ព្រឹត្តិការណ៍ ពិធីបញ្ចូលព្រះរាជាណាចក្រកម្ពុជា ជាសមាជិកទី១០ នៃអាស៊ាន ៣០ មេសា ១៩៩៩

លោកឧបនាយករដ្ឋមន្រ្តី ស ខេង៖ មូលហេតុដែលត្រូវតែអនុវត្តវិធានការណ៍រឹតបន្តឹងច្បាប់ចរាចរណ៍គឺដោយសារគ្រោះថ្នាក់ចរាចរណ៍មានការកើនឡើងយ៉ាងគំហ៊ុកក្នុងពេលកន្លងទៅ

លោកឧបនាយករដ្ឋមន្រ្តី ស ខេង រដ្ឋមន្រ្តីក្រសួងមហាផ្ទៃ បានមានប្រសាសន៍ថា ចាប់ពីម៉ោង០០:០០នាទីថ្ងៃទី ០១ ខែឧសភា ឆ្នាំ២០២០នេះតទៅ រាជរដ្ឋាភិបាល នឹងចាប់ផ្តើមរឹតបណ្តឹងការអនុវត្តច្បាប់ចរាចរណ៍ផ្លូវគោកតាមរយៈការធ្វើវិសោធនកម្មអនុក្រឹត្យស្តីពីការផាកពិន័យអន្តរការណ៍ថ្មី ដើម្បីធានាការពារអាយុជីវិត ផលប្រយោជន៍ និងសុវត្ថិភាពសង្គម។ ក្នុងឱកាសអញ្ជើញជាអធិបតីដ៏ខ្ពង់ខ្ពស់ដឹកនាំកិច្ចប្រជុំឆ្លងសេចក្តីណែនាំអំពីរបៀបរបបធ្វើការងាររបស់រដ្ឋលេខាធិការ អនុរដ្ឋលេខាធិការ អគ្គនាយក ចំណុះក្រសួងមហាផ្ទៃ នាព្រឹកថ្ងៃទី៣០ ខែមេសា ឆ្នាំ២០២០ នៅទីស្តីការក្រសួងមហាផ្ទៃ លោក ស ខេង បានមានប្រសាសន៍ថា ចាប់ពីម៉ោង០០៖០០ថ្ងៃទី០១ ខែឧសភា ឆ្នាំ២០២០នេះតទៅ សមត្ថកិច្ចនឹងចាប់ផ្តើមអនុវត្តរឹតបណ្តឹងច្បាប់ចរា​ចរណ៍ផ្លូវគោក ដែលទើបតែធ្វើវិសោធនកម្មថ្មីលើអនុក្រឹត្យស្តីពីការផាកពិន័យអន្តរការណ៍។

ជាងនេះទៀត លោកឧបនាយករដ្ឋមន្រ្តី ស ខេង ក៏បានបញ្ជាក់ថា មូលហេតុដែលត្រូវតែអនុវត្តវិធានការណ៍នេះគឺដោយសារគ្រោះថ្នាក់ចរាចរណ៍មានការកើនឡើងយ៉ាងគំហ៊ុកក្នុងពេលកន្លងទៅ ដែលបានបណ្ដាលឱ្យមានអ្នកស្លាប់ របួស និងពិការជាច្រើនពីមួយឆ្នាំទៅមួយឆ្នាំ។ លោក ស ខេង បានមានប្រសាសន៍ថា «មូលហេតុអីបានជាយើងរឹតបណ្តឹងការអនុវត្តច្បាប់? ហើយក្នុងគោលបំណងអ្វី?…មូលហេតុដូចយើងបានដឹងទាំងអស់ហើយថា គ្រោះថ្នាក់ចរា​ចរណ៍ឆ្នាំ២០១៩ កន្លងទៅនេះ មានការកើនឡើងជាគំហ៊ុក ហើយភាគច្រើនអ្នកប្រើប្រាប់ផ្លូវមិនបានគោរពច្បាប់បានត្រឹមត្រូវនៅឡើយ»។

លោកឧបនាយករដ្ឋមន្រ្តី ស ខេង បានមានប្រសាសន៍បញ្ជាក់ថា ការខាតបង់នៃគ្រោះថ្នាក់ចរាចរណ៍នេះ គឺមានភាពធ្ងន់ធ្ងរណាស់ដែលបណ្តាលឲ្យបាត់បង់អាយុជីវិត បង្កទុក្ខលំបាកដល់ក្រុមគ្រួសារ និងបង្កឱ្យមានកុមារកំព្រានិងការវិនាសព្រាត់ប្រាស់គ្រួសារ ខាតបង់ទ្រព្យសម្បត្តិគ្រួសារ និងទ្រព្យសម្បត្តិសាធារណៈព្រមទាំងបានបន្សល់ជាបន្ទុកដ៏ធ្ងន់ធ្ងរដល់សង្គមជាតិផងដែរ៕

លោកនាយករដ្ឋមន្រ្តី ហ៊ុន សែន ក្រើនរំលឹកថាត្រូវតែមានឯកសារចាំបាច់បំផុតគ្រប់ពេលវេលានៃការបើកបរ

លោកនាយករដ្ឋមន្រ្តី ហ៊ុន សែន បានថ្លែងថា ឯកសារចាំបាច់បំផុតត្រូវមានក្នុងពេលបើកបរ ដែ​លមិនអាចអត់បាន គឺឆៀក រថយន្ដ និងបណ្ណបើកបរជាដើម។ នៅក្នុងបណ្តាញសង្កមហ្វេសប៊ុករបស់លោក ហ៊ុន សែន នារសៀលថ្ងៃទី៣០ ខែមេសា ឆ្នាំ២០២០ បានឲ្យដឹងថា ក្នុងពេ​លសមត្ថកិច្ចកំពុងរឹតបន្តឹងសុវត្ថិភាពចរាចរណ៍ផ្លូវគោក ប្រជាពលរដ្ឋ និងក្មួយៗត្រូវយកចិត្តទុកដាក់ពិនិត្យរថយន្តរបស់ខ្លួនថា តើដល់ថ្ងៃឆៀកហើយឬនៅបើដល់ហើយត្រូវយកទៅឆៀកឲ្យបានទាន់ពេលចៀសវាងការផាកពិន័យក្នុងពេលបើកបរ។

លោកនាយករដ្ឋមន្រ្តី ហ៊ុន សែន បានបន្ដថា ព្រោះតម្រូវការឆៀកនេះដើម្បីធានាសុវត្ថិភាពរថយន្តក្នុងពេលបើកបរ ដោយមិនបង្កគ្រោះថ្នាក់ផ្សេងៗនិងបង្កការបំពុលបរិស្ថានជាដើម។ លោ​ក​បានបន្ថែមថា «ទន្ទឹមនឹងនេះដែរ បងប្អូនត្រូវមានប័ណ្ណបើកបរជាប់នឹងខ្លួនគ្រប់ពេលក្នុងពេ​ល​បើកបរ។ ប្រសិនបើប័ណ្ណបើកបរផុតកំណត់គឺត្រូវបន្តសុពលភាពឡើងវិញ»។

លោកនាយករដ្ឋមន្រ្តី ហ៊ុន សែន បានបញ្ជាក់ថា ហាមដាច់ខាតបញ្ជាយានយន្តនៅលើដងផ្លូវដោយគ្មានប័ណ្ណ ឬប័ណ្ណបើកបរផុតកំណត់ដោយមិនបានបន្តឲ្យបានត្រឹមត្រូវតាមច្បាប់ដែលអាចប្រឈមនឹងការផាកពិន័យធ្ងន់ធ្ងរ។ បន្ថែមពីនេះ លោក ក៏បានជូនពរប្រជាពលរដ្ឋខ្មែរ មា​នសុវត្ថិភាពក្នុងការបើកបរនៅទូទាំងប្រទេស ហើយគោរពច្បាប់ចរាចរណ៍ទាំងអស់គ្នា៕

ក្រសួងសាធារណការ បង្ហាញលេខទូរស័ព្ទ សម្រាប់ពលរដ្ឋរាយការណ៍ពីភាពមិនប្រក្រតី នៃការយកសេវាសាធារណៈ, ទីតាំងឆៀករថយន្តមាន ១៤កន្លែង ក្នុងរាជធានី-ខេត្តចំនួន១០

មន្រ្តីជាន់ខ្ពស់ក្រសួងសាធារណការ និងដឹកជញ្ជូន បានបង្ហាញលេខទូរស័ព្ទចំនួន ៣ខ្សែ ជូនដល់ប្រជាពលរដ្ឋទាំងអស់ ដែលអាចរាយការណ៍ពីភាពមិនប្រក្រតីរបស់មន្រ្តី លើការយកសេវា សាធារណៈ ជាពិសេសនៅក្នុងរយៈពេលចុងក្រោយនេះ មានប្រជាពលរដ្ឋបានសម្រុកយករថយន្តរបស់ខ្លួនទៅឆៀក ធ្វើស្លាកលេខ និងជាពិសេសនោះគឺទៅធ្វើបណ្ណបើកបរ ឬទៅសុំសុពលភាព បណ្ណបើកបរឡើងវិញ។

សម្រាប់កន្លែងឆៀករថយន្តនៅក្របខណ្ឌទូទាំងប្រទេសមានចំនួន ១៤កន្លែង ក្នុងរាជធានីភ្នំពេញ-ខេត្តចំនួន១០ អមដោយរថយន្តឆៀកចល័ត ៣ក្រុមផងដែរ។

ថ្លែងនៅរសៀលថ្ងៃទី៣០ ខែមេសា ឆ្នាំ២០២០នេះ លោក គង់ វិមាន នាយកខុទ្ទកាល័យ និងជាអ្នកនាំពាក្យក្រសួងសាធារណការ និងដឹកជញ្ជូន បានបញ្ជាក់ថា «ខ្ញុំសូមជម្រាបជូនព័ត៌មានពាក់ព័ន្ធមណ្ឌលត្រួតពិនិត្យលក្ខណៈបច្ចេកទេសយានយន្ត នៅទូទាំងព្រះរាជាណាចក្រកម្ពុជារូមមាន៖ រាជធានីភ្នំពេញមាន ៥ទីតាំង (នៅផ្លូវ៥៩៨-ផ្លូវជាសុផារ៉ា, នៅបឹងបៃតងផ្លូវឧកញ៉ា ម៉ុង រិទ្ធី, នៅចំការដូង, នៅផ្លូវជាតិ៦អា និងនៅបឹងស្នោ) និងតាមបណ្តាខេត្តមាន ៩ទីតំាង គឺមានខេត្ត ព្រះវិហារ, រតនគីរី, ក្រចេះ, សៀមរាប, បាត់ដំបង, កំពង់ស្ពឺ, ព្រះសីហនុ, កំពង់ចាម និងកំពង់ឆ្នាំង និងរថយន្តឆៀកចល័ត ៣ក្រុមផងដែរ»។

បើតាមលោក គង់ វិមាន សម្រាប់ការសាកសួរព័ត៌មាន និងការផ្តល់យោបល់ពីភាពមិនប្រក្រតីនៃការយកសេវាសាធារណៈ របស់ក្រសួងសាធារណការ និងដឹកជញ្ជូន សូមទំនាក់ទំនងតាមលេខទូរស័ព្ទ៖ 085 92 90 90, 015 92 90 90, 067 92 90 90 ៕

ប្រជាពលរដ្ឋងាយរងគ្រោះចំនួន ១៣គ្រួសារ ទទួលអំណោយមនុស្សធម៌ពីលោកស្រី ដោក សុទ្ធា ទីប្រឹក្សារាជរដ្ឋាភិបាល ព្រមទាំងព្រះសង្ឃ និងសប្បុរសជន

