Tuesday, January 17, 2023

មតិរបស់អ្នកតាមដានសង្គម៖ កុំសន្និដ្ឋានថាជារឿងនយោបាយ ត្រូវមើលសំណុំរឿងសិន ថាតើថាច់ សេដ្ឋា បានប្រព្រឹត្តបទល្មើសអ្វី?

កាលពីល្ងាចថ្ងៃទី១៦ មករា ២០២៣ ម្សិលមិញ បានធ្វើឱ្យ មជ្ឈដ្ឋានអ្នកតាមដាននយោបាយ និង សង្គម មានការចាប់អារម្មណ៍ យ៉ាងខ្លាំងនៅពេលមានព័ត៌មាន

ថា សមត្ថកិច្ចបានចុះនាំខ្លួនលោក ថាច់ សេដ្ឋា តាមដីកាបង្គាប់ឱ្យនាំខ្លួនលេខ ៣៨ “ឈ១” ព្រ.ទ ចុះថ្ងៃទី១៦ មករា ២០២៣ របស់ចៅក្រមស៊ើបសួរ។

អ្នកខ្លះគ្រាន់តែឮនិងឃើញព័ត៌មាននេះភ្លាម បានធ្វើបុរេវិនិច្ឆ័យភ្លាមមួយរំពេចថាជារឿងនយោបាយ ពីព្រោះគាត់ជាអ្នកនយោបាយ ជាអនុប្រធានគណបក្សភ្លើងទៀន។ ម្យ៉ាងទៀត វាជាពេលវេលាក្តៅ រដូវក្តៅ នៅមុនពេលការបោះឆ្នោតជាតិខិតជិតចូល

មកដល់។

មុននឹងវិនិច្ឆ័យរបៀបនេះ អ្នកទាំង នោះគួរពិនិត្យនិងសួររកហេតុផលឱ្យបានច្បាស់លាស់ជាមុនសិន ថាតើ លោក ថាច់ សេដ្ឋា បានប្រព្រឹត្តអ្វីខ្លះពាក់ព័ន្ធបុគ្គលឯកជន ដទៃទៀតដែលធ្វើឱ្យខាត ប្រយោជន៍របស់ គេ។ អស់លោកអស់អ្នកទាំងនោះ មានបានសួរទេថាតើ លោក ថាច់ សេដ្ឋា បានចេញសែក ដែលភាសាច្បាប់ហៅ ថា “ឧបករណ៍អាចជួញដូរបាន” នៅក្នុងអំឡុងឆ្នាំ២០១៩ ទេ? តើបានបំពេញកាតព្វកិច្ចតាមការ សន្យារបស់គាត់ហើយឬនៅ?

នេះគឺជាទំនាក់ទំនងទំនាស់ដែលក្លាយជាបទល្មើសព្រហ្មទណ្ឌរវាងបុគ្គលនិងបុគ្គល វាមិនមែន

ជារឿងនយោបាយឡើយ ផ្ទុយទៅវិញ វាជារឿងរបស់អ្នកនយោបាយដែលបានប្រព្រឹត្តបទល្មើសព្រហ្មទណ្ឌ។ បើអាងខ្លួនជាអ្នកនយោបាយ ហើយប្រព្រឹត្តផ្ទុយនឹងច្បាប់ ប៉ះពាល់នឹងផលប្រយោជន៍

របស់អ្នកដទៃ តើសង្គមមួយនេះវានឹងក្លាយទៅជាយ៉ាងណា? តើអ្នកវិនិយោគជាតិនិងបរទេស គេជឿទុកចិត្តប្រព័ន្ធច្បាប់យើង ទេ? ជាក់ស្តែងណាស់ តាមសាវតាដែលដីកាបង្គាប់ឱ្យនាំខ្លួនរបស់ចៅក្រមស៊ើបសួរ បានបញ្ជាក់ថា លោក ថាច់ សេដ្ឋា ក្រៅពីអ្នកនយោបាយ លោកក៏ជា មន្ត្រីពាណិជ្ជកម្មនៅរាជធានីភ្នំពេញ ជាគ្រូបង្រៀន ជា ចាង ហ្វាង កាសែត ថែមទៀត។ អាចដីកានេះរៀបរាប់មិនអស់ផង លោក ថាច់ សេដ្ឋា ជាអ្នកញៀន ល្បែង ស៊ី សង ថែម ទៀត ពីព្រោះគេឧស្សាហ៍ឃើញលោក លេងល្បែងនៅកាស៊ីណូជា ច្រើនលើកច្រើនសារណាស់។ បើអញ្ចឹង គ្មានអ្វីចម្លែកទេសម្រាប់លោក ថាច់ សេដ្ឋា ហើយក៏មិនពាក់ព័ន្ធនឹងរឿងនយោបាយនោះដែរ។

