Thursday, January 25, 2018

លោកឧបនាយករដ្ឋមន្រ្តី ប៊ិន ឈិន ថ្លែងថា សមិទ្ធផលទាំងឡាយពិតជាមិនអាចកើតឡើងបានទេ បើគ្មានកិច្ចខិតខំប្រឹងប្រែង គោលនយោបាយនិងយុទ្ធសាស្រ្តដ៏ត្រឹមត្រូវរបស់រាជរដ្ឋាភិបាល

លោកឧបនាយករដ្ឋមន្រ្តីប្រចាំការ ប៊ិន ឈិន រដ្ឋមន្រ្តីស្តីទីទទួលបន្ទុកទីស្តីការគណៈរដ្ឋមន្រ្តី បានថ្លែងថា សមិទ្ធផលទាំងឡាយប្រាកដជាមិនអាចកើតមានឡើងបានទេ ប្រសិនបើគ្មានកិច្ចខិត​ខំប្រឹងប្រែង គោលនយោបាយ និងយុទ្ធសាស្រ្តដ៏ត្រឹមត្រូវរបស់រាជរដ្ឋាភិបាលក្រោមការដឹ​ក​នាំប្រកបដោយគតិបណ្ឌិតរបស់លោកនាយករដ្ឋមន្រ្តី ហ៊ុន សែន។ លោកបានថ្លែងដូចនេះក្នុងឱកាសបើកសន្និបាតបូកសរុបលទ្ធផលការងារអាកាសចរស៊ីវិលឆ្នាំ២០១៣-២០១៧ និងលើ​កទិសដៅសម្រាប់ឆ្នាំ ២០១៨-២០២៣ នៅសណ្ឋាគារសុខាភ្នំពេញ រាជធានីភ្នំពេញ នៅថ្ងៃព្រ​​ហស្បត្តិ៍ ៩កើត ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៥ ខែមករា ឆ្នាំ២០​១​៨​។​

លោកឧបនាយករដ្ឋមន្រ្តី ប៊ិន ឈិន បានបញ្ជាក់ថា គោលនយោបាយ «ឈ្នះ-ឈ្នះ» បាននាំមកនូវឯកភាពជាតិ សុខសន្តិភាព និងស្ថិរភាពពេញផ្ទៃប្រទេសដែលពុំធ្លាប់មានក្នុងរយៈកាលប្រមាណ ៥០០ឆ្នាំចុងក្រោយ នៃប្រវត្តិសាស្រ្តដ៏យូរលង់របស់កម្ពុជា ហើយដែលសន្តិភាព និងស្ថិរភាពនយោបាយនេះ គឺជាមូលដ្ឋានគ្រឹះដ៏ចាំបាច់សម្រាប់ការអភិ​វឌ្ឍគ្រប់វិស័យ រួមទាំងវិស័យអាកាសចរណ៍ស៊ីវិលផងដែរ។ លោកបានបន្ថែមថា សន្និបាតបូកសរុបលទ្ធផលការងារអា​កា​សចរស៊ីវិលនេះ​ ក៏បានប្រព្រឹត្តទៅចំពេលដែលប្រទេសជាតិយើងកំពុងស្ថិតក្នុងសន្តិភាពពេ​ញ​បរិបូរណ៍ ហើយប្រជាពលរដ្ឋនិងប្រជាជាតិទាំងមូលក៏កំពុងទទួលបាននូវមនុញ្ញផលនៃសន្តិភាពនេះជាមួយរាជរដ្ឋាភិបាលកម្ពុជាផងដែរ។

លោកឧបនាយករដ្ឋមន្រ្តី ប៊ិន ឈិន បានគូសបញ្ជាក់ថា ក្នុងរបបប្រល័យពូជសាសន៍ ប៉ុល ពត ហេ​​ដ្ឋារចនាសម្ព័ន្ធសង្គម សេដ្ឋកិច្ច និងរូបវ័ន្តនានាព្រមទាំងធនធានមនុស្ស ត្រូវបានបំផ្លិចបំ​ផ្លា​ញដល់ឬសគល់  វិស័យអាកាសចរណ៍របស់យើងក៏បានផ្អាកដំណើរការផងដែរនៅពេលនោះ​។ ក្រោយថ្ងៃរំដោះ ៧ មករា ១៩៧៩ វិស័យអាកាសចរណ៍កម្ពុជាត្រូវបានដាក់ឱ្យដំណើរការសារជាថ្មី ដោយផ្តើ​មចេញពីស្ថានភាពដ៏លំបាកលំបិនបំផុត ឈានទៅមុខជាជំហានៗ និងរហូតមកដល់ពេលនេះ យើងបានឆ្លងកាត់ពីដំណាក់កាលរីកចម្រើនមួយទៅដំណាក់កាលរីកចម្រើនមួយទៀត ទាំងហេដ្ឋារចនាសម្ព័ន្ធរូបវ័ន្ត ទាំងទំហំប្រតិបត្តិការប្រកបដោយមោទនៈភាព ជាពិសេសគឺបន្ទាប់ពីរាជរដ្ឋាភិបាលកម្ពុជាក្រោមការដឹកនាំរបស់លោកនាយករដ្ឋមន្រ្តី ហ៊ុន សែ​ន បានដាក់ចេញនូវគោលនយោបាយ «បើកចំហរជើងមេឃ» ដែលបាននិងកំពុងប្រែក្លាយប្រ​ទេសកម្ពុជាទៅជាមជ្ឈមណ្ឌលអាកាសចរណ៍ និងទេសចរណ៍មួយដែលមានភាពទាក់ទាញក្នុងតំបន់និងពិភពលោក។

លោក ប៊ិន ឈិន បានសង្កត់ធ្ងន់ថា ក្រោមការដឹកនាំរបស់លោកនាយករដ្ឋមន្រ្តី ហ៊ុន សែន និងតាមរយៈការដាក់ចេញនូវចក្ខុវិស័យវែងឆ្ងាយដ៏ត្រឹមត្រូវសម្រាប់ការអភិវឌ្ឍប្រទេសជាតិ រួមជាមួយគោលនយោបាយ និងយុទ្ធសាស្រ្តប្រកបដោយភាពជាក់ស្តែង ប្រាកដនិយម និងភាពម៉ឺងម៉ាត់ កម្ពុជាសម្រេចបាននូវសមិទ្ធផលល្អប្រសើរ ជាមួយនឹងកំណើនសេដ្ឋកិច្ចខ្ពស់ និងការកាត់បន្ថយភាពក្រីក្ររបស់ប្រជាជនគួរឱ្យកត់សម្គាល់។ លោកបានបន្ថែមថា ជាមួយនឹងសមិទ្ធផលនេះ ធនាគារអភិវឌ្ឍន៍អាស៊ីបានចាត់ទុកប្រទេសកម្ពុជាជាប្រទេសមួយក្នុងចំណោមប្រ​ទេ​ស​ដែលមានកំណើនសេដ្ឋកិច្ចលឿនបំផុតនៅតំបន់អាស៊ី ហើយបានប្រសិទ្ធនាមប្រទេសកម្ពុជា ជា «ខ្លាសេដ្ឋកិច្ចថ្មីនៅអាស៊ី» ទៀតផង។

