Wednesday, April 15, 2015

សេចក្តីប្រកាសព័ត៌មាន៖ ការរាំចង្វាក់ ម៉ាឌីហ្សុន ជាក្រុម​នៅក្នុង​ព្រឹត្តិ​ការណ៍​អង្គរ​សង្រ្កាន្ត​ឆ្នាំ​២០១៥ ត្រូវបាន​កត់​ត្រា​ជាផ្លូវ​ការ​ចូល​ក្នុង​កំណត់​ត្រា​ពិភព​លោក Guiness World Record

រាជធានីភ្នំពេញ ថ្ងៃទី១៥ ខែមេសា ឆ្នាំ២០១៥

សេចក្តីប្រកាសព័ត៌មាន
 
សហភាពសហព័ន្ធយុវជនកម្ពុជា (ស.ស.យ.ក) មានកិត្តិយសូមជម្រាបជូនជនរួមជាតិឲ្យបានជ្រាបថា ការរាំចង្វាក់ ម៉ាឌីហ្សុន ជាក្រុមនៅក្នុងព្រឹត្តិការណ៍អង្គរសង្រ្កាន្តឆ្នាំ២០១៥ ត្រូវបានកត់ត្រាជាផ្លូវការចូលក្នុងកំណត់ត្រាពិភពលោក Guiness World Record ហើយកាលពីវេលាម៉ោង​​១៣ និង៥៣នាទីនាថ្ងៃ​ទី១៥ ខែ មេសា ឆ្នាំ២០១៥ នេះ។
ការរំាជាក្រុម ដែលមានអ្នកចូលរួមចំនួន ២,០១៥នាក់ ក្នុងរយៈពេល៥នាទីចាប់ពីម៉ោង ១១:៤៣​​នាទី ដល់ម៉ោង១១:៥៣នាទី ត្រូវបានផ្តួចផ្តើមឡើងក្នុងគោលបំណងបង្ហាញពីសាមគ្គីភាពក្នុងចំណោមប្រជាពលរដ្ឋខ្មែរ ក្នុងន័យចង្កឹះមួយបាច់កាច់មិនបាក់ ហើយការ​រាំនេះ​ក៏ចង់ផ្តល់វេទិកាមួយប្លែក និងមានភាពសប្បាយរីករាយដល់បណ្តាភ្ញៀវជាតិ និងអន្តរជាតិដែលកំពុងមកចូលរួម​ ទស្សនាក្នុងព្រឹត្តិការណ៍អង្គរសង្រ្កាន្តនៅលើទឹកដីនៃខេត្តសៀមរាប ។
បន្ទាប់ពីវិនិច្ឆ័យ​អស់រយៈពេលប្រមាណ២ម៉ោង លោកស្រី Seyda Subasi-Gemici ចៅក្រមនៃកំណត់ត្រាពិភពលោក Guiness World Record បានមាន​ប្រសាសន៍ថា ការរាំចង្វាក់ ម៉ាឌីហ្សុន នៅទីលានជល់ដំរីបានជាប់កំណត់ត្រាពិភពលោក Guiness World Record ដែលធ្វើឲ្យអ្នករាំនិងអ្នកទស្សនារាប់​ម៉ឺននាក់បាន​អបអរសាទរ និង​សប្បាយរីករាយ។
គួរបញ្ជាក់ថា នេះជាកំណត់ត្រាពិភពលោកលើកទីពីរហើយក្នុងរយៈពេលបីថ្ងៃ បន្ទាប់ពីស្ថាប័ន Guiness World Record  បានកត់នំអន្សមខ្មែរចូល​ក្នុងកំណត់ត្រាពិភពលោករបស់ខ្លួន​កាលពីរសៀល​ថ្ងៃទី១៣ ខែ មេសា ឆ្នាំ២០១៥ កន្លងទៅនេះ។
ការរាំចង្វាក់ ម៉ាឌីហ្សុននេះគឺជាកម្មវិធីមួយដែលសហភាពសហព័ន្ធយុវជនកម្ពុជាខេត្តសៀមរាប (យុទ្ធនាការសៀមរាបផ្ទះខ្ញុំ) បានរៀបចំឡើង ហើយក៍ជាកម្មវិធីមួយ​ក្នុងចំណោមកម្មវិធីជាច្រើនទៀតនៃព្រឹត្តិ​ការណ៍​ អង្គរសង្រ្កាន្ត​ឆ្នាំ២០១៥ ដែលសហភាពសហព័ន្ធយុវជនកម្ពុជាបានរៀបចំឡើងដោយមានកិច្ចសហការពីសំណាក់ស្ថាប័ន​​ រដ្ឋ និងឯក​ជន​នានា៕

ការ​រាំ​​​ចង្វាក់​​ម៉ា​ឌី​ហ្សូនរបស់​​កម្ពុជា​​បំ​បែក​​ឯក​ទគ្គកម្មពិភពលោ​កថ្មី​មួយ​ទៀត បន្ទាប់​​ពី​​នំ​អន្សម​​យក្ស​!



