Tuesday, May 05, 2015

សម្តេចតេជោ ផ្ញើរសារទៅ ឯកឧត្តម សម រង្ស៊ី ឲ្យបំភ្លឺអំពីពាក្យ​សំដី​ដែលបាន​និយាយ​ក្នុង​វីដេ​អូឃ្លីប​ថា ​«ចង់ចាប់​ចោរ ​ត្រូវទៅ​កៀក​ចោរសិន»


នៅថ្ងៃទី​ ៥ ខែឧសភា​ ឆ្នាំ២០១៥នេះ ​គេហទំព័រ Fresh News ​បានចុះផ្សាយសារ ​(SMS)​ របស់ ​សម្តេចតេជោ ​ហ៊ុន សែន​ ដែលបាន​ផ្ញើរទៅកាន់​ ឯកឧត្តម​ សម រង្ស៊ី ​ដោយបាន​ស្នើឲ្យ​ឯកឧត្តម​ សម​ រង្ស៊ី ​ពន្យល់ពី​អ្វីដែល​ឯកឧត្តម​ បាននិយាយ​នៅក្នុងវីដេអូ ​ឃ្លីប រយៈ​ពេល ​2 នាទី ​និង 47 វិនាទី​ ដោយបាន​លើកឡើង​ថា ​«បើចង់ចាប់​ចោរ​ ត្រូវចូល​កៀកចោរ​សិន»​។
នៅក្នុង​វីដេអូឃ្លីប​ដដែលនេះ ​ឯកឧត្តម​ សម​ រង្ស៊ី ​បានថ្លែង​ក្នុងន័យ​នយោបាយ​ ដោយវាយ​ប្រហារ​មកលើ ​សម្ដេចតេជោ​ ហ៊ុន សែន​ ដែលធ្វើឲ្យ​សម្ដេចយល់ថា​ គណបក្ស​សង្គ្រោះជាតិ​ កំពុងប្រើ​ល្បិច​ទុច្ចរិត​ ក្នុងការ​អនុវត្ត​វប្បធម៌​សន្ទនា ​រវាង​គណបក្ស​ប្រជាជន​ ដែលមាន​រូបសម្តេច​ជាតំណាង​ និង​ខាង​គណបក្ស​សង្គ្រោះជាតិ​ដែលមាន​ ឯកឧត្តម​ សម​ រង្ស៊ី​ ជាសមភាគី​។
ខាងក្រោម​នេះជាសារ​ដែល​សម្ដេច​តេជោ ​ហ៊ុន​ សែន​ បាន​សរសេរ​ផ្ញើតាម​ SMS ទៅកាន់​ឯកឧត្តម ​សម​ រង្ស៊ី​ ដើម្បី​សុំឲ្យមាន​ការបំភ្លឺ ​ឲ្យបាន​ច្បាស់ ​ពាក់ព័ន្ធ​ទៅនឹង​ខ្លឹមសារ​នៅក្នុង​ឃ្លីបវីដេអូ​ខាងលើ ​ដែលខ្លឹមសារ​មានន័យថា ​«នេះជាវប្បធម៌​សន្ទនា ​ដែល​ឯ.ឧ​ ចង់បាន​។​ ចង់បាន​ការបំភ្លឺ​ពីឯ.ឧ!​ ខ្ញុំមិនអាច​ទទួលយក ​ការបកស្រាយ​របៀបនេះ​បានទេ​ ខ្ញុំត្រូវ​ចាប់មេ​ចោរពិត​ នឹង​កូនចោរពិត​ ដែល​កំពុង​មានសំណុំ​រឿង​នៅតុលាការ​, សុំឯ.ឧ​ កុំពឹងពាក់​ដៃចោរ ​លើកលែង​ទោសឲ្យ​កូនចៅ ​ឯ.ឧ ​ទៀត​។​ សូមប្រាប់​ កឹម សុខា​ផង​ បើប៉ះ​ពាល់​ម្ដង​ទៀត ​CPP នឹង​បោះឆ្នោត​ទម្លាក់​ហើយ»
ថ្មីៗនេះ​បន្ទាប់​ពីមានការ​ជំរុញរបស់​ ប្រមុខរាជ​រដ្ឋាភិបាល​កម្ពុជា ​សម្តេចតេជោ ​ឲ្យគណបក្ស​សង្គ្រោះជាតិ​ គោរព​តាមគោល​ការណ៍ ​នៃ​វប្បធម៌​សន្ទនា ​ឲ្យបានត្រឹមត្រូវ ​ជៀសវាង​ ម្នាក់ដើរតួ​ជាអ្នក​ចាប់ដៃ ​ដែលសំដៅ​ទៅលើ ​ឯកឧត្តម​ សម​ រង្ស៊ី ​និង​ម្នាក់ទៀត​ដើរតួ​ជាអ្នក​ជាន់ជើង​ ដែល​សំដៅ​ទៅលើ ​ឯកឧត្តម​ កឹម​ សុខា ​គេឃើញថា​ ដើម្បី​ឆ្លើយតប​និង​ការជំរុញ​របស់​សម្តេច​ខាងលើ ​គណបក្ស​សង្គ្រោះជាតិ​ បាន​ប្រកាស​ប្រកាន់​ជំហរ​ រក្សា​វប្បធម៌​សន្ទនា​ ដើម្បី​បង្រួម​បង្រួមជាតិ​ និង​ធ្វើការ​អភិវឌ្ឍន៍​ប្រទេសនេះ​ឲ្យរីកចំរើន​ដូច​ប្រទេស​ជិតខាង​។​
ផ្ទុយស្រឡះ​ពីការ​ប្រកាស​ជំហរ​របស់​ថ្នាក់ដឹកនាំ​ និង​មន្ត្រី​របស់​គណបក្ស​សង្គ្រោះជាតិ​ ដែលបាន​លើក​ឡើងថា ​ខ្លូន​ប្រកាន់​យកជំហរ​ រក្សា​វប្បធម៌​សន្ទនា ​ដើម្បី​ភាពរីក​ចំរើន​នៃ​ប្រទេស​ជាតិ​ គឺ​វីដេអូឃ្លីប​វាយ​ប្រហារ​ទៅលើ​សម្ដេច​តេជោ ​ត្រូវបាន​គេបង្ហោះ​តាម​ប្រព័ន្ធ​ផ្សព្វផ្សាយ​សង្គមថ្មី​ ដែល​ក្នុងវីដេអូឃ្លីប​នេះ ​គឺជា​សម្តីវាយ​ប្រហារ​ខ្លាំងៗ​របស់ ​ឯកឧត្តម​ សម​ រង្ស៊ី​ សំដៅ​មក​លើ​សម្តេច ​ហ៊ុន​ សែន៕
អត្ថបទ៖ ច័ន្ទ ទេវី