អ្នកនយោបាយគ្មានអភ័យឯកសិទ្ធិទេ ហើយរិតតែមិនមានទៀត នៅពេលអ្នកនយោបាយប្រព្រឹត្តបទល្មើសព្រហ្មទណ្ឌដែលប៉ះពាល់អ្នកដទៃនិងផលប្រយោជន៍របស់អ្នកដទៃ ពីព្រោះប្រទេស ជាតិ ត្រូវការពង្រឹងនិងគោរព គោលការណ៍នីតិរដ្ឋនិងយុត្តិធម៌សង្គមទាំងអស់គ្នា។

លោក ថាច់ សេដ្ឋា ក៏ធ្លាប់បួសរៀនក្នុងសំណាក់ព្រះពុទ្ធសាសនា ដែរ ស្គាល់ច្បាស់ពីទ្រឹស្តីបុណ្យបាប កម្មផល បើបានប្រព្រឹត្តហើយ ទទួលខុសត្រូវទៅពីព្រោះនេះជាផលដែលកើតចេញពីកម្មរបស់ខ្លួនទេ មិន អាចឱ្យអ្នកដទៃទទួលជំនួស ឬបង្វែរទៅជារឿង នយោបាយឡើយ។

ជាងនេះទៅទៀត គួរខិតខំរកមេធាវីដែលមានសមត្ថភាព មានបទពិសោធន៍ការពារក្តី

របស់ខ្លួនទៅ ជាជាងចំណាយពេលឥតប្រយោជន៍ប្រែក្លាយឱ្យទៅជារឿងនយោបាយ និងធ្វើឱ្យ 

សាធារណៈជនដែលមិនបាន តាមដាន ដឹងរឿងពិតមានការភាន់ច្រឡំ។

ការប្រែក្លាយបទល្មើសព្រហ្មទណ្ឌធម្មតា ឱ្យទៅជារឿងនយោបាយតាមរយៈការលាបពណ៌ បង្ខូច 

បង្កាច់ កាឡៃការពិត ប្រឌិតបន្ថែមមកលើថ្នាក់ដឹកនាំគណបក្សប្រជាជនកម្ពុជានិងរាជរដ្ឋាភិបាលនឹង អាចនាំឱ្យមានចំណាត់ការតាម

ផ្លូវច្បាប់ថែមទៀតទៅលើអ្នកប្រព្រឹត្តល្មើស។ ហើយការធ្វើរបៀបនេះ នឹងនាំឱ្យមាន 

ស្ថានទម្ងន់ទោសលើលោក ថាច់ សេដ្ឋា ថែមទៀតក៏អាចថាបាន។

ដោយ : ម្ចាស់ស្រុក



សម្តេចតេជោ ហ៊ុន សែន អញ្ជើញធ្វើដំណើរចាកចេញពីសាធារណរដ្ឋម៉ាល់ឌីវ ក្នុងដំណើរនិវត្តន៍មកកាន់រាជធានីភ្នំពេញ


បន្ទាប់ពីបានស្នាក់អាស្រ័យបំពេញទស្សនកិច្ចផ្លូវការ នៅទីក្រុងម៉ាល នៃសាធារណរដ្ឋម៉ាល់ឌីវ ប្រកបដោយលទ្ធផលដ៏ត្រចះត្រចង់ រយៈពេល២យប់៣ថ្ងៃរួចមក នៅម៉ោង៨.០០នាទី(ម៉ោងនៅម៉ាល់ឌីវ) ត្រូវនឹងម៉ោង១០.០០នាទី(ម៉ោងនៅកម្ពុជា) ព្រឹកថ្ងៃទី១៧ មករា ឆ្នាំ២០២៣នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានអញ្ជើញធ្វើដំណើរចាកចេញពីទីក្រុងម៉ាល នៃសាធារណរដ្ឋម៉ាល់ឌីវ ក្នុងដំណើរនិវត្តន៍មកកាន់រាជធានីភ្នំពេញ ព្រះរាជាណាចក្រកម្ពុជា។ 

នៅអាកាសយានដ្ឋានអន្តរជាតិវ៉ាឡេណា វត្តមាននៃការអញ្ជើញជូនដំណើរសម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់រាជរដ្ឋាភិបាលកម្ពុជា រួមមាន ឯកឧត្តម អាប់ឌុលឡា សាហ៊ីដ រដ្ឋមន្រ្តីការបរទេស នៃសាធារណរដ្ឋម៉ាល់ឌីវ ឯកឧត្តម អ៊ុង ស៊ាន ឯកអគ្គរាជទូតវិសាមញ និងពេញសមត្ថភាព នៃព្រះរាជាណាចក្រកម្ពុជា ប្រចាំសាធារណរដ្ឋម៉ាល់ឌីវ ព្រមទាំងវត្តមាន ឯកឧត្តម លោកជំទាវ ជាឥស្សរជនជាន់ខ្ពស់រដ្ឋាភិបាល នៃសាធារណរដ្ឋម៉ាល់ឌីវ និងឥស្សរជនការទូត នៃព្រះរាជាណាចក្រកម្ពុជា ប្រចាំសាធារណរដ្ឋម៉ាល់ឌីវ ជាច្រើនរូប។ 

