ក្រសួងមហាផ្ទៃ នឹងជ្រើសរើសនគបាលជាតិ ៣ដងក្នុងមួយឆ្នាំ ចាប់ពីឆ្នាំ២០១៧នេះ

រដ្ឋមន្ត្រីក្រសួងមហាផ្ទៃ នៅថ្ងៃទី១៨ មេសា ឆ្នាំ២០១៧ បានប្រកាសថា នៅក្នុងឆ្នាំបន្តបន្ទាប់ខាងមុខចាប់ពីឆ្នាំ២០១៧នេះទៅ ក្រសួងនឹងជ្រើសរើសមន្ត្រីចូលបម្រើការងារក្នុងជួរក្របខ័ណ្ឌនគរបាលជាតិ ៣ដង ក្នុងមួយឆ្នាំ។ ការជ្រើសរើសនេះ ដើម្បី បំពេញសេចក្តីត្រូវការ ការពារសន្តិសុខ សណ្តាប់ធ្នាប់សង្គម ពិសេសបំពេញកន្លែងទំនេរគ្មានមនុស្សធ្វើការនៅក្នុងអង្គភាពនគរបាល។

នៅក្នុងពិធីបិទវគ្គ បណ្តុះបណ្តាលកម្រិតបឋមវិជ្ជាជីវៈនគរបាល និងប្រកាសតាំងស៊ប់មន្ដ្រីធ្វើការពេញសិទ្ធិ មន្ត្រីនគរបាលជាតិចំនួនជិត៤០០នាក់ នៅសាលាបណ្ឌិតសភានគរបាលកម្ពុជា ដីឥដ្ឋ លោក ស ខេង រដ្ឋមន្ត្រីក្រសួងមហាផ្ទៃ មានប្រសាសន៍លើកឡើងថា បន្ទាប់ពីមានការឯកភាពពីប្រមុខថ្នាក់ដឹកនាំ នៃរាជរដ្ឋាភិបាល នៅក្នុងឆ្នាំបន្តបន្ទាប់ខាងមុនទៀតនេះ ពោលគឺចាប់ពីឆ្នាំ២០១៧ទៅ ក្រសួងមហាផ្ទៃ នឹងជ្រើសរើសមន្ត្រីនគរបាលចូលបំរើការងារ ៣ខែម្តង ក្នុងមួយឆ្នាំ ដែលការជ្រើសរើសនេះ នឹងធ្វើឡើងក្នុងករណីប្រសិន អង្គភាពនគរបាលណាមានការខ្វះមន្ត្រីនគរបាលបំរើការងារ ជំនួសកន្លែងមន្ត្រីចូលនិវត្ត ជំនួសមន្ត្រីបោះបង់ការងារ ជំនួសមន្ត្រីនគរ បាលដែលត្រូវបណ្តេញចេញ និងអ្នកគ្មានពេលគ្រប់គ្រាន់ចូលមកបំរើការងារនៅអង្គភាពនគរបាលជាដើម។
រដ្ឋមន្ត្រីក្រសួងមហាផ្ទៃ បានមានប្រសាសន៍បន្តថា ការជ្រើសរើសមន្ត្រីនគរបាលដែលត្រូវជ្រើសរើសថ្មី គឺត្រូវឆ្លងកាត់ការប្រលង ឆ្លងកាត់ការរៀនសូត្របំពាក់បំប៉នជំនាញវិជ្ជាជីវៈដូចគ្នា ។
ដោយឡែកសម្រាប់មន្ត្រីក្រសួងផ្សេង ដែលមានបំណងផ្ទេរការងារចូលបំរើការងារក្នុងជួរក្របខ័ណ្ឌមន្ត្រីនគរបាល ក៏ត្រូវឆ្លងកាត់ការរៀនសូត្រជំនាញកំរិតបឋមវិជ្ជាជីវៈនគរបាលដូចគ្នាដែរ។
លោក ស ខេង បន្តទៀតថាន្លងមកក្រសួងមហាផ្ទៃ បានប្រកាន់គោលការណ៍១ឆ្នាំជ្រើសរើសម្តងហើយបានជ្រើសរើសក្នុងចំនួនច្រើន ហើយឆ្នាំចុងក្រោយនេះ គឺក្រសួងមហាផ្ទៃ ប្រកាសជ្រើសរើសរហូតដល់ជាង៤៥០០នាក់ ដើម្បី បំពេញតម្រូវការងារនឹងការខ្វះខាតកងកំលាំងនគរបាលនគរបាល៕