ទុន​វិនិយោគ​លើវិស័យ​សំណង់​នៅកម្ពុជា​មាន​ជាង ៨ពាន់​លាន នៅ​ឆ្នាំ​២០១៦​

ព្រះវិហារ៖ លោក ទេព ធន អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី១៤ ខែកុម្ភៈ ឆ្នាំ២០១៧នេះ បានបញ្ជាក់ថា ទុនវិនិយោគលើវិស័យសំណង់នៅប្រទេសកម្ពុជា ក្នុងឆ្នាំ២០១៦ មានចំនួន ៨,៥០០លានដុល្លារ កើនឡើង ១៥៥ភាគរយ បើធៀបនឹងឆ្នាំ២០១៥។

នេះជាការលើកឡើងរបស់លោក ទេព ធន ក្នុងសន្និបាតបូកសរុបការងារឆ្នាំ២០១៦ និងលើកទិសដៅការងារឆ្នាំ២០១៧ របស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តព្រះវិហារ ដែលមានការចូលរួមពី លោក អ៊ុន ចាន់ដា អភិបាលខេត្តព្រះវិហារ។
លោក ទេព ធន បានបញ្ជាក់ថា ការងាររៀបចំដែនដី នគរូបនីយកម្ម និងសំណង់ ការងាររដ្ឋបាលដីធ្លី និងការងារលំនៅឋាន ដែលស្ថិតនៅក្រោមការគ្រប់គ្រងរបស់ក្រសួងរៀបចំដែនដី បានសម្រេចសមិទ្ធផលធំៗជាច្រើន រួមមាន «ការចុះបញ្ជីដីធ្លីគិតពីពេលចាប់ផ្តើមរហូតដំណាច់ឆ្នាំ២០១៦ ក្រសួងសម្រេចចែកបណ្ណកម្មសិទ្ធិដីធ្លី បានចំនួន ៤,៤៥១,៨១៧បណ្ណ ស្មើនឹង ៦៣.៦ភាគរយ លើសផែនការ ១.៦ភាគរយ»។
សូមជម្រាបផងដែរថា ក្រសួងបានដោះស្រាយវិវាទដីធ្លីក្នុងសមត្ថកិច្ចគណៈកម្មការសុរិយោដីគ្រប់លំដាប់ថ្នាក់ គិតចាប់តាំងពីចាប់ផ្តើមមកដល់ដំណាច់ឆ្នាំ២០១៦ ក្នុងបណ្តឹងជាង ៧,៥០០ករណី ក្នុងនោះបានដោះស្រាយបញ្ចប់ ៣,៥០០ករណី ច្រានចោល និងបញ្ជូនតាមសមត្ថកិច្ច ជាង២,៥០០ករណី។
ចំពោះទិសដៅសម្រាប់អនុវត្តឆ្នាំ២០១៧ មន្ទីដែនដីខេត្តព្រះវិហារ បានប្តេជ្ញាចុះដោះស្រាយករណីវិវាទដែលមិនទាន់បញ្ចប់ នៅឆ្នាំ២០១៦ ឱ្យបានចប់នាឆ្នាំ២០១៧នេះ ចុះធ្វើការវាស់វែងដីមានលក្ខណៈជាប្រព័ន្ធឱ្យបានចប់តាមផែនការ ពង្រឹងដល់មន្ត្រីឱ្យចុះបោះបង្គោលព្រំដី សាងសង់សំណង់គ្រប់ក្រុង-ស្រុកទាំង៨ និងបញ្ហាផ្សេងៗទៀត៕

ក្រសួងការងារ ចេញសេចក្តីណែនាំពាក់ព័ន្ធនឹងគ្រឿងញៀន

(ភ្នំពេញ)៖ នៅថ្ងៃទី១៤ ខែកុម្ភៈ ឆ្នាំ២០១៧នេះ ក្រសួងការងារ និងបណ្តុះបណ្តាលវិជ្ជាជីវៈ បាន​ចេញសេចក្តីណែនាំ ស្តីពីការប្រយុទ្ធប្រឆាំងគ្រឿងញៀនខុសច្បាប់នៅតាមសហគ្រាស គ្រឹះស្ថាន ដើម្បី​ប្រយុទ្ធប្រឆាំងគ្រឿងញៀនខុសច្បាប់ និងចូលរួមក្នុងការអនុវត្តផែនការ​របស់​រាជ​​រដ្ឋា​ភិបាល​ស្តី​ពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១។

ក្រសួងការងារ បានបញ្ជាក់ថា និយោជកនៃសហគ្រាស គ្រឹះស្ថាន ត្រូវសហការជាមួយកម្មករ និយោជិត សហជីព និងប្រតិភូបុគ្គលិក ដើម្បីរៀបចំផែនការបង្ការ ទប់ស្កាត់កុំឱ្យមាន​ការប្រើ​ប្រាស់ និងជួញដូរគ្រឿងញៀននៅតាមសហគ្រាស គ្រឹះស្ថាន។

សេចក្តីណែនាំ ក៏បានបញ្ជាក់ថា ក្នុងករណីពិនិត្យ និងរកឃើញថា មានកម្មករ និយោជិតណា ប្រើប្រាស់គ្រឿងញៀន នៅក្នុងសហគ្រាស គ្រឹះស្ថាន និយោជក សហជីព និងប្រតិភូបុគ្គលិក ឬតំណាងកម្មករ និយោជិត ត្រូវពិគ្រោះយោបល់គ្នា អំពីស្ថានភាពជាក់ស្តែង ដើម្បីជួយ​សម្រួលឱ្យទៅទទួលសេវាព្យាបាល និងស្តារនីតិសម្បទារបស់រដ្ឋ ឬឯកជនដោយគ្មានការរើស អើង៕

សូមអានសេចក្តីណែនាំរបស់ក្រសួងការងារដូចខាងក្រោម៖

ក្រសួង​ទេសចរ​ណ៍ នឹងរៀប​ចំទិវាជា​តិទីក្រុង​ស្អាត​លើកទី​៥ ឆ្នាំ២០១​៧ នៅចុង​ខែនេះ​

ភ្នំពេញ៖ គណៈកម្មាធិការជាតិវាយតម្លៃទីក្រុងស្អាត បានចេញសេចក្តីជូនដំណឹង ប្រកាសឱ្យអាជ្ញាធរ គ្រប់រាជធានី-ខេត្ត រៀបចំកម្មវិធីបញ្ជ្រាបការយល់ដឹង និងការសម្អាតទីក្រុង ដើម្បីចូលរួមអបអរ ដល់ទិវាជាតិទីក្រុងស្អាតលើកទី៥ ឆ្នាំ២០១៧ ដែលប្រារព្វឡើង នៅចុងខែនេះ។