កំពង់ឆ្នាំង៖ លោកស្រី ដោក សុទ្ធា ទីប្រឹក្សារាជរដ្ឋាភិបាល នៅថ្ងៃទី២៩ ខែមេសា ឆ្នាំ២០២០ បាននាំយកអំណោយរបស់សប្បុរសជន តាមរយៈការអំពាវនាវរបស់ព្រះគ្រូឆន្ទរតនមុនី សរ បញ្ញាឫទ្ធិ ដើម្បីចែកជូនប្រជាពលរដ្ឋ លោកតា លោកយាយ ងាយរងគ្រោះ ចំនួន១៣គ្រួសារ និងចុះផ្សព្វផ្សាយអប់រំដល់ប្រជាពលរដ្ឋ និងតាមខ្នងផ្ទះ អំពីវិធានការបង្ការ និងកាត់បន្ថយហានិភ័យនៃជំងឺឆ្លងបង្ករដោយជំងឺកូវីដ១៩។

ចំពោះអំណោយដែលនាំយកទៅចែកជូនប្រជាពលរដ្ឋ លោកតា លោកយាយ ចំនួន ១៣គ្រួសារ ដែលមកពីភូមិចំនួន២ ស្ថិតក្នុងឃុំអណ្តូងស្នាយ ស្រុករលាប្អៀរ ខេត្តកំពង់ឆ្នាំង ដែលក្នុង១គ្រួសារទទួលបាន៖ អង្ករ ២០គីឡូក្រាម, មី ១កេះ, ត្រីខ ១យួរ, ជែលលាងដៃ ១ដប, មុង១, ក្រម៉ា១, សាប៊ូ ១ដុំ និងថវិកា ២០០០០រៀល ដោយឡែក ៣គ្រួសារទៀតទទួលបាន ប្រឡុង១ ជែលលាងដៃ១ដប និងថវិកា ២០០០០រៀល។

ក្នុងនាមព្រះគ្រូឆន្ទរតនមុនី សរ បញ្ញាឫទ្ធិ សូមធ្វើការជូនបុណ្យ និងជូនពរសប្បុរសជនទាំងអស់ អោយជួបប្រទះនូវសេចក្ដីសុខ ចម្រើន មានលាភជ័យ ប៉ងប្រាថ្នាអ្វី គិតអ្វី សូមអោយសម្រេចគ្រប់ភារកិច្ច សូមវត្ថុស័ក្តិសិទ្ធដែលថែរក្សាក្នុងព្រះរាជាណាចក្រកម្ពុជា តាមឃុំគ្រប់បីបាច់ថែរក្សា ចូលកើតកើនចម្រើនមានដល់សម្បុរជនក្នុង និងក្រៅប្រទេសទាំងអស់ តរៀងទៅ សូមអោយជួបនូវជួបពុទ្ធពរទាំងឡាយ៤ប្រការគីៈ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ៕

អាជ្ញាធរខេត្តសៀមរាប ជំរុញអាជ្ញាធរ មូលដ្ឋានបន្តរួមគ្នាអនុវត្តវិធានការទប់ស្កាត់រលកទី២នៃការរាតត្បាតជម្ងឺកូវីដ១៩ ទៅក្នុងសហគមន៍

សៀមរាប៖ នៅក្នុងកិច្ចប្រជុំស្តីពីវឌ្ឍនភាពនៃការគ្រប់គ្រងវិបត្តិកូវីដ-១៩ ដែលបានធ្វើឡើងនានៅថ្ងៃទី២៩ ខែមេសា ឆ្នាំ២០២០ លោក ពិន ប្រាកដ អភិបាលរងខេត្ត តំណាងលោក ទៀ សីហា អភិបាលនៃគណៈអភិបាលខេត្តសៀមរាប បានដឹកនាំកិច្ចប្រជុំស្តីពីវឌ្ឍភាពស្ថានភាពទូទៅនៃវិធានការការពារ ការបង្ការទប់ស្តាត់ នៃជំងឺកូវីដ១៩ នៅក្នុងខេត្តសៀមរាប ដោយមានការអញ្ជើញចូលរួមពីសំណាក់ លោកប្រធានសហភាពសហព័ន្ធយុវជនកម្ពុជាខេត្តសៀមរាប អភិបាល នៃគណៈអភិបាលក្រុង/ស្រុក និងលោក លោកស្រីប្រធានមន្ទីរដែរពាក់ព័ន្ធទាំងអស់។

លោកស្រី ម៉ននី រង្សី អភិបាលស្រុកក្រឡាញ់ បានបង្ហាញរបាយការណ៏ស្តីអំពីករណីប្រឈម ដែលទើបនឹងកើតឡើងថ្មីៗនេះថាមានជនខិលខូចមួយចំនួនតូចជាមេខ្យល់ បានអូសទាញឲ្យប្រជាពលរដ្ឋខ្មែរ ដែលបានវិលត្រឡប់មកពីក្រៅប្រទេស ឲ្យវិលត្រឡប់ទៅធ្វើការនៅក្រៅប្រទេសវិញ ។ ប៉ុន្មានថ្ងៃមុននេះ មានប្រជាពលរដ្ឋស្រុកក្រឡាញ់មួយចំនួន បានចាញ់ឧបាយកលនៃការអូសទាញនេះ រួចទៅហើយធ្វើឲ្យប្រជាពលរដ្ឋទាំងនោះខាតបង់លុយកាក់និងពេលវេលាឆ្លងកាត់ការធ្វើចត្តាឡីស័កដាក់ខ្លួននៅដាច់ដោយឡែក១៤ថ្ងៃជាថ្មីម្តងទៀតផងដែរ ។ លោកស្រីបញ្ជាក់ថា ករណីនេះ អាជ្ញាធរស្រុកបានចាត់វិធានការដោយមានសហការជាមួយកម្លាំងសមត្ថកិច្ចធ្វើការស្រាវជ្រាវរកក្រុមឆបោកនោះផងដែរ។

យ៉ាងណាក៏ដោយ លោក ពិន ប្រាកដ អភិបាលរងខេត្តសៀមរាប បានថ្លែងនូវការលើកទឹកចិត្តដល់បណ្តាថ្នាក់ដឹកនាំមូលដ្ឋានគ្រប់លំដាប់ថ្នាក់ រួមទាំងមន្រ្តីជំនាញពាក់ព័ន្ធ ដែលបានលះបង់គ្រប់បែបយ៉ាង ជំនះរាល់លំបាកទាំងឡាយដើម្បីសុខភាពនិងអាយុជីវិតប្រជាពលរដ្ឋ ។ លោកបានបញ្ជាក់ថា បើទោះជារលកទី១នៃការនាំចម្លងចូលត្រូវបានកាត់ផ្តាច់ ក៏ប៉ុន្តែយើងត្រូវបង្កើនការទប់ស្កាត់រលកទី២ នៃការឆ្លងជម្ងឺកូវីដ-១៩ទៅក្នុងសហគមន៍ គឺជាកង្វល់ដ៏ធំរបស់ប្រមុខរាជរដ្ឋាភិបាល ដែលតម្រូវឲ្យមានការចូលរួមទាំងអស់គ្នា អនុវត្តតាមការណែនាំរបស់ក្រសួងសុខាភិបាល ក្នុងខណៈពេលដែលកំពុងមានលំហូរចូលនៃប្រជាពលរដ្ឋខ្មែរមកពីក្រៅប្រទេសវិញនោះ ។

ក្នុងកិច្ចប្រជុំនោះ បើទោះជាមានការលើកឡើង ស្តីអំពីបទពិសោធន៍ជាក់ស្តែងផ្សេងៗគ្នា ទៅតាមលទ្ធភាពរបស់បណ្តាស្រុកនានានោះក៏ដោយ ក៏ប៉ុន្តែលទ្ធផលជារួម បានទទួលស្គាល់ថា គិតត្រឹមថ្ងៃទី២៨ខែមេសានេះ ប្រជាពលរដ្ឋខ្មែរចំណូលស្រុកមកពីក្រៅប្រទេសវិញប្រមាណជាង១ម៉ឺននាក់ ក្រោយពីការយកចិត្តទុកដាក់ធ្វើចត្តាឡីស័ក និងដាក់ឲ្យនៅដោយឡែ១៤ថ្ងៃ មន្រ្តីជំនាញពុំបានរកឃើញករណីវិជ្ជមានជម្ងឺកូវីដ-១៩ នៅក្នុងចំណោមប្រជាពលរដ្ឋទាំងនោះឡើយ ៕

លោកស្រី ម៉ែន សំអន អញ្ជើញចែកអំណោយនិងសំណេះសំណាលជាមួយប្រជាពលរដ្ឋចំនួន៥៦គ្រួសារ នៅឃុំសង្កែ

ស្វាយរៀង៖ នាព្រឹកថ្ងៃទី៣០ ខែមេសា ឆ្នាំ២០២០ លោកស្រី ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានអញ្ជើញជាធិបតីក្នុងពិធីចែកអំណោយមនុស្សធម៌របស់លោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជានិងសំណេះសំណាលជាមួយប្រជាពលរដ្ឋចំនួន៥៦គ្រួសារ នៅឃុំសង្កែ ស្រុករំដួល ខេត្តស្វាយរៀង។

ថ្លែងក្នុងឱកាសនោះលោកស្រី ម៉ែន សំអន ក៏បានមានប្រសាសន៍ផ្ដាំផ្ញើសួរសុខទុក្ខ និងសេចក្ដីនឹករលឹកពីសំណាក់លោក ហ៊ុន សែន នាយករដ្ឋមន្រ្តី និងភរិយា លោក សាយ ឈុំ ប្រធានព្រឹទ្ធសភា និងលោក ហេង សំរិន ប្រធានរដ្ឋសភា ជូនដល់បងប្អូនប្រជាពលរដ្ឋទាំង ដោយក្តីនឹករលឹក ដែលជានិច្ចកាលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ ការចែកជូនអំណោយនាថ្ងៃនេះក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានលោកស្រី ប៊ុន រ៉ានី ហ៊ុនសែន ជាប្រធានដូចដែលបានលើកឡើងថា «កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នាមិនទុកនរណាម្នាក់ចោល» និង«ទីណាមានទុក្ខលំបាកទីនោះមានកាកបាទក្រហមកម្ពុជា»។

លោកស្រី ម៉ែន សំអន ក៏បានអំពាវនាវឲ្យប្រជាពលរដ្ឋទាំងអស់ត្រូវ៖
ទី១- ប្រុងប្រយ័ត្នឲ្យបានខ្ពស់គ្រប់ៗក្រុមគ្រួសារ ក្នុងការចូលរួមទប់ស្កាត់នូវការឆ្លងរីករាលដាលនៃជម្ងឺកូវីដ១៩។ ជាពិសេសមិនត្រូវភ្លេចខ្លួននោះទេ បើទោះបីជាប្រទេសកម្ពុជាមានអ្នកឆ្លងនៅមានមក្រិតតិចក្រោមការអនុវត្តតាមការណែនាំរបស់ក្រសួងសុខាភិបាល និងសារាចរណែនាំ និងវិធានការណ៍ជាច្រើនរបស់សម្តេចតេជោនាយករដ្ឋមន្រ្តី។ ស្របពេលដែលកម្ពុជាមកដល់ថ្ងៃនេះ អ្នកឆ្លងមានចំនួន ១២២នាក់ អ្នកជាសះស្បើយមានចំនួន ១១៩នាក់ និងពុំមានអ្នកស្លាប់នោះទេ។

ទី២- យើងទាំងអស់គ្នាត្រូវជម្រុញការងារកសិកម្មក្នុងការដាំដុះ ចិញ្ចឹមសត្វនៅក្នុងមូលដ្ឋាន ជាពិសេសត្រូវរក្សាទុក្ខនូវស្បៀងអាហារដូចជា អង្ករ អំបិល ប្រហុក ត្រី សាច់ ។ល។ ប្រសិនបើជំងឺកូវីដ១៩នេះនៅតែអូសបន្លាយ។

