Thursday, March 20, 2014

ឯកឧត្តម​​បណ្ឌិត​​សភាចារ្យ​ សុខ អាន ផ្តល់​​អនុ​សាសន៍​​សម្រាប់​ការ​​អភិវឌ្ឍន៍​​លើ​​វិស័យ​​អប់រំ​

ដោយ​រំលឹកអនុស្សាវរីយ៍ក្នុង​អាជីពជាគ្រូ​បង្រៀន ឯកឧត្តម​បណ្ឌិត​សភាចារ្យ សុខ អាន ឧ ប​នាយក​រដ្ឋមន្ដ្រី រដ្ឋមន្ដ្រី​ទទួលបន្ទុក​ទីស្ដីការគណៈរដ្ឋមន្ដ្រី​នា​ព្រឹក​ថ្ងៃទី​១៩​ ខែមីនា ឆ្នាំ​២០១៤ បានដាក់​ចេញ​នូវ​អនុសាសន៍ចំនួន ១០ចំណុច​ធំៗ ដើម្បី​ជួយ​អភិវឌ្ឍន៍ និង​លើក​កម្ពស់​គុណ​ភាព​អប់រំ​នៃ​ព្រះ​រាជាណាចក្រកម្ពុជា ជូន​សមាជិក​សមាជិកា ដែល​អញ្ជើញ​ចូល​ក្នុង​​​សន្និបាត​បូកសរុប​ការងារ​ក្រសួង​អប់រំ យុវជន ​និង​កីឡា ​ឆ្នាំ​សិក្សា​២០១២- ២០១៣ និង ទិសដៅ​ឆ្នាំ​សិក្សា ២០១៣-២០១៤ ពិនិត្យ និង​ពិភាក្សាសម្រាប់​ជាការ​អនុវត្ត។

ក្នុង​ឱកាស​អញ្ជើ​ញ​ជា​អធិបតី​ក្នុង​ពិធី​បើក​សន្និបាតបូកសរុប​ការងារ​ក្រសួង​អប់រំយុវជន ​និង​កីឡា ​ឆ្នាំ​សិក្សា​២០១២- ២០១៣ និង ទិសដៅ​ឆ្នាំ​សិក្សា ២០១៣-២០១៤ ដែល​ប្រារព្ធ​ធ្វើ​នៅ​វិទ្យា​ស្ថាន​បច្ចេក​វិទ្យាកម្ពុជា​(តិចណូ) ឯកឧត្តម​បណ្ឌិត​សភាចារ្យ សុខ អាន បាន​ចាត់​ទុក​​​ការ​ជួប​ជុំគ្នា​ថ្ងៃនេះ(សន្និបាត) គឺជា​ព្រឹត្តិការណ៍​ដ៏​មាន​អត្ថន័យ​យ៉ាង​ជ្រាលជ្រៅ ឆ្លុះបញ្ចាំង​ឱ្យ​ឃើញ​នូវ​ការបន្ត​យកចិត្តទុកដាក់​ខ្ពស់​របស់​រាជរដ្ឋាភិបាល ក្នុងការ​អភិវឌ្ឍ​វិស័យ​អប់រំយុវជន និង កីឡា​នៅ​កម្ពុជា​។ ព្រឹត្តិការណ៍​នេះ​ក៏​ជា​វេទិកា​ដ៏​ល្អ​សម្រាប់​អ្នកជំនាញ អ្នកស្រាវជ្រាវ និងអ្នក​ពាក់ព័ន្ធ​ដទៃទៀត​ក្នុង​វិស័យ​អប់រំ ផ្លាស់ប្តូរ​បទពិសោធន៍ និងការអនុវត្ត​ល្អៗ​សម្រាប់​ជា​ធាតុ​ចូល ក្នុង​ការបង្កើន​ប្រសិទ្ធភាព​ថែមទៀត​នៃ​ការអនុវត្ត​គោលនយោបាយ និងផែនការ​យុទ្ធ​សាស្ត្រ​​វិស័យ​អប់រំ យុវជន និងកីឡា ព្រមទាំង​សម្រាប់​លើក​ទិសដៅ​ការងារ​របស់​ក្រសួង​ក្នុង​ឆ្នាំ​សិក្សា​ថ្មី​ ឱ្យបាន​កាន់តែ​ប្រសើរ​ថែមទៀត​ដើម្បី​ឆ្លើយតប​ទៅនឹង​តម្រូវការថ្មីៗ នៃ​ការ​អភិវឌ្ឍ​ធន​ធានមនុស្ស​ប្រកបដោយ​គុណភាព​ខ្ពស់​ទាំង​ចំណេះដឹង ចំណេះធ្វើ គុណធម៌ និងសីលធម៌​។

ក្នុង​ឱកាស​នោះឯកឧត្តម​បណ្ឌិត​សភាចារ្យ សុខ អាន បាន​ផ្ដល់​នូវ​អនុសាសន៍​ ១០ចំណុច ដែល​ជា​គំនិត​ផ្តួច​ផ្តើម​សម្រាប់​ការពិភាក្សា​ក្នុង​អង្គសន្និបាត​ ដែល​ប្រារព្ធ​ធ្វើ​រយៈពេល​បី​ថ្ងៃ​រួម​មាន៖

ទី​១-​អនុវត្ត​ឱ្យបាន​សម្រេច​គោលដៅ​អប់រំ​ជាតិ និង​គោលដៅ​សហស្សវត្ស​ដែល​តម្រូវឱ្យ​ប្រ​ទេ​ស​នីមួយៗ ខិតខំ​រំដោះ​អន​ក្ខ​រ​ភាព​ឱ្យបាន​សម្រេច​ជា​ស្ថាពរ​នៅ​ឆ្នាំ​២០១៥​ខាងមុខ​ ក្នុង​ក្រប​ខ័ណ្ឌ​នៃ “​ការអប់រំ​សម្រាប់​ទាំងអស់គ្នា ទាំងអស់គ្នា​សម្រាប់​ការអប់រំ”។

ទី​២-​គប្បី​ផ្តោត​ឤ​ទិ​ភាព​លើ​គុណភាព​អប់រំ​ជា​ចម្បង។

ទី​៣-​ចំពោះ​គ្រឹះស្ថាន​ឧ​ត្ត​មសិ​ក្សា​គួរ​លើកកម្ពស់​ការសិក្សា​ស្រាវជ្រាវ ប្រកបដោយ​គុណភាព​ខ្ពស់​​ដើម្បី​បង្កើន​ប្រសិទ្ធភាព​និង​ប្រសិទ្ធ​ផល ​ក្នុង​ការបង្រៀន​និង​ការផ្សារភ្ជាប់​ទ្រឹស្តី​នៅ​នឹង​ការ អនុវត្ត​ជាក់ស្តែង ហើយ​លទ្ធផល​នៃ​ការស្រាវជ្រាវ​ត្រូវ​លើកទឹកចិត្ត​ឱ្យ​បោះ​ពុ​ម្ភ​ក្នុង​ ទិនានុប្បវត្តិ វិទ្យាសាស្ត្រ ជាពិសេស​ទិនានុប្បវត្តិ​វិទ្យាសាស្ត្រ​ក្នុង​តំបន់​និង​អន្តរជាតិ​។

ទី​៤-​គប្បី​ជំរុញ​ការអភិវឌ្ឍ​កម្មវិធីសិក្សា​ដើម្បី​លើកកម្ពស់​គុណភាព អប់រំ​និង​ឆ្លើយតប​ទៅនឹង​តម្រូវ​ការ​ជាក់ស្ដែង​នៅក្នុង​ទីផ្សារការងារ​ដែល​ កាន់តែ​មានការ​ប្រកួតប្រជែង​ខ្លាំង​។

ទី​៥-​គួរយកចិត្តទុកដាក់​លើ​ការកែលម្អ​ជីវភាព​រស់នៅ​របស់ លោកគ្រូ អ្នកគ្រូ និង សាស្ត្រាចារ្យ ព្រមទាំង​បុគ្គលិក​សិក្សា​ទាំងអស់ ដើម្បី​បង្កើន​ប្រសិទ្ធភាព​ការងារ​អប់រំ​ឱ្យ​កាន់តែ​ប្រសើរ​ថែម​ទៀត​។

ទី​៦- ដោយ​ការអប់រំ គឺជា​ការវិនិយោគ​រយៈ​វែង គឺ​ត្រូវឱ្យ​មានការ​យកចិត្តទុកដាក់​ខ្ពស់​លើ​ការ​កៀរ​គរ​ហិរញ្ញប្បទាន​ ការជំរុញ​កំណែទម្រង់​អភិបាលកិច្ច​ក្នុង​វិស័យ​អប់រំ​ឱ្យ​កាន់​តែមាន​ប្រសិទ្ធ​ភាព​ខ្ពស់​ការផ្សារភ្ជាប់​ការអប់រំ​ទៅនឹង​ការអភិវឌ្ឍន៍​ និងការជំរុញ​វិទ្យាសាស្ត្រ​បច្ចេកទេស។

ទី​៧-​គ្រប់​ស្ថាប័ន​ជាតិ​និង​អន្តរជាតិ​វិស័យ​ឯកជន និងអង្គការ​មិនមែន​រដ្ឋាភិបាល ដែល​បំពេញ​ការ​ងារ​ក្នុង​វិស័យ​អប់រំ មេត្តា​ពិនិត្យ​លើ​ឤ​ទិ​ភាព​សំខាន់​ក្នុង​ផែនការ​យុទ្ធសាស្ត្រ​របស់​រាជ​រដ្ឋាភិ​បាល និង​ផ្តល់​ការគាំទ្រ​ឱ្យបាន​ពេញលេញ តាម​សមត្ថកិច្ច និង​លទ្ធភាព​របស់ខ្លួន ទាំង​បច្ចេក​ទេស ហិរញ្ញវត្ថុ និងសម្ភារៈ​។

ទី​៨-​គួរ​បន្ដ​កៀរគរ​បញ្ញា​វ័​ន្ដ​កម្ពុជា ដែលមាន​សញ្ញាបត្រ​ខ្ពស់ ជាពិសេស សញ្ញាបត្រ​ថ្នាក់​បណ្ឌិត​ដែល​ត្រូវបាន​ទទួលស្គាល់​ជា​អន្តរជាតិ និង​មានបទពិសោធន៍​រួមចំណែក​ដល់​ការ​អភិ​វឌ្ឍ​វិស័យ​អប់រំ​នៅ​កម្ពុជា ប្រកបដោយ​គុណភាព​និង​ចីរភាព​។

ទី​៩-​គួរ​យកចិត្តទុកដាក់​អនុវត្ត​គោលនយោបាយ​ជាតិ​ស្តីពី​ការអភិវឌ្ឍ​យុវជន​កម្ពុជា​​ សំដៅ​អភិ​វឌ្ឍ​យុវជន​ទាំង​ខាងចំណេះដឹង ​ចំណេះធ្វើ សុខភាព កាយសម្បទា និង​សីលធម៌ ឱ្យក្លាយ​ទៅ​ជា​មូលធន​មនុស្ស ប្រកបដោយ​សក្តានុពល និង​ធានាបាន​នូវ​ការបង្កើត​កាលានុវត្តភាព​ការ​ងារ​​សម្រាប់​យុវជន ជាពិសេស​តាមរយៈ​ការបង្កើត​វេទិកា​ស្វែងរក​ការងារ​សម្រាប់​យុវជន និងទី​១០-​គួរ​ផ្សារភ្ជាប់​ការអប់រំ​ទៅនឹង​ការអភិវឌ្ឍ​វិស័យសេដ្ឋកិច្ច​ឱ្យ​ កាន់តែ​ប្រសើរឡើង​ថែម​ទៀត តាម​​រយៈ​ការ​បង្រួម​ឱ្យ​បានជា​អប្បរ​មា​នូវ​គម្លាត​រវាង​ការ​ផ្ត​ត់​ផ្ត​ង់ និង​តម្រូវ​ការជំនាញ​ក្នុង​ទីផ្សា​រ​ការងារ។