សេចក្តីជូនដំណឹង បានបន្តទៀតថា ទិវាជាតិទីក្រុងស្អាតលើកទី៥ ឆ្នាំ២០១៧នេះ នឹងធ្វើឡើងក្រោមប្រធានបទ «ទីក្រុងស្អាត ទីក្រុងផ្តល់ភាពកក់ក្តៅដល់ប្រជាពលរដ្ឋ និងភ្ញៀវទេសចរ» អមជាមួយ ការរៀបចំវេទិកាធុរកិច្ចបៃតងក្នុងវិស័យទេសចរណ៍លើកទី២ ដែលនឹងប្រព្រឹត្តទៅនៅថ្ងៃទី២៧ ខែកុម្ភៈ ឆ្នាំ២០១៧ ក្រោមអធិបតីភាព លោកនាយករដ្ឋមន្ត្រីហ៊ុន សែន ។

គណៈកម្មាធិការជាតិវាយតម្លៃទីក្រុងស្អាត ក៏បានធ្វើការណែនាំឱ្យរាជធានី-ខេត្ត ជាពិសេសក្រុង/ខណ្ឌបេក្ខភាពទីក្រុងស្អាត រៀបចំសកម្មភាពការបញ្ជ្រាបការយល់ដឹង អំពីទីក្រុងស្អាតដល់សាធារណជនចំនួនពីរ គឺ ទី១-កម្មវិធីបញ្ជ្រាបការយល់ដឹង និងទី២-កម្មវិធីសម្អាតទីក្រុង៕

ក្រុមការងារសហគមន៍អាជ្ញាធរជាតិអប្សរា៣ក្រុមចុះពិនិត្យសំណើជួសជុលនិងអនុញ្ញាតបានចំនួន១២ករណី

នាថ្ងៃទី១៤ កុម្ភៈ ឆ្នាំ២០១៧នេះ ក្រុមការងារសហគមន៍នៃអាជ្ញាធរជាតិអប្សរាចំនួន៣ក្រុម គឺក្រុមការងារប្រចាំស្រុកប្រាសាទបាគង ស្រុកអង្គរធំ និងក្រុងសៀមរាប បានចុះទៅជួបប្រជាពលរដ្ឋ និងដោះស្រាយសំណើសុំជួសជុលផ្សេងៗតាមការស្នើសុំរបស់ពួកគាត់។ ជាមួយគ្នានេះ ក៏បាននាំយកកញ្ចប់ទ្រទ្រង់សុខុមាលភាពមាតា និងទារកទៅចែកជូនស្ត្រីទើបសម្រាលកូនចំនួន១០នាក់ផងដែរ។

ក្រុមការងារ បានអនុញ្ញាតសំណើសុំជួសជុលតូចៗចំនួន១២ករណី ដូចជាការផ្លាស់សសរផ្ទះ តសំយ៉ាប និងជួសជុលជញ្ជាំងផ្ទះជាដើម។ ដោយឡែក សំណើសុំចំនួន៣ករណីផ្សេងទៀតនៅក្រុងសៀមរាប ដែលស្នើសុំរុះរើផ្ទះចាស់ហើយសាងសង់ថ្មី មិនត្រូវបានអនុញ្ញាតដោយផ្ទាល់ឡើយ តែក្រុមការងារបានណែនាំឲ្យម្ចាស់ផ្ទះដាក់ពាក្យស្នើសុំទៅមជ្ឈមណ្ឌលច្រកចេញតែមួយនៃអាជ្ញាធរជាតិអប្សរា ព្រោះសំណើទាំងនោះជាសំណង់ធំ ដែលត្រូវការក្រុមជំនាញចុះពិនិត្យល្អិតល្អន់។

លោក វ៉ាន់ ចាន់ថន ពលរដ្ឋនៅភូមិប្រិយចាស់ សង្កាត់ទឹកវិល ក្រុងសៀមរាប បានបង្ហាញនូវភាពសប្បាយរីករាយដែលក្រុមការងារបានចុះមកពិនិត្យផ្ទះរបស់លោក និងបានអនុញ្ញាតសំណើរបស់លោកក្នុងការជួសជុលជណ្តើរ ជួសជុលជញ្ជាំង និងធ្វើរបងជុំវិញផ្ទះ។ លោកក៏បានអំពាវនាវដល់ប្រជាពលរដ្ឋដទៃទៀត ដែលរស់នៅស្របច្បាប់ក្នុងរមណីយដ្ឋានអង្គរ មានបំណងជួសជុលផ្ទះសម្បែង សូមទាក់ទងទៅអាជ្ញាធរមូលដ្ឋាន និងស្នើសុំទៅអាជ្ញាធរជាតិអប្សរាដោយផ្ទាល់ ជៀសវាងការពឹងពាក់ជនណាម្នាក់ ដែលអាចនាំឲ្យចាញ់បោកគេបាន ព្រោះការដាក់ពាក្យស្នើសុំជួសជុល ឬសាងសង់ គឺមិនមានការបង់កម្រៃឡើយ។

ក្រុមការងារសហគមន៍នៃអាជ្ញាធរជាតិអប្សរា ត្រូវបានបង្កើតឡើងដើម្បីផ្សព្វផ្សាយអំពីបេតិ​កភណ្ឌ បញ្ជ្រាបចំណេះដឹងដល់ប្រជាពលរដ្ឋ ដើម្បីឲ្យពួកគាត់បានចូលរួមក្នុងកិច្ចការពារបេតិ​កភណ្ឌ។ ទន្ទឹមនឹងនេះ ក្រុមការងារសហគមន៍ក៏បានឆ្លើយតបនឹងតម្រូវការជាក់ស្តែងរបស់ប្រជាពលរដ្ឋ ដែលស្នើសុំជួសជុលតិចតួច និងអនុញ្ញាតជូនភ្លាមៗនៅនឹងមូលដ្ឋាន ដើម្បីសម្រួលដល់ពេលវេលា និងការធ្វើដំណើររបស់ពួកគាត់។ លើសពីនេះទៀត ក្រុមការងារសហគមន៍ក៏ជាក្រុមជួយសង្គ្រោះបន្ទាន់ ក្នុងករណីគ្រោះថ្នាក់ធម្មជាតិដែលកើតមានឡើងចំពោះប្រជា​ពលរដ្ឋក្នុងតំបន់អង្គរ និងនាំយកអំណោយចែកជូនស្ត្រីទើបសម្រាលកូនជាដើម៕

