ស្ពានជ្រោយចង្វារចាស់ នឹងត្រូវផ្អាកទាំងស្រុងចាប់ពីថ្ងៃទី១ ខែតុលា ឆ្នាំ២០១៧

កាលបរិច្ឆេទ នៃការផ្អាកធ្វើចរាចរណ៍លើស្ពានមិត្តភាព កម្ពុជា-ជប៉ុន ឬស្ពានជ្រោយចង្វារទី១ ត្រូវបានរដ្ឋបាល រាជធានីភ្នំពេញ ចេញសេចក្តីជូនដំណឹងប្រកាសថា នឹងត្រូវផ្អាកចរាចរណ៍ឆ្លងកាត់ទាំងស្រុង ចាប់ពីថ្ងៃទី១ ខែតុលា ឆ្នាំ២០១៧តទៅ រហូតការដ្ឋានជួសជុលត្រូវបានចប់ជាស្ថាពរ នៅអំឡុងឆ្នាំ២០១៩។
នេះបើយោងតាមសេចក្តីជូន ដំណឹងរបស់រដ្ឋបាលរាជធានីភ្នំពេញ នៅថ្ងៃទី៧ ខែកញ្ញា ឆ្នាំ២០១៧នេះ។

សូមបញ្ជាក់ថា កាលពីប៉ុន្មានថ្ងៃមុននេះ រដ្ឋបាលរាជធានីភ្នំពេញ បានចេញសេចក្តីជូនដំណឹងថា ការផ្អាកចរា ចរណ៍ឆ្លងកាត់ស្ពានជ្រោយចង្វារចាស់ នឹងត្រូវធ្វើឡើងចាប់ពីថ្ងៃទី១៥ ខែកញ្ញា ឆ្នាំ២០១៧នេះតទៅ ប៉ុន្តែការ សម្រេចនេះ មានការរិះគន់ និងការលើកឡើងជាច្រើនថា អាជ្ញាធរគួរតែទុកពេលឱ្យប្រជាពលរដ្ឋ ធ្វើដំណើរទៅ ស្រុកកំណើតសិន នៅអំឡុងបុណ្យភ្ជំបិណ្ឌសិន។ ទើបនៅថ្ងៃនេះរដ្ឋបាលរាជធានីភ្នំពេញ ក៏បានប្រកាសផ្លាស់ ប្តូរ កាលបរិច្ឆេទនេះឡើងវិញតែម្តងទៅ ។

អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានថ្លែងបន្ថែមថា «មូលហេតុលើកពេលបន្តទៀត នេះ ដោយសារកៀកនឹងពិធីបុណ្យភ្ជុំបិណ្ឌ ដែលពេលនោះ ប្រជាពលរដ្ឋធ្វើដំណើរឆ្លងកាត់ស្ពាន ដើម្បីទៅកាន់ ស្រុកកំណើត ប្រាកដជានឹងកើនឡើងទ្វេរដង។ ដូច្នេះដើម្បីដោះស្រាយកាកស្ទះនេះ សាលារាជធានីភ្នំពេញ ត្រូវពន្យាពេលបន្តទៀតជាចំបាច់»។

ជាមួយគ្នានេះដែរលោក ម៉េត មាសភក្ដី បានបញ្ជាក់ថា ក្រោយពេលផ្អាកធ្វើចរាចរណ៍ លើស្ពានជ្រោយចង្វារ ទី១នេះ អាជ្ញាធររាជធានីបានត្រៀមកម្លាំងរួចជាស្រេចទៅហើយ ក្នុងការសម្រួលចរាចរណ៍ ដោយសារ ប្រជាពលរដ្ឋត្រូវធ្វើដំណើរ ទៅមកលើស្ពានមិត្តភាព កម្ពុជា-ចិន ឬជ្រោយចង្វារទី២។ ទោះជាយ៉ាងណា អ្នកនាំពាក្យរូបនេះ ស្នើប្រជាពលរដ្ឋយោគយល់ក្នុងរយៈពេលនៃការជួសជុលនេះ។

សូមបញ្ជាក់ថា កាលពីថ្ងៃទី៣ ខែឧសភា ឆ្នាំ២០១៦កន្លងមក ក្រសួងសាធារណការ និងដឹកជញ្ជូន បានចុះកិច្ច ព្រមព្រៀងជួសជុលស្ពានជ្រោយចង្វារទី១ឡើងវិញ ជាមួយប្រធានទីប្រឹក្សាសាជីវកម្ម central consultant Inc, បន្ទាប់ពីអ្នកជំនាញពិនិត្យឃើញថា ស្ពានមានសភាពទ្រុឌទ្រោម។

បើតាមក្រសួងសាធារណការ ថវិកាសម្រាប់ជួសជុលស្ពានមិត្តភាពកម្ពុជា ជប៉ុននេះ គឺជាជំនួយឥត សំណង របស់រាជរដ្ឋាភិបាលជប៉ុន តាមរយៈ JICA ចំនួន៣០លានដុល្លារ។ ប្រសិនបើគ្មានអ្វីប្រែប្រួលទេនោះ ការជួស ជុលឡើងវិញនេះ ត្រូវការរយៈពេល២២ខែ។

គួររំលឹកថា ស្ពានជ្រោយចង្វារទី១ ត្រូវបានបំផ្លាញក្នុងឆ្នាំ១៩៧២។ ក្រោយថ្ងៃរំដោះ ៧ មករា ១៩៧៩ ពោលគឺ នៅឆ្នាំ១៩៩៥ រាជរដ្ឋាភិបាលកម្ពុជា បានទទួលជំនួយឥតសំណង ពីរាជរដ្ឋាភិបាលជប៉ុនដើម្បីតភ្ជាប់ស្ពាន និងដាក់ឱ្យប្រើប្រាស់រហូតមកដល់សព្វថ្ងៃនេះ ៕

ថៃ សន្យាជំរុញទំហំពាណិជ្ជកម្មឱ្យកើនឡើងប្រមាណ១៥,០០០លានដុល្លារនៅក្នុងឆ្នាំបន្ទាប់ខាងមុខនេះ

នៅថ្ងៃទី០៧ ខែកញ្ញា ឆ្នាំ២០១៧ លោកនាយករដ្ឋមន្រ្តី ហ៊ុន សែន និង លោកនាយករដ្ឋមន្រ្តីថៃ ប្រាយុទ្ឋ ចាន់អូឆា បានអញ្ជើញជាអធិបតីនៅក្នុងពិធីចុះហត្ថលេខាលើកិច្ចព្រមព្រៀងមួយចំនួនដូចជា៖ ១-ពិធីចុះហត្ថលេលខារវាងរដ្ឋមន្ត្រីការបរទេសកម្ពុជា លោកទេសរដ្ឋមន្ត្រី ប្រាក់ សុខុន និង លោក ដន ប្រាមុតវិណៃ រដ្ឋមន្រ្តីការបរទេស​ថៃលើសេចក្តីថ្លែងការណ៍រួមនៃកិច្ចប្រជុំគណៈរដ្ឋមន្ត្រីចំរុះលើកទី៣ រវាងប្រទេសទាំងពីរ និង២- ពិធីចុះហត្ថលេខារវាងរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកម្ពុជា លោក អូន ព័ន្ធមុនី្នរ័ត្ន និង រដ្ឋមន្រ្តីការបរទេសថៃ ឯកឧត្តម ដន ប្រាមុត វិណៃ ស្តីពីការជៀសវាងការយកពន្ធត្រួតគ្នា និងការកិបកេងបន្លំពន្ធពាក់ព័ន្ធប្រាក់ចំណូល។

