ផ្លូវការរបស់លោកនាយករដ្ឋមន្រ្ដី ហ៊ុន សែន បានបញ្ជាក់យ៉ាងដូច្នេះថា «អរគុណក្មួយៗ និងចៅៗយុវជនយុវតី ដែលចូលរួមថែរក្សាការពារសន្តិភាព។ ក្រោមការដឹកនាំរបស់ សម្តេចតេជោ ហ៊ុន សែន គឺក្មួយៗនិងចៅៗមានឱកាសច្រើនណាស់ក្នុងការសិក្សារៀនសូត្រនៅគ្រប់ទីកន្លែង គ្រប់កម្រិត និងគ្រប់ជំនាញទាំងក្នុងប្រទេស និងក្រៅប្រទេស។ ពិតណាស់ គឺក្មួយៗ និងចៅៗយុវជន គឺជាទំពាំងស្នងប្ញស្សី ដែលប្រទេសជាតិត្រូវការ»។
បន្ថែមពីលើនេះប្រមុខរាជដ្ឋាភិបាលកម្ពុជា លោកនាយករដ្ឋមន្រ្ដី ហ៊ុន សែន បានស្នើឱ្យក្មួយៗ និងចៅៗ បន្តចូលរួមឱ្យកាន់តែសកម្មជាមួយលោក ដើម្បីកសាងប្រទេសជាតិ យើងឱ្យកាន់តែរីកចម្រើនសម្បូរសប្បាយទាំងអស់គ្នា ៕

កម្ពុជានឹងស្នើដាក់​​ ទីក្រុងបាត់ដំបង ក្រចេះ និងកំពត ជាទីក្រុងបេតិកភណ្ឌ ក្នុងសន្និសីទអន្តរជាតិ ស្តីពីទេសចរណ៍បេតិកភណ្ឌ

សៀមរាប៖ លោក ទិត ចន្ថា រដ្ឋលេខាធិការក្រសួងទេសចរណ៍ បានថ្លែងថា ក្នុងសន្និសីទអន្តរជាតិស្តីពី ទេសចរណ៍បេតិកភណ្ឌ ចាប់ពីថ្ងៃទី១៤-១៥ ខែមិថុនា ឆ្នាំ២០១៧ខាងមុខ ម្ចាស់ផ្ទះកម្ពុជា នឹងស្នើសុំដាក់ទីក្រុងបាត់ដំបង ក្រុងក្រចេះ និងក្រុងកំពត បញ្ចូលជាទីក្រុងបេតិកភណ្ឌ បន្ទាប់មកនឹងដាក់ចេញសេចក្តីប្រកាសសៀមរាប ស្តីពីការអភិវឌ្ឍទេសចរណ៍បេតិកភណ្ឌ ដើម្បីរំលេចអំពីសារៈសំខាន់ របស់ទេសចរណ៍បេតិកភណ្ឌ។

លោកបានថ្លែងបែប ក្នុងនាមតំណាងលោក ថោង ខុន រដ្ឋមន្រ្តីក្រសួងទេសចរណ៍ នាឱកាសដឹកនាំកិច្ចប្រជុំថ្នាក់ឧត្តមមន្ត្រី នៃដៃគូសន្ទនាសហប្រតិបត្តិការអាស៊ី ACD លើកទី២ ដោយមានការចូលរួមមកពីតំបន់អាស៊ី ២២ប្រទេស នៅសណ្ឋាគារសុខា ខេត្តសៀមរាប ព្រឹកថ្ងៃទី១១ ខែមិថុនា ឆ្នាំ២០១៧។

លោក ទិត ចន្ថា ឱ្យដឹងថា កិច្ចប្រជុំមន្រ្តីជាន់ខ្ពស់នេះ គឺដើម្បីរៀបចំនូវឯកសារពាក់ព័ន្ធសំខាន់ៗ ដើម្បីដាក់ចូលក្នុងកិច្ចប្រជុំថ្នាក់រដ្ឋមន្រ្តីទេសចរណ៍ នៅថ្ងៃស្អែកនេះ បន្ទាប់ពីពិធីបើកក្រោមអធិបតីភាព លោក ហ៊ុន សែន នាយករដ្ឋមន្រ្ទីនៃកម្ពុជា នៅក្នុងកិច្ចប្រជុំថ្នាក់រដ្ឋមន្រ្តី ACD និងសន្និសីទអន្តរជាតិលើកទី១ ស្តីពីទេសចរណ៍ ប្រកបដោយនិរន្តរភាព និងទីក្រុងបេតិកភណ្ឌ ក្រោមប្រធានបទ « ការអភិរក្ស និងការការពារទីក្រុងបេតិកភណ្ឌ (Conserving and Presenting Urban Heritages) »។