ទី៣- ត្រូវចូលរួមទាំងអស់គ្នាក្នុងការគោរពច្បាប់ចរាចរណ៍ផ្លូវគោគដើម្បីកាត់បន្ថយនូវគ្រោះថ្នាក់និងការបាត់បង់អាយុជីវិតនៅលើដងវិថីផងដែរ។

អំណោយរបស់លោកស្រី ប៊ុន រ៉ានី ដែលបានចែកជូនទាំង ៥៤ គ្រួសារ នាពេលនេះរួមមាន៖ ចាស់ជរា ២១ គ្រួសារ ជនពិការ ៣ គ្រួសារ និងទីទ័លក្រ ៣០ គ្រួសារ មកពី ៤ឃុំ នៃស្រុករំដួល ក្នុង ១គ្រួសារទទួលបាន អង្ករ ២៥ គ.ក្រ មី ១ កេស ត្រីខ ១០ កំប៉ុង សាប៊ូ ២ ដុំ ក្រម៉ា ១ ថវិកាធ្វើដំណើរ៤ម៉ឺនរៀល៕

រដ្ឋមន្ត្រីការពារជាតិ កោតសរសើរថ្នាក់ដឹកនាំ និងកងទ័ព ដែលចូលរួមទាំងកម្លាំងកាយចិត្ត និងថវិកាផ្ទាល់ខ្លួន គាំទ្ររាជរដ្ឋាភិបាលប្រយុទ្ធនឹងជំងឺ COVID-19

លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីការពារជាតិ បានថ្លែងកោតសរសើរដល់ថ្នាក់ដឹកនាំ និងកងទ័ពទាំងអស់ ដែលបានចូលរួមចំណែកអស់កម្លាំងកាយចិត្ត ព្រមទាំងថវិកាផ្ទាល់ខ្លួន គាំទ្រដល់រាជរដ្ឋាភិបាល ដឹកនាំដោយលោកនាយករដ្ឋមន្រ្ដី ហ៊ុន សែន ក្នុងការប្រយុទ្ធប្រឆាំងជាមួយនឹងការរីករាលដាលនៃជំងឺ COVID-19។

ការថ្លែងអំណរគុណបែបនេះ របស់លោកឧបនាយករដ្ឋមន្ត្រី ទៀ បាញ់ បានធ្វើឡើងបន្ទាប់ពីមន្ត្រីរាជការ គ្រប់ជាន់ថ្នាក់ បានប្រកាសចូលរួមបរិច្ចាគថវិកា និងប្រាក់បៀវត្សប្រចាំរបស់ខ្លួន តាមការអំពាវនាវរបស់ លោកនាយករដ្ឋមន្រ្ដី ហ៊ុន សែន ដើម្បីយកទៅប្រើប្រាស់ក្នុងយុទ្ធនាការប្រយុទ្ធប្រឆាំងនឹងជំងឺ COVID-19។

តាមរយៈទំព័រ Facebook ផ្លូវការនៅថ្ងៃទី៣០ ខែមេសា ឆ្នាំ២០២០នេះ រដ្ឋមន្ត្រីការពារជាតិកម្ពុជារូបនេះ បានថ្លែងយ៉ាងដូច្នេះថា៖ «សូមកោតសរសើរដល់ថ្នាក់ដឹកនាំ និងបងប្អូនកងទ័ពទាំងអស់ ដែលបានចូលរួមចំណែកអស់កម្លាំងកាយចិត្ត ព្រមទាំងថវិកាផ្ទាល់ខ្លួន គាំទ្រដល់រាជរដ្ឋាភិបាល ដឹកនាំដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការប្រយុទ្ធប្រឆាំងជាមួយមេរោគ COVID-19» ៕

ព្រឹកថ្ងៃនេះក្រសួងសុខាភិបាលបន្តប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ

(ភ្នំពេញ)៖ នៅថ្ងៃទី៣០ ខែមេសា ឆ្នាំ២០២០នេះក្រសួងសុខាភិបាល បានបន្តចេញប្រកាសថា មិនមានករណីឆ្លងជំងឺកូវីដ១៩ ហើយក៏ពុំមានករណីជាសះស្បើយដែរ ខណៈអ្នកជំងឺកូវីដ១៩ បានជាសះស្បើយសរុបចំនួន១១៩នាក់។

ចំណែកអ្នកកំពុងសម្រាកព្យាបាលជំងឺកូវីដ នៅសល់តែ៣នាក់ប៉ុណ្ណោះ នៃអ្នកឆ្លងសរុប១២២នាក់។ បើគិតត្រឹមព្រឹកថ្ងៃទី៣០ ខែមេសា ឆ្នាំ២០២០នេះ។

«ច្បាប់គ្រប់គ្រងប្រទេសជាតិ ស្ថិតក្នុងភាពអាសន្ន» ត្រូវបានប្រកាសដាក់ឱ្យប្រើប្រាស់ហើយ

ទីបំផុតទៅ «ច្បាប់គ្រប់គ្រងប្រទេសជាតិ ស្ថិតក្នុងភាពអាសន្ន» ដែលជាច្បាប់ថ្មីសន្លាងនៅក្នុងប្រទេស​កម្ពុជា ត្រូវបានប្រកាសដាក់ឱ្យប្រើប្រាស់ជាផ្លូវការហើយ នៅថ្ងៃទី២៩ ខែមេសា ឆ្នាំ​២០២០​នេះ។ ច្បាប់ស្តីពី «ការគ្រប់គ្រងប្រទេសជាតិស្ថិតក្នុងភាពអាសន្ន» ត្រូវបានចុះហត្ថលេខាដាក់ឱ្យប្រើប្រាស់ដោយប្រមុខរដ្ឋស្តីទី លោក សាយ ឈុំ។

រាជរដ្ឋាភិបាលកម្ពុជាដឹកនាំដោយលោក​នាយករដ្ឋ​មន្ត្រី​ ហ៊ុន សែន កាលពីខែមេសា ឆ្នាំ២០២០កន្លងទៅនេះ បានចាប់ផ្តើមរៀបចំ និងតាក់តែងឡើងនូវច្បាប់ស្តីពី «ការគ្រប់គ្រងប្រទេសជាតិស្ថិតក្នុងភាពអាសន្ន» ចំពេលប្រទេសកម្ពុជារងការរាតត្បាតនៃជំងឺកូវីដ១៩។ ច្បាប់នេះត្រូវបានរៀបចំឡើងក្នុងល្បឿនមួយយ៉ាងលឿន ហើយត្រូវបានរដ្ឋសភា ព្រឹទ្ធសភា និងក្រុមប្រឹក្សាធម្មនុញ្ញអនុម័តជាបន្តបន្ទាប់​ត្រឹមរយៈពេលតែមួយខែប៉ុណ្ណោះ។

លោកនាយករដ្ឋមន្ត្រី​ ធ្លាប់បានគូសបញ្ជាក់ថា ច្បាប់នេះគឺជាឧបករណ៍ផ្នែកច្បាប់ដ៏មានសារៈសំខាន់សម្រាប់កម្ពុជា ក្នុងការគ្រប់គ្រងប្រទេសនៅពេលមានគ្រោះអាសន្នផ្សេងៗ ខណៈបច្ចុប្បន្នកម្ពុជាមិនទាន់មានច្បាប់សម្រាប់ការគ្រប់គ្រងប្រទេសពេលមានអាសន្ននៅឡើយ។

រាជរដ្ឋាភិបាលកម្ពុជា ធ្លាប់បានអះអាងថា ច្បាប់ស្តីពីការគ្រងប្រទេសជាតិស្ថិតក្នុងភាពអាសន្ន ត្រូវបានរៀបចំឡើងដោយផ្អែកតាមស្មារតីនៃមាត្រា ២២ថ្មី នៃរដ្ឋធម្មនុញ្ញរបស់កម្ពុជា ដែលចែងថា «នៅ​ពេលប្រជាជាតិប្រឈមមុខនឹងគ្រោះថ្នាក់ ព្រះមហាក្សត្រទ្រង់ប្រកាសប្រទានដំណឹងជាសាធា​រណៈ ដាក់ប្រទេសជាតិស្ថិតក្នុងភាពអាសន្ន ក្រោយពីបានមតិឯកភាពពីនាយករដ្ឋមន្ត្រី ប្រធានរដ្ឋសភា និងប្រធានព្រឹទ្ធសភា»។

ច្បាប់ថ្មីនេះ ក៏ផ្តល់ជាមូលដ្ឋានគតិយុត្ត ដើម្បីធានាដល់ការអនុវត្តមាត្រា ២២ថ្មី នៃរដ្ឋធម្មនុញ្ញ និងជាមូលដ្ឋានគតិយុត្តកំណត់សិទ្ធិអំណាចរបស់រាជរដ្ឋាភិបាល ក្នុងការដាក់ចេញនូវវិធានការចាំបាច់ដែលមិនអាចខ្វះបាន ដើម្បីឆ្លើយតបទៅនឹងស្ថានភាពរបស់ប្រទេសក្នុងភាពអាសន្ន សំដៅការពារសន្តិសុខសណ្តាប់ធ្នាប់សាធារណៈ ការពារអាយុជីវិត និងសុខភាពរបស់ប្រជាពលរដ្ឋ ព្រមទាំងការពាំរទ្រព្យសម្បត្តិ និងបរិស្ថាន។

ច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន ក៏កំណត់នូវបែបបទ នីតិវិធី និងលក្ខខណ្ឌនៃការប្រកាសដាក់ប្រទេសជាតិស្ថិតក្នុងភាពអាសន្ន ព្រមទាំងវិធានការចាំបាច់នានា ដែលរាជរដ្ឋាភិបាលមានសិទ្ធិដាក់ចេញក្នុងពេលប្រទេសជាតិស្ថិតក្នុងភាពអាសន្ន។

ច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន បានបញ្ជាក់ថា ការដាក់ប្រទេសជាតិក្នុងភាពអាសន្ន អាចធ្វើឡើងនៅពេលប្រជាជាតិប្រឈមមុខ នឹងគ្រោះថ្នាក់ជាអាទិ៍, គ្រោះថ្នាក់ដែលបង្កឡើងដោយសង្គ្រាម ឬការឈ្លានពានពីកម្លាំងបរទេស, គ្រោះអាសន្នបន្ទាន់ចំពោះសុខភាពសាធារណៈបណ្តាលមកពីការឆ្លងរាលដាលនៃជំងឺ, ភាពវឹកវរធ្ងន់ធ្ងរដល់សន្តិសុខជាតិ និងសណ្តាប់​ធ្នាប់​សាធា​រណៈ ព្រមទាំងគ្រោះមហន្តរាយធ្ងន់ធ្ងរ ដែលគំរាមកំហែង ឬអាចបង្កគ្រោះថ្នាក់រីករាលដាលដល់​កម្រិត​ទូទាំងប្រទេស។