ឯកឧត្តម​បណ្ឌិត​សភាចារ្យ សុខ អាន ក៏បាន​អំពាវនាវ​ផង​ដែរ ដល់​ថ្នាក់ដឹកនាំ​ក្រសួង​អប់រំ យុវជន និងកីឡា និង​មន្ត្រីរាជការ គ្រប់លំដាប់​ថ្នាក់ លោកគ្រូ អ្នកគ្រូ សាស្ត្រាចារ្យ បុគ្គលិក​សិក្សា​ទាំងអស់ ព្រម​ទាំង​អ្នកពាក់ព័ន្ធ​នានា សូម​បន្ត​ចូលរួមចំណែក និងការគាំទ្រ​បន្ថែមទៀត​ក្នុង​ការ​អនុវត្ត​នូវ​កម្មវិធី​កំណែទម្រង់​វិស័យ​អប់រំ ជាពិសេស​អាទិភាព​ទាំង៨ គឺ​៖​ការពង្រឹង​កា​រ​គ្រប់​គ្រង​ហិរញ្ញវត្ថុ និង​ការគ្រប់គ្រង​ទ្រព្យសម្បត្តិ​រដ្ឋ ការពង្រឹង​ការគ្រប់គ្រង​បុគ្គលិក ការពង្រឹង​ការ​ប្រល​ង​គ្រប់​ប្រភេទ ការបង្កើត​ធនាគារ​ខួរក្បាល​វិស័យ​អប់រំ កំណែទម្រង់​ឧ​ត្ត​មសិ​ក្សា ការ​បង្កើន​គុណភាព និង​​ប្រសិទ្ធភាព​នៃ​សេវា​អប់រំ​នៅ​គ្រប់​កម្រិតសិក្សា ក្នុងការ​បណ្តុះបណ្តាល​ប​ច្ចេក​ទេស​ និង​មុខជំនាញ​ឱ្យស្រប​ទៅតាម តម្រូវការ​អភិវឌ្ឍរ​បស់​ប្រទេស​ការអភិវឌ្ឍ​សម្រាប់​យុវជន​នូវ​ជំនាញ​ បច្ចេកទេស​និង​ជំនាញ​ទន់ និង​កំណែ​ទម្រង់ការអប់រំ​កាយ និងកីឡា ដើម្បី​ត្រៀមខ្លួន​ឱ្យ​បានល្អ​ចូលរួម​ក្នុងការ​ប្រកួត​កីឡា​ស៊ី​ហ្គេម នៅ​ឆ្នាំ​២០២៣។

ឯកឧត្តម​បណ្ឌិត  ហង់ ជួន ណា​រ៉ុ​ន រដ្ឋមន្ត្រីក្រសួង​អប់រំ យុវជន និង កីឡា បានថ្លែងឲ្យ​ដឹង​ថា នៅ​ក្រោមការ​ដឹកនាំ​របស់​សម្តេច​អគ្គមហាសេនា​បតី​តេជោ ហ៊ុន សែន វិស័យ​អប់រំ​កម្ពុជា​មានការ​រីក​ចម្រើន​ ដែល​ក្នុង​នោះ​ឯកឧត្តម​រដ្ឋមន្ត្រី​បាន​មាន​ប្រសាសន៍​បញ្ជាក់​ថា បច្ចុប្បន្ន​ក្នុង​ចំណោម​​ពលរដ្ឋកម្ពុជា ៤ នាក់ មាន ម្នាក់​បាន​ទៅ​សាលារៀន។

ឯកឧត្តម​បណ្ឌិត ហង់ ជួន ណា​រ៉ុ​ន បាន​មានប្រសាសន៍ថា ជា​លទ្ធផល​សម្រេចបាន​ឆ្នាំ ២០១២-២០១៣ មាន​ចំណុច​ច្រើនយ៉ាង​ដូចជា​ការកសាង​អគារសិក្សា​នៅ​គ្រប់​ច្រកល្ហក នៅ​ទូ​ទាំង​​ប្រទេស​កម្ពុជា​ពិសេស​នៅ​តំបន់​ព្រំដែន និងតំបន់​ជួប​ការលំបាក​ក្នុងទិសដៅ​បង្ខិត​សា​លា​រៀនឲ្យ​ទៅជិត​លំនៅស្ថាន​រប​ស់​ប្រជាជន។ ​​ជា​លទ្ធផលមក​ដល់​ពេលនេះ ព្រះ​រាជា​ណាច​ក្រ​កម្ពុជា មាន​​សា​លាម​ត្តេ​យ្យ​សិក្សា​ និង​ចំណេះ​ទូទៅ​ទាំង​រដ្ឋ និង​ឯកជន​សរុប​ចំនួន ១៤.៨៥៣ កន្លែង​នៅ​ទូទាំងប្រទេស។ ក្នុង​នោះ​មាន​សា​លាម​ត្តេ​យ្យ​សិក្សា ៥.៨០៧ ដែល​​ក្នុងនោះ​មាន​មតេយ្យ​សិក្សា​រដ្ឋ​ចំនួន ៣.១៨៤ និង ឯកជន​ចំនួន ៤០៣ និង មតេយ្យ​សិក្សា​សហគមន៍​ចំនួន ២.២២០។ កុមា​រអា​យុ​​​ក្រោម ៦ឆ្នាំ ទទួលបាន​សេវា​អប់រំ ចំនួន ១៧,៥៩​ភាគរយ, ​កុមារ​អាយុ​ពី ៣ ដល់​៤ ឆ្នាំ ទទួលបាន​សេវា​អប់រំ​ចំនួន ២០,៥ ភាគរយ និង កុមារ​អាយុ ៥ ឆ្នាំ​ទទួលបាន​សេវា​អប់រំ​ចំនួន ៥៩,៩​ភាគរយ​។ សាលាបឋមសិក្សាមាន​ចំនួន​ ៧.២៣៦ មាន​សិស្ស​ ចំនួន ២.០៧៣.៨១១​នាក់។ អនុវិទ្យាល័យមាន​ចំនួន​​១.២៧៩ និង មាន​សិស្ស​ចំនួន ៥៣៨.៦២៦​នាក់។ វិទ្យាល័យ​មានចំនួន  ៥៣១ និង មាន​សិស្ស​ចំនួន ២៦៦.២៩៣ នាក់។ សម្រាប់​គ្រឹះ​ស្ថាន​​ឧ​ត្ត​មសិ​ក្សា​មាន​ចំនួន ១០៥ មាន​ទីតាំង​នៅតាម​រាជធានី  ខេត្ត ចំនួន ១៩ ដែល​ក្នុងនោះ​មាន​គ្រឹះស្ថាន​ឧ​ត្ត​ម​សិក្សា​រដ្ឋ ៣៩ និង ឯកជន​ចំនួន ៦៦ មាន​និស្សិត​កំពុង​សិក្សា ចំនួន ២៥៣.៧៦៤ នាក់ ហើយ​ក្នុងនោះ​មាន​អគារ​ចំនួន ៣.៧០៥ ខ្នង​ស្មើនឹង​១៩.៣១៩​បន្ទប់ ដែល​គិត​ត្រឹម ថ្ងៃទី ២៤ មិថុនា ឆ្នាំ២០១៣​៕

ពិធី​បិទ​​សន្និ​បាត​​បូក​​សរុប​​លទ្ធ​​ផល​​​ការ​ងារ របស់​​ក្រុម​​ប្រឹក្សា​​ខេត្ត​​តាកែវ​​អាណត្តិ​​ទី១ និង​​បូក​​សរុប​​លទ្ធ​ផល​​​ការ​ងារ​​​ប្រចាំ ឆ្នាំ​២០១៣

ឯកឧត្តម ស ខេង ឧបនាយក​រដ្ឋមន្ត្រី រដ្ឋមន្ត្រី​ក្រសួង​មហាផ្ទៃ និង​ឯកឧត្តម​បណ្ឌិតសភាចារ្យ សុខ  អាន ឧប​នាយក​រដ្ឋមន្ត្រី រដ្ឋមន្ត្រី​ទទួល​បន្ទុក​ទីស្តីការគណៈរដ្ឋមន្ត្រី នា​ព្រឹក​ថ្ងៃទី​១៨​ ខែមីនា ឆ្នាំ​២០១៤ បាន​ផ្តល់​ការ​ណែនាំ​ជាទូ​ទៅ​មួយក្នុង​នយោបាយ​កំណែទម្រង់​របស់​រាជរ​ដ្ឋាភិបាល ​ឲ្យមន្រ្តីអ្នក​ផ្ដល់សេវា​ថ្នាក់រដ្ឋ​បាល​ក្រោម​ជាតិ​ទាំង​អស់​ត្រូវ​ធ្វើ​ការ​ផ្លាស់​ប្តូរឥរិយា​បថ ​និងផ្នត់​គំនិត​ពី “ភាព​ជាអ្នក​ត្រួតត្រា” ទៅជា “អ្នកផ្តល់​សេវា ” បំរើ​ប្រជា​ពល​រដ្ឋ​ប្រកប​ដោយ​ឆន្ទៈ​ស្មោះ​ត្រង់ ពិសេស​អាជ្ញាធរ កង​កម្លាំង​ប្រដាប់​អាវុធ ត្រូវ​សហការ​គ្នា​ឲ្យ​បាន​ល្អ​ រួម​ជាមួយ​នឹង​កិច្ច​សហប្រតិបត្តិការ​ជាមួយ​ប្រទេស​ជិត​ខាង ដើម្បី​ការពារ​សុខសន្តិភាព​ជូន​ប្រជា​ពលរដ្ឋ​ និង​ការ​អភិវឌ្ឍន៍។

ថ្លែងក្នុង​សន្និបាតបូក​សរុបលទ្ធផល​ការងារ​ក្រុមប្រឹក្សា​ខេត្តតា​កែវ​អាណត្តិទី១ និង​បូក​សរុប​លទ្ធផល​ការងារ​ប្រចាំឆ្នាំ​របស់​រដ្ឋបាល​ខេត្តតា​កែវ រួម​ជាមួយ​និង​ពិធីប្រកាស​ផ្ទេរ​ភារកិច្ច និងមុខ​តំណែង​ថ្មី​ដល់អភិបាល អភិ​បាល​រង​ខេត្តអភិបាល អភិ​បាល​រងស្រុក​មួយចំនួន​របស់​ខេត្តតាកែវ​ឯកឧត្តម​បណ្ឌិត​សភាចារ្យ សុខ អាន មាន​ប្រសាសន៏​ថា​រដ្ឋ​បាល​ថ្នាក់​ក្រោមជាតិ មិន​ត្រឹម​តែមាន​តួនាទី ជាអ្នក​ការពារ​សន្តិភាព សុវត្ថិភាព និង​សណ្តាប់ធ្នាប់សាធារណៈ​ជូនប្រជា​ពលរដ្ឋ​ប៉ុណ្ណោះទេ ប៉ុន្តែ​ថែម​ទាំង​មាន​តួនាទី ជាអ្នក​ផ្តល់សេវា​សាធា​រ​ណៈ និង​ជាសេនា​ធិការ​ផ្ទាល់ និង​ជាតំណាង​របស់​រាជរដ្ឋាភិបាល​ក្នុង​មូលដ្ឋាន។ ដូច្នេះ​មន្ត្រី​រដ្ឋបាល​ថ្នាក់​ក្រោម​ជាតិ​ទាំង​អស់ តែ​ត្រូវយក​ចិត្តទុកដាក់​ខ្ពស់​លើ​ការលើក​កម្ពស់​ការផ្តល់​សេវា​សាធារណៈ​ជូន​ប្រជាព​ល​រដ្ឋ ដោយ​ស្មារតីម្ចាស់ការ​ភក្តីភាព សីលធម៌ វិជ្ជាជីវៈ និង​វប្បធម៌​សេវាសា​ធារណៈ ក្នុងគោល​ដៅ​ធ្វើ​យ៉ាង​ណា​គឺ “បម្រើ​ប្រជាពលរដ្ឋឱ្យ​បានកាន់​តែប្រសើរ​ឡើង”។ ឯកឧត្តម​បណ្ឌិត​សភាចារ្យ សុខ អាន បាន​មាន​ប្រសា​សន៍​បញ្ជាក់​ថា ដើម្បីសម្រេច​បាននូវ​វត្ថុបំណង​នេះ រដ្ឋបាលថ្នាក់​ក្រោមជាតិ ដែល​ជាអ្នក​ផ្តល់​សេវា​សាធា​រណៈ ត្រូវ​មានទស្សនា​ទានប្រែ​ក្លាយ​រដ្ឋបាល​សាធារណៈពី “អ្នកគ្រប់​គ្រង និងអនុវត្ត​វិធាន​និង នីតិវិធី” ឱ្យ​ទៅ​ជា “អ្នក​ផ្តល់​សេវា​ជូនប្រជាពលរដ្ឋ។

ដោយ​ឡែក​ ឯកឧត្តម ស ខេង ​ឧបនាយករដ្ឋមន្ត្រី បានសំដែងការ​អបអរសាទរ​ចំពោះមន្ត្រី​វ័យក្មេង​ដែល​ត្រូវ​បានព្រះ​មហាក្សត្រ និង​រាជរដ្ឋាភិបាលតែងតាំង​ផ្តល់តួនាទី​ជាអ្នកបន្តវេន​ពីអ្នក​ជំនាន់​មុន ក្នុង​ការបំ​រើ​ប្រយោជន៏​ជូន​ប្រជា​ពល​រដ្ឋ និង​ប្រទេស​ជាតិ ដើម្បី​ឈាន​ទៅពង្រឹង​ប្រសិទ្ធភាព​ការងារ​នៅថ្នាក់​រដ្ឋបាល​ក្រោម​ជាតិឲ្យមានប្រសិទ្ធិ​ភាពខ្ពស់ និងភាពសក្ត័សិទ្ធិ​ក្នុងការបំរើ​សេវាជូន​ប្រជាពលរដ្ឋ​នៅតាម​មូលដ្ឋាន។ ឯកឧត្តម ស ​ខេង ក៏បានជំរុ​ញឲ្យ​មន្ត្រី​អ្នក​បំ​រើសេវាសាធារណៈ​ទាំង​អស់ ពិសេស​មន្ត្រីដែល​ត្រូវ​បាន​ប្រកាស់​ផ្ទេរ​ភារកិច្ចទទួល​តំណែង​ថ្មី​នៅ​ថ្ងៃនេះ​ ត្រូវខិតខំលើក​កំពស់​ការបំរើសេវា​ជូនប្រជា​ពលរដ្ឋ​ឲ្យបាន​ល្អ​ប្រសើរ ដើម្បី​បំពេញនូវ​តំរូវការទាំង​ឡាយជូនពួកគាត់​ទៅ​តាមភាព​ចាំបាច់​ដែលគាត់​ត្រូវការ​ឲ្យយើង​ជួយ​​បំរើ ចៀស​វាងបង្ករការ​ថ្នាំងថ្នាក់​ចំពោះ​ប្រជា​ពលរដ្ឋ​។