តាមកម្មវិធីដែលបានគ្រោងទុក សម្តេចតេជោនាយករដ្ឋមន្រ្តី គ្រោង នឹងអញ្ជើញដល់អាកាសយានដ្ឋានអន្តរជាតិភ្នំពេញ នៅវេលាម៉ោង១៥ រសៀល ថ្ងៃអង្គារទី១៧ ខែមករា ឆ្នាំ២០២៣នេះ៕

#ហ៊ុនសែន #HunSen

#កម្ពុជា #Cambodia 

#ម៉ាល់ឌីវ #Maldives

សម្តេចតេជោ ហ៊ុន សែន ៖ សង្ឃឹមថា អាស៊ាន នឹងទទួលយកប្រទេសម៉ាល់ឌីវ ធ្វើជាភាគីនៃសន្ធិសញ្ញាមិត្តភាព និងជាដៃគូកិច្ចសហប្រតិបត្តិការ

នៅក្នុងសន្និសីទកាសែត នាព្រឹកថ្ងៃទី១៦ ខែមករា ឆ្នាំ២០២៣ នេះ  នៅក្នុងដំណើរទស្សនកិច្ចផ្លូវការរបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ទៅកាន់ម៉ាល់ឌីវ នាឱកាសនោះសម្តេច បានថ្លែងថា ក្នុងជំនួបពិភាក្សាទ្វេភាគី មេដឹកនាំទាំងពីរបានលើកឡើងអំពីបញ្ហាអន្តរជាតិ ហើយប្រទេសទាំងពីរគាំទ្រគ្នាទៅវិញទៅមក ដោយក្នុងនោះកម្ពុជាគាំទ្រម៉ាល់ឌីវឱ្យក្លាយទៅជាភាគីនៃសន្ធិសញ្ញាមិត្តភាព និងកិច្ចសហប្រតិបត្តិការនៅអាស៊ីអាគ្នេយ៍ ក៏ដូចជាអ្នកសង្កេតការណ៍នៅអាស៊ីអាគ្នេយ៍ នៅក្នុងក្របខណ្ឌអាស៊ាន ខណៈដែលបញ្ហានេះកំពុងស្ថិតនៅដំណាក់កាលនៃការពិភាក្សា នៅផ្ទៃក្នុងរបស់អាស៊ាន។

សម្តេចតេជោ សង្ឃឹមថា បណ្តាប្រទេសអាស៊ានដទៃទៀត នឹងទទួលយកនូវដៃគូ (ម៉ាល់ឌូវ) ដែលគ្មានហេតុផលណាដែលត្រូវជំទាស់នោះទេ យើងទាញបណ្តាប្រទេសឆ្ងាយៗ នៅទ្វីបដទៃមកចូលរួមជាដៃគូរបស់យើង ហើយយើងក៏នៅជិតខាងគ្នានៅតំបន់នេះ។ ការបង្ហាញក្តីសង្ឃឹមនេះ សម្តេចតេជោ  បានចាត់ទុកថា ទស្សនកិច្ចផ្លូវការរបស់សម្តេចទៅកាន់ម៉ាល់ឌីវនាពេលនេះ គឺជាការបើកផ្លូវសម្រាប់ទំនាក់ទំនងរវាងម៉ាលឌីវ និងអាស៊ាន។

សម្តេចតេជោ ហ៊ុន សែន ក៏បានថ្លែងអំណរគុណចំពោះការគាំទ្ររបស់ម៉ាល់ឌីវ ដែលចង់ឱ្យកម្ពុជាក្លាយទៅជាសមាជិក OIC ដោយធ្វើជាអ្នកសង្កេតការណ៍ ហើយសម្តេចតេជោសង្ឃឹមថា កម្ពុជានឹងក្លាយទៅជាតួអង្គដ៏សំខាន់នៃការធ្វើសុខដុមនីយកម្មជាតិសាស្ត្រ និងសាសនា នៅកម្ពុជា៕



កម្ពុជា និងម៉ាល់ឌីវ សម្រេចចុះកិច្ចព្រមព្រៀង ៦ចំណុចសំខាន់ៗ ស្តីពីការលើកលែងទិដ្ឋាការចំពោះអ្នកកាន់លិខិតឆ្លងដែនការទូត ផ្លូវការ និងធម្មតា

នៅរសៀលថ្ងៃទី១៦ ខែមករា ឆ្នាំ២០២៣ នៅវិមានប្រធានាធិបតីម៉ាល់ឌីវ មានរៀបចំពិធីចុះកិច្ចព្រមព្រៀងរវាងរាជរដ្ឋាភិបាល នៃព្រះរាជាណាចក្រកម្ពុជា និង រដ្ឋាភិបាលនៃសាធារណរដ្ឋម៉ាល់ឌីវ ស្តីពីការលើកលែងទិដ្ឋាការចំពោះ អ្នកកាន់លិខិតឆ្លងដែនការទូត ផ្លូវការ និងធម្មតា ត្រូវបានចុះហត្ថលេខា ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីកម្ពុជា និងរដ្ឋាភិបាលនៃសាធារណរដ្ឋម៉ាល់ឌីវ។