ច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន មានចំនួន ៥ជំពូក និងចែកចេញ ១២​មាត្រា។ មាត្រា៤ ជំពូកទី៣ បានកំណត់ថា នៅពេលប្រទេសជាតិ ត្រូវបានប្រកាសដាក់ស្ថិតនៅក្នុងភាពអាសន្ន រាជរដ្ឋាភិបាលមានសិទ្ធិដាក់ចេញវិធានដូចខាងក្រោម៖
១៖ ហាមឃាត់ ឬ កម្រិតសិទ្ធិសេរីភាពក្នុងការធ្វើដំណើរ។
២៖ ហាមឃាត់ ឬ កម្រិតសិទ្ធិសេរីភាពក្នុងការជួបជុំ ឬការប្រមូលផ្តុំមនុស្ស។
៣៖ ហាមឃាត់ ឬ កម្រិតការធ្វើសកម្មភាពការងារ ឬមុខរបរ។
៤៖ ហាមឃាត់ ឬ កម្រិតមិនឱ្យបុគ្គលចេញពីលំនៅឋាន ឬ ទីសំណាក់ណាមួយ។
៥៖ ដាក់ចេញវិធានការចត្តាឡីស័ក ឬ ការដាក់ឱ្យនៅដោយឡែកក្នុងករណីគ្រោះអាសន្នបន្ទាន់ ចំពោះសុខភាពសាធារណៈបណ្តាលមកពីការឆ្លងរាលដាលនៃជំងឺ។
៦៖ ដាក់ចេញវិធានការទាក់ទងនឹងកំណែន និងជម្លៀសពលរដ្ឋ ដើម្បីឆ្លើយតបចំពោះភាពអាសន្ន។
៧៖ ដាក់ចេញវិធានការទាក់ទងនឹងកំណែន ដកហូត គ្រប់គ្រង និងចាត់ចែងទ្រព្យសម្បត្តិ និងសេវា ដែលមានភាពចាំបាច់ ដើម្បីឆ្លើយតបចំពោះភាពអាសន្ន។ នីតិវិធីនៃការធ្វើកំណែន និងសំណងត្រូវកំណត់ដោយរាជរដ្ឋាភិបាល។
៨៖ ដាក់ចេញវិធានការទាក់ទងនឹងការបិទទីតាំងសាធារណៈ ឬឯកជនណាមួយ ដែលមានភាពចាំបាច់ ដើម្បីឆ្លើយតបចំពោះភាពអាសន្ន។
៩៖ ដាក់ចេញវិធានការទាក់ទងនឹងការបិទទីតាំងសាធារណៈ ឬឯកជនណាមួយ ដែលមានភាពចាំបាច់ ដើម្បីឆ្លើយតបចំពោះភាពអាសន្ន។
១០៖ ដាក់ចេញនូវវិធានការឃ្លាំមើល និងតាមដានគ្រប់មធ្យោបាយ ដើម្បីទទួលបានព័ត៌មានតាមរយៈប្រព័ន្ធទំនាក់ទំនងទូរគមនាគមន៍គ្រប់រូបភាព ក្នុងគោលបំណងឆ្លើយតបចំពោះភាពអាសន្ន។
១១៖ ហាមឃាត់ ឬ ការកម្រិតការចែកចាយ ឬ ការផ្សព្វផ្សាយព័ត៌មានដែលអាចបង្កឱ្យមានការភ័យខ្លាចដល់សាធារណជន ឬ ចលាចល ឬ ដែលនាំឱ្យខូចខាតដល់សន្តិសុខជាតិ ឬ ធ្វើឱ្យមានការភាន់ច្រឡំអំពីស្ថានភាពនៃភាពអាសន្ន។
១២៖ ដាក់ចេញវិធានការដទៃទៀតដែលសមស្រប និងចាំបាច់ ដើម្បីឆ្លើយតបចំពោះភាពអាសន្ន។ ក្នុងមាត្រានេះ បានចែងទៀតថា វិធានការអនុវត្តពេលប្រទេសជាតិស្ថិតក្នុងភាពអាសន្ន អាចត្រូវបានដាក់ចេញសម្រាប់ទូទាំងប្រទេស ឬ ដែនដីកំណត់ជាក់លាក់ណាមួយ។ ក្នុងករណីចាំបាច់ រាជរដ្ឋា​ភិបាល​អាចបង្កើតយន្តការ ឬប្រគល់សិទ្ធិអំណាចទៅអាជ្ញាធរមានសមត្ថកិច្ចណាមួយ ឬប្រើប្រាស់​កងកម្លាំង​ប្រដាប់អាវុធ ដើម្បីធានាដល់ការអនុវត្តវិធានការខាងលើ។

ក្នុងពេលសង្គ្រាម ឬ ក្នុងកាលៈទេសដទៃទៀតដែលសន្តិសុខជាតិប្រឈមនឹងគ្រោះថ្នាក់ធ្ងន់ធ្ងរ ការគ្រប់គ្រងប្រទេសជាតិស្ថិតក្នុងភាពអាសន្នអាចធ្វើឡើងតាមរបបអាជ្ញាសឹក។

នៅក្នុងមាត្រា៧ ក្នុងជំពូកទី៤ និយាយពីទោសប្បញ្ញត្តិ បានចែងថា អំពើដោយចេតនារារាំង ឬ បង្កឧបសគ្គដល់កិច្ចប្រតិបត្តិការឆ្លើយតបចំពោះភាពអាសន្ន ត្រូវផ្តន្ទាទោសដាក់ពន្ធនាគារពី ១ឆ្នាំ ដល់​ទៅ ៥ឆ្នាំ និងពិន័យជាប្រាក់ពី ១លានរៀល ដល់ ៥លានរៀល។ ចំពោះអំពើរារាំងដល់កិច្ចប្រតិបត្តិការពេលប្រទេសជាតិស្ថិតក្នុងភាពអាសន្ន ត្រូវផ្តន្ទាទោសដាក់ពន្ធនាគារពី ៥ឆ្នាំ ទៅ ១០ឆ្នាំ កាលបើអំពើនេះ នាំឱ្យមានចលាចលជាសាធារណៈ ឬប៉ះពាល់ដល់សន្តិសុខជាតិ។

ក្នុងមាត្រា៨ នៃជំពូកដដែល បានចែងថា អំពើដោយចេតនាមិនគោរពវិធានការដាក់ចេញដោយរាជរដ្ឋាភិបាលដែលមានចែងក្នុងមាត្រា៥ ត្រូវផ្តន្ទាទោសដាក់ពន្ធនាគារពី១ខែ ទៅ១ឆ្នាំ និងពិន័យជាប្រាក់​ពី ១០ម៉ឺនរៀល ដល់ ១លានរៀល។ ដោយឡែកអំពើមិនគោរពតាមវិធានការពេលប្រទេសជាតិស្ថិតក្នុងភាពអាសន្ន ត្រូវផ្តន្ទាទោសដាក់ពន្ធនាគារពី ១ឆ្នាំ ទៅ៥ឆ្នាំ និងពិន័យជាប្រាក់ពី ១លានរៀល ទៅ ៥លានរៀល កាលបើអំពើនេះនាំឱ្យមានចលាចលជាសាធារណៈ។

ដោយឡែកនីតិបុគ្គលដែលមានចេតនារារាំង ឬ បង្កឧបសគ្គដល់កិច្ចប្រតិបត្តិការឆ្លើយតបចំពោះភាពអាសន្ន ត្រូវទទួលខុសត្រូវព្រហ្មទណ្ឌដូចមានចែងក្នុងមាត្រា៤២ (ការទទួលខុសត្រូវព្រហ្មទណ្ឌនីតិបុគ្គល) នៃក្រមព្រហ្មទណ្ឌ ដោយត្រូវផន្ទាទោសពិន័យជាប្រាក់ពី ១០០លានរៀល ដល់ ១,០០០​លានរៀល ព្រមទាំងទោសបន្ថែមមួយ ឬ ច្រើនដូចមានចែងក្នុងមាត្រា១៦៨ (ទោសបន្ថែមអនុវត្តចំពោះនីតិបុគ្គល) នៃក្រមព្រហ្មទណ្ឌ។

រីឯនីតិបុគ្គលដែលប្រព្រឹត្តអំពើដោយចេតនាមិនគោរពវិធានការដាក់ចេញដោយរាជរដ្ឋាភិបាលដែលមានចែងក្នុងមាត្រា៥ ត្រូវទទួលខុសត្រូវព្រហ្មទណ្ឌដូចមានចែងក្នុងមាត្រា៤២ (ការទទួលខុសត្រូវព្រហ្មទណ្ឌរបស់នីតិបុគ្គល) នៃក្រមព្រហ្មទណ្ឌ ដោយត្រូវផ្តន្ទាទោសពិន័យជាប្រាក់ពី ៥០លានរៀល ដល់ ៥០០លានរៀល ព្រមទាំងទោសបន្ថែមមួយ ឬច្រើន ដូចមានចែងក្នុងមាត្រា១៦៨ (ទោសបន្ថែមអនុវត្តចំពោះនីតិបុគ្គល) នៃក្រមព្រហ្មទណ្ណ។

ច្បាប់នេះ ក៏បាននិយាយពីការទទួលខុសត្រូវរបស់អាជ្ញាធរមានសមត្ថកិច្ច ពេលប្រទេសត្រូវដាក់ក្នុងភាពមានអាសន្នផងដែរ។ មាត្រា១០ ក្នុងជំពូក៤ បាននិយាយថា មន្ត្រីមានសមត្ថកិច្ចដែលប្រើប្រាស់សិទ្ធិអំណាចតាមទំនើងចិត្តដោយរំលោភបំពាំនខុសពីគោលបំណងនៃច្បាប់ ហើយបង្កការប៉ះពាល់ដល់រូបរាងកាយ ឬការខូចខាតដល់ទ្រព្យសម្បត្តិរបស់បុគ្គលដទៃត្រូវទទួលខុសត្រូវចំពោះអំពើ ដែលខ្លួនបានប្រព្រឹត្តស្របតាមច្បាប់របស់កម្ពុជា៕

ច្បាប់គ្រប់គ្រងប្រទេសជាតិ ស្ថិតក្នុងភាពអាសន្ន ត្រូវបានប្រកាសដាក់ឱ្យប្រើប្រាស់ហើយ

 ទីបំផុតទៅ «ច្បាប់គ្រប់គ្រងប្រទេសជាតិ ស្ថិតក្នុងភាពអាសន្ន» ដែលជាច្បាប់ថ្មីសន្លាងនៅក្នុងប្រទេស​កម្ពុជា ត្រូវបានប្រកាសដាក់ឱ្យប្រើប្រាស់ជាផ្លូវការហើយ នៅថ្ងៃទី២៩ ខែមេសា ឆ្នាំ​២០២០​នេះ។

ច្បាប់ស្តីពី «ការគ្រប់គ្រងប្រទេសជាតិស្ថិតក្នុងភាពអាសន្ន» ត្រូវបានចុះហត្ថលេខាដាក់ឱ្យប្រើប្រាស់ដោយប្រមុខរដ្ឋស្តីទី លោក សាយ ឈុំ។ រាជរដ្ឋាភិបាលកម្ពុជាដឹកនាំដោយលោក​នាយករដ្ឋ​មន្ត្រី​ ហ៊ុន សែន កាលពីខែមេសា ឆ្នាំ២០២០កន្លងទៅនេះ បានចាប់ផ្តើមរៀបចំ និងតាក់តែងឡើងនូវច្បាប់ស្តីពី «ការគ្រប់គ្រងប្រទេសជាតិស្ថិតក្នុងភាពអាសន្ន» ចំពេលប្រទេសកម្ពុជារងការរាតត្បាតនៃជំងឺកូវីដ១៩។ ច្បាប់នេះត្រូវបានរៀបចំឡើងក្នុងល្បឿនមួយយ៉ាងលឿន ហើយត្រូវបានរដ្ឋសភា ព្រឹទ្ធសភា និងក្រុមប្រឹក្សាធម្មនុញ្ញអនុម័តជាបន្តបន្ទាប់​ត្រឹមរយៈពេលតែមួយខែប៉ុណ្ណោះ។

លោកនាយករដ្ឋមន្ត្រី​ ធ្លាប់បានគូសបញ្ជាក់ថា ច្បាប់នេះគឺជាឧបករណ៍ផ្នែកច្បាប់ដ៏មានសារៈសំខាន់សម្រាប់កម្ពុជា ក្នុងការគ្រប់គ្រងប្រទេសនៅពេលមានគ្រោះអាសន្នផ្សេងៗ ខណៈបច្ចុប្បន្នកម្ពុជាមិនទាន់មានច្បាប់សម្រាប់ការគ្រប់គ្រងប្រទេសពេលមានអាសន្ននៅឡើយ។