ដូច​គ្នា​នឹង​ប្រសាសន៍​របស់​ ឯកឧត្តមបណ្ឌិត​សភាចារ្យ សុខ អាន ដែរ ឯកឧត្តម ស ខេង ឧបនាយករដ្ឋមន្ត្រី ក៏បានមាន​ប្រសាសន៍​អំពាវនាវ​បន្ថែម​ទៀត​ដល់​កងកម្លាំង​ប្រដាប់អាវុធ និង​អាជ្ញាធរមា​នសមត្ថកិច្ច​គ្រប់​លំ​ដាប់​ថ្នាក់ឲ្យ​បន្ត​រួមសហការ​គ្នា ​​​ពង្រឹងការ​អនុវត្ត​គោល​នយោបាយ​អភិវឌ្ឍន៍​សេដ្ឋកិច្ចសង្គម តាម​វិស័យ​របស់​ក្រសួងស្ថាប័ន​នានា ព្រមទាំងផ្តោត​ការយកចិត្ត​ទុកដាក់​លើការផ្តល់​សេវា​សាធារ​ណៈជូនប្រ​ជា​ពល​រដ្ឋ​ជាអាទិភាព និងត្រូវបន្តរួមគ្នា​ថែរក្សា​ការពារ​សុខសន្តិភាព ស្ថិរភាព​នយោបាយ សណ្តាប់ធ្នា​ប់សង្គមឲ្យ​បា​ន​ល្អ​នៅទូទាំងខេត្ត​ ត្រូវបន្ត​ទប់ស្កាត់​ការជួញដូរ និង​ការប្រើប្រាស់​គ្រឿងញៀន​គ្រប់​ប្រភេទ ការលេង​ល្បែង​ស៊ីសង សកម្ម​ភា​ពក្មេង​ទំនើង ​ដែលអាចជះ​ឥទ្ធិពល​អាក្រក់​ដល់​សង្គមជា​តិ និង​ជាពិសេស​ដល់​ក្មួយៗ​យុវជន ព្រមទាំង​ត្រូវលើក​កម្ពស់ការ​គ្រប់គ្រងច្រក​ទ្វារព្រំដែន​ច្រករបៀង​រួមគ្នា​បង្ការ​ទប់ស្កាត់​ និង​បង្រ្កាប​ឲ្យបានទាន់​ពេល​វេលា និង​មានប្រសិទ្ធភាព​នូវ​បទ​ល្មើស​ឆ្លងដែន​គ្រប់​ប្រភេទ។

សូម​បញ្ចាក់​ថា រដ្ឋបាល​ខេត្តតាកែវ​ដែលត្រូវប្រកាស​ផ្ទេរ​ភារកិច្ច និងមុខ​តំណែង​ថ្ងៃនេះ​តាម​ព្រះរាជ​ក្រឹត្យ​តែង​តាំង​​បាន​ត្រាស់បង្គាប់​ផ្ទេរ​ឯកឧត្តម ស្រី បេន អភិបាល​នៃគណអភិបាល​ខេត្តតាកែវ ឲ្យទទួល​ភារ​កិច្ច​ជា​ទីប្រឹក្សារាជ​រដ្ឋាភិបាល​មានឋានៈស្មើរដ្ឋមន្ត្រី។ សម្រេច​តំឡើង​ឋានន្តរស័ក្តិ និងតែងតាំងឯកឧត្តម ឡាយ  វណ្ណៈ ជាអភិបាល​ខេត្តតាកែវ។ ដោយ​ឡែកអនុក្រឹត្យ​របស់រាជ​រដ្ឋាភិ​បាល ក៏បាន​សម្រេច​តែង​តាំង​លោក គាវ  សុវណ្ណធី។ លោកអ៊ួច ​ភា ឲ្យឡើង​ជាអភិបាលរង​នៃគណអភិបាល​ខេត្តតាកែវ និង​សម្រេច​ផ្ទេរ​ភារកិច្ច​លោក អៀង អូននី ពី​អភិបាល​រង​ខេត្ត​តាកែវ ទៅ​ជា​អភិបាល​រង​រាជធានីភ្នំពេញ។ ​អនុក្រឹត្យ​ក៏បាន​សម្រេច​ផ្ទេរ​ភារកិច្ច​លោក មូល  វិចិត្រ ពីអភិបាល​ស្រុកអង្គរបូរី ឲ្យទៅ​ទទួលតំ​ណែងជាអភិ​បាល​ក្រុងដូនកែវ។ លោក​ស្រី គា សុភូ ពីអភិបាល​ស្រុក​ត្រាំកក់ ឲ្យទៅទទួល​ភារកិច្ចថ្មីនៅ​សាលា​ខេត្តតាកែវ។ លោក តឹក​តុងលឹម ពីអភិបាល​ស្រុក​គិរីវង់ ឲ្យទៅទទួល​តំណែងជា​អភិបាល​ស្រុកត្រាំកក់ និង​តែងតាំង​លោក ឃុន បូរ ជាអភិ​បាលស្រុក​អង្គរបូរី។ លោក កៅ វគ្គសែល ជាអភិ​បាលស្រុកគិរីវង់៕

សុន្ទរកថា ឯកឧត្ដម​បណ្ឌិត​សភាចារ្យ សុខ អាន ក្នុង​ពិធី​បើក​សន្និបាត​បូក​សរុប​ការងារ​អប់រំ យុវជន និងកីឡា ឆ្នាំសិក្សា២០១២-២០១៣ និង​ទិស​ដៅ​ឆ្នាំ​សិក្សា​២០១៣-២០១៤

សុន្ទរកថា
ឯកឧត្ដមបណ្ឌិតសភាចារ្យ សុខ អាន ឧបនាយករដ្ឋមន្ដ្រី រដ្ឋមន្ដ្រីទទួល​បន្ទុកទីស្ដីការ​គណៈរដ្ឋមន្ដ្រី តំណាង​ដ៏ខ្ពង់​ខ្ពស់​សម្តេច​អគ្គ​មហា​សេនា​បតី​តេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងពិធីបើកសន្និបាតបូកសរុបការងារអប់រំ យុវជន និងកីឡា ឆ្នាំសិក្សា២០១២-២០១៣ និង​ទិស​ដៅ​ឆ្នាំសិក្សា២០១៣-២០១៤
រាជធានីភ្នំពេញ ថ្ងៃទី១៩ ខែមីនា ឆ្នាំ២០១៤

-        ឯកឧត្តមបណ្ឌិត ហង់ ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា
-        ឯកឧត្តម លោកជំទាវ សមាជិក សមាជិកា នៃរាជរដ្ឋាភិបាល
-        ឯកឧត្តម លោកជំទាវ ឯកអគ្គរាជទូត-រដ្ឋទូត នៃប្រទេសជាមិត្តប្រចាំនៅព្រះរាជាណាចក្រ​កម្ពុជា
-        ឯកឧត្តម លោកជំទាវ អស់លោក លោកស្រី ថ្នាក់ដឹកនាំ សាស្ត្រាចារ្យ លោកគ្រូ អ្នកគ្រូនិងមន្ត្រីរាជការទាំងអស់ នៃក្រសួងអប់រំ យុវជន និងកីឡា ជាទីមេត្រី!

ថ្ងៃនេះ​ ខ្ញុំមានសេចក្តីសោមនស្សរីករាយ​ ចូលរួមជាមួយ ឯកឧត្តម លោកជំទាវ អស់​លោក លោកស្រី ក្នុងពិធីបើកសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០១២-២០១៣ និង​ទិស​ដៅ​ឆ្នាំ​សិក្សា២០១៣-២០១៤។ ឆ្លៀតក្នុងឱកាសនេះ ក្នុងនាម សម្តេចអគ្គមហាសេនាបតីតេជោ ហ៊ុន​ សែន នាយករដ្ឋមន្ត្រីនៃព្រះរាជាណាចក្រកម្ពុជា និង​ក្នុង​នាម​ខ្លួនខ្ញុំ​ផ្ទាល់ ខ្ញុំសូមសម្តែង​នូវការកោត​សរសើរ និង​វាយតម្លៃខ្ពស់ចំពោះ​កិច្ច​ខិតខំ​ប្រឹង​ប្រែ​ង របស់ឯកឧត្តម លោកជំទាវ អស់លោក លោកស្រី ថ្នាក់ដឹកនាំ សាស្ត្រាចារ្យ លោកគ្រូ អ្នកគ្រូ និងមន្ត្រីរាជការទាំងអស់ របស់ក្រសួងអប់រំ យុវជន និងកីឡា ព្រមទាំង​អង្គការជាតិ​និង​អន្តរជា​តិ និងដៃគូ​អភិវឌ្ឍន៍​​ ដែលបានបន្តយកចិត្តទុកដាក់ខ្ពស់ និងជួយ​ឧបត្ថម្ភ​គាំទ្រ ទាំងសម្ភារៈ ថវិកា និង​បច្ចេក​ទេស សំដៅ​លើកកម្ពស់គុណភាព​អប់រំ និង​ប្រសិទ្ធភាពនៃការបណ្តុះបណ្តាល​ធនធា​ន​​​មនុស្ស ជាមួយនឹង​សមិទ្ធផលធំៗជាច្រើនទៀត​ ក្នុង​ការ​អភិវឌ្ឍ​​​វិស័យ​អប់រំនៅកម្ពុជា។ ជាការ​ពិ​ត​ សមិទ្ធផល​ទាំងនេះ កើតមានឡើង​ដោយ​បាន​ការ​ចូលរួមយ៉ាងសកម្មពីអស់លោក លោកស្រី​សាស្រ្តាចារ្យ លោកគ្រូ អ្នកគ្រូ មាតាបិតា អាណាព្យាបាល​សិស្ស និស្សិតទាំងអស់ ដែលបាន​ខិត​ខំ​បង្រៀននិង​បញ្ជូនកូនមក​រៀន​គ្រប់ៗគ្នា ដើម្បីសម្រេចបាននូវគោលដៅ​ «ការអប់រំសម្រាប់​ទាំង​អស់​គ្នា ហើយ​​​ទាំងអស់​គ្នា​សម្រាប់​ការអប់រំ»។  ខ្ញុំក៏​​សូម​​យក​​ឱកាស​នេះផងដែរ សម្តែង​នូវ​ការ​កោត​​សរសើរ​ដល់ឯកឧត្តម​បណ្ឌិត ហង់ ជួន ណារ៉ុន រដ្ឋមន្ត្រី​ក្រសួង​អប់រំ យុវជន និងកីឡា ដែល​​​​បន្ត​ដឹកនាំការងារ​ក្នុង​វិស័យ​ដ៏មានសារៈសំខាន់នេះ យ៉ាងសកម្ម​និង​ប្រកបដោយ​ប្រសិទ្ធភាព​ខ្ពស់ ដោយ​​​​សម្រេចបាន​លទ្ធផល​​គួរជាទី​មោទនៈ នា​ពេលកន្លង​មកនេះ។

ការជួបជុំគ្នាថ្ងៃនេះ គឺជាព្រឹត្តិការណ៍ដ៏មានអត្ថន័យយ៉ាងជ្រាលជ្រៅ ឆ្លុះបញ្ចាំងឱ្យ​ឃើញ​នូវការបន្តយកចិត្តទុកដាក់ខ្ពស់របស់រាជរដ្ឋាភិបាល ក្នុង​ការអភិវឌ្ឍវិស័យអប់រំ​ យុវជន និង​កីឡា​​នៅ​កម្ពុជា។ ព្រឹត្តិការណ៍​នេះ​ក៏​ជា​វេទិកា​ដ៏ល្អសម្រាប់អ្នកជំនាញ អ្នកស្រាវជ្រាវ និងអ្នក​ពាក់​ព័ន្ធ​ដទៃ​ទៀត​ក្នុងវិស័យអប់រំ ផ្លាស់ប្តូរបទពិសោធន៍ និងការអនុវត្តល្អៗសម្រាប់ជាធាតុចូល ក្នុងការ​បង្កើន​ប្រសិទ្ធភាព​ថែមទៀតនៃការ​អនុវត្តគោលនយោបាយ និង​ផែន​ការ​យុទ្ធ​សាស្ត្រ​វិស័យ​អប់រំ យុវជន និងកីឡា ព្រមទាំង​សម្រាប់​​​លើកទិស​ដៅ​ការងាររបស់ក្រសួង​ក្នុងឆ្នាំសិក្សា​ថ្មី​​ឱ្យបាន​កាន់​តែ​ប្រសើរ​ថែមទៀត ដើម្បី​ឆ្លើយ​តប​​ទៅនឹង​តម្រូវ​ការ​​​ថ្មីៗ​​នៃការអភិវឌ្ឍ​ធនធានមនុស្ស ​ប្រកប​ដោយ​គុណ​ភាព​ខ្ពស់ទាំងចំណេះដឹង ចំណេះធ្វើ គុណធម៌ និងសីលធម៌។

