Thursday, October 20, 2022

វិភាគអន្តរជាតិ៖ វិបត្តិកូរ៉េខាងជើង កាន់តែខិតជិតចូលមកដល់


(ញូវយ៉ក)៖ វិបត្តិភូមិសាស្ត្រនយោបាយថ្មីមួយ បាន និងកំពុងដរចេញពីសង្រ្គាមឈ្លានពានរបស់រុស្ស៉ីនៅអ៊ុយក្រែន ភាពតានតឹងក្នុងតំបន់ច្រកសមុទ្រតៃវ៉ាន់ និងការប្រជែងដណ្ដើមឥទ្ធិពលយ៉ាងស្រួចស្រាល់រវាងសហរដ្ឋអាមេរិក និងចិន ហើយឥលូវនេះបូកបន្ថែមវិបត្តិមួយទៀតដែលកាន់តែនៅជិតបង្កើយ នោះគឺ កូរ៉េខាងជើង។ អស់រយៈពេលជាង៣ឆ្នាំ បន្ទាប់ពីផ្អាកការធ្វើតេស្ដអាវុធនុយក្លេអ៊ែរ កូរ៉េខាងជើងបានបង្កើនការបាញ់សាកល្បងមីស៊ីលឥតល្ហែ ដែលធ្វើឱ្យ ក្រុមមន្ត្រីចារកម្មអាមេរិកព្រមានថាកូរ៉េខាងជើងអាចនឹងធ្វើតេស្ដអាវុធនុយក្លេអ៊ែរលើកទី៧ ក្នុងពេលអនាគតដ៏ខ្លី ឬអាចមុននឹងការបោះឆ្នោតពាក់កណ្ដាល អាណត្តិរបស់សហរដ្ឋអាមេរិក នៅថ្ងៃទី៨ ខែវិច្ឆិកាខាងមុខនេះ។


បើគេនៅចំាមិនភ្លេចទេ កាលពីជាង៥ឆ្នាំមុន ពិភពលោកបានប្រឈមមុខនឹងហានិភ័យនៃសង្រ្គាមនុយក្លេអ៊ែរម្ដងរួចមកហើយ នៅពេលដែលលោក គីម ជុងអ៊ុន និងអតីតប្រធានាធិបតីអាមេរិក លោក ដូណាល់ ត្រាំ បានសម្លុតគំរាមកម្ទេចគ្នាទៅវិញទៅមកតាមរយៈការអួតពី «ប៊ូតុងនុយក្លេអ៊ែរ»។ ការសម្លុតគ្នានេះ បានស្ងប់ស្ងាត់ទៅវិញក្រោយលោក ដូណាល់ ត្រាំ និងលោក គីម ជុងអ៊ុនបានជួបគ្នានៅសិង្ហបុរី និងវៀតណាម។ ក្រោយបរាជ័យនៅហាណូយ ក្នុងកិច្ចប្រជុំកំពូល ជាមួយលោក ត្រាំ កាលពីឆ្នាំ២០១៩ លោក គីម បានត្រឡប់ទៅកាន់ទីក្រុងព្យុងយ៉ាងវិញ ហើយមួយរយៈក្រោយមក លោកបានសម្រេចចិត្តបិទខ្ទប់កូរ៉េខាងជើង ដើម្បីប្រយុទ្ធប្រឆាំងនឹងកូវីដ១៩។ ប៉ុន្តែ ក្នុងពេលជាមួយគ្នានោះ កម្មវិធីអាវុធនុយក្លេអ៊ែរ និងមីស៊ីលរបស់កូរ៉េខាងជើងមិនត្រូវបានបិទខ្ទប់នោះទេ ហើយបែរជា កាន់តែរីកចម្រើនទៅមុខថែមទៀត។


លោក គីម ជុងអ៊ុន បានបង្ហើបពីបំណងបង្កើនឃ្លាំងអាវុធនុយក្លេអ៊ែរ ក្នុងពេលជាមួយគ្នាដែលលោកបានចាប់ផ្ដើមយុទ្ធនាការទូតកាលពីដើមឆ្នាំ២០១៨ និងបានធ្វើ តាមពាក្យសន្យារបស់លោកពិតមែន ដោយកូរ៉េខាងជើង សព្វថ្ងៃត្រូវបានគេវាយតម្លៃថាមានអាវុធនុយក្លេអ៊ែរ ៥០គ្រាប់។ ក្នុងឆ្នាំ២០២០ ភ្លាមៗក្រោយការធ្វើតេស្ដ បាញ់មីស៊ីលផ្លោងចេញពីនាវាមុជទឹក លោក គីម បានសម្ញែងមីស៊ីលផ្លោងរយៈចម្ងាយដ៏ធំសម្បើម នៅឯព្យុហយាត្រាយោធាមួយនៅពេលយប់។ នៅឆ្នាំ២០២១ ទីភ្នាក់ងារអន្តរជាតិថាមពលអាតូមិកបានរាយការណ៍ថាកូរ៉េខាងជើងបានចាប់ផ្ដើមឡើងវិញនូវការចម្រាញ់សារធាតុផ្លុយតូញ៉ូម និងមានរយៈខ្លី ក្រោមមកទៀត ទីក្រុងព្យុងយ៉ាងបានបាញ់សាកល្បងមីស៊ីលគ្រូសរយៈចម្ងាយឆ្ងាយ និងមីស៊ីលល្បឿនលឿនជាងសំឡេងមានសមត្ថភាពពាំក្បាលគ្រាប់នុយក្លេអ៊ែរ។