រឿងមុនដំបូងខ្មែរក្រហមសម្លាប់ប៉ាខ្ញុំ នឹងមានបញ្ចាំងក្នុងពេលឆាប់ៗនេះ (មានវីដេអូ)

«មុនដំបូងខ្មែរក្រហមបានសម្លាប់ប៉ារបស់ខ្ញុំ» គឺជាការចងចាំដ៏ឈឺចាប់របស់អ្នកនិពន្ធសៀវភៅ និង សកម្មជនការពារសិទ្ធិមនុស្សអ្នកស្រី លឿង អ៊ឹង ដែលបានរួចផុតជីវិតពីរបបខ្មែរក្រហមយ៉ាងសាហាវយ៉ងឃ្នង នៅចន្លោះឆ្នាំ ១៩៧៥ ដល់ ១៩៧៨។ ព្រឹត្តិការណ៍នេះបានកើតឡើង ពេលខ្មែរក្រហមបានឡើងកាន់អំណាច កាលពីអ្នកស្រីនៅអាយុ ៥ ឆ្នាំ ដល់ ៩ ឆ្នាំ។

ខ្សែភាពយន្តនេះ បានឆ្លុះបញ្ចាំងអំពីស្មារតីយ៉ាងមោះមុត និងការតស៊ូយ៉ាងប្ដូរផ្តាច់របស់គ្រួសារអ្នកស្រី លឿង អ៊ឹង ដើម្បីបានរស់នៅជាមួយគ្នាយ៉ាងវេទនា អំឡុងសម័យខ្មែរក្រហម។ ឈុតឆាកខ្លីៗនៅក្នុងរឿង «មុនដំបូងខ្មែរក្រហមសម្លាប់ប៉ាខ្ញុំ» ត្រូវបានបង្ហោះផ្សាយនៅក្នុងបណ្តាញផ្សព្វផ្សាយសង្គមនានា។ ខ្សែភាពយន្តនេះ រួមមានលោកស្រី Angelina Jolie គឺជាចាងហ្វាងខ្សែភាពយន្តលោក ប៉ាញ់ ឬទ្ធី ផលិតករ និងនិពន្ធដោយលោកស្រី លឿង អ៊ឹង។

ផលិតករខ្សែភាពយន្ត លោក ប៉ាញ់ ឬទ្ធី បានបញ្ជាក់ថា ការផលិតរឿងនេះ អាចឱ្យយើងកសាងខ្លួនជាថ្មី ការលើករឿង យកមកនិយាយមិនត្រឹមតែជាការកាន់ទុក្ខ វាក៏ជាការបន្តដំណើរទៅមុខ។ លោកក៏បានបញ្ជាក់ថា នៅឆ្នាំ២០១៥ អ្នករួចជីវិតពីរបបប្រល័យពូជសាសន៍នេះរាប់រយនាក់ និងកូនចៅរបស់គេ បានសហការគ្នាបង្កើតឡើងប្រវត្តិសាស្រ្តសារជាថ្មីតាមរយៈរឿង «មុនដំបូងខ្មែរក្រហមសម្លាប់ប៉ាខ្ញុំ»។

ចាងហ្វាងផលិតខ្សែភាពយន្ត លោកស្រី Angelina Jolie បានលើកឡើងថា ខ្សែភាពយន្តនេះ ឆ្លុះបញ្ចាំងពីជីវិតពិតរបស់អ្នកស្រី លឿង អ៊ឹង។ វាមិនត្រឹមតែបង្ហាញពីការឆ្លងកាត់សង្រ្គាមផ្ទាល់របស់ក្មេងស្រីម្នាក់ទេ ប៉ុន្តែវាក៏ជារឿងរ៉ាវរបស់ប្រទេសជាតិទាំងមូលផងដែរ។ អ្នកនិពន្ធខ្សែរភាពយន្តលោកស្រី លឿង អ៊ឹង បានថ្លែងថា អ្នកសម្តែង និងសាច់រឿងទាំងមូលនឹងនិយាយជាភាសាខ្មែរ ហើយអ្វីដែល Angelina Jolie កំពុងធ្វើគឺជាអំពើដ៏ល្អប្រសើរមួយសម្រាប់ប្រទេសកម្ពុជា។

លោកស្រី Angelina Jolie ក៏បានបញ្ជាក់ថា៖ «នេះជាលើកទីមួយហើយដែលប្រទេសកម្ពុជា បានទទួលរងនូវសង្រ្គាមដ៏ធំបែបនេះ។ ខ្ញុំគិតថា អ្នកដែលមកធ្វើការទីនេះគ្រប់ផ្នែកទាំងអស់ គឺមិនមែនមកដើម្បីខ្លួនឯងទេ គឺសុទ្ធតែមានគោលបំណងជួយឱ្យរឿងរ៉ាវប្រទេសពួកគេ បានដឹងឮដល់ពិភពលោក។ ពួកយើងបានបង្កើតឆាក ហើយពន្យល់ពីឈុតឆាកដែលលំបាកដូចជា យើងត្រូវថតការវាយតប់របស់ខ្មែរក្រហមជាដើម។ ពួកយើងក៏បានស្វែងរកឃើញមនុស្សមួយចំនួន ដែលគាត់បានជួបរឿងរ៉ាវឈឺចាប់ខ្លួនឯងផ្ទាល់ផង និងដឹងពីរឿងរ៉ាវឈឺចាប់របស់អ្នកដទៃផង។ ពួកគាត់ បានប្រាប់យើងពីរឿងរ៉ាវ និងអារម្មណ៍ជាក់ស្តែងដែលគាត់បានជួបផ្ទាល់។ ជាការពិតណាស់ វាមិនត្រឹមតែជារឿងកុនប៉ុណ្ណោះទេ វាគឺជាស្ពានរវាងអតីតកាលរបស់យើង និងអ្នកជំនាន់ក្រោយ៕

ក្រសួង​ការបរទេស និង​ឧត្តមស្នង​ការសិទ្ធិ​មនុស្សនៃ​អង្គការ​សហ​ប្រ​ជា​ជាតិ បានព្រម​​ព្រៀង​ ជួប​ប្រជុំពិ​គ្រោះ​យោបល់​រៀង​រាល់បីខែ​ម្តង

