នៅព្រឹកថ្ងៃទី៣០ ខែកញ្ញា ឆ្នាំ២០២០នេះ អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បានបញ្ចេញ នូវវីដេអូផ្លូវការមួយ ដែលមានរយៈពេលប្រមាណជិត២០នាទី មានចំណងជើងថា « ក្រុមឧទ្ទាមក្រៅច្បាប់ប្រើឧបាយកលចាស់យុទ្ធសាស្ត្រថ្មីដើម្បីប៉ុនប៉ងផ្តួលរំលំ រាជរដ្ឋាភិបាល!» វីដេអូននេះបានបង្ហាញ ពីការផ្លាស់ប្តូរយុទ្ធសាស្ត្រ នៃផែនការប៉ុនប៉ងផ្តួលរំលំរាជរដ្ឋាភិបាលស្របច្បាប់នៅកម្ពុជា របស់ ក្រុមឧទ្ទាមក្រៅច្បាប់ក្រោមការជួយជ្រោមជ្រែងរបស់បរទេស មកប្រើប្រាស់អង្គការសង្គមស៊ីវិលដើម្បីធ្វើសកម្មភាពជំនួសឱ្យក្រុមបក្សប្រឆាំង ។
បើទោះបីជាអង្គការចាត់តាំងនយោបាយនៃបដិវត្តន៍ពណ៌ត្រូវបាន រំលាយ ហើយក្បាលម៉ាស៊ីន ដឹកនាំរបស់ក្រុមនេះត្រូវបានចាប់ខ្លួននិងដកហូតសិទ្ធិធ្វើនយោបាយក៏ដោយក៏ផែនការប៉ុនប៉ងផ្តួលរំលំរាជរដ្ឋាភិបាលស្របច្បាប់នៅកម្ពុជានៅតែត្រូវបានពួកឧទ្ទាមក្រៅច្បាប់បន្តអនុវត្តជា បន្តបន្ទាប់ ក្រោមការគាំទ្រទាំងនយោបាយនិងហិរញ្ញវត្ថុពីបរទេសមួយចំនួន។ ក្រុមឧទ្ទាមក្រៅច្បាប់ទាំងនោះដែលមានមេដឹកនាំបញ្ជាពីក្រៅប្រទេស កំពុងរៀបចំផែនការបំផ្ទុះ ចលនាបដិវត្តន៍ពណ៌សារជាថ្មីដើម្បីឈានទៅផ្តួលរំលំរាជរដ្ឋាភិបាលតាមគោលដៅដែលពួកគេចង់បានដដែល។ប៉ុន្តែលើកនេះពួកគេបានផ្លាស់ប្តូរយន្តការនិងយុទ្ធសាស្ត្រថ្មីដើម្បីធ្វើសកម្មភាពតាម រយៈការ ប្រើប្រាស់សមាគម និងអង្គការក្រៅរដ្ឋាភិបាលមួយចំនួនឲ្យដើរតួជំនួសគណបក្សប្រឆាំង ជ្រុលនិយម ដែលត្រូវបានតុលាការកំពូលរំលាយចោល។ ក្នុងយុទ្ធសាស្ត្រថ្មីនេះ ពួកគេបានបញ្ចូល ក្រុមសកម្មជននយោបាយប្រឆាំងឲ្យធ្វើសកម្មភាពដោយជ្រកក្រោមស្លាកអង្គការសង្គមស៊ីវិលវិញម្តង ក្រោមការជួយជ្រោមជ្រែងពីបរទេសមួយចំនួនដែលជាចៅហ្វាយនាយ។ រីឯអង្គការសង្គមស៊ីវិលទាំងនោះទៀតសោត មួយចំនួនគឺជាអង្គការដែលបង្កើតឡើងដោយខុសច្បាប់ និងដោយមិនបានចុះបញ្ជីជាផ្លូវការនៅស្ថាប័នដែលកំណត់ដោយច្បាប់ឡើយ។
តើហេតុអ្វីបានជាក្រុមឧទ្ទាមក្រៅច្បាប់ក្រោមការជួយជ្រោមជ្រែងរបស់បរទេស ផ្លាស់ប្តូរយុទ្ធសាស្ត្រ មកប្រើប្រាស់អង្គការសង្គមស៊ីវិលដើម្បីធ្វើសកម្មភាពជំនួសឱ្យក្រុមបក្សប្រឆាំង?
សូមទស្សនាវីដេអូផ្លូវការរបស់អង្គភាពព័ត៌មាន និងប្រតិកម្មរហ័ស ដូចខាងក្រោមនេះ៖
#ក្រុមឧទ្ទាមក្រៅច្បាប់ #បដិវត្តន៍ពណ៌ #រាជរដ្ឋាភិបាលកម្ពុជា #ផ្តួលរំលំ