ព្រះ​រាជា​ណាចក្រកម្ពុជា​ បាន​បំ​បែក​ឯកទគ្គកម្ម​ពិភព​លោកថ្មី​មួយ​ទៀត​ គឺ​ការ​រាំ​ចង្វាក់​ម៉ា​ឌីហ្សូន​ ដែល​មាន​យុវជន​ចូល​រួម​រាំ​ច្រើន​ជាង​គេបំ​ផុត​លើ​ពិភព​លោករហូត​ដល់​ ២០១៥នាក់​ ហើយ​នៅ​ថ្ងៃ​ទី​១៥ ខែ​មេសា ឆ្នាំ​២០១៥​នេះ លោកស្រី Seyda Subasi Gemici តំណាងស្ថាប័ន Guinness World Records ប្រគល់​វិញ្ញាបនបត្រកំ​ណត់​ត្រាពិភព​លោក នៃ​ការ​រាំ​ចង្វាក់​ម៉ា​ឌីហ្សូន​​​នេះ​ ជូន​ដល់​ឯកឧត្តម​ ហ៊ុន ​ម៉ា​នី​ ប្រធាន​សហភាព​សហព័ន្ធ​យុវជន​កម្ពុជា ក្រោមវត្ត​មាន​​ដ៏​ខ្ពង់​ខ្ពស់​ នៃ​ការ​អញ្ជើញ​ជា​អធិបតី​របស់​សម្តេច​កិត្តិព្រឹទ្ធ​បណ្ឌិត​ ប៊ុន រ៉ានី​ ហ៊ុន សែន ប្រធាន​កាកបាទ​ក្រហម​កម្ពុជា​។
ពិធី​ប្រគល់​វិញ្ញាបនបត្រ​ ដែល​ជា​កំ​ណត់​ត្រាពិភព​លោកជូន​​ចំ​ពោះ​កម្ពុជា​ បាន​ធ្វើ​ឡើង​នៅ​ខាង​មុខ​វេទិកាជួប​ជុំ​មហាជន សំ​ដែង​សិល្បៈ កំសាន្ត​ នៃព្រឹត្តិការណ៍​អង្គ​រសង្ក្រាន្ត​ ខាង​មុខ​ទី​លាន​ជល់ដំ​រី​ ក្នុង​ទឹក​ដី​អង្គរខេត្តសៀម​រាប​។
លោកស្រី​ Seyda Subasi Gemici តំណាងស្ថាប័ន Guinness World Records  បាន​ថ្លែង​ថា កម្ពុជា​ជា​ប្រទេស​ជា​ទី​ស្រឡាញ់​ ។ លោកស្រី​គិត​ថា ការ​បំ​បែក​ឯកទគ្គកម្ម​ពិភព​លោក​លើ​ការ​រាំ​ចង្វាក់​ម៉ា​ឌីហ្សូន​នេះ​ មិន​មែន​ជា​ការ​ងាយ​ស្រួល​ទេ​សម្រាប់​បង​ប្អូនយុវជនកម្ពុជា​។ លោកស្រី Seyda Subasi Gemici បាន​ឲ្យ​ដឹង​ថា តំ​ណែង​នៃ​ Guinness World Records សម្រាប់​ការ​រាំ​ម៉ា​ឌីហ្សូន​ដែល​ច្រើន​ជាង​គេ នាពេល​កន្លង​មក​ គឺ​ប្រទេស​អូស្ត្រាលី ដែល​មាន​អ្នក​ចូល​រួម​រាំ​ចំ​នួន​១១៥៥នាក់​។
ប៉ុន្តែ ពេល​នេះ  ជាលទ្ធផល​ជូន​សម្រាប់​ការ​ប្រកួត​នៅ​ថ្ងៃ​នេះ សូម​អប​អរសាទរកម្ពុជា​ និង​ជាមួយ​​ប្រជា​ជន​កម្ពុជា​ និង​យុវជន​ទាំង​អស់​ជា​គោរព​ស្រឡាញ់​ ដែល​បាន​ប្រឹង​ប្រែង​ប្រកួត​រហូត​ទទួល​បាន​ជោគ​ជ័យ ​ ដែលនៅ​ពេល​នេះ គឺ​កម្ពុជា​ទទួល​បាន​នូវ​ជ័យ​លាភី​ នៃ​កំ​ណត់​ត្រា​ពិភព​លោក​ថ្មី​មួយ​ទៀត​ ​ « Guinness World Records» គឺ​​ការ​រាំ​ម៉ា​ឌីហ្សូន​ដែល​មាន​អ្នក​ចូល​រួម​ច្រើន​ជាង​គេបំ​ផុត​លើពិភព​ លោក ជា​មួយ​នឹង​សមាជិក​ចំ​នួន​២០១៥នាក់​
ឯកឧត្តម ហ៊ុន ម៉ា​នី​ ប្រធាន​សហភាព​សហព័ន្ធ​យុវជន​កម្ពុជា​ បាន​ប្រគល់​ពាន​ជ័យ​លាភី​នេះ​បន្ត​​ជូន​ទៅឯកឧត្តម ទៀ ​ជី​ហា ប្រធាន​សហភាព​សហព័ន្ធ​យុវជនកម្ពុជា​នៅ​ខេត្ត​សៀម​រាប​​ ដែល​លោក​បាន​ប្រឹង​ប្រែង​ អស់​ពី​កម្លាំង​កាយ​ចិត្ត​ក្នុង​ការ​ដឹក​នាំ​ការ​ងារ​បំ​បែក​ឯកទគ្គកម្ម​រាំ ​ចង្វាក់​ម៉ា​ឌីហ្សូន​នេះ រហូត​បាន​ទទួល​ជោគ​ជ័យជា​ប្រវត្តិសាស្ត្រ​។ ជា​មួយ​នឹង​ការ​ថ្លែង​អំ​ណរ​គុណ​ចំ​ពោះ​លោកស្រី Seyda Subasi Gemici តំណាងស្ថាប័ន Guinness World Records ជា​គណៈកម្មការ​ ដែល​បាន​មក​ចូល​រួម​ និង​ផ្តល់​នូវ​ការ​បំបែក​ឯកទគ្គកម្មពិភពលោក​លើក​ទី​២ចំ​ពោះ​​កម្ពុជា​ក្នុង​ ឆ្នាំ​២០១៥​នេះ ។
ឯកឧត្តម​ ហ៊ុន ម៉ា​នី បាន​ថ្លែង​ថា ពិភព​លោក​នៅ​ពេល​គេចូល​ទស្សនានៅ​ក្នុង​កំ​ណត់​ត្រាពិភព​លោក​ គេនឹង​បាន​ឃើញ​កម្ពុជា​ ទទួល​បាន​ជ័យ​លាភី​ដ៏​លេចធ្លោរចំ​នួន​ពីរ គឺ​នំ​អន្សម​យក្សដែល​មាន​ទម្ងន់​ជាង​៤តោន និង​ការ​រាំ​ចង្វាក់​ម៉ា​ឌីហ្សូន​ ដែល​មាន​គ្នា​ចំ​នួន​២០១៥នាក់​។
ជា​មួយ​នឹង​ការ​ថ្លែង​អំ​ណរ​គុណ​ដល់​រាជ​រដ្ឋាភិបាល​កម្ពុជា​ដែល​បាន​ផ្តល់​ ឱកាសដល់​សហភាព​សហព័ន្ធ​យុវជន​កម្ពុជា​បាន​រៀប​ចំ​ព្រឹត្តិការណ៍​ អង្គរសង្ក្រាន្ត​ និង​បាន​ឱកាសរៀប​ចំ​ធ្វើ​អ្វី​ដែលជា​ការ​បំ​បែក​ឯកទគ្គកម្ម​ជូន​ជាតិ​ មាតុភូមិ​។ នេះ​ គឺ​ជា​កាដូដ៏​ពិសេសជូន​ដល់​ប្រជាពលរដ្ឋ​ខ្មែរ​ទាំង​អស់​គ្នា​។
ទោះ​យ៉ាង​ណា​ ឯកឧត្តម​ ហ៊ុន ម៉ា​នី​ បាន​វាយតម្លៃ​ខ្ពស់​ថា ជោគ​ជ័យ​ទាំង​នេះ គឺ​ពិត​ជា​កើត​ឡើង​ពី​ការ​ខិតខំ​ប្រឹង​ប្រែងអស់​ពី​កម្លាំង​កាយ​ចិត្ត​​របស់ ​យុវជន​គ្រប់​រូប​ និង​បាន​សុំ​ឲ្យ​យុវជន​ចង​ចាំ​ទាំង​អស់​គ្នានូវ​អ្វី​ដែល​បាន​ខំ​ប្រឹង​ ប្រែង​ រៀប​ចំ​ តាំងពី​ការហ្វឹកហាត់ និង​រហូត​បាន​សម្រេច​ជោគ​ជ័យ​ គឺ​ជា​ស្នាដៃជា​ប្រវត្តិសាស្ត្រ​មួយ​ដែល​កើត​ចេញ​ពី​យុវជន​ម្នាក់​ៗ ក្នុង​លក្ខណៈជា​មហាគ្រួសារខ្មែរតែ​មួយ​ មហាគ្រួសារសហភាព​សហព័ន្ធ​យុវជន​កម្ពុជា​តែមួយ ហើយ​យើងត្រូវ​មាន​មោទនភាព ដោយ​ការ​ឆ្លើយ​ទៅ​នឹង​ការ​ចោទ​សួរ​ថា តើប្អូន​ៗបាន​ជួយ​អ្វី​សម្រាប់​សង្គម​ជាតិ គឺ​ប្អូន​ៗអាច​ឆ្លើយ​ទៅ​វិញ​ដោយ​មោទនភាព​ថា និង​ចងចាំ​ទៅ​អនាគតថា ថ្ងៃ​ទី​១៥ ខែ​មេសា នៅ​ទី​លាន​ជល់​ដំ​រី គឺ​បាន​ចូល​រួម​បំ​បែក​ឯកទគ្គកម្ម​ជូន​ព្រះ​រាជាណាចក្រកម្ពុជា​។
ឯកឧត្តម​ ហ៊ុន ម៉ា​នី​ ក្នុង​នាម​សហភាព​សហព័ន្ធ​យុវជន​កម្ពុជា​ នឹង​ប្តេជ្ញាខិតខំ​រិះ​រក​អ្វី​ដែល​ប្លែក​ និង​មាន​អត្ថន័យ​សម្រាប់​ការ​បំ​បែក​ឯកទគ្គកម្ម​ពិភព​លោក​នៅ​លើក​ក្រោយ​ៗ​ ទៀត ដោយ​សង្ឃឹម​ថា នឹង​មាន​ការ​ចូល​រួម​ពី​យុវជន​ឲ្យ​បាន​ច្រើន​កុះ​ករថែម​ទៀត។ បើ​តាមការ​បង្ហើប​ឲ្យ​ដឹង​ពី​អ្នក​រៀប​ចំ​ព្រឹត្តិការណ៍​អង្គរសង្ក្រាន្ត​ បាន​ឲ្យ​​ដឹងថា​ កម្ពុជា​នឹង​ត្រៀម​បំ​បែក​ឯកទគ្គកម្ម​ថ្មី​មួយ​ទៀត​នៅ​ព្រឹត្តិការណ៍​លើក​ ក្រោយ​ គឺ​បំ​បែក​ឯកទគ្គកម្ម​ផលិត​អាម៉ុក​យក្ស​៕




សម្តេច​​តេជោ ហ៊ុន សែន​ ចង់​ឲ្យ​​មហាជន​​ឈប់​​ហៅ​​បក្ស​​សង្គ្រោះ​​ជាតិ ថា បក្ស​​ប្រឆាំង​ទៀត​




