Monday, June 10, 2019

ឯកអគ្គរដ្ឋទូតញូវហ្សេឡែនអញ្ជើញពិនិត្យលទ្ធផលគម្រោងកិច្ចសហប្រតិបត្តិការរវាងអាជ្ញាធរជាតិអប្សរានិងរដ្ឋាភិបាលញូវហ្សេឡែន

នៅថ្ងៃទី១០ ខែមិថុនា ឆ្នាំ២០១៩ លោក ហង់ ពៅ អគ្គនាយកអាជ្ញាធរជាតិអប្សរា អញ្ជើញអមដំណើរលោក BEN KING ឯកអគ្គរដ្ឋទូតញូវហ្សេឡែន ក្នុងឱកាសលោកឯកអគ្គរដ្ឋទូតចុះបំពេញទស្សនកិច្ចស្វែងយល់អំពីលទ្ធផលដែលសម្រេចបាននាពេលកន្លងមកនៅរមណីយដ្ឋានអង្គរក្រោមគម្រោងអភិវឌ្ឍន៍សេដ្ឋកិច្ចនិងបេតិកភណ្ឌអង្គរ Angkor Community Heritage and Economic Advancement (ACHA) ដែលជាគម្រោងកិច្ចសហប្រតិបត្តិការរវាងអាជ្ញាធរជាតិអប្សរានិងរដ្ឋាភិបាលញូវហ្សេឡែន។
នៅនឹងការដ្ឋានសំណង់ទ្វារទឹកតាសោម លោក ហង់ ពៅ បានបង្ហាញជូនលោកឯកអគ្គរដ្ឋទូតនូវសកម្មភាពនិងលទ្ធផលការងារដែលបានអនុវត្តកន្លងមក ជាពិសេសផលប្រយោជន៍ជាច្រើនដែលបានជួយលើកកម្ពស់ ជីវភាព រស់នៅ របស់ប្រជាពលរដ្ឋក្នុងរមណីយដ្ឋានអង្គរតាមរយៈការដាំដុះកសិកម្ម ព្រមទាំងការស្តារប្រព័ន្ធធារាសាស្ត្របុរាណអង្គរដើម្បី ទប់ស្កាត់ទឹកជំនន់ក្នុងរមណីយដ្ឋានអង្គរនិងក្រុងសៀមរាប។

លោក BEN KING បានចាប់អារម្មណ៍យ៉ាងខ្លាំងចំពោះលទ្ធផលប្រកបដោយផ្លែផ្កានៃគម្រោង ACHA ជាពិសេសការធ្វើ ឱ្យប្រែប្រួលនៃជីវភាពរស់នៅរបស់អ្នកស្រុកអង្គរ។ លើសពីនេះទៀត លោកក៏បានបញ្ជាក់ពីក្តីរីករាយពេលដែលបានចុះមកឃើញផ្ទាល់ភ្នែក ព្រមទាំងបានសន្យាថានឹងបន្តកិច្ចសហ ប្រតិបត្តិការ លើផ្នែកផ្សេងៗបន្ថែមទៀតនាពេលអនាគត៕




២០ មិថុនាខាងមុខនេះ! ក្រសួងការពារជាតិ នឹងប្រារព្ធខួប ៤២ឆ្នាំ ដំណើររបស់សមមិត្ត ហ៊ុន សែន ឆ្ពោះទៅកាន់ការផ្ដួលរំលំរបប «ប៉ុល ពត» នៅតំបន់កោះថ្ម ស្រុកមេមត់