កិច្ចព្រមព្រៀង និងអនុស្សារណៈចំនួន៦ រវាងរាជរដ្ឋាភិបាលកម្ពុជា និងម៉ាឌីវ ត្រូវបានចុះហត្ថលេខារួមមាន៖

ទី១៖ កិច្ចព្រមព្រៀងរវាងរាជរដ្ឋាភិបាល នៃព្រះរាជាណាចក្រកម្ពុជា និង រដ្ឋាភិបាលនៃសាធារណរដ្ឋម៉ាល់ឌីវ ស្តីពីការលើកលែងទិដ្ឋាការចំពោះ អ្នកកាន់លិខិតឆ្លងដែនការទូត ផ្លូវការ និងធម្មតា។

ទី២៖ កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋម៉ាល់ឌីវ ស្ដីពីកិច្ចសហប្រតិបត្តិការសេដ្ឋកិច្ច។

ទី៣៖ អនុស្សរណៈនៃការយោគយល់គ្នា ស្ដីពីកិច្ចពិគ្រោះយោបល់ទ្វេភាគីរវាង ក្រសួងការបរទេស នៃសាធារណរដ្ឋម៉ាល់ឌីវ ជាមួយក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា។

ទី៤៖ អនុស្សរណៈនៃការយោគយល់គ្នា រវាងរដ្ឋាភិបាល នៃសាធារណរដ្ឋម៉ាល់ឌីវ និងរដ្ឋាភិបាល នៃព្រះរាជាណាចក្រកម្ពុជា ស្ដីពីកិច្ចសហប្រតិបត្តិការក្នុង វិស័យទេសចរណ៍។

ទី៥៖ អនុស្សរណៈនៃការយោគយល់គ្នា រវាងក្រសួងសុខាភិបាល នៃសាធារណ- រដ្ឋម៉ាល់ឌីវ និងក្រសួងសុខាភិបាល នៃព្រះរាជាណាចក្រកម្ពុជា ស្តីពី កិច្ចសហប្រតិបត្តិការក្នុងវិស័យសុខាភិបាល។

ទី៦៖ អនុស្សរណៈយោគយល់គ្នា រវាងសភាពាណិជ្ជកម្មកម្ពុជា និងសភាពាណិជ្ជ- កម្មជាតិ និងឧស្សាហកម្មម៉ាល់ឌីវ៕





សម្តេចតេជោ ហ៊ុន សែន៖ កម្ពុជា មានតម្រូវការក្នុងស្រុកខ្ពស់សម្រាប់ត្រីខំកំប៉ុងរបស់ម៉ាល់ឌីវ

នៅក្នុងសន្និសីទសារព័ត៌មានរួម ពីវិមានប្រធានាធិបតីនៃសាធារណរដ្ឋម៉ាល់ឌីវ នៅថ្ងៃចន្ទ ទី១៦ ខែមករា ឆ្នាំ២០២៣ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងថា កម្ពុជា ជាប្រទេសដែលមានទាំងត្រីទឹកសាប និងត្រីទឹកសមុទ្រ ក៏ប៉ុន្តែវាមិនគ្រប់នោះទេ។ ដូច្នេះគោលដៅដំបូងនៃការនាំចេញរបស់ម៉ាល់ឌីវ ទៅកាន់កម្ពុជា គឺត្រីខកំប៉ុង។

សម្តេចតេជោ ហ៊ុន សែន បានគូសបញ្ជាក់ថា កម្ពុជាបានប្រើប្រាស់ត្រីខកំប៉ុងចំនួនប្រមាណ១០ម៉ឺនកេះ ដើម្បីចែកជូនប្រជាពលរដ្ឋដែលរងគ្រោះដោយជំនន់ទឹកភ្លៀងនាពេលកន្លងទៅថ្មីៗនេះ ហើយត្រីខកំប៉ុងនៅតែជាតម្រូវការបន្តទៀត។

សម្តេចតេជោ ហ៊ុន សែន សង្ឃឹមថា ផលិតផលត្រីរបស់ម៉ាល់ឌីវ អាចនឹងក្លាយជាគោលដៅនាំចេញទៅកាន់កម្ពុជា ដើម្បីផ្គត់ផ្គង់ដល់ប្រជាជនកម្ពុជាផង និងអ្នកទេសចរណ៍ដែលមកទស្សនកិច្ចនៅកម្ពុជាផង៕




សម្តេចតេជោ ហ៊ុន សែន ជំរុញឱ្យកម្ពុជា-ម៉ាល់ឌីវ បង្កើតកញ្ចប់ទេសចរណ៍រួមគ្នា នៅក្នុងកិច្ចសហប្រតិបត្តិការលើវិស័យទេសចរណ៍