សម្តេច​តេជោ​ ហ៊ុន សែន​ នាយករដ្ឋមន្ត្រី​ បាន​ថ្លែង​ថា យើង​គួរឈប់​ហៅ​គណបក្ស​របស់​ឯកឧត្តម សម រង្ស៊ី ​ថា ​គណ​បក្សប្រឆាំង​តទៅ​ទៀត គួរ​តែ​ហៅ​ថា បក្ស​ក្នុង​រដ្ឋាភិបាល សំ​ដៅ​លើ​គណបក្សប្រជាជន​កម្ពុជា​ និង​​ហៅ​គណបក្ស​សង្គ្រោះ​ជាតិ​ ថាបក្ស​ក្រៅ​រដ្ឋាភិបាល​វិញ​។
សម្តេច​តេជោ មាន​ប្រសាសន៍​បែប​នេះ​ ក្នុង​ពេល​អញ្ជើញ​ជា​អធិបតី​ បើក​ព្រឹត្តិការណ៍​អង្គរ​សង្ក្រាន្តនៅ​ខេត្ត​សៀម​រាប ព្រឹក​ថ្ងៃ​ទី​១៤ ខែ​មេសា ឆ្នាំ​២០១៥​ ខណៈឯកឧត្តម សម រង្ស៊ី និង​លោក​ជំ​ទាវ​កំ​ពុង​មាន​វត្តមាននៅ​ក្នុង​នោះ​ អង្គុយ​ចំ​ពី​ក្រោយ​ខ្នង​សម្តេច​តេជោ ហ៊ុន សែន​។
ជា​មួយ​គ្នា​នេះ​ដែរ សម្តេច​តេជោ ​បាន​បន្ថែម​ថា  សម្តេចតេជោ ក៏​ចង់​ឲ្យ​កូន​ៗរបស់​ឯកឧត្តម សម រង្ស៊ី មាន​ការ​ជួប​ជុំ​គ្នា​ញ៉ាំ​បាយ​ជាមួយ​កូន​ៗរបស់​សម្តេច ដែល​សម្តេច ​ចាត់​ទុក​ថា ការ​រៀប​ចំ​ឲ្យ​មាន​ការ​ជួប​ជុំ​គ្នា​ក្នុង​កម្ម​វិធី​បែប​នេះ គឺ​ជា​ការ​បណ្តុះកូន​ៗ​ឲ្យ​ចេះ​ធ្វើ​ការ​ជា​មួយ​គ្នា​។
សម្តេចតេជោ ក៏​បាន​មាន​ប្រសាសន៍​ផង​ដែរ ដោយ​សម្តេច​ចង់​ឲ្យ​មាន​វប្បធម៌សន្ទនានេះ រីក​ទៅ​ដល់​មូលដ្ឋាន​ ។ សម្តេចតេជោ​ បញ្ជាក់​​ថា ទោះ​ជា​អ្នក​ស្រឡាញ់គណបក្សណា​មួយ​ក៏​ដោយ វាជា​សិទ្ធិ​រៀង​ៗខ្លួន​ ប៉ុន្តែ សម្តេច​ មិន​ចង់​ឃើញ​ ប្រជាពលរដ្ឋ​នៅ​ចុង​ភូមិ​បក្ស​ផ្សេង នៅ​កណ្តាល​ភូមិ​បក្ស​ផ្សេង​នោះ​ទេ គឺ​ត្រូវ​តែបញ្ចប់ កុំ​មាន​ដាច់​ខាត​នូវ​វប្បធម៌​នេះ​។
ទន្ទឹម​នឹង​ការ​ថ្លែង​កោត​សរសើរចំ​ពោះ​ការ​រៀប​ចំ​ព្រឹត្តិការណ៍​អង្គ​ រសង្ក្រាន្ត​​ ថាជា​ជោគ​ជ័យ​ដ៏​ធំ​ធេង​ កើត​ចេញ​ពី​កិច្ច​ខិត​ខំ​ប្រឹង​ប្រែង​របស់​ក្រុម​យុវជន​ និងសរសើរដល់​យុវជន​ស្ម័គ្រចិត្តប្រមាណ​២៩២៩​នាក់​ ដែល​បាន​លះ​បង់​ពេល​វេលា​របស់​ខ្លួន​ក្នុង​ការ​ចូល​រួម​រៀប​ចំព្រឹត្តិការណ៍ ​នេះ ថាបាន​ផ្តល់​ឱកាសឲ្យ​កម្ពុជា​បង្ហាញ​ខ្លួន​កាន់​តែ​ល្បី​រន្ទឺលើឆាក​ អន្តរជាតិ​ និង​ថា​ ជា​ព្រះ​រាជាណា​ចក្រសំ​បូរ​ដោយ​វប្បធម៌  ជា​ពិសេសជោគ​ជ័យ​ ដែល​នំ​អន្សម​យក្ស​របស់​កម្ពុជា​បាន​បំ​បែក​​ក្នុង​កំ​ណត់​ត្រា ឯកទគ្គ​​កម្ម​ពិភព​លោក  និង​ការ​រាំ​ចង្វាក់​ម៉ា​ឌី​ហ្សូន បំ​បែក​ឯកទគ្គកម្ម​ពិភព​លោក​ដែរ​នោះ​  សម្តេច​តេជោ​​ក៏​បាន​ឆ្លៀត​យក​ឱកាសនេះ ផ្តល់​អនុសាសន៍​ដល់​យុវជន​ជំ​នាន់ក្រោយ​ ត្រូវ​តែ​ហ៊ាន​គិត​ ហ៊ាន​ធ្វើ​ និង​ហ៊ាន​ទទួល​ខុសត្រូវ​ ហើយ​និង​ហ៊ាន​ទទួល​យក​នូវ​ការ​រិះ​គន់​ទាំង​អស់​យក​ទៅ​ពិគ្រោះ​យោបល់ជា​មួយ​ អ្នក​ជំ​នាញ​ ដើម្បី​កែ​លម្អ​ ទើប​មាន​អនាគតរុង​រឿង ល្អ​ប្រសើរ ដោយ​មិន​ត្រូវ​ពួក​គេផ្តេក​ផ្តួល​តែ​លើ​ឳពុក​ម្តាយ​នោះ​ឡើយ​។
សម្តេច​តេជោ បញ្ជាក់​ថា តាម​រយៈព្រឹត្តិការណ៍​ដែល​រៀប​ចំ​ដោយ​ក្រុម​យុវជន​នេះ ​ក៏​ជា​វិធី​សាស្ត្រ​​ឲ្យ​យុវជន​ចេះ​ទទួលខុសត្រូវ​ និង​សម្រាប់​បន្ត​វេន​ដឹក​នាំ​ប្រទេស​ផង​ដែរ៕

ឯកឧត្តម​​បណ្ឌិត​សភាចារ្យ សុខ អាន ​និង​​លោក​​ជំ​ទាវ​ ទស្សនា​កម្មវិធី​​និម្មិត​ភូមិ ក្នុង​​ព្រឹត្តិការណ៍​​អង្គ​រសង្ក្រាន្ត



ឯកឧត្តម​បណ្ឌិត​សភាចារ្យ សុខ អាន​ ឧបនាយករដ្ឋមន្ត្រី រដ្ឋមន្ត្រី​ទទួល​បន្ទុក​ទី​ស្តីការ​គណៈរដ្ឋមន្ត្រី​ និង​លោក​ជំ​ទាវ នៅ​រសៀល​ថ្ងៃ​ទី​១៤ ខែមេសា ឆ្នាំ​២០១៥ ដែល​ជា​ថ្ងៃ​ទី​១ នៃព្រឹត្តិការណ៍​អង្គ​សង្ក្រាន្ត នៅ​តំ​បន់​រមណី​ដ្ឋាន​វប្បធម៌​ ទេសចរណ៍​អង្គរ ខេត្តសៀម​រាម បាន​អញ្ជើញ​ចូល​ទស្សនាកម្ម​វិធិនិម្មិតភូមិ  ដែល​បង្ហាញ​ដោយ​ក្រុម​ការងារ​យុវជន​បេតិកភណ្ឌ​ នៃ​ព្រឹត្តិការណ៍​អង្គ​រសង្ក្រាន្ត​ និង​មន្ត្រី​ជំ​នាញ​របស់​អាជ្ញារធម៌​ជាតិ​អប្សរា និង​ក្រុម​ការងារ​មូល​និធិ​កេរដំ​ណែល​ខ្មែរ ក្រោម​ការ​ច្នៃ​ប្រឌិត បង្កើតរូប​ភាព​ដោយ​ប៉ិន​ប្រសប់​។
កម្មវិធី​និម្មិតភូមិនេះ​ បានបង្ហាញ​នូវពិព័រណ៌គំ​នូ និង​រូប​ភាព ការ​រំ​លេចបន្ថែម​នូវ​ទិដ្ឋភាព​ទី​តាំង​ភូមិសាស្ត្រ​ និង​សក្កានុពល​ធម្មជាតិ​នានាដែល​ជំ​រុញ​ឲ្យ​មាន​ការ​កសាង​អង្គរ និង​ក៏​បាន​បង្ហាញ​អំ​ពី​ស្នាដៃរបស់​បុព្វបុរសខ្មែរសម័យ​ដើម​ នៅ​ក្នុង​ជី​វភាព​រស់​នៅ​ប្រចាំ​ថ្ងៃ​ ការ​ធ្វើ​កសិកម្ម ការនេសាទ​  ការ​ងារ​ស្លដែក ការ​ជីក​ ដឹក​ជញ្ជូន​ថ្មសម្រាប់​សាង​សង់​សង់​អង្គរ  ការ​ជុសជុល​ប្រាសាទ និងបង្ហាញពី​​វប្បធម៌ អរីយធម៌​ និង​ទំ​នៀប​ទំ​លាប់​​ខ្មែរកាលពី​សម័យ​បុរាណ​។
ការ​បង្កើត​ស្នាដៃដោយ​ទេពកោសល នៅ​លើ​ទឹក​ដី​នៃ​ភូមិសាស្ត្រ​មួយ​ឲ្យ​កើត​ទៅ​ជា​ភូមិ​ឋាន  ដែល​មាន​ហេដ្ឋារចនាសម្ព័ន្ធ​ប្រកបដោយ​សុខដុម​នីយកម្មទៅ​នឹង​ទិដ្ឋភាព​ ធម្មជាតិ​ គឺ​បាន​ផ្តល់នូវ​ចំ​ណេះ​ដឹង​បន្ថែម​ទៀត​ជា​ច្រើន​ដល់​ភ្ញៀវ​ដែល​ចូល​ទស្សនា ផ្តល់​នូវ​ចំ​ណេះ​ដឹង​បច្ចេក​ទេស​កែ​ច្នៃ​ថ្ម​ដើម្បី​សាង​សង់ យល់​ដឹង​ពី​ការ​គោរពប្រណិបត្តិ​សាសនា សកម្មភាព​ជី​វភាព​រស់​នៅ​របស់​ប្រជាពលរដ្ឋ​ខ្មែរសម័យ​អង្គរ បង្ហាញ​ពី​តួនាទី​ និង​សមិទ្ធ​ផល​ក្នុង​ការ​អភិរក្ស និង​អភិវឌ្ឍ​រមណី​ដ្ឋាន​អង្គរប្រកប​ដោយ​ចីរភាព​របស់​អាជ្ញាធរជាតិ​អប្សរា ជា​ពិសេស គឺ​ការ​លើក​កំ​ពស់​គុណ​តម្លៃ​បេតិកភណ្ឌ និង​ផ្តល់​ឱកាសឲ្យ​សាធារណជន​បាន​ចូល​រួម​ទស្សនា និង​រៀន​អនុវត្តសកម្មភា​ជាក់​ស្តែង​ ក៏​ដូចជា​​ជម្រុញ​ឲ្យ​សាធារណជន​រឡាញ់ និង​ចូល​រួម​បន្ត​អភិរក្ស​បេតិកភណ្ឌ ដើម្បី​អភិវឌ្ឍ​ ក៏​ដូចជា​ជួយ​បន្ត​ផ្សព្វ​ផ្សាយ​ឲ្យ​បាន​ទូ​លំ​ទូ​លាយ​ថែម​ទៀត៕



ឯកឧត្តម​​បណ្ឌិត​​សភាចារ្យ សុខ​ អាន​ និង​លោក​​ជំ​ទាវ អញ្ជើញ​​ជា​​អធិបតី​ ក្នុង​មហោ​ស្រប​​វប្បធម៌​យុវជន​​អន្តរជាតិ