នៅក្នុងសន្និសីទរួមគ្នា លោកនាយករដ្ឋមន្រ្តីថៃ ប្រាយុទ្ធ ចាន់អូឆា បានមានប្រសាសន៍គាំទ្រ និងបញ្ជាក់បន្ថែមផងដែរថា ប្រទេសថៃ នឹងសហការខិតខំជួយមើលថែទាំជំរុញការនាំចេញទំនិញកសិផលកម្ពុជានៅតាមតំបន់ព្រំដែន និងការជួញដូរទូទៅរវាងថៃកម្ពុជា។ ទន្ទឹមនឹងនោះ ប្រទេសថៃ នឹងខិតខំជំរុញឱ្យការបើកច្រកព្រំដែនឱ្យបានឆាប់រហ័ស និងសហការជួយរៀបចំពលកដែលកំពុងធ្វើការតាមទូកក្នុងសមុទ្រឱ្យបានស្របច្បាប់ត្រឹមត្រូវ។ ប្រទេសថៃ នឹងពន្លឿនក្នុងការបង្កើតមជ្ឈមណ្ឌលស្តារនីតិសម្បទារនៅខេត្តព្រះសីហនុ។ ចំពោះទិសដៅនៃការធ្វើពាណិជ្ជកម្មរួមគ្នា ប្រទេសថៃ នឹងជំរុញទំហំពាណិជ្ជកម្មឱ្យកើនឡើងប្រមាណ១៥,០០០លានដុល្លារនៅក្នងឆ្នាំបន្ទាប់ខាងមុខនេះ ដើម្បីឱ្យទាន់ច្បាប់គយថៃដែលនឹងប្រកាសចេញជាផ្លូវការឆាប់ខាងមុខនេះដែលបង្កលក្ខណៈងាយស្រួលដល់ពាណិជ្ជករកម្ពុជាក្នុងការបញ្ជូនទំនិញទៅកាន់ប្រទេសទី៣ផងដែរ។

ចំពោះការតភ្ជាប់ផ្លូវដែកជាប្រវត្តិសាស្រ្តនៅក្នុងតំបន់អនុភូមិភាគតាមតំបន់ទន្លេមេគង្គ គឺភាគីថៃ នឹងជំរុញកិច្ចការនេះឱ្យបានលឿន។ ភាគីថៃ នឹងសហការលើកកម្ពស់អភិវឌ្ឍន៍ជីវភាពរស់នៅរបស់ប្រជាពលរដ្ឋ តាមព្រំដែនអោយបានល្អប្រសើរ។ លោកនាយករដ្ឋមន្រ្តថៃ ក៏បានថ្លែងអំណរគុណលោកនាយករដ្ឋមន្រ្តី ហ៊ុន សែន ដែលបានផ្តល់កិច្ចសហការល្អ និងអរគុណ ក្រុមការងារដែលបានសហការធ្វើកិច្ចការរួមគ្នាដើម្បីប្រទេសជាតិយើងរីកចម្រើនទៅមុខទៀត ដោយមិនទុកអោយដៃគូណាមួយនៅខាងក្រោយគឺយើងរីកចម្រើនទាំងអស់គ្នា។

បន្ទាប់មក លោកនាយករដ្ឋមន្រ្តី ហ៊ុន សែន និងភរិយា បានរៀបចំពិសារអាហារថ្ងៃត្រង់ជូនលោកនាយករដ្ឋមន្ត្រី ប្រាយុទ្ធ ចាន់អូឆា និងលោកស្រី នៅវិមានសន្តិភាពប្រកបដោយបរិយាកាសស្និទ្ធស្នាល និងរីករាយក្រៃលែង៕

(សូមទស្សនាវីដេអូ)៖ សេចក្តីថ្លែងការណ៍របស់អ្នកនាំពាក្យក្រសួងយុត្តិធម៌ ពន្យល់អំពីការអនុវត្តនីតិវិធីផ្លូវច្បាប់ទៅលើបុគ្គល​ កឹម សុខា​ ក្នុងបទល្មើសសន្ទិដ្ឋិភាពជាមួយបរទេស​( ក្បត់ជាតិ)

អភិបាលខេត្តកំពង់ឆ្នាំង និងភិរិយា ព្រមទាំងមន្រ្តីរាជការអញ្ជើញចូលរួមកាន់បិណ្ឌទី២ នៅវត្តត្រឡែងកែង ស្ថិតក្នុងស្រុកកំពង់ត្រឡាច

កំពង់ឆ្នាំង ៖ នៅព្រឹកថ្ងៃទី៧ ខែកញ្ញា ឆ្នាំ២០១៧នេះ ដែលត្រូវជាថ្ងៃកាន់បិណ្ឌវេនទី២ លោកឈួរ ច័ន្ទឌឿន អភិបាលខេត្តកំពង់ឆ្នាំង និងភិរិយា ព្រមទាំងអស់លោក លោកស្រី សមាជិកក្រុមប្រឹក្សាខេត្ត លោក ហេង ពិទូ អភិបាលរងខេត្ត ប្រធានអនុប្រធានមន្ទីរអង្គភាពជុំវិញខេត្ត មន្រ្តីរាជការ ក្នុងស្រុកកំពង់ត្រឡាចគ្រប់លំដាប់ថ្នាក់​ និងប្រជាពលរដ្ឋបានអញ្ជើញចូលរួមកាន់បិណ្ឌវេនទី២ នៅវត្តត្រឡែងកែងស្ថិតក្នុងឃុំលង្វែកស្រុកកំពង់ត្រឡាច ខេត្តកំពង់ឆ្នាំង។

ក្នុងពិធីកាន់បិណ្ឌវេនទី២នេះផងដែរ លោក ឈួរ ច័ន្ទឌឿន និងភិរិយា ព្រមទាំងមន្រ្តីរាជ និង ប្រជាពលរដ្ឋ បាន នាំយកនូវទេយ្យវត្ថុមួយចំនួន និងបច្ច័យចំនួន៤.៣០០.០០០រៀល ដើម្បីប្រគេនដល់ព្រះសង្ឃ គង់ចាំព្រះ វស្សា នៅវត្តត្រឡែងកែង ទុកកសាង សមិទ្ធផលក្នុងវត្ត ហើយបានវេរប្រគេនចង្ហាន់ និង ទេយ្យវត្ថុដល់ព្រះសង្ឃ អង្គ ក្នុងមួយៗ ស្លាដក១ និងបច្ច័យមួយចំនួនភេសជ្ជៈ និងគ្រឿងឧបភោគបរិភោគជាច្រើនទៀត ជូនថវិកាដល់ យាយជី តាជី ២៤០នាក់ក្នុងម្នាក់ៗ ៥ពាន់រៀលផងដែរ ។

បន្ទាប់មកលោក ឈួរ ច័ន្ទឌឿន និងភិរិយា ព្រមទាំងថ្នាក់ដឹកនាំមន្រ្តីរាជការនិងប្រជាពលរដ្ឋបានបង្សុកូលនិង បានរាប់បាត ដើម្បីឧទ្ទិសដល់វិញ្ញាណក្ខន្ធបងប្អូនជីដូនជីតា និង ញាតិកាទាំង៧សន្តាន ដែលបានចែកឋានទៅ ឧទ្ទិសដល់វិញ្ញាណក្ខន្ធ យុទ្ធជន យុទ្ធនារី ដែលបានលះបង់ជីវិត ដើម្បីបុព្វហេតុជាតិ និង ប្រជាពលរដ្ឋដែល បានបាត់បង់ជីវិត ក្នុងរបប ប៉ុលពតនិង សូមអោយមន្រ្តីរាជការ និង ប្រជាពលរដ្ឋទាំងអស់ ជួបតែសេចក្តីសុខ គ្រប់ៗគ្នា។