ឯកឧត្តម លោកជំទាវ អស់លោក លោកស្រី
គ្រឹះស្ថានសិក្សា រួមទាំង​ស្ថាប័នដទៃទៀតទាំងអស់ត្រូវ​បាន​បំផ្លិចបំផ្លាញទាំងស្រុង​ដោយ​របប​ប្រល័យ​​​ពូជសាសន៍ក្នុងរយៈពេលតែជាងបីឆ្នាំប៉ុណ្ណោះ។ បន្ទាប់ពីថ្ងៃរំដោះ ៧ មករា ១៩៧៩ យើង​បាន​ឆ្លង​កាត់​ការ​លំបាក​គ្រប់បែបយ៉ាង ដោយដៃម្ខាងខិតខំប្រឹងប្រែងស្ដារ និងកសាង​ជាតិ​មាតុភូមិជាទីស្នេហានៃយើងពីបាតដៃទទេ និងដៃម្ខាងទៀតខិតខំការពារមិន​ឱ្យមានការវិល​ត្រឡប់​​មកវិញនៃរបប​ប្រល័យពូជសាសន៍​។ លើសពីនេះទៀត តាមរយៈគោល​នយោបាយ​​ឈ្នះ-ឈ្នះរបស់​សម្តេចតេជោនាយករដ្ឋមន្ត្រី  ដែលបានធ្វើការផ្សះផ្សារ បង្រួបបង្រួម និង​ឯកភាព​​ជាតិ ​ដោយ​ពុំមាន​ការបង្ហូរឈាមគ្នា  កម្ពុជាទទួលបាន​សន្តិភាព​ពេញ​លេញ​​​ដែល​ពុំ​ធ្លាប់​​មាន​​ក្នុង​រយៈ​កាលប្រមាណ ៥០០ ឆ្នាំ​ចុង​ក្រោយ​នេះ​។

សុខសន្តិភាព និង​ស្ថិរភាព​នយោបាយ​គឺ​ជាមូលដ្ឋាន​ដ៏រឹងមាំ​សម្រាប់​​ធានា​បាន​នូវការ​អភិវឌ្ឍ​​​​​លើ​គ្រប់​វិស័យ សំដៅ​លើក​​​​​កម្ពស់​ជីវភាពរស់នៅ និងកាត់បន្ថយភាព​ក្រីក្ររបស់​ប្រជាជ​ន​។ ជាក់​ស្តែង​ ក្នុងឆ្នាំ២០១២ កម្ពុជា​សម្រេច​បាន​នូវ​កំណើនសេដ្ឋកិច្ច ៧,៣% ហើយ​កំណើននេះ​ត្រូវ​បាន​ប៉ាន់ស្មាន​ថា​ស្ថិតក្នុង​រង្វង់​ពី​ ៧% ទៅ ៨% នៅឆ្នាំបន្តបន្ទាប់ ដោយរក្សា​បាន​​នូវអតិផ​រ​ណា​​ទាប។ ផ្អែកលើកំណើន​ដ៏ខ្ពស់នេះ  កម្ពុជា​នឹង​ក្លាយ​ជា​ប្រទេសដែលមាន​ប្រាក់​​ចំណូលមធ្យម​​កម្រិត​​​​ទាបក្នុងពេលអនាគត​ដ៏ខ្លីខាងមុខនេះ និង​ឈាន​ទៅ​ជាប្រទេស​ដែល​មាន​ប្រាក់ចំណូល​មធ្យម​កម្រិតខ្ពស់​នៅឆ្នាំ២០៣០។

រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតី​តេជោ ហ៊ុន​ សែន នាយករដ្ឋមន្ត្រីនៃព្រះរាជាណាចក្រកម្ពុជា ​បាន​និង​កំពុង​​យកចិត្តទុកដាក់​ខ្ពស់ទៅលើវិស័យអប់រំ ដែល​ជា​វិស័យ​អាទិភាពមួយ​ដ៏សំខាន់ ដោយហេតុថាវិស័យនេះគឺជា​ឆ្អឹង​ខ្នងសម្រាប់ទ្រទ្រង់ការអភិវឌ្ឍសេដ្ឋកិច្ចជាតិ ​ព្រមទាំង​ការអភិវឌ្ឍ​វិស័យដទៃៗទៀត។ ផ្អែក​តាម​របាយការណ៍​របស់ឯកឧត្តមរដ្ឋមន្រ្តី ​វិស័យអប់រំ​ទាំង​មូល​មាន​ការ​រីក​ចម្រើន​​ជាបន្តបន្ទាប់គួរ​ឱ្យ​កត់សម្គាល់ ទាំងបរិមាណនិងគុណភាព ​ រួមមាន​​​​ការរីកដុះដាល​យ៉ាង​ខ្លាំង​នៃ​សាលា​រៀន​ចំណេះ​​ទូទៅ​ គ្រឹះស្ថានឧត្តមសិក្សា និងចំនួនសិស្ស និស្សិតចុះឈ្មោះចូលរៀន​នៅ​​គ្រប់ភូមិ​សិក្សា​​ទាំង​ផ្នែក​សាធារណៈ និងផ្នែកឯកជន ដែលនេះគឺ​ជា​មូលដ្ឋានគ្រឹះដ៏ចាំបាច់​សម្រាប់​ឈាន​ទៅ​ពង្រឹងគុណភាពអប់រំឱ្យកាន់តែប្រសើរឡើង​ថែម​ទៀត។ ជោគជ័យទាំងនេះ គឺជាការ​រួម​ចំណែក​​​​យ៉ាងសំខាន់ដល់ការលើកកម្ពស់ ការ​អភិវឌ្ឍ​ធនធានមនុស្សឱ្យឆ្លើយតបទៅនឹងទីផ្សារការងារ ។

អង្គសន្និបាតជាមេត្រី!
ឆ្លៀតក្នុងឱកាសនេះ ខ្ញុំសូមកោតសរសើរ និងវាយតម្លៃខ្ពស់ចំពោះ​របៀបនៃ​ដំណើរការ​របស់អង្គសន្និបាតនេះ  ដែលបានធ្វើការប្រមូលផ្ដុំមតិយោបល់ចាប់ពី​ថ្នាក់​ក្រោមជាតិ តាមរយៈ​សន្និបាត​អប់រំតាមខេត្ត និង​ជាបន្តបន្ទាប់ ដែលមតិយោបល់ទាំងនោះ ត្រូវបាន​បញ្ជូន​ឡើង​មក​ថ្នាក់​ជាតិ។ លើសពីនេះ ប្រធានបទទាំង១៥ ដែលនឹងត្រូវពិភាក្សា​ មានភាព​ប្រទាក់​ក្រឡាគ្នា និង​ជា​ប្រធាន​បទ​ដែលកំពុងតែទាមទារឱ្យមានការបកស្រាយ ពន្យល់ រិះរក​ដំណោះ​ស្រាយ និង​ត្រូវ​ចំ​សភាពការណ៍  ព្រមទាំងមានការចូលរួមចំណែកពីសំណាក់​បណ្ដា​តំណាង​អាជ្ញាធរ​មូលដ្ឋាន ផ្នែកឯកជន  និងដៃគូអភិវឌ្ឍន៍នានាផងដែរ។

ក្នុងន័យនេះ ខ្ញុំមានជំនឿថា​ ឯកឧត្តម លោកជំទាវ អស់លោក លោកស្រី សមាជិក សមាជិកា អង្គសន្និបាតដែលបានអញ្ជើញមកពីរាជធានី ខេត្ត តំណាងឱ្យលោកគ្រូ អ្នកគ្រូ​សាស្ត្រាចារ្យជាង ១១ ម៉ឺននាក់ រួមជាមួយដៃគូអភិវឌ្ឍន៍ នឹងចូលរួមយ៉ាងផុលផុស ដើម្បីចែក​រំលែក​បទពិសោធន៍ល្អៗ និង​ពិភាក្សាផ្លាស់​ប្ដូរយោបល់​ សំដៅរកឱ្យឃើញនូវចំណុចខ្លាំង និង​ចំណុចខ្សោយ ព្រមទាំងបញ្ហាប្រឈមនានា​នៅក្នុ​​ងវិស័យអប់រំ ជាពិសេសពាក់ព័ន្ធនឹង​ប្រធាន​បទ​ទាំង​១៥នេះ។ ខ្ញុំសង្ឃឹមជឿជាក់ថា ផ្លែផ្កានៃកិច្ចពិភាក្សានេះនឹងអាចជាដំណោះ​ស្រាយ​ប្រកប​ដោយប្រសិទ្ធភាព​មាន​​លក្ខណៈស៊ីជម្រៅ និង​មាន​វិសាលភាពកាន់តែទូលាយ ដើម្បីរួមចំណែក​ដោះស្រាយបញ្ហា​ប្រឈម​​នានាពាក់ព័ន្ធនឹងការងារអប់រំ​ យុវជន និងកីឡា ជាអាទិ៍ ការពង្រឹង​គុណភាពអប់រំនៅគ្រប់​កម្រិត  ការជំរុញឱ្យកុមារនិងយុវជនទទួលបានការអប់រំ​នៅគ្រប់​កម្រិត​សិក្សា ការផ្ដល់​សេវាអប់រំប្រកបដោយប្រសិទ្ធភាពនិងសមធម៌ ការអភិវឌ្ឍស្ថាប័ននិងពង្រឹង​សមត្ថភាព​​មន្ត្រី​អប់រំ​នៅគ្រប់កម្រិត ការពង្រឹងសកម្មភាព​អប់រំកាយនិងកីឡានៅតាម​គ្រឹះស្ថាន​សិក្សា ការពង្រឹង​សកម្មភាព​កីឡា​មហាជន ជាដើម។

ដើម្បីរួមចំណែកដល់ការដោះស្រាយបញ្ហាប្រឈមទាំងនេះ ខ្ញុំសូមផ្ដល់ជាគំនិតខ្លះៗ ដែលជា​ធាតុចូលសម្រាប់ការពិភាក្សាក្នុងអង្គសន្និបាតរយៈពេលបីថ្ងៃនេះ ដូចខាងក្រោម៖

ទី១- ដើម្បីអនុវត្តឱ្យបានសម្រេចគោលដៅអប់រំជាតិ និងគោលដៅសហស្សវត្ស​ដែល​​តម្រូវ​ឱ្យប្រទេស​នីមួយៗខិតខំរំដោះ​អនក្ខរភាពឱ្យបានសម្រេចជាស្ថាពរនៅឆ្នាំ២០១៥ ខាង​មុខ ក្នុង​ក្របខ័ណ្ឌនៃ “ការអប់រំ​សម្រាប់ទាំងអស់គ្នា”​។ ក្នុងបរិបទនេះ ការអប់រំក្នុងប្រព័ន្ធនិង​ក្រៅ​ប្រព័ន្ធ​​ជា​ការងារដ៏សំខាន់។ ហេតុនេះ រាជធានី ខេត្ត គួរ​ខិតខំថែមទៀត ក្នុងការ​ជំរុញ​កុមារ​ដល់​វ័យសិក្សា កុមារលើសអាយុសិក្សា និងកុមារបោះ​បង់ចោលការសិក្សា កុមារនិងយុវជននៅក្រៅ​សាលា​រៀនដែលជួញដូរនិងប្រើប្រាស់គ្រឿងញៀន ព្រម​ទាំង​កុមារ​និង​យុវជន​ដែល​ទទួលរង​គ្រោះ​ពីការរំលោភបំពាននិងអំពើហិង្សាជា​ដើម​ ឱ្យបានទទួលសេវាអប់រំក្នុងប្រព័ន្ធ និងក្រៅ​ប្រព័ន្ធ​ឡើងវិញ និង​ទទួល​បាន​ការ​បណ្ដុះបណ្ដាលជំនាញ​ខ្លីៗប្រកបដោយសមធម៌។