នៅក្នុងសន្និសីទសារព័ត៌មានរួម ពីវិមានប្រធានាធិបតីនៃសាធារណរដ្ឋម៉ាល់ឌីវ នៅថ្ងៃចន្ទ ទី១៦ ខែមករា ឆ្នាំ២០២៣ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងថា ទាក់ទងជាមួយទេសចរណ៍ ត្រូវផ្តោតការយកចិត្តទុកដាក់ខ្ពស់ក្នុងការជំរុញទំនាក់ទំនង និងកិច្ចសហប្រតិបត្តិការលើវិស័យទេសចរណ៍។ 

សម្តេចតេជោ ហ៊ុន សែន បានគូសបញ្ជាក់ថា មិនគ្រាន់តែប្រជាជនកម្ពុជាមកកាន់ម៉ាល់ឌីវ ប្រជាជនម៉ាល់ឌីវ ទៅកាន់កម្ពុជាប៉ុណ្ណោះទេ តែថែមទាំងផ្តោតការយកចិត្តទុកដាក់ទៅលើអ្នកដែលទស្សនកិច្ចនៅកម្ពុជាទៅលើប្រាង្គប្រាសាទនានា បន្ទាប់មកគេក៏អាចមកកាន់ម៉ាល់ឌីវដើម្បីងូតទឹកលំហែនៅមាត់សមុទ្រ ឬក៏អ្នកដែលមកងូតទឹកនៅម៉ាល់ឌីវរួច គេក៏អាចទៅទស្សនាប្រាង្គប្រាសាទនៅកម្ពុជាបានផងដែរ។

សម្តេចតេជោ ហ៊ុន សែន បានគូសបញ្ជាក់ថា យើងអាចក្លាយទៅជាកញ្ចប់ទេសចរណ៍រួមមួយ ហើយដែលអាចប្រើប្រាស់ វីសា មួយគោលដៅពីរ ដែលយើងនឹងសិក្សាពីបញ្ហានេះបន្តទៀត៕




សម្តេចតេជោ ហ៊ុន សែន ថ្លែងអំណរគុណប្រធានាធិបតីម៉ាល់ឌីវ ដែលបានផ្តល់អាហារូបករណ៍ សម្រាប់និស្សិតកម្ពុជា

នៅក្នុងសន្និសីទសារព័ត៌មានរួម ពីវិមានប្រធានាធិបតីនៃសាធារណរដ្ឋម៉ាល់ឌីវ នៅថ្ងៃចន្ទ ទី១៦ ខែមករា ឆ្នាំ២០២៣ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងអំណរគុណដែលឯកឧត្តមប្រធានាធិបតីម៉ាល់ឌីវ បានផ្តល់អាហារូបករណ៍ សម្រាប់និស្សិតកម្ពុជា ផ្តល់នូវការហ្វឹកហាត់សម្រាប់អ្នកហែលទឹករបស់កម្ពុជា និងផ្តល់នូវការបណ្តុះបណ្តាលដល់មន្រ្តីបដិសណ្ឋារកិច្ចរបស់កម្ពុជាចំនួន២០រូបដើម្បីជំរុញវិស័យទេសចរណ៍នៅកម្ពុជា។

សម្តេចតេជោ ហ៊ុន សែន បានគូសបញ្ជាក់ថា កម្ពុជា ក៏បានប្រកាសផ្តល់អាហារូបករណ៍ចំនួន១០រូបដល់និស្សិតរបស់ម៉ាល់ឌីវ ដើម្បីសិក្សានៅថ្នាក់ឧត្តមសិក្សានៅកម្ពុជាផងដែរ។

លើសពីនេះ សម្តេចតេជោ ហ៊ុន សែន ក៏សុំស្នើផងដែរជាមួយនឹងលទ្ធភាពនៃការពង្រីកកិច្ចសហប្រតិបត្តិការ លើវិស័យវប្បធម៌ ដែលសង្ឃឹមថា រដ្ឋមន្រ្តីការបរទេសនៃប្រទេសទាំងពីរ នឹងពិនិត្យពិភាក្សាគ្នាដើម្បីពង្រីកគ្របដណ្តប់ទៅដល់វិស័យវប្បធម៌នៃប្រទេសទាំងពីរ៕





សម្តេចតេជោ ហ៊ុន សែន៖កម្ពុជា បានសម្រេចចិត្តជ្រើសរើសផ្លូវមួយខ្សែនៅទីក្រុងទេសចរណ៍មាត់សមុទ្រដាក់ឈ្មោះថា «ផ្លូវមិត្តភាពកម្ពុជា-ម៉ាល់ឌីវ»