រាជរដ្ឋាភិបាលកម្ពុជា ធ្លាប់បានអះអាងថា ច្បាប់ស្តីពីការគ្រងប្រទេសជាតិស្ថិតក្នុងភាពអាសន្ន ត្រូវបានរៀបចំឡើងដោយផ្អែកតាមស្មារតីនៃមាត្រា ២២ថ្មី នៃរដ្ឋធម្មនុញ្ញរបស់កម្ពុជា ដែលចែងថា «នៅ​ពេលប្រជាជាតិប្រឈមមុខនឹងគ្រោះថ្នាក់ ព្រះមហាក្សត្រទ្រង់ប្រកាសប្រទានដំណឹងជាសាធា​រណៈ ដាក់ប្រទេសជាតិស្ថិតក្នុងភាពអាសន្ន ក្រោយពីបានមតិឯកភាពពីនាយករដ្ឋមន្ត្រី ប្រធានរដ្ឋសភា និងប្រធានព្រឹទ្ធសភា»។

ច្បាប់ថ្មីនេះ ក៏ផ្តល់ជាមូលដ្ឋានគតិយុត្ត ដើម្បីធានាដល់ការអនុវត្តមាត្រា ២២ថ្មី នៃរដ្ឋធម្មនុញ្ញ និងជាមូលដ្ឋានគតិយុត្តកំណត់សិទ្ធិអំណាចរបស់រាជរដ្ឋាភិបាល ក្នុងការដាក់ចេញនូវវិធានការចាំបាច់ដែលមិនអាចខ្វះបាន ដើម្បីឆ្លើយតបទៅនឹងស្ថានភាពរបស់ប្រទេសក្នុងភាពអាសន្ន សំដៅការពារសន្តិសុខសណ្តាប់ធ្នាប់សាធារណៈ ការពារអាយុជីវិត និងសុខភាពរបស់ប្រជាពលរដ្ឋ ព្រមទាំងការពាំរទ្រព្យសម្បត្តិ និងបរិស្ថាន។

ច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន ក៏កំណត់នូវបែបបទ នីតិវិធី និងលក្ខខណ្ឌនៃការប្រកាសដាក់ប្រទេសជាតិស្ថិតក្នុងភាពអាសន្ន ព្រមទាំងវិធានការចាំបាច់នានា ដែលរាជរដ្ឋាភិបាលមានសិទ្ធិដាក់ចេញក្នុងពេលប្រទេសជាតិស្ថិតក្នុងភាពអាសន្ន។

ច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន បានបញ្ជាក់ថា ការដាក់ប្រទេសជាតិក្នុងភាពអាសន្ន អាចធ្វើឡើងនៅពេលប្រជាជាតិប្រឈមមុខ នឹងគ្រោះថ្នាក់ជាអាទិ៍, គ្រោះថ្នាក់ដែលបង្កឡើងដោយសង្គ្រាម ឬការឈ្លានពានពីកម្លាំងបរទេស, គ្រោះអាសន្នបន្ទាន់ចំពោះសុខភាពសាធារណៈបណ្តាលមកពីការឆ្លងរាលដាលនៃជំងឺ, ភាពវឹកវរធ្ងន់ធ្ងរដល់សន្តិសុខជាតិ និងសណ្តាប់​ធ្នាប់​សាធា​រណៈ ព្រមទាំងគ្រោះមហន្តរាយធ្ងន់ធ្ងរ ដែលគំរាមកំហែង ឬអាចបង្កគ្រោះថ្នាក់រីករាលដាលដល់​កម្រិត​ទូទាំងប្រទេស។

ច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន មានចំនួន ៥ជំពូក និងចែកចេញ ១២​មាត្រា។ មាត្រា៤ ជំពូកទី៣ បានកំណត់ថា នៅពេលប្រទេសជាតិ ត្រូវបានប្រកាសដាក់ស្ថិតនៅក្នុងភាពអាសន្ន រាជរដ្ឋាភិបាលមានសិទ្ធិដាក់ចេញវិធានដូចខាងក្រោម៖
១៖ ហាមឃាត់ ឬ កម្រិតសិទ្ធិសេរីភាពក្នុងការធ្វើដំណើរ។
២៖ ហាមឃាត់ ឬ កម្រិតសិទ្ធិសេរីភាពក្នុងការជួបជុំ ឬការប្រមូលផ្តុំមនុស្ស។
៣៖ ហាមឃាត់ ឬ កម្រិតការធ្វើសកម្មភាពការងារ ឬមុខរបរ។
៤៖ ហាមឃាត់ ឬ កម្រិតមិនឱ្យបុគ្គលចេញពីលំនៅឋាន ឬ ទីសំណាក់ណាមួយ។
៥៖ ដាក់ចេញវិធានការចត្តាឡីស័ក ឬ ការដាក់ឱ្យនៅដោយឡែកក្នុងករណីគ្រោះអាសន្នបន្ទាន់ ចំពោះសុខភាពសាធារណៈបណ្តាលមកពីការឆ្លងរាលដាលនៃជំងឺ។
៦៖ ដាក់ចេញវិធានការទាក់ទងនឹងកំណែន និងជម្លៀសពលរដ្ឋ ដើម្បីឆ្លើយតបចំពោះភាពអាសន្ន។
៧៖ ដាក់ចេញវិធានការទាក់ទងនឹងកំណែន ដកហូត គ្រប់គ្រង និងចាត់ចែងទ្រព្យសម្បត្តិ និងសេវា ដែលមានភាពចាំបាច់ ដើម្បីឆ្លើយតបចំពោះភាពអាសន្ន។ នីតិវិធីនៃការធ្វើកំណែន និងសំណងត្រូវកំណត់ដោយរាជរដ្ឋាភិបាល។
៨៖ ដាក់ចេញវិធានការទាក់ទងនឹងការបិទទីតាំងសាធារណៈ ឬឯកជនណាមួយ ដែលមានភាពចាំបាច់ ដើម្បីឆ្លើយតបចំពោះភាពអាសន្ន។
៩៖ ដាក់ចេញវិធានការទាក់ទងនឹងការបិទទីតាំងសាធារណៈ ឬឯកជនណាមួយ ដែលមានភាពចាំបាច់ ដើម្បីឆ្លើយតបចំពោះភាពអាសន្ន។
១០៖ ដាក់ចេញនូវវិធានការឃ្លាំមើល និងតាមដានគ្រប់មធ្យោបាយ ដើម្បីទទួលបានព័ត៌មានតាមរយៈប្រព័ន្ធទំនាក់ទំនងទូរគមនាគមន៍គ្រប់រូបភាព ក្នុងគោលបំណងឆ្លើយតបចំពោះភាពអាសន្ន។
១១៖ ហាមឃាត់ ឬ ការកម្រិតការចែកចាយ ឬ ការផ្សព្វផ្សាយព័ត៌មានដែលអាចបង្កឱ្យមានការភ័យខ្លាចដល់សាធារណជន ឬ ចលាចល ឬ ដែលនាំឱ្យខូចខាតដល់សន្តិសុខជាតិ ឬ ធ្វើឱ្យមានការភាន់ច្រឡំអំពីស្ថានភាពនៃភាពអាសន្ន។
១២៖ ដាក់ចេញវិធានការដទៃទៀតដែលសមស្រប និងចាំបាច់ ដើម្បីឆ្លើយតបចំពោះភាពអាសន្ន។ ក្នុងមាត្រានេះ បានចែងទៀតថា វិធានការអនុវត្តពេលប្រទេសជាតិស្ថិតក្នុងភាពអាសន្ន អាចត្រូវបានដាក់ចេញសម្រាប់ទូទាំងប្រទេស ឬ ដែនដីកំណត់ជាក់លាក់ណាមួយ។ ក្នុងករណីចាំបាច់ រាជរដ្ឋា​ភិបាល​អាចបង្កើតយន្តការ ឬប្រគល់សិទ្ធិអំណាចទៅអាជ្ញាធរមានសមត្ថកិច្ចណាមួយ ឬប្រើប្រាស់​កងកម្លាំង​ប្រដាប់អាវុធ ដើម្បីធានាដល់ការអនុវត្តវិធានការខាងលើ។

ក្នុងពេលសង្គ្រាម ឬ ក្នុងកាលៈទេសដទៃទៀតដែលសន្តិសុខជាតិប្រឈមនឹងគ្រោះថ្នាក់ធ្ងន់ធ្ងរ ការគ្រប់គ្រងប្រទេសជាតិស្ថិតក្នុងភាពអាសន្នអាចធ្វើឡើងតាមរបបអាជ្ញាសឹក។

នៅក្នុងមាត្រា៧ ក្នុងជំពូកទី៤ និយាយពីទោសប្បញ្ញត្តិ បានចែងថា អំពើដោយចេតនារារាំង ឬ បង្កឧបសគ្គដល់កិច្ចប្រតិបត្តិការឆ្លើយតបចំពោះភាពអាសន្ន ត្រូវផ្តន្ទាទោសដាក់ពន្ធនាគារពី ១ឆ្នាំ ដល់​ទៅ ៥ឆ្នាំ និងពិន័យជាប្រាក់ពី ១លានរៀល ដល់ ៥លានរៀល។ ចំពោះអំពើរារាំងដល់កិច្ចប្រតិបត្តិការពេលប្រទេសជាតិស្ថិតក្នុងភាពអាសន្ន ត្រូវផ្តន្ទាទោសដាក់ពន្ធនាគារពី ៥ឆ្នាំ ទៅ ១០ឆ្នាំ កាលបើអំពើនេះ នាំឱ្យមានចលាចលជាសាធារណៈ ឬប៉ះពាល់ដល់សន្តិសុខជាតិ។

ក្នុងមាត្រា៨ នៃជំពូកដដែល បានចែងថា អំពើដោយចេតនាមិនគោរពវិធានការដាក់ចេញដោយរាជរដ្ឋាភិបាលដែលមានចែងក្នុងមាត្រា៥ ត្រូវផ្តន្ទាទោសដាក់ពន្ធនាគារពី១ខែ ទៅ១ឆ្នាំ និងពិន័យជាប្រាក់​ពី ១០ម៉ឺនរៀល ដល់ ១លានរៀល។ ដោយឡែកអំពើមិនគោរពតាមវិធានការពេលប្រទេសជាតិស្ថិតក្នុងភាពអាសន្ន ត្រូវផ្តន្ទាទោសដាក់ពន្ធនាគារពី ១ឆ្នាំ ទៅ៥ឆ្នាំ និងពិន័យជាប្រាក់ពី ១លានរៀល ទៅ ៥លានរៀល កាលបើអំពើនេះនាំឱ្យមានចលាចលជាសាធារណៈ។

ដោយឡែកនីតិបុគ្គលដែលមានចេតនារារាំង ឬ បង្កឧបសគ្គដល់កិច្ចប្រតិបត្តិការឆ្លើយតបចំពោះភាពអាសន្ន ត្រូវទទួលខុសត្រូវព្រហ្មទណ្ឌដូចមានចែងក្នុងមាត្រា៤២ (ការទទួលខុសត្រូវព្រហ្មទណ្ឌនីតិបុគ្គល) នៃក្រមព្រហ្មទណ្ឌ ដោយត្រូវផន្ទាទោសពិន័យជាប្រាក់ពី ១០០លានរៀល ដល់ ១,០០០​លានរៀល ព្រមទាំងទោសបន្ថែមមួយ ឬ ច្រើនដូចមានចែងក្នុងមាត្រា១៦៨ (ទោសបន្ថែមអនុវត្តចំពោះនីតិបុគ្គល) នៃក្រមព្រហ្មទណ្ឌ។