ភ្នំពេញ៖ ក្រសួងការបរទេស និងសហប្រតិបត្តិការអន្តរជាតិកម្ពុជា និងការិយាល័យឧត្តមស្នងការសិទ្ធិមនុស្ស នៃអង្គការសហប្រជាជាតិប្រចាំកម្ពុជាបានព្រមព្រៀងគ្នាថា នឹងជួបប្រជុំពិគ្រោះយោបល់ជាមួយគ្នា ជារៀងរាល់បីខែម្តង ក្នុងគោលបំណងពង្រឹងកិច្ចសហប្រតិបត្តិការរវាងរាជរដ្ឋាភិបាលកម្ពុជា និងការិយាល័យឧត្តមស្នងការសិទ្ធិមនុស្សនៃអង្គការសហប្រជាជាតិ។ ការសន្យាបែបនេះក្នុងពេលដែលលោក ប្រាក់ សុខុន រដ្ឋមន្ត្រីការបរទេស និងលោកស្រី Wan Hea-Lee តំណាងការិយាល័យឧត្តមស្នងការសិទ្ធិមនុស្សនៃអង្គការសហប្រជាជាតិ ប្រចាំកម្ពុជាបានជួបពិភាក្សាការងារជាមួយគ្នា នាទីស្តីក្រសួង រាជធានីភ្នំពេញ នៅថ្ងៃទី១៤ ខែកុម្ភៈ ឆ្នាំ២០១៧នេះ។

លោក ជុំ សុន្ទរី អ្នកនាំពាក្យក្រសួងការ បានឱ្យដឹងថា ក្នុងជំនួបនោះ លោកស្រី Wan Hea-Lee បានសំណូមពរសុំជួបប្រជុំពិភាក្សាការងារជារៀងរាល់បីខែម្តង ដើម្បីពង្រឹងទំនាក់ទំនងការងារជាមួយនឹងបណ្តាក្រសួង ស្ថាប័នពាក់ព័ន្ធផ្សេងៗរបស់កម្ពុជា ព្រមទាំងពង្រឹងកិច្ចសហប្រតិបត្តិការជាមួយក្រសួងការបរទេសកម្ពុជា។

លោកស្រី Wan Hea-Lee បានមានប្រសាសន៍ថា ឆ្នាំ២០១៧នេះ គឺជាឆ្នាំនៃការចាប់ផ្តើមពង្រឹងកិច្ចសហប្រតិបត្តិការឡើងវិញ រវាងការិយាល័យ និងរាជរដ្ឋាភិបាលកម្ពុជា ជាពិសេសកសាងជំនឿទុកចិត្តជាមួយគ្នា។

ជាការឆ្លើយតប លោក ប្រាក់ សុខុន បានឯកភាពចំពោះសំណើជួបគ្នាជាទៀងទាត់រៀងរាល់បីខែម្តងនេះ ដោយលោកបានបញ្ជាក់ថា គោលជំហររបស់ក្រសួងការបរទេស ចង់ពង្រឹងកិច្ចសហការជាមួយការិយាល័យឧត្តមស្នងការសិទ្ធិមនុស្ស នៃអង្គការសហប្រជាជាតិ និងការកសាងនូវជំនឿទុកចិត្តគ្នាទៅវិញទៅមក។ លោក ប្រាក់ សុខុនបានបញ្ជាក់ផងដែរថា នៅប៉ុន្មានខែខាងមុខនេះ រាជរដ្ឋាភិបាល និងរៀបចំកិច្ចប្រជុំមួយជាមួយការិយាល័យឧត្តមស្នងការសិទ្ធិមនុស្សនៃអង្គការសហប្រជាជាតិ ដើម្បីទទួលជ្រាបអំពីផែនការសកម្មភាពបន្តទៀត របស់ស្ថាប័នមួយនេះដែលមានគោលដៅលើកស្ទួយសិទ្ធិមនុស្សនៅកម្ពុជា។

លោក ជុំ សុន្ទរី បានបន្តថា ប្រមុខកាទូតកម្ពុជា ក៏បានសំណូមពរសុំឱ្យការិយាល័យនេះយកចិត្តទុកដាក់ខ្ពស់ចំពោះការគោរពឱ្យបានត្រឹមត្រូវនូវអធិបតេយ្យភាពរបស់កម្ពុជា និងជៀសវាងការជ្រែតជ្រែតចូលកិច្ចការផ្ទៃក្នុងរបស់កម្ពុជា ដែលស្របតាមការកំណត់នៃធម្មនុញ្ញរបស់អង្គការសហប្រជាជាតិ និងក្រមប្រតិបត្តិនានាសម្រាប់មន្ត្រីរដ្ឋបាលអន្តរជាតិ។

សូមជម្រាបផងដែរថា ក្នុងជំនួបនោះ ភាគីទាំងពីរក៏បានសន្យាថា នឹងខិតខំអនុវត្តតាមការចុះអនុស្សារណៈយោគយល់ស្តីពីកិច្ចសហប្រតិបត្តិការផ្នែកបច្ចេកទេស រវាងរាជរដ្ឋាភិបាលកម្ពុជានិងការិយាល័យឧត្តមស្នងការសិទ្ធិមនុស្សនៃអង្គការសហប្រជាជាតិប្រចាំកម្ពុជាដែលទើបតែត្រូវបានចុះហត្ថលេខាថ្មីៗនេះ មានរយៈពេល២ឆ្នាំ ៕

កូនស្រីលោក កឹម សុខា៖ លោក សម រង្ស៊ី លែងសំខាន់សម្រាប់គណបក្សសង្គ្រោះជាតិទៀតហើយ !

(ភ្នំពេញ)៖ នៅលើទំព័រធ្វីតទ័ររបស់ខ្លួន កញ្ញា កឹម មនោវិទ្យា កូនស្រីរបស់ប្រធានគណបក្សសង្រ្គោះជាតិស្តីទី កឹម សុខា បានសរសេរនៅល្ងាចថ្ងៃទី១៣ ខែកុម្ភៈ ឆ្នាំ២០១៧ ថា «ឥឡូវនេះគណបក្សសង្គ្រោះជាតិ មានសំណាងក្នុងការបង្ហាញថា យើងជាគណបក្សដែលផ្អែកលើគោលគំនិតមួយ មិនមែនពឹងផ្អែក លើបុគ្គលឡើយ ហើយជ័យជំនះសម្រាប់ការបោះឆ្នោតខាងមុខនឹង​បង្ហាញច្បាស់»។

កញ្ញា កឹម មនោវិទ្យា និយាយយ៉ាងដូច្នេះអាចចង់មានន័យដៀមដាមថា កាលពីលោក សម រង្ស៊ី នៅធ្វើជាប្រធានបក្ស គណបក្សសង្គ្រោះជាតិនេះគ្មានសំណាងឡើយ គឺអ្វីៗត្រូវពឹងផ្អែកតែទៅលើបុគ្គល សម រង្ស៊ី ប៉ុណ្ណោះ ឬចង់សំដៅថា លោក សម រង្ស៊ី ដឹកនាំគណបក្សដោយលើក​បុគ្គលខ្លួនឯងជាធំជាងគណបក្ស!?