ក្នុងឱកាសនោះលោក ឈួរ ច័ន្ទឌឿន ក៏បានមានប្រសាសន៍ផ្តាំផ្ញើដល់ប្រជាពលរដ្ឋទាំងអស់ដែល គ្រប់អាយុ ទៅចុះឈ្មោះបោះឆ្នោតអោយបានគ្រប់ៗ គ្នាតាមការកំណត់របស់ គ.ជ.ប។ ត្រូវចូលរួមគោរពច្បាប់ចរាចរណ៍ អោយបានគ្រប់ៗគ្នា និងអប់រំកូនចៅអោយខិតខំរៀនសូត្រ និងជៀសអោយឆ្ងាយពីគ្រឿងញៀន និងបទល្មើស ផ្សេងៗដែលខុសច្បាប់ ៕

ពិធីប្រកាសផ្ទេរភារកិច្ច តែងតាំងមុខតំណែងនិងបំពាក់ឋានន្តរស័ក្តិស្នងការ នៃស្នងការដ្ឋាននគរបាលខេត្តបាត់ដំបង

នៅព្រឹកថ្ងៃទី ០៧ ខែកញ្ញា ឆ្នាំ២០១៧ លោក អ៊ុយ រី ប្រធានក្រុមប្រឹក្សាខេត្តបាត់ដំបង លោក ច័ន្ទ សុផល អភិបាលនៃគណៈអភិបាលខេត្តបាត់ដំបង បានអញ្ជើញចូលរួមក្នុងពិធីប្រកាសផ្ទេរភារកិច្ច តែងតាំងមុខតំណែង និងបំពាក់ឋានន្តរស័ក្តិ ស្នងការ នៃស្នងការដ្ឋាននគរបាលខេត្តបាត់ដំបង ក្រោមអធិបតីភាព លោក ចាន់ អ៊ាន អនុរដ្ឋលេខាធិការក្រសួងមហាផ្ទៃ និងជាតំណាងដ៏ខ្ពង់ខ្ពស់ លោក ស​ ខេង រដ្ឋមន្រ្តីក្រសួងមហាផ្ទៃ ។

ពិធីប្រកាសតែងតាំងមុខតំណែងថ្មីនេះត្រូវបានផ្ទេរភារកិច្ច លោក អ៊ុច សុខុន ពីស្នងការរងនគរបាលរាជ ធានីភ្នំពេញ មកជាស្នងការនគរបាលខេត្តបាត់ដំបង ជំនួសលោក ស ថេត ពីស្នងការនគរបាលខេត្តបាត់ដំបង ត្រូវទទួលភារកិច្ច និងមុខតំណែងថ្មីជាអគ្គស្នងការរងនគរបាលជាតិ ។

ក្នុងឱកាសនោះក៏មានការអញ្ជើញចូលរួមពី លោកមេបញ្ជារងយោធភូមិភាគទី៥ មេបញ្ជាការ មេបញ្ជាការរង កងរាជអាវុធហត្ថខេត្ត ស្នងការរង អភិបាលក្រុង ស្រុក អធិការក្រុង ស្រុក មន្ទីរអង្គភាពជុំវិញខេត្ត ព្រមទាំងមន្រ្តីនគរបាល នៃស្នងការដ្ឋាននគរបាលខេត្តបាត់ដំបង ៕

ទស្សនវិភាគ៖ ការមិនចូលរួមក្នុងការបោះឆ្នោត២០១៨ ដោយសារគណបក្សសង្គ្រោះជាតិធ្វើពហិកាឬក៏បក្សនេះត្រូវរំលាយដោយច្បាប់!

បន្ទាប់ពីចំណាត់ការផ្លូវច្បាប់មកលើលោក កឹម សុខា ដែលបច្ចុប្បន្នកំពុងត្រូវឃុំខ្លួនបណ្តោះអាសន្នក្នុងពន្ធនា គារ លោក អេង ឆៃអ៊ាង អនុប្រធានគណបក្សសង្គ្រោះជាតិ បានគំរាមធ្វើបាតុកម្មទាមទារដោះលែងលោក កឹម សុខា ហើយបញ្ជាក់ជំហរថា បើមិនដោះលែងទេនោះ គណបក្សខ្លួននឹងធ្វើពហិកាក្នុងការចូលរួមបោះ ឆ្នោតជាតិ នៅឆ្នាំ២០១៨ខាងមុខនេះ។ ប៉ុន្តែទិដ្ឋភាពបញ្ជាក់ថា ការបោះឆ្នោតជាតិនៅឆ្នាំ២០១៨ខាងមុខនេះ គឺនៅចំហនៅ ឡើយទេថាតើបើអវត្តមានគណបក្សសង្គ្រោះជាតិមែននោះគឺមកពីអ្វី? ពហិកាដោយសាមីគណបក្ស ឬក៏ គណបក្សនេះត្រូវរំលាយ?

រឿងពហិកាជាសិទ្ធិស្វ័យសម្រេចរបស់គណបក្សសង្គ្រោះជាតិ។ រីឯការជាក់ស្តែងកន្លងមក គណបក្សប្រឆាំង មួយនេះបានត្រឹមលើកឡើងជាវោហារស័ព្ទតែប៉ុណ្ណោះ។ យោងបច្ចុប្បន្នភាពម្តងនេះ ចំណាត់ការផ្លូវច្បាប់ អាចនឹងនាំឱ្យមានទិដ្ឋភាពថ្មី ថាតើការបោះឆ្នោតជាតិនៅឆ្នាំ២០១៨ខាងមុខនេះ មានវត្តមានចូលរួមរបស់ គណបក្សសង្គ្រោះជាតិដែរឬអត់? បើអត់ តើដោយសារពហិកាឬ ដោយសារគណបក្ស នេះត្រូវរំលាយ ដោយអំណាចច្បាប់?

ទឡ្ហីករណ៍ទី១ គឺការទម្លាក់ការចោទប្រកាន់លើលោក កឹម សុខា ពិតជាមិនអាចទេ ព្រោះអយ្យកាអមសាលា ដំបូងរាជធានីភ្នំពេញបានធ្វើការចោទប្រកាន់ជាផ្លូវការរួចហើយ និងឈានដល់ចៅក្រមស៊ើបសួរ បានសម្រេច ឃុំខ្លួនបណ្តោះអាសន្នទៀតផង បានសេចក្តីថាចូលដល់ដំណាក់កាលវិនិច្ឆ័យក្តី។ ទឡ្ហីករណ៍ទី២ គឺការដោះ លែងឱ្យនៅក្រៅឃុំ ក៏មិនអាចទៅរួចដែរ ព្រោះជាបទល្មើស «សន្ទិដ្ឋិភាពជាមួយបរទេស»។ ដូច្នេះជនជាប់ ចោទកឹម សុខា ងាយនឹងរត់ទៅជ្រកកោននៅស្ថានទូតបរទេសដែលជាចៅហ្វាយនាយរបស់ខ្លួន។ ទឡ្ហីករណ៍ទី៣ បើតុលាការរកឃើញកំហុស នោះជនជាប់ចោទកឹម សុខា ក្លាយជាទណ្ឌិត។

