Thursday, November 05, 2015
សម្តេចតេជោ ហ៊ុន សែន ចេញសេចក្តីសម្រេចតែងតាំង សមាសភាពគណៈកម្មាធិការទទួលបន្ទុកការងារព្យាបាល និងស្ដារនីតិសម្បទា អ្នកញៀនគ្រឿងញៀន
នៅថ្ងៃទី០៥ ខែវិច្ឆិកា ឆ្នាំ២០១៥នេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានចេញសេចក្តីសម្រេចតែងតាំង សមាសភាពគណៈកម្មាធិការ ទទួលបន្ទុកការងារព្យាបាល និងស្តារនីតិសម្បទា អ្នកញៀនគ្រឿងញៀន ដែលមានលោក ម៉ម ប៊ុនហេង រដ្ឋមន្រ្តីក្រសួងសុខាភិបាល ជាប្រធាន, លោក អេង ហួត រដ្ឋលេខាធិការក្រសួងសុខាភិបាល, លោក នឹម ថូត រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងលោក ហ៊ុយ ហាន សុង រដ្ឋលេខាធិការក្រសួងការងារ ជាអនុប្រធាន៕
សមាជិកសភាគណបក្សប្រជាជន នឹងទៅសួរសុខទុក្ខអ្នកតំណាងរាស្ត្របក្សប្រឆាំង
យោងតាមសេចក្តីប្រកាសព័ត៌មានរបស់ អគ្គលេខាធិការដ្ឋាន រដ្ឋសភា នៅថ្ងៃទី ០៥ ខែវិច្ឆិកា ឆ្នាំ២០១៥ បានឲ្យដឹងថា គណៈប្រតិភូរដ្ឋសភាដែលមកពីគណបក្សប្រជាជនកម្ពុជា នឹងចុះបំពេញ បេសកម្មសួរសុខទុក្ខ ឯកឧត្តម គង់ សភា តំណាងរាស្ត្រមណ្ឌលខេត្តស្វាយរៀង និងឯកឧត្តម ញ៉យ ចំរើន តំណាងរាស្ត្រមណ្ឌលខេត្ត កំពង់ចាម នៅទីក្រុងបាងកក ប្រទេសថៃ ដែលរងអំពើហិង្សាកាលពីថ្ងៃទី ២៦ ខែតុលា ឆ្នាំ២០១៥ នៅខាងក្រៅរបងមន្ទីរដ្ឋសភា ក្បែរស្ថានទូតអូស្ត្រាលី បន្ទាប់ពីបាតុកម្មអហិង្សាស្នើដកលោក កឹម សុខា ត្រូវបានរំសាយ។
ការសួរសុខទុក្ខអ្នកតំណាងរាស្ត្រគណបក្សសង្គ្រោះជាតិទាំងពីររូបនេះ គឺធ្វើឡើងចាប់ពីថ្ងៃទី ០៦ ដល់ថ្ងៃទី ០៨ ខែវិច្ឆិកា ឆ្នាំ២០១៥ តាមការចាត់តាំងពី សម្តេចពញាចក្រី ហេង សំរិន ប្រធានរដ្ឋសភា ដោយឯកឧត្តម ឈាង វុន សមាជិករដ្ឋសភាមកពីគណបក្សប្រជាជនកម្ពុជា ជាអ្នកចុះបំពេញបេសកម្មសួរសុខទុក្ខនេះ។ សំរាប់គណៈប្រតិភូអមដំណើររួមមាន ឯកឧត្តម យ៉ែម បុញ្ញាឬទ្ធិ និងលោកជំទាវ បាន ស្រីមុំ៕
សម្តេចតេជោ ហ៊ុន សែន ព្រមាន បង្ហោះសារដែល ឯកឧត្តម សម រង្ស៊ី បានសរសេរសុំទោស