លោកឧបនាយករដ្ឋមន្រ្តី ប៊ិន ឈិន ក៏បានបញ្ជាក់ថា វិស័យអាកាសចរណ៍ស៊ីវិលជាវិស័យ​មួ​យ​ដែលកំពុងមានភាពទាក់ទាញ និងរីកចម្រើនប្រកបដោយសក្តានុពល ដែលជាផ្នែកដ៏សំ​​ខា​ន់​​​មួយមិនអាចខ្វះបាននៃសេដ្ឋកិច្ចពិភពលោក ដែលកាន់តែមានលក្ខណៈជាសាកលតាមរយៈកា​រ​ជួយសម្រួលពាណិជ្ជកម្មអន្តរជាតិ ទេសចរណ៍ និងវិនិយោគទុនអន្តរជាតិព្រមទាំងជួយភ្ជា​ប់​​ប្រជាជនពីទ្វីបមួយទៅទ្វីបមួយទៀតនៅទូទាំងពិភពលោក។ ដើម្បីឱ្យវិស័យអាកាសចរណ៍ស៊ីវិលនៅតែបន្តជួយជំរុញការអភិវឌ្ឍសេដ្ឋកិច្ចសង្គម និងកាត់បន្ថយបាននូវភាពក្រីក្រនៅកមម្ពុជា លោកឧបនាយករដ្ឋមន្រ្តី ប៊ិន ឈិន បានស្នើសុំឱ្យអង្គសន្និបាតបន្តយកចិត្តទុកដាក់ផ្លាស់ប្តូរគំនិត ពិគ្រោះយោបល់គ្នា រិះរកដំណោះស្រាយបញ្ហាប្រឈមនានាដែលបានជួបប្រទះក្នុងពេលបំពេញភារកិច្ច ជាពិសេសត្រូវយកចិត្តទុកដាក់លើបញ្ហាមួយចំនួនដូចជា៖ ការកែទម្រង់ស្ថាប័ន បញ្ហាសុវត្ថិភាព-សន្តិសុខអាកាសចរណ៍ និងការបណ្តុះបណ្តាលធនធានមនុស្សជាដើម។

គួរបញ្ជាក់ថា បច្ចុប្បន្ននេះ ចំពោះសេវាកម្មដឹកជញ្ជូនតាមផ្លូវអាកាស កម្ពុជាមានក្រុមហ៊ុនអា​កា​ស​​​ចរណ៍ក្នុងស្រុកចំនួន១០ កំពុងប្រតិបត្តិការហោះហើរដឹកជញ្ជូនអ្នកដំណើរ និងទំនិញចេញ-ចូល លើដំណាក់ផ្លូវហោះហើរក្នុងស្រុក និងអន្តរជាតិ មានដូចជា៖ ១- ក្រុមហ៊ុនខាមបូឌាអង្គរអ៊ែរ ២- ក្រុមហ៊ុន ស្កាយអង្គរ អ៊ែរឡាញ ៣- ក្រុមហ៊ុន ខេមបូឌា បាយ័ន អ៊ែរឡាញ ៤- ក្រុមហ៊ុន បាសសាកា អ៊ែរ ៥- ក្រុមហ៊ុន ជេស៊ី ខាមបូឌារ អ៊ិនធើណេសសិណល អ៊ែរឡាញ ៦- ក្រុមហ៊ុន ឡានម៉ី អ៊ែរឡាញ ៧- ក្រុមហ៊ុន ស្មលផ្លែនណេត និងមានក្រុមហ៊ុនឧទ្ធម្ភាគចក្រចំនួនពីរគឺ ៨- ក្រុមហ៊ុន ហេលិខបធឺ ខេមបូឌា ៩- ក្រុមហ៊ុន ហេលិស្តារ ខេមបូឌា ១០- ក្រុមហ៊ុន Union Development Group។ ក្រុមហ៊ុនអាកាសចរណ៍ក្នុងស្រុកមួយចំនួនទៀត ដែលបាននិងកំពុងស្នើសុំវិញ្ញាបនបត្រប្រតិបត្តិការហោះហើរ (AOC) ពីរដ្ឋលេខាធិការដ្ឋានអាកាសចរណ៍ស៊ីវិល ដើម្បីអាចដំណើរការហោះហើរដឹកជញ្ជូនអ្នកដំណើរ និងទំនិញក្នុងស្រុក និងក្រៅស្រុកនៅកម្ពុជា៕







អាជ្ញាកណ្ដាលកម្ពុជា៩រូប ជាប់ឈ្មោះកម្រិតអាជ្ញាកណ្ដាលអន្តរជាតិ FIFA

អាជ្ញាកណ្ដាលក្នុងស្រុកចំនួន៩រូប ជាប់ឈ្មោះជាអាជ្ញាកណ្ដាលអន្តរជាតិដែលទទួលស្គាល់ដោយសហព័ន្ធកីឡាបាល់ទាត់អន្តរជាតិ (FIFA) សម្រាប់ដឹកនាំការប្រកួតនៅក្នុងឆ្នាំ២០១៨ នេះទាំងក្នុងនិងក្រៅប្រទេស ប្រចាំទ្វីបអាស៊ី សម្រាប់ការប្រកួតពានរង្វាន់អន្តរជាតិនានា។

យោងតាមវេបសាយរបស់ FIFA អាជ្ញាកណ្ដាលទាំង៩រូប មាន៣រូបជាអាជ្ញាកណ្ដាលលើទីលាន ៥រូបជាអាជ្ញាកណ្ដាលខ្សែបន្ទាត់ ឬជំនួយការអាជ្ញាកណ្ដាល និង១រូបជាអាជ្ញាកណ្ដាលកីឡាបាល់ទាត់ក្នុងសាល។ ចំពោះអាជ្ញាកណ្ដាលលើទីលានទាំង៣រូបមាន លោក ជី សាមឌី ,លោក ឃួន វីរៈ, និងលោក លឹម ប៊ុនធឿន ខណៈជំនួយការអាជ្ញាកណ្ដាលមានលោក ចេង ចាន់តារា,លោក ឈី សុភាព, លោក គឹម ស៊ីពិសាល, លោក ស៊ុន ចាន់ភារិទ្ធិ និងលោក ស៊ុន ដារ៉ាវុធ។ ចំណែកអាជ្ញាកណ្ដាលសម្រាប់កីឡាបាល់ទាត់ក្នុងសាល គឺលោក សៀង សុភ័ក្រ៕


ស្វែងយល់ពីប្រទេសឥណ្ឌាទីដែលលោកនាយករដ្ឋមន្ត្រី ហ៊ុន សែន កំពុងបំពេញដំណើរទស្សនកិច្ច

លោកនាយករដ្ឋមន្រ្តី ហ៊ុន សែន កំពុងបំពេញទស្សនកិច្ចនៅសាធារណរដ្ឋឥណ្ឌាចាប់ពីថ្ងៃទី២៥ ដល់ថ្ងៃទី២៨ ខែមករា ឆ្នាំ២០១៨នេះ។ ឆ្លៀតឱកាសនេះ សូមបង្ហាញពីព័ត៌មានសំខាន់ៗពាក់ព័ន្ធនឹងប្រទេសនៅអាស៊ីខាងត្បូងមួយនេះ៖

ប្រទេសឥណ្ឌា ជាប្រទេសប្រជាធិបតេយ្យដ៏ធំជាងគេលើពិភពលោក ហើយតាមការព្យាករណ៍របស់អង្គការសហប្រជាជាតិបានឱ្យដឹងថា ចំនួនប្រជាជនរបស់ប្រទេសនេះ នឹងមានចំនួនច្រើ​នជាងប្រទេសចិនក្នុងឆ្នាំ២០២៨ខាងមុខ ព្រមទាំងក្លាយជាប្រទេសដែលមានចំនួនប្រជាជនច្រើ​នជាងគេលើពិភពលោកផងដែរ។ ខណៈដែលប្រទេសនេះកំពុងមានកំណើនសេដ្ឋកិច្ចនិងជារដ្ឋនុយក្លេអ៊ែរផងនោះ ប្រទេសឥណ្ឌាបានក្លាយជារដ្ឋដ៏មានអំណាចមួយក្នុងតំបន់។ យ៉ាងនេះក្តី ប្រទេសឥណ្ឌាក៏ត្រូវប្រឈមមុខនឹងបញ្ហាធ្ងន់ធ្ងរជាច្រើនផងដែរដូចជាបញ្ហាសង្គម សេដ្ឋកិច្ច និងបរិស្ថាន។