 នៅក្នុងសន្និសីទសារព័ត៌មានរួម ពីវិមានប្រធានាធិបតីនៃសាធារណរដ្ឋម៉ាល់ឌីវ នៅថ្ងៃចន្ទ ទី១៦ ខែមករា ឆ្នាំ២០២៣ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងថា  សម្រាប់ទំនាក់ទំនងខាងនយោបាយ ឆ្នាំ២០២៣នេះ គឺជាឆ្នាំខួបលើកទី២៨ នៃទំនាក់ទំនងការទូតរវាងប្រទេសទាំងពីរ។ ដើម្បីបង្ហាញពីចំណងមិត្តភាពរវាងប្រទេសទាំងពីរ កម្ពុជា បានសម្រេចចិត្តជាមួយនឹងការជ្រើសរើសផ្លូវមួយខ្សែនៅទីក្រុងទេសចរណ៍មាត់សមុទ្ររបស់យើង ដាក់ឈ្មោះថា «ផ្លូវមិត្តភាពកម្ពុជា-ម៉ាល់ឌីវ» ដែលនេះបង្ហាញពីចរិតប្រវត្តិសាស្រ្តនៃទំនាក់ទំនងរបស់ប្រទេសទាំងពីរដោយចាប់ផ្តើមពីទស្សនកិច្ចរបស់សម្តេចតេជោនាយករដ្ឋមន្រ្តី។

សម្តេចតេជោ ហ៊ុន សែន បានគូសបញ្ជាក់ថា ផ្លូវមួយខ្សែនេះ នឹងប្រែក្លាយទៅជាផ្លូវមិត្តភាពកម្ពុជា-ម៉ាល់ឌីវ ហើយប្រសិនបើអាចធ្វើទៅបានផ្លូវនេះអាចសម្ពោធរូមគ្នាក្នុងឱកាសដែលឯកឧត្តមប្រធានាធិបតី ម៉ាល់ឌីវ អញ្ជើញទស្សនកិច្ចនៅកម្ពុជា តែម្តង។ សម្តេចបានបន្តថា យើងនឹងធ្វើកិច្ចការងារនេះដើម្បីជានិមិត្តរូប នៃសាមគ្គីភាព រវាងកម្ពុជា និងម៉ាល់ឌីវ ដែលសុទ្ធតែជាប្រទេសកំពុងអភិវឌ្ឍន៍ដូចគ្នា៕





វិភាគអន្តរជាតិ៖ តើរុស្ស៉ី កំពុងងើបចេញពីបរាជ័យនៅអ៊ុយក្រែន យ៉ាងដូចម្ដេច?


(វ៉ាស៊ីនតោន)៖ រុស្ស៉ីបានចាប់ផ្ដើមការវាយប្រហារទម្លាក់គ្រាប់បែកបំផ្លិចបំផ្លាញហេដ្ឋារចនាសម័្ពន្ធថាមពលអ៊ុយក្រែន តាំងតែពីខែតុលា ឆ្នាំ២០២២មកម្ល៉េះ បន្ទាប់ពីទទួលបរាជ័យជាបន្តបន្ទាប់ នៅឯសមរភូមិ ក្នុងតំបន់ខាកៀវ និងតំបន់ខឺសុន។ បើតាមអាជ្ញាធរអ៊ុយក្រែន ហេដ្ឋារចនាសម្ព័ន្ធថាមពលនៅទូទាំងប្រទេសជាង ៤០ភាគរយរងការខូចខាត និង៣០ភាគរយនៃស្ថានីយ៍ផ្គត់ផ្គង់ថាមពល ត្រូវបានបំផ្លាញ នៅក្នុងការវាយប្រហាររបស់រុស្ស៉ី គិតត្រឹមខែវិច្ឆិកា ឆ្នាំដដែល។


ជារឿយៗ រុស្ស៉ីតែងតែអះអាងថាការវាយប្រហាររបស់ខ្លួនមិនមានគោលដៅលើជនស៊ីវិល ឬហេដ្ឋារចនាសម្ព័ន្ធស៊ីវិលនោះទេ។ ក៏ប៉ុន្តែ ការវាយប្រហារទម្លាក់គ្រាប់បែកដែលរុស្ស៉ីនៅតែបន្តធ្វើឡើង មកទល់នឹងពេលនេះ មិនត្រឹមតែបង្ហាញពីចេតនាប៉ុណ្ណោះទេ តែវាគឺជា «យុទ្ធសាស្ត្រមួយ» តែម្ដងរបស់ទីក្រុងមូស្គូ ដែលកំពុងជួយឱ្យទាហានរុស្ស៉ីកែខៃយុទ្ធសាស្ត្រសង្រ្គាម និងកំហុសកើតមានឡើងនៅលើ សមរភូមិនាពេលកន្លងមក។ ប្រធានាធិបតីរុស្ស៉ី លោក វ្ល៉ាឌីមៀ ពូទីន បាននិយាយថាប្រតិបត្តិការយោធានៅក្នុងប្រទេសអ៊ុយក្រែន កំពុងដំណើរការទៅមុខតាមផែនការ ហើយលោកផ្ទាល់សង្ឃឹម ថាកងទ័ពរបស់លោកនឹងសម្រេចបានជ័យជម្នះបន្ថែមទៀត បន្ទាប់ពីទីក្រុងមូស្គូ អះអាងពីការវាយកាន់កាប់បានទីក្រុងសូឡេដា (Soledar) ស្ថិតនៅភាគខាងកើតប្រទេសអ៊ុយក្រែន។

