អនុប្រធានសភាប្រឹក្សាភិបាលប្រជាជនចិន ដឹកនាំគណៈប្រតិភូធ្វើទស្សកិច្ចនៅកម្ពុជា និងជួបសវនាការជាមួយ លោក ហេង សំរិន

អនុប្រធានសភាប្រឹក្សាភិបាលប្រជាជនចិន លោក Wang Jiarui ដែលកំពុងដឹកនាំគណៈប្រតិភូ ធ្វើទស្សកិច្ច នៅកម្ពុជា បានប្រកាសធ្ងន់ៗថា « កម្ពុជាមានឧបសគ្គ ចិននៅពីក្រោយចាំជួយគាំទ្រ ជោគជ័យរបស់កម្ពុជា ក៏ដូចជាជោគជ័យរបស់ចិន ឧបសគ្គរបស់កម្ពុជា ក៏ដូចជាឧបសគ្គរបស់ចិន »។

ការបញ្ជាក់ជំហររបស់ប្រទេសចិនយ៉ាងដូច្នេះរបស់លោក Wang Jiarui ធ្វើឡើងក្នុងឱកាសដែលលោកចូល ជួបសវនាការជាមួយ លោក ហេង សំរិន ប្រធានរដ្ឋសភា នៅព្រឹកថ្ងៃទី៧ ខែកញ្ញា ឆ្នាំ២០១៧នេះ។

លោក សន សរណា ទីប្រឹក្សាលោក ហេង សំរិន ថ្លែង បានប្រាប់ក្រោយបញ្ចប់សវនាការ យ៉ាងដូច្នេះថា « អនុប្រធានសភាប្រឹក្សាភិបាលប្រជាជនចិន លោក Wang Jiarui បានជំរាបជូនលោកប្រធានរដ្ឋសភាថា ដើម្បី ធានានូវនយោបាយ ស្ថិរភាពរបស់ប្រជាជាតិ លោកនាយករដ្ឋមន្រ្ដី ហ៊ុន សែន បានដោះស្រាយ បញ្ហាផ្ទៃក្នុង បានល្អប្រសើរ ក្នុងរយៈពេលប៉ុន្មានថ្ងៃនេះ រាជរដ្ឋាភិបាលបានចាប់ លោក កឹម សុខា ក្រសួងការ បរទេសចិន សូមធ្វើការគាំទ្រ ចំពោះកិច្ចការនេះ និងសូមធានាដល់សន្តិសុខប្រទេសកម្ពុជា ប្រទេសចិន នឹងជួយសហ ការប្រទេសកម្ពុជា នៅគ្រប់កាលៈទេសៈ កម្ពុជាមានឧបសគ្គ ប្រទេសចិននៅពីក្រោយជួយគាំទ្រដំណើរនេះ ជោគជ័យរបស់កម្ពុជា ក៏ដូចជាជោគជ័យរបស់ប្រទេសចិន ឧបសគ្គកើតឡើង ចំពោះប្រទេសកម្ពុជា ក៏ដូចជាឧបសគ្គចំពោះប្រទេសចិន សង្ឃឹមថា ប្រទេសកម្ពុជាមានសេដ្ឋកិច្ចល្អយ៉ាងខ្លាំងនៅពេលអនាគត »។

សូមបញ្ជាក់ថា លោក កឹម សុខា ត្រូវបានកម្លាំងសមត្ថកិច្ចចាប់ខ្លួននៅវេលាម៉ោងប្រមាណ១២:៣៥នាទី រំលងអាធ្រាត្រឈានចូលថ្ងៃទី០៣ ខែកញ្ញា ឆ្នាំ២០១៧ នៅគេហដ្ឋានរបស់លោកស្ថិតនៅក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ ក្រោយពីមានការបែកធ្លាយវីដេអូក្បត់ជាតិមួយ ដែលលោកធ្វើតាម សហរដ្ឋ អាមេរិក ដើម្បីក្នុងគោលដៅផ្តួលរំលំរាជរដ្ឋាភិបាលកម្ពុជាដែលកើតចេញពីការបោះឆ្នោត។

រាជរដ្ឋាភិបាលកម្ពុជា បានចេញសេចក្តីថ្លែងការណ៍ភ្លាមៗ ក្រោយការចាប់ខ្លួននេះ ដោយបានចាត់ទុកកាយវិការ និងសកម្មភាពរបស់មេបក្សប្រឆាំង តាមរយៈការនិយាយដោយផ្ទាល់មាត់នៅក្នុងវីដេអូនេះថា ជាអំពើក្បត់ជាតិ ដែលមានចែង និងផ្តន្ទាទោសតាមបញ្ញត្តិនៃមាត្រា ៤៤៣ (បទសន្ទិដ្ឋិភាពជាមួយបរទេស) ក្នុងផ្នែកទី១ ស្តីពីអំពើក្បត់ជាតិ និងអំពើចារកម្ម ជំពូកទី២ ស្តីពីការប៉ះពាល់សន្តិសុខនៃរដ្ឋ មាតិកាទី១ ស្តីពីអំពើក្បត់ជាតិ និងអំពើចារកម្មជំពូកទី២ ស្តីពីការប៉ះពាល់ដល់សន្តិសុខនៃរដ្ឋ មាតិកាទី១ ស្តីពីការប៉ះពាល់ដល់ស្ថាប័នចម្បង របស់រដ្ឋ គន្ថីទី៤ ស្តីពីបទល្មើសប្រឆាំងនឹងជាតិ នៃក្រមព្រហ្មទណ្ឌរបស់ប្រទេសកម្ពុជា។

តាមរយៈសេចក្តីថ្លែងការណ៍នេះ រាជរដ្ឋាភិបាល បានអំពាវនាវដល់ប្រជាពលរដ្ឋរក្សាភាពស្ងប់ស្ងាត់ និងទុកករណីនេះជូនតុលាការ ដើម្បីចាត់ការបន្ត ៕