រីឯនីតិបុគ្គលដែលប្រព្រឹត្តអំពើដោយចេតនាមិនគោរពវិធានការដាក់ចេញដោយរាជរដ្ឋាភិបាលដែលមានចែងក្នុងមាត្រា៥ ត្រូវទទួលខុសត្រូវព្រហ្មទណ្ឌដូចមានចែងក្នុងមាត្រា៤២ (ការទទួលខុសត្រូវព្រហ្មទណ្ឌរបស់នីតិបុគ្គល) នៃក្រមព្រហ្មទណ្ឌ ដោយត្រូវផ្តន្ទាទោសពិន័យជាប្រាក់ពី ៥០លានរៀល ដល់ ៥០០លានរៀល ព្រមទាំងទោសបន្ថែមមួយ ឬច្រើន ដូចមានចែងក្នុងមាត្រា១៦៨ (ទោសបន្ថែមអនុវត្តចំពោះនីតិបុគ្គល) នៃក្រមព្រហ្មទណ្ណ។

ច្បាប់នេះ ក៏បាននិយាយពីការទទួលខុសត្រូវរបស់អាជ្ញាធរមានសមត្ថកិច្ច ពេលប្រទេសត្រូវដាក់ក្នុងភាពមានអាសន្នផងដែរ។ មាត្រា១០ ក្នុងជំពូក៤ បាននិយាយថា មន្ត្រីមានសមត្ថកិច្ចដែលប្រើប្រាស់សិទ្ធិអំណាចតាមទំនើងចិត្តដោយរំលោភបំពាំនខុសពីគោលបំណងនៃច្បាប់ ហើយបង្កការប៉ះពាល់ដល់រូបរាងកាយ ឬការខូចខាតដល់ទ្រព្យសម្បត្តិរបស់បុគ្គលដទៃត្រូវទទួលខុសត្រូវចំពោះអំពើ ដែលខ្លួនបានប្រព្រឹត្តស្របតាមច្បាប់របស់កម្ពុជា៕

លិខិតមិត្តអ្នកអាន៖ ជឿទុកចិត្តជួយយកអាសាគ្នាទៅវិញទៅមក កងទ័ពទាំងពីរកម្ពុជា-ចិនពួតដៃគ្នាប្រយុទ្ធប្រឆាំងនឹងជំងឺកូវីដ-១៩

ថ្មីៗកន្លងទៅនេះយន្តហោះដឹកអីវ៉ាន់របស់កងទ័ពជើងអាកាសប្រទេសចិន បានចុះចតនៅអា​កា​សយានដ្ឋានអន្តរជាតិភ្នំពេញម្តងទៀតដោយបំពាក់នូវសម្ភារៈបរិក្ខារពេទ្យសំរាប់ប្រយុទ្ធប្រ​ឆាំងនឹងជំងឺកូវីដ-១៩ ហើយទន្ទឹមនឹងនេះ បាននាំមកនូវមនោសញ្ចេតនា និងមិត្តភាពដ៏ជ្រាលជ្រៅ និងការជូនពរល្អប្រសើរពីប្រជាជនចិនជាង១៤០០លាននាក់ និងពីយោធិនចិនចំនួន២លា​ននាក់។ នេះគឺជាជំនួយលើកទី៣ ដែលក្រសួងការពារជាតិចិន បានផ្តល់សម្ភារពេទ្យសំរា​ប់ទប់ស្កាត់ជំងឺកូវីដ-១៩ ជូនចំពោះក្រសួងការពារជាតិកម្ពុជា ហើយបានបង្ហាញច្បាស់លាស់ថែមទៀត នូវមិត្តភាពដូចបងប្អូនដែកថែបរវាងកងទ័ពទាំងពីរកម្ពុជា និងចិន ព្រមទាំងសេចក្តីសម្រេចចិត្តមឹងម៉ាត់ ក្នុងការពួតដៃប្រយុទ្ធប្រឆាំងនឹងជំងឺកូវីដ-១៩។

ទោះបីជាជំងឺកូវីដ-១៩​ កំពុងរីករាលដាលនៅពិភពលោក ប្រទាញមនុស្សឲ្យឆ្ងាយចេញពីគ្នាក៏ប៉ុន្តែទឹកចិត្តរបស់កងទ័ពទាំងពីរ និងប្រទេសទាំងពីរ កម្ពុជានិងចិន ជាប់ទល់នឹងគ្នាកាន់តែជិតស្និទ្ធ ក៏ដូចជាដៃរបស់យើងចាប់កាន់តែរឹងមាំ។ ពេលប្រទេសចិន ស្ថិតនៅគ្រាលំបាកធ្ងន់ជាងគេ មិត្តកម្ពុជាបានផ្តល់ជំនួយភ្លាមៗ។ ៨០ថ្ងៃមុន យន្តហោះមួយគ្រឿងបានចុះចតនៅអាកាសយានដ្ឋានអន្តរជាតិ រដ្ឋធានីប៉េកាំង សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញបំពេញទស្សនកិច្ចនៅប្រទេសចិនជាបន្ទាន់ បានផ្តល់ការគាំទ្រយ៉ាងខ្លាំងក្លាដល់ប្រទេសចិន ខាងវិស័យនយោបាយ និងសីលធម៌ ក៏បានប្រតិបត្តិដំណើរការជាក់ស្តែង ក្នុងការបង្ហាញនូវខ្លឹមសារជាស្នូល នៃសហគមន៍រួមវាសនាចិននិងកម្ពុជា។

លោក ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន និងសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្រេចបានជាកុងសង់ស៊ីសដ៏សំខាន់ស្តីពីការជំរុ​ញ​អភិវឌ្ឍន៍ទំនាក់ទំនងប្រទេសទាំងពីរឲ្យស៊ីជំរៅ និងពួតដៃប្រឆាំងទប់ស្កាត់ជំងឺកូវីដ-១៩។ នាថ្ងៃទី២ ខែមីនា ពិធីប្រគល់-ទទួលសម្ភារៈការពារទប់ស្កាត់វីរុសកូវីដ-១៩ របស់ក្រសួងការ​ពារជាតិនៃព្រះរាជាណាចក្រកម្ពុជាជូនចំពោះក្រសួងការពារជាតិនៃសាធារណរដ្ឋប្រជាមានិតចិន ត្រូវបានរៀបចំឡើងក្នុងស្ថានទូតចិនប្រចាំកម្ពុជា។

សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានមានប្រសា​សន៍ថា ភាគីកម្ពុជាគាំទ្រចិនយ៉ាងម៉ឺងម៉ាត់ក្នុងការប្រយុទ្ធប្រឆាំងនឹងជំងឺកូវីដ-១៩ ហើយក៏ជឿជាក់យ៉ាងមុតមាំថា រដ្ឋាភិបាល កងទ័ពយោធា និងប្រជាជនចិន មានសមត្ថភាពគ្រប់គ្រាន់ក្នុងការយកជម្នះលើកិច្ចប្រយុទ្ធ ទប់ស្កាត់ជំងឺកូវីដ-១៩។ ជំងឺកូវីដ-១៩ ក៏ដូចជាបញ្ជាដើម្បីបំពេញបេសកកម្មពេញទំហឹង កងទ័ពយោធាចិន បានអនុវត្តន៍គោលនយោបាយរបស់មជ្ឈិមបក្ស និ​ងគណៈកម្មការយោធាមជ្ឈិមបក្សយ៉ាងម៉ឺងម៉ាត់ ហើយបានរួមវិភាគទានយ៉ាងលេចធ្លោរក្នុងការប្រយុទ្ធយកជម្នះក្នុងសង្គ្រាម បង្ការនិងគ្រប់គ្រងជំងឺនេះ។

នាថ្ងៃទី២៤ ខែមករា កងទ័ពចូលសង្គ្រាមតាមបញ្ជា យោធាចិនបានបញ្ជូនក្រុមពេទ្យទី១ នៅទូទាំងប្រទេសចិន ចុះជួយឧបត្ថម្ភ ទីក្រុងវូហាន។ កងទ័ពចិន បានទទួលភារកិច្ចធ្ងន់ធ្ងរយ៉ាងក្លា​ហាន សរុបចាត់តាំងបុគ្គលិកពេទ្យជាង៤០០០នាក់ រៀបចំគ្រែសំរាប់ព្យាបាលអ្នកជំងឺ២៨៥៦គ្រែ ហើយទទួលអ្នកឆ្លងជំងឺ៧១៩៨នាក់។ ដោយសារតែមានបច្ចេកទេសជំនាញបរិបូរណ៍បា​ន​ទទួលជោគជ័យពេញលេញក្នុងភារកិច្ចសង្គ្រោះអ្នកជំងឺ ជាពិសេសបានសម្រេចគោលដៅ គឺ វាយប្រយុទ្ធជំងឺប្រកបដោយជោគជ័យ អត់មានបុគ្គលិកណាឆ្លងវីរុស។ ក្រៅពីនេះកងទ័ពចិន ក៏យកចិត្តទុកដាក់ការស្រាវជ្រាវវិទ្យាសាស្ត្រដែរនាថ្ងៃទី១៦ ខែមីនា បានចាប់ផ្តើមការសាកល្ប​ងវ៉ាក់សាំងប្រឆាំងមេរោគកូវីដ-១៩ ដំណាក់កាលទី១ ជាលើកដំបូងនៅប្រទេសចិន ដែលត្រូវចាក់ពិសោធន៍លើមនុស្ស។ នាថ្ងៃទី១២ ខែមេសា បានឈានដល់ការសាកល្បងចាក់វ៉ាក់សាំង លើមនុស្សដំណាក់កាលទី២ ហើយគឺជាប្រទេសមុនគេឈាន ដល់ដំណាក់កាលទី២។

ទោះខ្យល់ក្តី ទោះភ្លៀងក្តី យើងត្រូវសាមគ្គីគ្នា។ មេរោគមិនរើសអើងជនជាតិ ឬប្រទេសណាមួ​យទេ មនុស្សជាតិគឺជាសហគមន៍រួមវាសនាតែមួយដែលពឹងផ្អែកគ្នាទោះសុខឬទុក្ខ។ មានតែគាំទ្រឧបត្ថម្ភទៅវិញទៅមក ទើបពន្លឺនៃភាពជោគជ័យមកដល់យ៉ាងឆាប់រហ័ស។ ប្រទេសចិនមិនអាចភ្លេចជំនួយទប់ស្កាត់ជំងឺកូវីដ-១៩ ដែលផ្តល់ដោយរដ្ឋាភិបាល និងកងទ័ពនៃប្រទេសនានា រាប់បញ្ចូលទាំងប្រទេសកម្ពុជាជូនចំពោះភាគីចិន។ កងទ័ពចិនកំពុងពង្រឹង និងពង្រីកកិច្ចសហប្រតិបត្តិការលើការប្រយុទ្ធប្រឆាំងកូវីដ-១៩ ជាមួយកងទ័ពនានានៅលើពិភពលោក ហើយបានផ្តល់ជំនួយសំរាប់ទប់ស្កាត់ជំងឺនេះ អាស្រ័យសមត្ថភាពរបស់ខ្លួនជូនចំពោះកងទ័ពកម្ពុជា ក៏ដូចជាកងទ័ពផ្សេងទៀតដើម្បីថែរក្សាសន្តិសុខ និងសុវត្ថិភាព លើវិស័យសុខាភិបាល អន្តរជាតិពួតដៃបង្កើតសហគមន៍រួមសុខាភិបាលនិងសុខភាពមនុស្សជាតិ។