ការបង្ហាញពីការយល់ឃើញរបស់ខ្លួននេះធ្វើឡើងតែពីរថ្ងៃតែប៉ុណ្ណោះ បន្ទាប់ពីលោក សម រង្ស៊ី បានលាលែងចេញពីតំណែងប្រធានគណបក្សសង្គ្រោះជាតិ និងមួយថ្ងៃក្រោយពីឪពុកនាង ត្រូវ​​បានតែងតាំងជាប្រធានស្តីទីពេញសិទ្ធិចាត់ចែងការងារក្នុងគណបក្សនេះ រហូតដល់មានការ​ជ្រើសរើសប្រធានថ្មី ក្នុងសមាជបក្សនាពេលខាងមុខ។

សម្រាប់ក្រុមមន្ត្រីស្និទ្ធនឹងលោក សម រង្ស៊ី បានលើកឡើងថា ការលាលែងពីតំណែងរបស់លោក សម រង្ស៊ី គឺជាការសោកស្តាយមួយ និងអាចបាត់បង់ឥទ្ធិពលកាន់តែច្រើនពីក្នុងការដឹកនាំបក្ស ប៉ុន្តែសម្រាប់កូនស្រីលោក កឹម សុខា វិញ ការលាលែងរបស់លោកសម រង្ស៊ី ពីប្រធានគណបក្សសង្គ្រោះជាតិ និងបញ្ចប់សមាជិកភាពពីបក្សនេះ គឺដូចជាដកបន្លាចេញពីកែវភ្នែករបស់ខ្លួនដូច្នេះឯង។ ហេតុដូច្នេះហើយ បានជានៅពេលលោក សម រង្ស៊ី អស់តំណែងជា ប្រធានបក្សភ្លាម កឹម មនោវិទ្យា បានសរសេរបែបដៀមដាមថា «គណបក្សសង្គ្រោះជាតិផ្អែកលើគោលគំនិតមិនមែនលើបុគ្គល»។

សារនេះបញ្ចេញនៅពេលគ្មាន សម រង្ស៊ី ប៉ុន្តែមានឪពុកនាងជាអ្នកដឹកនាំបក្ស។ តាមរយៈសម្តីនេះគេអាចយល់បានថា គណបក្សសង្គ្រោះ នឹងមិនផ្អែកលើបុគ្គល សម រង្ស៊ី ទៀតទេ នៅពេល​ដែលមាន កឹម សុខា ជាអ្នកដឹកនាំហើយនោះ។

កញ្ញា កឹម មនោវិទ្យា ក៏បានបញ្ជាក់ដែរថា ជ័យជម្នះនៅក្នុងការបោះឆ្នោតនាពេលខាងមុខ នឹងបង្ហាញថា អ្វីដែលនាងនិយាយគឺត្រឹមត្រូវ។ នាងចង់សំដៅថា ក្រោមការដឹកនាំរបស់ឪពុកនាង ទោះគ្មាន សម រង្ស៊ី ក៏ឈ្នះដែរ។ លាហើយសម័យកាល សម រង្ស៊ី! សម្រាប់ កឹម មនោវិទ្យា លោក សម រង្ស៊ី ដែលសមាជិកភាគច្រើនគោរពនោះ លែងជាតួអង្គជាទីគោរពសក្ការៈរបស់គណបក្សសង្គ្រោះជាតិទៀតហើយ ហើយក៏លែងត្រូវការ សម រង្ស៊ី ដែរ។ សូម សម រង្ស៊ី កុំលូកដៃ ឬប្រើឥទ្ធិពលរបស់ខ្លួននៅក្នុងគណបក្សសង្គ្រោះជាតិធ្វើអ្វី។ សូមសម្រាកឱ្យបានស្ងប់ចុះ! សាររបស់ កឹម មនោវិទ្យា គឺខុសស្រឡះពីសាររបស់លោក អេង ឆៃអ៊ាង និងមន្ត្រីស្និទ្ធនឹងលោក សម រង្ស៊ី ផ្សេងទៀត ដែលបានសរសេរលើហ្វេសប៊ុករបស់ខ្លួនថា «ទោះលោកប្រធាន សម រង្ស៊ី អស់ងារជាប្រធានគណបក្សសង្គ្រោះជាតិក៏ដោយ តែនៅក្នុងបេះដូងកូនខ្មែរ លោកប្រធាននៅតែជាប្រធានគណបក្សសង្គ្រោះជាតិដដែល»។

នៅក្នុងរង្វង់គណបក្ស ជាពិសេសមន្ត្រីមកពីគណបក្ស សម រង្ស៊ី មិនសូវជាចូលចិត្ត កឹម មនោវិទ្យា កូនស្រីលោក កឹម សុខា នេះប៉ុន្មានទេ ដោយសារតែឡើងតំណែងធំក្នុងបក្សក៏ព្រោះតែឡើងតាមជើងខោឪពុករបស់ខ្លួន និងមានចរិតក្រអឺតក្រទម មិនគោរពចំពោះអ្នកចាស់ទុំនយោបាយ។ ឥឡូវនេះ អំណាចបាន ស្ថិតនៅក្នុងដៃរបស់លោក កឹម សុខា គេមានការព្រួយបារម្ភថា កឹម មនោវិទ្យា នឹងលូកដៃកាន់តែជ្រៅ និងកាងការងារក្នុងបក្សព្រោះកាលឪពុកខ្លួនជា អនុប្រធាន​បក្ស បានសម្តែងឫកខ្ពស់ និងឈ្លោះជាមួយគេឯងនៅក្នុងបក្ស ចុះទម្រាំពេលនេះ ឪពុកបានឡើងជាប្រធានស្តីទីមានសិទ្ធិច្រើនជាងមុន កឹម មនោវិទ្យា អាចនឹងបើកការសងសឹក ទៅលើមន្ត្រីនិយម សម រង្ស៊ី មួយចំនួនដែលធ្លាប់មានជម្លោះពាក្យសម្តីជាមួយគ្នា ព្រោះនេះជាសករាជរបស់ កឹម សុខា មិនមែនជាសករាជរបស់ សម រង្ស៊ី តទៅទៀតឡើយ។