យោងតាមច្បាប់គណបក្ស គឺមិនអនុញ្ញាតឱ្យទណ្ឌិតធ្វើជាមេដឹកនាំបក្ស ហើយគណបក្សត្រូវផ្តាច់ខ្លួនពីទណ្ឌិត។ វិសាលភាពនឹងឈានដល់បុគ្គលដទៃទៀតក្នុងជួរដឹកនាំគណបក្សសង្គ្រោះជាតិពាក់ព័ន្ធនឹង «បទក្បត់ជាតិ» ហើយបើតុលាការរកឃើញថា គណបក្សនេះត្រូវបានដឹកនាំធ្វើនយោបាយ បំពានល័ក្ខខ័ណ្ឌណា មួយដែលជា បម្រាមចែងក្នុងច្បាប់គឺគណបក្សសង្គ្រោះជាតិ ត្រូវប្រឈមនឹងការរំលាយចោល។

ដូច្នេះ៖ ១- បើកើតមានករណីរំលាយគណបក្សមុនការបោះឆ្នោត នោះគណបក្សសង្គ្រោះជាតិ នឹងគ្មានវត្តមាន ក្នុងប្រព័ន្ធពហុបក្សកម្ពុជាទៀតហើយ ទោះបក្សនេះពហិកា ក៏មិនសំខាន់ដែរ តែ ២- បើករណីរំលាយគណបក្ស ក្រោយការបោះឆ្នោត នោះពហិកា ឬមិនពហិកា ក៏គ្មានប្រយោជន៍អីដែរព្រោះសមាជិកសភា ក៏ត្រូវបាត់បង់ អាណត្តិរបស់ខ្លួនដោយស្វ័យប្រវត្តិជាមួយនឹងការរំលាយបក្ស។

អញ្ចឹងយកល្អក្រុមអ្នកនយោបាយរបស់គណបក្សសង្គ្រោះជាតិ គួរតែរៀបចំបង្កើតគណបក្សថ្មីមួយ ឬត្រៀមយក គណបក្សសម រង្ស៊ី ឬ/និង គណបក្សសិទ្ធិមនុស្សដើម្បីបន្តជីវិតនយោបាយរបស់ខ្លួនសម្រាប់ការបោះឆ្នោតជាតិ ២០១៨ ខាងមុខ ប្រសើរជាជាងប្រើវោហារស័ព្ទ «ពហិការ»៕

(ប្រភព៖ ហ្វេសបុក វិទ្យាស្ថាន ពលរដ្ឋវិជ្ជា)

ស្នងការនគរបាលរាជធានីភ្នំពេញ ប្រកាសចាត់វិធានការចាប់រថយន្ត និងម៉ូតូដែលកែច្នៃខុសស្ដង់ដារ យកមកផាកពិន័យតាមច្បាប់

លោក ជួន សុវណ្ណ ស្នងការនគរបាលរាជធានីភ្នំពេញ បានប្រកាសនឹងចាត់វិធានការម៉ឺង ម៉ាត់ដោយចុះចាប់ យានយន្ត ដែលកែច្នៃខុសស្ដង់ដារ ល្មើសច្បាប់ចរាចរណ៍ផ្លូវគោក ដូចជា លេងភ្លើងឡាស៊ែ សំឡេងលាន់ឮខ្លាំង ផ្សែងខ្លាំងខុសពីលក្ខណៈបច្ចេកទេស តសាក់ស៊ីជាដើម យកមកផាកពិន័យតាមច្បាប់ និងកែតម្រូវតាម លក្ខណៈបច្ចេកទេសវិញ។ នេះបើតាមសេចក្ដីជូនដំណឹង របស់ស្នងការនគរបាលរាជធានី ភ្នំពេញដែល ទទួល បាននៅព្រឹកថ្ងៃទី០៧ ខែកញ្ញា ឆ្នាំ២០១៧នេះ។

ការចេញសេចក្ដីជូនដំណឹងនេះ ធ្វើឡើងបន្ទាប់ពីកន្លងមក ស្នងការដ្ឋាននគរបាលរាជធានីភ្នំពេញ បានសង្កេត ឃើញថា មានប្រជាពលរដ្ឋមួយចំនួនដែលភាគច្រើនជាយុវជន បានប្រើប្រាស់យានយន្ តកែច្នៃសំឡេង ម៉ាស៊ីនខ្លាំង ឬផ្សែងខ្លាំងខុសលក្ខណៈបច្ចេកទេស ដែលល្មើសនឹងបទប្បញ្ញត្តិនៃច្បាប់ស្ដីពីចរាចរណ៍ផ្លូវគោក ធ្វើឱ្យរំខានដល់អ្នកប្រើប្រាស់ផ្លូវផ្សេងទៀត ឬអ្នករស់នៅជាប់ដងផ្លូវ បង្កឱ្យបាត់សណ្ដាប់ធ្នាប់ប៉ះពាល់បរិស្ថាន និងសុខភាពប្រជាពលរដ្ឋ។

ខាងក្រោមនេះ ជាសេចក្ដីជូនរបស់ស្នងការដ្ឋាននគរបាលរាជធានីភ្នំពេញ៖

(សូមទស្សនាវីដេអូ)៖ កូនប្រុសលោក ហ៊ុន សែន លើកឡើងថា លោក កឹម សុខា ពឹងបរទេសផ្តួល​រំលំរដ្ឋាភិបាលកម្ពុជា

(សូមទស្សនាវីដេអូ) លិខិតមិត្តអ្នកអាន៖ កម្ទេចស្ពានហើយ ពេលអាសន្ននាំគ្នារំឭកពីគុណនៃវប្បធម៌សន្ទនា​!

អភិបាល​ខេត្តកំពតស្វាគមន៍​ ប្រតិភូចិន​មកស្វែងយល់​សក្តានុពល​ក្នុងខេត្តកំពត​

នៅថ្ងៃទី៧ ខែកញ្ញា ឆ្នាំ២០១៧នេះ នៅសាលប្រជុំសាលាខេត្តកំពត លោក ចាន់ ចេស្តា អភិបាលនៃគណៈអភិបាលខេត្តកំពត បានទទួលជួបស្វាគមន៍ប្រតិភូមកពីប្រទេសចិនប្រមាណជិត៣០នាក់ ក្នុងដំណើរស្វែងយល់នូវសក្តានុពលក្នុងខេត្តកំពត។

ឆ្លើយតបចំពោះប្រតិភូដែលមានបំណងមកវិនិយោគក្នុងខេត្តកំពត លោកអភិបាលខេត្តបានសំណូមពរឱ្យមានការដាក់ទុនសម្រាប់វិស័យវាយនភណ្ឌ ខណៈដែលបច្ចុប្បន្នក្នុងខេត្តនេះទើបតែមានរោងចក្រកាត់ដេរតិចតួចនៅឡើយ។ លើសពីនោះ លោកក៏បានសំណូមពរឱ្យមានការនិយោគផ្នែកវិស័យកសិកម្មផងដែរ ពិសេសលើដំណាំម្រេចដោយសព្វថ្ងៃផលិតផលនេះមិនទាន់ឆ្លើតតបទៅនឹងតម្រូវការរបស់សហគមន៍អឺរ៉ុប នៅឡើយ៕

សមាគមមាតុភូមិខ្មែរនៅប្រទេសកាណាដា ចេញញត្តិគាំទ្រចំណាត់ការរបស់ស្ថាប័នមានសមត្ថកិច្ចចំពោះបុគ្គល កឹម សុខា

ប្រជាពលរដ្ឋរស់នៅក្នុងខេត្តអន់ធារីយ៉ូ ប្រទេសកាណាដា បានសម្តែងការគាំទ្រយ៉ាងខ្លាំងក្លាលើចំណាត់ការរបស់ស្ថាប័នមានសមត្ថកិច្ចចំពោះបុគ្គល កឹម សុខា ប្រធានគណបក្សសង្រ្គោះជាតិដែលបានឃុបឃិតគ្នាជាមួយបក្ខពួកបរទេសមួយចំនួន ហើយបានសារភាពថាខ្លួនធ្វើតាមបញ្ជាសហរដ្ឋអាមេរិកក្នុងការផ្តួលរំលំរាជរដ្ឋាភិបាលកម្ពុជាដូចគម្រូប្រទេសយូហ្គោស្លាវី ដែលត្រូវបានផ្សព្វផ្សាយដោយបណ្តាញ CBN (Cambodia Broadcasting Network) ដែលមានទីតាំងនៅប្រទេសអូស្រ្តាលី។

