នៅថ្ងៃទី១៩ ខែមេសា ឆ្នាំ២០១៧នេះ ទំព័រហ្វេសប៊ុកចៅចាក់ស្មុក បានបង្ហោះផ្សាយអត្ថបទ មួយក្រោមចំណងជើងថា «រាជការទុកផ្លូវឱ្យរស់!» ដែលមានខ្លឹមសារដូចខាងក្រោម៖
ខណៈខ្លួនប្រព្រឹត្តកំហុសដោយខ្លួនឯង ព្យាយាមទម្លាក់កំហុសលើរាជការថា គាបសង្កត់ធ្វើបាប តែត្រូវបរាជ័យព្រោះខ្លួនបានធ្វើខុសនឹងលក្ខន្តិកៈបក្សខ្លួន តែចង់មកជះកំហឹង និងកំហុសលើអ្នកត្រួតពិនិត្យការអនុវត្តច្បាប់នគរទៅវិញ។ ឥឡូវនេះបង្ហាញកាន់តែច្បាស់ហើយថាមូលហេតុដែលរាជការក្រសួងមហាផ្ទៃ មិនទទួលស្គាល់ក្បាលម៉ាស៊ីនដឹកនាំលើកទី១ គឺព្រោះស្ថានភាព កូនកើតមុនឪ លក្ខន្តិកៈដែលធ្វើវិសោធនកម្មមិនទាន់ត្រូវបានទទួលស្គាល់ផង បែរជានាំគ្នាបោះឆ្នោតជ្រើសរើសក្បាលម៉ាស៊ីនថ្មីភ្លាមៗ។
លើកទី២ ទទួលស្គាល់ កឹម សុខា ជាមេបក្ស តែមិនទទួលស្គាល់មេបក្សរងទាំងបី ដោយសារតែបក្សព្រះអាទិត្យប្រព្រឹត្តកំហុសទី២ ជ្រើសរើសមេបក្ស និងមេបក្សរងសារជាថ្មី បន្ទាប់ពីរាជការក្រសួងមហាផ្ទៃផ្តល់សុពលភាពលក្ខន្តិកៈបក្ស អ្នកចេះដឹងម៉ាបក្សរកអ្នកផ្សំថ្នាំគ្មានធ្វើខុសជាន់លើខុស ជ្រើសរើសមេបក្សរងលើសពី ៣០ ថ្ងៃដែលច្បាប់កំពូលបក្សបានកំណត់។ ខុសទៀត!! ចុងក្រោយបានអង្វររាជការក្រសួងមហាផ្ទៃប្រាប់ ថាតើត្រូវធ្វើយ៉ាងម៉េចបានត្រឹមត្រូវ? អស់ទាស់ លក្ខន្តិកៈសរសេរខ្លួនឯង អនុវត្តមិនត្រូវដែរ!!