ព្រះរាជពិធី​បុណ្យច្រត់ព្រះនង្គ័លឆ្នាំនេះ​ ប្រារព្ធធ្វើ​នៅលើទឹក​ដីខេត្តបាត់ដំបង​ ដែលជាខេត្ត​ សំបូរស្រូវជាង​គេនៅក្នុង​ប្រទេសកម្ពុជា​


បន្ទាប់​ពី​ព្រះរាជ​ពិធី ច្រត់ព្រះនង្គ័ល​បាន​ប្រារព្ធ​ធ្វើ​ឡើងនៅ​​ខេត្តកំពង់ចាម និង​នៅ​ក្រុង​តាខ្មៅ២ឆ្នាំ ​ជាប់​គ្នា​កន្លងទៅ មិនមាន​ការផ្សាយ​ផ្ទាល់​តាម​កញ្ចក់​ទូរទស្សន៍​ជាតិ​កម្ពុជានោះ ​ព្រះ​រាជ​​​ពិធី​ដែល​ត្រូវ​រៀបចំឡើង​ឆ្នាំ​ទី៣ ដែល​នឹង​ប្រារព្ធ​ធ្វើ​នៅ​ខេត្តបាត់ដំបង ​សម្រាប់​ឆ្នាំ​នេះ ទូរទស្សន៍​ជាតិកម្ពុជា ​នឹង​ផ្សាយ​ផ្ទាល់​ព្រឹត្តិការណ៍​នេះ​ ពី​ទីវាល​ព្រះ​ស្រែ ដែល​ត្រូវ​រៀប​ចំ​នៅលើ​ទីលាន​បាល់ទាត់​ក្នុងខេត្តបាត់​ដំ​បង។ នេះ​បើយោង​តាម​ការបង្ហោះ​ខ្លឹម​សារ​របស់​​ឯកឧត្តម កឹម គុណ​វឌ្ឍន៍ អគ្គនាយក​ នៃ​ទូរទស្សន៍​ជាតិកម្ពុជា​ ដែលបាន​ឲ្យ​ដឹងថា ក្រុម​​​ការងារ​របស់​លោក នឹង​ត្រូវ​ដឹកនាំ​ការ​ផ្សាយ​ផ្ទាល់​នេះ ​។
ឯកឧត្តម កឹម គុណ​វឌ្ឍន៍​ បានបញ្ជាក់​យ៉ាង​ដូច្នេះ​ថា៖«យើង​បំរើ​សំណូមពរ​ប្រជាពលរដ្ឋ និង​ដោយមាន​ការណែនាំឲ្យ​​អនុវត្ត​ពី​ក្រសួងព័ត៌មាន និង​ពី​គណ:ក​ម្មា​ធិ​ការរៀបចំ​បុណ្យ​ជាតិ អន្តរជាតិ។ ការផ្សាយ​ផ្ទាល់​នេះ ធ្វើតាម​បណ្តាញ​កាប​អុ​ប​ទិច​ពីខេត្ត ​បាត់ដំបង មក​ភ្នំពេញ»
ឯកឧត្តម កឹម គុណ​វឌ្ឍន៍​ ក៏បាន​ឲ្យ​ដឹង​ផង​ដែរថា ក្រុមការងារទូរទស្សន៍​ជាតិកម្ពុជា មាន​គ្នាចំ​នួន​៣៥នាក់ នឹង​​ត្រូវ​ចេញដំណើរ​ទៅ​ខេត្តបាត់ដំបង​នៅ​ថ្ងៃទី៤ ខែ​ឧសភា​ ដើម្បី​ត្រៀម​រៀបចំ​ការផ្សាយ​ផ្ទាល់ «ព្រះ​រាជពិធី​ច្រត់ព្រះនង្គ័ល» ដែល​នឹង​ប្រព្រឹត្តិ​ទៅ​ក្រោម​ព្រះរាជា​ធិបតីភាព​ដ៏​ខ្ពង់​ខ្ពស់​បំ​ផុត នៃ​ព្រះមហាក្សត្រ ព្រះបាទសម្តេច ព្រះបរមនាថ នរោត្តម សីហមុនី។
ព្រះ​រាជពិធី​ច្រត់ព្រះនង្គ័ល ត្រូវបាន​ប្រារព្ធ​ឡើង​ជារៀងរាល់​ឆ្នាំ ​ដើម្បី​សម្គាល់​អំ​ពី​រដូវ​ចាប់​ផ្តើម​ធ្វើស្រែ​​ចម្ការ​រប​ស់​ប្រជាកសិករ​ខ្មែរ ។ ​ពីធី​ច្រត់​ព្រះ​នង្គ័ល​នេះ បើ​យោង​លើ​ការពន្យល់​បកស្រាយ​របស់​សម្តេច​ព្រះ​មហាសង្ឃរាជ​ជោតិ​ញាណោ ជួត ណាត បាន​បញ្ជាក់​ថា ជា​ឈ្មោះ​ នៃ​មង្គល​ពិសេសមួយ​ រាប់​បញ្ចូល​ក្នុង​មង្គល​ទ្វាទសមាស ដែល​ជា​មង្គល​ចម្រើន​ការ​សាប​ព្រោះ បណ្តុះដាំក្នុងរដូវ​ភ្លៀង។ មង្គល​នេះ កំ​ណត់​ធ្វើ​នៅ​ថ្ងៃ​៤រោជ ខែពិសាខ រៀង​រាល់​ឆ្នាំ​។ ក្នុង​គម្ពី​របាលី​ ហៅ​ថា វប្បមង្គល​  « មង្គល​សាប​ព្រោះ​ បណ្តុះ​ដាំ​ »៕



សេចក្តីថ្លែងការណ៍ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្នុង​មិទ្ទីញ​អបអរ​ខួបលើកទី​១៥២ ទិវា​ពិភពលោក​កាកបាទក្រហម​ និងអឌ្ឍ​ចន្ទក្រហម ៨ ឧសភា






រដ្ឋ​មន្ត្រីពីររូប​ ចូលឆ្លើយ​បំភ្លឺជា​បន្តបន្ទាប់នៅ​គណៈ​កម្មការរដ្ឋសភា​ ពាក់ព័ន្ធ​នឹង​បញ្ហា​ទំនាស់​ដីធ្លី ​និង​ការធ្វើ​អាជីវកម្ម​ខ្សាច់​