រុស្ស៉ីកាលពីថ្ងៃសុក្រ ទី១៣ ខែមករានេះ បានប្រកាសថាកងទ័ពរបស់ខ្លួន បានវាយកាន់កាប់បានទីក្រុងសូឡេដាទាំងស្រុង ហើយដែលនេះជាជ័យជម្នះដ៏កម្រមួយរបស់ទីក្រុងមូស្គូ ក្រោយទទួលបរាជ័យ នៅលើសមរភូមិក្នុងរយៈពេលជាច្រើនខែមកនេះ។ នៅពេលត្រូវបានសាកសួរពីការដណ្ដើមបានទីក្រុងរ៉ែអំបិលរបស់អ៊ុយក្រែននេះដែរ លោក ពូទីន បានគូសបញ្ជាក់នៅក្នុងបទសម្ភាសន៍ជាមួយទូរទស្សន៍ រុស្ស៉ី រ៉ូសស៊ីយ៉ា វ័ន (Rossiya 1) កាលពីថ្ងៃអាទិត្យចុងសប្ដាហ៍កន្លងទៅនេះ យ៉ាងដូច្នេះថា «អ្វីៗកំពុងដំណើរការទៅមុខនៅក្នុងក្របខណ្ឌនៃការផែនការរបស់ក្រសួងការពារជាតិ និងអគ្គសេនាធិការ... ហើយខ្ញុំសង្ឃឹមថាអ្នកប្រយុទ្ធរបស់យើងនឹងសម្រេចបានជ័យជម្នះបន្ថែម នៅក្នុងសមរភូមិប្រយុទ្ធរបស់ពួកគេ»។

យុទ្ធសាស្ត្រទម្លាក់គ្រាប់បែករបស់រុស្ស៉ី មិនទាន់សម្រេចបានជោគជ័យជាក់ស្ដែងជាដុំកំភួនអ្វីទេ តែវាបានបំផ្លិចបំផ្លាញយ៉ាងមានប្រសិទ្ធភាពលើប្រព័ន្ធផលិត ផ្ទេរ និងចែកអគ្គិសនីរបស់អ៊ុយក្រែន។ ការបំផ្លាញ ប្រព័ន្ធអគ្គិសនីពិតជាប្រសិទ្ធភាព ហើយប្រសិទ្ធភាពនោះទៀតសោត ក៏មិនមែនត្រឹមតែធ្វើឱ្យប្រជាជនអ៊ុយក្រែនរស់នៅដោយលំបាកលំបិនក្នុងរដូវរងាប៉ុណ្ណោះទេ តែវាក៏បានផ្ដល់ផលប្រយោជន៍ផ្នែកយោធា ដល់រុស្ស៉ីផងដែរ។ នៅក្នុងសង្រ្គាមសម័យទំនើប ប្រព័ន្ធយោធាទំនើបៗសម្រាប់ប្រព័ន្ធការពារដែនអាកាស ទីបញ្ជាការយោធា និងការប្រមូលព័ត៌មានសម្ងាត់សុទ្ធតែពឹងផ្អែកលើអគ្គិសនី ហើយប្រសិនបើ ប្រព័ន្ធទាំងនេះមិនអាចទទួលបានការផ្គត់ផ្គង់ពីអគ្គិសនីរដ្ឋទូទៅជាធម្មតាទេ នោះចាំបាច់ត្រូវប្ដូរទៅប្រើម៉ាស៊ីនភ្លើងវិញ។ ក៏ប៉ុន្តែ ការប្ដូរពីការប្រើភ្លើងរដ្ឋ ទៅប្រើម៉ាស៊ីនភ្លើង មែនជារឿងងាយស្រួលដូចជា ការកាច់កុងទាក់ភ្លើងចុះឡើងនោះទេ។

ណាមួយ ការពឹងផ្អែកទៅលើម៉ាស៊ីនភ្លើងអាចនឹងដាក់បន្ទុកបន្ថែមឱ្យអ៊ុយក្រែនទៅវិញ ដោយទីក្រុងកៀវ នឹងត្រូវងាកទៅរកតម្រូវការឥន្ធនៈដែលកំពុងខ្វះខាតស្រាប់។ មួយវិញទៀតការប្រើប្រាស់ម៉ាស៊ីនភ្លើង វាក៏អាចបង្កគ្រោះថ្នាក់ដល់ទាហានអ៊ុយក្រែនទៅទៀត ពីព្រោះថាផ្សែង ឬកម្ដៅដែលភាយចេញពីម៉ាស៊ីនភ្លើងអាចឱ្យទីភ្នាក់ងារស៊ើបការសម្ងាត់រុស្ស៉ីកំណត់ទីតាំងរបស់ទាហានអ៊ុយក្រែនកាន់តែជាក់លាក់។ យុទ្ធនាការទម្លាក់គ្រាប់បែករបស់រុស្ស៉ី ក៏កំពុងធ្វើឱ្យអ៊ុយក្រែនត្រូវបង្កើនធនធាន ដើម្បីសម្របខ្លួនទៅនឹងការវាយប្រហារ ក៏ដូចជាបង្វែរធនធានខ្លះមកការពារប្រព័ន្ធ ឬហេដ្ឋារចនាសម្ព័ន្ធថាមពលរបស់ខ្លួន ផងដែរ។ ប្រព័ន្ធអាវុធ ឧស្សាហកម្មផលិតអាវុធ រួមទាំងប្រព័ន្ធរថភ្លើងមួយភាគធំដែលបាន និងកំពុងដើរតួនាទីយ៉ាងសំខាន់ដឹកជញ្ជូនអាវុធទៅកាន់សមរភូមិ សុទ្ធតែត្រូវការថាមពលអគ្គិសនីជាចាំបាច់ តែខណៈ ប្រព័ន្ធផ្គត់ផ្គង់រងការខូចខាត ឬត្រូវបានបំផ្លាញ នោះទាហានអ៊ុយក្រែន និងប្រជាជនស៊ីវិលនឹងត្រូវងាកមកពឹងផ្អែកលើរថភ្លើងដើរដោយម៉ាស៊ូត និងម៉ាស៊ីនភ្លើងដើរដោយម៉ាស៊ូត ឬក៏ត្រូវប្ដូរមកប្រើម៉ាស៊ីនភ្លើង ដើរដោយឧស្ម័នដែលកំពុងខ្សត់ស្រាប់ផងនោះ។