កញ្ញា កឹម មនោវិទ្យា ត្រូវបានគេស្គាល់ថា ជាក្មេងស្រីក្រអ៊ឺតក្រទមម្នាក់នៅក្នុងគណបក្សសង្រ្គោះជាតិ ប៉ុន្តែក៏ជាមនុស្សក្លាហានហ៊ាននិយាយត្រង់ដោយចំហ និងដោយមិនខ្លាចថ្នាក់ដឹកនាំបក្សឡើយ នៅពេលកញ្ញា យល់ឃើញថា ខុស ថាខុស ត្រូវថាត្រូវ។ កញ្ញា កឹម មនោវិទ្យា គឺជាសមាជិកគណៈកម្មាធិការអចិន្រ្តៃយ៍ គណបក្សសង្រ្គោះជាតិ និងជាកូនស្រីសំណព្វចិត្តរបស់លោក កឹម សុខា។ កូនស្រីលោក កឹម សុខា រូបនេះធ្លាប់មានបញ្ហាឈ្លោះទាស់ទែងគ្នា បែកផ្សែងម្តង រួចមកហើយ បន្ទាប់ពីបានបង្ហោះសារនៅលើធ្វីតទ័ររបស់ខ្លួនរិះគន់លោក សម រង្ស៊ី អំពីការនិរទេសខ្លួន និងមានហេតុផលស្របច្បាប់ ក្នុងការស្ថិតនៅបរទេស បន្តទៀត ខណៈដែលឪពុកនាងគឺលោក កឹម សុខា បានឃុំខ្លួនឯងនៅក្នុងទីស្នាក់ការបក្សនៅចាក់អង្រែ ដោយសារតែរឿងអាស្រូវផ្លូវភេទ ដោះស្រាយ បញ្ហាតែម្នាក់ឯង។

ក្រៅពីការរិះគន់ទាំងនេះ កញ្ញា កឹម មនោវិទ្យា ក៏ធ្លាប់បានលើកឡើងប្រាប់បណ្តាញសារព័ត៌​មាននានាថា បើទោះបីអត់ពីលោក សម រង្ស៊ី ក៏ដោយ ក៏គណបក្សសង្រ្គោះជាតិ នៅតែមានដំណើរការជាធម្មតា ព្រោះសមាជិកគណបក្សនីមួយៗកំពុងបំពេញតួនាទីរបស់ពួកគេរៀងៗខ្លួន និងបានចោទលោក សម រង្ស៊ី ថា ជាមនុស្សគេចយករួចខ្លួន មិនហ៊ានចូលគុក។ ពេលនោះ​មិនមាននរណាហ៊ានថាឱ្យកញ្ញា កឹម មនោវិទ្យា ឬដាក់វិន័យនាងឡើយ។ ចុះទំរាំបច្ចុប្បន្ន លោក កឹម សុខា ដែលជាឪពុកនាង គឺជាប្រធានស្តីទីគណបក្សពេញសិទ្ធិ ក្តាប់អំណាចពេញទី និងជាអនាគតប្រធានបក្សទៅទៀត តើនរណាថ្លើមធំហ៊ានស្តីបន្ទោស ឬដាក់វិន័យកញ្ញា កឹម មនោវិទ្យា? លោក កឹម សុខា នឹងការពារកូនស្រីថា កុំធ្វើដឹង ធ្វើឮ ហើយ កុំចាំបាច់មានវិធានការដាក់វិន័យកូនស្រីគាត់អី ព្រោះនេះ ជាការបំបែកបំបាក់ ! ថាតែប៉ុណ្ណឹង លែងមានអ្នកក្អកហើយ!៕

ប្រភព៖ Fresh News

លោកនាយករដ្ឋមន្រ្ដី ហ៊ុន សែន ជួបលេខាធិការក្រុមប្រឹក្សាសន្តិសុខជាតិរបស់សហព័ន្ឋរុស្ស៊ី

នៅវិមានសន្តិភាព ព្រឹកថ្ងៃទី១៤ខែកុម្ភៈ ឆ្នាំ២០១៧នេះ លោក ហ៊ុន សែន នាយករដ្ឋមន្ត្រីនៃកម្ពុជា បានអនុញ្ញាតអោយ លោក Nikolai Platonovich Patrushev លេខាធិការក្រុមប្រឹក្សាសន្តិសុខជាតិរបស់សហព័ន្ឋរុស្ស៊ី ចូលជួបសំដែងការគួរសម និងពិភាក្សាការងារ។ លោក Nikolai ក៏បាននាំនូវការផ្តាំផ្ញើសួរសុខទុក្ខពីលោក នាយករដ្ឋមន្រ្តី និង លោកប្រធានាធិបតីរុស្សី ជូន លោកនាយករដ្ឋមន្រ្តី ផងដែរ។

លោក Nikolai Platonovich Patrushev បានជម្រាបជូនលោកនាយករដ្ឋមន្រ្តី អំពីដំណើរទស្សនៈកិច្ចពេលនេះដើម្បីពិភាក្សាការងារ និងពង្រឹងកិច្ចសហប្រតិបត្តិការរវាងប្រទេសទាំងពីរកម្ពុជារុស្សី។ កិច្ចប្រជុំព្រឹកមិញនេះ គឺមានការពិភាក្សាផ្លាស់ប្តូរយោបល់មួយចំនួនផងដែរអំពីបញ្ហាក្នុងតំបន់ និងបញ្ហាអន្តរជាតិ ដូចជាការប្រឆាំងឧក្រិដ្ឋកម្មឆ្លងដែន គ្រឿងញៀន និងបញ្ហាជនអន្តោប្រវេសន៍ខុសច្បាប់ ជាពិសេសផ្តោតលើការប្រយុទ្ធប្រឆាំងអំពើភេរវកម្ម។ លោកនាយករដ្ឋមន្រ្ដី បានស្នើសុំអោយតំណាងភាគីកម្ពុជា និងរុស្ស៊ីបន្តជួបពិភាក្សាគ្នាអោយបាន ញឹកញាប់ដើម្បីរកវិធីផ្សេងៗជម្រុញការប្រយុទ្ធប្រឆាំងនឹង អំពើភេរវកម្មឱ្យកាន់តែមានប្រសិទ្ធិភាព។