សម្តេចនាយករដ្ឋមន្រ្តី ហ៊ុន សែន នៅថ្ងៃព្រហស្បត្តិ៍នេះ បានព្រមានបង្ហោះសារ សុំទោសរបស់ ឯកឧត្តម សម រង្ស៊ី នៅលើបណ្តាញទំនាក់ទំនងសង្គម Facebook បើសិនជាមេបក្សប្រឆាំងរូបនេះ បានធ្វើអ្វីខុសនឹងពាក្យសម្តី ដែលខ្លួនបានសន្យាជាមួយសម្តេច។ ការលើកឡើងរបស់សម្តេចតេជោ ហ៊ុន សែន ធ្វើឡើងនៅព្រឹកថ្ងៃទី០៥ ខែវិច្ឆិកា ឆ្នាំ២០១៥ នេះ ខណៈសម្តេចតេជោ ហ៊ុន សែន បានអញ្ជើញអធិបតីភាព បើកសម្ពោធ «គម្រោងការពារទឹកជំនន់ និងកែលំអប្រព័ន្ធប្រឡាយលូ» នៅក្នុងរាជធានីភ្នំពេញ។
សម្តេចបានថ្លែងថា « ឯកឧត្តម សម រង្ស៊ី អើយ ! ឯកឧត្តមបានវ៉ៃ SMS សុំទោសខ្ញុំ បើសិនជាឯកឧត្តម ហ៊ានប្រថុយប្រថានបំពានទៅលើអ្វីដែលឯកឧត្តម សុំទោសខ្ញុំនេះ ខ្ញុំនឹងបង្ហោះតាមFacebook » ។
សម្តេចនាយករដ្ឋមន្រ្តី បានអះអាងថា ឯកឧត្តម សម រង្ស៊ី បានផ្ញើសារសុំទោស ទៅសម្តេច កាលពីថ្ងៃទី២៩ ខែតុលា ឆ្នាំ២០១៥ គឺមុនបាតុកម្មទាមទារទម្លាក់ ឯកឧត្តម កឹម សុខា ចេញពីអនុប្រធានទី១ នៃរដ្ឋសភា មួយថ្ងៃ។ជាមួយគ្នានេះដែរ សម្តេចនាយករដ្ឋមន្រ្តី ហ៊ុន សែន បានជំរុញឱ្យឯកឧត្តម សម រង្ស៊ី គ្រប់គ្រងផ្ទៃក្នុងឱ្យបានល្អ និងទប់ស្កាត់នូវការប្រើប្រាស់ពាក្យជេរ ប្រមាថមកលើរាជរដ្ឋាភិបាល ៕
សម្តេចតេជោអះអាងថា រាជរដ្ឋាភិបាលកម្ពុជា មិនបានប៉ះពាល់លុយជំនួយរបស់ជប៉ុនទេ
អញ្ជើញជាអធិបតីភាពក្នុងពិធីសម្ពោធគម្រោងការពារទឹកជំនន់ និងកែលំអប្រព័ន្ធប្រឡាយលូ ជំហានទី៣ ក្នុងរាជធានីភ្នំពេញ នៅថ្ងៃទី ០៥ ខែវិច្ឆិកា ឆ្នាំ២០១៥នេះ សម្តេចតេជោ បានលើកឡើងថា ប្រាក់ជំនួយឥតសំណងរបស់ប្រទេសជប៉ុនក្នុងគម្រោងផ្សេងៗ គឺរាជរដ្ឋាភិបាល កម្ពុជាមិនបានកាន់កាប់ដោយផ្ទាល់ទេ គឺជប៉ុនដែលជាម្ចាស់ជំនួយ ជាអ្នកអនុវត្តន៍ការដេញថ្លៃ និងការស្ថាបនាដោយខ្លួនឯង។