រដ្ឋមន្ត្រី​ពី​ររូប​ គឺ​ រដ្ឋមន្ត្រី​ក្រសួង​បរិស្ថាន​ និង​រដ្ឋមន្ត្រី​ក្រសួង​រ៉ែ និង​ថាម​ពល​ ប្រកាសចូលខ្លួន​​បំ​ភ្លឺ​ពាក់​ព័ន្ធនឹង​បញ្ហា​ទំ​នាស់​ដី​ធ្លី​ និង​ការ​ធ្វើ​អាជី​វកម្មខ្សាច់  ដែល​នៅរសៀល​ថ្ងៃ​ទី​៥  ខែ​ឧសភា ឆ្នាំ​២០១៥​នេះ ឯកឧត្តម សាយ សំ​អាល់ រដ្ឋមន្ត្រីក្រសួង​បរិស្ថាន​ ចូលទៅ​បំភ្លឺ​ករណី​ដោះស្រាយ​ទំនាស់​ដីធ្លី​ នៅក្នុង​ខេត្តកោះកុង ​រវាង​ពលរដ្ឋ និង​ក្រុមហ៊ុន​ចិន Union development Group នៅ​ចំពោះមុខ​គណៈកម្មការ​សិទ្ធិមនុស្ស​នៃ​រដ្ឋសភា។​

ការចូលខ្លួន​បំភ្លឺនេះ ​ធ្វើឡើង​តាម​ការកោះអញ្ជើញ​របស់​ឯកឧត្តម អេង ឆៃអ៊ាង ប្រធាន​គណៈកម្មការ​ទីមួយ​នៃ​ រដ្ឋ​សភា​ ដែលឯកឧត្តម អេង ឆៃអ៊ាង បាន​ឲ្យ​ដឹង​ថា លោក​ចង់ដឹង​អំពី​ការវិវត្ត​នៃ​ការដោះស្រាយ​ទំនាស់​ដីធ្លី​ក្នុងករណីនេះ ខណៈ​លោក​សង្កេតឃើញថា វា​ហាក់​មាន​ភាពស្ងាត់ស្ងៀម។

ប្រធាន​គណៈកម្មការ​សិទ្ធិមនុស្ស ដែល​មកពី​គណបក្ស​សង្គ្រោះ​ជាតិរូប​នេះ ​បាន​ថ្លែង​យ៉ាង​ដូច្នេះ​ថា៖«ខ្ញុំ​ធ្លាប់បាន ​ជួបពិភាក្សា​ជាមួយ​លោក​អភិបាលខេត្ត និង​លោក​រដ្ឋមន្ត្រី​រួចហើយ លើ​ករណីនេះ ប៉ុន្តែ​ហាក់ដូចជា​គ្មានអ្វី​ទៅមុខ។ ផ្ទុយទៅវិញ ខ្ញុំ​មានតែ​ទទួល​ព័ត៌មាន​ដែលថា ក្រុមហ៊ុន​នៅតែ​បន្ត​ឈូសឆាយដី​ប្រជាជន បើទោះជា​មាន​អនុ​ក្រឹ​តរបស់រាជ​រដ្ឋាភិបាល​បញ្ជា​ឲ្យ​ផ្អាក​ការ​ឈូសឆាយ​ ក៏ដោយ»

ក្រុមហ៊ុន Union Development Group បានទទួល​សិទ្ធិ​វិនិយោគ​ពី​រដ្ឋាភិបាល​លើ​ផ្ទៃដី​ជាង៤ម៉ឺន​ហិច​តា ដែល​ឯកឧត្តម អេង ឆៃអ៊ាង អះអាង​ថា វា​បាន​ចូលក្នុង​ផ្ទៃដី​នៃ​ឧទ្យាន​ជាតិ​បុ​ទុម​សាគរ​ទៀតផង ហើយ​ថា រហូតដល់​ពេលនេះ ក្រុមហ៊ុន​បាន​កសាង​ផ្លូវ​មួយ សណ្ឋាគារ និង​កន្លែង​លេង Golf

ឯកឧត្តម អេង ឆៃអ៊ាង បាន​អះ​អាង​ថា  មានប្រជាជន​ជាង៣០០គ្រួសារ​ដែល​មិន​ព្រម​ទទួល​សំណង និង​ចង់​ឲ្យ​ក្រុមហ៊ុន​ឆ្វៀល​ដី​ឲ្យ​ពួកគេ ក៏​ក្រុមហ៊ុន​មិនបាន​ធ្វើ» ហើយ​ឯកឧត្តម អេង ឆៃអ៊ាង ដោយ​បន្ថែមថា លោក​បានទទួល​ព័ត៌មាន​នានា​ដែលថា មាន​ភាពអយុត្តិធម៌​ខ្លាំង​នៅក្នុង​ការដោះស្រាយ​សំណង​ដល់​ពលរដ្ឋ​ម្ចាស់​ដី​ ដែល​ព្រម​ទទួល​សំណង។
ចំ​ណែក​រដ្ឋមន្ត្រី​មួយ​រូប​ទៀត គឺឯកឧត្តម ​ស៊ុយ សែម រដ្ឋមន្ត្រី​ក្រសួង​រ៉ែ​ និង​ថាម​ពល​ នឹង​ឆ្លើយតប​ពី​ការដេញថ្លៃ​ធ្វើ​អាជីវកម្ម​ខ្សាច់​នៅ​ថ្ងៃទី១២ ខែ​ឧសភា ឆ្នាំ​២០១៥ ខាង​មុខ។
តាម​ព័ត៌មានបាន​ឲ្យដឹង​ថា រដ្ឋមន្ត្រីក្រសួង​រ៉ែ និង​ថាមពលរូប​នេះ  នឹង​ជួបប្រជុំ​ជាមួយក្រុម​​អាជីវករ​ខ្សាច់​ម្តងទៀត នៅ​ថ្ងៃទី១២ ខែឧសភា ដើម្បី​ពិភាក្សា​អំ​ពី​បញ្ហា​ពាក់​ព័ន្ធ​។
 
យោងតាម​សេចក្តីប្រកាស​ព័ត៌មាន​របស់​ក្រសួង​រ៉ែ និង​ថាមពល ជំនួប​ប្រជុំ​នេះ នឹង​ឆ្លើយតប​ទៅកាន់​អាជីវករ ជុំវិញ​ការដាក់​ដេញថ្លៃ​ធ្វើ​អាជីវកម្ម​ខ្សាច់​ចំនួន៤ឡូត៍ នៅ​តំបន់​ប្រឡាយ​ស្តៅ-តា​ឯក ដែល​ស្ថិតនៅក្នុង​ស្រុក​កងមាស ខេត្តកំពង់ចាម និង​ស្រុក​មុខកំពូល ស្រុក​ខ្សាច់កណ្តាល ខេត្តកណ្តាល។