បន្ទាប់​ពី​បាន​ទទួល​ទេវតាឆ្នាំ​ថ្មីរួច​មក​ នៅ​រសៀល​ថ្ងៃ​ទី​១៤ ខែ​មេសា ឆ្នាំ​២០១៥ ឯកឧត្តម​បណ្ឌិត​​សភាចារ្យ​ សុខ អាន ឧបនាយករដ្ឋមន្ត្រី រដ្ឋ​មន្ត្រី​ទទួល​បន្ទុក​ទី​ស្តី​ការ​គណៈរដ្ឋមន្ត្រី​ និង​លោក​ជំ​ទាវ​ បាន​អញ្ជើញ​ចូល​រួម​ទស្សនាមហោស្រប​វប្បធម៌​យុវជន​អន្តរជាតិ ដែល​មាន​ប្រទេស​ ក្នុង​សមាគមអាស៊ាន និង​ប្រទេស​ជា​មិត្ត​​ប្រមាណ​ជាង​១០ចូល​រួម​ តាម​រយការ​ដាក់​តាំង​បង្ហាញ​នូវ​វប្បធម៌​ ប្រពៃ​ណី ទំ​នៀម​ទំ​លាប់​របស់​​ជាតិ​សាសន៍​នីមួយ​ និង​បាន​ថត​រូប​អនុស្សាវរីយ៍​ផង​ដែរ។
ព្រឹត្តិការណ៍​អង្គរសង្ក្រាន្ត​ រយៈពេល​៣ថ្ងៃ​ ចាប់ពី​ថ្ងៃ​ទី​១៤ ដល់​ថ្ងៃ​ទី​១៦ ខែ​មេសា ឆ្នាំ​២០១៥​ ក្នុង​​ឱកាសបុណ្យ​ចូល​ឆ្នាំ​ថ្មី​ប្រពៃ​ណី​ជាតិ​ខ្មែរ រៀប​ចំ​ដោយ​សហភាព​សហព័ន្ធ​យុវជន​កម្ពុជា​ ក្នុង​ឆ្នាំ​នេះ មិន​ត្រឹម​តែ​បាន​ផ្តល់​ឱកាសដល់ប្រជាជន​ខ្មែរទាំង​អស់ ក្នុង​នាម​ជា​មហា​គ្រួសារ​ខ្មែរតែ​មួយ​ ដើម្បី​
ជួប​ជុំ​គ្នា​ប៉ុណ្ណោះទេ  ជាង​នេះ​ទៅ​ទៀត ពិធីដ៏​​ឧឡារិក​​នេះ ​ក៏​បាន​​​រៀប​ចំ​ និង​ផ្តល់​ឱកាស​ផង​ដែរ ចំពោះ​មិត្តភក្តិ​អន្តរជាតិ​​មក​ពី​ប្រទេស​ នៃ​ប្រជា​ជាតិ​អាស៊ាន និងមិត្ត​យុវជន​មក​ពី​បណ្តា​​ប្រទេស​មួយចំ​នួន​ទៀត ដូចជា​ ឥណ្ឌា ជប៉ុន រុស្ស៊ី កូរ៉េ ជា​ដើម​ ដើម្បី​បាន​ចែក​រំ​លែក​នូវ​បទ​ពិសោធ​ន៍ វប្បធម៌​ ប្រពៃ​ណី​ ទំ​នៀម​ទំ​លាប់​រវាងគ្នា​និង​គ្នា​ទៅ​វិញ​ទៅ​មក​។
មហាស្រប​វប្បធម៌​អាស៊ាន ឆ្នាំ​២០១៥​នេះ នៅ​លើ​ទឹកដី​អង្គ​រ   ​យុវជន​កម្ពុជា​ និង​មិត្តភក្តិ​បរទេស​​ជួប​ជុំ​គ្នា​ ដើម្បី​រឹត​ចំ​ណង​មិត្ត​ភាព​ឲ្យកាន់​តែ​ស្និទ្ធស្នាល​ថែម​ទៀត ប្រកប​ដោយ​ស្មារតី​គោរព​គ្នា​ទៅ​វិញ​ទៅ​មក​។
ការ​ជួប​ជុំគ្នា​ជា​មហាគ្រួសារខ្មែរ និង​ក្រោម​វត្តមាន​មិត្តភក្តិ​បរទេស​ចូល​រួម​ផង​នេះ ក្រៅពី​ការ​ពង្រីក​នូវ​ព្រឹត្តិការណ៍​អង្គរសង្ក្រាន្ត​នេះឲ្យ​ក្លាយ​ទៅ​ជា​ ព្រឹត្តិកាណ៍​អន្តរជាតិ​ ដើម្បី​រឹត​ចំ​ណង​សាមគ្គី​ភាព​រវាង​ប្រជា​ជាតិ​ខ្មែរ និង​ប្រជា​ជាតិនៅ​លើ​សកលលោក​ ​ ក៏​ជា​ឱកាសសម្រាប់កម្ពុជា ​បាន​បង្ហាញ​ផង​ដែរ​នូវ​សក្កានុពល​របស់​ខ្លួន​ លើការ​ប្តេជ្ញាចិត្ត​ខ្ពស់​ ដោយ​ការ​ទទួល​ខុសត្រូវ​ ក្នុង​ការ​ត្រៀម​ខ្លួន​សម្រាប់​សមាហរណ​កម្ម​អាស៊ាន​ឆ្នាំ​២០១៥​នាពេល​ខាង​ មុខ​នេះ៕





សម្តេច​​កិត្តិព្រឹទ្ធ​​បណ្ឌិត​ ប៊ុន រ៉ានី​ ហ៊ុន សែន ទទួល​​ទេវតា​​ឆ្នាំ​ថ្មី​​ នៅ​មុខ​​ប្រាសាទ​​បាយ័ន



សម្តេច​កិត្តិព្រឹទ្ធ​បណ្ឌិត​ ប៊ុន រ៉ានី​ ហ៊ុន សែន ​អម​ដំ​ណើរដោយ​ឯកឧត្តម​បណ្ឌិត​សភាចារ្យ សុខ អាន​ ឧបនាយករដ្ឋមន្ត្រី រដ្ឋមន្ត្រី​ទទួល​បន្ទុក​ទី​ស្តីការ​គណៈរដ្ឋមន្ត្រី​ និង​លោក​ជំ​ទាវ ព្រម​ទាំង​ឯកឧត្តម ឧបនាយក​រដ្ឋមន្ត្រី យឹម​ ឆៃ​លី     តំ​ណាង​ដ៏​ខ្ពង់ខ្ពស់​របស់​សម្តេច​អគ្គ​មហាសេនាបតី​តេជោ ហ៊ុន សែន នៅ​រសៀល​ថ្ងៃ​ទី​១៤ ខែមេសា ឆ្នាំ​២០១៥ វេលាម៉ោង​២ បាន​អញ្ជើញ​ជា​កិត្តិយសទទួល​ទេវតាឆ្នាំ​ថ្មី ឆ្នាំ​មមែ សប្ត​ស័ក ព្រះ​នាង​ រាក្យ​សៈទេវី បុត្រី​ទី​៣ ព្រះ​កបិល​មហាព្រហ្ម ។

ពិធី​ទទួល​ទេវតា​ឆ្នាំ​ថ្មី បាន​ប្រារព្ធធ្វើ​ឡើង​នៅ​ខាង​មុខ​ប្រាសាទ​បាយ័ន នៃ​ទឹក​ដី​អង្គរ រៀប​ចំ​តាម​របៀប​សាសនា ជាមួយ​នឹង​ការ​និមន្ត​ព្រះ​សង្ឃសូត្រធម៌ ជយ័ន្តោ​  លើក​ជោគ​ជតារាសី សម្រាប់​ឆ្នាំ​ថ្មី ប្រកប​ដោយ​ភាព​អឹក​អាធឹក​យ៉ាង​ក្រៃ​លែង​។

សម្តេច​កិត្តិព្រឹទ្ធ​បណ្ឌិត​ បាន​អញ្ជើញ​បូជាទាន​ធូប ផ្កាភ្ញី នៅ​ទី​កន្លែង​ដែល​មាន​ការ​រៀប​ចំ​យ៉ាង​ល្អ​ប្រណិត​ នូវ​គ្រឿង​សក្ការៈបូជា​ជាច្រើន​ ដែល​ជា​ដង្វាយសម្រាប់​​ទេវតាឆ្នាំ​ថ្មី និង​បាន​បួង​សួង​ដល់​ទេវតាឆ្នាំ​ថ្មី​ ដែល​នឹង​យាង​ចូល​មក​គ្រង​ថែរក្សាចក្រវាឡទាំង​មូល ជាពិសេសសម្រាប់​ប្រទេស​កម្ពុជា​ សូម​ប្រទាន​សព្វ​សាធុការ​ពរដល់​ប្រជា​ពលរដ្ឋ​កម្ពុជា​គ្រប់​រូប​ ជួប​ប្រទះ​តែ​សេចក្តី​សុខ ជ័យ​មង្គល​ វិបុលសុខគ្រប់​ប្រការ មាន​សិរី​សួស្តី​ និង​ភាព​រីក​ចម្រើន​រុង​រឿង​ និង​សូម​ឲ្យ​ប្រទេស​កម្ពុជា​ជួប​តែ​សុខ​សន្តិភាព​ សំ​បូរសប្បាយ​ និង​បន្ត​ការ​រីក​ចំ​រើន​រុង​រឿង​តទៅ​ទៀត​។

តមក​ទៀត​ នៅ​ថ្ងៃ​ដដែល​នេះ​ដែរ ​សម្តេច​កិត្តិព្រឹទ្ធ​បណ្ឌិត​ ប៊ុន រ៉ា​នី ហ៊ុន​សែន និង​គណៈប្រតិភូអម​ដំ​ណើរ ក៏​បាន​អញ្ជើញ​ជា​កិត្តិយស​ក្នុង​កម្ម​វិធី​ទាញ​ព្រ័ត្រមិត្តភាព​អង្គ​ សង្ក្រាន្ត ដែល​មាន​ប្រវែង​២៥០ម៉ែត្រ ក្នុង​បរិយាកាសដ៏​មហារីករាយ និង​សំ​ឡេង​ហោរសប្បាយ​ពី​ប្រជាពលរដ្ឋ​ដែល​បាន​អញ្ជើញ​មក​ជួប​ជុំ​គ្នា​នៅ​ ក្នុងពិធី​បុណ្យ​ចូល​ឆ្នាំ​ថ្មី​ លើ​ទឹក​ដី​អង្គរ ហើយ​បន្ទាប់​មកពេល​ព្រលប់ សម្តេច​កិត្តិព្រឹទ្ធ​បណ្ឌិត ក៏​បាន​អញ្ជើញ​ជាអធិបតី​ដ៏​ខ្ពង់​ខ្ពស់​​ ក្នុង​ពិធី​គោម​បណ្តែត​ ដើម្បី​ទឹកបួង​សួង​សុំ​សេចក្តី ភាព​ចម្រុង​ចំ​រើន​សម្រាប់​ប្រជាពលរដ្ឋ​ខ្មែរ ដែល​ប្រព្រឹត្តធកវើ​ឡើង​​នៅ​កសិក្ស ខាង​មុខប្រាសាទ​អង្គ​វត្ត ដោយ​មាន​ប្រជាពលរដ្ឋ​ចូល​រួម​យ៉ាង​ច្រើន​កុះ​ករ ​​៕