នាយឧត្ដមសេនីយ៍ ណឹម សុវត្ថិ អគ្គនាយក នៃអគ្គនាយកដ្ឋាននយោបាយ និងកិច្ចការបរទេស ក្រសួងការពារជាតិ និងជាប្រធានក្រុមការងារសាងសង់វិមានឈ្នះ-ឈ្នះ បានថ្លែងឱ្យដឹងថា ក្រសួងការពារជាតិ នឹងប្រារព្ធខួប ៤២ឆ្នាំ នៃដំណើរបស់សមមិត្ត ហ៊ុន សែន ឆ្ពោះទៅកាន់ការផ្ដួលរំលំរបបប្រល័យពូជសាសន៍ «ប៉ុល ពត» ខណៈការប្រារព្ធខួបនេះនៅសល់តែ ១០ថ្ងៃទៀតប៉ុណ្ណោះ (២០ មិថុនា ១៩៧៧-២០ មិថុនា ២០១៩)។
ថ្លែងប្រាប់អ្នកសារព័ត៌មាននៅពីមុខវិមានឈ្នះ-ឈ្នះ នៅថ្ងៃទី៩ ខែមិថុនា ឆ្នាំ២០១៩ នាយឧត្ដមសេនីយ៍ ណឹម សុវត្ថិ បានលើកឡើងថា ប្រវត្តិសាស្ត្ររបស់សមមិត្ត ហ៊ុន សែន និងសមមិត្តរួមដំណើរផ្សេងៗទៀត មិនអាចបំភ្លេចបាននោះឡើយ ខណៈការយកជីវិតទៅប្រថុយប្រថានជាមួយបរទេស (ស្នើសុំកម្លាំងវៀតណាម) ដើម្បីជួយរំដោះប្រទេសជាតិឱ្យរួចផុតពីរបប ដ៏សាហាវរបស់ខ្មែរក្រហមហើយ បានធ្វើឱ្យប្រទេសជាតិមានសុខសន្តិភាព និងការអភិវឌ្ឍរហូតដល់សព្វថ្ងៃនេះ។
ខួបលើក ៤២ឆ្នាំ នៃទិវាចងចាំដំណើរឆ្ពោះទៅការផ្ដួលរំលំរបបប្រល័យពូជសាសន៍ ប៉ុល ពត នឹងប្រព្រឹត្តទៅក្រោមអធិបតីភាពលោកឧបនាយករដ្ឋមន្ត្រី ទៀ បាញ់ រដ្ឋមន្ត្រី ក្រសួងការពារជាតិ ស្ថិតនៅតំបន់កោះថ្ម ឃុំទន្លូង ស្រុកមេមត់ ខេត្តត្បូងឃ្មុំ និងបន្តដំណើរចូលទៅក្នុងប្រទេសវៀតណាម ដើម្បីរំលឹកនូវការចងចាំនៃទីតាំងសំខាន់ៗ ក្នុងការចាប់ផ្ដើមតស៊ូរបស់សមមិត្ត ហ៊ុន សែន លើសមរភូមិរំដោះជាតិ និងប្រជាជនកម្ពុជា កាលពីជាង៤០ឆ្នាំមុន។
នាយឧត្ដមសេនីយ៍ ណឹម សុវត្ថិ បានបញ្ជាក់បន្ថែមថា «ទិវាចងចាំ នៃដំណើរឆ្ពោះទៅកាន់ការផ្តួលរំលំ របបប្រល័យពូជសាសន៍ ប៉ុល ពត»នឹងធ្វើឡើងជារៀងរាល់ឆ្នាំហើយរាល់ ឯកសារនានារបស់សមមិត្ត ហ៊ុន សែន ពាក់ព័ន្ធនឹងដំណើរការតស៊ូលះបង់ជីវិត ដើម្បីជាតិមាតុភូមិ ត្រូវបានឆ្លាក់នៅវិមានឈ្នះ-ឈ្នះ ដើម្បីទុកឱ្យកូនចៅជំនាន់ក្រោយ បានសិក្សារៀនសូត្រពីប្រវត្តិ នៃការតស៊ូរបស់លោក និងសមមិត្តរួមដំណើរផ្សេងៗទៀត។

នៅវិមានឈ្នះ-ឈ្នះ ក៏នឹងប្រារព្ធកម្មវិធីនេះដែរ ដោយនឹងប្រព្រឹត្តទៅជាមួយនឹងការបើកនូវសារមន្ទីរ ផ្ទុកដោយឯកសារជាច្រើនទាក់ទង និងប្រវត្តិសាស្ត្រដ៏ជូរចត់របស់សមមិត្ត ហ៊ុន សែន និងមិត្តរួមដំណើរដែលបានបូជាសាច់ស្រស់ ឈាមស្រស់ ដើម្បីប្រទេសជាតិទាំងមូលឱ្យរួចផុតពីរបបប៉ុលពត ឱ្យប្រជាពលរដ្ឋខ្មែរ ក៏ដូចជាភ្ញៀវជាតិ និងអន្តរជាតិចូលទស្សនាផងដែរ ៕



លោកនាយករដ្ឋមន្រ្ដី ហ៊ុន សែន នឹងបំពេញទស្សនកិច្ចនៅហុងគ្រី និងចូលរួមសន្និសីទកំពូល ស្តីពី អន្តរសកម្មភាព និងវិធានការកសាងទំនុកចិត្តនៅអាស៊ី នៅប្រទេសតាជីគីស្ថាន