ទី២- គប្បី​​ផ្តោតឤទិភាពលើគុណភាពអប់រំជាចម្បង។ ដើម្បីសម្រេចបាន​នូវគោល​បំណង​នេះ ខ្ញុំសូមលើក​ទឹកចិត្តដល់​ថ្នាក់​ដឹក​នាំ​និង​មន្ត្រីរាជការទាំងអស់របស់ក្រសួងអប់រំ យុវ​ជ​ន និងកីឡា ចូលរួមយ៉ាងសកម្មក្នុងការងារ​កំណែ​ទម្រង់និង​អភិវឌ្ឍ​វិស័យអប់រំបន្ថែមទៀត ប្រកប​ដោយ​​ឆន្ទៈពិតប្រាកដនិងភាពជាម្ចាស់ ដោយចាត់ទុកកំណែទម្រង់ក្នុងវិស័យនេះ​ជាកត្តា​កំណត់​​​​​ជោគវាសនារួម​ និងការអភិវឌ្ឍលើគ្រប់វិស័យ។ ដូចនេះ ក្រសួង​គួរ​បន្ត​យកចិត្ត​ទុកដាក់ធ្វើ​វិក្រឹតការគ្រូបង្រៀន​ប្រកបដោយគុណវុឌ្ឍិ​ខ្ពស់ ដើម្បីបន្តលើកកម្ពស់សមត្ថភាពវិជ្ជាជីវៈ​ក្នុង​ការ​អប់រំ សំដៅរួមចំណែកដល់ការកាត់បន្ថយនូវអត្រា​បោះបង់​ការសិក្សា ជាមួយនិងការ​ផ្តល់​នូវ​ឤហារូបករណ៍ដល់​សិស្ស-និស្សិត​ក្រីក្រ ដើម្បីធានាឱ្យមាននូវការទទួលបាន​ការអប់រំ ប្រកប​ដោយ​គុណភាពខ្ពស់និងសមធម៌។

ទី៣- ចំពោះ​គ្រឹះស្ថាន​ឧត្ត​មសិក្សា​ គួរ​លើកកម្ពស់​ការ​សិក្សាស្រាវជ្រាវ​ ប្រកបដោយ​គុណភាពខ្ពស់​​ ដើម្បី​បង្កើន​ប្រសិទ្ធភាព​និង​ប្រសិទ្ធផលក្នុង​ការ​បង្រៀន និងការ​ផ្សារភ្ជាប់​ទ្រឹស្តី​នៅ​​នឹង​​ការ​អនុវត្តជាក់ស្តែង ហើយ​លទ្ធផលនៃការ​ស្រាវជ្រាវត្រូវ​លើកទឹកចិត្តឱ្យបោះពុម្ភក្នុង​ទិនានុប្បវត្តិ​វិទ្យាសាស្រ្ត ជាពិសេសទិនានុប្បវត្តិវិទ្យាសាស្រ្តក្នុងតំបន់និង​អន្តរជាតិ។​ ដើម្បីធានា​ឱ្យ​មាន​គុណភាព​​ខ្ពស់​និងការបោះពុម្ពផ្សាយជាអន្តរជាតិ ឯកសារស្រាវជ្រាវគួរ​ត្រូវបាន​ត្រួតពិនិ​ត្យ​​ដោយ​​​អ្នកឯកទេស​ឯករាជ្យ​លើប្រធានបទស្រាវជ្រាវនោះ។ លើសពីនេះ អ្នកសិក្សាស្រាវជ្រាវគួរ​​ប្រកាន់ខ្ជាប់​​ជានិច្ចនូវសីលធម៌អាជីពរបស់ខ្លួនម្នាក់ៗ ដើម្បីជៀសវាងឱ្យបាន​នូវការ​ប្រើប្រាស់​ស្នាដៃ​របស់​អ្នក​​ស្រាវជ្រាវដទៃទៀតដែលពុំបានផ្តល់នូវប្រភពត្រឹមត្រូវ និងសេចក្តីទុច្ចរិតក្នុង​ការ​​សិក្សា​​ស្រាវ​ជ្រាវ។ ខ្ញុំមាន​ជំនឿយ៉ាងមុតមាំថា សកម្មភាពការសិក្សា​នេះ​នឹងពិតជារួម​ចំណែ​ក​​​​ដល់ការ​ផ្សព្វ​ផ្សាយ​នូវគុណភាពនៃ​ការ​អប់រំ​នៅ​កម្ពុជា និងកម្ពុជានៅលើឆាក​អន្តរជាតិ។

ទី៤- គប្បី​​ជំរុញ​ការ​អភិវឌ្ឍ​កម្ម​វិធី​សិក្សា​ ដើម្បី​លើកកម្ពស់​គុណភាព​អប់​រំ​ និង​ឆ្លើយ​តប​ទៅ​នឹង​តម្រូវការ​ជាក់​ស្ដែង​នៅក្នុង​ទីផ្សារការងារ​​ដែល​​កាន់តែ​មាន​ការ​ប្រកួត​ប្រជែងខ្លាំង​។​ ​

ទី៥- គួរ​យកចិត្តទុកដាក់លើការកែលម្អជីវភាពរស់នៅរបស់លោកគ្រូ អ្នកគ្រូ និង​សាស្ត្រាចារ្យ ព្រមទាំងបុគ្គលិកសិក្សាទាំងអស់ ដើម្បីបង្កើនប្រសិទ្ធភាព​ការងារអប់រំឱ្យ​កាន់​តែ​ប្រសើរថែមទៀត។

ទី៦-​ ដោយ​ការអប់រំ គឺជាការវិនិយោគរយៈវែង ខ្ញុំសូមអំពាវនាវឱ្យមាន​ការយកចិត្ត​ទុក​ដាក់ខ្ពស់​លើការកៀរគរហិរញ្ញប្បទាន ការជំរុញកំណែទម្រង់អភិបាលកិច្ចក្នុង​វិស័យ​អប់រំ​​ឱ្យកាន់​តែ​មាន​ប្រសិទ្ធភាព​ខ្ពស់ ការផ្សារ​ភ្ជាប់​ការ​អប់​រំទៅ​នឹងការអភិវឌ្ឍន៍ និង​ការ​ជំរុញ​​វិទ្យាសាស្ត្រ​ បច្ចេកទេស និង​នវានុវត្តភាព។

ទី៧- ខ្ញុំសូមអំពាវនាវ​ដល់ស្ថាប័នជាតិនិងអន្តរជាតិ វិស័យឯកជន និងអង្គការមិនមែន​រដ្ឋាភិបាល ដែល​បំពេញ​ការងារក្នុងវិស័យអប់រំ មេត្តា​ពិនិ​ត្យ​​​លើ​ឤទិភាពសំខាន់​ក្នុងផែនការ​យុទ្ធសាស្ត្ររបស់រាជរដ្ឋាភិបាល និង​ផ្តល់​ការ​គាំទ្រឱ្យបាន​ពេញលេញ តាមសមត្ថកិច្ច និង​លទ្ធភាព​របស់ខ្លួន ទាំងបច្ចេកទេស ហិរញ្ញវត្ថុ និងសម្ភារៈ។
ទី៨-​ គួរ​បន្ដ​​កៀរគរ​បញ្ញាវ័ន្ដ​កម្ពុជា ដែល​មាន​សញ្ញា​បត្រខ្ពស់ ជាពិសេស​ សញ្ញាបត្រ​ថ្នាក់បណ្ឌិតដែលត្រូវបាន​ទទួល​ស្គាល់​​​ជាអន្តរជាតិ និងមាន​​បទ​ពិសោធន៍ ​រួមចំណែកដល់​ការ​អភិវឌ្ឍវិស័យ​អប់រំ​នៅកម្ពុជា ប្រកប​ដោយ​គុណភាព​និង​ចីរភាព​។

ទី៩- គួរ​យកចិត្តទុកដាក់អនុវត្តគោលនយោបាយជាតិ ស្តីពីការអភិវឌ្ឍយុវជនកម្ពុជា សំដៅ​​​អភិវឌ្ឍ​យុវជន ទាំងខាងចំណេះដឹង ចំណេះធ្វើ សុខភាព កាយសម្បទា និងសីលធម៌ ឱ្យ​ក្លាយ​ទៅជាមូលធន​មនុស្ស ប្រកបដោយសក្តានុពល និងធានាបាននូវការបង្កើត​កាលានុវត្តភាព​​​​ការងារ​​សម្រាប់យុវជន ជាពិសេសតាមរយៈ​ការបង្កើត​​វេទិកា​ស្វែងរកការងារសម្រាប់យុវជន។

ទី១០-​ គួរ​ផ្សារភ្ជាប់ការអប់រំទៅនឹងការអភិវឌ្ឍវិស័យសេដ្ឋកិច្ចឱ្យកាន់តែប្រសើរឡើង​ថែម​ទៀត តាមរយៈការបង្រួមឱ្យបាន​ជាអប្បរមានូវគម្លាតរវាង​ការផ្តត់ផ្តង់ និងតម្រូវការ​ជំនាញ​ក្នុង​ទីផ្សារការងារ។ នេះទាមទារ​ឱ្យ​មាន​ការ​កែ​ទម្រង់​ស៊ីជម្រៅនៃប្រព័ន្ធអប់រំ​នៅកម្រិតឧត្តម​សិក្សា ជាពិសេស​ការ​ពង្រឹងការគ្រប់គ្រងប្រកបដោយវិជ្ជាជីវៈខ្ពស់ សំដៅជម្រុញឱ្យគ្រឹះស្ថាន​ឧត្តម​សិក្សា​​​ទាំង​រដ្ឋ​ ទាំង​​​ឯកជន ផ្តល់ការបណ្តុះបណ្តាលមានគុណភាពខ្ពស់ ដើម្បីបង្កើន​កាលា​នុវត្ត​ភាព​​​​​​ការ​ងារ​សម្រាប់និស្សិតដែលបាន​បញ្ចប់ការសិក្សាអាចរកការងារធ្វើបាន នៅក្នុង​ទីផ្សារ​​​ការងារ​ដែលកំពុងមានភាពប្រកួតប្រជែងកាន់តែខ្ពស់ ជាពិសេសនៅពេល​ដែលសហគមន៍​​​សេដ្ឋកិច្ច​អាស៊ានត្រូវបាន​បង្កើតឡើងនៅឆ្នាំ២០១៥ ខាងមុខនេះ។

ឯកឧត្តម លោកជំទាវ អស់លោក លោកស្រី
ជាថ្មីម្ដងទៀត ខ្ញុំសូមកោតសរសើរ និងវាយតម្លៃខ្ពស់ចំពោះថ្នាក់ដឹកនាំក្រសួងអប់រំ យុវជន និងកីឡា និងមន្ត្រីរាជការគ្រប់លំដាប់ថ្នាក់ លោកគ្រូ អ្នកគ្រូ សាស្ត្រាចារ្យ បុគ្គលិក​សិក្សា​​ទាំងអស់  ក្រសួង-ស្ថាប័ន​ពាក់ព័ន្ធ ផ្នែកឯកជន អង្គការជាតិ-អន្ដរជាតិ និងដៃគូ​អភិវឌ្ឍន៍​នានា ដែល​បានចូល​រួមចំណែកក្នុង​កិច្ច​​អភិវឌ្ឍ​វិស័យ​អប់រំនៅ​កម្ពុជា ដោយទទួលបាន​លទ្ធផល​ជា​ទី​មោទនៈនាពេលកន្លងមក។​ ​ខ្ញុំសូមអំពាវនាវដល់ថ្នាក់ដឹកនាំក្រសួងអប់រំ យុវជន និងកីឡា និងមន្ត្រីរាជការគ្រប់លំដាប់ថ្នាក់ លោកគ្រូ អ្នកគ្រូ សាស្ត្រាចារ្យ បុគ្គលិកសិក្សាទាំងអស់ ​ព្រម​ទាំ​ង​​​អ្នកពាក់ព័ន្ធនានា សូមបន្តចូលរួមចំណែក និងការគាំទ្របន្ថែមទៀត ក្នុងការអនុវត្ត​នូវ​កម្មវិធី​កំណែទម្រង់វិស័យអប់រំ ជាពិសេសអាទិភាពទាំង ៨ គឺ៖ ការពង្រឹងការគ្រប់គ្រង​ហិរញ្ញ​វត្ថុ និងការគ្រប់គ្រងទ្រព្យសម្បត្តិរដ្ឋ ការពង្រឹងការគ្រប់គ្រងបុគ្គលិក ការពង្រឹងការ​ប្រលង​គ្រប់​ប្រភេ​ទ ការបង្កើតធនាគារខួរក្បាលវិស័យអប់រំ កំណែ​ទម្រង់​ឧត្តម​សិក្សា ការបង្កើនគុណភាព និង​ប្រសិទ្ធភាពនៃសេវាអប់រំនៅគ្រប់កម្រិតសិក្សា ក្នុងការបណ្តុះបណ្តាលបច្ចេកទេសនិង​មុខ​ជំនា​ញ​​​ឱ្យស្របទៅតាមតម្រូវការអភិវឌ្ឍរបស់ប្រទេស ការអភិវឌ្ឍសម្រាប់យុវជននូវជំនាញ​បច្ចេកទេ​ស​​និងជំនាញទន់ និងកំណែទម្រង់ការអប់រំកាយ និងកីឡា ដើម្បីត្រៀមខ្លួនឱ្យបានល្អ​ចូលរួម​ក្នុង​ការប្រកួតកីឡា​ស៊ីហ្គេម នៅឆ្នាំ២០២៣។

ខ្ញុំសង្ឃឹមថា អង្គសន្និបាតនេះនឹងទទួលបានលទ្ធផលល្អ ជាពិសេស​នឹង​ទទួល​បាន​អនុសាសន៍​ណែ​នាំប្រកបដោយគតិបណ្ឌិតរបស់សម្ដេចអគ្គមហាសេនាបតី​តេជោ ហ៊ុន​ សែន នាយករដ្ឋមន្ត្រីនៃព្រះរាជាណាចក្រកម្ពុជា ​ក្នុង​ពិធី​បិ​ទ​​សន្និបាត​នេះ។​

ជាទីបញ្ចប់ ខ្ញុំសូមជូនពរឯកឧត្ដម លោកជំទាវ អស់លោក លោកស្រីទាំងអស់ សូម​ទទួល​បាន​ជោគ​ជ័យ ​សេចក្ដី​សុ​ខ និងសុភមង្គលក្នុងក្រុមគ្រួសារ។

ខ្ញុំ​សូម​ប្រកាសបើកសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០១២-២០១៣ និងទិសដៅឆ្នាំសិក្សា២០១៣-២០១៤ ចាប់ពីពេល​នេះ​តទៅ។
                                                                                       សូមអរគុណ!