លោកថ្លែងយ៉ាងដូច្នេះថា « យើងក៏មានសន្និសីទអន្តរជាតិ ស្តីអំពីទេសចរណ៍បេតិកភណ្ឌ ចាប់ពីថ្ងៃទី១៤-១៥ ខែមិថុនានេះ ហើយបន្ទាប់មកនឹងដាក់ចេញសេចក្តីប្រកាសសៀមរាប ស្តីពីការអភិវឌ្ឍទេសចរណ៍បេតិកភណ្ឌ ដើម្បីរំលេចអំពីសារៈសំខាន់របស់ទេសចរណ៍បេតិកភណ្ឌ ជាមួយគ្នានេះ កម្ពុជាក៏បានស្នើរដាក់ទីក្រុងសំខាន់ៗ​ ចំនួន៣ គឺក្រុងបាត់ដំបង ក្រុងក្រចេះ និងក្រុងកំពត ឱ្យទៅជាទីក្រុងបេតិកភណ្ឌ សម្រាប់ការអភិរវឌ្ឍទេសចរណ៍បេតិកភណ្ឌ»។

បើតាមលោក ទិត ចន្ថា តាមរយៈកិច្ចប្រជុំមន្រ្តីជាន់ខ្ពស់ និងសន្និសីទអន្តរជាតិខាងលើនេះ គឺជាឱកាសជំរុញឱ្យអន្តរជាតិមើលឃើញថា កម្ពុជាជាប្រទេសមានសក្តានុពល ផ្នែកវប្បធម៌បេតិកភណ្ឌខ្លាំង ក្នុងការទាក់ទាញទាំងទេសចរ និងដៃគូអភិវឌ្ឍន៍ផ្សេងៗ មកចូលរួមអភិរក្សថែរក្សាបេតិកភណ្ឌ និងធនធានវប្បធម៌ផងដែរ ដូចជា អង្គការ UNWTO, UNESCO, PATA រួមទាំងអង្គការពាក់ព័ន្ធជាច្រើនទៀត។

កត្តាទាំងនេះ កើតចេញដោយសារប្រទេសកម្ពុជា មានសុខសន្តិភាព ស្ថិរភាពនយោបាយ និងមានការអភិវឌ្ឍលើគ្រប់វិស័យ ទើបធ្វើឱ្យទេសចរមានការកើនឡើងរហូត ជាមួយនឹងកំណើននៃចំនួនទេសចរអន្តរជាតិ នៅលើសកលលោកចំនួន ១,២៣៥លាននាក់ ក្នុងកំណើន ៣.៩% នៅឆ្នាំ២០១៦ ដែលក្នុងនោះទេសចរតំបន់អាស៊ីប៉ាស៊ីហ្វិកទទួលបាន ៣០៣លាននាក់ ក្នុងកំណើន ៨.៤% កម្ពុជាទទួលបានទេសចរអន្តរជាតិចំនួន ៥លាននាក់ ក្នុងកំណើន ៥%។ ក្នុងរយៈពេល៣ខែ ដើមឆ្នាំ២០១៧ កម្ពុជាទទួលបានទេសចរអន្តរជាតិជាង ១.៥លាននាក់ ក្នុងកំណើន ១២%។ តាមការរំពឹងទុកនៅឆ្នាំ២០១៧ កម្ពុជាអាចនឹងទទួលបានទេសចរអន្តរជាតិប្រមាណ ៥.៤លាននាក់ និង៧លាននាក់ នៅឆ្នាំ២០២០៕

លោក អូស្មាន ហាស្សាន់ បន្ដចែកកញ្ចប់អាហារ ជូនសហគមន៍ ខ្មែរឥស្លាមនៅសង្កាត់ច្រាំងចំរេះ ជាង៥០០គ្រួសារ សម្រាប់ទទួលទាន ក្នុងខែបួសរ៉ាម៉ាឌន