លោកនាយករដ្ឋមន្ត្រី បានបញ្ជាក់អំពីការគាំទ្រក្នុងការប្រយុទ្ឋប្រឆាំងភេវរកម្ម ហើយលោក បានស្នើសុំឱ្យភាគីរុស្សីរៀបចំជាផ្លូវការនូវ ”សន្និសីទអន្តរជាតិ ស្តីពីការប្រយុទ្ធប្រឆាំងអំពើភេរវកម្ម” ដើម្បីប្រទេសនានា និងសហគមអន្តរជាតិអាចចូលរួមបាន។ លោក Nikolai នឹងនាំសេចក្តីស្នើសុំនេះទៅកាន់ប្រធានាធិបតីរុស្ស៊ីដើម្បីសម្រេច។

កិច្ចប្រជុំព្រឹកមិញនេះគឺបានរឹតបន្តឹងនូវចំណងមិត្តភាព និងកិច្ចសហប្រតិបត្តិការល្អរវាង កម្ពុជា និង រុស្សីក្នុង បរិយាកាសស្និទស្នាលបំផុត។ លោកនាយករដ្ឋមន្រ្ដី ហ៊ុន សែន ក៏បានផ្តាំផ្ញើសួរសុខទុក្ខលោកនាយករដ្ឋមន្រ្តី និង លោកប្រធានាធិបតីរុស្សីផងដែរ៕

នាយឧត្តមសេនីយ៍ សៅ សុខា ដឹកនាំកម្លាំងចុះត្រួតពិនិត្យកន្លែងប្រព្រឹត្តបទល្មើសព្រៃឈើ នៅខេត្តពោធិ៍សាត់

ភ្នំពេញ៖ នៅព្រឹកថ្ងៃទី១៤ ខែកុម្ភៈ ឆ្នាំ២០១៧ គណៈកម្មាការពិសេសបង្ក្រាប បទល្មើសព្រៃឈើដឹកនាំ ដោយលោក នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស បាន និងកំពុងដឹកនាំកម្លាំង ប្រមាណជាង១០០នាក់ ចុះត្រួតពិនិត្យកន្លែង ដែលប្រព្រឹត្តបទល្មើសព្រៃឈើ នៅក្នុងភូមិសាស្ត្រខេត្តពោធិសាត់។
ប្រតិបត្តិការនេះ ក៏មានការអញ្ជើញចូលរួមពី លោក ម៉ៅ ធនិន អភិបាលខេត្តពោធិសាត់ និងមន្ត្រីកសិកម្ម មន្ត្រីបរិស្ថានផងដែរ៕

ព្រឹកនេះលោក សម រង្ស៊ី ត្រូវចូលបំភ្លឺនៅតុលាការ ករណីចោទ លោក នាយករដ្ឋមន្ត្រី ហ៊ុន សែន ផ្តល់លុយ១លានដុល្លារឱ្យ ធី សុវណ្ណថា

ភ្នំពេញ៖ តាមការគ្រោងទុក នៅវេលាម៉ោង៩៖០០ នៅព្រឹកថ្ងៃទី១៤ ខែកុម្ភៈ ឆ្នាំ២០១៧ លោក សម រង្ស៊ី ដែលទើបនិងលាលែងពីតំណែង ប្រធានគណបក្សសង្រ្គោះជាតិ ត្រូវចូលបំភ្លឺនៅតំណាង អយ្យការអម សាលាដំបូងរាជធានីភ្នំពេញ ករណីចោទលោកនាយករដ្ឋមន្រ្ដី ហ៊ុន សែន ថាបានផ្តល់លុយ១លានដុល្លារទៅឱ្យ កញ្ញា ធី សុវណ្ណថា ដើម្បីប្រឆាំងនឹងគណបក្សសង្រ្គោះជាតិ។

បណ្តឹងនេះត្រូវបានប្តឹងដោយ មេធាវីលោកនាយករដ្ឋមន្រ្ដី ហ៊ុន សែន គឺលោក គី តិច ដោយទាមទារសំណងជំងឺចិត្តជូន លោកនាយករដ្ឋមន្ដ្រី ហ៊ុន សែន ១លានដុល្លារ ក្រោមការចោទពីបទបរិហារកេរ្តិ៍ជាសាធារណៈ បន្ទាប់ពីលោក សម រង្ស៊ី បាននិយាយចោទប្រកាន់លោកនាយករដ្ឋមន្រ្ដី កាលពីថ្ងៃទី១៤ ខែមករា ឆ្នាំ២០១៧។

លោក សម រង្ស៊ី នៅក្នុងឱកាសជំនួបសំណេះសំណាលជាមួយសកម្មជនគណបក្សសង្គ្រោះជាតិ ប្រចាំប្រទេសបារាំង នៅទីក្រុងប៉ារីស បាននិយាយយ៉ាង ដូច្នេះថា «ចុះ…ហ៊ុន សែន សូក ធី សុវណ្ណថា មួយលានដុល្លារ ម៉េចអាណាមិនធើអី ហ៊ុន សែន ផង?…មួយលានដុល្លារ… និយាយ…លុយនោះលុយពុករលួយ ទៅសូកឱ្យមនុស្សធ្វើអាក្រក់ ថាឱ្យវាយប្រហារ…ឱ្យរករឿងគណបក្សសង្រ្គោះជាតិឱ្យធ្វើបាតុកម្ម ឬជួល នេះ ជួលនោះ…ប្រើមួយលានដុល្លារ…»។

ចំពោះករណីនេះ កញ្ញា ធី សុវណ្ណថា ក៏បានដាក់ពាក្យបណ្តឹងប្តឹង លោក សម រង្ស៊ី ដោយទាមទារសំណងជំងឺចិត្ត ៥សែនដុល្លារផងដែរ៕

គណៈរដ្ឋមន្រ្តី នឹងបើកកិច្ចប្រជុំ នៅថ្ងៃសុក្រ សប្តាហ៍នេះដើម្បីពិភាក្សាលើរបៀបវារៈចំនួន២

ភ្នំពេញ៖ គណៈរដ្ឋមន្រ្តីកម្ពុជា នឹងបើកកិច្ចប្រជុំមួយនៅ ថ្ងៃសុក្រ ទី១៧ ខែកុម្ភៈ ឆ្នាំ២០១៧ នៅវេលាម៉ោង៨:៣០ព្រឹក ដើម្បីពិភាក្សាលើរបៀបវារៈចំនួន២។ នេះបើតាម លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា។
របៀបវារៈទាំង២នេះរួមមានដូចខាងក្រោម៖