សូមបញ្ជាក់ថា​ កាលពីដើម​ខែមេសា ក្រសួង​រ៉ែ និង​ថាមពល និង​ក្រុម​អា​ជីវ​ករ​ដែលមាន​អាជ្ញាប័ណ្ណ​ធ្វើ​អាជីវកម្ម​ខ្សាច់​នៅ​ភ្នំពេញ និង​ខេត្តកណ្តាល បាន​ឯកភាពគ្នា​ផ្អាក​ការធ្វើ​អាជីវកម្ម​រយៈពេល៣ទៅ៦ខែ។ ការផ្អាក​នេះ គឺ​ដើម្បី​ទុកពេល​ឲ្យ​ក្រសួង​ធ្វើការ​សិក្សា​ពី​ផលប៉ះពាល់​នានា មុននឹង​សម្រេច​ឲ្យ​ដំណើរការ​អាជីវកម្ម​ឡើងវិញ។

ការសម្រេច​ផ្អាក​នេះ បានធ្វើ​ឲ្យ​បរិមាណ​ផ្គត់ផ្គង់​ខ្សាច់​នៅលើ​ទីផ្សារ​ថយចុះ ធ្វើ​ឲ្យ​តម្លៃ​ខ្សាច់​ហក់​ឡើង​គួរ​ឲ្យ​កត់សម្គាល់។ ដូច្នេះ ដើម្បី​រក្សា​តម្លៃ​ខ្សាច់​នៅលើ​ទីផ្សារ ក្រសួង​បានប្រកាស​ដាក់​ដេញថ្លៃ​ជា​សាធារណៈ​ជ្រើសរើស​ក្រុមហ៊ុន ​ក្នុង​ និង​ក្រៅ​ស្រុក ដើម្បី​ធ្វើ​អាជីវកម្ម​ខ្សាច់ និងឲ្យដំណើរការ​ដេញថ្លៃ​នេះ នឹង​ប្រព្រឹត្តិ​ទៅ​នៅថ្ងៃទី២៩ខែឧសភា​ខាងមុខ ប៉ុន្តែ រាល់​ការ​ធ្វើ​អាជី​វកម្ម​បូម​ខ្សាច់​នេះ គឺ​ឲ្យ​ធ្វើ​ចរាចរណ៍​សម្រាប់តែ​ការ​ផ្គត់​ផ្គង់​ក្នុង​ស្រុក​តែ​ប៉ុណ្ណោះ  គឺ​មិន​អនុញ្ញាតិ​ឲ្យ​មាន​ការ​នាំ​ខ្សាច់​ចេញ​យក​ទៅ​លក់​នៅ​ឯក្រៅ​ប្រទេស​ឡើយ៕

មិទ្ទិញ​ខួបទី ១៥២ ទិវា​ពិភព​​លោក​កាក​​បាទ​ក្រហម អឌ្ឍចន្ទ​ក្រហម ខេត្ត​តាកែវ ប្រមូល​ថ​វិកា​​បាន​ចំនួន​ប្រមាណ​​ជិត ៤៤ម៉ឺន​ ដុល្លារ​​អាមេរិក


មិទ្ទិញ​អប​អរ​ខួប​ទី​១៥២ ទិវា​ពិភពលោក​កាក​បាទ​ក្រហម អឌ្ឍចន្ទ​ក្រហម ថ្ងៃ​ទី០៨ ខែ​ឧស​ភា ឆ្នាំ​២០១៥ ក្រោម​ប្រធានបទ “កម្លាំង​មនុស្សធម៌ : គោលការណ៍​គ្រឹះ​ក្នុងសកម្ម​ភាព” ដែល​បាន​ប្រារព្ធ​​ធ្វើនៅ​សួន​ច្បារ​មុខ​សាល​មហា​ស្រប ខេត្ត​តាកែវ ថ្ងៃ​ទី​០៥ ខែ​ឧសភា ឆ្នាំ​២០១៥ នេះ ប្រមូល​ប្រាក់​វិភាគទាន​បាន​ចំនួនជិត ៤៤ ម៉ឺន​ដុល្លារអាមេរិក។

ទិវានក្ខត្ថឬក្សថ្ងៃនេះ ធ្វើ​ឡើងក្រោម​អធិបតី​ភាព​ដ៏​ខ្ពង់​ខ្ពស់ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ដ្រី រដ្ឋមន្ដ្រីទទួល​បន្ទុកទីស្ដី​ការ​គណៈ​រដ្ឋ​មន្ដ្រី និង​លោក​ជំទាវ និង​មាន​ការ​ចូលរួម​ពី​មន្ដ្រី​អ្នក​មុខ​អ្នក​ការមក​ពី​ស្ថាប័ន​រដ្ឋ​សភា ព្រឹទ្ធ​សភា សមាជិក​រាជ​រដ្ឋាភិបាល​ អ្នក​ជំនួញ ដៃ​គូ​អភិវឌ្ឍន៍ ប្រជាពលរដ្ឋ សិស្ស និស្សិត យ៉ាង​ច្រើន​កុះ​ករ។

លោក ​ជំទាវ នូ សុវណ្ណនី អភិបាល​រង​ខេត្ត និង​ជាប្រធាន​គណៈកម្មាធិការកាក​បាទ​ក្រហម​កម្ពុជា ខេត្ត​តាកែវ បានអាន​នូវ​របាយការណ៍​បូក​សរុប​ពី​សកម្ម​ភាពនៃ​ការ​ងារ​មនុស្ស​ធម៌​ក្នុង​ ការ​ចុះ​ជួយ​ស​ម្រួល​ដោះ​ស្រាយដល់​ប្រជាពលរដ្ឋ​ ផ្ទុក​មេរោគអេដស៍ ជម្ងឺ​អេដស៍ ជន​ពិការ កុមារកំព្រា ​ស្ដ្រី​មេ​ម៉ា​យ និង​ចាស់​ជរាគ្មាន​ទីពឹង និង​​បាន​ជួយ​សង្រ្គោះ​​បន្ទាន់​ ដូច​ជា ខ្យល់​ព្យុះ គ្រោះ​មហន្ដរាយ អគ្គិភ័យ រន្ទៈ​បា​ញ់ លង់​ទឹក ការ​សង់​ផ្ទះ និង​បូមទឹក​ជួយ​សង្រ្គោះ​ស្រូវ​ជូ​ន​ប្រជាពលរដ្ឋ។​ សាខា​កាកបាទ​ក្រហម​កម្ពុជា ខេត្ត​តាកែវ មាន​អ្នក​ស្ម័គ្រ​ចិត្ត​ចំនួន ៨០៥នាក់ ស្រី ៤៨៨នាក់ នៅ​គ្រប់​សាខា អនុសាខា ក្នុង ៣៧១​ភូមិ លើ ១១១៩ភូមិ។ ក្រៅ​ពី​នេះ សាខា​ ក៏​បាន​កសាង​យុវជនកាក​បាទ​ក្រហម​កម្ពុជាបាន​ចំនួន ៤០០៥នាក់ ស្រី ២៣៦៣នាក់ ទីប្រឹក្សា​យុវជន​ចំនួន ១០៨នាក់ ស្រី ៥៤នាក់ ទៅតាម​វិទ្យាល័យ​ចំនួន​ ៤៦សាលា។