មកទល់នឹងបច្ចុប្បន្ន ពោលគឺក្នុងឆ្នាំ២០២២នេះ កូរ៉េខាងជើង បានបាញ់តេស្ដមីស៊ីលផ្លោងជាង ៤០គ្រាប់ ក្នុងនោះរួមមានទាំងកំឡុងដំណើរទស្សនកិច្ចរបស់ អនុប្រធានាធិបតីអាមេរិក លោកស្រី កាម៉ាឡា ហារីស (Kamala Harris) នៅជប៉ុន និងកូរ៉េខាងត្បូងកាលពីថ្ងៃកញ្ញាកន្លងទៅ ដោយមានមីស៊ីលមួយគ្រាប់ ហោះរំលងប្រទេសជប៉ុនជាលើកដំបូងគិតចាប់តាំងពីឆ្នាំ២០១៧មក។ មិនតែប៉ុណ្ណោះ របបដឹកនាំលោក គីម បានចម្រាញ់សារធាតុផ្លុយតូញ៉ូមឡើងវិញនៅឯ រោងចក្រ យ៉ុងប៊ីយុន (Yongbyon) រីឯរូបភាពផ្កាយរណបពីក្រុមហ៊ុនអាមេរិកជាច្រើនបង្ហាញពីសកម្មភាពសាងសង់នៅឯរោងចក្រ ផុងហ្គេរី (Punggye-ri) ដែលនេះជាសញ្ញានៃការត្រៀមធ្វើតេស្ដអាវុធនុយក្លេអ៊ែរលើកទី៧។


ពិតមែនទៅ តាំងពីជំនាន់លោក គីម ជុងអ៉ីល (ឪពុករបស់លោក គីម ជុងអ៊ុន) រហូតមកដល់ជំនាន់លោក គីម ជុងអ៊ុន កូរ៉េខាងជើងមិនដែលមានគំនិតចង់បោះ បង់ចោលអាវុធនុយក្លេអ៊ែរម្ដងណាឡើយ បើទោះជាសហរដ្ឋអាមេរិក និងកូរ៉េខាងត្បូងមានពេលខ្លះដាក់សម្ពាធផង និងលួងលោមជាមួយសម្បទានសេដ្ឋកិច្ច ក៏ដោយ។ មួយវិញទៀត នៅក្នុងជំនាន់លោក គីម ជុងអ៊ុនតែម្ដង ទីក្រុងព្យុងយ៉ាងបានប្រកាសជាសាធារណៈថាខ្លួននឹងមិនបោះបង់ចោលអាវុធនុយក្លេអ៊ែរ ជាដាច់ខាតនៅក្នុងច្បាប់ថ្មីមួយដែលអនុញ្ញាតឱ្យកងទ័ពកូរ៉េខាងជើង ប្រើអាវុធនុយក្លេអ៊ែរវាយប្រហារលើប្រទេសណាមួយដែលព្យាយាមផ្ដួលរំលំរបបដឹកនាំ របស់លោក គីម។


បើតាមក្រុមអ្នកជំនាញ ការប្រកាន់យកអាកប្បកិរិយាបែបនេះគឺលោក គីម កំពុងចង់បង្ហាញប្រាប់ពិភពលោកថាកូរ៉េខាងជើងគឺជារដ្ឋអាវុធនុយក្លេអ៊ែរ ហើយមិនយូរ មិនឆាប់ លោកអាចនឹងអំពាវនាវឱ្យមានកិច្ចចរចាស្ដីពីការកាត់បន្ថយអាវុធនុយក្លេអ៊ែរជាមួយសហរដ្ឋអាមេរិក សំដៅឱ្យគេគ្រប់គ្នាដឹងថាកូរ៉េខាងជើង គឺជារដ្ឋអាវុធនុយក្លេអ៊ែរប្រកបដោយហេតុផល មិនមែនជារដ្ឋបំផ្លាញសន្តិភាពនោះទេ។ ជាងនេះទៅទៀត លោក គីម ក៏នឹងបន្តទាញយកប្រយោជន៍ពីទំនាក់ទំនង ប្រេះឆារវាងសហរដ្ឋអាមេរិកជាមួយចិន និងរុស្ស៉ីផងដែរ។ ដ្បិត តាមរយៈសម្ព័ន្ធភាពយុទ្ធសាស្ត្ររវាងលោក ស៊ី ជិនពីង និងលោក វ្ល៉ាឌីមៀ ពូទីន ដែលកំពុងចាត់ទុក អាមេរិក និងលោកខាងលិចជាសត្រូវរួម ច្បាស់ណាស់វាបានផ្ដល់ការធានាមួយដល់លោក គីម ថាទាំងចិន និងរុស្ស៉ីនឹងមិនចូលដៃជាមួយលោកខាងលិច ដើម្បី គ្រប់គ្រង ឬដាក់សម្ពាធ ឬក៏ដាក់ទណ្ឌកម្មណាមួយលើកូរ៉េខាងជើងនោះឡើយ។ គួបផ្សំនឹងការសម្រេចចិត្តខ្ទប់ដំណោះស្រាយ UN ប្រឆាំងកូរ៉េខាងជើងពីសំណាក់ ចិន និងរុស្ស៉ី លោក គីម ជុងអ៊ុន នឹងកាន់តែប្រឹងពង្រីកមហិច្ឆតាអាវុធនុយក្លេអ៊ែរ។