១៖ គម្រោងវិនិយោគខ្សែបញ្ជូនអគ្គីសនី ២៣០ គីឡូវ៉ុល ពីស្ថានីយវារីអគ្គីសនីស្ទឹងតាតៃ មកភ្នំពេញ និងគម្រោងវិនិយោគបន្ថែមម៉ាស៊ីនផលិតអគ្គីសនីដុតធ្យូងថ្មអានុភាព១៣៥ មេហ្កាវ៉ាត់ ខេត្តព្រះសីហនុ។
២៖ បញ្ហាផ្សេងៗ៖ សំណើសុំការយល់ព្រមពីគណៈរដ្ឋមន្ត្រី ដើម្បីសុំសច្ចាប័នពីស្ថានប័ននីតិប្បញ្ញាត្តិលើ «ពិធីសារទី៣ ដើម្បីធ្វើវិសោធនកម្មកិច្ចព្រមព្រៀងពាណិជ្ជកម្មទំនិញ នៅក្រោមកិច្ចព្រមព្រៀងក្របខ័ណ្ឌស្តីពីកិច្ចសហប្រតិបត្តិការសេដ្ឋកិច្ចទូលំទូលាយ ក្នុងចំណោមរដ្ឋាភិបាល នៃប្រទេសសមាជិកសមាគមប្រជាជាតិអាស៊ីអាគ្នេយ៍ និងសាធារណរដ្ឋកូរ៉េ»។
កិច្ចប្រជុំនេះ នឹងប្រព្រឹត្តទៅក្រោមអធិបតីភាពលោក នាយករដ្ឋមន្រ្តី ហ៊ុន សែន នៅវិមានសន្តិភាព៕

ដីកាបង្គាប់លោក គឹម សុខ ឱ្យចូលខ្លួនត្រូវបានសមត្ថកិច្ចយកទៅបិទដល់មុខផ្ទះនាខេត្តតាកែវ

នាព្រឹកថ្ងៃទី១៤ ខែកម្ភៈនេះ  ព្រះរាជអាជ្ញាបានយកដីកាបង្គាប់ឱ្យលោក គឹម សុខ ឱ្យចូលខ្លួន​​ទៅបិទដល់មុខផ្ទះនាខេត្តតាកែវ គឺក្រោយពេលលោក គឺ តិច មេធាវីតំណាងដោយអណត្តិរបស់លោក​ ហ៊ុន សែន ប្រធានគណបក្សប្រជាជនកម្ពុជាសម្រេចប្តឹង ព្រោះលោក គឹម សុខ ដែលជាអ្នកវិភាគរូបនេះបានចោទគណបក្សកាន់អំណាចជាអ្នកសម្លាប់លោកបណ្ឌិត កែម ឡី។​

គួរំលឹកផងដែរថា​ ​ ពាក្យបណ្តឹងប្តឹងលោក គឹម សុខ អ្នកឃ្លាំមើលបញ្ហាសង្គម និងនយោបាយ បាននិយាយនៅក្នុងវេទិកាវិទ្យុអាស៊ីសេរី ចោទប្រកាន់ថា «គណបក្ស ប្រជាជនកម្ពុជា ជាអ្នកសម្លាប់លោក កែម ឡី» ។ ដោយសុំប្តឹងដូចខាងក្រោម, ទី១៖ សុំឲ្យតុលាការ ផ្តន្ទាទោសលើឈ្មោះ គឹម សុខ តាមផ្លូវច្បាប់, ទី២៖ ទាមទារឲ្យឈ្មោះ គឹម សុខ សងសំណងជំងឺចិត្តជូនដល់គណបក្សប្រជាជនកម្ពុជា ចំនួន ២០០០លានរៀល៕

តុលាការកំពូលនឹងជម្រះបណ្ដឹងសុំនៅក្រៅឃុំ របស់មន្ត្រីអាដហុក និងគជប

ភ្នំពេញ៖ នៅព្រឹកថ្ងៃទី២៧ ខែកុម្ភៈ ខាងមុខនេះ តុលាការកំពូល នឹងបើកសវនាការលើបណ្តឹងសុំនៅក្រៅឃុំបណ្តោះអាសន្នរបស់ មន្ត្រីសមាគមសិទ្ធិមនុស្សអាដហុក៤រូប និងអគ្គលេខាធិការរងគណៈកម្មាធិការជាតិរៀបចំការបោះឆ្នោតមួយរូប ។ នេះបើតាមការអះអាងរបស់មន្រ្តីតុលាការ។

សវនាការនេះនឹងដឹកនាំដោយលោក ឃឹម ប៉ុណ្ណ អនុប្រធានតុលាការកំពូល និង លោក ច័ន្ទ តារារស្មី ជាតំណាងមហាអយ្យការ ។
គួររំលឹកថា ក្រុមជនត្រូវចោទទាំង៥នាក់ ត្រូវបានលោក ធាម ច័ន្ទពិសិដ្ឋ ចៅក្រមស៊ើបសួរសាលាដំបូងរាជធានីភ្នំពេញ សម្រេចកាលពីល្ងាចថ្ងៃទី២ ខែឧសភា ឆ្នាំ២០១៦ សម្រេចឃុំខ្លួនដាក់ពន្ធនាគារ ដើម្បីរង់ចាំការស៊ើបអង្កេតបន្តទៀត ។

លោក នី សុខា  ប្រធានផ្នែកស៊ើបអង្កេតសមាគមអាដហុក លោក យី សុខសាន្ត អនុប្រធានសមាគមអាដហុក លោក ណៃ រ៉ង់ដា អនុប្រធានសមាគមអាដហុក និង លោកស្រី លឹម មុន្នី មន្ត្រី ជាន់ខ្ពស់សមាគមអាដហុក ត្រូវបានលោកព្រះរាជអាជ្ញារង គុជ គឹមឡុង ចោទពីបទសូកប៉ាន់សាក្សី តាមមាត្រា៥៤៨នៃក្រមព្រហ្មទណ្ឌ ។ ដោយឡែកលោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត ត្រូវបានតុលាការចោទប្រកាន់ពីបទសមគំនិតក្នុងអំពើសូកប៉ាន់សាក្សី តាមមាត្រា២៩ និង មាត្រា ៥៤៨ នៃក្រមព្រហ្មទណ្ឌ ។

ជនសង្ស័យទាំងនេះ ត្រូវបានតុលាការរកឃើញថា បានបញ្ចុះបញ្ចូល ឬ លួងលោម កញ្ញា ខុម ចាន់តារាទី ហៅស្រីមុំ មិនឱ្យនិយាយការពិតដល់សមត្ថកិច្ច ចំពោះរឿងអាស្រូវផ្លូវភេទរបស់លោក កឹម សុខា ប្រធានស្តីទីគណបក្សសង្គ្រោះជាតិ ៕