ឧបទ្វីបឥណ្ឌា ជាដែនដីមួយដែលបន្សល់ទុកនូវអារ្យធម៌ដ៏ចំណាស់ជាងគេលើពិភពលោកលា​តសន្ធឹងចេញពីតំបន់ភ្នំជាប់បន្ទាត់ព្រំដែនប្រទេស អាហ្វហ្កានីស្ថាន ទៅកាន់តំបន់ព្រៃនៃប្រ​ទេសភូមា ហេតុនេះដែនដីឥណ្ឌាជាដែនដីធំ ហើយចម្រុះដោយជនជាតិ ភាសា វប្បធម៌ និងប្រពៃណីជាច្រើនប្រភេទ។

* ឈ្មោះផ្លូវការ៖ សាធារណរដ្ឋឥណ្ឌា
* រដ្ឋធានី៖ ញ៉ូវដេលី
* ចំនួនប្រជាជន៖ ១,៣ពាន់លាននាក់
* ផ្ទៃក្រឡា៖ ៣,១លានម៉ែតការ៉េ ក្នុងនោះរួមទាំងដែនដីកាស្មៀផងដែរ។
* ភាសាសំខាន់ៗ៖ ហិណ្ឌី អង់គ្លេស និងភាសាផ្លូវការចំនួន២០ផ្សេងទៀត។
* សាសនារដ្ឋ៖ ហិណ្ឌូ ឥស្លាម គ្រីស្ទាន ព្រះពុទ្ធ និង ស៊ីក និងសាសនាផ្សេងៗជាច្រើនទៀត។
* អត្រាសង្ឃឹមរស់ ៦៤ឆ្នាំ(សម្រាប់បុរស) និង៦៨ឆ្នាំ(សម្រាប់ស្ត្រី)
* ប្រភេទក្រដាស់ប្រាក់៖ រ៉ូពី
* ពេលវេលា៖ ខុសគ្នាមួយម៉ោងកន្លះ ជាមួយប្រទេសកម្ពុជា
* ប្រធានាធិបតី៖ លោក Ram Nath Kovind
* នាយករដ្ឋមន្ត្រី៖ លោក Narendra Modi

១- កាលបរិច្ឆេទសំខាន់ៗក្នុងប្រវត្តិសាស្ត្រឥណ្ឌា៖
* ឆ្នាំ២៥០០ មុនគ.ស៖ ប្រទេស ឥណ្ឌាក្លាយជាដែនដីនៃអារ្យធម៌ និងចក្រភពបុរាណ។
* ឆ្នំា១៦០០ នៃគ.ស៖ ចក្រភពអង់គ្លេសបានមកដល់ដែនដីឥណ្ឌា និងបង្កើតទីតាំងជំនួញក្រោមការរគ្រប់គ្រងរបស់ក្រុមហ៊ុនឥណ្ឌាខាងកើត ហើយក្នុងទស្សវត្សរ៍ឆ្នាំ១៨៥០ អង់គ្លេសគ្រប់គ្រងឥណ្ឌាស្ទើទាំងស្រុង។
* ឆ្នាំ១៨៥៨ នៃគ.ស៖ ឥណ្ឌាស្ថិតក្រោមការគ្រប់គ្រងដោយផ្ទាល់របស់រដ្ឋាភិបាលអង់គ្លេស។
* ឆ្នាំ១៩២០ នៃគ.ស៖ អ្នកជាតិនិយមឥណ្ឌាលោក មហាត្មាត់គន្ធី បានដឹកនាំយុទ្ធនាការបាតុកម្មទាមទារឯករាជ្យអហិង្សាប្រឆាំង នឹងការគ្រប់គ្រងនៃរដ្ឋាភិបាលអង់គ្លេស ដែលទីបំផុតបាតុកម្មនេះ បានឈានទៅរកការទាមទារឯករាជ្យយ៉ាងពិតប្រាកដ។
* ឆ្នាំ១៩៤៧ នៃគ.ស៖ ប្រទេស ឥណ្ឌាត្រូវបានបំបែកចេញជាពីរ ដោយដែនដីដែលមានពួកហិណ្ឌូភាគច្រើន ស្ថិតក្នុងប្រទេស ឥណ្ឌា ចំណែកពួកម៉ូស្លីមគ្រប់គ្រងប៉ាគីស្ថាន។ ប្រទេសទំាងពីរបានវាយប្រហារគ្នាដើម្បីដណ្តើមតំបន់ កាស្មៀដែលជាតំបន់ជម្លោះ។
* ឆ្នាំ១៩៥០ នៃគ.ស៖ ឥណ្ឌាបានក្លាយជាប្រទេស សាធារណរដ្ឋ។
* ឆ្នាំ១៩៦២ នៃគ.ស៖ ឥណ្ឌា និងចិន បានវាយប្រហារគ្នាតាមបន្ទាត់ព្រំដែន។
* ឆ្នាំ១៩៧១ នៃគ.ស៖ ប្រទេស ឥណ្ឌា និងប៉ាគីស្ថាន បានធ្វើសង្គ្រាមដណ្តើមតំបន់ភាគខាងកើតប៉ាគីស្ថាន ដែលឈានទៅរកការបង្កើតប្រទេសបង់ក្លាដែស។
* ឆ្នាំ១៩៧៤ នៃគ.ស៖ ឥណ្ឌាបានបាញ់សាកល្បងនុយក្លេអ៊ែរក្រោមដីជាលើកដំបូងរបស់ខ្លួន។
* ទសវត្សរ៍ឆ្នាំ១៩៩០ រដ្ឋាភិបាលផ្តើមបង្កើតកម្មវិធីកំណែទម្រង់សេដ្ឋកិច្ច សេរី បើកចំហសេដ្ឋកិច្ចដល់ពាណិជ្ជករ និងវិនិយោគិនទូទាំងសកលលក។
* ឆ្នាំ២០០០ នៃគ.ស៖ ប្រជាពលរដ្ឋឥណ្ឌាកើនឡើងដល់១ពាន់លាននាក់។

២- វប្បធម៌៖
វប្បធម៌ប្រទេសឥណ្ឌាបានអូសបន្លាយអស់រយៈពេល៤៥០០ឆ្នាំមកហើយ។ សង្គមឥណ្ឌាត្រូវបានកំណត់ទៅតាមវណ្ណៈក្នុងសង្គមដែលមានភាពរឹតបន្តឹងជាខ្លាំង។ តម្លៃគ្រួសារមានសារៈសំ​ខាន់ជាខ្លាំងក្នុងប្រពៃណីឥណ្ឌា។  អាពាហ៍ពិពាហ៍ត្រូវបានគេគិតថាជារឿងជីវិតដ៏សំខាន់មួយ ហេតុនេះអត្រានៃការលែងលះគឺទាបបំផុត។ គិតត្រឹមឆ្នាំ២០០១ ស្ត្រីឥណ្ឌាតែ១,៦ ភាគរយប៉ុ​ណ្ណោះ ដែលបានលែងលះគ្នា ប៉ុន្តែតួលេខនេះបានកើនឡើងដោយសារតែការអប់រំ និងឯករា​ជ្យនៃសេដ្ឋកិច្ចរបស់ស្ត្រី។ អាពាហ៍ពិពាហ៍កុមារបានក្លាយជារឿងធម្មតាទៅហើយជាពិ​សេ​សនៅតាមតំបន់ជនបទ។ ស្ត្រីជាច្រើនបានរៀបអាពាហ៍ពិពាហ៍មុនអាយុ១៨ឆ្នាំ ដែលជាអាយុរៀ​បការស្របច្បាប់របស់ពួកគេ។