អាជ្ញាធរខេត្តសៀមរាប ដឹកនាំមន្ត្រីរាជការចូលរួមកាន់បិណ្ឌវេនទី២នៅវត្តរាជបូព៌

នៅថ្ងៃទី០៧ ខែកញ្ញា ឆ្នាំ២០១៧ លោក ឃឹម ប៊ុនសុង អភិបាលខេត្តសៀមរាប និងភរិយា លោក នូ ផល្លា ប្រធានក្រុមប្រឹក្សាខេត្ត និង ភរិយា អស់លោក លោកស្រី ជាប្រធាន-អនុប្រធានមន្ទីរជុំវិញខេត្ត រួមជាមួយនឹងពុទ្ធបរិស័ទ បានអញ្ជើញចូលរួមកាន់បិណ្ឌវេនទី២ នៅវត្តរាជបូព៌ ស្ថិតក្នុងសង្កាត់សាលាកំរើក ក្រុងសៀមរាប ខេត្តសៀមរាប។

ក្នុងឱកាសនោះ លោកអភិបាលខេត្ត បាននាំយកទៅជាមួយនូវគ្រឿងឧបភោគបរិភោគនិងទេយ្យទានវត្ថុមួយចំនួនវេរប្រគេនដល់ព្រះសង្ឃ សម្រាប់ប្រើប្រាស់នៅក្នុងវត្ត រួមមាន៖ អង្ករ ២៥០ គក្រ មី ១៥ កេស ទឹកក្រូច ១៥ កេស ទឹកសុទ្ធ ១៥ កេស ទឹកត្រី ៥ យួរ ទឹកស៊ីអ៊ីវ ៥ យួរ ត្រីខ ៥ យួរ ស្ករស ១៥ គក្រ និង ទឹកដោះគោ ២ កេស តែ ៥ កញ្ចប់ធំ បច្ច័យសម្រាប់វត្តចំនួន ៤ លានរៀល បច្ច័យប្រគេនព្រះសង្ឃ ២០០ សង្ឃ ចំនួន ៤ លាន ៤០ ម៉ឺន និងយាយជី តាជី ៥០ នាក់ ម្នាក់ៗ ក្រណាត់ស ១ ដុំ បច្ច័យ ១ ម៉ឺនរៀល ផងដែរ។

លោក ឃឹម ប៊ុនសុង បានមានប្រសាសន៍ថា ពិធីបុណ្យកាន់បិណ្ឌ និងភ្ជុំបិណ្ឌ គឺជាពិធីបុណ្យប្រពៃណីជាតិដ៏ធំមួយក្នុងចំណោមពិធីបុណ្យប្រពៃណីជាតិដទៃទៀត ហើយពិធីបុណ្យភ្ជុំបិណ្ឌត្រូវបានប្រជាពលរដ្ឋខ្មែរប្រារព្ធឡើងជារៀងរាល់ឆ្នាំ គឺចាប់ពីថ្ងៃ១រោច ខែភទ្របទ រហូតដល់ថ្ងៃ១៥រោច ខែភទ្របទ។

លោកអភិបាលខេត្ត ក៏បានមានប្រសាសន៍ទៀតថា វិស័យអាណាចក្រ និងពុទ្ធចក្រនៅកម្ពុជាគឺដើរទន្ទឹមគ្នាពុំអាចខ្វះមួយណាបានឡើយ ហេតុនេះវិស័យព្រះពុទ្ធសាសនារីកចម្រើនលូតលាស់ទៅបានគឺអាស្រ័យដោយប្រជាពុទ្ធបរិស័ទមានជីវភាពសម្បូរធូរធារ ជាក់ស្តែងប្រទេសកម្ពុជាក្រោមការដឹកនាំរបស់លោកនាយករដ្ឋមន្រ្តី ហ៊ុន សែន អ្វីៗបាននិងកំពុងរីកចម្រើនជឿនលឿនទៅមុខឥតឈប់ឈរក្រោមដំបូលសន្តិភាពតែមួយ។ ប្រទេសមានស្ថិរភាពមានសុខសន្តិភាពទើបយើងមានឱកាសបានបំពេញបុណ្យទានទៅតាមកាលវេលាទៅតាមគន្លងប្រពៃណីពីជីដូនជីតាបានពេញលេញដោយគ្មានក្តីបារម្ភ៕

រដ្ឋសភាកំណត់យកថ្ងៃទី១១កញ្ញាដើម្បីបើកកិច្ចប្រជុំសភាវិសាមញ្ញលើករណីលោក កឹម សុខា

នៅថ្ងៃទី០៧ ខែកញ្ញា ឆ្នាំ២០១៧ អគ្គលេខាធិការដ្ឋានរដ្ឋសភា បានចេញសេចក្ដីប្រកាសព័ត៌មានស្ដីពីលទ្ធផលនៃកិច្ចប្រជុំគណៈកម្មាធិការអចិន្ដ្រៃយ៍នៃរដ្ឋសភាលើករណី លោក កឹម សុខា ដែលបានធ្វើឡើងនៅវេលាម៉ោង១០ព្រឹក ថ្ងៃទី០៧ ខែកញ្ញា ឆ្នាំ២០១៧ ដោយបានបញ្ជាក់ថា អង្គប្រជុំបានអនុម័តកាលបរិច្ឆេទសម័យប្រជុំរដ្ឋសភាវិសាមញ្ញនីតិកាលទី៥ នៅវេលាម៉ោង៨ព្រឹក ថ្ងៃទី១១ ខែកញ្ញា ឆ្នាំ២០១៧ ដើម្បីសម្រេចករណីលោក កឹម សុខា តំណាងរាស្ដ្រមណ្ឌលខេត្តកំពង់ចាម និងជាប្រធានគណបក្សសង្គ្រោះជាតិ ក្រោយសមត្ថកិច្ចចាប់ខ្លួន ហើយត្រូវបានតុលាការឃុំខ្លួនដាក់ពន្ធនាគារ។

សូមអានខ្លឹមសារលម្អិត នៅក្នុងសេចក្ដីប្រកាសព័ត៌មានខាងក្រោមនេះ៖

(សូមទស្សនាវីដេអូ) គណៈកម្មាធិការគណបក្សខេត្ត បើកវគ្គបណ្ដុះបណ្ដាល ស្ដីពីការប្រើប្រាស់បណ្ដាញសង្គមហ្វេសប៊ុក

គណៈកម្មាធិការត្រួតពិនិត្យគ្រឿងញៀនខេត្តស្វាយរៀង រៀបចំកិច្ចប្រជុំ​ផ្សព្វផ្សាយ​ផែនការយុទ្ធនាការ​ប្រយុទ្ធប្រឆាំង​គ្រឿងញៀន​ខុសច្បាប់​លើកទី២​

នៅថ្ងៃទី០៧ ខែកញ្ញា ឆ្នាំ២០១៧នេះ គណៈកម្មាធិការត្រួតពិនិត្យគ្រឿងញៀនខេត្តស្វាយរៀង បានរៀបចំកិច្ចប្រជុំផ្សព្វផ្សាយផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី២ រយៈពេល ៦ខែ (ចាប់ពីថ្ងៃ០១ ខែកក្កដា ដល់ថ្ងៃទី៣១ ខែធ្នូ ឆ្នាំ២០១៧) ក្រោមអធិបតីភាពលោក ម៉ែន វិបុល អភិបាលខេត្ត និងជាប្រធានគណៈកម្មាធិការត្រួតពិនិត្យគ្រឿងញៀនខេត្តស្វាយរៀង ។