ជាគោលការណ៍ ទាំងចិន និងរុស្ស៉ីសុទ្ធតែប្រឆាំងនឹងកម្មវិធីអាវុធនុយក្លេអ៊ែរបស់កូរ៉េខាងជើង ហើយជាពិសេសមេដឹកនាំចិន ក៏ធ្លាប់បានបង្ហាញការមិនពេញចិត្តដែរ ចំពោះការធ្វើតេស្ដអាវុធនុយក្លេអ៊ែនាពេលកន្លងមក ដ្បិតបារម្ភខ្លាចថាបើមានកំហុសឆ្គងណាមួយ សារធាតុវិទ្យុសកម្មអាចនឹងសាយភាយឆ្លងដែនចូលមកក្នុង ទឹកដីចិន។ តែទោះជាបែបនេះក្ដី លោក គីម ជុងអ៊ុន ដឹងយ៉ាងច្បាស់ថាចិន និងរុស្ស៉ីប្រាកដជាមិនថាអីនោះទេ ព្រោះថាការបង្ករឿងរបស់កូរ៉េខាងជើងក៏អាចជា ប្រយោជន៍សម្រាប់ប៉េកាំង និងមូស្គូដែរ នោះគឺការបង្វែរចំណាប់អារម្មរបស់សហរដ្ឋអាមេរិកចេញពីសំណុំរឿងតៃវ៉ាន់ និងសង្រ្គាមនៅអ៊ុយក្រែន។ ក៏ប៉ុន្តែអ្វីដែល គួរឱ្យភ័យខ្លាច នោះគឺភាពតានតឹងជាមួយកូរ៉េខាងជើង វាជារឿងគ្រោះថ្នាក់បំផុត ដោយវោហាសាស្ត្រសម្លុតគំរាមអាចនឹងក្លាយជាការពិតគ្រប់ពេលវេលា៕ ដោយៈ Fresh News






ប្រធានាធិបតីទីម័រ អរគុណកម្ពុជា ដែលបានគាំទ្រយ៉ាងខ្លាំងក្លាប្រទេសខ្លួន ចូលជាសមាជិកអាស៊ានក្នុងឆ្នាំនេះ


(FN-ភ្នំពេញ)៖ លោកបណ្ឌិត ចូហ្សេ រ៉ាម៉ូស ហ៊រតា (José Ramos Horta) ប្រធានាធិបតី នៃសាធារណរដ្ឋប្រជាធិបតេយ្យទីម័រឡេស្តេ (ទីម័រខាងកើត) បានថ្លែងអំណរគុណកម្ពុជា ដែលបានគាំទ្រយ៉ាងខ្លាំងក្លាដល់ប្រទេសរបស់ខ្លួន បានចូលជាសមាជិកអាស៊ានក្នុងឆ្នាំ២០២២នេះ។




លោកប្រធានាធិតី ថ្លែងអំណរគុណបែបនេះ ក្នុងឱកាសដែលោកបានជួបសម្តែងការគួរសមជាមួយ សម្តេចអគ្គមហាពញាចក្រី ហេង សំរិន ប្រធានរដ្ឋសភា នៅវិមានរដ្ឋសភា នារសៀលថ្ងៃទី២០ ខែតុលា ឆ្នាំ២០២២នេះ ខណៈលោកប្រធានាធិបតី បំពេញទស្សនកិច្ចជាផ្លូវការនិងមិត្តភាពនៅកម្ពុជា។

សេចក្តីជូនព័ត៌មានរបស់រដ្ឋសភា បានបញ្ជាក់យ៉ាងដូច្នេះថា «ឯកឧត្តមបណ្ឌិត ចូហ្សេ រ៉ាម៉ូស ហ៊រតា បានសម្តែងការអបអរសាទរ និងក្តីសប្បាយរីករាយដោយឃើញកម្ពុជាមានការអភិវឌ្ឍយ៉ាងឆាប់រហ័ស។ ឯកឧត្តមប្រធានាធិបតី បានថ្លែងអំណរគុណយ៉ាងជ្រាលជ្រៅដល់កម្ពុជា ដែលបានគំាទ្រយ៉ាងខ្លាំងក្លាដល់ប្រទេសទីម័រឡេស្តេ ក្នុងការបានចូលជាសមាជិកអាស៊ាន នៅក្នុងឆ្នាំ២០២២នេះ»។