នៅព្រឹកថ្ងៃទី១១ ខែមិថុនា ២០១៧ លោក អូស្មាន ហាស្សាន់ រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានអង្គការមូលនិធិអភិវឌ្ឍន៍មុស្លិមកម្ពុជា បានជួបសំណេះសំណាល និងប្រគល់កញ្ចប់អំណោយ ស្រាយបួសជូនសហគមន៍ខ្មែរឥស្លាមនៅភូមិ៤ សង្កាត់ច្រាំងចំរេះ១ ខណ្ឌឫស្សីកែវ ចំនួន៥៦០គ្រួសារ សម្រាប់ទទួលទានខ្លះ ក្នុងឱកាសខែរ៉ាម៉ាឌន។

កញ្ចប់អំណោយរួមមាន៖ ស្ករស២គីឡូ, ទឹកដោះគោ២កំប៉ុង, ទឹកផ្លែឈើ២កំប៉ុង, ទឹកក្រូច២លីត្រ, ទឹកសេរ៉ូមួយដប, ត្រីខ២កំប៉ុង និងអូវ៉ានទីន១ដប។

លោក អូស្មាន ហាស្សាន់ បង្ហាញសុទិដ្ឋិនិយម ចំពោះសហគមន៍ខ្មែរឥស្លាម សម្រាប់លទ្ឋផលបោះឆ្នោត ក្រុមប្រឹក្សាឃុំ-សង្កាត់ដែលទើបតែកន្លងផុតទៅនេះ សន្លឹកឆ្នោតបានបង្ហាញ ពីភាពជ័យជំនះរួចទៅហើយ ពី៨០ភាគរយ រហូតដល់៩០ភាគរយ នៃសម្លេងបោះឆ្នោតជូនគណបក្សប្រជាជន ពីសហគមន៍ខ្មែរឥស្លាម ធៀបនឹងសម្លេងគាំទ្រគណបក្សប្រឆាំង។

បន្ថែមពីនេះលោក បានកោតសរសើរ ដល់សហគមន៍ខ្មែរឥស្លាម សង្កាត់ច្រាំងចំរេះ ក៏ដូចជាប្រជាពលរដ្ឋជាទូទៅក្នុងប្រទេស ដែលបានសម្រេចតួនាទីឆន្ទៈរបស់ខ្លួន បានបោះឆ្នោតជ្រើសរើសមេដឹកនាំ របស់ខ្លួនក្នុងឃុំ-សង្កាត់ ហើយផ្តល់ជ័យលាភី ជូនគណបក្សប្រជាជនកម្ពុជា គឺជាការផ្តល់ជ័យលាភី សម្រាប់ជោគវាសនានូវភាពរុងរឿង ចម្រុងចម្រើន នេះក៏ជាសញ្ញាណ នៃការផ្តល់ភាពជោគជ័យ ជូនគណបក្សប្រជាជនកម្ពុជា ក្នុងការបោះឆ្នោតសភាអាណត្តិទី៥ ជាបន្តទៀត៕

ភរិយាលោក ហ៊ុន ម៉ានិត ដឹកនាំក្រុមវេជ្ជសាស្ត្រសម្តេចតេជោ ចុះពិនិត្យព្យាបាលជំងឺដោយឥតគិតថ្លៃ ជូនប្រជាពលរដ្ឋស្រុកគូលែន ខេត្តព្រះវិហារ

ព្រះវិហារ៖ លោកស្រី ឌី សុខីទីឃាយុកោ ភរិយាលោក ហ៊ុន ម៉ានិត នៅថ្ងៃទី១១ ខែមិថុនា ឆ្នាំ២០១៧នេះ បានដឹកនាំក្រុមវេជ្ជសាស្ត្រស​ម្តេចតេជោ ចុះពិនិត្យព្យាបាលជំងឺ ដោយឥតគិតថ្លៃ ជូនប្រជាពលរដ្ឋ រស់នៅភូមិឈូក ឃុំត្បែងពីរ ស្រុកគូលែន ខេត្តព្រះវិហារ នៅថ្ងៃទី១១ ខែមិថុនា ឆ្នាំ២០១៧នេះ។

ការពិនិត្យជំងឺនៅពេលនេះ រួមមានពិនិត្យជំងឺទូទៅ ពិនិត្យរោគស្ត្រី វះកាត់តូច ឆ្លុះអេកូសាស្ត្រ ពិនិត្យធ្មេញ ចែកវ៉ែនតា និងចែកឱសថ ហើយក៏មានទទួលការបរិភោគ អាហារថ្ងៃត្រង់រួមគ្នាប្រកបដោយក្តីរីករាយ និងស្និតស្នាល។