លោកនាយករដ្ឋមន្រ្ដី ហ៊ុន សែន នឹងដឹកនាំគណៈប្រតិភូជាន់ខ្ពស់កម្ពុជា អញ្ជើញទៅបំពេញទស្សនកិច្ចផ្លូវការ នៅសាធារណរដ្ឋហុងគ្រី និងចូលរួមសន្និសីទកំពូលលើកទី៥ ស្តីពី អន្តរសកម្មភាព និងវិធានការកសាងទំនុកចិត្តនៅអាស៊ី នៅសាធារណរដ្ឋតាជីគីស្ថាន ពីថ្ងៃទី១៣ ដល់ថ្ងៃទី១៥ ខែមិថុនា ឆ្នាំ២០១៩ ខាងមុខនេះ។ នេះបើតាមសេចក្តីប្រកាសរបស់ក្រសួងការបរទេសកម្ពុជា។
សម្រាប់ការបំពេញទស្សនកិច្ចផ្លូវការនៅប្រទេសហុង គ្រី ពីថ្ងៃទី១៣ ដល់១៤ ខែមិថុនា ឆ្នាំ ២០១៩ ដែលធ្វើឡើងតបតាមការអញ្ជើញរបស់លោកឱ្យ នាយករដ្ឋមន្រ្តីហុងគ្រី វីកទ័រ អ័របាន (Viktor Orbán)នោះ លោកនាយករដ្ឋមន្រ្ដី នឹងជួបសម្តែងការគួរសមដោយឡែកពីគ្នាជាមួយថ្នាក់ដឹកនាំហុងគ្រី និងមានជំនួបពិភាក្សាទ្វេភាគីជាមួយសមភាគីហុងគ្រី លើបញ្ហាជាច្រើនសំដៅលើកកម្ពស់ និងពង្រឹងទំនាក់ទំនងទ្វេភាគីដែលមានស្រាប់ ក៏ដូចជាកិច្ចសហប្រតិបត្តិការជិតស្និទ្ធនៅលើវេទិកាពហុភាគីនានា។
នៅក្នុងដំណើរទស្សនកិច្ចនេះ ឯកសារពីរគឺ កិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច និង កម្មវិធីផ្លាស់ប្តូរវិស័យអប់រំ នឹងត្រូវចុះហត្ថលេខា។
ដោយឡែក សម្រាប់សន្និសីទកំពូល ស្តីពី អន្តរសកម្មភាព និងវិធានការកសាងទំនុកចិត្តនៅអាស៊ី (CICA) លើកទី៥ នៅថ្ងៃទី១៥ ខែមិថុនា ឆ្នាំ ២០១៩ នៅទីក្រុងឌូស្ហាន់បេ សាធារណរដ្ឋតាជីគីស្ថាន៖ លោកនាយករដ្ឋមន្រ្ដី នឹងថ្លែងសុន្ទរកថាគន្លឹះ និងមានជំនួបទ្វេភាគីតបតាមការអញ្ជើញរបស់ លោកឱ្យ អ៊ីម៉ូម៉ាលី រ៉ាម៉ុន (Emomali Rahmon) ប្រធានាធិបតីនៃសាធារណរដ្ឋតាជីគីស្ថាន និងជាប្រធានកិច្ចប្រជុំកំពូលលើកទី៥ នៃសន្និសីទស្តីពីអន្តរសកម្មភាព និងវិធានការកសាងទំនុកចិត្តនៅអាស៊ី (5th CICA Summit) ពីឆ្នាំ២០១៨ ដល់២០២០។
នៅក្នុងកិច្ចប្រជុំកំពូលនេះ លោកនាយករដ្ឋមន្រ្តី នឹងថ្លែងសុន្ទរកថាដ៏សំខាន់មួយដោយផ្តោតលើបញ្ហាគន្លឹះជាច្រើន ដែលជាការប្រឈមរួមរបស់តំបន់អាស៊ី និងចែករំលែកទស្សនៈស៊ីជម្រៅថា អាស៊ីនឹងរួមគ្នាដោះស្រាយបញ្ហាសន្តិសុខ សេដ្ឋកិច្ច និងនយោបាយ តាមរយៈការពង្រឹងជំនឿទំនុកចិត្ត និងទំនាក់ទំនងក្នុងចំណោមប្រទេសជាសមាជិក CICA ។
ក្រៅពីកិច្ចប្រជុំកំពូលនេះ លោកនាយករដ្ឋមន្រ្តី នឹងមានជំនួបពិភាក្សាការងារទ្វេភាគី ជាមួយលោកឱ្យ អ៊ីម៉ូម៉ាលី រ៉ាម៉ុន ប្រធានាធិបតីតាជីគីស្ថាន និងប្រមុខរដ្ឋ/រដ្ឋាភិបាលនៃប្រទេសមួយចំនួនដែលអញ្ជើញមកពីប្រទេសសមាជិកផ្សេងទៀត។
CICA គឺជាវេទិកាពហុភាគីដែលមានវត្ថុបំណងលើកកម្ពស់កិច្ចសហប្រតិបត្តិការក្នុងចំណោមរដ្ឋសមាជិករបស់ខ្លួន ក្នុងវិស័យមួយចំនួនដូចជា សន្តិភាព សន្តិសុខ និងស្ថិរភាពនៅអាស៊ី និងពិភពលោក ទាំងមូល។ បច្ចុប្បន្ន សន្និសីទនេះ មានសមាជិកអចិន្រៃ្តយ៍ចំនួន ២៦ ប្រទេស ហើយកម្ពុជាបានចូលជាសមាជិកនៅឆ្នាំ២០១១៕