លោកប្រធានាធិតីបានបញ្ជាក់បន្ថែមថា ប្រទេសទីម័រឡេស្តេ នឹងខិតខំជំរុញទំនាក់ទំនងជាមួយកម្ពុជាលើគ្រប់វិស័យឱ្យរឹងមាំថែមទៀត នៅក្នុងពេលឆាប់ៗខាងមុខនេះ ទីម័រឡេស្តេនិងកម្ពុជា នឹងមានជើងហោះហើរត្រង់ជាមួយគ្នាផងដែរ។

សម្តេចអគ្គមហាពញាចក្រី ហេង សំរិន បានអះអាងថា កម្ពុជាបានគាំទ្រពេញទំហឹងចំពោះប្រទេសទីម័រឡេស្តេ ចូលជាសមាជិកអាស៊ានទី១១ និងចូលជាសមាជិក អន្តរសភាអាស៊ាន សម្រាប់សភាប្រទេសទីម័រឡេស្តេ ផងដែរ។

សម្តេចបានចាត់ទុកដំណើរទស្សនកិច្ចរបស់លោកប្រធានាធិបតីទីម័រខាងកើតនៅកម្ពុជានេះ នឹងរួមចំណែកពង្រឹង និងពង្រីកទំនាក់ទំនងមិត្តភាព និងកិច្ចសហប្រតិបត្តិការកម្ពុជា-ទីម័រឡេស្តេ ឱ្យបានកាន់តែប្រសើរឡើងថែមមួយកម្រិតទៀត។

សម្តេចអគ្គមហាពញាចក្រី ហេង សំរិន បានលើកឡើងថា ការបន្តថែរក្សាទំនាក់ទំនងមិត្តភាព និងកិច្ចសហប្រតិបត្តិការជាទ្វេភាគី និងក្នុងក្របខ័ណ្ឌសហគមន៍អាស៊ាន ពិតជាមានសារសំខាន់ នៅក្នុងកាលៈទេសៈបច្ចុប្បន្ន និងទៅអនាគត ដែលសភាពការណ៍សកលលោក មានការប្រែប្រួល ការវិវឌ្ឍឥតឈប់ឈរ៕









សម្តេចតេជោ ហ៊ុន សែន ជំរុញឱ្យទីម័រមកវិនិយោគលើវិស័យកែច្នៃស្រូវអង្ករ និងទិញអង្ករពីកម្ពុជាទៅទីម័រ

(FN-ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា តាមរយៈ លោកបណ្ឌិត ចូហ្សេ ម៉ានូអែល រ៉ាមូស អរតា (Jose Ramos-Horta) ប្រធានាធិបតីទីម័រឡេស្ត (ទីម័រខាងកើត) បានជំរុញឱ្យវិនិយោគិនទីម័រ មកវិនិយោគលើវិស័យកែច្នៃស្រូវអង្ករនៅកម្ពុជា ហើយនាំចេញអង្ករពីទៅកាន់ប្រទេសទីម័រឱ្យបានកាន់តែច្រើន។



លោកបណ្ឌិត ចូហ្សេ ម៉ានូអែល រ៉ាមូស អរតា វ័យ ៧២ឆ្នាំ បានដឹកនាំគណៈប្រតិភូអញ្ជើញដល់ប្រទេសកម្ពុជាកាលពីថ្ងៃទី១៩ ខែតុលា ឆ្នាំ២០២២ ដើម្បីបំពេញទស្សនកិច្ចផ្លូវរដ្ឋរយៈពេល៣ថ្ងៃ ចាប់ពីថ្ងៃទី ១៩ ដល់ថ្ងៃទី២១ ខែតុលា ឆ្នាំ២០២២។ លោកបានជួបពិភាក្សាការងារជាមួយ សម្តេចតេជោ ហ៊ុន សែន នៅវិមានសន្តិភាព នៅរសៀល ថ្ងៃទី២០ ខែតុលា ឆ្នាំ២០២២នេះ។

ថ្លែងប្រាប់ក្រុមអ្នកសារព័ត៌មានក្រោយបញ្ចប់ជំនួបនេះ លោក អ៊ាង សុផល្លែត ជំនួយការផ្ទាល់របស់ សម្តេចតេជោ ហ៊ុន សែន បានបញ្ជាក់ថា នៅក្នុងជំនួបនេះ លោកប្រធានាធិបតី បានថ្លែងអំណរគុណសម្តេចតេជោ ក៏ដូចជារាជរដ្ឋាភិបាលកម្ពុជា ដែលបានគាំទ្រទីម័រខាងកើត ជាពិសេសទៅលើវិស័យអភិវឌ្ឍ កសាងជាតិ ស្ថិរភាពសង្គម និងគាំទ្រសមាជិកភាពរបស់ទីម័រខាងកើត នៅក្នុងសហគមន៍អាស៊ាន ហើយថ្មីៗនេះទៀត ក៏បានឧបត្ថម្ភដល់ទីម័រនូវវ៉ាក់សាំងបង្ការជំងឺកូវីដ១៩ និងគ្រឿងបរិក្ខាផ្សេងទៀតផងដែរ។