៣- ទំនាក់ទំនងអន្តរជាតិ និងយោធា៖
ចាប់តាំងពីទទួលបានឯករាជ្យនៅឆ្នាំ១៩៤៧ មក ឥណ្ឌាបានថែរក្សាចំណងមិត្តភាពជាមួយប្រ​ជាជាតិជាច្រើន។ នៅទសវត្សរ៍ឆ្នាំ១៩៥០ ឥណ្ឌាបានចាប់យកតួនាទីជាអ្នកគាំទ្រដឹកនាំការទា​មទារឯករាជ្យរបស់បណ្ដាប្រទេសនៅទ្វីបអាស៊ី និងអាហ្វ្រិកក្រោមអាណានិគមអឺរ៉ុប។ ឥ​ណ្ឌាគឺជាសមាជិកនៃប្រទេសមិនចូលបក្សសម្ព័ន្ធ។ ក្រោយពីសង្គ្រាមរវាង ចិន-ឥណ្ឌា និង ឥណ្ឌា-ប៉ាគីស្ថាន នៅឆ្នាំ១៩៦៥ មកទំនាក់ទំនងយ៉ាងជិតស្និទ្ធរវាងឥណ្ឌា និងសហភាព សូវៀត បានធ្វើឲ្យឥណ្ឌា បាត់បង់នូវទំនាក់ទំនងជាមួយ សហរដ្ឋអាមេរិក  ហើយបានបន្តសភាពបែបនេះរហូ​តដល់ការបញ្ចប់នូវសង្គ្រាម ត្រជាក់។ ឥណ្ឌា បានធ្វើសង្គ្រាម ៤ ដងជាមួយប៉ាគីស្ថាន ដែលដើមចមសំខាន់នៃជម្លោះ គឺដណ្ដើមដែនដីកាស្មៀរ ។ ឥណ្ឌា បានឈ្នះសង្គ្រាមទៅលើប៉ាគីស្ថាន នៅឆ្នាំ ១៩៧១ ដោយឥណ្ឌាបានជួយគាំទ្រដល់ចលនារំដោះជាតិបង់ក្លាដេស (អតីតប្រទេសប៉ាគីស្ថានខាងកើត)។

ឥណ្ឌាបានដើរតួនាទីដ៏មានឥទ្ធិពលក្នុងសមាគមអាស៊ាន អង្គការ SA​ARC និងអង្គការ WTO ។ ឥណ្ឌាគឺជាសមាជិក និងជាអ្នកគាំទ្រអង្គការសហប្រជាជាតិជាយូរណាស់មកហើយ។  នៅក្នុងប្រតិបត្តិការថែរក្សាសន្តិសុខចំនួន ៣៥ ទូទាំងទ្វីបទាំង ៤ មានកងទ័ព  និងកម្លាំងនគ​របា​លឥណ្ឌាជាង ៥៥.០០០ នាក់ផងដែរ។ នៅក្នុងវិស័យសេដ្ឋកិច្ចវិញ ឥ​ណ្ឌា បានបង្កើតឱ្យមានទំនាក់ទំនងយ៉ាងជិតស្និទ្ធជាមួយបណ្ដាប្រទេសកំពុងអភិវឌ្ឍន៍នានានៅអាមេរិកខាងត្បូង អា​ស៊ី និងអាហ្វ្រិក។ ឥណ្ឌា ជាប្រទេស ដែលមានកងទ័ពច្រើនជាងគេទី៣ នៅលើពិភពលោក បន្ទាប់ពីប្រទេសចិន និងសហរដ្ឋអាមេរិក ដែលរួមមានទាំង កងទ័ពជើងគោក ជើងទឹក និងជើងអាកាស។ កងទ័ពជំនួយមានដូចជា ទាហានប៉ារ៉ា (Paramilitary Forces) ឆ្មាំសមុទ្រ (Coast Guard) និងកងកំម៉ង់ដូយុទ្ធសាស្ត្រ (Strategic Forces Command) សុទ្ធតែស្ថិតនៅក្រោមការគ្រប់គ្រង របស់កងទ័ពទាំងអស់។

ប្រធានាធិបតី គឺជាមេបញ្ជាការកំពូលនៃកងទ័ពឥណ្ឌា។ ឥណ្ឌាបានក្លាយទៅជាមហាអំណាចនុយក្លេអ៊ែរ នៅឆ្នាំ១៩៧៤ បន្ទាប់ពីការសាកល្បងអាវុធនុយក្លេអ៊ែរជាលើកដំបូងមក ដោយពុំមានការប្រកាសជាសាធារណៈ។ ២៤ ឆ្នាំក្រោយមកគឺនៅឆ្នាំ ១៩៩៨ បានធ្វើការសាកល្បងអាវុធនុយក្លេអ៊ែរម្ដងទៀត ដោយបានប្រកាសជាសាធារណៈនូវសក្ដានុភាពរបស់ខ្លួនថា ជា ម​ហាអំណាចនុយក្លេអ៊ែរ។ ជាការឆ្លើយតបចំពោះព្រឹត្តិការណ៍នេះ ប្រទេសប៉ាគីស្ថាន ដែលជាសត្រូវដ៏យូរអង្វែងរបស់ឥណ្ឌា ក៏បានធ្វើការសាកល្បងអាវុធនុយក្លេអ៊ែររបស់ខ្លួន នៅឆ្នាំជា​មួយគ្នានោះដែរ។ នាពេលថ្មីៗនេះឥណ្ឌា បានធ្វើសហប្រតិការជាមួយសហរដ្ឋអាមេរិក លើការអភិ​វឌ្ឍកម្មវិធីនុយក្លេអ៊ែរស៊ីវិល។

៤៖ រដ្ឋបាល៖
បំណែងចែកប្រព័ន្ធរដ្ឋបាល ឥណ្ឌា គឺជាសាធារណរដ្ឋសហព័ន្ធមាន២៨ រដ្ឋ (States) និង០៧ ទឹកដីសហភាព (Union Territories) ហើយមានរដ្ឋធានី ឈ្មោះញូដេលី (New Delhi) ។ គ្រប់រដ្ឋទាំងអស់ និងអាណាខេត្តចំនួនពីរគឺ៖ Producherry និងរដ្ឋធានីជាតិដេលី (National Capital Territory of Delhi) បានបោះឆ្នោតជ្រើសរើសរដ្ឋាភិបាលប្រចាំរដ្ឋ និងអាណាខេត្តផ្ទាល់ខ្លួន។
នៅឆ្នាំ១៩៥៦ តាមរយៈច្បាប់ស្ដីអំពីការរៀបចំរដ្ឋឡើងវិញ (States Reorganisation Act) រដ្ឋត្រូវបានបង្កើតឡើងដោយផ្អែកទៅតាមមូលដ្ឋាននៃភាសា។ រចនាសម្ព័ន្ធថ្មីនេះមិនមានបំលា​ស់ប្ដូរ អ្វីជាធំដុំទេ។ រដ្ឋ ឬអាណាខេត្តនីមួយៗ ត្រូវបានចែកទៅជា៦១០ ស្រុក (Districts) ស​ម្រាប់ការគ្រប់គ្រងរដ្ឋបាលមូលដ្ឋាន។ ស្រុកត្រូវបានចែកទៅជា tehsils និងបន្តចែកទៅជាភូមិ (villages) ។