ឯកឧត្តម ឡាយ វណ្ណៈ ប្រធាន​កិត្តិយសកាកបាទ​ក្រហម​កម្ពុជា ខេត្ត​តាកែវ បាន​ឡើង​អាន​សេចក្ដី​ថ្លែងការណ៍របស់សម្ដេច​កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាក​បាទ​ក្រហម​​កម្ពុជា ក្នុង​មិទ្ទិញ​ខួប​ទី១៥២ ដោយ​ជម្រាប​ឲ្យ​ដឹងថា ឆ្នាំ​នេះ ចលនា​អន្ដរ​ជាតិ​កាកបាទ​ក្រ​ហ​ម អឌ្ឍចន្ទ​ក្រហម បាន​ដាក់​ចេញ​នូវ​ប្រធានបទ “កម្លាំង​មនុស្សធម៌ : គោល​ការ​ណ៍​គ្រឹះ​ក្នុង​សកម្ម​ភាព” ​ គឺ​មាន​បំណង​គូស​បញ្ជាក់​នូវ​ភាព​សម​ស្រប​​នៃ​គោល​ការណ៍​គ្រឹះ​ដែល​នៅ​បន្ដ​ ជា​និរន្ដ នៅ​ក្នុង​សេវា​​កម្ម​មនុស្ស​ធម៌ និង​ជាមគ្គទ្ទេសដ៏​សំខាន់​ ក្នុង​ការ​បំពេញ​ការ​ងារ​របស់​ខ្លួន។

ជាង ​នេះ​ទៅទៀត ស្ថិត​ក្នុង​ការ​អនុវត្តវិស័យ​ស្នូល​​ទាំង ៤ នៃ​យុទ្ធ​សាស្ដ្រ២០១១-២០២០ របស់​កាក​បាទ​ក្រហមកម្ពុជា បាន​ និ​ង​កំពុង​បម្រើនូវ​សកម្ម​ភាព​មនុស្ស​ធម៌ដោយ​ប្រកាន់​ខ្ជាប់​ខ្ជួន​នូវ​គោល ​ការណ៍​គ្រឹះ​ទាំង ៧ របស់​ចលនា​អន្ដរជាតិ​កាកបាទក្រហម អឌ្ឍ​ចន្ទ​ក្រហម គឺ​ក្នុង​ភាព​ជា​មនុស្ស​ធម៌ ភាព​គ្មាន​លំអៀង អព្យាក្រឹត​ភាព ឯករាជ្យភាព សេវា​កម្ម​ស្ម័គ្រ​ចិត្ត ឯកភាព និង​សកល​ភាព។

ឯកឧត្តម ​បណ្ឌិត​សភាចារ្យ ឧបនាយករដ្ឋមន្ដ្រី​ សុខ អាន បាន​មាន​ប្រសាសន៍ថា ចលនា​របស់​កាក​បាទ​ក្រហម​កម្ពុជា គឺ​ជា​ការ​ចូល​រួម​ពង្រឹង​វិស័យ​ស្នូល​ ដ៏​មាន​សារៈ​សំខាន់​ក្នុង​វប្បធម៌​ចែក​រំលែក និង​ការ​ជួយ​សង្រ្គោះ​គ្នា​ទៅវិញ​ទៅមក​ដូច​ជា​ គ្រោះ​មហ​ន្ដរាយ ទឹក​ជំនន់ ខ្យល់​ព្យុះ​ជាដើម។ល។ ដែល​សកម្ម​ភាព​មនុស្ស​ធម៌​ទាំង​នេះ គឺ​ជា​ការ​ចូល​រួម​ចំណែក​ក្នុង​ការ​លើក​កម្ពស់​ជីវភាព និង​សុខមាលភាព​របស់​ប្រជាពលរដ្ឋ​ និង​ជា​ការ​ចូល​រួម​ចំណែក​មួយ​យ៉ាង​សំខាន់​ក្នុង​ការ​កាត់​បន្ថយភាព​ក្រីក្រ ​ជូន​ប្រជាពលរដ្ឋ​។

ឯកឧត្តម ​ឧបនាយករដ្ឋមន្ដ្រី បានមាន​ប្រសាសន៍សង្កត់​ធ្ងន់​ថា សកម្ម​ភាព​របស់​កាក​បាទ​ក្រហមកម្ពុជានឹង​សម្រេចជោគជ័យ​ក្នុង​ប្រតិបត្តិការ​ របស់ខ្លួន​ជា​បន្ដ​​បន្ទាប់ គឺ​ត្រូវ​តែពង្រឹង​ការ​យក​ចិត្ត​ទុក​ដាក់​ខ្ពស់បន្ថែម​ទៀត នៅ​ពេល​ប្រជាពលរដ្ឋ​ជួប​ការ​លំបាក ដោយ​បាន​ជំរុញ​ឲ្យ​សាខា​កាក​បាទ​ក្រហម​កម្ពុជា​ ខេត្ត​តាកែវ ត្រូវ​កសាង​កាក​បាទ​ក្រហម​ឲ្យ​បាន​រឹង​មាំ​ និង​ចាត់​ចែង​ថវិកា​ស្ម័គ្រ​ចិត្ត ដែល​មាន​បាន​ពីសប្បុរសជនឲ្យ​បាន​តម្លាភាព។ ជាមួយ​គ្នានេះ ឯកឧត្តម​បាន​បញ្ជាក់​ថា ការ​ជួយ​គ្នា​ទៅវិញ​ទៅមក​ ក្នុង​សកម្ម​ភាព​ដោះ​ស្រាយ​ផល​ប៉ះ​ពាល់​ជូន​ប្រជាពលរដ្ឋ ដែល​រង​គ្រោះ​នៅ​គ្រប់​ទីកន្លែង និង​គ្រប់​កាលៈ​ទេសៈ ត្រូវ​តែទាម​ទារ​ដាច់​ខាតនូវ​ការ​ពូន​​ផ្ដុំ​នៃ​កម្លាំង​មនុស្ស​ធម៌៕