កិច្ចប្រជុំនេះត្រូវបានរៀបចំឡើងនៅសាលប្រជុំស្នងការដ្ឋាននគរបាលខេត្តស្វាយរៀង ដោយមានការអញ្ជើញចូលរួមពីអភិបាលរងខេត្ត តំណាងប្រធានសាលាដំបូងខេត្ត ព្រះរាជអាជ្ញាខេត្ត ឧត្ដមសេនីយ៍ទោស្នងការនគរបាលខេត្ត ឧត្ដមសេនីយ៍ត្រីមេបញ្ជាការកងរាជអាវុធហត្ថខេត្ត ឧត្ដមសេនីយ៍ត្រីមេបញ្ជាការរងតំបន់ប្រតិបត្តិការសឹករងស្វាយរៀង លោក លោកស្រី ឧត្ដមសេនីយ៍ស្នងការរងនគរបាលខេត្ត លោក លោកស្រីប្រធានមន្ទីរ-អង្គភាព អភិបាលក្រុង ស្រុក ប្រធានច្រកទ្វារព្រំដែនទាំងអស់ក្នុងខេត្ត អធិការនគរបាល មេឃុំ ចៅសង្កាត់ នាយប៉ុស្តិ៍នគរបាលរដ្ឋបាល សមត្ថកិច្ចនៅតាមព្រំដែន និងកងកម្លាំងប្រដាប់អាវុធទាំងបីប្រភេទ សរុបចំនួន២៩០នាក់ ។

មានប្រសាសន៍ក្នុងឱកាសនោះ អភិបាលខេត្តស្វាយរៀងបានសម្ដែងនូវការអបអរសាទរចំពោះលទ្ធផល នៃការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១ និងថ្លែងនូវការកោតសរសើរចំពោះថ្នាក់ដឹកនាំ មន្រ្តីនគរបាល កងរាជអាវុធហត្ថ មន្ត្រីអនុវត្តច្បាប់ មន្ទីរ-អង្គភាពពាក់ព័ន្ធ និងគណៈកម្មាធិការត្រួតពិនិត្យគ្រឿងញៀនគ្រប់លំដាប់ថ្នាក់ក្នុងខេត្ត ដែលបានយកអស់កម្លាំងកាយចិត្ត ប្រាជ្ញាស្មារតី ចាត់ចែងសម្របសម្រួល និងអនុវត្តប្រកបដោយការទទួលខុសត្រូវខ្ពស់រហូតទទួលបានលទ្ធផលវិជ្ជមានគួរឲ្យកត់សម្គាល់។

អភិបាលខេត្តស្វាយរៀង បានចាត់ទុកការងារប្រយុទ្ធប្រឆាំងគ្រឿងញៀនជាបញ្ហារួមរបស់យើងទាំងអស់គ្នា ដែលទាមទារប្រើប្រាស់ពេលវេលាបន្ថែមទៀត ដើម្បីគាស់រំលើងឲ្យដល់ឬសគល់នៃបទល្មើស តាមរយៈការប្រមូលផ្ដុំកម្លាំងសរុបធ្វើយុទ្ធនាការប្រយុទ្ធប្រឆាំងគ្រឿងញៀនលើកទី២បន្តទៀត ។

ក្នុងនាមជាប្រធានគណៈបញ្ជាការឯកភាពរដ្ឋបាលខេត្ត និងជាប្រធានគណៈកម្មាធិការត្រួតពិនិត្យគ្រឿងញៀនខេត្ត លោកអភិបាលខេត្ត បានណែនាំ និងផ្ដាំផ្ញើនូវចំណុចសំខាន់ៗមួយចំនួនដល់អ្នកពាក់ព័ន្ធទាំងអស់ជាពិសេសកងកម្លាំងប្រដាប់អាវុធគ្រប់ប្រភេទ អភិបាលក្រុង ស្រុក អធិការនគរបាល នាយប៉ុស្តិ៍នគរបាលរដ្ឋបាល និងសមត្ថកិច្ចនៅតាមព្រំដែន ត្រូវបង្កើនកិច្ចសហការទាំងក្នុងក្របខ័ណ្ឌក្នុងស្រុក និងកិច្ចសហប្រតិបត្តិការអន្តរជាតិ ដែលមានលក្ខណៈប្រទាក់ក្រឡា ក្ដាប់ឲ្យបាននូវមុខសញ្ញាសង្ស័យពាក់ព័ន្ធ ដើម្បីទប់ស្កាត់ បង្រ្កាបឲ្យបាននូវរាល់ការប៉ុនប៉ងជួញដូរ ចរាចរ និងចែកចាយគ្រឿងញៀន ជាពិសេសត្រូវបន្តផ្សព្វផ្សាយខ្លឹមសារអប់រំពីផលប៉ះពាល់នៃគ្រឿងញៀនឲ្យបានទូលំទូលាយ និងការកៀរគរប្រមូលផ្ដុំឲ្យមានការចូលរួម សហការគាំទ្រពីសំណាក់ប្រជាពលរដ្ឋ គ្រឹះស្ថានឯកជន ម្ចាស់ផ្ទះសំណាក់ សណ្ឋាគារ ខារ៉ាអូខេ ក្លឹបកម្សាន្ត ឲ្យមានសកម្មភាពផុលផុសថែមទៀតនៅក្នុងយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី២ សំដៅកាត់បន្ថយឲ្យបានជាអតិបរមានូវផលប៉ះពាល់អវិជ្ជមាន និងការគំរាមកំហែងនានា ដែលបង្កឡើងដោយគ្រឿងញៀន។

ឆ្លៀតក្នុងឱកាសនោះផងដែរ លោកអភិបាលខេត្ត ក៏បានផ្ដាំផ្ញើដល់គណៈបញ្ជាការឯកភាពរដ្ឋបាលក្រុង ស្រុក ត្រូវការពារសន្តិសុខ សុវត្ថិភាព ជូនប្រជាពលរដ្ឋឲ្យបានល្អប្រសើរក្នុងឱកាសបុណ្យកាន់បិណ្ឌ និងភ្ជុំបិណ្ឌ៕

អនុប្រធានសភាប្រឹក្សាភិបាលប្រជាជនចិន ដឹកនាំគណៈប្រតិភូធ្វើទស្សកិច្ចនៅកម្ពុជា និងជួបសវនាការជាមួយ លោក ហេង សំរិន

អនុប្រធានសភាប្រឹក្សាភិបាលប្រជាជនចិន លោក Wang Jiarui ដែលកំពុងដឹកនាំគណៈប្រតិភូ ធ្វើទស្សកិច្ច នៅកម្ពុជា បានប្រកាសធ្ងន់ៗថា « កម្ពុជាមានឧបសគ្គ ចិននៅពីក្រោយចាំជួយគាំទ្រ ជោគជ័យរបស់កម្ពុជា ក៏ដូចជាជោគជ័យរបស់ចិន ឧបសគ្គរបស់កម្ពុជា ក៏ដូចជាឧបសគ្គរបស់ចិន »។

ការបញ្ជាក់ជំហររបស់ប្រទេសចិនយ៉ាងដូច្នេះរបស់លោក Wang Jiarui ធ្វើឡើងក្នុងឱកាសដែលលោកចូល ជួបសវនាការជាមួយ លោក ហេង សំរិន ប្រធានរដ្ឋសភា នៅព្រឹកថ្ងៃទី៧ ខែកញ្ញា ឆ្នាំ២០១៧នេះ។