លោកប្រធានាធិបតី បានជម្រាបជូនសម្តេចតេជោថា លោកបានមកធ្វើទស្សនកិច្ចនៅកម្ពុជាច្រើនដងហើយ ដោយលោកបានសង្កេតឃើញថា កម្ពុជាមានការរីកចម្រើនជាលំដាប់។ ជាមួយគ្នានេះទំនាក់ទំនងរវាងកម្ពុជា និងទីម័រខាងកើត ក៏មានការរីកចម្រើនផងដែរ។

លោក អ៊ាង សុផល្លែត បានបញ្ជាក់ថា «ក្នុងន័យនេះឯកឧត្តម​ក៏បានបញ្ជាក់ជូនសម្តេចតេជោនូវបំណងចង់ពង្រីកពង្រឹង ចំណងមិត្តភាព ពង្រឹងកិច្ចសហប្រតិបត្តិការរវាងប្រទេសទាំងពីរឱ្យកាន់តែខ្លាំងឡើង តាមរយៈឱ្យមានការហោះហើរត្រង់រវាងប្រទេសទាំងពីរ ក៏ដូចជាវិស័យពាណិជ្ជកម្មរវាងប្រទេសទាំងពីរផងដែរ»។

នៅក្នុងជំនួបនោះ សម្តេចតេជោ ហ៊ុន សែន បានសម្តែងការអបអរសាទរជូន លោកប្រធានាធិបតី ដែលបានជាប់ឆ្នោតភ្លូកទឹកភ្លូកដី ហើយកាន់តំណែងប្រធានាធិបតីជាលើកទី២។ សម្តេចក៏បានសម្តែងនូវអំណរគុណចំពោះ លោកប្រធានាធិបតី ដែលបានធ្វើការវាយតម្លៃលើទំនាក់ទំនងប្រទេសទាំងពីរ ខណៈឆ្នាំនេះជាខួបទី២០ នៃទំនាក់ទំនងរវាងប្រទេសទាំងពីរ ដែលកន្លងមកទំនាក់ទំនងនេះមានការកើនឡើងជាលំដាប់។

សម្តេចតេជោ បានសម្តែងស្វាគមន៍ចំពោះការហោះហើរត្រង់រវាងទីម័រខាងកើត និងព្រះរាជាណាចក្រកម្ពុជា ដោយសម្តេចបានចាត់ទុកថា ការហោះហើរត្រង់នេះ នឹងចូលរួមចំណែកពង្រីកពាណិជ្ជកម្មរវាងប្រទេសទាំងពីរ។

លោក អ៊ាង សុផល្លែត បានបញ្ជាក់ថា៖ «ពាក់ព័ន្ធនឹងពាណិជ្ជកម្មដែល ឯកឧត្តម ចូហ្សេ ម៉ានូអែល រ៉ាមូស ចង់ពង្រីករវាងប្រទេសទាំងពីរនេះ ជាពិសេសលើវិស័យកសិកម្មនោះ សម្តេចតេជោ បានមានប្រសាសន៍ថា គប្បីណាមានអ្នកវិនិយោគទីម័រខាងកើត មកវិនិយោគនៅកម្ពុជាយើង លើម៉ាស៊ីនកិនស្រូវ លើម៉ាស៊ីនសម្ងួត ក៏ដូចជាទិញស្រូវអង្ករពីកម្ពុជាយើងដើម្បីធ្វើការទិញកិនហើយនាំចេញទៅប្រទេសទីម័រខាងកើតតែម្តង»។

សម្តេចបានបញ្ជាក់ប្រាប់លោកប្រធានាធិបតីថា កម្ពុជាបានអនុញ្ញាតឱ្យបរទេសវិនិយោគ១០០ភាគរយ ហើយនេះជាកត្តាសំខាន់សម្រាប់អ្នកវិនិយោគរបស់ទីម័រខាងកើតមកកាន់កម្ពុជា។ សម្តេចបានលើកទឹកចិត្តឱ្យជំរុញ អនុវត្តលើរាល់អនុស្សារណៈទាំងឡាយណា ដែលប្រមុខរដ្ឋាភិបាលទាំងពីរ បានចុះហត្ថលេខាហើយ ហើយក៏បានស្នើសុំឱ្យមានការពិនិត្យជំរុញ កិច្ចសហប្រតិបត្តិការលើវិស័យអប់រំ ក៏ដូចជាវិស័យសន្តិសុខផងដែរ៕

ឯកសារចំនួន២ រវាងកម្ពុជា-ទីម័រខាងកើត ត្រូវបានចុះហត្ថលេខា ក្រោមអធិបតីភាព សម្តេចតេជោ ហ៊ុន សែន និងលោកប្រធានាធិបតី ចូហ្សេ ម៉ានូអែល រ៉ាមូស អរតា