សម្តេច​តេជោ ហ៊ុន សែន សរ​សើរ​​ឯកឧត្តម​សម រង្ស៊ី​​ថា​​ជា​សម​ភាគី​ចរ​ចាដ៏ល្អមួយ ក្នុង​កា​រ​ដោះ​ស្រាយ​​បញ្ហា​​រវាង​ខ្មែរ ដោយ​​ខ្មែរដូច​​គ្នា



ក្នុង​ឱកាសនៃ​ការ​អញ្ជើញ​ជា​អធិបតី​ដ៏​ខ្ពង់​ខ្ពស់​បំ​ផុត ​​បើក​ព្រឹត្តិការណ៍​អង្គ​រសង្ក្រាន្ត​ឆ្នាំ​ថ្មី​ នៅ​លើ​ទឹក​ដី​អង្គរខេត្ត​សៀមរាប នៅព្រឹកថ្ងៃ​ទី​១៤ ខែ​មេសា ឆ្នាំ​២០១៥  សម្តេច​តេជោ​នាយករដ្ឋមន្រ្តី ហ៊ុន សែន បាន​ថ្លែង​កោតសរសើរចំ​ពោះ​ ឯកឧត្តម ​សម រង្ស៊ី ថា​ជា​ដៃគូ​សន្ទនាដៃល្អមួយ​ក្នុង​ការ​ដោះ​ស្រាយ​បញ្ហា​។​​

ថ្លែង​ប្រាប់​តំណាងអង្គទូត​ប្រចាំ​នៅ​កម្ពុជា​ ថ្នាក់​ដឹកនាំរដ្ឋាភិបាល​ និង​ប្រជា​ពលរដ្ឋដែល​បាន​ចូលរួ​មយ៉ាង​ច្រើន​កុះ​ករ សម្តេច​តេជោ បាន​មាន​ប្រសាសន៍​​ថា «យើងខ្ញុំ​ចេះ​ទាស់គ្នា យើងខ្ញុំ​ក៏​ចេះ​ត្រូវ​គ្នា​ដែរ​»។ សម្តេច ​បន្ត​ថា​ ព្រឹត្តិការណ៍នយោបាយ​ថ្មីៗនេះជា​​ដំណាក់​កាល​ថ្មីដែល​បាន​មក​ពី​​ វប្បធម៌សន្ទនា ​ជំនួស​ដោយ​វប្បធម៌ប្រទុស្តរាយ និង​ការ​កាប់​សម្លាប់។ សម្តេច តេជោ​នាយករដ្ឋមន្រ្តីបញ្ជាក់ថា​ «ខ្ញុំ​បាន​ធ្វើ​កិច្ច​ការ​នេះ​ដោយ​អំណត់​​ជាមួយ​សមភាគី​របស់ខ្ញុំ គឺ​ឯកឧត្តម​សម រង្ស៊ី»។

សម្តេច​ បាន​ឲ្យ​ដឹង​ថា ជាង​ពាក់​កណ្តាល​ជី​វិត​របស់​សម្តេច​ គឺ​សម្តេច​បាន តស៊ូ ឆ្លង​កាត់​តំ​ណាក់​កាល​នៃ​ការ​ចរចាជាច្រើន​ ដើម្បី​បញ្ចប់​ជម្លោះរវាង​ខ្មែរនិង​ខ្មែរ និង​នាំ​ឲ្យ​មាន​ការ​ផ្សះ​ផ្សារ​បង្រួប​បង្រួម​ជាតិ ឯកភាព​ទឹក​ដី​មក​ដល់​សព្វ​ថ្ងៃ​នេះ។ ក្នុង​ន័យថា ក្នុង​ដំណើរ​ជីវិត​របស់សម្តេច គឺ​សម្តេចតែ​ងតែ​​ជា​អ្នក​ចរចា​ស្វែង​រក​សន្តិភាព​សម្រាប់​​កម្ពុជា ជា​ជាង​ការ​ប្រើ​ប្រដាប់អាវុធ​។ ក្នុង​នោះ​សម្តេច​ក៏បាន​រំ​លឹក​អំពី​ ប្រវត្តិ​នៃ​ការចរចាសន្តិភាព​ទី​ក្រុង​ប៉ា​រីស ឆ្នាំ​១៩៩១ រហូត​ទទួល​បាន​ជោគ​ជ័យ​ រំ​លឹក​អំ​ពី​ បញ្ហា​ប្រឈម​​មុន​ឆ្នាំ​១៩៩៥ ខ្មែរមាន​បែង​ចែក​ជា​៥ក្រុម គឺ​ខ្មែរខៀវ ខ្មែរស ខ្មែរក្រហម​ ខ្មែរស៊ី​ជម្ពូរ និង​ខ្មែរខាង​ភាគី​រដ្ឋាភិបាល គឺ​ខ្មែរមានការ​បែក​បាក់​សាមគ្គី​ជាតិ​ និង​បន្ត​រហូត​មក​ដល់​ឆ្នាំ​១៩៧០ ដល់១៩៧៥ ខ្មែរបែក​ជា​ពីរទៀត គឺសម្តេច​ព្រះ​នរោត្តម សីហនុ និងសេនាប្រមុខលន់ នល់  ហើយ​បន្ទាប់​ពី​របប លន់ នល់​ដួល​រលំ​ គឺ​ប្រទេសត្រូវ​បាន​គ្រប់​គ្រង​ បំ​ផ្លិចបំ​ផ្លាញ​ដោយ​របបប្រល័យ​ពូច​សាសន៍​ប៉ុល​ ពត​។
សម្តេចតេជោនាយករដ្ឋមន្រ្តី​ បញ្ជាក់​ថា សង្រ្គាម​កើតឡើង​ដែល​ជា​បទពិសោធន៍​​មួយ​សម្រាប់​រូប​សម្តេច ប៉ុន្តែ ដោយ​​សារសម្តេច​គិត​ថា ​ជម្រើស​តែ​មួយគត់​សម្រាប់​ដោះ​ស្រាយ​​គឺ ​«ទុក​ច្រក​ឲ្យ​គេ​រស់​ ទុក​ច្រក​ឲ្យ​គេ​មានលទ្ធភាព​នៃ​ការ​ធ្វើ​អ្វី​ដែល​​ខុស​ពី​យើង»។ ដូច្នេះ អី​ឡូវ​នេះគ្មាន​ការ​ដោះ​ស្រាយ​ណា​មួយតាម​កម្លាំង​ប្រដាប់​អាវុធ​ទៀត​នោះ​ទេ យើង​មាន​តែ​ការ​ស្រុះ​ស្រួល​គ្នា​ ហើយ​និង​ត្រូវ​បន្តលើក​កម្ពស់​វប្បធម៌​សន្ទនានេះ​ថែម​ទៀត ។