សុន្ទរកថា ឯកឧត្តម ស ខេង, ថ្លែងក្នុង ពិធី​បិទ​សន្និបាត​បូក​សរុប​លទ្ធ​ផល​ការ​ងារ​របស់ក្រុម​ប្រឹក្សា​ខេត្ត​តាកែវ អាណត្តិ​ទី១ (ឆ្នាំ​២០០៩~២០១៤)

សុន្ទរកថា
ឯកឧត្តម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ថ្លែងក្នុង ពិធបិទសន្និបាតបូកសរុបលទ្ធផលការងាររបស់ក្រុមប្រឹក្សាខេត្តតាកែវ អាណត្តិទី១(ឆ្នាំ២០០៩~២០១៤) និងបូកសរុបលទ្ធផលការងារឆ្នាំ២០១៣ និងលើកទិសដៅការងារឆ្នាំ២០១៤ របស់រដ្ឋបាលខេត្តតាកែវ រួមជាមួយ ការប្រកាសផ្ទេរភារកិច្ច តែងតាំងមុខតំណែងអភិបាល អភិបាលរងនៃ គណៈអភិបាលខេត្តតាកែវ
ខេត្តតាកែវ ថ្ងៃទី១៨ ខែកុម្ភៈ ឆ្នាំ២០១៤

–ឯកឧត្តម សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី

–ឯកឧត្តមប្រធានក្រុមប្រឹក្សា ឯកឧត្តមអភិបាលនៃគណៈអភិបាលខេត្តតាកែវ

–ឯកឧត្តម លោកជំទាវសមាជិក សមាជិកាក្រុមប្រឹក្សា អភិបាលរង

–ឯកឧត្តម លោកជំទាវ លោកស្រី អស់លោក ភ្ញៀវកិត្តិយស សមាជិក សមាជិកា នៃអង្គសន្និបាត ជាទីមេត្រី !

–ថ្ងៃនេះ ខ្ញុំមានកិត្តិយស និងមានសេចក្តីសោមនស្សរីករាយយ៉ាងក្រៃលែង ដែលបាន មកចូលរួមក្នុងពិធីបិទសន្និបាតបូកសរុបលទ្ធផលការងាររបស់ក្រុមប្រឹក្សាខេត្តតាកែវ អាណត្តិទី១(ឆ្នាំ២០០៩~២០១៤)​ និងការបូកសរុបលទ្ធផលអនុវត្តការងារឆ្នាំ២០១៣ និង លើកទិសដៅការងារឆ្នាំ២០១៤ របស់រដ្ឋបាលខេត្តតាកែវ រួមជាមួយការប្រកាសផ្ទេរភារកិច្ច តែងតាំងមុខតំណែងអភិបាល អភិបាលរងនៃគណៈអភិបាលខេត្តតាកែវ នាឱកាសដ៏មហោ ឡារិកនេះ។

–ក្នុងឱកាសដ៏ថ្លៃថ្លានេះ ក្នុងនាមរាជរដ្ឋាភិបាលកម្ពុជា ក្រសួងមហាផ្ទៃ និងក្នុងនាម ខ្លួនខ្ញុំផ្ទាល់ ខ្ញុំសូមសំដែងនូវការកោតសរសើរ និងវាយតម្លៃខ្ពស់ចំពោះក្រុមប្រឹក្សា គណៈ អភិបាលខេត្ត ក្រុង ស្រុក ក្រុមប្រឹក្សាឃុំ សង្កាត់ ថ្នាក់ដឹកនាំគ្រប់ភូមិ មន្ទីរ អង្គភាពជំនាញ នានា និងកងកម្លាំងប្រដាប់អាវុធ ព្រមទាំងប្រជាពលរដ្ឋទូទាំងខេត្តតាកែវ ដែលបានខិតខំ ប្រឹងប្រែងរួមគ្នាធ្វើការកសាង​អភិវឌ្ឍន៍ខេត្តតាកែវឲ្យមានការអភិវឌ្ឍរីកចម្រើនលើគ្រប់វិស័យ។

–ទន្ទឹមនេះ ខេត្តតាកែវរបស់យើងក៏បានធ្វើការផ្ទេរភារកិច្ច និងតែងតាំងមុខតំណែង អភិបាលខេត្ត អភិបាលរងខេត្ត ០២រូប និងអភិបាលក្រុងដូនកែវ អភិបាលស្រុកគិរីរង្ស និង អភិបាលស្រុកត្រាំកក់ផងដែរ។ ហេតុនេះ ក្នុងឱកាសដ៏មហោឡារិកនេះ ខ្ញុំសូមសំដែងនូវការ កោតសរសើរ និងវាយតម្លៃខ្ពស់ចំពោះឯកឧត្តម ស្រី បេន​ ដែលបានធ្វើពលីកម្មយ៉ាងធំធេង ក្នុង​ការ​ដឹកនាំ​កសាង​អភិវឌ្ឍន៍​ខេត្តតាកែវក្នុងមុខ​តំណែង​ជា​បន្តបន្ទាប់ចាប់តាំងពីក្រោយថ្ងៃ រំដោះប្រទេសជាតិ ៧មករា​ ឆ្នាំ១៩៧៩រហូតមក ពិសេសចាប់តាំងពីឯកឧត្តមបានទទួលមុខ តំណែងជាអភិបាលខេត្តតាកែវអស់រយៈពេលប្រមាណ ០៨ឆ្នាំចាប់តាំងពីថ្ងៃទី២៣ ខែមីនា ឆ្នាំ២០០៦មក។

ព្រមជាមួយនេះ ខ្ញុំសូមសំដែងនូវការកោតសរសើរ និងអបអរសាទរចំពោះឯកឧត្តម ឡាយ វណ្ណៈដែលត្រូវបានតែងតាំងជាអភិបាលខេត្តតាកែវ ជំនួសឯកឧត្តម ស្រី បេន ដើម្បី​ បន្តដឹកនាំ​អភិវឌ្ឍន៍​ខេត្ត​តាកែវ​ឲ្យកាន់​តែមានការអភិវឌ្ឍរីកចម្រើនជាបន្ថែមទៀត។

–ការតែងតាំង ផ្លាស់ប្តូរភារកិច្ចទាំងនេះគឺជាកិច្ចដំណើរការជាធម្មតាក្នុងកិច្ចការមុខងារ​សាធារណៈដើម្បីលើកកម្ពស់ប្រសិទ្ធភាពការងារ។

–អាស្រ័យហេតុនេះ ខ្ញុំសូមស្នើក្រុមការងាររាជរដ្ឋាភិបាលចុះជួយខេត្តតាកែវ  ក្រុមប្រឹក្សា គណៈអភិបាលខេត្ត ក្រុង ស្រុក ក្រុមប្រឹក្សាឃុំ សង្កាត់ មន្ទីរ អង្គភាពជំនាញនានា កងកម្លាំង មានសមត្ថកិច្ច និងកងកំលាំងប្រដាប់អាវុធគ្រប់លំដាប់ថ្នាក់ គាំទ្រ និងចូលរួមជាមួយឯកឧត្តម ឡាយ វណ្ណៈ  អភិបាលខេត្ត  អភិបាលរងខេត្ត និងអភិបាល ក្រុង ស្រុកដែលទើបបានទទួល ការតែងតាំងខាងលើនេះ ដោយរួបរួមសាមគ្គីជួយ​ឧបត្ថម្ភគាំទ្រគ្នាទៅវិញទៅមក ដើម្បីបន្ត កសាងអភិវឌ្ឍន៍ខេត្តតាកែវឲ្យមានការរីកចម្រើនលើគ្រប់វិស័យ និងខិតខំរួមគ្នាបំរើប្រជាជន ឲ្យបានល្អបំផុត។

ឯកឧត្តម លោកជំទាវ លោកស្រី អស់លោក !
            អំពីកិច្ចដំណើរការកំណែទម្រង់វិមជ្ឈការ និងវិសហមជ្ឈការក្នុងអាណត្តិទី១នៃក្រុមប្រឹក្សា ខេត្ត ក្រុង ស្រុក និងការងារគ្រប់វិស័យក្នុងខេត្តតាកែវនាឆ្នាំ២០១៣ ខ្ញុំសូមធ្វើការកត់សំគាល់ ដូចខាងក្រោម៖

I-សមិទ្ធផលក្រុមប្រឹក្សាខេត្ត ក្រុង ស្រុក អាណត្តិទី១
–ការអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការគឺជាដំណើរការ កំណែទម្រង់ជាប្រវត្តិសាស្រ្តក្នុងប្រព័ន្ធអភិបាលកិច្ចថ្នាក់ក្រោមជាតិនៅកម្ពុជា ដែលបានចាប់ ផ្តើមស្របពេលនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ជាលើកដំបូងនៅកម្ពុជានា ខែកុម្ភៈ ឆ្នាំ២០០២។

–សមិទ្ធផលជាវិជ្ជមាននៃកិច្ចដំណើរការកំណែទម្រង់នៅថ្នាក់ឃុំ សង្កាត់បានជំរុញ និងលើកទឹកចិត្តដល់រាជរដ្ឋាភិបាលកម្ពុជាពង្រីកដំណើរការកំណែទម្រង់នេះនៅថ្នាក់ក្រោម ជាតិទាំងមូល តាមរយៈការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី១ កាលពីខែឧសភា ឆ្នាំ ២០០៩កន្លងទៅនេះ។

–អាស្រ័យដោយមានការប្តេជ្ញាចិត្តខាងនយោបាយដ៏មុតមាំរបស់រាជរដ្ឋាភិបាលកម្ពុជា បានធ្វើឲ្យកម្មវិធីកំណែទម្រង់នេះសម្រេចបានសមិទ្ធផលជាច្រើនក្នុងអាណត្តិទី១ របស់​ក្រុមប្រឹក្សារាជធានី ខេត្ត ក្រុង ស្រុក ខណ្ឌ ដែលក្នុងនោះមានសមិទ្ធផលសំខាន់ជាគន្លឹះ ចំនួន០៦ រួមមាន៖

ទីមួយ.ការចូលរួមពង្រឹងសន្តិភាព ស្ថិរភាពនយោបាយ និងការពង្រឹងលទ្ធិប្រជាធិប- តេយ្យ សេរីពហុបក្សនៅកម្ពុជា តាមរយៈការបង្កើតឡើងនូវក្រុមប្រឹក្សារាជធានី ខេត្ត ក្រុង ស្រុក ខណ្ឌ និងក្រុមប្រឹក្សាឃុំ សង្កាត់ទូទាំងប្រទេស។

ទីពីរ.ដោយសារកំណែទម្រង់នេះមានភាពស៊ាំញាំ និងរសើប ​យើងបានដាក់ចេញនូវ កម្មវិធីជាតិរយៈពេល១០ឆ្នាំសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដែលជាផែនទីបង្ហាញផ្លូវរយៈពេលវែងពីឆ្នាំ២០១០ ដល់ឆ្នាំ២០១៩។ ផ្អែកលើកម្មវិធីជាតិនេះ  គ.ជ.អ.បបានដាក់ចេញនូវផែនការអនុវត្តរយៈពេល០៣ឆ្នាំដំបូងដែលជាផែនការសកម្មភាព រយៈពេលមធ្យមសម្រាប់កំណែទម្រង់ដ៏មានសារៈសំខាន់នេះ។

ទីបី.ផ្អែកតាមច្បាប់រៀបចំអង្គការ រចនាសម័្ពន្ធ និងប្រព័ន្ធអភិបាលកិច្ចថ្នាក់រាជធានី ខេត្ត ក្រុង ស្រុក ខណ្ឌ ត្រូវបានរៀបចំឡើងវិញ។ ជាក់ស្តែង គណៈអភិបាលរាជធានី ខេត្ត ក្រុង ស្រុក ខណ្ឌ ត្រូវបានតែងតាំងដើម្បីធ្វើគណនេយ្យភាពដោយផ្ទាល់ជាមួយក្រុមប្រឹក្សា និងជាមួយរាជរដ្ឋាភិបាលសម្រាប់អាណត្តិការងារ០៤ឆ្នាំ និងអាចបន្ត០៤ឆ្នាំទៀតក្នុងដែន សមត្ថកិច្ចដដែល។ ទន្ទឹមនេះ មន្រ្តីរាជការស៊ីវិលប្រមាណជិត០១ម៉ឺននាក់នៅសាលារាជធានី ខេត្ត ក្រុង ស្រុក ខណ្ឌទូទាំងប្រទេស ត្រូវបានធ្វើសមាហរណកម្មចូលទៅក្នុងរចនាសម័្ពន្ធ និងប្រព័ន្ធអភិបាលកិច្ចថ្មីនេះផងដែរ។