(ភ្នំពេញ)៖ កម្ពុជា-ទីម័រខាងកើត បានចុះកិច្ចព្រមព្រៀងលើឯកសារចំនួន ក្នុងដំណើរទស្សនកិច្ចរបស់ លោកបណ្ឌិត ចូហ្សេ ម៉ានូអែល រ៉ាមូស អរតា (Jose Ramos-Horta) ប្រធានាធិបតីទីម័រឡេស្ត (ទីម័រខាងកើត) មកកាន់ប្រទេសកម្ពុជា។


ឯកសារចំនួន២នេះ ត្រូវបានចុះហត្ថលេខាក្រោមអធិបតីភាព សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងលោកប្រធានាធិបតិ លោកបណ្ឌិត ចូហ្សេ ម៉ានូអែល រ៉ាមូស អរតា នៅវិមានសន្តិភាព នាល្ងាចថ្ងៃទី២០ ខែតុលា ឆ្នាំ២០២២ បន្ទាប់ថ្នាក់ដឹកនាំកំពូលទាំងពីរជួបពិភាក្សាការងារមួយចំនួន។

ឯកសារចំនួន២នោះ រួមមាន៖

ទី១៖ អនុស្សរណៈ នៃការយោគយល់គ្នា ស្តីពីការធ្វើពាណិជ្ជកម្មអង្កររវាងរដ្ឋាភិបាល នៃសាធារណរដ្ឋប្រជាធិបតេយ្យទីម័រខាងកើត និងរាជរដ្ឋាភិបាល នៃព្រះរាជាណាចក្រកម្ពុជា ដែលចុះហត្ថលេខាដោយ លោកស្រីបណ្ឌិត daljiza Albertina Xavier Reis Magno រដ្ឋមន្ត្រីការបរទេស និងសហប្រតិបត្តិការទីម័រខាងកើត និង លោក ប៉ាន សូរសក្ដិ រដ្ឋមន្ត្រីក្រសួងពាណិជ្ជកម្មកម្ពុជា។

ទី២៖ កិច្ចព្រមព្រៀង ស្ដីពីសេវាកម្មដឹកជញ្ជូនផ្លូវអាកាសរវាងរដ្ឋាភិបាល

នៃសាធារណរដ្ឋប្រជាធិបតេយ្យទីម័រខាងកើត និងរាជរដ្ឋាភិបាល នៃព្រះរាជាណាចក្រកម្ពុជា ដែលបានចុះហត្ថលេខាដោយ លោកស្រីណ្ឌិត Adaljiza Albertina Xavier Reis Magno រដ្ឋមន្ត្រីការបរទេស និងសហប្រតិបត្តិការទីម័រខាងកើត និង លោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលកម្ពុជា។

សូមបញ្ជាក់ថា លោកបណ្ឌិត ចូហ្សេ ម៉ានូអែល រ៉ាមូស អរតា វ័យ ៧២ឆ្នាំ បានដឹកនាំគណៈប្រតិភូអញ្ជើញដល់ប្រទេសកម្ពុជាកាលពីថ្ងៃទី១៩ ខែតុលា ឆ្នាំ២០២២ ដើម្បីបំពេញទស្សនកិច្ចផ្លូវរដ្ឋរយៈពេល៣ថ្ងៃ ចាប់ពីថ្ងៃទី ១៩ ដល់ថ្ងៃទី២១ ខែតុលា ឆ្នាំ២០២២។ ដំណើរទស្សនកិច្ចធ្វើឡើងតបតាមការអញ្ជើញរបស់ ព្រះករុណា ព្រះបាទសម្តេច នរោត្តម សីហមុនី ព្រះមហាក្សត្រខ្មែរ៕








សម្តេចអគ្គមហាពញាចក្រី ហេង សំរិន នឹងអញ្ជើញទៅចូលរួមកិច្ចប្រជុំប្រចាំឆ្នាំនៃវេទិកាសភាអាស៊ី-ប៉ាស៊ីហ្វិក លើកទី៣០ នៅប្រទេសថៃ នៅចុងខែតុលានេះ

 (ភ្នំពេញ)៖ តបតាម​​ការអញ្ជើញរបស់ លោក ឈួន លីកផៃ (Chuan Leekpai) ប្រធានរដ្ឋសភានៃព្រះរាជាណាចក្រថៃឡង់ សម្តេចអគ្គមហាពញាចក្រី ហេង សំរិន ប្រធានរដ្ឋសភា​នៃកម្ពុជា នឹងដឹកនាំ​គណៈប្រតិភូ​ជាន់ខ្ពស់សភានៃកម្ពុជា ចូលរួមកិច្ចប្រជុំប្រចាំឆ្នាំនៃវេទិកាសភាអាស៊ី-ប៉ាស៊ីហ្វិក លើកទី៣០ (APPF-30) ដែលសភាថៃឡង់ នឹងធ្វើជាម្ចាស់ផ្ទះ នាទីក្រុងបាងកក ចាប់ពីថ្ងៃទី២៦ ដល់ថ្ងៃទី២៩ ខែតុលា ឆ្នាំ២០២២។