ជា​មួយ​គ្នា​នេះ សម្តេច​តេជោ ក៏​បាន​ថ្លែង​កោត​សរសើរចំ​ពោះ​ ឯកឧត្តម សម រង្ស៊ី  និងចាត់​ទុក​ ឯកឧត្តម សម រង្ស៊ី ថា​ជា​សហស្ថាបនិក​នៃ​វប្បធម៌សន្ទនា។ សម្តេច​បញ្ជាក់​ថា​ បើ​គ្មា​ន​ឯកឧត្តម ​សម រង្ស៊ី អ្វីៗ​ក៏ធ្វើ​មិន​បាន​ដែរ។ សម្តេច​តេជោ បាន​​បន្ត​ថា ​ការ​សន្ទនា​នេះ​ គឺ​ដើម្បី​ជំរុញ​សន្តិភាព និង​ការ​អភិវឌ្ឍ​ប្រទេសកម្ពុជា។ សម្តេច​តេជោ ក៏បាន​បើក​ឱកាសឲ្យ​ពង្រីក​វប្បធម៌​សន្ទនានេះ បើ​អាច​ធ្វើ​បាន​ គឺ​ធ្វើ​ជា​មួយ​គណបក្ស​នយោបាយ​ដទៃ​ទៀត គឺ​ធ្វើ​តាម​រូប​មន្ត ២ បូកអ៊ិច ( 2+X ឬ1+x ) ដែល​សម្តេច​មាន​ជំ​នឿថា គណបក្ស​កាន់​អំ​ណាច និង​គណបក្ស​ឯកឧត្តម សម រង្ស៊ី គឺ​អាច​ធ្វើ​ទៅ​កើត។  សម្តេចតេជោ បាន​បន្ថែមថា នៅក្នុង​វប្បធម៌​សន្ទនារវាង​សម្តេច និង​ឯកឧត្តម សម រង្ស៊ី គឺ​គ្មាន​ការ​សន្ទនាណាមួយ​ ដែល​នាំ​ដល់​ការ​បំ​ផ្លាញ​ប្រទេស​ជាតិ​នោះ​ទេ។  សម្តេច​ បាន​បញ្ជាក់​ជា​ថ្មី​ទៀត​ថា វប្បធម៌​ទឹក​ឡើង​ត្រី​ស៊ី​ស្រមោច ទឹក​ខោចស្រមោចស៊ី​ត្រី ត្រូវ​បាន​បញ្ចប់​ហើយ ហើយ​សម្តេច​ក៏បានរំ​លឹក​ពី​សម្តី​របស់​ ឯកឧត្តម សម រង្ស៊ី ថា​ធ្លាប់​បាន​និយាយជាមួយ​សម្តេច​ថា បើ​ខ្មែរសាមគ្គី​គ្នា​ គឺ​ខ្មែរខ្លាំង ។ ពិត​មែន​តែ​ការ​តស៊ូ​មតិលើក​ឡើង​ពី​ខំ​ណុច​ខុសគ្នា​ខ្លះ ប៉ុន្តែ គោល​ការ​ណ៍​ជា​រួម​ គឺ​ខ្មែរសាមគ្គី​គ្នា​ និយាយគ្នា​បាន ដូច្នេះ មិ​ន​ចាំបាច់​ឲ្យ​បរទេសមក​គាប​សង្កត់​ខ្មែរនោះ​ទេ។ យ៉ាង​ណាមិញ​ ពាក់​ព័ន្ធ​ នឹង​ការ​ជួយ​សម្រួល​និតិវិធីតាម​ផ្លូវ​ច្បាប់ អ្នក​ជាប់​ទោស​មួយ​ចំ​នួន​ត្រូវ​បាន​ដោះ​លែង​ឲ្យ​នៅ​ក្រៅ​ឃុំ​ ដើម្បី​ចូល​រួម​ពិធី​បុណ្យ​ចូល​ឆ្នាំ​ថ្មី​ ជួប​ជុំ​ក្រុម​គ្រួសារ គឺ​បាន​កើត​ចេញ​ពី​ការ​យោគ​យល់​គ្នា​ សន្ទនាគ្នា​រវាង​ខ្មែរ និង​ខ្មែរ។ សម្តេច​ថ្លែង​ថា សហរដ្ឋ​អាមេរិក​ធ្លាប់​បាន​គាប​សង្កត់​ឲ្យ​សម្តេច​ ត្រូវ​តែ​ដោះ​លែង​អ្នក​ជាប់​ទោស​មួយ​ចំ​នួន​ជាបន្ទាន់ ប៉ុន្តែ សម្តេចតេជោ មាន​ប្រសាសន៍​ថា ប្រទេស​មួយ​ចំ​នួន​កំ​ពុង​គាប​សង្កត់​លើ​ទឹក​ចិត្ត​ និង​អធិបតេយ្យ​របស់កម្ពុជា ប៉ុន្តែ តាម​រយៈ វប្បធម៌​សន្ទនា ដោយ​ឈរលើ​ស្មារតី​​ឯកភាព​ជាតិ​ សម្តេចតេជោ​ ក៏បាន​យល់​ព្រមសម្រួល​លើ​ការងារ​មួយ​ចំ​នួន​តាម​ការ​យោគ​យល់​គ្នា​ជា​មួយ​ ឯកឧត្តម សម រង្ស៊ី។ សម្តេច​តេជោ បានបញ្ជាក់​ជា​ច្រើន​ដង​ថា « មាន​តែ​ដៃគូសន្ទនា​ដែល​មាន​ភាព​ស័ក្តិសម ទើប​អាច​ធ្វើ​ការ​ជា​មួយ​គ្នា​បាន និង​ដោះ​ស្រាយ​បញ្ហា​ចេញ បាន​ជោគ​ជ័យ»​៕


សម្តេច​​តេជោ ហ៊ុន សែន ចាត់​ទុក​​​ការដុត​​ខ្លោងទ្វា​រអង្គរ​សង្រ្កាន្ត​ជាសកម្មភាព​ជ្រុល​​និយម​ ​ និង​បញ្ជាឲ្យ​​អាជ្ញា​ធរមាន​​សមត្ថ​កិច្ច​ស្វែង​​រក​ចាប់​​ខ្លួន​ជន​​ប្រព្រឹត្ត​ល្មើស



 

សម្តេច​តេជោនាយករដ្ឋមន្រ្តី ហ៊ុន សែន ថ្លែង​នៅ​ក្នុង​ពិធី​បើក​ព្រឹត្តិការណ៍​អង្គរសង្ក្រាន្ត​ឆ្នាំ​២០១៥ ព្រឹកថ្ងៃ​ទី​១៤ ខែមេសា ឆ្នាំ​២០១៥​  ដោយ​បញ្ជាឲ្យ​អាជ្ញាធរមាន​សមត្ថកិច្ច​ស្វែង​រក​ចាប់​​ខ្លួន​ជន​ ប្រព្រឹត្តល្មើសដែល​បាន​លួចដុត​​ខ្លោងទ្វារអង្គរសង្រ្កាន្តយក​មក​អប់​រំ​ និងបាន​ចាត់​ទុក ទង្វើ​នោះ​ថា ជាសកម្មភាពជ្រុល​និយម និង​ខុសច្បាប់​​​។

ពាក់​ព័ន្ធ​នឹង​បញ្ហា​នេះ សម្តេច​តេជោ បាន​​បន្ត​ថា អាជ្ញាធរ​ត្រូវ​តែ​រក​មុខ​អ្នក​លួច​ដុត​ឲ្យ​បាន និងយក​មក​​អប់រំថា ​នេះ​ជា​អំពើ​ខុស​ច្បាប់ បើ​ទោះ​អ្នក​លួច​ដុត​ទាំងនោះ​មក​ពី​គណបក្ស​ណា​ក៏​ដោយ​។​​ សម្តេច​​ បន្ថែម​ថា ​រូបលោក និង​ឯកឧត្តម​ សម រង្ស៊ី នឹង​ធ្វើ​ការ​ងារ​នេះ​ជាមួយ​គ្នា ដើម្បី​លុប​បំបាត់​ភាព​​ជ្រុល​និយមរបស់​ក្រុម​ណាមួយ។ សម្តេច​បញ្ជាក់​ថា តួនាទី​របស់​ឯកឧត្តម សម រង្ស៊ី និង​សម្តេចត្រូវ​ខំ​ធ្វើ​យ៉ាង​ម៉េច ដើម្បី​ឲ្យ​យុវជន​និយម​កណ្តាល ចៀសវាង​ភាព​ជ្រុល​និយម​ និង​ការ​រើសអើង​ជាតិ​សាសន៍​ហួសហេតុ​។ ជាមួយ​គ្នា​នេះ សម្តេច​តេជោនាយករដ្ឋមន្រ្តី​ក៏បាន​អំពាវនាវផង​ដែរ « សូម​កុំ​ឲ្យប្រជាពលរដ្ឋ​​​ចាត់ទុក​ពណ៌ណាមួយ​ជា​របស់យួន​ និង​លាប​ពណ៌​ដាក់គ្នា ដែល​នាំ​ឲ្យ​មាន​ការ​ស្អប់ខ្ពើមគ្នា» ។ សម្តេច​នាយករដ្ឋមន្រ្តី​ បន្ត​ថា ​ការ​រចនាខ្លោង​ទ្វារ​នេះ គឺ​ជា​ការ​ខិតខំ​រក​ប្រភពដើម​របស់​ខ្មែរ បូក​ផ្សំ​នឹង​ការ​ច្នៃប្រឌិត​។ ប៉ុន្តែ ទោះ​យ៉ាង​ណា​ សម្តេច​តេជោ បាន​អំ​ពាវ​នាវ​ដល់យុវជន​ត្រូវ​តែ​ទទួល​យក​នូវ​មតិរិះគន់​ទាំង​អស់​ យក​ទៅ​ពិគ្រោះ​យោបល់​ជា​មួយ​អ្នក​ជំ​នាញ បើ​មាន​ការ​ខ្វះ​ចន្លោះ​ត្រូវ​បំ​ពេញ​បន្ថែម ប៉ុន្តែ បើ​បាន​ល្អ​ ត្រឹម​ត្រូវ​ហើយ​ គឺ​ជា​រឿង​មួយ​ដ៏​ប្រសើរខ្លាំង​ណាស់ ដែល​មិន​គួរ​ត្រូវ​បាន​ មាន​ក្រុម​ជ្រុល​និយមបង្ក​បញ្ហា​នោះ​ទេ​។

សូម​បញ្ជាក់​ថា ក្រោយ​ពី​ខ្លោងទ្វារ​អង្គរ​សង្ក្រាន្តចាស់ដែល​រង​ការរិះគន់​ពី​ក្រុម​ជ្រុល​ និយម​មួយ​ចំ​នួន​តាម​ប្រព័ន្ធ​បណ្ដាញ​ទំនាក់ទំនង​សង្គម​ហ្វេ​ស​ប៊ុកថា​ ជាធ្វើ​ឡើង​តាម​រចនបទ​វៀតណាម និង​ចិនមក​នោះ ​ត្រូវ​បានជនល្មើសលួច​ដុតកាលពីថ្ងៃ​ទី​០៧ខែ​មេសា​ ឆ្នាំ​២០១៥ ក្នុង​ដំ​ណាក់​កាល​ដែល​ខ្លោង​ទ្វារនោះ ត្រូវ​បាន​មន្ត្រី​រៀប​ចំ​កម្ម​វិធី​អង្គរសង្ក្រាន្ត​ ដឹក​នាំ​ដោយ​សហភាព​សហព័ន្ធ​យុវជន​កម្ពុជា បញ្ជាក់​ថា កំ​ពុង​សាង​សង់​មិន​ទាន់​រួចរាល់​នៅ​ឡើយ។ ប៉ុន្តែ បន្ទាប់​ពី​ត្រូវ​បាន​ជន​ជ្រុល​និយម​លួចដុត​បំ​ផ្លាញ​ ​ ​ខ្លោង​ទ្វារមួយ​នេះ​ក៏​បាន​ជុសជុល ​កែសម្រួល​ឡើងវិញ៕

សម្តេច​​តេជោ ហ៊ុន សែន និង​​​ឯកឧត្តម សម រង្ស៊ី មាន​​វត្តមាន​​ដ៏​ក​ម្រជាប្រវត្តិ​សាស្ត្រ​ក្នុង​​​ពិធី​​អង្គរ​សង្ក្រាន្ត​ឆ្នាំ២០១៥​​នៅ​ខេត្ត​​សៀមរាប ជា​មួយ​​នឹង​ការ​​ពង្រឹ​ង​បន្ថែម​​នូវ​វប្បធម៌​​សន្ទនា