ស្ថានភាពបន្ទាន់បែបនេះឯង នឹងបង្កើនតម្រូវការឥន្ធនៈសម្រាប់ប្រតិបត្តិការយោធា ឬតម្រូវឱ្យសម្ព័ន្ធមិត្តរបស់អ៊ុយក្រែនចាំបាច់បង្កើនការផ្ដល់ឥន្ធនៈដែលរឿងបែបនេះគឺជាការមួយដ៏លំបាកមួយ ដ្បិតប្រទេស អឺរ៉ុបក៏កំពុងខ្វះខាតប្រេង និងឧស្ម័នដើម្បីបំពេញតម្រូវការនៅក្នុងស្រុកដែរ។ ជាការពិតណាស់ លោកខាងលិច បាន និងកំពុងជួយអ៊ុយក្រែនស្ដារប្រព័ន្ធអគ្គិសនីឡើងវិញ ហើយខ្លះទៀតក៏បានផ្ដល់ជាម៉ាស៊ីនភ្លើង ស្របពេលរុស្ស៉ីនៅតែបន្តការវាយប្រហារទម្លាក់គ្រាប់បែកជាប្រចាំ។ ម្លោះហើយសម្រាប់រុស្ស៉ី នេះគឺជាដំណឹងល្អមួយ ព្រោះថាការជួសជុលនេះនឹងស្រូបទាញ ឬយ៉ាងហោចណាស់ វានឹងកាត់បន្ថយធនធានដែល អ៊ុយក្រែនត្រូវយកទៅប្រើនៅឯសមរភូមិមុខ។ ជាងនេះទៅទៀត អ្វីដែលកាន់តែគ្រោះថ្នាក់សម្រាប់អ៊ុយក្រែន នោះគឺរុស្ស៉ីកំពុងប្រើប្រាស់អាវុធដែលមានតម្លៃថោក ដូចជាយន្ដហោះដ្រូនអ៉ីរ៉ង់ នៅក្នុងយុទ្ធនាការទម្លាក់គ្រាប់បែករបស់ខ្លួន។ ពោលគឺអាវុធទាំងនេះមានតម្លៃថោកពិតមែន តែវាអាចបង្កការបំផ្លិចបំផ្លាញយ៉ាងធំ រីឯការប្រើអាវុធស្ទាក់ និងបំផ្លាញពួកវា ក៏ត្រូវការចំណាយថ្លៃច្រើនគួរសមដែរ។

គួរបញ្ជាក់ថា ទោះជាក្រុមមន្ត្រីអាមេរិក និងចក្រភពអង់គ្លេស បានព្យាករម្ដងហើយម្ដងទៀតថារុស្ស៉ីអាចនឹងអស់គ្រាប់រំសេវ និងអាវុធមួយចំនួនក៏ដោយ តែអ្វីដែលគេបានឃើញគឺរុស្ស៉ីត្រូវបានគេរាយការណ៍ថា បានស្វែងរកអាវុធពីកន្លែងផ្សេងបានដដែល ដូចជាទិញដ្រូនពីអ៉ីរ៉ង់ជាដើម។ ដូច្នេះការដឹកនាំយុទ្ធនាការទម្លាក់គ្រាប់បែកយ៉ាងមានប្រសិទ្ធភាពនេះបង្ហាញថាកងទ័ពអាកាសរុស្ស៉ី ដែលសម្រេចបានជោគជ័យ តិចតួចបំផុតមកទល់នឹងបច្ចុប្បន្ន ក្នុងការវាយប្រហារលើទាហានថ្មើរជើងអ៊ុយក្រែន បានរៀនសូត្រពីបរាជ័យរបស់ខ្លួន កន្លងមក៕ (Fresh News)