ការជ្រើសរើសជំនាញសិក្សាត្រូវគិតគូរឱ្យបានច្រើនចំណុច ដោយក្នុងនោះទីផ្សារការងារក៏ជាផ្នែកយ៉ាងសំខាន់មួយដែលគួរគិតគូរផងដែរ។ កន្លងមកមានមនុស្សជាច្រើនបានលើកឡើងថា ជំនាញបច្ចេកទេសជាជំនាញដែលមានទីផ្សារនៅកម្ពុជា តែមនុស្សមួយចំនួនមិនទាន់បានដឹងច្បាស់នៅឡើយពីមូលហេតុដែលធ្វើឱ្យជំនាញនេះមានទីផ្សារខ្ពស់នៅកម្ពុជា។
លោក អ៊ឹម កុច រដ្ឋលេខាធិការក្រសួងអប់រំ យុវជន និងកីឡា បានលើកឡើងថា កម្ពុជាជាប្រទេស ដែលកំពុងមានការរីកលូតលាស់ពីមួយឆ្នាំទៅមួយឆ្នាំ ហេតុនេះគម្រោងសាងសង់ និងចង្វាក់ផលិតកម្មផ្នែកឧស្សាហកម្មបានរីកលូតលាស់យ៉ាងលឿន ដែលវាទាមទារឱ្យមានកម្លាំងពលកម្មដើម្បីទៅបំពេញតម្រូវការទាំងអស់នោះ។
លោក អ៊ឹម កុច ក៏បានបញ្ជាក់ថា ថ្នាក់វិទ្យាសាស្ត្រពិត ឬជំនាញបច្ចេកទេស ជាជំនាញដែលជួយសង្គមបច្ចុប្បន្នឱ្យមានការអភិវឌ្ឍបានច្រើន ព្រោះថានៅពេលដែលយើងសម្បូរធនធានមនុស្សដែលមានសមត្ថភាពក្នុងផ្នែកនេះ យើងនឹងអាចមានកម្លាំងច្រើនដើម្បីបង្កើនសមិទ្ធផលសំខាន់ៗ រួមទាំងធ្វើការងារលឿនជាមួយនឹងបច្ចេកទេសថ្មី។ កម្ពុជានាពេលបច្ចុប្បន្នកំពុងជំរុញឱ្យមានការលើកទឹកចិត្តអ្នកជំនាញឱ្យបានច្រើន ព្រោះថានៅពេលដែលប្រទេសយើងមានការអភិវឌ្ឍកាន់តែខ្លាំង នៅពេលនោះអ្នកបច្ចេកទេសនឹងក្លាយជាចំណុចដែលវិនិយោគិនចាប់អារម្មណ៍ ព្រោះថាការបណ្តាក់ទុនរកស៊ីនៅប្រទេសណាមួយគេត្រូវការមើលលើចំណុចជាច្រើន ដែលក្នុងនោះធនធានមនុស្សក៏ជាកត្តាសំខាន់មួយផងដែរដែលគេត្រូវផ្តោតជាសំខាន់។
ឯកអគ្គរាជទូតនៃចក្រភពអង់គ្លេសប្រចាំនៅកម្ពុជា លោក Bill Longhurst ធ្លាប់បានលើកឡើងថា កម្ពុជាកំពុងត្រូវការជំនាញវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ហើយជំនាញទាំងអស់នេះជាជំនាញដែលអាចបង្កើតផលិកម្ម និងការអភិវឌ្ឍនៅលើវិស័យជាច្រើននៅកម្ពុជា។ វាក៏ជាជំនាញដែលរុញច្រានឱ្យមានដំណើរសេដ្ឋកិច្ចល្អតាមរយៈការប្រើប្រាស់បច្ចេកទេសរបស់អ្នកជំនាញក្នុងស្រុក ដែលទទួលបានការអប់រំច្បាស់លាស់ពីជំនាញ STEM (science, technology, engineering and mathematics) ។
លោក Bill Longhurst ក៏បានបញ្ជាក់ថា យុវជននៅកម្ពុជាជាច្រើនមិនបានជ្រើសរើសយកជំនាញ STEM ព្រោះពួកគេគិតថា ជំនាញទាំងអស់នោះពិបាក មិនសូវមានមុខមានមាត់ និងមិនអាចទទួលបានប្រាក់ខែខ្ពស់ ប៉ុន្តែតាមពិតទៅជំនាញទាំងអស់នោះជាជំនាញដែលកម្ពុជាកំពុងត្រូវការដើម្បីចូលរួមឱ្យបានសកម្មនៅក្នុងការអភិវឌ្ឍប្រទេស។ យើងសង្ឃឹមថាសិស្សនិស្សិតកម្ពុជានឹងជ្រើសរើសជំនាញ STEM ដើម្បីសិក្សានៅមហាវិទ្យាល័យដើម្បីទាញយកឱកាសការងារដែលមានតម្រូវការខ្ពស់ ។
លោកឯកអគ្គរាជទូត បានបន្ថែមទៀតថា STEM បានក្លាយជាមុខងារដែលគេត្រូវការបំផុតនៅទូទាំងពិភពលោករួមទាំងកម្ពុជាផងដែរ។ ស្របពេលដែលសេដ្ឋកិច្ចកំពុងលូតលាស់យ៉ាងឆាប់រហ័ស និងបើកទូលាយចំពោះវិនិយោគិនអន្តរជាតិនោះ ពលរដ្ឋកម្ពុជាវ័យក្មេងចាំបាច់ត្រូវដឹងថា តើការងារអ្វីខ្លះដែលពួកគេអាចធ្វើបាន ហើយតើជំនាញអ្វីខ្លះដែលគេត្រូវការ? កម្ពុជាកំពុងត្រូវការវេជ្ជបណ្ឌិត វិស្វករ អ្នកបង្កើតបណ្តាញ និងស្ថិតិ ជាច្រើននាក់បន្ថែមទៀតដើម្បីការអភិវឌ្ឍប្រទេស។ ការជ្រើសរើសយកជំនាញ STEM មកសិក្សាជាការចូលរួមចំណែកយ៉ាងសំខាន់ក្នុងការបង្កើតភាពសកម្មនៅក្នុងសកម្មភាពនៃការអភិវឌ្ឍ៕
ប្រភព៖ ឡារ៉ែន