ខួបលើក ទី១៥២ ទិវាពិភពលោក ​កាកបាទក្រហម​ អឌ្ឍចន្ទក្រហម​ មានសប្បុរស​ជន​ចូល​ប្រាក់វិភាគទាន​ជាច្រើនម៉ឺនដុល្លារ​ នៅតាមបណ្តាខេត្ត​នីមួយៗ​ ថ្ងៃ អង្គារ ទី ០៥ ខែ ឧសភា ឆ្នាំ ២០១៥ ដោយ : GNN


គ្រាន់​តែ​រយៈពេល​ពីរថ្ងៃ​ប៉ុណ្ណោះ ទឹក​ប្រាក់​រាប់​ម៉ឺន​ដុល្លារ​អាមេរិក ត្រូវ​បាន​សប្បុរសជន​ រួម​គ្នា​បរិច្ចាគ​ ក្នុង​ជំ​នួយ​សប្បុរសធម៌​ ដល់​កាកបាទ​ក្រហម​កម្ពុជា​ គ្រប់​ខេត្ត​ ក្រុង​ រាជធានី​ ដើម្បីបន្ត​បំ​រើសកម្មភាព​មនុស្សធម៌​ ក្នុង​ការ​ដោះ​ស្រាយ​បញ្ហា​ប្រឈម​នានាជូន​ប្រជា​ពលរដ្ឋ​ដែល​ងាយ​រង​គ្រោះ​ ពី​គ្រោះ​ធម្មជាតិ ទឹក​ជំ​នន់ ចាស់​ជរា ខ្យល់​ព្យុះ ជន​ពិការ កុមាកំ​ព្រា ស្ត្រី​មេម៉ាយ​  ការ​សង់​ផ្ទះ និង​ការ​ជួយ​បូម​ទឹក​បញ្ចូល​ស្រែជូន​ប្រជាពលរដ្ឋ​ជា​ដើម​។
កាកបាទ​ក្រហមកម្ពុជា​​ បាន​និង​កំ​ពុង​ស្ថិត​ក្នុង​ការ​អនុវត្តវិស័យ​ស្នូល​​ទាំង ៤ នៃ​យុទ្ធ​សាស្ដ្រ​ឆ្នាំ២០១១-២០២០ ហើយ​ បាន​ និ​ង​កំពុង​បម្រើនូវ​សកម្ម​ភាព​មនុស្ស​ធម៌ដោយ​ប្រកាន់​ខ្ជាប់​ខ្ជួន​នូវ​គោល​ការណ៍​គ្រឹះ​ទាំង ៧ របស់​ចលនា​អន្ដរជាតិ​កាកបាទក្រហម អឌ្ឍ​ចន្ទ​ក្រហម គឺ​ក្នុង​ភាព​ជា​មនុស្ស​ធម៌ ភាព​គ្មាន​លំអៀង អព្យាក្រឹត​ភាព ឯករាជ្យភាព សេវា​កម្ម​ស្ម័គ្រ​ចិត្ត ឯកភាព និង​សកល​ភាព។
យោង​តាម​សេចក្ដី​ថ្លែងការណ៍របស់សម្ដេច​កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាក​បាទ​ក្រហម​​កម្ពុជា ក្នុង​មិទ្ទិញ​ខួប​ទី១៥២ បាន​ឲ្យ​ដឹងថា ឆ្នាំ​នេះ ចលនា​អន្ដរ​ជាតិ​កាកបាទ​ក្រ អឌ្ឍចន្ទ​ក្រហម បាន​ដាក់​ចេញ​នូវ​ប្រធានបទ “កម្លាំង​មនុស្សធម៌ : គោល​ការ​ណ៍​គ្រឹះ​ក្នុង​សកម្ម​ភាព​ គឺ​មាន​បំណង​គូស​បញ្ជាក់​នូវ​ភាព​សម​ស្រប​​នៃ​គោល​ការណ៍​គ្រឹះ​ដែល​នៅ​បន្ដ​ជា​និរន្ដ នៅ​ក្នុង​សេវា​កម្ម​មនុស្ស​ធម៌ និង​ជាមគ្គទ្ទេសដ៏​សំខាន់​ ក្នុង​ការ​បំពេញ​ការ​ងារ​របស់​ខ្លួន។
មិទ្ទិញ​អប​អរ​ខួប​ទី​១៥២ ទិវា​ពិភពលោក​កាក​បាទ​ក្រហម អឌ្ឍចន្ទ​ក្រហមឆ្នាំ​នេះ  កាលពីថ្ងៃ​ទី៤ ខែ​ឧស​ភា ឆ្នាំ​២០១៥ នៅខេត្ត​ស្វាយរៀង ប្រមូល​បាន​ថវិកាជិត២០ម៉ឺនដុល្លារ ពិធី​នេះ​ធ្វើ​ឡើង ក្រោម​អធិបតីភាព ឯកឧត្តមនាយឧត្តម​សេនីយ៍​ សៅ សុខា អគ្គមេបញ្ជាការ​កងរាជ​អាវុធ​ហត្ថលើ​ផ្ទៃប្រទេស​ នៅ​ខេត្តតាកែវ ប្រារព្ធ​ធ្វើ​ឡើងនៅ​ថ្ងៃ​ទី​០៥ ខែ​ឧសភា ឆ្នាំ​២០១៥ នេះ ប្រមូល​ប្រាក់​វិភាគទាន​បាន​ប្រមាណជិត ៤៤ ម៉ឺន​ដុល្លារអាមេរិក ក្រោម​អធិបតី​ភាព​ដ៏​ខ្ពង់​ខ្ពស់​ ឯកឧត្តម​បណ្ឌិត​សភាចារ្យ​ ឧបនាយករដ្ឋមន្ត្រី សុខ អាន និង​លោក​ជំ​ទាវ  នៅ​ខេត្ត​បន្ទាយមានជ័យ ព្រឹកថ្ងៃទី៥ ខែឧសភានេះ​ដែរ ទទួលបានថវិកា ចំនួនប្រមាណ​ជាង​១១ម៉ឺន​ដុល្លារ​អាមេរិក នៅខេត្តសៀមរាប សាខាក្រហមកម្ពុជា បានប្រារព្ធ​ខួបនេះ នៅសាលសិល្បៈ រ៉ូស្សាណា (Rosana Broadway) ក្រុងសៀមរាប បានទទួលថវិកា ពីសប្បុរសជន ចំនួនជាង ៤០ ម៉ឺនដុល្លារ និងប្រាក់រៀល ជាង ៣០លានរៀល  នៅ​ខេត្តកំពង់ឆ្នាំង ពិធី​នេះ ប្រារព្ធ​ធ្វើ​ឡើងក្រោមអធិបតីភាពសម្តេចចៅហ្វាវាំង គង់ សំអុល ឧប​នាយក​រដ្ឋមន្ត្រី និងជាអនុ​ប្រធាន​អចិន្ត្រៃយ៍នៃគណៈកម្មាធិការ កណ្តាលកាកបាទ​ក្រហមកម្ពុជា បាន​ទទួល​ថវិកាសរុបជា​ទឹក​ប្រាក់​បានចំនួនជាង៩ម៉ឺនដុល្លារសហរដ្ឋអាមេរិក។
ក្រៅ​ពី​នេះ សាខាកាកបាទ​ក្រហម​កម្ពុជា នឹង​បន្ត​ធ្វើ​មីទ្ទីញ​រំ​លឹក​ខួប​លើក​ទី​១៥២ នៃ​ទិវាពិភព​លោកកាកបាទ​ក្រហម និង​អឌ្ឍ​ចន្ទ​ក្រហម​ ជាបន្ត​បន្ទាប់​ទៀត ទៅ​តាម​ពេល​វេលាជាក់​ស្តែង​របស់​ខេត្ត ក្រុង​ ​នីមួយ​ៗ ដោយ​សង្ឃឹម​ថា នឹង​មាន​សប្បុរសជន​ចូល​រួម​ផ្តល់​ថវិកាស្ម័គ្រចិត្ត​គាំទ្រ​ មាន​ចំ​នួន​ច្រើន​ជាង​ឆ្នាំ​កន្លង​ទៅ​  ដោយ​សារ​តែ​ការ​ជឿជាក់​លើ​សកម្មភាព​ការងារ​របស់​កាកបាទ​ក្រហម​កម្ពុជា​ ក្នុង​ការ​ជួយ​ដោះ​ស្រាយ​ទុក្ខលំ​បាក​ជូន​ប្រជាពលរដ្ឋ​ ដោយ​ការ​អនុវត្ត​តាម​ទិសស្លោក ៖ ទី​ណា​មាន​ទុក្ខ​លំ​បាក ទី​នោះ​មាន​កាកបាទ​ក្រហម​កម្ពុជា​ « រួម​កម្លាំង​គ្នា​ ដើម្បី​មនុស្ស​ធម៌  និង វប្បធម៌​ចែក​រំ​លែក​ ចាប់​ផ្តើម​ពី​ខ្ញុំ»៕​