ការលើកឡើងរបស់សម្តេចតេជោ គឺធ្វើឡើងនៅចំពោះមុខ ឯកឧត្តមឯកអគ្គរដ្ឋទូតជប៉ុនប្រចាំ នៅកម្ពុជា និងដើម្បីឆ្លើយតប និងការចោទប្រកាន់ពីមជ្ឈដ្ឋានមួយចំនួនដែលថា រាជរដ្ឋាភិបាល បានប្រព្រឹត្តអំពើពុករលួយនៅក្នុងប្រាក់ជំនួយរបស់ជប៉ុននេះ។ សម្តេចតេជោ បានមានប្រសាសន៍ថា «លុយជំនួយនេះ គឺជប៉ុនគេផ្តល់ឲ្យតែគេដាក់ដេញថ្លៃនៅទីក្រុងតូក្យូ រដ្ឋាភិបាលកម្ពុជា មិនមែនជាអ្នកកាន់លុយទេ សូមឯកឧត្តមឯកអគ្គរដ្ឋទូតជប៉ុន ពន្យល់បក្សប្រឆាំងផង ថាវិធីប្រើលុយ របស់ជប៉ុន គឺជប៉ុនមិនប្រគល់លុយឲ្យខ្មែរកាន់ទេ»។ សម្តេចតេជោ «បានលើកឡើងថា មានគេចោទប្រកាន់ថា យើងយកលុយជប៉ុននេះមកប្រព្រឹត្តអំពើពុករលួយ ទាំងរឿងស្ពាន អ្នកលឿង គឺមិនពិតទាល់តែសោះ ព្រោះសម្តេចគ្រាន់តែជាអ្នកអញ្ជើញទៅបើកសម្ពោធប៉ុណ្ណោះ។
ទោះបីជាយ៉ាងណា សម្តេចតេជោ ហ៊ុន សែន បានបញ្ជាក់ថា គម្រោងរបស់ប្រទេសជប៉ុននេះ គឺមិនមែនធ្វើតែចំពោះកម្ពុជាទេ គឺធ្វើគ្រប់ប្រទេសដែលជប៉ុនផ្តល់ជំនួយដូចគ្នា។ សម្តេចបន្ថែមថា «មនុស្សមួយចំនួន ធ្វើអត្ថាធិប្បាយដោយគ្មានទំនួលខុសត្រូវថាជប៉ុនធ្វើចឹង ដោយសាររដ្ឋាភិបាល ខ្មែរពុករលួយបានគេធ្វើចឹង សូមឲ្យឯកអគ្គរដ្ឋទូតជប៉ុនជួយពន្យល់ទៅពួកប្រឆាំង ពីរបៀបរបប ប្រើលុយរបស់ជប៉ុនផងកុំឲ្យគេចេះតែថា។ យើងនិយាយគ្នាដោយស្មោះត្រង់ កុំឲ្យបង្ខួចកេរ្តិ៍ឈ្មោះ ពូជសាសន៍ឯងចឹងវាហួសហេតុពេក»។
សម្តេចតេជោ បានពន្យល់ថា សូម្បីតែអង្គការក្រៅរដ្ឋាភិបាល អនុវត្តន៍គម្រោងមួយចំនួន ដែលប្រទេសជប៉ុនជួយ ក៏ជប៉ុនជាអ្នកអនុវត្តន៍ដែរ ហើយលុយជប៉ុនគឺមានតែក្រុមហ៊ុនជប៉ុនទៀត ដែរអាចចូលដេញថ្លែបាន នេះជាជំនួយឥតសំណងរបស់ជប៉ុន ប្រទេសនានាក៏គេធ្វើចឹងដែរ មិនមែនខុសគេអីតែកម្ពុជាទេ៕
សម្តេចតេជោ៖ ស្ថានភាពទីក្រុងភ្នំពេញកាន់តែមានការប្រែប្រួល
ក្នុងឱកាសសម្ពោធ គម្រោងការពារទឹកជំនន់ និងកែលំអប្រព័ន្ធប្រឡាយលូ ជំហានទី៣ ក្នុងរាជធានីភ្នំពេញ នៅថ្ងៃទី ០៥ ខែវិច្ឆិកា ឆ្នាំ២០១៥នេះ សម្តេចតេជោ បានលើកឡើងថា ក្នុងរាជធានីភ្នំពេញបានជួបប្រទះបញ្ហាកកស្ទះ៣យ៉ាងធំៗ ដែលចាំបាច់ត្រូវដោះស្រាយ៖ គឺកកស្ទះជំនន់ទឹកភ្លៀង កកស្ទះសំរាម និងកកស្ទះចរាចរ ហើយសមិទ្ធផលនៅថ្ងៃនេះ គឺមានវិសាលភាពគ្របដណ្តប់លើតំបន់មួយចំនួន ដើម្បីរំដោះទឹកចេញពីទីក្រុងភ្នំពេញ ដើម្បីកាត់ បន្ថយការលិចក្នុងពេលភ្លៀងខ្លាំង។