នៅក្នុងសេចក្តីជូនដំណឹងរបស់រដ្ឋសភា បានឱ្យដឹងទៀតថា នាឱកាសចូលរួមកិច្ចប្រជុំនេះ សម្តេចអគ្គមហាពញាចក្រី ហេង សំរិន នឹងអញ្ជើញថ្លែងបទអន្តរាគមន៍នៅកិច្ចប្រជុំជាផ្លូវការ​ក្រោមមូលបទ «សភានិងការអភិវឌ្ឍប្រកបដោយចីរភាព ក្រោយជំងឺកូវីដ-១៩»

នៅក្នុងកំលុងពេលចូលរួមកិច្ចប្រជុំប្រចាំឆ្នាំនេះ សម្តេចប្រធានរដ្ឋសភា គ្រោងជួបពិភាក្សាការងារទ្វេភាគីជាមួយសមភាគី ប្រធានរដ្ឋសភាថៃ និងទទួលជួបសវនាការជាមួយថ្នាក់ដឹកនាំសភាប្រទេសជាមិត្តមួយចំនួន​ទៀត ក្នុងការពង្រឹងពង្រីកចំណងមិត្តភាព កិច្ចសហប្រតិបត្តិការវិស័យការទូតសភាកម្ពុជា នៅលើឆាកអន្តរជាតិ ទាំងក្របខ័ណ្ឌពហុភាគី និងទ្វេភាគី។ ចំណែកសមាជិកគណៈប្រតិភូដទៃទៀតនឹងចូលរួមកិច្ចប្រជុំ តាមគណៈកម្មាធិការជាច្រើនរបស់ APPF ស្របតាមកម្មវិធីដែលបានរៀបចំ៕

ខាងក្រោមនេះជាសេចក្តីជូនដំណឹងរបស់រដ្ឋសភា៖




ប្រធានាធិបតីទីម័រខាងកើត អញ្ជើញចូលជួបសម្តែងការគួរសមចំពោះ ប្រធានរដ្ឋសភាកម្ពុជា

(ភ្នំពេញ)៖ ក្នុងដំណើរទស្សនកិច្ចផ្លូវរដ្ឋនៅកម្ពុជា នៅរសៀលថ្ងៃទី២០ ខែតុលា ឆ្នាំ២០២២នេះ លោកបណ្ឌិត ចូហ្សេ ម៉ានូអែល រ៉ាមូស អរតា (Jose Ramos-Horta) ប្រធានាធិបតីទីម័រឡេស្ត (ទីម័រខាងកើត) បានបន្តដឹកនាំគណៈប្រតិភូចូលជួបសម្តែងការគួរសមចំពោះ សម្តេចអគ្គមហាពញាចក្រី ហេង សំរិន ប្រធានរដ្ឋសភាកម្ពុជា។


លោកបណ្ឌិត ចូហ្សេ ម៉ានូអែល រ៉ាមូស អរតា វ័យ ៧២ឆ្នាំ បានដឹកនាំគណៈប្រតិភូអញ្ជើញដល់ប្រទេសកម្ពុជាកាលពីថ្ងៃទី១៩ ខែតុលា ឆ្នាំ២០២២ ដើម្បីបំពេញទស្សនកិច្ចផ្លូវរដ្ឋរយៈពេល៣ថ្ងៃ ចាប់ពីថ្ងៃទី ១៩ ដល់ថ្ងៃទី២១ ខែតុលា ឆ្នាំ២០២២។ ដំណើរទស្សនកិច្ចធ្វើឡើងតបតាមការអញ្ជើញរបស់ ព្រះករុណា ព្រះបាទសម្តេច នរោត្តម សីហមុនី ព្រះមហាក្សត្រខ្មែរ។

ក្នុងអំឡុងពេលទស្សនកិច្ចផ្លូវរដ្ឋនេះ លោកបណ្ឌិត ចូហ្សេ ម៉ានូអែល រ៉ាមូស អរតា បានចូលគាល់ ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រ នៃកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាទីសក្ការដ៏ខ្ពង់ខ្ពស់បំផុត នៅព្រះបរមរាជវាំង។

លោកក៏មានកម្មវិធីជំនួបដោយឡែកពីគ្នាជាមួយ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា, សម្តេចពញាចក្រី ហេង សំរិន ប្រធានរដ្ឋសភា និងសម្តេចតេជោ ហ៊ុន សែន នាយករដ្ឋមន្ត្រីកម្ពុជា។

សម្តេចតេជោនាយករដ្ឋមន្ត្រី និងលោកប្រធានាធិបតីទីម័រខាងកើត នឹងអញ្ជើញជាអធិបតីដ៏ខ្ពង់ខ្ពស់ក្នុងពិធីចុះហត្ថលេខា លើឯកសារទ្វេភាគីដ៏មានសារសំខាន់ចំនួនពីរ រួមមាន៖ កិច្ចព្រមព្រៀងសេវាកម្មអាកាសចរណ៍ និងអនុស្សរណៈនៃការយោគយល់ ស្តីពីពាណិជ្ជកម្មស្រូវរវាងប្រទេសទាំងពីរ។