អំពី​ប្រវត្តិ​ព្រះ​រាជ​ពិធីបុណ្យ ​«ច្រត់​ព្រះនង្គ័ល»

ព្រះ​រាជពិធី​បុណ្យច្រត់​ព្រះនង្គ័ល ត្រូវ​បាន​រៀប​ចំប្រារព្ធ​ឡើង​យ៉ាងអធិកអធម ជារៀង​រាល់​ឆ្នាំ​នៅ​ក្រោម​ព្រះ​អធិបតី​ភាព នៃ​ព្រះមហាក្សត្រ ប្រចាំនគរ រួមទាំង​មន្ត្រី អ្នក​មុខអ្នក​ការ និង​ប្រជា​នុ​រាស្ត្រគ្រប់ជាន់ថ្នាក់ មកពីគ្រប់ខេត្តក្រុងនៅទីលាន វាលព្រះមេរុនៅភ្នំពេញ និង​នៅ​តាម​បណ្តា​ខេត្តក្រុង​រាជ​ធានី​ នៅ​ទូ​ទាំង​ប្រទេស ដោយ​នឹង​ត្រូវ​ប្រារព្ធ​ធ្វើ​ឡើង​ ផ្លាស់​ប្តូរ​វេន​គ្នា​ ប៉ុន្តែ ជា​ញឹក​ញាប់​គេបាន​សង្កេត​ឃើញ​ថា ភាគ​ច្រើន​ពិធី​នេះ​ច្រើន​ធ្វើ​នៅ​វាល​ព្រះ​មេរុ
ព្រះរាជ​ពិធីនេះ ជាពិធី​មង្គល​មួយ​ដែល​ព្រះករុណា ព្រះមហាក្សត្រ ចាត់​ទុកថា ជាការ​ចាប់ផ្តើម ប្រកក់ ប្រសិទ្ធី ឲ្យ​ដល់​ប្រជាកសិករ ក្នុង​ការធ្វើ​ស្រែចម្ការ​នៅរដូវ​វស្សា ឲ្យទទួល​បាន​ទិន្នផល​ខ្ពស់ ព្រម​ទាំង​បង្ហាញ​ឲ្យប្រជាកសិករ​ទូទាំង​នគរឲ្យបាន​ដឹងថា ដល់ពេលដែល​ត្រូវ​ចាប់​ផ្តើម​ការ ដាំ​ដុះ​ហើយ ។
ពិធី​នេះ​ត្រូវ​បាន​ប្រារព្ធឡើង​ដោយ​មាន​បុរសម្នាក់​ឈ្មោះ​ថា (ស្តេចមាឃ) ដែល​កាន់​នឹម និង​នង្គ័​​ល, និងស្ត្រីម្នាក់ ឈ្មោះថា (ព្រះម៉ែ មេ ហួរ) ដែលសាប​ពូជ​ស្រូវ ដើរ​តាម​ក្រោយ​នង្គ័ល។
គេមាន​ជំនឿថា ពិធីនេះ​ត្រូវបាន​គេរៀប​ចំតាម​លំនាំ​សាសនាព្រហ្មញ្ញ ដោយផ្សង​ទឹក​ភ្លៀង​តាម​រយៈការដាក់​ភោគ​ផល ឬ អាហារ៧យ៉ាង រៀបដាក់​តុ​ប្រាក់​ធំៗ តាំងទុកនៅ​ទីមុខ​ព្រះ​ពន្លា គឺ​គ្រាប់​ស្រូវ​១តុ គ្រាប់​សណ្ដែក១តុ គ្រាប់​ពោត​១តុ គ្រាប់​ល្ង១តុ ស្មៅស្រស់​១តុ ទឹក១​តុ ស្រា១តុ ដើម្បី​ឲ្យ​គោឧសុភរាជ​ស៊ីផឹក​តាម​ចិត្ត​រយៈពេល​ពេញ​មួយកម្មវិធី​ផ្សង​នេះ ។
ទាក់​ទងនឹង​ពេល​វេលា កាលពី​បុរាណ ពិធីនេះ​ត្រូវ​បាន​គេប្រារព្ធរយៈពេល​ ៣ថ្ងៃ។ តែ​ក្រោយ​​មក​ដោយកា​រវិវត្តជឿន​លឿន​ នៃ​សង្គម និង​ម្យ៉ាង​ដោយ​ព្រះរាជា មន្ត្រីដែល​ជា​អ្នក​មុខ​អ្នកការ រួមទាំង​ប្រជារាស្ត្រមាន​ភាពមមារញឹក​ផង​​នោះ ទើប​ព្រះរាជា បាន​សម្រេច​ការ​ប្រារព្ធ​ពិធីនេះ​មក​នៅ​ត្រឹមរយៈ​ពេល​មួយ​ថ្ងៃវិញ ពោល​គឺ​ចំថ្ងៃ ៤ រោច ខែពិសាខ ជា​រៀងរាល់ឆ្នាំ ។
សារៈសំខាន់ នៃបុណ្យច្រត់​ព្រះនង្គ័ល​មាន​ដូចជា៖