នៅក្នុងឱកាសនោះ លោកស្រី ឌី សុខីទីឃាយុកោ ក៏បានចែកជូនរទេះរុញដល់ជនពិការ និងកាតាបសម្រាប់ដាក់សំភារៈ​សិក្សាដល់សិស្សផ​ង​ដែរ។

សកម្មភាពខាងលើនេះ ក៏មានការអមដំណើរដោយលោក អ៊ុន ចាន់ដា អភិបាលខេត្តព្រះវិហារ និងក្រុមការងារជាច្រើនរូបទៀត។

លោកស្រី ឌី សុខីទីឃាយុកោ ហ៊ុន ម៉ានិត បានក៏បាននាំយកការផ្តាំផ្ញើសាកសួរសុខទុក្ខ ពីសំណាក់លោកនាយករដ្ឋមន្រ្ដី ហ៊ុន សែន និងលោកស្រី ប៊ុន រ៉ានី ហ៊ុនសែន ដែលជានិច្ចកាល លោកតែងគិតគូរជានិច្ច អំពីសុខទុក្ខ និងការរស់នៅ របស់បងប្អូនប្រជាពលរដ្ឋ។

លោកស្រីបានបន្តថា ចំពោះក្រុមវេជ្ជសាស្ត្រសម្តេចតេជោ គឺបង្កើតឡើងសំរាប់ភ្យាបាលជំជឺ ជូនប្រជាពលរដ្ឋ ដោយឥតគិតថ្លៃ និងមិនប្រកាន់គណបក្សនយោបាយឡើយ។

ជាមួយគ្នានោះដែរ លោកស្រីដែលជាភរិយារបស់ លោក ហ៊ុន ម៉ានិត ក៏បានថ្លែងអំណរគុណ ដល់ក្រុមគ្រូពេទ្យដែល យកអស់កំលាំងកាយចិត្តព្យាបាលជំងឺ ជូនបងប្អូនប្រជាពលរដ្ឋយើង ៕

អគ្គនាយកស៊ីម៉ាក់៖ លទ្ធផលបោះឆ្នោត សម្លាប់គោលនយោបាយ លុយកន្លះលានដុល្លារក្នុង១ឆ្នាំៗ

លោក ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា (ស៊ីម៉ាក់) បានសរសេរអត្ថបទមួយ បង្ហោះលើ Facebook ផ្លូវការរបស់ខ្លួន ដោយបានលើកឡើង និងពន្យល់ អំពីការចាត់ចែងថវិកាជាតិ ពិសេសឆ្លើយតបនឹងគោលនយោបាយ ទម្លាក់លុយកន្លះលានដុល្លារ ដល់ឃុំសង្កាត់ក្នុងមួយឆ្នាំ របស់បក្សប្រឆាំង។

ក្នុងអត្ថបទរបស់លោក ហេង រតនា បានសង្កត់ធ្ងន់ថា លទ្ធផលបណ្តោះអាសន្ន នៃការបោះឆ្នោតក្រុមប្រឹក្សាឃុំសង្កាត់ អាណត្តិទី៤ ថ្ងៃទី០៤​ ខែមិថុនា ឆ្នាំ២០១៧ បានសម្លាប់ចោល គោលនយបាយ​ទឹកលុយកន្លះលានដុល្លារ តាមឃុំ/សង្កាត់ របស់បក្សប្រឆាំង ហើយសូមរង់ចាំអាណត្តិក្រោយ ឆ្នាំ២០២៣-២០២៨ចុះ។

លោក ហេង រតនា បានសរសេរយ៉ាងដូច្នេះថា « អ្វីទៅជាថវិកាជាតិ និងត្រូវចាត់ចែងរបៀបយ៉ាងម៉េច?​ »​

ថវិកាជាតិត្រូវដំណើរការ​ ១៖​ ត្រូវរៀបចំដោយរាជរដ្ឋាភិបាល​ ២៖​ ត្រូវអនុមត័ដោយរដ្ឋសភាជាតិ​ ៣៖​ ត្រូវអនុមត័ដោយព្រឹទ្វសភាជាតិ។​ ទើបក្លាយជាច្បាប់ថវិកាជាតិ ប្រចាំឆ្នាំសារពើព័ន្ធ! បានន័យថា ត្រូវឆ្លងកាត់៣ដំណាក់កាលធំៗ​ ដែលតាមធម្មតាត្រូវរៀបចំពង្រាងថវិកានៅខែមិថុនា​ នឹងត្រូវឆ្លងគណៈរដ្ឋមន្ត្រីនៅតែតុលា​ ឆ្លងរដ្ឋសភាខែវិចិ្ឆកា​ និងត្រូវឆ្លងព្រឹទ្ធសភា នៅខែធ្នូនៃឆ្នាំនីមួយៗ។

