Tuesday, August 30, 2016

ទស្សនៈ៖ តើទណ្ឌិត សម រង្ស៊ី មានសិទ្ធិចុះឈ្មោះបោះឆ្នោតបានដែរឬទេ?

មានមតិមួយចំនួនបានលើកឡើងថា លោក សម រង្ស៊ី ប្រធានគណបក្សសង្គ្រោះជាតិមានសិទ្ធិ​ចុះឈ្មោះបោះឆ្នោតនៅខែកញ្ញាខាងមុខនេះ ប៉ុន្តែ​មតិខ្លះ​ទៀតថា ទណ្ឌិតរូប​នេះ​ គ្មាន​សិទ្ធិ​ចុះ​ឈ្មោះបោះ​ឆ្នោត​បាន​ឡើយ ដោយ​សារ​តែគាត់​ជា​អ្នក​ទោសដែល​មាន​ពិរុទ្ធភាព​ជាប់​ខ្លួន​។
បើ​ទោះ​ជា​ដឹង​ថា មេបក្ស​ប្រឆាំង​រូប​នេះ​ គ្មាន​សិទ្ធិស្រប​ច្បាប់​ក្នុង​ការ​ចុះ​ឈ្មោះ​បោះ​ឆ្នោត​ក្តី​​ ប៉ុន្តែ​ដោយសារមនុស្សមួយ​ចំ​នួន​ធ្លាប់​បំ​រើ​ និង​ទទួលផលប្រយោជន៍ពី​បក្សប្រឆាំង ហើយ​បើ​ទោះ​បី​ជា​ទៅ​ទទួល​ភារកិច្ច​នៅ​ស្ថាប័ន​ឯករាជ្យ គ.ជ.ប ក៏ដោយ​ ក៏នៅ​តែមិន​បាន​ធ្វើ​ខ្លួន​ឯង​ជា​បុគ្គល​ឯករាជ្យ​ដែរ។
លោក គួយ ប៊ុនរឿន អតីតមន្ត្រី​ជាន់​ខ្ពស់គណបក្ស​ប្រឆាំង ដែល​បច្ចុប្បន្នជា​អនុប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានលើកឡើងថា ជាគោលការណ៍ច្បាប់ លោក សម រង្ស៊ី មានសិទ្ធិក្នុងការចុះឈ្មោះបោះឆ្នោត ប៉ុន្តែនៅពេលបិទបញ្ជីដំបូងអាចមានការប្តឹងជំទាស់បាន។
បើ​ទោះ​ជា​មានការ​អះ​អាង​ក្នុង​ចេតនា​បំ​ភ័ន្ត​បែប​នេះ​ក្តី​ ប៉ុន្តែ លោក      ស៊ិក​​​ ប៊ុនហុក ប្រធានគណៈ​កម្មាធិការជាតិរៀបចំការបោះឆ្នោតបានលើកឡើង​ផ្ទុយពីនេះថា ស្ថិតនៅក្នុងលក្ខខ័ណ្ឌពេលនេះ លោក សម រង្ស៊ី ត្រូវបានច្បាប់ហាមឃាត់មិនឱ្យចុះឈ្មោះបោះឆ្នោត និងឈរឈ្មោះ​​ជាបេក្ខជនសម្រាប់​ការបោះឆ្នោត ២០១៧ និង២០១៨ ខាងមុខនោះទេ។ លោកបាន​បន្តថា​  បើយោងតាមច្បាប់បោះឆ្នោតជ្រើសតាំងតំណាងរាស្ត្រមាត្រា៥១ បានចែងថា ដើម្បីចុះឈ្មោះបោះឆ្នោតបាន ប្រជាពលរដ្ឋត្រូវទៅបង្ហាញ​​ខ្លួននៅសាលាឃុំ‑សង្កាត់របស់ខ្លួន ឬទីកន្លែងណាមួយ​ក្នុងឃុំ​‑សង្កាត់ ដែលខ្លួនកំពុងតែរស់នៅតាមការកំណត់របស់គណៈកម្មាធិការជាតិរៀបចំការ​បោះឆ្នោត​។
លោក ស៊ិក ប៊ុន​ហុក បាន​បញ្ជាក់បន្ថែម​ថា ដើម្បីអាចចុះឈ្មោះបោះឆ្នោតបាន ពេលបង្ហាញខ្លួន ប្រជាពលរដ្ឋត្រូវតែមានអត្តសញ្ញាណប័ណ្ណសញ្ជាតិខ្មែរ សម្រាប់សម្គាល់អត្តសញ្ញាណរបស់ខ្លួនដល់ក្រុមចុះឈ្មោះបោះឆ្នោត ព្រមទាំងមានសិទ្ធិបោះឆ្នោត ស្របតាមមាត្រា ៤៦ នៃច្បាប់នេះ។ មាត្រា ៤៦ នៃច្បាប់នេះ បានចែងទៀតថា ដើម្បីមានឈ្មោះក្នុងបញ្ជីបោះឆ្នោត ប្រជាពលរដ្ឋត្រូវ​បំពេញ​លក្ខខ័ណ្ឌដូចខាងក្រោម៖ មានសញ្ជាតិខ្មែរ មានអាយុ១៨ (ដប់ប្រាំបី) ឆ្នាំឡើងទៅ គិតដល់ថ្ងៃបោះឆ្នោត មានលំនៅឋាន ឬទីសំណាក់ក្នុងឃុំ សង្កាត់ដែលសាមីខ្លួនត្រូវបោះឆ្នោត និងមិនត្រូវស្ថិតក្នុងស្ថានភាពជាប់ពន្ធនាគារ ឬមិនត្រូវបានដកសិទ្ធបោះឆ្នោត។