នៅគ្រាលំបាក ស្គាល់មិត្តពិតប្រាកដ។ នាថ្ងៃទី២៤ ខែមីនា ក្រុមពេទ្យប្រយុទ្ធប្រឆាំងនឹងជំងឺកូវីដ-១៩ របស់កងទ័ពរំដោះប្រជាជនចិន បានអញ្ជើញដល់ក្រុងភ្នំពេញ នេះគឺជាក្រុមពេទ្យលើកទីមួយដែលកងទ័ពចិនបានចាត់តាំងកម្លាំងជូនដល់ពិភពលោកដើម្បីជួយទប់ស្កាត់ជំងឺវីរុសកូវីដ-១៩ បានបង្កើត «លើកដំបូង» ថែមទៀតក្នុងទំនាក់ទំនងកងទ័ពទាំងពីរចិន និងកម្ពុជា។ ជា​ងមួយខែកន្លងមកហើយ ក្រុមពេទ្យ និងអ្នកជំនាញភាគីកម្ពុជាធ្វើការពេញទំហឹងសហការគ្នាជិត្តស្និទ្ធ ពុះពារឧបសគ្គយ៉ាងសកម្មក្តោបក្តាប់ពេលវេលាបានល្អបានបង្កើតនិងកែសម្រួលសម​ត្ថ​ភាពបង្ការ និងគ្រប់គ្រងជំងឺទាំងគ្រប់ដំណើរការ។ សម្តេចតេជោ ហ៊ុន សែន បានថ្លែងការកោ​តសរសើរយ៉ាងខ្ពង់ខ្ពស់ រីឯសម្តេចពិជ័យសេនា ទៀ បាញ់ ក៏បានអញ្ជើញចុះពិនិត្យនៅនឹងក​ន្លែ​ងជាច្រើនដងហើយបានថ្លែងការកោតសរសើរដែរ។

ជំងឺកូវីដ-១៩ បានជំរុញកិច្ចសហប្រតិបត្តិការលើសុខាភិបាល និងវេជ្ជសាស្ត្ររវាងកងទ័ពកម្ពុជា និងចិន ចំណែកឯវិស័យផ្សេងទៀត ក៏មិនផ្អាកដំណើរការទេ នេះបានឆ្លុះបញ្ចាំងឲ្យឃើញនូវជំនឿទុកចិត្តយុទ្ធសាស្ត្រដ៏ខ្ពង់ខ្ពស់និងកិច្ចសហប្រតិបត្តិការជាក់ស្តែងយ៉ាងស៊ីជំរៅរវាងកងទ័ពទាំងពីរ។

ចាប់តាំងពីថ្ងៃទី១៥ ខែមីនា ដល់ថ្ងៃទី១ ខែមេសា លំហាត់សមយុទ្ធនាគមាស ២០២០ រវាងកងទ័ពកម្ពុជា និងចិន បានប្រារព្ធឡើងតាមពេលកំណត់។ កងទ័ពទាំងពីរចែកជាក្រុមលាយគ្នា ស​​ហការគ្នាធ្វើប្រតិបត្តិការ បានទទួលជោគជ័យពេញលេញ លើគ្រប់មេរៀនលំហាត់ ហើយធានាថា អត់មានបុគ្គលណាមួយ ឆ្លងមេរោគ កូវីដ-១៩ បានអនុវត្តដោយជោគជ័យ ក្នុងការហ្វឹ​កហាត់ទាហានត្រៀមសង្រ្គាមផង និងការបង្កាទប់ស្កាត់មេរោគផង។ នេះបានបន្ថែមសោភ័ណភាព ដ៏ស្រស់ផូរផងថែមមួយកម្រិតទៀត លើប្រវត្តិសាស្រ្តនៃកិច្ចសហប្រតិបត្តិការមេត្រីភាព រវាងប្រទេសទាំងពីរ និងកងទ័ពទាំងពីរ។ «ជឿទុកចិត្តគ្នា ជួយយកអាសាគ្នាទៅវិញទៅមក»។ ការជួយឧបត្ថម្ភទៅវិញទៅមករវាងកងទ័ពទាំងពីរ កម្ពុជានិងចិន គឺកើតចេញពីក្រអៅបេះដូង អត់ដាក់លក្ខខណ្ឌៈអ្វីសោះ។ រីឯកិច្ចសហប្រតេបត្តិការរវាងកងទ័ពកម្ពុជា និងចិន ក៏ផ្តល់ផលប្រយោជន៍ដល់គ្នាទៅវិញទៅមក មិនសំដៅដល់ភាគីទី៣ទេ។

កងទ័ពទាំងពីរ យើងពួតដៃប្រយុទ្ធប្រឆាំងនឹងជំងឺកូវីដ-១៩ ការពារអាយុជីវិត និងសុខភាពរប​ស់ប្រជាជនប្រទេសទាំងពីរដោយពេញទំហឹងនេះបញ្ចាំងឲ្យឃើញនូវស្មារតីសហគមន៍រួមវាស​នា ដែលមិនអាចបំបែកបំបាក់និងស្មារតីអន្តរជាតិនិយម និងមនុស្សធម៌ពិតប្រាកដហើយគឺជាគំរូល្អ នៃកិច្ចសហប្រតិបត្តិការយោធាទ្វេភាគីនៅក្នុងអន្តរជាតិ។ ជំងឺកូវីដ-១៩ នៅមិនទាន់បាត់នៅឡើយទេ សភាពការណ៍ទប់ស្កាត់មេរោគនេះនៅតែមានភាពធ្ងន់ធ្ងរដែរ កងទ័ពប្រទេសទាំ​ងពីរមានភារកិច្ចធ្ងន់ត្រូវអនុវត្តន៍ និងមានផ្លូវវែងត្រូវដើរឆ្លង។ ស៊ូឡើងប្រទេសកម្ពុជា ស៊ូឡើងប្រទេសចិន។ ស៊ូឡើង កងយោធពលខេមរភូមិន្ទ។ ស៊ូឡើង កងទ័ពរំដោះប្រជាជនចិន៕

ដោយ៖ វរសេនីយ៍ឯកពិសេស Li Jingfeng អនុព័ន្ធយោធានៃស្ថានទូតចិនប្រចាំនៅកម្ពុជា

សេចក្តីជូនដំណឹងរបស់ ក្រសួងសាធារណការ និងដឹកជញ្ជូន «ត្រួតពិនិត្យលក្ខណៈបច្ចេកទេសយានជំនិះ (ឆៀក) ទាំងថ្ងៃអាទិត្យ»

(ភ្នំពេញ)៖ ដោយមើលឃើញពីកំណើន នៃការយករថយន្តមកធ្វើការត្រួតពិនិត្យលក្ខណៈបច្ចេកទេស (ឆៀក) មានការកើនឡើងជាបន្តបន្ទាប់ ក្រសួងសាធារណការ និងដឹកជញ្ជូន តាមរយៈនាយកដ្ឋានដឹកជញ្ជូនផ្លូវគោក បានសម្រេចបន្ថែមពេលវេលាត្រួតពិនិត្យលក្ខណៈបច្ចេកទេសយានជំនិះ (ឆៀក) ដោយក្នុងមួយសប្តាហ៍ (ទាំងថ្ងៃអាទិត្យ) ចាប់ពីម៉ោង ០៨៖០០នាទីព្រឹក ដល់ម៉ោង ០៥៖០០ នាទីល្ងាចនៅគ្រប់មណ្ឌលត្រួតពិនិត្យលក្ខណៈបច្ចេកទេស (ឆៀក) ទាំងអស់។

នៅក្នុងសេចក្តីជូនដំណឹងរបស់ក្រសួងសាធារណការ និងដឹកជញ្ជូននៅរសៀលថ្ងៃទី២៩ ខែមេសា ឆ្នាំ២០២០នេះ បានឱ្យដឹងទៀតថា ការងារនេះនឹងចាប់ផ្តើមអនុវត្តន៍ចាប់ពីថ្ងៃទី០៣ ខែឧសភា ឆ្នាំ២០២០តទៅ រហូតដល់មានការជូនដំណឹងសារជាថ្មី។

ជាមួយគ្នានោះដែរ ក្រសួងសាធារណការ និងដឹកជញ្ជូន ក៏បានជូនដំណឹងទៀតថា សម្រាប់មជ្ឈមណ្ឌលផ្តល់បណ្ណបើកបរយានយន្ត និងប្តូរបណ្ណបើកបរ នៅផ្សារទំនើបអ៊ីអន១ និងអ៊ីអន២ ធ្វើការចាប់ពីថ្ងៃទី០១ ខែឧសភា ឆ្នាំ២០២០ រៀងរាល់ថ្ងៃចន្ទ ដល់ថ្ងៃអាទិត្យ ចាប់ពីម៉ោង ០៩៖០០នាទីព្រឹក ដល់ម៉ោង១០៖០០នាទីយប់ និងនៅអគ្គនាយកដ្ឋានដឹកជញ្ជូនផ្លូវគោក ចាប់ពីថ្ងៃចន្ទ ដល់ថ្ងៃសុក្រចាប់ពីម៉ោង០៩៖០០នាទីព្រឹក ដល់ម៉ោង០៥៖០០នាទីល្ងាច៕

លោកនាយករដ្ឋមន្រ្តី ហ៊ុន សែន៖ ការរឹតបន្តឹងច្បាប់ចរាចរណ៍ដើម្បីធានាសុវត្ថិភាពអាយុជីវិតរបស់ប្រជាពលរដ្ឋទូទាំងប្រទេស

នៅថ្ងៃទី២៩ ខែមេសា ឆ្នាំ២០២០ លោកនាយករដ្ឋមន្រ្តី ហ៊ុន សែន តាមរយៈ Facebook បានថ្លែងបញ្ជាក់ថា ការរឹតបន្តឹងច្បាប់ចរាចរណ៍ថ្មីដែលនឹងចាប់ផ្តើមអនុវត្តពីថ្ងៃទី១ ខែឧសភា ឆ្នាំ២០២០ គឺដើម្បីធានាសុវត្ថិភាពអាយុជីវិតបងប្អូន ប្រជាពលរដ្ឋនៅទូទាំងប្រទេសចៀសវាងគ្រោះ​ថ្នាក់ផ្សេងៗដែលអាចបង្ករបួសស្នាមធ្ងន់ស្រាលរហូតដល់មានការបាត់បង់អាយុជីវិត។ ជាមួយគ្នានេះ លោក ហ៊ុន សែន ក៏បានអំពាវនាវដល់បងប្អូនប្រជាពលរដ្ឋ បើកបរត្រូវគោរពច្បា​ប់ចរាចរណ៍ មានការប្រុងប្រយ័ត្នខ្ពស់ជាមួយនឹងការយោគយល់ដល់គ្នាទៅវិញទៅមក ដើ​ម្បីសុវត្ថិភាពទាំងអស់គ្នា។

លោកនាយករដ្ឋមន្រ្តី ហ៊ុន សែន បានសរសេរក្នុង Facebook ទាំងស្រុងយ៉ាងដូច្នេះថា «បើកបរត្រូវគោរពច្បាប់ចរាចរណ៍ ដើម្បីសុវត្ថិភាពទាំងអស់គ្នា។ នៅពេលនេះ ការរិតបន្តឹងច្បាប់ច​រាចរណ៍ គឺកំពុងដំណើរការនៅទូទាំងប្រទេស។ សូមបងប្អូនប្រជាពលរដ្ឋជាពិសេសក្មួយៗយុវជន មុននឹងបើកបររថយន្ត ត្រូវមានបណ្ណបើកបរពិតប្រាកដត្រឹមត្រូវ។ រីឯរថយន្តវិញត្រូវបង់ពន្ធ និងបង់ថ្លៃសេវាផ្សេងៗ ឲ្យបានត្រឹមត្រូវមុននឹងបញ្ជាយានយន្តនៅលើដងផ្លូវសាធារណៈ»។