ចំពោះថវិកាឃុំ/សង្កាត់​៖​ អាណាបក្សដើមខែ្ស គឺក្រសួងមហាផ្ទៃ​ ទោះបីឃុំ/សង្កាត់មកពីបក្សណាក៏ដោយ​ ហើយឃុំ/សង្កាត់ណាក៏ដោយ​ក៏ស្ថិត នៅក្រោមអាណាព្យាបាល នៃរដ្ឋបាលស្រុក និងរដ្ឋបាលខេត្តដែរ។​ ដូចនេះរាល់គំរោងថវិកា ឃុំ/សង្កាត់ទាំងអស់ ត្រូវឆ្លងកាត់ឋានានុក្រមនេះ និងអាណាបក្សដើមខែ្សទើបបញ្ជូន មកក្រសួងហិរញ្ញវត្ថុ ​ដែលជាសេនាធិការ របស់រាជរដ្ឋាភិបាល ដើម្បីសំរបសំរួល និងពិនិត្យពិភាក្សា រៀបចំបញ្ចូលក្នុងថវិកាជាតិ។​ គ្មានគណបក្សណាមានសិទ្ធិ ក្នុងការរៀបចំថវិកាជាតិនេះ​ ជំនួសរាជរដ្ឋាភិបាលនោះទេ!​

បើពិនិត្យលើការដំណើរការនេះ​ ថវិកាគោលនយោបាយរបស់ឃុំ/សង្កាត់ មកពីបក្សណាក៍ដោយត្រូវតែគោរពតាមនីតិវិធីនេះ និងច្បាប់ហិរញ្ញវត្ថុសាធារណៈផងដែរ!​

លទ្ធផលបោះឆ្នោត ថ្ងៃទី៤ ខែមិថុនា ឆ្នាំ២០១៧ បណ្តោះអាសន្ន​ អាចកំណត់ជោគជ័យច្បាស់លាស់ សំរាប់ការបោះឆ្នោត​អសកលជ្រើស​រើសអសនៈព្រឹទ្ធសភា នឹងបន្តដឹកនាំដោយគណបក្សប្រជាជន​(២០១៨-២០២២)​។​ ដូចនេះ​ ក្នុងអំណាចទាំង៣​ រាជរដ្ឋាភិបាល​ សភាជាតិ​ និងព្រឹទ្ធសភា​ អំណាចមួយណាសុទ្ធតែអាចកំណត់ និងសម្លាប់ចោលគោលនយបាយ​ទឹកលុយកន្លះលានដុល្លារ តាមឃុំ/សង្កាត់បាន​ទាំងអស់​! តែប្រហែលគោលនយោបាយនេះ អាចស្លាប់នៅកំរិតស្រុក​ ខេត្តដែលជាអាណាព្យាបាលផ្ទាល់ លើឃុំ/សង្កាត់ទាំងនោះ!​

សូមមេត្តាចងចាំថា​ «​គ្មានមេឃុំបំរើតែបក្ស​ មិនបំរើរាស្ត្រ​នោះទេ!»​ គ្មានអំណាចរដ្ឋក្នុងរដ្ឋនោះទេ​ មានន័យថា​ ឃុំ/សង្កាត់ទាំងអស់បន្ទាប់​ពីកាន់តំណែង ត្រូវស្ថិតក្រោមអាណាព្យាបាល ស្រុក/ខណ្ឌ​ ខេត្ត/រាជធានី​ និងអាណាបក្សដើមខែ្ស គឺក្រសួងមហាផ្ទៃ!!!
ផ្អែកលើគោលការណ៍រៀបរាប់ខាងលើ​ គោលនយោបាយលុយកន្លះលានដុល្លារក្នុងមួយឆ្នាំៗនេះ​ សូមមានសង្ឃឹមញញឹមទុកចុះត្រូវរង់ចាំ អាណតិ្ត២០២៣-២០២៨បន្តទៀត!!»៕