ប្រមុខ​រាជរដ្ឋាភិបាល​​កម្ពុជា សម្តេច​តេជោ ហ៊ុន សែន​  និង​សម្តេច​កិត្តិព្រឹទ្ធ​បណ្ឌិត​ ប៊ុន រ៉ានី​ ហ៊ុន សែន​ និង​ឯកឧត្តម​ សម រង្ស៊ី ព្រម​ទាំង​លោក​ជំ​ទាវ​ ជូឡុង សូម៉ូ​រ៉ាស​គណបក្ស​សង្គ្រោះ​ជាតិ​​ បាន​មាន​វត្តមាន​រួម​គ្នា​ជា​លើក​ដំ​បូងក្នុង​ប្រវត្តិសាស្ត្រ​​ នៃ​​ពិធី​បើក​ព្រឹត្តិការណ៍​អង្គរសង្ក្រាន្ត​ឆ្នាំ​២០១៥ ដែល​រៀប​ចំ​ដោយ​សហភាព​សហព័ន្ធ​យុវជន​កម្ពុជា ដែល​មាន​ឯកឧត្តម​ ហ៊ុន ម៉ា​នី​ជា​ប្រធាន​ ដែលពិធី​ដ៏​មហស្ចារ្យនេះ​បាន​ប្រារព្ធ​ឡើង​នៅ​ខាង​មុខប្រាសាទបាយ័ន​ ក្នុង​តំ​បន់​រមណី​ដ្ឋាន​អង្គរខេត្តសៀម​រាប​ កាលពី​ថ្ងៃ​ទី​១៤ ខែ​មេសា ឆ្នាំ​២០១៥​។

វត្តមាន​របស់​សម្តេច​តេជោ និង​មេដឹក​នាំគណ​បក្ស​សង្គ្រោះ​ជាតិ បាន​កើត​មាន​មុន​ពេល​វេលា​តែប៉ុន្មាន​ម៉ោង​ប៉ុណ្ណោះ​ មុន​ការ​យាង​មក​ដល់​នៃ​ទេវតា​ឆ្នាំ​ថ្មី ដើម្បី​ប្ដូរ​វេន​ជាមួយ​ទេវតា​ឆ្នាំ​ចាស់។

សម្តេច​តេជោ ហ៊ុន សែន បាន​ថ្លែង​ទៅ​កាន់ប្រជាពល​រដ្ឋ​ដ៏​ច្រើ​កុះ​ករ​នៅ​ក្នុង​ពិធី​បើក​ព្រឹត្តិ​ ការណ៍​​អង្គរ​សង្ក្រាន្ត​លើក​ទី​៣ ឆ្នាំ​២០១៥ ថា នេះ​គឺ​ឆ្នាំ​ដ៏​ពិសេស​ដែល​សម្តេច​សុខ​ចិត្ត​លុប​ចោល​​ដំណើរ​ទៅ​កាន់​ សាធារណរដ្ឋ​កូរ៉េ ដើម្បី​យក​ឱកាស​ចូល​រួម​ជាមួយ​ប្រជាពលរដ្ឋ​ខ្មែរ​ដែល​កំពុង​ប្រារព្ធ​ ព្រឹត្តិការណ៍​អង្គរ​សង្ក្រាន្ត​អបអរ​ឆ្នាំ​ថ្មី​វិញ។ សម្តេច​ បាន​បន្ថែម​ថា ពេល​នេះ​ប្រទេស​កម្ពុជាបាន​ដើរ​ដល់​ដំណាក់កាល​ថ្មី​មួយ​ទៀត ដោយសារ​មាន​វត្តមាន​របស់​ឯកឧត្តម​សម រង្ស៊ី និង​លោកជំ​ទាវ​ ចូល​រួម​ក្នុង​ព្រឹត្តិការណ៍​អង្គរ​សង្ក្រាន្ត​នេះ។

សម្តេច​មាន​ប្រសាសន៍​បន្ត​ថា  នៅ​ថ្ងៃ​នេះ វប្បធម៌​សន្ទនា​មួយ​បាន​ចាប់​ផ្ដើម​នៅ​លើ​ទឹកដី​កម្ពុជា ជំនួស​ឱ្យ​ការ​ប្រទូសរ៉ាយ។ គ្មាន​ការ​ដោះស្រាយ​តាម​រយៈ​ជម្លោះ​ប្រដាប់​អាវុធ ឬ​ការ​ប្រទូស​រ៉ាយ​​នយោបាយ​ណា​មាន​លទ្ធផល​ល្អ​ជា​ជាង​ការ​សន្ទនា​គ្នា​ទេ។ ឥឡូវ​នេះ​​យើង​ត្រូវ​លើក​កម្ពស់​​ការ​សន្ទនា​រវាង​អ្នក​នយោបាយ៖ «វប្បធម៌​សន្ទនា​របស់​យើង​គោលដៅ​សំខាន់ ២​យ៉ាង ១​ពង្រឹង​សន្តិភាព​មួយ​ទៀត​ជំរុញ​ការ​អភិវឌ្ឍ​ប្រទេស​ជាតិ​ចេះ​ធ្វើ​ការ​ ជាមួយ​គ្នា»។


ព្រឹត្តិការណ៍​អង្គរសង្ក្រាន្ត​ ត្រូវ​បាន​រៀប​ចំ​ឡើង​ ដើម្បី​ចូល​រួម​អប​អរសាទរពិធី​បុណ្យ​ចូល​ឆ្នាំ​ថ្មី​ប្រពៃ​ណី​ជាតិ​ខ្មែរ និង​ផ្តល់​ភាព​សប្បាយ​រីក​រាយ​ជួប​ជុំ​គ្នា​ តាម​រយការ​បង្ហាញ​អំ​ពី​ល្បែង​ប្រជា​ប្រីយ៍​ របាំប្រពៃណី​ ទំ​នៀម​ទម្លាប់​នៃការ​រស់​នៅ​របស់​ប្រជាជន​ខ្មែរ សិល្បៈ និង​ទស្សនីយភាព​ផ្សេង​ៗ ដែល​​សម្តែង​ដោយ​យុវជន​ យុវនារី​ សិល្បករខ្មែរ រួម​ជា​មួយ​នឹង​ការ​បង្ហាញ​នូវកេរដំ​ណែល​​អរិយធម៌​ និង​ស្នាដៃ​នានារបស់​បុព្វ​បុរស​ខ្មែរដែល​បាន​បន្សល់​ទុក​តាំងពី​យូរលង់​មក​ នោះ មក​រំ​លេចឡើង​ជា​ផ្ទាំង​ទស្សនីយភាព​ថ្មី​ៗ និង​ប្លែក​អស្ចារ្យ​ ដើម្បី​បង្ហាញ​ជូន​ភ្ញៀវ​ជាតិ និង​អន្តរជាតិ​ បាន​​ចូល​រួម​ទស្សនាកំ​សាន្ត។

សម្តេច​តេជោ ហ៊ុន សែន បាន​មានប្រសាសន៍​ថា សម្តេច​ សូម​ឆ្លៀត​ឱកាសនេះ​ នឹករលឹក​ឃើញ​​ដល់​គុណរបស់​បុព្វ​បុរសខ្មែរ ដែល​បាន​កសាង និងបន្សល់ទុកប្រាសាទ​ជាច្រើន គឺ​សម្តេច​ បញ្ជាក់​ថា « ផឹក​ទឹក​ ត្រូវ​នឹក​ដល់​ប្រភព​ទឹក​» ហើយថា ​ព្រឹត្តិការណ៍​អង្គ​រសង្ក្រាន្ត​ គឺ​ជា​ឱកាស​ដ៏​ប្រពៃ​នៃ​ការ​ជួប​ជុំ​មហាគ្រួសារខ្មែរទាំង​ផ្នែក​វប្បធម៌ និង​នយោបាយ ឆ្លុះ​បញ្ចាំង​អំពី​ឯកភាព​​ជាតិ​ សាមគ្គី​ភាព​  និង​ក៏​ជា​ការ​បង្ហាញ​អំ​ពី « ​ជំ​នួប​រវាង​វប្បធម៌​អរូបី ជួប​ជា​មួយ​វប្ប​ធម៌​រូបី​» ។​ ក្នុង​ន័យ​ថា ពេជ្រដែល​មិន​ទាន់​បាន​ច្នៃ ត្រូវ​បាន​កែ​ច្នៃដោយ​ក្រុម​យុវជន តាម​រយៈការ​រៀប​ចំ​របាំប្រពៃណី​ ល្បែង​កំ​សាន្តនានានៅ​លើ​ទី​តាំង​រូប​បី​ គឺ​ទឹក​ដី​អង្គវត្តដ៏​បវរនៃ​យើង ។ សម្តេច​​បន្ថែម​ថា ​ការ​រៀប​ចំ​កម្មវិធី​អង្គរសង្ក្រាន្តនេះ គឺបាន​ធ្វើ​ឲ្យ​អង្គរ ដែល​ជា​សម្បត្តិ​បេតិក​ភណ្ឌ​​ពិភព​លោក កាន់​តែល្បីរន្ទឺ​បន្ថែម​ទៀត​លើ​ឆាក​អន្តរជាតិ​។

បន្ទាប់​ពី​ប្រកាសបើកកម្មវិធី​អង្គរ​សង្ក្រាន្តរួម​មក​ សម្តេចតេជោនាយករដ្ឋមន្ត្រី​នៃ​រាជរដ្ឋាភិបាល និង​ឯកឧត្តម​ សម រង្ស៊ី ប្រធាន​គណបក្ស​ប្រឆាំង​ ចូល​រួម​អម​ដំ​ណើរដោយ​ភរិយានៃ​មេដឹក​នាំ​ និង​មន្ត្រី​ជាន់​ខ្ពស់​ជាច្រើន​រូប​ បានដើរ​ទស្សនា​ទិដ្ឋភាព​ប្លែកៗ​ជា​ច្រើន​កន្លែង​ជាមួយ​គ្នា ប្រកប​ដោយ​បរិយាកាសរីក​រាយ ​ល្អូក​ល្អឺន និង​ស្និទ្ធ​ស្នាល​ ​​៕