សម្តេចតេជោរំលឹកថា «កាលពីឆ្នាំ១៩៧៩ និង១៩៨០ស្ថានភាពកកស្ទះទាំងបីនេះ មិនសូវមានទេ ទោះបីពី១៩៧៩មក មានភ្លៀងហើយលិចកន្លែងខ្លះ តែមិនសូវប៉ះពាល់ទេ ព្រោះមិនសូវមាន ប្រជាជនរស់នៅច្រើន និងអត់មានឡាន ដូច្នេះវាអត់ស្ទះចរាចរទេ។ តែឥឡូវនេះឲ្យតែមាន ស្ទះទឹកកន្លែងណា មួយគឺស្ទះចរាចរកន្លែងនោះតែម្តង»។ សម្តេចបានបន្ថែមថា ជប៉ុនបានចូលរួមចំណែកដោះស្រាយបញ្ហាទាំងអស់នេះ ជាបន្តបន្ទាប់ ពិសេសគឺប្រព័ន្ធលូ នេះឯង។ សម្តេចតេជោ ហ៊ុន សែន បានលើកឡើងថា «បើយើងសំលឹងមើល ពីទីក្រុងមួយ ដែលស្លាប់ទៅហើយ ហើយចាប់ផ្តើមរស់ឡើងវិញ ជាមួយនិងការខិតខំដោយបាតដៃទទេ ពីពលរដ្ឋរបស់យើង យើងអាចដឹងបានថាកំលាំងប្រឹងរបស់យើងរួមគ្នា នៅពេលនោះគឺខ្លាំង កំរិតណា»។ សម្តេចតេជោគូសបញ្ជាក់ថា «បើយើងកុំផ្តួលរំលំរបបប៉ុលពតឆ្នាំ១៩៧៩ នៅកន្លែងនេះ ក្លាយទៅជាស្អីពិតប្រាកដ ច្បាស់ជាចំការដូងដុះពេញទាំងអស់ ព្រោះតាមសួនច្បារ និងសូម្បីតែ ផ្សារថ្មីក៏សុទ្ធតែដើមដូងដែរនៅពេលនោះ។ បើកុំតែយើងផ្តួលរំលំរបបប៉ុលពត ភ្នំពេញនេះ មិនមែនជាភ្នំពេញដែលមានមនុស្សរស់នៅទេ គឺភ្នំពេញជាចំការដូង។ ប៉ុន្តែបន្ទាប់ពីរំដោះហើយ យើងបានប្រឹងបន្តិចម្តងៗតាំងពីការស្តារស្ថានភាពសួនច្បារ ដើម្បីសម្រួលដល់ការរស់នៅ និងការកំសាន្តរបស់ប្រជាពលរដ្ឋ»។
ទោះបីជាគម្រោងការពារទឹកទំនន់ និងកែលំអប្រព័ន្ធប្រឡាយលូ បានធ្វើជាបន្តបន្ទាប់ ចាប់ពីជំហានទី១មកក្តី ក៏ប៉ុន្តែសម្តេចតេជោ អះអាងថាដោយសារស្ថានភាព ភូមិសាស្ត្រដី នៅរាជធានីភ្នំពេញទាប បើផ្អែកតាមការវាស់នីវ៉ូទឹកសមុទ្រ ដូច្នេះគឺចៀសមិនផុត ពីការគំរាម កំហែងដោយជំនន់ទឹកភ្លៀង។ សម្តេចបន្ថែមថា ការជន់លិចក្នុងកំឡុងពេលភ្លៀងខ្លាំងម្តងៗ គឺដោយសារប្រព័ន្ធលូក្នុងរាជធានីភ្នំពេញ ដែលទទួលរងទឹកភ្លៀង វាមិនគ្រប់ក្នុងការរំដោះទឹក នេះចេញ គឺបើមានធ្លាប់ពី៨០ ទៅ១០០មីលីម៉ែត្រក្នុងមួយពេល