លោកនាយករដ្ឋមន្រ្តី ហ៊ុន សែន បានបញ្ជាក់ថា ការរឹតបន្តឹងនេះគឺដើម្បីធានាសុវត្ថិភាពអាយុជីវិតបងប្អូនប្រជាពលរដ្ឋនៅទូទាំងប្រទេសដើ​ម្បីចៀសវាងគ្រោះថ្នាក់ផ្សេងៗដែលអាចបង្ករបួ​សស្នាមធ្ងន់ស្រាលរហូតដល់មានការបាត់បង់អា​យុជីវិតទៀតផង។ យើងមិនចង់ឃើញករណីគ្រោះថ្នាក់ចរាចរណ៍កើតមាននៅក្នុងក្រុមគ្រួសារ របស់បងប្អូនណាម្នាក់ឡើយ។ សូមបងប្អូនប្រជាពលរដ្ឋ និងក្មួយៗយុវជន បើកបរដោយមានការប្រុងប្រយ័ត្នខ្ពស់ ជាមួយនឹងការយោគយល់ដល់គ្នាទៅវិញទៅមក ដើម្បីសុខសុវត្ថិភាព ទាំងអស់គ្នានៅទូទាំងប្រទេស៕

លោកឧបនាយករដ្ឋមន្ដ្រី ស ខេង បានអញ្ជើញដឹកនាំកិច្ចប្រជុំឆ្លងផែនការសកម្មភាពឆ្នាំ២០២០ របស់បណ្ឌិត្យសភានគរបាលកម្ពុជា

នៅព្រឹកថ្ងៃពុធ ទី២៩ ខែមេសា ឆ្នាំ២០២០នេះ លោកឧបនាយករដ្ឋមន្ដ្រី  ស ខេង រដ្ឋមន្ដ្រីក្រសួងមហាផ្ទៃ បានអញ្ជើញដឹកនាំកិច្ចប្រជុំឆ្លងផែនការសកម្មភាពឆ្នាំ២០២០ របស់បណ្ឌិត្យសភានគរបាលកម្ពុជា។

ក្រោមការដឹនាំរបស់លោកឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ កិច្ចប្រជុំឆ្លងផែនការសកម្មភាពឆ្នាំ២០២០របស់បណ្ឌិត្យសភានគរបាលកម្ពុជា នៅទីស្ដីការក្រសួងមហាផ្ទៃនាឱកាសនោះ មានការអញ្ជើញចូលរួមពីរដ្ឋលេខាធិការប្រចាំការ រដ្ឋលេខាធិការ អនុរដ្ឋលេខា អគ្គនាយក អគ្គនាយករង និងថ្នាក់ដឹកនាំជាន់ខ្ពស់នៃបណ្ឌិត្យសភានគរបាលកម្ពុជាជាច្រើនរូបទៀត។

អញ្ជើញមានប្រសាសន៍បើកកិច្ចប្រជុំ លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានគូសបញ្ជាក់ថា កិច្ចប្រជុំឆ្លងផែនការសកម្មភាពរបស់បណ្ឌិត្យសភានគរបាលកម្ពុជានាពេលនេះ គឺបានប្រព្រឹត្តទៅបន្ទាប់ពីកាលពីពេលថ្មីៗនេះ ក្រសួងក៏ទើបតែបានឆ្លងផែនការសកម្មភាពអគ្គស្នងការដ្ឋាននគរបាលជាតិ និងអគ្គនាយកដ្ឋានអន្ដោប្រវេសន៍ ដែលជាធម្មតាគឺមានការកែសម្រួល និងបន្ថែមធាតុចូលខ្លះៗបន្ថែមទៀត។

ពាក់ព័ន្ធនឹងការកសាងផែនការ និងការដាក់ចេញទិសដៅត្រូវអនុវត្ត លោកឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ក៏បានជំរុញឱ្យបណ្ឌិត្យសភានគរបាលកម្ពុជឋ ពន្លឿនកិច្ចការទាំងនេះឱ្យបានឆាប់ ទោះមានកិច្ចខ្លះជារឿងថ្មី និងត្រូវបានធ្វើឡើងនៅក្នុងបរិបទនៃការរីករាលដាលជំងឺកូវីដ១៩ក៏ដោយ។ លោកឧបនាយករដ្ឋមន្ដ្រី ក៏បានណែនាំឱ្យថ្នាក់ដឹកនាំពាក់ព័ន្ធបន្តពង្រឹងយន្តការកែទម្រង់ឱ្យបានខ្លាំងក្លា និងមានប្រសិទ្ធភាព ក្នុងនោះក៏ត្រូវបែងចែកកងកម្លាំងបំពេញភារកិច្ចឱ្យបានច្បាស់លាស់ដែរ។

លោកឧបនាយករដ្ឋមន្ដ្រី ស ខេង បានបន្តថា សម្រាប់នគរបាលដែលបញ្ចប់ការសិក្សា និងតាំងស៊ុបជាមន្ត្រីនគរបាលជាតិ ត្រូវបែងចែកឱ្យបំពេញការងារនៅអង្គភាពដែលមានតម្រូវការធនធានពិតប្រាកដ និងចាំបាច់ ពោលគឺមិនអាចបណ្ដែតបណ្ដោយឱ្យទៅប្រមូលផ្ដុំនៅអង្គភាពណាមួយដែលមិនសូវមានតម្រូវការនោះទេ។ ដោយឡែកក្នុងកិច្ចប្រជុំ លោកឧបនាយករដ្ឋមន្ដ្រី ស ខេង និងអង្គប្រជុំក៏បានពិភាក្សាគ្នាអំពីការផ្ដល់ការលើកទឹកដល់គ្រូនគរបាលដែលមានស្នាដៃល្អ និងអំពីត្រូវការគ្រូបន្ថែមនាពេលខាងមុខដែរ។

លោកឧបនាយករដ្ឋមន្ដ្រី ស ខេង ក៏បានណែនាំថ្នាក់ដឹកនាំបណ្ឌិត្យសភានគរបាលកម្ពុជា ត្រូវបន្តបង្កើនការបើកវគ្គបណ្ដុះបណ្ដាលរយៈពេលខ្លីលើមុខជំនាញចាំបាច់ និងទាន់សភាពការណ៍វិវត្តន៍ជាក់ស្ដែងមួយចំនួន ជូនដល់ថ្នាក់ដឹកនាំនគរបាលគ្រប់លំដាប់ថ្នាក់ ដើម្បីបានជាទុនបន្ថែមក្នុងការពង្រីងចំណេះដឹង ពង្រឹងជំនាញ និងសម្រាប់ការអប់រំ ផ្សព្វផ្សាយ ណែនាំដល់មន្ត្រីនគរបាលក្រោមឱវាទ ដោយវគ្គបណ្ដុះបណ្ដាលនោះអាចធ្វើឡើង២ទៅ៣ថ្ងៃក៏បាន។ អង្គប្រជុំក៏បានពិភាក្សាគ្នាដែរអំពីតម្រូវការធនធានកងកម្លាំងនគរបាលប្រចាំឆ្នាំ ដើម្បីបំពេញចំនួនមន្ត្រីនគរបាលដែលចូលនិវត្តន៍ ឬមានបញ្ហាសុខភាព ឬត្រូវបានបណ្ដេញចេញ និងក៏ដើម្បីឆ្លើយតបនឹងសេចក្ដីត្រូវការក្នុងកិច្ចការពារសន្តិសុខ សណ្ដាប់ធ្នាប់សាធារណៈ សុវត្ថិភាពសង្គម និងកិច្ចការពារព្រំដែន៕

លោកស្រី ម៉ែន សំអន ថ្លែងអំណរគុណចំពោះសប្បុរសជនបានបរិច្ចាគថវិកាគាំទ្រសកម្មភាពមនុស្សធម៌

ភ្នំពេញ៖ នៅថ្ងៃទី ២៨ ខែ មេសា ឆ្នាំ ២០២០ លោកស្រី ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានជួបសំណេះសំណាល និងប្រគល់ថវិការរបស់សប្បុរសជនដែលបានបរិច្ចាគគាំទ្រសកម្មភាពមនុស្សធម៌
ទៅកាន់លោកស្រី ដួង វណ្ណា ប្រធានកិត្តិយសសាខាបានដឹកនាំក្រុមការងារសាខាខេត្តស្វាយរៀង មកទទួលថវិការចំនួន២៨,៧០០ ដុល្លារ និង ១៨,៩០០,០០០ រៀល សម្រាប់សាខាស្វាយរៀង សម្រាប់ចូលរួមអបអរសាទរខួបទី ១៥៧ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ ២០២០ ក្រោមប្រធានបទ «ខ្ញុំ ស្រឡាញ់សន្តិភាព និងកាកបាទក្រហមកម្ពុជា» ដែលពិធីនេះប្រារព្វធ្វើនៅភូមិគ្រឹះរបស់លោកស្រីកិត្តិសង្គហបណ្ឌិតផ្ទាល់ស្ថិតនៅខ័ណ្ឌចំការមន ក្នុងរាជធានីភ្នំពេញ។

ក្នុងពិធីនោះលោកស្រី ម៉ែន សំអន បាន ថ្លែងអំណរគុណចំពោះសប្បុរសជន និងការផ្តាំផ្ញើសាកសួរសុខទុក្ខពីសំណាក់លោកស្រីបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនលោក លោកស្រី ទាំងអស់ ដែលបានបរិច្ចាគធនធានផ្ទាល់ខ្លួននាពេលកន្លងមកក៍ដូចជាពេលនេះ ដើម្បីរួមចំណែកក្នុងសកម្មភាពមនុស្សធម៌។ លោកស្រីបានមានប្រសាសន៍ផ្តាំផ្ញើដល់សប្បុរសជនទាំងអស់ សូមបន្តជួយជាសម្ភារៈថវិកា ដើម្បីចូលរួមក្នុងយុទ្ធនាការទប់ស្កាត់ការរីករាលដាលជំងឺកូវីដ១៩ ដែលកំពុងកើតឡើងនៅលើពិភពលោក ក៍ដូចជាក្នុងប្រទេសកម្ពុជាយើងផងដែ ៕

អភិបាលខេត្តបាត់ដំបង ប្រគល់ធុងបាញ់ថ្នាំ ទឹកថ្នាំបាញ់សម្លាប់មេរោគ និងសាប៊ូ ដល់សាលារៀនចំនួន ៦កន្លែង

បាត់ដំបង៖ នៅថ្ងៃទី២៩ ខែមេសា ឆ្នាំ២០២០ លោក ងួន រតនៈ អភិបាល នៃគណៈអភិបាលខេត្តបាត់ដំបង បានប្រគល់ធុងបាញ់ថ្នាំ ទឹកថ្នាំបាញ់សម្លាប់ មេរោគ និងសាប៊ូ ដល់សាលារៀនចំនួន ៦ នៅក្នុងក្រុងបាត់ដំបង ដែលមានការអញ្ជើញចូលរួម អភិបាលរងខេត្ត នាយករដ្ឋបាលខេត្ត លោកនាយក និងលោកគ្រូ អ្នកគ្រូផងដែរ។

សូមជម្រាបជូនថា ក្នុងពិធីប្រគល់សម្ភារៈដែលទទួលបានមានរួមមាន ធុងបាញ់ថ្នាំ ចំនួន ១ នាក់ ទឹកបាញ់ថ្នាំសម្លាប់មេរោគចំនួន ៨០ លីត្រ និងសាប៊ូ ១ កេស ដែលប្រគល់ជូនសាលារៀនចំនួន ៦ រួមមាន វិទ្យាល័យព្រះមុនីវង្ស វិទ្យាល័យ នេតយ៉ង់ វិទ្យាល័យសម្តេចឪ វិទ្យាល័យក្តុលដូនទាវ សាលាហ្វាពន្លឺសិល្បៈ និងវិទ្យាស្ថានគរុកោ និងវិក្រឹតការខេត្តបាត់ដំបង។

សូមបញ្ជាក់ផងដែរថា សម្ភារៈ ដែលបានប្រគល់ជូនសាលានាពេលនេះ គឺទទួលបានពីសប្បុរជននានា ដែលប្រគល់ជូនរដ្ឋបាលខេត្ត សម្រាប់ធ្វើការបែងចែកតាមតម្រូវការជាក់ស្តែង៕