លោក សន សរណា ទីប្រឹក្សាលោក ហេង សំរិន ថ្លែង បានប្រាប់ក្រោយបញ្ចប់សវនាការ យ៉ាងដូច្នេះថា « អនុប្រធានសភាប្រឹក្សាភិបាលប្រជាជនចិន លោក Wang Jiarui បានជំរាបជូនលោកប្រធានរដ្ឋសភាថា ដើម្បី ធានានូវនយោបាយ ស្ថិរភាពរបស់ប្រជាជាតិ លោកនាយករដ្ឋមន្រ្ដី ហ៊ុន សែន បានដោះស្រាយ បញ្ហាផ្ទៃក្នុង បានល្អប្រសើរ ក្នុងរយៈពេលប៉ុន្មានថ្ងៃនេះ រាជរដ្ឋាភិបាលបានចាប់ លោក កឹម សុខា ក្រសួងការ បរទេសចិន សូមធ្វើការគាំទ្រ ចំពោះកិច្ចការនេះ និងសូមធានាដល់សន្តិសុខប្រទេសកម្ពុជា ប្រទេសចិន នឹងជួយសហ ការប្រទេសកម្ពុជា នៅគ្រប់កាលៈទេសៈ កម្ពុជាមានឧបសគ្គ ប្រទេសចិននៅពីក្រោយជួយគាំទ្រដំណើរនេះ ជោគជ័យរបស់កម្ពុជា ក៏ដូចជាជោគជ័យរបស់ប្រទេសចិន ឧបសគ្គកើតឡើង ចំពោះប្រទេសកម្ពុជា ក៏ដូចជាឧបសគ្គចំពោះប្រទេសចិន សង្ឃឹមថា ប្រទេសកម្ពុជាមានសេដ្ឋកិច្ចល្អយ៉ាងខ្លាំងនៅពេលអនាគត »។

សូមបញ្ជាក់ថា លោក កឹម សុខា ត្រូវបានកម្លាំងសមត្ថកិច្ចចាប់ខ្លួននៅវេលាម៉ោងប្រមាណ១២:៣៥នាទី រំលងអាធ្រាត្រឈានចូលថ្ងៃទី០៣ ខែកញ្ញា ឆ្នាំ២០១៧ នៅគេហដ្ឋានរបស់លោកស្ថិតនៅក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ ក្រោយពីមានការបែកធ្លាយវីដេអូក្បត់ជាតិមួយ ដែលលោកធ្វើតាម សហរដ្ឋ អាមេរិក ដើម្បីក្នុងគោលដៅផ្តួលរំលំរាជរដ្ឋាភិបាលកម្ពុជាដែលកើតចេញពីការបោះឆ្នោត។

រាជរដ្ឋាភិបាលកម្ពុជា បានចេញសេចក្តីថ្លែងការណ៍ភ្លាមៗ ក្រោយការចាប់ខ្លួននេះ ដោយបានចាត់ទុកកាយវិការ និងសកម្មភាពរបស់មេបក្សប្រឆាំង តាមរយៈការនិយាយដោយផ្ទាល់មាត់នៅក្នុងវីដេអូនេះថា ជាអំពើក្បត់ជាតិ ដែលមានចែង និងផ្តន្ទាទោសតាមបញ្ញត្តិនៃមាត្រា ៤៤៣ (បទសន្ទិដ្ឋិភាពជាមួយបរទេស) ក្នុងផ្នែកទី១ ស្តីពីអំពើក្បត់ជាតិ និងអំពើចារកម្ម ជំពូកទី២ ស្តីពីការប៉ះពាល់សន្តិសុខនៃរដ្ឋ មាតិកាទី១ ស្តីពីអំពើក្បត់ជាតិ និងអំពើចារកម្មជំពូកទី២ ស្តីពីការប៉ះពាល់ដល់សន្តិសុខនៃរដ្ឋ មាតិកាទី១ ស្តីពីការប៉ះពាល់ដល់ស្ថាប័នចម្បង របស់រដ្ឋ គន្ថីទី៤ ស្តីពីបទល្មើសប្រឆាំងនឹងជាតិ នៃក្រមព្រហ្មទណ្ឌរបស់ប្រទេសកម្ពុជា។

តាមរយៈសេចក្តីថ្លែងការណ៍នេះ រាជរដ្ឋាភិបាល បានអំពាវនាវដល់ប្រជាពលរដ្ឋរក្សាភាពស្ងប់ស្ងាត់ និងទុកករណីនេះជូនតុលាការ ដើម្បីចាត់ការបន្ត ៕

លោកឧបនាយករដ្ឋមន្រ្តី ស ខេង ជំរុញឱ្យសហព័ន្ធសហជីពកម្មករបន្តសកម្មភាពការពារផលប្រយោជន៍កម្មករនិយោជិត

លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានបើកកិច្ចប្រជុំលើកទី២អំពីសកម្មភាពការងារ និងការវិវត្តន៍របស់សហភាពសហព័ន្ធសហជីពរបស់កម្មករ-កម្មការិនីក្នុងវិស័យកាត់ដេរដើម្បីរក្សាផលប្រយោជន៍ជូនកម្មករ។ កិច្ចប្រជុំនេះ បានធ្វើឡើងនាទីស្តីការក្រសួងមហាផ្ទៃក្រោមអធិបតីភាព លោកឧបនាយករដ្ឋមន្រ្តី ស ខេង ជាមួយនិងតំណាងប្រធានសហភាពសហព័ន្ធសហជីពជាង៣០ស្ថាប័ន កាលពីថ្ងៃទី០៦ ខែកញ្ញា ឆ្នាំ២០១៧។

លោក ស ខេង បានថ្លែងទៅកាន់តំណាងសហភាពសហជីពទាំងអស់ឱ្យ មានការប្រឹងប្រែង ជំរុញដើម្បីឱ្យកម្មករមានជីវភាពកាន់តែប្រសើរឡើង។ លោកក៏បានលើកឡើងថារដ្ឋាភិបាល នឹងឧបត្ថម្ភកុំព្យូទ័រ ម៉ាស៊ីនថតចម្លងសម្រាប់ជួយសម្រួលដល់ការអនុវត្តការងារប្រចាំថ្ងៃរបស់សហជីពជាមួយនឹងកម្មករ-កម្មការិនី​​ដើម្បីបន្តការពារផលប្រយោជន៍ជូនកម្មករ-កម្មការិនី និងរួមចំណែកជាមួយរដ្ឋាភិបាលរួមគ្នាកសាងជីវភាព កម្មករនិយោជិតឱ្យកាន់តែប្រសើរ។ ស្របពេលជាមួយការយកចិត្តទុកដាក់របស់រាជរដ្ឋាភិបាលទៅលើកម្មការិនីនៃវិស័យកាត់ដេរនោះ ក្នុងដើមឆ្នាំ២០១៨ លោកនាយករដ្ឋមន្ត្រី ហ៊ុន សែន បានប្រកាសថារដ្ឋាភិបាលនឹងឧបត្ថម្ភកម្មការិនី សម្រាលកូនមួយនាក់គឺទទួលបានចំនួន៤០០,០០០រៀល សម្រាលកូនភ្លោះពីរនាក់នឹងទទួលបានចំនួន ៨០០,០០០រៀល ហើយសម្រាលកូនភ្លោះ៣នាក់គឺទទួល​​​បានចំនួន ១,២០០,០០០រៀលផងដែរ។ នៅក្នុងឱកាសនោះ លោកឧបនាយករដ្ឋមន្ត្រី ស ខេង បានសំណូមពរដល់សហព័ន្ធសហជីពបន្ត សកម្មភាពការពារផលប្រយោជន៍កម្មករផង និងផលប្រយោជន៍ជាតិផង។