ទីបួន.រាជធានី ខេត្ត ក្រុង ស្រុក ខណ្ឌទូទាំងប្រទេសបានរៀបចំនូវផែនការអភិវឌ្ឍន៍ រយៈពេល០៥ឆ្នាំ និងកម្មវិធីវិនិយោគ០៣ឆ្នាំរំកិល ដែលកំណត់អំពីយុទ្ធសាស្រ្តសម្រាប់ការ អភិវឌ្ឍមូលដ្ឋាន ដោយផ្អែកលើមូលដ្ឋាននៃការចូលរួម ការពិគ្រោះយោបល់ តម្លាភាព និង គណនេយ្យភាព ដែលឆ្លុះបញ្ចាំងនូវតម្រូវការខុសៗគ្នាពីមូលដ្ឋានមួយទៅមូលដ្ឋានមួយទៀត។

ទន្ទឹមនេះ ប្រព័ន្ធផ្ទេរថវិកាពីថ្នាក់ជាតិទៅថ្នាក់ក្រោមជាតិក៏ត្រូវបានរៀបចំឡើងវិញ ពិសេសការបង្កើតឲ្យមានមូលនិធិក្រុង ស្រុក ដើម្បីថ្នាក់រដ្ឋបាលដ៏មានសារៈសំខាន់នេះ ទទួលបានធនធាន ថវិកាសម្រាប់ចាត់ចែងប្រើប្រាស់ក្នុងការផ្តល់សេវា និងធ្វើការអភិវឌ្ឍ មូលដ្ឋាន ស្របតាមផែនការអភិវឌ្ឍន៍ និងកម្មវិធីវិនិយោគរបស់ខ្លួន។

ទីប្រាំ.ក្រសួងអាទិភាពចំនួន០៥បានរៀបចំបញ្ជីមុខងារ ហើយបាននិងកំពុងធ្វើការ វិភាគមុខងារ និងធនធានសម្រាប់ជាមូលដ្ឋានធ្វើការផ្ទេរមុខងារ ធនធានទៅឲ្យរដ្ឋបាលថ្នាក់ ក្រោមជាតិ។

ទីប្រាំមួយ.រៀបចំឲ្យមានប្រព័ន្ធលើកកម្ពស់ការចូលរួម គណនេយ្យភាព តម្លាភាព របស់រដ្ឋបាលថ្នាក់ក្រោមជាតិ ដូចជាប្រព័ន្ធគ្រប់គ្រងបុគ្គលិក ការបញ្ជ្រាបយេនឌ័រ ការពង្រឹងកិច្ច ប្រជុំជាសាធារណៈរបស់ក្រុមប្រឹក្សា  ការរៀបចំវេទិកាផ្សព្វផ្សាយ ពិគ្រោះយោបល់របស់ក្រុមប្រឹក្សា ការរៀបចំក្របខ័ណ្ឌគណនេយ្យភាពសង្គម...។ល។

II-សមិទ្ធផលការងារឆ្នាំ២០១៣របស់ខេត្តតាកែវ
ក្នុងឆ្នាំ២០១៣កន្លងទៅនេះ ខេត្តតាកែវខិតខំពុះពារសម្រេចបានសមិទ្ធផលនយោបាយ និងសង្គមនានាជាច្រើន ក្នុងនោះមានសមិទ្ធផលសំខាន់ៗចំនួន០៥ដែលលេចធ្លោគឺ៖

-ខិតខំរួមគ្នារក្សាការពារសន្តិសុខសម្រាប់ការបោះឆ្នោតជាតិលើកទី៥ ឲ្យប្រព្រឹត្តទៅ ក្នុងបរិយាកាសសន្តិភាព សេរី ត្រឹមត្រូវ និងគ្មានអំពើហិង្សានយោបាយ។

-កងកម្លាំងនគរបាល កងរាជអាវុធហត្ថ កងកម្លាំងមានសមត្ថកិច្ចនានា និងអាជ្ញាធរ គ្រប់លំដាប់ថ្នាក់នៃខេត្តតាកែវ បានប្រឹងប្រែងថែរក្សាសន្តិសុខ សណ្តាប់ធ្នាប់សាធារណៈ ខិតខំបង្ការ ទប់ស្កាត់ បង្រ្កាបបទល្មើសនានាក្នុងទូទាំងខេត្ត ដោយប្រើប្រាស់វិធានការជំនាញ ដើរទន្ទឹមនឹងការចលនាមហាជន​ ដើម្បីអនុវត្តគោលនយោបាយឃុំ ភូមិមានសុវត្ថិភាព ជាហេតុ ធ្វើឲ្យបទល្មើសជាទូទៅក្នុងខេត្តតាកែវមានការថយចុះប្រមាណ២៨%​ បើ ប្រៀបធៀបទៅនឹង ឆ្នាំ២០១២។

-ឆ្នាំ២០១៣កន្លងមកនេះ ការដាំដំណាំស្រូវ និងការដាំដំណាំរួមផ្សំផ្សេងៗទូទាំងខេត្ត មានសន្ទុះកើនឡើងគួរឲ្យកត់សម្គាល់ ដែលជាការរួមចំណែកផ្តល់ប្រភពចំណូលដល់ប្រជា ពលរដ្ឋ និងការផ្គត់ផ្គង់តម្រូវការក្នុងស្រុក និងការនាំចេញ។

-អាជ្ញាធរខេត្តតាកែវបានខិតខំពង្រឹងពង្រីកកិច្ចសហប្រតិបត្តិការជាមួយខេត្ត ក្រុង សម្ព័ន្ធមេត្រីភាព ដៃគូអភិវឌ្ឍន៍ អង្គការអន្តរជាតិ សង្គមស៊ីវិល និងបណ្តាប្រទេសក្នុងតំបន់ ពិសេសបណ្តាខេត្តនៃប្រទេសវៀតណាមដែលជាប់ព្រំប្រទល់ជាមួយខេត្តតាកែវ ដើម្បីជំរុញ លើកកម្ពស់កិច្ចអភិវឌ្ឍលើគ្រប់វិស័យទូទាំងខេត្ត។

-ក្រៅពីសមិទ្ធផលខាងលើនេះ អាជ្ញាធរ មន្ទីរ អង្គភាពជំនាញ និងកងកម្លាំងមាន សមត្ថកិច្ចគ្រប់លំដាប់ថ្នាក់នៃខេត្តតាកែវ ក៏ខិតខំពុះពាររួមគ្នាជំរុញការងារគ្រប់វិស័យក្នុង ទូទាំងខេត្តឲ្យសម្រេចបានសមិទ្ធផលនានាជាច្រើនទៀត។

កិច្ចខិតខំប្រឹងប្រែង និងសមិទ្ធផលដែលខេត្តតាកែវសម្រេចបានខាងលើនេះ គឺពិត ជាបានរួមចំណែកយ៉ាងសំខាន់ក្នុងការពង្រឹងសន្តិភាព ស្ថិរភាពជាតិ សន្តិសុខ សណ្តាប់ធ្នាប់ សាធារណៈ និងការអភិវឌ្ឍសេដ្ឋកិច្ច សង្គម ជាហេតុធ្វើឲ្យកម្ពុជាយើងសម្រេចបានកំណើន សេដ្ឋកិច្ចប្រមាណ៧,៦% ក្នុងឆ្នាំ២០១៣កន្លងទៅនេះ។ ជាមួយនឹងការសម្រេចបានកំណើន សេដ្ឋកិច្ចខ្ពស់ក្នុងរយៈពេលមធ្យម បានធ្វើឲ្យអត្រាភាពក្រីក្រនៅកម្ពុជាធ្លាក់ចុះពីប្រមាណ ២៧% នាឆ្នាំ២០០៩ មកនៅត្រឹមប្រមាណ១៩% នៅឆ្នាំ២០១៣នេះ។

III-ទិសដៅជាយុទ្ធសាស្ត្រ
ដើម្បីបន្តថែរក្សាពង្រឹងពង្រីកសមិទ្ធផលនយោបាយ សមិទ្ធផលសង្គមលើគ្រប់វិស័យ ដែលប្រជាជាតិ និងប្រជាជនយើង ខិតខំរួមគ្នាសម្រេចបានយ៉ាងលំបាកលំបិនក្នុងរយៈពេល ជាង៣០ឆ្នាំកន្លងមក  សម្រាប់រយៈពេលបន្តទៀតយើងត្រូវខិតខំពុះពាររួមគ្នាសម្រេចឲ្យបាន នូវទិសដៅជាយុទ្ធសាស្រ្តចំនួន០៣គឺ៖

ទីមួយ.ត្រូវធ្វើការប្តេជ្ញាចិត្តរួមគ្នាដើម្បីធានាដល់ប្រក្រតីភាពនៃស្ថាប័នជាតិ រដ្ឋបាល សាធារណៈ និងដំណើរការនៃលទ្ធិប្រជាធិបតេយ្យសេរី ពហុបក្ស និងនីតិរដ្ឋនៅកម្ពុជា។

ទីពីរ.ត្រូវខិតខំរួមគ្នាបន្តថែរក្សាសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់ សាធារណៈ និងជំរុញការចូលរួមរបស់ប្រជាពលរដ្ឋ ជាពិសេសការចូលរួមអនុវត្តគោល នយោបាយភូមិ ឃុំមានសុវត្ថិភាព និងគោលនយោបាយនានារបស់រាជរដ្ឋាភិបាល។

ទីបី.ត្រូវខិតខំរួមគ្នាជំរុញកំណើនសេដ្ឋកិច្ច ការកាត់បន្ថយភាពក្រីក្រ ទប់ស្កាត់អតិផរណា ខិតខំប្រមូលចំណូល ត្បិតត្បៀតការចំណាយ ដោយខិតខំប្រើប្រាស់ចំណាយឲ្យចំគោលដៅ ជាអាទិភាពនានា និងជំរុញផលិតកម្មលើគ្រប់ផ្នែក គ្រប់វិស័យ។

IV-ទិសដៅការងារជាក់ស្តែង

-អំពីកំណែទម្រង់វិមជ្ឈការ និងវិសហមជ្ឈការ

–ពាក់ព័ន្ធនឹងកំណែទម្រង់វិមជ្ឈការ និងវិសហមជ្ឈការ ក្នុងរយៈពេល០៥ឆ្នាំខាងមុខនេះ ទិសដៅសំខាន់ជាអាទិភាព គឺត្រូវបន្តពង្រឹងរដ្ឋបាលគ្រប់ថ្នាក់នៅថ្នាក់ក្រោមជាតិ ទាំងស្ថាប័ន និងសមត្ថភាព ដើម្បីទទួលយកមុខងារ និងធនធានដែលនឹងត្រូវផ្ទេរ សំដៅឆ្លើយតបតម្រូវការ របស់មូលដ្ឋានឲ្យបានកាន់តែល្អប្រសើរ ឆាប់រហ័ស និងមានប្រសិទ្ធភាព។

–លើកកម្ពស់ការចូលរួមរបស់រដ្ឋបាលថ្នាក់ក្រោមជាតិឲ្យបានកាន់តែសកម្មថែមទៀត ក្នុងការអភិវឌ្ឍសេដ្ឋកិច្ច សង្គម និងការកាត់បន្ថយភាពក្រីក្ររបស់ប្រជាពលរដ្ឋ។

–បន្តរៀបចំផែនការអនុវត្តរយៈពេល០៣ឆ្នាំដំណាក់កាលទី២នៃកម្មវិធីជាតិរយៈពេល ១០ឆ្នាំសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។

-ទិសដៅការងារគ្រប់វិស័យក្នុងឆ្នាំ២០១៤
ឆ្នាំ២០១៤នេះគឺជាឆ្នាំទី១នៃការចាប់ផ្តើមអនុវត្តកម្មវិធីនយោបាយ និងយុទ្ធសាស្រ្ត ចតុកោណដំណាក់កាលទី៣របស់រាជរដ្ឋាភិបាលកម្ពុជា។ ហេតុនេះ ខ្ញុំសូមធ្វើការផ្តល់នូវ អនុសាសន៍លើកិច្ចការសំខាន់ៗ ដូចខាងក្រោម៖

មួយ.ត្រូវយកចិត្ដទុកដាក់អនុវត្ដការងារស្របតាមផែនការសកម្មភាព និងទិសដៅការងារ ដែលបានពិភាក្សា និងឯកភាពគ្នានៅក្នុងអង្គសន្និបាតនេះ។ ផែនការសកម្មភាព និងទិសដៅ ទាំងនេះត្រូវផ្អែកលើផែនការយុទ្ធសាស្ដ្រអភិវឌ្ឍន៍របស់ខេត្ត ផែនការយុទ្ធសាស្ដ្រតាមវិស័យ នៃក្រសួង ស្ថាប័ននីមួយៗ ដោយខិតខំតម្រង់ទិសការរៀបចំផែនការ និងការអនុវត្តឲ្យស្រប ជាមួយកម្មវិធីនយោបាយ និងយុទ្ធសាស្ដ្រចតុកោណដំណាក់កាលទី៣របស់រាជរដ្ឋាភិបាល កម្ពុជា ដើម្បីធ្វើសុខុដុមនីយកម្មរាល់សកម្មភាពការងារទាំងអស់ដែលត្រូវអនុវត្ដនៅក្នុងដែន សមត្ថកិច្ចរបស់ខេត្តតាកែវ។