ពេលនេះបក្សព្រះអាទិត្យចាប់ផ្តើមទទួលស្គាល់ការពិតហើយ! ការពិតដែលថាខ្លួនពិតជាបានប្រព្រឹត្តកំហុសឆ្គងក្នុងការអនុវត្តតាមលក្ខន្តិកៈបក្សជាពិសេសប្រការ ៤៧ របស់ខ្លួនមែន តាមរយៈសំឡេងរបស់ប៉ុល ហំម មេបក្សរងម្នាក់ដែលមិនត្រូវបានក្រសួងមហាផ្ទៃមិនទទួលស្គាល់ បានថ្លែងប្រាប់វិទ្យុអាស៊ីសេរីថា គណបក្សសង្គ្រោះជាតិ ទទួលស្គាល់ពីភាពចន្លោះប្រហោងនៃលក្ខន្តិកៈរបស់គណបក្សប្រឆាំងដែលតម្កល់នៅក្រសួងមហាផ្ទៃ។ គណបក្សនេះ នឹងធ្វើសមាជវិសាមញ្ញនៅសប្ដាហ៍ក្រោយ ដើម្បីកែសម្រួល និងបន្ថែមភាពចន្លោះប្រហោងនេះ។ បើតាម ប៉ុល ហំម គណបក្សសង្គ្រោះជាតិគ្រោងធ្វើសមាជជាថ្មីទៀតនៅថ្ងៃទី២៥ ខែមេសា ដើម្បីជ្រើសរើសអនុប្រធានគណបក្ស និងបន្ថែមមាត្រាខ្លះ ដើម្បីបំពេញភាពចន្លោះប្រហោងនៃលក្ខន្តិកៈរបស់គណបក្សតាមការចង់បានរបស់ក្រសួងមហាផ្ទៃ ព្រោះបក្សសង្គ្រោះជាតិមិនចង់មានភាពរកាំរកូសជាមួយក្រសួងមហាផ្ទៃ។
មានភាពរកាំរកូស? រាជការមហាផ្ទៃគ្មានហេតុផលអ្វីទៅមានភាពរកាំរកូសជាមួយនោះទេ! កុំចេះតែទាញចំណេញនយោបាយពេក! ធ្វើខុសខ្លួនឯង មើលមិនយល់លក្ខន្តិកៈខ្លួនឯង ខុសជាន់លើខុស បែរជានិយាយយកល្អតែឯង។ បើថាខិតខំប្រឹងអនុវត្តច្បាប់ឱ្យបានត្រឹមត្រូវ និងធ្វើត្រឹមត្រូវឱ្យបានតាមលក្ខន្តិកៈបក្សខ្លួនដែលសរសេរទៅ វាល្អជាង រាស្ត្រមួយនគរគ្មានថាស្អីទេ។ តែសង្ស័យថាអនុវត្តលក្ខន្តិកៈបក្សខុស ក្រែងលោបរទេសនៅពីក្រោយខ្នងជាអ្នកសរសេរឱ្យទេដឹង? បានជាមើលមិនយល់ អនុវត្តមិនត្រូវ ឬអ្នកសរសេរនៅស្ទើរភ្លើង? យល់មិនសព្វន័យ ចេះតែសរសេរឱ្យតែពីរោះស្តាប់។ រាស្ត្រគ្រាន់តែផ្តាំទៅបក្សព្រះអាទិត្យថា បើមិនខ្មេះទេ កុំព្យាយាមសរសេរលក្ខន្តិកៈស្មុកស្មាញពេក សរសេរសាមញ្ញៗ អនុវត្តងាយស្រួលធ្វើត្រឹមត្រូវតាមច្បាប់ ផ្លូវរស់មានច្រើនណាស់ សំខាន់លើអ្នកជ្រើសរើសទេតើ!! ចាំមើលៗ! ថាតើនៅថ្ងៃទី ២៥ ខែមេសា ខាងមុខនេះ បក្សព្រះអាទិត្យឆា ឬស្ងោរ អាំង លក្ខន្តិកៈបក្សរបស់ខ្លួនជាពិសេសកែប្រែប្រការ ៤៧ នេះយ៉ាងម៉េចទៀតដើម្បីឱ្យត្រឹមត្រូវ។
ចាំមើល! ទាំងអស់គ្នា! ម៉េចៗ កុំឱ្យខុសដល់ទៅបីដង បើខុសបីដង គេមិនហៅថាកំហុសអចេតនាទេ គឺល្ងិតល្ងង់តែម្តង!! បើគ្រាន់តែលក្ខន្តិកៈបក្សខ្លួនអនុវត្តមិនត្រង់ផ្លូវផង កោតស្រម៉ៃខ្ពស់ចង់ដណ្តើមតំណែងព្រះឥន្ទ្រគ្រប់គ្រងនគរផង!! មានតែជប់ឱ្យក្លាយជាអ្នកសុំទានវិញ!
ដោយ៖ ចៅ ចាក់ស្មុក
ដោយ៖ ចៅ ចាក់ស្មុក