យោងតាមការលើកឡើងរបស់លោក សោម អូន ប្រធានសភាសម័្ពន្ធសហជីពជាតិកម្ពុជាបានឱ្យដឹង ថាសហគ្រាសរោងចក្រកាត់ដេរបានកើនមកទល់បច្ចុប្បន្នមានចំនួន ១១០៧រោងចក្រ និងការនាំចេញ មានចំនួនជាង៧ពាន់លានដុល្លារសហរដ្ឋអាមេរិក ដែលនេះជាការរួមចំណែកមួយ ជំរុញការអភិវឌ្ឍប្រទេស កម្ពុជា។ លោកបន្តថា សព្វថ្ងៃមានកម្មករ កម្មការិនីធ្វើការក្នុងវិស័យកាត់ ដេរចំនួនជាង៧៥ម៉ឺននាក់ក្នុងទូទាំង ប្រទេសកម្ពុជា។ លោក សោម អូន បានបន្ថែមថាអ្នកវិយោគិនភាគច្រើន មកវិនិយោគលើវិស័យកាត់ដេរ ក្នុងប្រទេសកម្ពុជាភាគច្រើនជាជនជាតិចិនហុងកុង និងចិនប៉េកាំង៕

កូនប្រុសលោក ហ៊ុន សែន លើកឡើងថា ៖ លោក កឹម សុខា ពឹងបរទេសផ្តួលរំលំរដ្ឋាភិបាលកម្ពុជា មិនខុសពីសម័យ លន់ ណុល

គណបក្សនយោបាយមួយ បោះឆ្នោតមិនដែលឈ្នះគណបក្សប្រជាជនកម្ពុជាទេ ប៉ុន្តែបែរជាទៅពឹងបរទេស និងបានធ្វើបាតុកម្មប្រឆាំងផ្តួលររំលំរដ្ឋាភិបាលកម្ពុជា។ លោក កឹម សុខាបាននិយាយអួតពីខ្លួនឯងថា មានបរទេសជួយធ្វើផែនការយុទ្ធសាស្រ្តផ្តួលរំលំរដ្ឋាភិបាលតាមបែបយូហ្គស្លាវី។ ការធ្វើបែបនេះ មិនខុសពីអតីតកាលសម័យ លន់ ណុល ប៉ុន្តែប្រទេសមានច្បាប់គេធ្វើតាមច្បាប់ដើម្បីថែរក្សាសុខសន្តិភាព។

នេះជាប្រសាសន៍លើកឡើង របស់លោក ហ៊ុន ម៉ាណែត តំណាងដ៏ខ្ពង់ខ្ពស់របស់លោកនាយករដ្ឋមន្រ្តី និងភរិយា នាពេលអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការនូវវិហារឥស្លាម អាល់មូហាជីរីន ស្ថិតនៅភូមិបេងថ្មី ឃុំសេដា ស្រុកតំបែរ ខេត្តត្បូងឃ្មុំ កាលពីព្រឹកថ្ងៃទី៦ ខែកញ្ញា ឆ្នាំ២០១៧។
លោក ហ៊ុន ម៉ាណែត មានប្រសាសន៍បន្តថា ការចូលរួមនៅក្នុងវិស័យសាសនា គឺជាការបង្ហាញពីការរីកលូតលាស់ខាងវិស័យសាសនា ក្រោមដំបូលសន្តិភាពដែលធ្វើឱ្យមនុស្សធ្វើអំពើល្អ ស្រលាញ់រាប់អានគ្នាដែលនេះ គឺជាគោលនយោបាយរបស់រាជរដ្ឋាភិបាលក្នុងការយកចិត្តទុកដាក់លើសាសនាផ្សេងៗ។ នេះគឺជាជោគសំណាងរបស់ប្រជាពលរដ្ឋខ្មែរដែលស្រលាញ់គ្នា មិនរើសអើងគ្នា ហើយចូលរួមថែរក្សាសុខសន្តិភាពទាំងអស់គ្នា។ សូមឱ្យស្មារតីនៃការស្រលាញ់ស្រលាញ់ រាប់អានគ្នានេះស្ថិតនៅក្នុងទឹកចិត្តប្រជាពលរដ្ឋខ្មែរជានិច្ច។
លោកបន្តថា ការអប់រំបានលើកតម្កើនឱ្យយើងស្រលាញ់គ្នាហើយក៏ជាការផ្តល់ឱកាស និងជាការចូលរួមរបស់ប្រជាពលរដ្ឋ សាសនិកឥស្លាមជាមួយរាជរដ្ឋាភិបាល។ នេះគឺជាការចាក់គ្រឹះយ៉ាងជ្រៅចំពោះការរីកចម្រើនរបស់ប្រទេសជាតិ។ ការកសាងប្រទេសទៅមុខទៀត គឺអាស្រ័យលើសន្តិភាពដែលពាក្យនេះ មានន័យច្រើនណាស់សម្រាប់ការរស់នៅលែងមានភាពភ័យខ្លាចសម្រាប់ប្រជាពលរដ្ឋនិងមានជីវភាពធូធារ។

លោក ហ៊ុន ម៉ាណែត បន្ថែមទៀតថា យើងរស់នៅជាមួយគ្នា យើងស្រលាញ់រាប់អានគ្នាជាយូមកហើយ មិនឱ្យប្រេះឆាជាមួយគ្នាទេព្រោះពេលវេលាដែងយើងខំកសាងជាយូមកហើយប៉ុន្តែបើយើងឈ្លោះគ្នានោះមិនដឹងថាពេលណាយើងត្រូវគ្នានោះទេ។ ដូច្នេះយើងត្រូវថែរក្សាទឹកចិត្តថែរក្សាស្រលាញ់រាប់អានគ្នា។ អ្នកនយោបាយគួរតែប្រកួតប្រជែងតាមការបោះឆ្នោតកុំយកប្រជាពលរដ្ឋធ្វើបាតុកម្មផ្តួលរំលំរដ្ឋាភិបាល។
ជាចុងក្រោយលោក ហ៊ុន ម៉ាណែត បានបញ្ជាក់បន្ថែមថា ប្រមុខរាជរដ្ឋាភិបាលកម្ពុជា លោកនាយករដ្ឋមន្រ្តី ហ៊ុន សែន បានយកជីវិតមកផ្សងហើយបោះបង់គ្រួសារដើម្បីស្វែងរកសុខសន្តិភាពបញ្ចប់សង្គ្រាមសម្រាប់ប្រជាពលរដ្ឋនិងប្រទេសជាតិ។
រាជរដ្ឋាភិបាល បានខិតខំដោះស្រាយបញ្ហាព្រំដែនជាមួយប្រទេសឡាវ កុំអោយមានការពិបាកសម្រាប់កូនចៅជំនាន់ក្រោយ។ ភាពក្លាហានរបស់សម្តេចតេជោធ្វើសម្រាប់ប្រជាពលរដ្ឋនិងប្រទេសជាតិទាំងមូល។ សូមប្រជាពលរដ្ឋជឿទុកចិត្តចុះ។ លោកសូមអរគុណបងប្អូនប្រជាពលរដ្ឋខ្មែរឥស្លាមដែលបានជឿទុកចិត្តគាំទ្រនិងបោះឆ្នោតជូនគណបក្សប្រជាជនកម្ពុជានិងលោកនាយករដ្ឋមន្រ្តី ហ៊ុន សែន ៕