ពីរ.បន្តលើកកម្ពស់ស្មារតីទទួលខុសត្រូវក្នុងការថែរក្សាសន្ដិសុខ សណ្ដាប់ធ្នាប់សង្គម ដោយខិតខំយកចិត្ដទុកដាក់បង្ការ ទប់ស្កាត់ និងបង្រ្កាបបទល្មើសឲ្យកាន់តែមានប្រសិទ្ធភាព ដើម្បីធ្វើឲ្យបទល្មើសបន្តថយចុះជាបន្ថែមទៀត។ ក្នុងនោះ ត្រូវយកចិត្តទុកដាក់លើកិច្ចការ សំខាន់ៗដូចខាងក្រោម៖

–លើកកម្ពស់វិធានការបង្ការ និងទប់ស្កាត់បទល្មើសជាកត្តាចម្បង និងគន្លឹះបំផុត។ ហេតុនេះ ត្រូវខិតខំជំរុញលើកកម្ពស់ការចូលរួមឲ្យបានកាន់តែសកម្មថែមទៀតក្នុងការអនុវត្ដ នូវគោលនយោបាយភូមិ ឃុំមានសុវត្ថិភាព។

–កងកម្លាំងមានសមត្ថកិច្ចគ្រប់លំដាប់ថ្នាក់ត្រូវលើកកម្ពស់ការគោរពវិន័យ ត្រូវមាន គុណធម៌ សីលធម៌ មនសិការវិជ្ជាជីវៈ និងភាពស្អាតស្អំនៅក្នុងការបំពេញតួនាទីរបស់ខ្លួន សំដៅបង្កើននូវជំនឿទុកចិត្ដ និងភាពកក់ក្ដៅដល់ប្រជាពលរដ្ឋ។

–ត្រូវបង្កើនការអប់រំប្រជាពលរដ្ឋឲ្យម្ចាស់ការក្នុងការការពារនូវគ្រោះថ្នាក់នានាក្នុងសង្គម ពិសេសគ្រោះថ្នាក់ចរាចរ អគ្គីភ័យ គ្រោះធម្មជាតិ ។​

–ក្នុងឆ្នាំ២០១៣ គ្រោះថ្នាក់ចរាចរនៅខេត្តតាកែវមានការកើនឡើងបើប្រៀបនឹងឆ្នាំ ២០១២។ ហេតុនេះ ត្រូវជំរុញការអប់រំ ផ្សព្វផ្សាយច្បាប់ចរាចរ ដើរទន្ទឹមនឹងការពង្រឹងការ អនុវត្ដច្បាប់ចរាចរឲ្យបានម៉ឺងម៉ាត់បំផុត។

–បន្តជំរុញការអភិវឌ្ឍហេដ្ឋារចនាសម្ព័ន្ធគមនាគមន៍ ការបន្តរៀបចំផ្លាកសញ្ញាចរាចរ និងការរៀបចំសណ្តាប់ធ្នាប់តាមដងផ្លូវនានាក្នុងទូទាំងខេត្ត ដើម្បីសម្រួលដល់ការធ្វើចរាចរ គ្រប់ប្រភេទ។

បី.នៅថ្ងៃទី១៨ ខែឧសភា ឆ្នាំ២០១៤ខាងមុខនេះ ប្រទេសយើងនឹងរៀបចំការបោះឆ្នោត ជ្រើសរើសក្រុមប្រឹក្សារាជធានី ក្រុមប្រឹក្សាខេត្ដ ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សា ខណ្ឌ អាណត្ដិទី២។

–ការងារជាអាទិភាពរបស់រាជរដ្ឋាភិបាល គឺត្រូវខិតខំរួមគ្នាដើម្បីការពារសន្តិសុខសម្រាប់ ការបោះឆ្នោត និងបង្កលក្ខណៈឲ្យគណបក្សនយោបាយ និងអ្នកនយោបាយនានាអាចអនុវត្ដ សិទ្ធិនយោបាយរបស់ខ្លួន ដើរទន្ទឹមនឹងការលើកកម្ពស់ការគោរពឲ្យបានត្រឹមត្រូវនូវច្បាប់ បោះឆ្នោត បទបញ្ជា និងនីតិវីធីនៃការបោះឆ្នោត ដើម្បីលើកកម្ពស់ដំណើរការលទ្ធិប្រជាធិបតេយ្យ និងនីតិរដ្ឋនៅកម្ពុជា។

–ចំពោះមុខនេះ ត្រូវជំរុញការផ្លាស់ប្ដូរសមាជិកក្រុមប្រឹក្សាឃុំ សង្កាត់ឲ្យបានទាន់ពេល វេលា និងការពិនិត្យឯកសារបញ្ជាក់អត្ដសញ្ញាណសម្រាប់ប្រើប្រាស់ក្នុងការបោះឆ្នោតរបស់ សមាជិកក្រុមប្រឹក្សាឃុំ សង្កាត់ម្នាក់ៗដែលជាអង្គបោះឆ្នោត។

បួន.ក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ បានដាក់ចេញនូវប្រកាសរួម ស្ដីពីការកំណត់អំពីប្រភេទសេវា កម្រៃ និងរយៈពេលនៃការផ្ដល់សេវាដោយរដ្ឋបាលថ្នាក់ ក្រោមជាតិ។

–រដ្ឋបាលគ្រប់ថ្នាក់នៃខេត្តតាកែវត្រូវធ្វើការផ្សព្វផ្សាយឲ្យបានទូលំទូលាយនូវតារាង កម្រៃសេវា រយៈពេលនៃការផ្ដល់សេវាដល់ប្រជាពលរដ្ឋ។

–បិទផ្សាយតារាងនេះនៅតាមក្ដារព័ត៌មាននៃសាលាខេត្ត ក្រុង ស្រុក ឃុំ សង្កាត់។

–ជំរុញលើកកម្ពស់ការចូលរួមពីសាធារណជន  រួមទាំងប្រព័ន្ធផ្សព្វផ្សាយនានាក្នុង ការងារនេះ ដើម្បីធានាឲ្យមានតម្លាភាព និងគណនេយ្យភាពក្នុងផ្ដល់សេវាជូនប្រជាពលរដ្ឋ។

–ត្រូវរួមគ្នាលុបបំបាត់ការយកកម្រៃសេវាមិនស្របច្បាប់នានា។

ប្រាំ.ត្រូវជំរុញលើកកម្ពស់ការផ្តល់សេវាសាធារណៈនានាជូនប្រជាពលរដ្ឋឲ្យកាន់តែ មានប្រសិទ្ធភាពថែមទៀត ពិសេសសេវាអប់រំ និងសុខាភិបាល ជាវិស័យដែលមានការ ពាក់ព័ន្ធ ផ្ទាល់ដល់ជីវភាពរស់នៅប្រចាំថ្ងៃរបស់ប្រជាពលរដ្ឋគ្រប់ៗរូប។

ប្រាំមួយ.បន្តខិតខំដោះស្រាយទំនាស់ដីធ្លីដែលនៅសេសសល់។

–ចំពោះមុខនេះត្រូវផ្តល់ អាទិភាពចំពោះដីធ្លីបង្កបង្កើនផលរបស់ប្រជាជន ដោយខិតខំ ប្រមូលផ្តុំកម្លាំងចុះដោះស្រាយឲ្យបានរួចរាល់មុនរដូវវស្សាឆ្នាំ២០១៤នេះ។

–ត្រូវបន្តរួមគ្នាខិតខំបង្ការ ទប់ស្កាត់ជម្លោះដីធ្លីនៅគ្រប់មូលដ្ឋាន។

–អាជ្ញាធរគ្រប់លំដាប់ថ្នាក់ត្រូវមានការប្រុងប្រយ័ត្ន និងមានការទទួលខុសត្រូវខ្ពស់ ដោយមិនត្រូវចុះហត្ថលេខា និងប្រថាប់ត្រាទទួលស្គាល់លើឯកសារណាមួយពាក់ព័ន្ធនឹងដីធ្លី ដែលពុំមានសាវតាច្បាស់លាស់ និងគ្មានអំណះអំណាងខាងផ្លូវច្បាប់គ្រប់គ្រាន់នោះឡើយ។

–ត្រូវចាត់វិធានការឲ្យបានម៉ឺងម៉ាត់បំផុតចំពោះសកម្មភាពទន្ទ្រានកាប់បំផ្លាញព្រៃឈើ ដើម្បីចាប់យកដីធ្លី បទល្មើសព្រៃឈើ បទល្មើសនេសាទ ការដាក់ប៉ុស្តិ៍ត្រួតពិនិត្យមិនស្រប ច្បាប់គ្រប់មូលដ្ឋានទូទាំងខេត្ត។

ប្រាំពីរ.ត្រូវបន្តជំរុញការរៀបចំសណ្តាប់ធ្នាប់ អនាម័យ សោភ័ណ្ឌភាពតាមទីក្រុង ទីប្រជុំជននានា ក្នុងនោះរួមមាន៖

–យកចិត្តទុកដាក់លើការរៀបចំប្លង់គោលអភិវឌ្ឍន៍ទីក្រុង ទីប្រជុំជន។

–ការគ្រប់គ្រងការសាងសង់សំណង់នានា។

–ការគ្រប់គ្រងកាកសំណល់រឹង រាវ។

–ការរៀបចំសណ្តាប់ធ្នាប់តាមទីផ្សារលក់ដូរ និងត្រូវលុបបំបាត់ការទារកម្រៃផ្សេងៗ ក្រៅពីសៀវភៅបន្ទុកដែលបានកំណត់។

–ចំពោះក្រុងដូនកែវដែលជាទីប្រជុំជនខេត្ត ត្រូវខិតខំថែមទៀតក្នុងការរៀបចំអនាម័យ សោភ័ណ្ឌភាព សណ្តាប់ធ្នាប់ ចំណតយានយន្តគ្រប់ប្រភេទ ការលក់ដូរ បរិស្ថាន ការដាំដើម ឈើ ការរៀបចំសួនច្បារ…។ល។

ប្រាំបី.ដើម្បីអនុវត្តសម្រេចនូវទិសដៅ ភារកិច្ចខាងលើ​​ បញ្ហាសំខាន់ជាគន្លឹះគឺថ្នាក់ ដឹកនាំគ្រប់លំដាប់ថ្នាក់ទូទាំងខេត្តតាកែវត្រូវពង្រឹងស្មារតីសាមគ្គីភាព ឯកភាពឲ្យបានល្អលើ មូលដ្ឋាននៃការលើកកម្ពស់ប្រសិទ្ធភាពការងារ ការគោរពច្បាប់ គោរពវិន័យ គោរពបទបញ្ជា ផ្ទៃក្នុង គោរពគោលការណ៍នានារបស់រដ្ឋ និងពង្រឹងរបៀបរបបធ្វើការ ដើម្បីធ្វើជាគំរូដល់មន្រ្តី រាជការជាទូទៅក្នុងការលើកកម្ពស់ការទទួលខុសត្រូវ និងភាពជាម្ចាស់ក្នុងការបំពេញតួនាទី ភារកិច្ចរបស់ខ្លួនប្រកបដោយប្រសិទ្ធភាព។

មុននឹងបពា្ចប់ ជាថ្មីម្ដងទៀតក្នុងនាមរាជរដ្ឋាភិបាលកម្ពុជា ក្រសួងមហាផ្ទៃ និងក្នុង នាមខ្លួនខ្ញុំផ្ទាល់ ខ្ញុំសូមថ្លែងនូវការកោតសរសើរដោយស្មោះ និងវាយតម្លៃខ្ពស់ចំពោះ ឯកឧត្ដម លោកជំទាវ លោកស្រី អស់លោកទាំងអស់ ដែលបានប្រឹងប្រែងយកអស់កម្លាំង កាយ ប្រាជ្ញាស្មារតី រួមគ្នាសម្រេចបាននូវសមិទ្ធផលជាច្រើននាពេលកន្លងមក និងសូម ប្រសិទ្ធពរជ័យជូនឯកឧត្ដម លោកជំទាវ លោកស្រី អស់លោកទាំងអស់ សូមទទួលបាន នូវសុខភាពល្អ និងជោគជ័យថ្មីៗបន្ថែមទៀត និងសូមប្រកាសបិទសន្និបាតបូកសរុបលទ្ធផល ការងាររបស់ក្រុមប្រឹក្សាខេត្តតាកែវអាណត្ដិទី១(ឆ្នាំ២០០៩~២០១៤)  និងការបូកសរុបលទ្ធផល ការងារឆ្នាំ២០១៣ និងលើកទិសដៅការងារឆ្នាំ២០១៤របស់រដ្ឋបាលខេត្តតាកែវក្នុងឱកាសនេះ។

                                                                                                សូមអរគុណ !