នំអន្សម​យក្ស​របស់​​កម្ពុជា ដែល​​មាន​​ទម្ងន់​​ជាង​​៤តោន បាន​ជាប់​ក្នុង​កំណត់​ត្រា​​ពិភព​​លោក​​ហើយ



នំអន្សមយក្សរបស់ខ្មែរដែល​មាន​ទម្ងន់​ដល់​ទៅ​ប្រមាណ​៤,០៤០តោន ក្រោយ​ពី​ចម្អិន​អស់​រយៈ​ពេល​៤៥ម៉ោង នៅ​ពេល​នេះត្រូវបានចៅ​ក្រម​អន្តរជាតិ​ សម្រេច​ដាក់​បញ្ចូលទៅ​ក្នុង​កំណត់​ត្រា​ពិភពលោក «Guinness World Records» ដោយ​ជោគ​ជ័យ​ហើយ ​នារសៀល​ថ្ងៃ​ទី​១៣ ខែ​មេសា ឆ្នាំ​២០១៥​នេះ ដែលជាប្រវត្តិសាស្រ្តថ្មីមួយទៀតរបស់កម្ពុជា ។

លោកស្រី Seyda Subasi Gemici តំណាងស្ថាប័ន Guinness World Records បាន​អញ្ជើញ​មកដល់​កម្ពុជា​ដោយ​ផ្ទាល់ និង​បាន​ប្រកាសដាក់បញ្ចូលនំ​អន្សម​ខ្មែរ ក្នុងកំណត់ត្រាពិភព​លោ​ក បន្ទាប់ពីបានវាយតម្លៃយ៉ាងល្អិតល្អន់ ពាក់ព័ន្ធទៅនឹងទម្ងន់ រសជាតិនំ ជាមួយនឹង​គ្រឿងផ្សំ ព្រមទាំងគុណភាពនំផងដែរ។  លោកស្រី Seyda Subasi Gemici បានវាយ​តម្លៃ​ថា នំអន្សម​របស់កម្ពុជា មានទម្ងន់ធ្ងន់ជាងគេបំ​ផុតលើពិភពលោក និង​បាន​ប្រគល់​វិញ្ញាបនប័ត្រ Guinness World Records ជូន​ចំពោះ ឯកឧត្តមអភិបាល នៃ​គណៈអភិបាល​ខេត្តសៀម​រាប និង​គណៈគ្រប់​គ្រង​កម្មវិធី ​ ដឹក​នាំ​ដោយ​ ឯកឧត្តម ហ៊ុន ម៉ានី ប្រធាន​សហភាព​សហព័ន្ធ​យុវជ​ន​​កម្ពុជា និង​វត្តមាន​ នៃក្រុម​ការងារ​រៀប​ចំ​ព្រឹត្តិការណ៍​អង្គរសង្ក្រាន្ត​ជា​ច្រើន​​រូបចូល​រួម ​ផង​ដែរ​។
ពិធី​ដ៏ឧឡារិក​នេះ បាន​ធ្វើ​ឡើង​មុន​មួយ​ថ្ងៃ​ ដែល​សម្តេច​តេជោ ហ៊ុន សែន នាយករដ្ឋមន្ត្រី​កម្ពុជា និង​សម្តេច​កត្តិព្រឹទ្ធបណ្ឌិត ប៊ុន រ៉ានី ហ៊ុន សែន និង​ថ្នាក់​ដឹក​នាំ​ជាន់​ខ្ពស់​ក្នុង​ជួរ​រាជ​រដ្ឋាភិបាល​ជាច្រើន​រូប ដែល​នឹង​អញ្ជើញ​ចូល​រួម​ជា​អធិបតី​ ជា​កិត្តិយស នៃ​ការ​បើក​ព្រឹត្តិការណ៍​អង្គរសង្ក្រាន្ត​ឆ្នាំ​២០១៥ ដែល​នឹង​ប្រព្រឹត្តទៅ​នៅ​ថ្ងៃ​ទី​១៤ ដល់បញ្ចប់​នៅ​ថ្ងៃទី​១៦ ខែ​មេសា ដែល​ជា​ថ្ងៃ​ចុង​ក្រោយ​នៃ​ពិធី​បុណ្យ​ចូល​ឆ្នាំ​ថ្មី​ប្រពៃ​ណី​ជាតិ​ខ្មែរ។

ព្រឹត្តិការណ៍​អង្គរសង្ក្រាន្ត​ឆ្នាំ​២០១៥​នេះ​ ក៏​មាន​វត្តមាន​ចូល​រួមផង​ដែរ​ពី​ឯកឧត្តម​ សម រង្ស៊ី និង​លោក​ជំ​ទាវ ជូឡុង សូម៉ូ​រ៉ា តប​តាម​ការ​អញ្ជើញ​របស់​ ឯកឧត្តម ហ៊ុន ម៉ា​នី​ អ្នក​តំ​ណាង​រាស្ត្រ​គណបក្ស​​ប្រជា​ជន​កម្ពុជា និង​ជាប្រធាន​សហភាព​សហព័ន្ធ​យុវជន​កម្ពុជា​។

នំអន្សមយក្សនេះ​ ត្រូវ​បាន​វេចខ្ចប់ដោយ​ស្លឹក​ចេក​ទម្ងន់៣៣៣គី​ឡូក្រាម និ​ងខ្សែចេក​ទម្ងន់​៣៧៥​គីឡូក្រាម​ ដោយ​មាន​គ្រឿង​ផ្សំ​អង្ករដំ​ណើប១,០០០គីឡូក្រាម​ ខ្ទិះដូង​៤៩៩គីឡូក្រាម​ អំ​បិល​​​១៥គីឡូក្រាម  សណ្តែក​បាយ៤៩៩គីឡូក្រាម​ សាច់​ជ្រូក​បី​ជាន់​៥០៧គីឡូក្រាម​ ស្ករ៤​គីឡូ​ក្រាម​ ម្រេចកំ​ពត៣គីឡូក្រាម​ ខ្ទឹម​ចិញ្ច្រាំ១០គីឡូក្រាម​ និង​ស្លឹក​ខ្ទឹម​ចិញ្ច្រាំ១៦គីឡូក្រាម​។ នំ​អន្សម​យក្ស​នេះ​ ត្រូវ​បាន​ចម្អិន​តាម​លក្ខណៈបច្ចេក​ទេស​ត្រឹម​ត្រូវ​ និង​មាន​រសជាតិ​ទាក់​ទាញ​ ជា​ពិសេស នំ​អន្សម​នេះ​ត្រូវ​បាន​ចម្អិន​ឡើង​ដោយ​ក្រុម​ចុង​ភៅ​ខ្មែរ និង​កូន​កាំ​បិត​ចំ​នួន​១០០​នាក់​ នេះ​បើ​យោង​តាម​សេចក្តី​ប្រកាសព័ត៌មាន​របស់​សហភាព​សហព័ន្ធ​យុវជន​កម្ពុជា ដែល​ចេញ​​ផ្សាយ​បន្ទាប់​ពី​នំ​អន្សម​យក្ស​ខ្មែរត្រូវ​បាន​បញ្ចូល​ក្នុង​កំ​ ណត់​ត្រាពិភព​លោក​ Guinness World Records។
សេចក្តី​ប្រកាសព័ត៌មាន​របស់ ស.ស.យ.ក បាន​បន្ថែម​ថា លោក​ ចាន់​ សុភា តំ​ណាង​សមាគម​ចុង​ភៅកម្ពុជា បាន​និយាយ​ដោយ​ទឹក​មុខ​រីករាយ​ថា ក្នុង​នាម​ជា​តំ​ណាង​សមាគមចុង​ភៅ ក៏ដូច​ជាប្រជាជន​កម្ពុជានៅ​ទូ​ទាំង​ប្រទេស​ លោក​ពិត​ជា​មាន​មោទនភាព​ ដែល​ក្រុម​ការងារ​ទាំង​អស់​បាន​រួម​គ្នា​ធ្វើ​ឲ្យ​កម្ពុជា​បាន​លេចធ្លោនៅ​ ក្នុង​ពិភព​លោក​។

សូម​បញ្ជាក់​ផង​ដែរថា មុន​នឹងការប្រកាសដាក់នំអន្សមយក្ស ក្នុងកំណត់ត្រាពិភពលោកនោះ ក្បួនដង្ហែដ៏មហោឡារឹកមួយត្រូវបានធ្វើឡើងកណ្តាលក្រុងអង្គរ ដោយមានមហាជន​ចូលរួម និងអ្នកឈរអមសងខាងផ្លូវរាប់ម៉ឺននាក់ ហើយ​ដែល​ពិធី​ប្រគល់​វិញ្ញាបនបត្រ ចូល​ក្នុង​កំ​ណត់​ត្រាពិភព​លោក បាន​ធ្វើ​ឡើង​នៅទីលានជល់ដំរី ជា​ទីកន្លែងដែល នំអន្សមក្នុង​តម្កល់សម្រាប់​អប​អរសាទរព្រឹត្តិការណ៍​អង្គរ​ សង្រ្កាន្តតែម្តង។

ពិធីប្រគល់​វិញ្ញាបនបត្រដាក់បញ្ចូលនំ​អន្សមយក្សក្នុងកំ​ណត់​ត្រាពិភព​លោក គឺ​ជាលើក​ទី​មួយសម្រាប់​ប្រជាជន​កម្ពុជា និង​ប្រជាជន​នៅ​លើ​ពិភព​លោក ដែល​កំណត់ត្រាពិសេសនេះ មិន​ធ្លាប់​មាន​ពីមុនមកទេក្នុង​ប្រវត្តិសាស្ត្រ​ ​៕