ខាងក្រោមនេះជាសេចក្តីប្រកាសរបស់ក្រសួងការបរទេស៖


គណៈកម្មាធិការសាខា CPP និងក្រុមការងារយុវជន CPP នៅអូស្ត្រាលី-នូវ៉ែលហ្សេឡង់ រៀបចំពិធីហូបនំបញ្ចុកតេជោសន្តិភាព

អូស្ត្រាលី-នូវ៉ែលហ្សេឡង់៖ ដោយអនុវត្តតាមការអំពាវនាវរបស់លោកនាយករដ្ឋមន្ត្រី ហ៊ុន សែន និងជាប្រធានគណបក្សប្រជាជនកម្ពុជា នៅថ្ងៃទី៩ ខែមិថុនា ឆ្នាំ២០១៩នេះ គណៈកម្មាធិការសាខាបក្ស និងក្រុមការងារយុវជនគណបក្ស បានជួបជុំសមាជិក សមាជិការគណបក្សប្រជាជនកម្ពុជាដែលកំពុងរស់នៅតាមបណ្តាទីក្រុងនានានៃប្រទេសអូស្ត្រាលី-នូវ៉ែលហ្សេឡង់ រៀបចំពិធីហូបនំបញ្ចុកតេជោសន្តិភាព នៅតាមបណ្តាទីក្រុងដែលខ្លួនកំពុងរស់នៅរួមមាន៖ រដ្ឋធានីកង់បេរ៉ា ទីក្រុងស៊ីដនី ទីក្រុងម៉ែលប៊ន ទីក្រុងអាដឺឡែត ទីក្រុងប្រីសប៊ិន ទីក្រុងភឺត ទីក្រុងហាលម៉ិនតុន ទីក្រុងផាមមើស្តុនណត ទីក្រុងក្លៃឈឺត ទីក្រុងនេបភា ទីក្រុងវ៉ែលីនតុន ទីក្រុងអូកក្លិន។
កម្មវិធីដ៏អធិកអធមនេះបានសហការរៀបចំ និងគាំទ្រដោយគណៈកម្មាធិការគណបក្សប្រចាំប្រទេសអូស្ត្រាលី-នូវ៉ែលហ្សេឡង់ និងក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជាប្រចាំប្រទេសអូស្ត្រាលី-នូវ៉ែលហ្សេឡង់ និងប្រចាំតាមតំបន់នានាផងដែរ។

គេក៏សង្កេតឃើញបើទោះជាមានការមមាញឹកក្នុងការងារ ឬក្នុងក្រុមគ្រួសារយ៉ាងណា ក៏សមាជិក សមាជិការ CPP បានឆ្លៀតឱកាសមកចូលរួមក្នុងការជួបជុំហូបនំបញ្ចុកតេជោសាមគ្គីជាតិនាថ្ងៃនេះ ប្រកបដោយការស្លៀកពាក់ស្អាតបាត ទឹកមុខសប្បាយរីករាយ ដោយមានអ្នករៀបចំទឹកសម្លនំបញ្ចុក និងមានបន្លែធម្មជាតិស្រស់ៗតាមការជាក់ស្តែងដែលអាចរកបាននៅទីនោះ ដែលបង្ហាញពីសាមគ្គីភាពក្នុងស្មារតីខ្មែរតែមួយ៕