គួររំលឹកផងដែរថា ទណ្ឌិត​ដែល​ជា​ប្រធានបក្សប្រឆាំង បច្ចុប្បន្ននេះ កំពុងជាប់បណ្តឹងជា​ច្រើន​ករណី បន្ថែម​ពី​លើសាលក្រមរបស់តុលាការដែល​បាន​ចូលជា​ស្ថាពរ គឺមាន​តម្លៃ​ស្មើ​នឹង​ការ​បិទ​ផ្លូវ​មិន​អាច​ឲ្យ​គាត់​បន្ត​ធ្វើ​នយោបាយ​បាន​ឡើយ​។
ទណ្ឌិត​រូប​នេះ ត្រូវបាន​គេដឹង​ថា កំ​ពុង​ប្រឈម​នឹង​បណ្តឹងជាច្រើន ក្នុង​នោះរួមមាន៖ បណ្តឹងរបស់លោក ហេង សំរិន ប្តឹងពីបទបរិហាកេរ្តិ៍ បណ្តឹងពាក់ព័ន្ធនឹងការបង្ហោះឯកសារក្លែ​ង​ក្លាយដែ​ល​ពន្យល់ដោយ​​លោក ហុង សុខហួរ ពាក់ព័ន្ធបញ្ហាព្រំដែនកម្ពុជា-វៀតណាម​ និងបណ្តឹងរបស់លោកនាយករដ្ឋមន្ត្រី​ ហ៊ុន សែន ប្តឹងពីការបង្ហោះសារនៅលើទំព័រហ្វេសប៊ុករបស់ខ្លួនមួលបង្កាច់ បង្ខូចកេរ្តិ៍ឈ្មោះ​លោក ហ៊ុន សែន ។ ក្រៅពី​នេះ លោក សម​រង្ស៊ី កំ​ពុង​ប្រឈម​នឹង​បទល្មើសដោយ​ការលាប​ពណ៌ដោយគ្មានមូលដ្ឋានច្បាស់លាស់ទៅលើ​រដ្ឋាភិបាល ចំពោះការស្លា​ប់​​របស់​លោក កែម ឡី ដោយបានចោទថាជាភេរវកម្មមួយរៀបចំដោយរដ្ឋអំណាច។
លោក សម រង្ស៊ី ត្រូវបាន​តុលាការ​ចេញ​សាលក្រមស្ថាពរមួយទៀតបង្គាប់ឲ្យចាប់ខ្លួនតាមអំណាចសាលដីការស្ថាពរលេខ១៧  ក្រ៥.ប ចុះថ្ងៃទី១២ ខែមិនា ឆ្នាំ២០១៣ របស់សាលាឧទ្ធរណ៍ ដែលតុលាការបានកាត់ឱ្យ​​ចាញ់ក្តីលោកឧបនាយករដ្ឋមន្រ្តី ហោ ណាំហុង   លើបណ្តឹ​ងបរិហាកេរ្តិ៍ ហើយតុលាការក៏បានបង្គាប់អោយចាប់ខ្លួនលោក សម រង្ស៊ី មកអនុវត្តទោសផងដែរ។
ដូច្នេះ ផ្អែកតាមបទល្មើស និង​លក្ខខ័ណ្ឌផ្លូវ​ច្បាប់​ដែល​កំ​ពុង​ប្រឈមដែលលោក សម រង្ស៊ី ប្រធានគណបក្សប្រឆាំងបានប្រព្រឹត្តដោយគ្មានទំនួលខុសត្រូវ រហូតរត់ចោលស្រុក ទាំងអស់នេះ គឺបង្ហាញយ៉ាងច្បាស់ថា ទណ្ឌិត​រូប​នេះ មិនមានសិទ្ធិចុះឈ្មោះបោះឆ្នោតដូចពលរដ្ឋខ្មែរទូទៅបានឡើយ។ អ៊ីចឹង​ ហេតុផល​ដែល​អតីតមន្ត្រីជាន់ខ្ពស់​របស់​ខ្លួន​ចេញ​មក​អះ​អាង​នោះ​ គ្រាន់​តែ​ជា​ការ​បោកប្រាស់​សាធារណមតិតែប៉ុណ្ណោះ ក្នុង​ន័យ​ថា បើសិនជាទណ្ឌិតរូបនេះ​មានសិទ្ធិចុះឈ្មោះបោះឆ្នោតបានមែននោះ អ្នកទោសនៅពន្ធនាគារទាំងអស់ក៏ប្រហែលជាមានសិទ្ធិចុះឈ្មោះបោះឆ្នោតដែរហើយ ប៉ុន្តែតាមច្បាប់នៃព្រះរាជាណាចក្រកម្ពុជា បាន​ចែង​យ៉ាង​ច្បាស់ថា អ្នកទោស ឬទណ្ឌិតពុំមានសិទ្ធិចុះឈ្មោះបោះឆ្នោតនោះទេ។ ម៉ោង​នេះ គេលែង​គិត លែង​ខ្វល់ និង​មិន​នឹក​នាអំពី​ឈ្មោះ​សម រង្ស៊ី ទៀត​នោះ​ទេ ពី​ព្រោះ​គាត់​បាន​បាត់​បង់​សិទ្ធិ​នយោបាយ​បាត់​ទៅ​ហើយ៕
អត្ថបទដោយ៖ សិទ្ធិ សេរី