ជាពិធីមួយ​ដើម្បី​ផ្សង​ប្រផ្នូរ​កម្រិត​ទឹកភ្លៀង និងភោគផល​ប្រចាំ​ឆ្នាំ​នៅ​គ្រប់តំបន់ ខេត្ត​ក្រុង​ទូទាំង​នគរខ្មែរ​តាមរយៈ ការ សោយព្រះស្ងោយ​របស់​គោ​ឧសភារាជ ។
ជាសញ្ញាប្រាប់​ដល់​ប្រជានុរាស្ត្រខ្មែរ​ទាំង​អស់​ដែល​មានមុខ​របរជា​កសិករ អ្នកស្រែ​ចំការ​ឲ្យ​លោក​ដឹង​ថា ដល់​ពេល ដែល​ត្រូវ​ចាប់​ផ្តើម​ធ្វើ​ស្រែចំការ​ហើយ ។
ជាពេលវេលាដែល​ព្រះរាជា ថ្នាក់​ដឹកនាំ​រដ្ឋ មាន​ឱកាស​ជួប​ជុំ សួរសុខ​ទុក្ខ​ប្រជា​រាស្ត្រ​ដែល​មាននាទី​ជាកសិករ ។
ជាពេលវេលាដែល​ថ្នាក់​ដឹក​នាំគ្រប់​ខេត្តក្រុង មាន​ឱកាស​រៀប​ចំការដាក់​តាំងភោគ​ផល​កសិ​កម្ម ប្រចាំ​ខេត្តក្រុង​របស់​ខ្លួន​ឲ្យមហាជន​បាន​ដឹង និងងាយ​ស្រួល​លក់​ភោគផល​នៅ​ពេល​ក្រោយ។
​ជាពេលវេលានៃ​ការដឹងគុណ​ព្រះម៉ែធរណី និង​ព្រះ​ភិរុណដែលបាន​បង្អុល​ទឹកភ្លៀង និង​ភោគផល​គ្រប់​គ្រាន់ នាពេល​កន្លងមក ។
ជាពេល​វេលា​នៃការបួង​សួង​សុំ​ទឹក​ភ្លៀង និង សុំ​ភោគផល​បានសម្បូរ​ហូរហៀរក្នុង​ឆ្នាំថ្មី​បន្ត​ទៀត ។
ជាពេលវេលាដែល​បង្ហាញ​ឲ្យឃើញពី​ទឹក​ព្រះទ័យ ឬការយក​ចិត្ត​ទុក​ដាក់​របស់​ព្រះរាជា និង​មន្ត្រី​គ្រប់ជាន់ថ្នាក់ ចំពោះ ប្រជារាស្ត្រទូទៅដែលជាកសិករ ។
គួរបញ្ជាក់ថា ប្រទេសខ្មែរ មានប្រភេទ​ស្រូវ​ល្បី​ច្រើន​មុខ​ស្ទើរ​រាប់​មិន​អស់​ដូច​ជា៖ ស្រូវ​សែន​ពិដោរ ស្រូវសូម៉ាលី ស្រូវផ្កាខ្ញី ស្រូវ​ផ្កាម្លិះ ស្រូវ​ផ្ការំដួល ស្រូវឆ្មាព្រុំ ស្រូវនាង​ម៉ិញ ស្រូវ​ដំណើ​បស ស្រូវដំណើបខ្មៅ ស្រូវខា ស្រូវ​ប្រដេញ​ទឹក ស្រូវឡើងទឹក ។ល។
ចំណែក​ប្រភេទ​សត្វ​ដែល​បម្រើ​ឲ្យការអូស​ទាញ​ក្នុង​វិស័យកសិកម្មរួម​មាន៖ គោ ក្របី សេះ ដំរី​​ដែល​សត្វ​ទាំង​នេះខ្មែរ និយម​ប្រើតាំង​ពីសម័យបូរាណមក​ម្លេះ ។
សរុបមក ពិធី​ច្រត់​ព្រះនង្គ័ល ពិត​ជា​មាន​អត្ថន័យ​ជ្រាល​ជ្រៅណាស់ សម្រាប់​ប្រទេស​កម្ពុជា​យើ​ង ដោយ​សារ​ពិធីនេះ ជាសកម្មភាព ឬដំណើរ​នៃ​ព្រះរាជា ដែល​ទ្រង់​សង្កត់​នង្គ័ល ដោយ​ព្រះហស្ថរបស់​ព្រះអង្គ ដើម្បីភ្ជួររាស់​ព្រះ​ស្រែជានិមិត្តរូប សម្រាប់​ប្រជានុរាស្ត្រ​របស់​ព្រះអង្គ៕

អត្ថបទ៖ ច័ន្ទ ទេវី


 

មតិស្វាគមន៍ របស់​លោកជំទាវ​ នូ សុវណ្ណនី អភិបាលរងខេត្តតាកែវ ថ្លែងក្នុង​មិទ្ទីញ​អបអរ​ខួបលើកទី​១៥២ ទិវា​ពិភពលោក​កាកបាទក្រហម​ និងអឌ្ឍ​ចន្ទក្រហម ៨ ឧសភា