គឺទោះបីជាលូធំប៉ុណ្ណា ក៏ត្រូវលិចមួយភ្លេតដែរ។ សម្តេចបន្តថា មិនថាតែក្រុងភ្នំពេញទេ ទីក្រុងឡុង ទីក្រុងបាងកក ក៏លិចដែរ ហើយទីក្រុងណាក៏លិចដែរ សូម្បីតែជប៉ុនដែលជាម្ចាស់ជំនួយនេះក៏ធ្លាប់លិចដែរ។ ទោះជាយ៉ាងណា សម្តេចតេជោ បានមានប្រសាសន៍ថា កាលពីមុនភ្លៀងតិចរឺច្រើន គឺលិចរហូត ប៉ុន្តែឥឡូវនេះ គឺប្រសើរជាងមុន គឺទាល់តែភ្លៀងខ្លាំងបានលិច នេះជាអ្វីដែលយើងបានធ្វើ ពីជំហានទី១ មកដល់ជំហានទី៣ និងនៅតែបន្តជំហានទី៤ទៀត៕
សម្តេចតេជោ៖ កុំធ្វើការវិភាគដោយប្រមាថ និងមិនទទួលខុសត្រូវ
ឆ្លើយតប និងការលើកឡើងផ្សេងៗជុំវិញការ ផ្អាកពិធីបុណ្យអុំទូកឆ្នាំនេះ សម្តេចតេជោ ហ៊ុន សែន នាយករដ្ឋមន្ត្រី នៅថ្ងៃទី ០៥ ខែវិច្ឆិកា ឆ្នាំ២០១៥នេះ បានមានប្រសាសន៍ថា «ខ្ញុំបានចេញ សារាចរណែនាំស្តីពីការផ្អាកបុណ្យអុំទូក ព្រោះទឹកទន្លេវាក្រោម៥ម៉ែត្រទៅហើយ ថ្ងៃនេះដូចជា នៅ៤ម៉ែត្រ៣តឹក ចឹងទំរំាំដល់បុណ្យអុំទូកនៅសល់២០ថ្ងៃទៀត។ ចឹងបើយើងគិតថាមួយថ្ងៃ ចុះត្រឹម៥ផឹង គឺដល់បុណ្យអុំទូក គឺអាចចុះ១ម៉ែត្រទៀត ចឹងពេលបុណ្យអុំទូក អុំលែងកើត ហើយ។ សម្តចតេជោបានបន្ថែមថា ឥឡូវអ្នកតំណាងរាស្ត្រ សង្គមស៊ីវិលដែលធ្វើអត្ថាធិប្បាយ ចូលមកអុំទូកទៅខ្ញុំចេញលុយឲ្យ ខ្ញុំហ៊ានឲ្យខ្ចីទូកឪខ្ញុំទៀត តើអុំទៅវាត្រូវបច្ចេកទេសអត់? សូមគិតផង នេះជាការធ្វើអត្ថាធិប្បាយតាមរបៀបប្រមាថ មិនអាចទទួលយកបានជាដាច់ខាត»។
នៅក្នុងពិធីសម្ពោធ គម្រោងការពារទឹកជំនន់ និងកែលំអប្រព័ន្ធប្រឡាយលូ ជំហានទី៣ ក្នុងរាជធានីភ្នំពេញ ដែលជាជំនួយឥតសំណងរបស់ជប៉ុន នៅទីតាំងសួនច្បារ មុខវត្តបទុមវត្តី សម្តេចតេជោ ហ៊ុន សែន បានបញ្ជាក់ជូនសាធារណៈជនទាំងអស់ថា តាមការព្យាករណ៍ថា ទៅដល់ថ្ងៃបុណ្យអុំទូនៅសល់៤ម៉ែត្រប៉ុណ្ណោះ។ សម្តេចបានបន្ថែមថា «នៅក្នុងកិច្ចប្រជុំសភា កាលពីសប្តាហ៍មុន យើងក៏បានពិភាក្សាផងដែរអំពីការ បន្ថយចំណាយទីប្រណាំង ពី១៧០០ម៉ែត្រ មក១៥០០ម៉ែត្រ ដោយសារបញ្ហាកំពស់ទឹកពេលដែលយើងកំពុងប្រជុំហ្នឹង នៅសល់ជាង៥ម៉ែត្រ ចុះទំរំាធ្លាក់ចុះជាងហ្នឹងទៀតតើវាអុំម៉េចទៀត? អុំវាមិនកើត ជាបច្ចេកទេសទៅវាមិនរួច»។