៥៖ សេដ្ឋកិច្ច៖
ចាប់តាំងតែពីបានទទួលឯករាជ្យមក ឥណ្ឌាបានប្រកាន់ភ្ជាប់នូវទិសដៅសង្គមនិយម ជាមួយនឹងការគ្រប់គ្រងយ៉ាងតឹងរឹងទៅលើផ្នែកឯកជន ដូចជាពាណិជ្ជកម្មក្រៅប្រទេស និងការវិនិ​យោគផ្ទាល់ពីបរទេស។ ទោះជាយ៉ាងណាក្ដី ចាប់ពីឆ្នាំ១៩៩១ មក ឥណ្ឌាបានបើកចំហទីផ្សាររបស់ខ្លួនដោយធ្វើកំណែទម្រង់សេដ្ឋកិច្ច និងបន្ធូរបន្ថយការគ្រប់គ្រងរបស់រដ្ឋទៅលើការធ្វើពាណិជ្ជកម្ម និងការវិនិយោគទុនបរទេស។ ឥណ្ឌា មានកម្លាំងពលកម្ម ៥១៦.៣ លាននាក់ជាប់លំដាប់ទី២ក្នុងលោក ដែលក្នុងនោះ៦០% បម្រើការនៅក្នុងវិស័យកសិកម្ម និងសហគ្រា​សពាក់ព័ន្ធ ចំណែក២៨% បម្រើវិស័យសេវាកម្ម និងសហគ្រាសពាក់ព័ន្ធ និង១២%ផ្សេងទៀតបម្រើក្នុងវិស័យឧស្សាហកម្ម។ ដំណាំកសិកម្មសំខាន់ៗរួមមាន ស្រូវ ស្រូវសាលី ធញ្ញជាតិប្រេង កប្បាស ក្រចៅ តែ អំពៅ និងដំឡូងបារាំង។ វិស័យកសិកម្មរួមចំណែក២៨% នៃផលិ​តផលក្នុងស្រុកដុល វិស័យសេវាកម្ម និងសហគ្រាសពាក់ព័ន្ធមានរហូតដល់៥៤% ហើយ ១៨%ទៀត តំណាងឲ្យឧស្សាហកម្មសំខាន់រួមមាន ឧស្សាហកម្មយានយន្ត ស៊ីម៉ង់ត៍ គីមី អេឡិចត្រូនិក ម្ហូបអាហារ គ្រឿងយន្ត អាជីវកម្មរុករករ៉ែ ប្រេងកាត ឱសថ ដែកថែប សម្ភារៈដឹកជញ្ជូននិងវាយនភណ្ឌ។ អាស្រ័យដោយកំណើនសេដ្ឋកិច្ច យ៉ាងឆាប់រហ័សរបស់ឥណ្ឌា បានធ្វើឱ្យមានការកើនឡើងនូវតម្រូវការថាមពលដ៏ច្រើនផងដែរ។ ដោយផ្អែកតាមអង្គការគ្រប់គ្រងព័ត៌មានស្ដីពីថាមពល (Energy Information Administration) ឥណ្ឌាជាប្រទេស ដែលប្រើប្រាស់ប្រេងច្រើនជាងគេទី៦ និងទី៣ ខាងធ្យូងថ្ម។

ទោះជាសេដ្ឋកិច្ចឥណ្ឌាមានការកើនក្នុង២ទសវត្សចុងក្រោយនេះក៏ដោយ ប៉ុន្តែការរីកចម្រើនពុំមានភាពស្មើគ្នាទេ ទៅតាមសង្គម សហគមន៍សេដ្ឋកិច្ច ភូមិសាស្ត្រតំបន់ជាពិសេសភាពខុសគ្នារវាងទីក្រុងនិងជនបទ។ សមភាពនៃចំណូលនៅប្រទេសឥណ្ឌា មានទំនាក់ទំនងគ្នាតិចណា​ស់ (Gini Coefficient: 36.8 នៅឆ្នាំ ២០០៤) ទោះជាមានការកើនឡើងនៅរយៈកាលចុងក្រោ​យនេះក៏ដោយ។ បំណែងចែកភោគផល (Wealth Distribution) នៅឥណ្ឌា ពុំមានសមភាពឡើយ ដោយអ្នកមានចំណូលខ្ពស់១០% នៃក្រុមចំណូលទទួលបានផលរហូតដល់ ៣៣% នៃចំណូល។ ថ្វីបើដំណើរការសេដ្ឋកិច្ចសំខាន់ ១/៤ នៃប្រជាជនរកចំណូលបានក្រោមបន្ទាត់ក្រោមបន្ទាត់ភាពក្រីក្រ ០.៤ ដុល្លារ ក្នុងមួយថ្ងៃ។ នៅឆ្នាំ ២០០៤-២០០៥ ប្រជាជន ២៧.៥% បានរស់នៅក្រោមបន្ទាត់ភាពក្រីក្រ។

ថ្មីៗនេះឥណ្ឌាបានផ្ដល់មូលនិធិយ៉ាងច្រើនដល់វិស័យអប់រំឱ្យប្រជាជនអាចនិយាយភាសាអង់​គ្លេសបាន និងផ្ដល់ការបណ្ដុះបណ្ដាលវិជ្ជាជីវៈដើម្បីឱ្យក្លាយជា Outsourcing Destination ដ៏សំខាន់ សម្រាប់សហប្រតិបត្តិការពហុភាគី និង Popular Destination សម្រាប់ Medical Tourism ។ ឥណ្ឌាបានក្លាយទៅជាអ្នកនាំចេញដ៏សំខាន់នូវផលិតផលផ្នែកទន់ (Software) ក៏ដូចជា ហិរញ្ញវត្ថុ ការស្រាវជ្រាវ និងសេវាកម្មផ្នែកបច្ចេកវិជ្ជា។ វាយនភណ្ឌ គ្រឿងអលង្ការ សម្ភារៈវិស្វកម្ម និងផលិតផលផ្នែកទន់ គឺជាផលិតផលនាំចេញដ៏សំខាន់។ ក្រៅពីនេះ ប្រេងឆៅ យានយន្ត ជីរកសិកម្ម ផលិតផលគីមីក៏ជាផ្នែកនាំចេញដ៏សំខាន់ផងដែរ។ ដៃគូពាណិជ្ជកម្ម សំខាន់បំផុតរបស់ឥណ្ឌាមានសហរដ្ឋអាមេរិក  សហភាពអឺរ៉ុប ប្រទេសចិន រុស្ស៊ី និងជប៉ុន៕






គ្រាប់ផ្លោង១៣០មីលីមែត្រមរតកអាមេរិកបន្សល់ទុកឲ្យកម្ពុជា ត្រូវបានរកឃើញជាថ្មីលើទឹកដីទីរួមខេត្តត្បូងឃ្មុំ

ត្បូងឃ្មុំ៖ ប្រជាពលរដ្ឋបានប្រទះឃើញគ្រាប់បែកមួយ នៅចំណុចដីមួយកន្លែង នៅខាងលិចអាងទឹកសិប្បនិមិត្ត ទីរួមខេត្តត្បូងឃ្មុំ ដែលស្ថិតនៅភូមិត្រពាំងដុំ ឃុំស្រឡប់ ស្រុកត្បូងឃ្មុំ ក្រោយពេលគ្រឿងចក្រ​អេសកាជីក​កាយដី។ ក្រោយប្រទះឃើញបែបនេះ ប្រជាពលរដ្ឋបានរាយការណ៍ទៅអាជ្ញារធរខេត្ត ដើម្បីអោយក្រុម​បច្ចេកទេស មកដោះយកទៅ។

បន្ទាប់ពីទទួលពត៌មាននេះ ពីសំណាក់ប្រជាពលរដ្ឋជាបន្តបន្ទាប់ នូវគ្រាប់យុទ្ធភ័ណ្ឌសំណល់ពីសង្គ្រាម ពិសេសសហរដ្ឋអាមេរិក, នាថ្ងៃទី២៣ ខែមករា ឆ្នាំ២០១៨ លោក ហាក់ សុខមករា អភិបាលរងខេត្តត្បូងឃ្មុំ និងជាប្រធានស៊ីម៉ាក់ខេត្ត រួមជាមួយនឹង គណៈកម្មការសកម្មភាពមីនខេត្ត និងក្រុមបច្ចេកទេសដោះគ្រាប់ បានចុះពិនិត្យ និងធ្វើការដោះគ្រាប់ ដើម្បីយកទៅរក្សាទុក និងកម្ទេចចោល ចៀសវាងបង្កគ្រោះថ្នាក់​ដល់ប្រជាពលរដ្ឋ ដែលនេះជាការយកចិត្តទុកដាក់ ពីសំណាក់ថ្នាក់ដឹកនាំខេត្ត ក្នុងន័យធ្វើយ៉ាងណា ធានាអោយបានសុខសុវត្ថិភាពជូនពួកគាត់ ។