លោកបណ្ឌិត ចូហ្សេ ម៉ានូអែល រ៉ាមូស អរតា បានអញ្ជើញដាក់កម្រងផ្កាគោរពវិញ្ញាណក្ខន្ធ នៅវិមានឯករាជ្យ និងកន្រ្តកផ្កានៅមណ្ឌបព្រះបរមរូប ព្រះករុណា ព្រះបាទសម្តេច ព្រះនរោត្តម សីហនុ «ព្រះបរមរតនកោដ្ឋ» អតីតព្រះមហាក្សត្រនៃព្រះរាជាណាចក្រកម្ពុជាផងដែរ។

ក្នុងអំឡុងពេលស្នាក់នៅភ្នំពេញ កាលពីល្ងាចថ្ងៃទី១៩ ខែតុលា លោកបណ្ឌិត ចូហ្សេ ម៉ានូអែល រ៉ាមូស អរតា ក៏បានទទួលការចូលជួបសម្តែងការគួរសមរបស់ លោកបណ្ឌិត ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោកផងដែរ។

លោកប្រធានាធិបតី ក៏មានកម្មវិធីផ្សេងទៀត ដូចជា អញ្ជើញធ្វើបាឋកថាសាធារណៈនៅសាកលវិទ្យាល័យល្បីៗ នៅរាជធានីភ្នំពេញ, ផ្តល់បទសម្ភាសន៍ដល់ស្ថាប័នព័ត៌មានក្នុងប្រទេស ក៏ដូចជា ថ្លែងសុន្ទរកថានៅក្នុងវេទិកាកម្ពុជា-ទីម័រខាងកើតលើកទី១ ស្តីពីទេសចរណ៍ និងធុរកិច្ច ដើម្បីការអភិវឌ្ឍ និងសន្តិភាពប្រកបដោយចីរភាពផងដែរ។

លោក ចូហ្សេ រ៉ាមូស អរតា ធ្លាប់បានអញ្ជើញមកប្រទេសកម្ពុជា កាលពីឆ្នាំ២០០៣ ក្នុងតំណែងជារដ្ឋមន្ត្រីការបរទេស និងអញ្ជើញលើកទី២ នៅឆ្នាំ២០១១ ក្នុងតំណែងជាប្រធានាធិបតី។

ក្រសួងការបរទេស បានរំពឹងថា ដំណើរទស្សនកិច្ចផ្លូវរដ្ឋរបស់លោកបណ្ឌិត ចូហ្សេ ម៉ានូអែល រ៉ាមូស អរតា មកកាន់កម្ពុជា ជាការបន្តពង្រឹង និងធ្វើឱ្យកាន់តែស៊ីជម្រៅបន្ថែមទៀតនូវទំនាក់ទំនង និងកិច្ចសហប្រតិបត្តិការ ទាំងនៅក្នុងក្របខ័ណ្ឌទ្វេភាគី និងពហុភាគី ដើម្បីផលប្រយោជន៍ទៅវិញទៅមកនៃប្រទេសទាំងពីរ៕


ព្រះមហាក្សត្រកម្ពុជា ទទួលស្វាគមន៍ជាលក្ខណៈផ្លូវរដ្ឋជូន ឯកឧត្តម ប្រធានាធិបតី នៃសាធារណរដ្ឋប្រជាធិបតេយ្យទីម័ខាងកើត


តបតាមការអញ្ជើញដ៏ខ្ពង់ខ្ពស់របស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីសក្ការៈដ៏ខ្ពង់ខ្ពស់បំផុត នៅវេលាព្រឹកថ្ងៃទី ២០ ខែតុលា ឆ្នាំ ២០២២ ឯកឧត្តមបណ្ឌិត ចូហ្សេ រ៉ាមូស អរតា ប្រធានាធិបតីនៃសាធារណរដ្ឋប្រជាធិបតេយ្យទីម័រខាងកើត ទទួលបាននូវមហាកិត្តិយសដ៏ខ្ពង់ខ្ពស់ ដោយបានព្រះករុណាជាអម្ចាស់ជីវិតលើត្បូង ព្រះមហាក្សត្រនៃព្រះរាជាណាចក្រកម្ពុ ជា ជាទីសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឬទ័យស្តេចយាងទទួលស្វាគមន៍ជាលក្ខណៈផ្លូវរដ្ឋ និងប្រោសព្រះរាជទាន នូវព្រះរាជសវនាការដ៏វិសេសវិសាល ជូនឯកឧត្តម ប្រធានាធិបតីនៃសាធារណរដ្ឋប្រជាធិបតេយ្យទីម័រខាងកើត និងគណៈប្រតិភូ ដែលប្រព្រឹត្តទៅនៅក្នុង ព្រះទីនាំង  ទេវាវិនិឆ្ឋ័យ ព្រះបរមរាជវាំង។


ដោយ: ទទក