សម្តេចតេជោ បានមានប្រសាសន៍ថា «សូមអ្នកធ្វើអត្ថាធិប្បាយចេញមកដើម្បីនិយាយគ្នាឲ្យច្បាស់ លោកឯងយកទូកមកអុំទៅ ទឹកប៉ុណ្ណឹងឲ្យលោកឯងអុំទៅ ខ្ញុំជួយចេញលុយឲ្យជាពិសេស អ្នកវិភាគ។ ពិសេសជាអ្នកនយោបាយខ្លះ រហូតថារាជរដ្ឋាភិបាលមិនហានព្រោះ ខ្លាចគណបក្ស សង្គ្រោះជាតិធ្វើបាតុកម្ម សូមអញ្ជើញចេញមកធ្វើបាតុកម្មចុះ»។ សម្តេចបន្ថែមថា «ឥឡូវថ្នាក់ ដល់រាជរដ្ឋាភិបាលខ្លាចប្រជាជនហើយ? ការពិតខ្ញុំចង់ឲ្យប្រជាជនមកលេងក្រុង ភ្នំពេញណាស់ ទោះបីមិនមានបុណ្យអុំទូកមែន ក៏ប៉ុន្តែគឺមានពិធីដ៏ទៃទៀត ដូចការរៀបចំប្រគុំតន្ត្រី និងស្តង់ ពិពរណ៍ទំនិញជាដើម»។ សម្តេចបានលើកឡើងថា ទូកដែលល្បីហើយលឿនៗ គឺទូកមកពីកំពង់ធំ ប៉ុន្តែទម្លាក់មកតាមណា អាចធ្វើឲ្យទូកខូច អុំឆ្នាំក្រោយមិនកើតទៀត ហើយអត់ចំណុះទូកទៀត ព្រោះបញ្ហាឥឡូវនេះ ពួកគាត់ត្រូវធ្វើស្រែប្រដេញទឹក ព្រោះវាអត់ទឹកហើយការតើទម្លាក់ទូក មកតាមណារួច បើវាអត់ទឹកពីដើមទម្លាក់មកតាមទន្លេសាប ទើបបានទាញទូកយកមកអ៊ុំឥឡូវទន្លេសាបអត់ទឹកចេញមិនរួចទេ។ សម្តេចតេជោ មានប្រសាសន៍ថា «អ្នកនៅតាមទន្លេមេគង្គ បើអត់១ម៉ឺនដុល្លារទេ គឺយកទូកនិងចិញ្ចឹមចំណុះទូកនៅភ្នំពេញកើតទេ សូមអ្នកវិភាគយល់ឲ្យ ច្បាស់កុំព្រហើន»។
សម្តេចបានសង្កត់ធ្ងន់ថា សម្តេចជាអ្នកទទួលខុសត្រូវដឹកនាំប្រទេសនេះ ហើយអ្នកទាំងអស់នោះ មានសិទ្ធិប៉ុន្តែសូមអស់លោក មានភាពថ្លៃថ្នូរគិតពិចារណាឲ្យបានម៉ត់ចត់ កុំអាងតែខ្លួនមានសិទ្ធិ សេរីភាពក្នុងការបញ្ចេញមតិដោយខ្វះការទទួលខុសត្រូវ ខ្វះវិចារណញ្ញាណ។ សម្តេចបន្តថា «ខ្ញុំដឹងហើយ ល្បែងអស់លោកគឺចឹង បើមិនធ្វើវិភាគចឹងគេមិនឲ្យលុយទេ ព្រោះលោកឯង ស៊ីឈ្នួលវិភាគ ហើយវិភាគវ៉ៃរដ្ឋាភិបាលរហូត ប៉ុន្តែសូមអស់លោកត្រូវចាំមួយម៉ាត់ឲ្យច្បាស់ថា រាជរដ្ឋាភិបាលមានអ្នកគាំទ្រច្រើនជាងបក្សប្រឆាំងទៅទៀត»។ សម្តេចតេជោ បានបញ្ជាក់ថា «បើអ្នកឯងមានសិទ្ធិធ្វើបាតុកម្ម គេក៏មានសិទ្ធិដូចអ្នកឯងដែរ អ្នកប្រឆាំងមានសិទ្ធិធ្វើបាតុកម្ម អ្នកគាំទ្រក៏មានសិទ្ធិធ្វើបាតុកម្មដែរ ខ្ញុំមិនលើកទឹកចិត្តឲ្យធ្វើបាតុកម្មទេ ហើយខ្ញុំកាន់តែប្រឆាំង នឹងអំពើហិង្សា តែអ្នកទាំងឡាយចូលចិត្តណាស់ ប្រមាថនាយករដ្ឋមន្ត្រី ប្រមាថរាជរដ្ឋាភិបាល ថាប្រជាជនចូលក្រុងច្រើនពេកធ្វើបាតុកម្ម ឥឡូវចូលមកប៉ុន្មាននាក់? ខ្ញុំរៀបចំប្រគុំតន្ត្រីឲ្យច្រើន ឲ្យទស្សនាសប្បាយ»។ សម្តេចបានអញ្ជើញប្រជាពលរដ្ឋឲ្យមកលេងទីក្រុងភ្នំពេញ ក្នុងរយៈ ពេលបុណ្យអុំទូក ព្រោះគ្រាន់តែអត់មានកម្មវិធីអុំទូកប៉ុណ្ណោះ ឯកម្មវិធីកំសាន្តផ្សេងទៀត នៅដដែល ហើយបើអ្នកណាចង់អុំ ហើយអុំកើតមកអុំទៅគ្រាន់តែក្រៅផ្លូវការប៉ុណ្ណោះ។ សម្តេចតេជោ នឹងបង្វែរ ថវិកាដែលសំរាប់ចំណាយពេលបុណ្យអុំទូក ទៅទិញប្រេងបូមទឹកដាក់ស្រែ សង្គ្រោះស្រូវ នៅខេត្តដែល ខ្វះទឹកធ្វើស្រែ តើរឿងហ្នឹងអ្នកវិភាគគិតយ៉ាងម៉េច? សម្តេចបានរំលឹកថា «នៅឆ្នាំមុនគឺទឹកទន្លេទាប ដែរ៦ម៉ែត្រជាង ចំណុះទូកអុំចង់ដាច់ខ្យល់។ កំរិតទឹកល្អគួរ៧ម៉ែត្រ តែបើឡើងលើស ពី៨ម៉ែត្រកន្លះទៅ១០ម៉ែត្រពិបាកទៀត ព្រោះខ្លាចគ្រោះថ្នាក់ ព្រោះឆ្នាំមួយនោះ មានបរទេស មកអុំទូកស្លាប់អស់ប៉ុន្មាននាក់ ព្រោះទឹកហូរគួចខ្លាំង អាអត់ហូរក៏ពិបាកអុំដែរ»។ សម្តេចតេជោ បានសង្កត់ធ្ងន់ថា ព្រោះការប្រមាថតាមការរយៈការធ្វើអត្ថាធិប្បាយនេះ និងការវិភាគបែបនេះ គឺជាការព្រហើនដែលមិនអាចទទួលយកបាន។ សម្តេចតេជោបន្តថា ក្នុងនាមខ្ញុំជាអ្នកចុះ ហត្ថលេខា រឿងនេះ សម្តេចបានធ្វើការពិភាក្សាជាមួយប្រធានរដ្ឋសភា ពិគ្រោះជាមួយបណ្តាឧបនាយក រដ្ឋមន្ត្រី គឺពិភាក្សាគ្នាម៉ត់ចត់ណាស់ ហើយក៏ឆ្លៀតទូលសម្តេចម៉ែ ព្រះមហាក្សត្រថាឆ្នាំនេះអុំទូក អត់កើតទេ ព្រោះទឹកទន្លេទាបពេក។ សម្តេចរំលឹកថា ដូច្នេះកុំឲ្យវិភាគថា រឿងអីក៏ដោយគឺមាន នយោបាយនៅពីក្រោយរហូត និងកុំឲ្យកំដៅ នយោបាយកាន់តែខ្លាំងដោយសារអស់លោក៕
Subscribe to:
Posts (Atom)