សូមបញ្ជាក់ថា គ្រាប់ផ្លោងដែលរកឃើញនេះ ជាប្រភេទគ្រាប់ផ្លោង១៣០មីលីមែត្រ ដែលមានកម្លាំងផ្ទុះ​រហូតដល់៥០០មែត្រជុំវិញ ដែលនេះជាមរតកកាលពីសម័យសង្គ្រាម ដែលអាមេរិកបានបន្សល់ទុក ៕




(ទស្សនាវីដេអូ) លោក ឈឹម ផលវរុណ៖ គណបក្សសង្គ្រោះជាតិដែរស្លាប់ទៅហើយ មិនអាចរស់មកវិញទេ

លោកនាយករដ្ឋមន្រ្ដី ហ៊ុន សែន អញ្ជើញទស្សនាគម្រោងផលិតផលបច្ចេកវិទ្យា នៅមជ្ឈមណ្ឌលអភិវឌ្ឍកុំព្យូទ័រទំនើបឥណ្ឌា

ញូវដែល្លី, ឥណ្ឌា៖ ក្នុងថ្ងៃដំបូងនៃការអញ្ជើញទៅដល់ទីក្រុងញូវដែល្លី ប្រទេសឥណ្ឌា នារសៀលថ្ងៃទី២៤ ខែមករា លោកនាយករដ្ឋមន្រ្ដី ហ៊ុន សែន និងគណៈប្រតិភូបានអញ្ជើញទស្សនាគម្រោងផលិតផល​បច្ចេកវិទ្យា​នានានៅមជ្ឈមណ្ឌលអភិវឌ្ឍកុំព្យូទ័រទំនើបរបស់ឥណ្ឌា។

វត្តមាននៃការអញ្ជើញដល់របស់លោកនាយករដ្ឋមន្រ្តី ត្រូវបានការធ្វើគារវកិច្ចស្វាគមន៍យ៉ាងស្និទ្ធស្នាល និងរ៉ាក់ទាក់បំផុតពីថ្នាក់ដឹកនាំ បុគ្គលិកនៅមជ្ឈមណ្ឌលអភិវឌ្ឍន៍កុំព្យូទ័រទំនើបឥណ្ឌា។

លោកនាយករដ្ឋមន្រ្តី ក៏ដូចជាថ្នាក់ដឹកនាំជាន់ខ្ពស់រាជរដ្ឋាភិបាលកម្ពុជា បានធ្វើការតាមដានស្តាប់យ៉ាង​យកចិត្ត​ទុកដាក់លើបទបង្ហាញស្តីពីគម្រោងផលិតផលបច្ចេកវិទ្យារបស់មជ្ឈមណ្ឌលអភិវឌ្ឍកុំព្យូទ័រទំនើប (Centre for Development of Advanced Computing) របស់សាធារណរដ្ឋឥណ្ឌា។

បទបង្ហាញដែលលើកឡើងដោយលោក Ravi Shankar Prasad រដ្ឋមន្រ្តីក្រសួងអេឡិចត្រូនិក និងបច្ចេកវិទ្យា​ព័ត៌មានឥណ្ឌា បានឲ្យដឹងថា មជ្ឈមណ្ឌលនេះ គឺជាទីកន្លែងប្រមូលផ្តុំដោយការសិក្សាស្រាវជ្រាវ និងការអនុវត្ត​ជាក់ស្តែង ក៏ដូចជាការរក្សាទុកបណ្តាទិន្នន័យនានា លើប្រព័ន្ធអ៊ីនធើណែត ក្នុងការគ្រប់គ្រងលើគ្រប់ផ្នែក និងគ្រប់ទីកន្លែងក្នុងប្រទេសឥណ្ឌា និងក៏ជាការភ្ជាប់ទំនាក់ទំនងទៅកាន់បណ្តា​ប្រទេសមួយចំនួនទាំង​នៅក្នុង​តំបន់ និងក្រៅតំបន់។

លោករដ្ឋមន្រ្តីក៏បានលើកឡើងពីការគ្រប់គ្រងទិន្នន័យដល់ប្រជាកសិករ និងការធ្វើអាជីវកម្មគ្រប់បែបយ៉ាងទាំង​ក្នុង​ប្រទេសឥណ្ឌា និងអន្តរជាតិ ពិសេសការភ្ជាប់ទៅបណ្តាសាកលវិទ្យាល័យធំៗលើពិភពលោកប្រមាណ ១៦ម៉ឺនកន្លែង។

ក្នុងឱកាសនោះលោកនាយករដ្ឋមន្រ្ដី ហ៊ុន សែន បានវាយតម្លៃខ្ពស់ និងកោតសរសើរចំពោះថ្នាក់ដឹកនាំ​ក្រសួងអេឡិចត្រូនិក និងបច្ចេកវិទ្យាព័ត៌ មានឥណ្ឌា ពិសេសថ្នាក់ដឹកនាំនៃមជ្ឈមណ្ឌលអភិវឌ្ឍកុំព្យូទ័រទំនើប (Centre for Development of Advanced Computing) ដែលបានអនុញ្ញាត និងផ្តល់ឱកាសឲ្យរូបលោក​បានស្វែងយល់ និងសិក្សាពីគម្រោងអាទិភាពនានា នៅក្នុងមជ្ឈមណ្ឌលនេះ។
លោកនាយករដ្ឋមន្រ្ដីប្រមុខរាជរដ្ឋាភិបាល បានស្នើភាគីឥណ្ឌា ធ្វើការសិក្សា និងផ្តល់លទ្ធភាពក្នុងការភ្ជាប់​ទំនាក់ទំនងជាមួយកម្ពុជា ដើម្បីឲ្យកម្ពុជាបានធ្វើការតភ្ជាប់ និងផ្តល់នូវព័ត៌មានពីគ្នា​ទៅវិញទៅមកលើប្រព័ន្ធព័ត៌​មានវិទ្យាដ៏មានសារះសំខាន់នេះ។

បន្ទាប់ពីការធ្វើបទបង្ហាញស្តីពីគម្រោងផលិតផលបច្ចេកវិទ្យារបស់មជ្ឈមណ្ឌលអភិវឌ្ឍកុំព្យូទ័រទំនើបរួចមក លោកនាយករដ្ឋមន្រ្ដីនាយករដ្ឋមន្រ្តី និងគណៈប្រតិភូ បានអញ្ជើញទស្សនាការបង្ហាញជាក់ស្តែង​ស្តីពីការតភ្ជាប់​ប្រព័ន្ធបច្ចេកវិទ្យាទំនើប ការគ្រប់គ្រងទន្នន័យ ការដំឡើងកម្មវិធី (Software) ចុះបញ្ជីដីធ្លី និងឯកសារផ្សេងៗ តាមរយៈប្រព័ន្ធព័ត៌មានវិទ្យាបែបទំនើប ពិសេសការតភ្ជាប់ពីប្រទេសឥណ្ឌា​ទៅកាន់ប្រទេសដទៃ​ទៀតលើពិភពលោក។

លោកនាយករដ្ឋមន្រ្តី និងគណៈប្រតិភូជាន់ខ្ពស់បានចំណាយពេលប្រមាណ៣០នាទីក្នុងការទស្សនាស្វែងយល់ និងការស្តាប់បទបង្ហាញស្តីពីគម្រោងផលិតផលបច្ចេកវិទ្យារបស់មជ្ឈមណ្ឌលអភិវឌ្ឍកុំព្យូទ័រទំនើប (Centre for Development of Advanced Com puting)។

កម្មវិធីគ្រប់គ្រងតាមបច្ចេកវិទ្យាទំនើបដែលបានបង្ហាញ និងនាំឲ្យមានការចាប់អារម្មណ៍នៅក្នុង​មណ្ឌលអភិវឌ្ឍន៍​បច្ចេកវិទ្យា ហើយឥណ្ឌាកំពុងប្រើប្រាស់សព្វថ្ងៃក្នុងនោះមានដូចជា ការគ្រប់គ្រងប្រព័ន្ធសុខាភិបាលដោយ​ប្រើប្រាស់ប្រព័ន្ធ កំព្យូទ័រក្នុងការគ្រប់គ្រងទិន្នន័យអ្នកជំងឺ (e-Health), គ្រប់គ្រងអត្តសញ្ញាណ រួមទាំងការ​បញ្ជូនឯកសារ ទិន្នន័យដោយមិនចាំបាច់នាំឯកសារទាំងមូល (e-Sign), គ្រប់គ្រងបុគ្គលិក និងរដ្ឋបាលទូទៅ (e-Office), គ្រប់គ្រង និងឆ្លើយតបតម្រូវការពេលមានគ្រោះអាសន្ន (NERS), និងជួយកសិករក្នុងការ​ជ្រើស​រើស​​ប្រភេទជីសម្រាប់ដីស្រែចំការឲ្យត្រូវដើម្បីបានទិន្នផលខ្ពស់ ព្រមទាំងប្រព័ន្ធឌីជីថលក្នុង​ការជួយរកទីផ្សារ​សម្រាប់កសិករលក់ផលិតផលផងដែរ។

ទន្ទឹមនឹងនោះក៏មាន e-Education ដែលជួយសម្រួលដល់ការសិក្សារបស់សិស្សនិស្សិត​ក្នុងប្រទេស​ឲ្យកាន់​តែងាយ​ស្រួលក្នុងការសិក្សា។ កិច្ចការខាងលើនេះ គឺបានធ្វើឲ្យរដ្ឋាភិបាលឥណ្ឌាចំណេញថវិកាប្រមាណ ៦ ប៊ីលានដុល្លារផងដែរ។ នៅឥណ្ឌាសព្វថ្ងៃ សូម្បីការបោះឆ្នោត ក៏ប្រើប្រព័ន្ធឌីជីថលគូសសន្លឹកឆ្នោត ដោយមិន​ចំណាយទៅលើក្រដាសទៀតឡើយ។

សូមបញ្ជាក់ដែរថា សាធារណរដ្ឋឥណ្ឌា មានផ្ទៃក្រឡាទំហំ ៣លាន ២៨៧ពាន់ ២៦៣គីឡូម៉ែត្រការ៉េ ចែកជា ២៩រដ្ឋ និង ៧ដែនដី ចំណុះរដ្ឋសហភាព មានព្រំប្រទល់ជាប់ប្រទេសបង់ក្លាដែស ប៊ូតាន មីយ៉ាន់ម៉ា ចិន នេប៉ាល់ និងប៉ាគីស្ថាន និងមានប្រជាជនសរុបចំនួន ១ពាន់២៧០លាននាក់ (តួលេខក្នុងខែកក្កដាឆ្នាំ២០១៦)។ ថ្ងៃបុណ្យជាតិរបស់សាធារណរដ្ឋឥណ្ឌា គឺនៅថ្ងៃទី២៦ ខែមករា ឆ្នាំ១៩៥០។

ស្ថានភាពសេដ្ឋកិច្ចរបស់សាធារណរដ្ឋឥណ្ឌាកាលពីឆ្នាំ២០១៦កន្លងទៅ កំណើនសេដ្ឋកិច្ចប្រចាំឆ្នាំមានទំហំ ៧,៦% ក្នុងនោះ GDP សម្រាប់មនុស្សម្នាក់ស្មើនិង ១,៧០៩.៦ដុល្លាអាមេរិក។ ផលិតផលតាមវិស័យគិតជាភាគរយ ក្នុងវិស័យកសិកម្មមាន ១៧,៤% ឧស្សា ហកម្មមាន ២៨,៨% និងសេវាកម្ម ៤៦,២% ជាមួយគ្នានេះទំហំពាណិជ្ជកម្មនៃការនាំចេញរបស់សាធារណរដ្ឋឥណ្ឌា កាលពីឆ្នាំ២០១៦ មានទឹកប្រាក់សរុប ២៦៨.៦ពាន់លានដុល្លា ឯការនាំចូលមានទឹកប្រាក់សរុប ៣៧៦.១ពាន់លានដុល្លារផងដែរ ៕










បារាំងផ្តល់ប្រាក់កម្ចីដល់កម្ពុជា ជាង៥០លានដុល្លារ សម្រាប់គម្រោងទឹកស្អាត និងអនាម័យតាមបណ្តាខេត្ត

រដ្ឋាភិបាលបារាំង តាមរយៈទីភ្នាក់ងារបារាំងសម្រាប់អភិវឌ្ឍន៍ (AFD) នាថ្ងៃទី២៤ ខែមករា ឆ្នាំ២០១៨ បានផ្តល់ជំនួយ និងប្រាក់កម្ចីប្រមាណ៤១លានអឺរ៉ូ ដែលស្មើនឹងជាង៥០លានដុល្លារដល់កម្ពុជា សម្រាប់គម្រោងចំនួន២ នៅតាមបណ្តាខេត្ត ជាពិសេសលើគម្រោងទឹកស្អាត និងអនាម័យ។ នេះបើតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ ដែល ទទួលបាននៅថ្ងៃទី២៥ ខែមករា ឆ្នាំ២០១៨នេះ។

ពិធីចុះហត្ថលេខាលើការផ្តល់ជំនួយ និងប្រាក់កម្ចីនេះ ត្រូវបានធ្វើឡើង ក្នុងកិច្ចប្រជុំពិគ្រោះយោបល់កម្រិត​គោល​នយោបាយលើកទី២រវាងភាគីកម្ពុជាដែលដឹកនាំដោយ លោក វង្សី វិស្សុត រដ្ឋលេខាធិការក្រសួង​សេដ្ឋកិច្ច និងហិរញ្ញវត្ថុ ជាមួយសមភាគីបារាំងដែលដឹកនាំដោយលោក Philippe BAUDUIN នាយកប្រតិបត្តិរងរបស់ទីភ្នាក់ងារបារាំងសម្រាប់អភិវឌ្ឍន៍ (AFD) នៅទីស្នាក់ការកណ្តាលរបស់ AFD នាទីក្រុងប៉ារីស សាធារណរដ្ឋបារាំង នាថ្ងៃទី២៤ ខែមករា ឆ្នាំ២០១៨។

ក្រោយបញ្ចប់កិច្ចប្រជុំនេះ បារាំង-កម្ពុជាបានចុះកិច្ចព្រមព្រៀងចំនួន២រួមមាន៖
១៖ កិច្ចព្រមព្រៀងឥណទានសម្បទានលើគម្រោងទឹកស្អាត និងអនាម័យនៅទីរួមខេត្ត ក្នុងទឹកប្រាក់ចំនួន ៤០លានអឺរ៉ូ ប្រហែល៤៩លានដុល្លា។
២៖ កិច្ចព្រមព្រៀងហិរញ្ញប្បទានឥតសំណងសម្រាប់ការសិក្សា និងពង្រឹងសមត្ថភាព ក្នុងទឹកប្រាក់ចំនួន ១លានអឺរ៉ូ ប្រហែល១,២៤លានដុល្លារ។
កិច្ចព្រមព្រៀងសហប្រតិបត្តិការទាំងពីរខាងលើនេះ នឹងចូលរួមចំណែកក្នុងផ្តល់ការអភិវឌ្ឍន៍​ហេដ្ឋា-រចនាសម្ព័ន្ធ​ជនបទតាមរយៈការផ្តល់សេវាកម្ម ក៏ដូចជាការតបណ្តាញទឹកស្អាតទៅកាន់ទីជនបទ និងការកសាងសមត្ថភាព​មន្រ្តីអនុវត្តគម្រោង និងការសិក្សាសមិទ្ធិលទ្ធភាពគម្រោងក្នុងក្របខ័ណ្ឌកិច្ចសហប្រតិបត្តិការអភិវឌ្ឍន៍ជាមួយ AFD។

លោក វង្សី វិស្សុត បានលើកឡើងថា ក្នុងគោលដៅធានាដល់ការអភិវឌ្ឍប្រកបដោយចីរភាពរបស់កម្ពុជា, កិច្ចសហ-ប្រតិបត្តិការហិរញ្ញវត្ថុដែលផ្តល់ដោយរដ្ឋាភិបាលបារាំងតាមរយៈ AFD ក្នុងក្របខណ្ឌឥណ​ទាន​សម្បទាន ត្រូវតែឆ្លើយតបទៅនឹងតម្រូវការរបស់កម្ពុជា ដើម្បីទ្រទ្រង់ដល់កំណើនសេដ្ឋកិច្ច, ការកាត់បន្ថយភាពក្រីក្រ និងត្រូវឲ្យចំនូវអាទិភាពគោលនយោបាយនានារបស់កម្ពុជា ដូចមានចែងនៅក្នុង​យុទ្ធសាស្ត្រចតុកោណ ដំណាក់កាលទី៣ ក៏ដូចជាត្រូវឱ្យមានសង្គតិភាពជាមួយគោលនយោបាយក្នុងការខ្ចី ព្រមទាំងច្បាប់ និងបទបញ្ញត្តិពាក់ព័ន្ធនានារបស់កម្ពុជាផងដែរ។

នាឱកាសនោះដែរ លោក Philippe Bauduin ក៏បានបង្ហាញនូវការបេ្តជ្ញាចិត្តរបស់ខ្លួន ក្នុងការបន្តគាំទ្រដល់កិច្ច​អភិវឌ្ឍន៍របស់កម្ពុជា។ លោកបានបញ្ជាក់ផងដែរថា AFD គ្រោងនឹងបន្ថែមទំហំហិរញ្ញប្បទាន​សហប្រតិបត្តិការ​ដល់ការអភិវឌ្ឍន៍របស់ប្រទេសកម្ពុជា ឲ្យស្របទៅនឹងបរិការណ៍នៃការអភិវឌ្ឍបច្ចុប្បន្នរបស់កម្ពុជា ហើយក្នុង​ន័យនេះ លោកនឹងខិតខំជួយសម្របសម្រួលគ្រប់បែបយ៉ាងដល់កម្ពុជា ក្នុងការស្រូបយកនូវហិរញ្ញប្បទាន​សហប្រតិបត្តិការនេះពី AFD ឲ្យបានច្រើនតាមដែលអាចធ្វើទៅបាន៕






លោកនាយករដ្ឋមន្រ្តី ហ៊ុន សែន ណែនាំឱ្យក្រសួងប្រៃសណីយ៍ពិភាក្សាជាមួយក្រសួងអេឡិចត្រូនិចនិងបច្ចេកវិទ្យាឥណ្ឌាដើម្បីសហការគ្នារៀបចំប្រព័ន្ធគ្រប់គ្រងទិន្នន័យតាមបែបឌីជីថល

នៅល្ងាចថ្ងៃពុធ ៨កើត ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៤ ខែមករា ឆ្នាំ២០១៨នេះ លោកនាយករដ្ឋមន្រ្តី ហ៊ុន សែន បានអញ្ជើញដឹកនាំគណៈប្រតិភូទៅទស្សនកិច្ចនៅ ក្រសួងអេឡិចត្រូនិចនិងបច្ចេក​វិទ្យាឥណ្ឌា (Ministry of Electronics and Information Technology – MeitY) ដែលមានលោក រ៉ាវី សាំងការ ប្រាសាដ (Ravi Shankar Prasad) រដ្ឋមន្រ្តី និងមន្រ្តីក្រសួងជាច្រើនរូបទៀតទទួលស្វាគមន៍។

នៅក្នុងឱកាសនោះ លោករដ្ឋមន្រ្តី រ៉ាវី សាំងការ ប្រាសាដ បានជម្រាបអំពីបច្ចេកវិទ្យា ដែលឥ​ណ្ឌាកំពុងប្រើប្រាស់សព្វថ្ងៃក្នុងនោះដូចជា ការគ្រប់គ្រងប្រព័ន្ធសុខាភិបាលដោយប្រើប្រាស់ ប្រព័ន្ឋ កំព្យូទ័រក្នុងការគ្រប់គ្រងទិន្ន័យអ្នកជំងឺ (e-Health), គ្រប់គ្រងអត្តសញ្ញាណ រួមទាំងការបញ្ជូនឯកសារ ទិន្នន័យដោយមិនចាំបាច់នាំឯកសារទាំងមូល, (e-Sign), គ្រប់គ្រងបុគ្គលិក និងរដ្ឋបាលទូទៅ(e-Office), គ្រប់គ្រងនិងឆ្លើយតបតម្រូវការពេលមានគ្រោះអាសន្ន (NERS), និងជួយកសិករក្នុងការជ្រើសរើសប្រភេទជីសម្រាប់ដីស្រែចំការអោយត្រូវដើម្បីបានទិន្នផលខ្ពស់ ព្រមទាំងប្រព័ន្ធឌីជីថលក្នុងការជួយរកទីផ្សារសម្រាប់កសិករលក់ផលិតផលផងដែរ។

លោករដ្ឋមន្រ្តី រ៉ាវី សាំងការ ប្រាសាដ ក៏បានបន្ថែមថា ទន្ទឹមនឹងនោះឥណ្ឌ ក៏មាន e-Education ដែលជួយ​សម្រួលដល់ការសិក្សារបស់សិស្សនិស្សិតនៅក្នុងប្រទេសអោយកាន់តែងាយស្រួលក្នុងការសិក្សា។ កិច្ចការខាងលើនេះ គឺបានធ្វើអោយរដ្ឋាភិបាលឥណ្ឌាចំណេញថវិកាប្រមាណ ៦ ប៊ីលៀនដុល្លារផងដែរ។ នៅឥណ្ឌាសព្វថ្ងៃ សូម្បីការបោះឆ្នោត ក៏ប្រើប្រព័ន្ធដីជីថលគូសសន្លឹកឆ្នោត ដោយមិនចំណាយទៅលើក្រដាសទៀតឡើយ។ លោករដ្ឋមន្រ្តីរីករាយនឹងសហការជាមួយក្រសួងទាំងឡាយរបស់កម្ពុជា ដើម្បីជំរុញបច្ចេកវិទ្យាដើរអោយទាន់សភាពការណ៍ចាំបាច់ និងតម្រូវការរបស់ពិភពលោកសព្វថ្ងៃ ក្នុងនោះមានក្រសួងអប់រំ ក្រសួងពាណិជ្ជកម្ម និង ក្រសួងសុខាភិបាលគឺមានការចាប់អារម្មណ៍ចំពោះបច្ចេកវិទ្យាឌីជីថលទាំងនេះ។

លោកនាយករដ្ឋមន្រ្តី ហ៊ុន សែន មានការពេញចិត្តចំពោះការរីកចម្រើនបច្ចេកវិទ្យារបស់ឥណ្ឌា ក្នុងនោះគឺ​បច្ចេកវិទ្យាជួយទៅលើកសិករក្នុងការជ្រើសរើសដី និងជីរ និងវិធីជួយរកទីផ្សារសម្រាប់កសិករ។ លោកក៏បានណែនាំឱ្យក្រសួងប្រៃសណីយ៍ និងទូរគមនាគមន៍ពិភាក្សាជា​មួយ​ក្រសួងអេឡិចត្រូនិចនិងបច្ចេកវិទ្យាឥណ្ឌា ដើម្បីសហការគ្នារៀបចំប្រព័ន្ធគ្រប់គ្រងទិន្នន័​យតាមបែបឌីជីថល ដើម្បីសម្រួលការងារឱ្យបានលឿនដែលនឹងជួយកាត់បន្ថយអំពើពុករលួ​យបានមួយកម្រិតធំទៀតផង៕