Thursday, September 03, 2015

ប្រសាសន៍ឯកឧត្តមឧបនាយករដ្ឋមន្ត្រី ហោ ណាំហុង ប្រធានគណៈកម្មការចំពោះកិច្ច សម្រាប់សម្របសម្រួលការងារទទួល ប្រគល់ និងផ្ទៀងផ្ទាត់ផែនទី ថ្លែងសរុបលទ្ធផលក្រោយពេល ផ្ទៀងផ្ទាត់ផែនទីពីបារាំង ជាមួយផែនទីផ្លូវការរបស់រាជរដ្ឋាភិបាលកម្ពុជា (វិមានសន្តិភាព ថ្ងៃទី០៣ ខែកញ្ញា ឆ្នាំ២០១៥)

ឯកឧត្តម ហោ ណាំហុង ទទូចឲ្យគណបក្សនយោបាយ បញ្ឈប់ការយកបញ្ហាផែនទី និងទឹកដី មកកេងចំណេញនយោបាយទៀត

មានប្រសាសន៍​នៅក្នុងពិធី​ប្រគល់ ​ទទួល ​និងផ្ទៀងផ្ទាត់​ផែនទី ​ពីស្ថានទូត​បារាំង នៅភ្នំពេញ ​នាវិមានសន្តិភាព​ ថ្ងៃទី ០៣​ ខែកញ្ញា ឆ្នាំ​២០១៥នេះ​ ឯកឧត្តមឧប​នាយករដ្ឋ​មន្ត្រី ហោ ​ណាំហុង ​រដ្ឋមន្ត្រីក្រសួង​ការបរទេស​ និងសហប្រតិបត្តិ​ការអន្តរជាតិ​ និងជាប្រធាន​គណៈកម្មាការចំពោះកិច្ច​សម្រាប់សម្រប​សម្រួលការ​ងារទទួល​ ប្រគល់ ​និងផ្ទៀងផ្ទាត់​ផែនទីបានមានប្រសាសន៍ថា​ «កន្លងមកមាន​គណបក្សនយោ​បាយខ្លះ ​លើកឡើងរឿង​ផែនទី ថាចេះចុះ!​ តើពួកគាត់ហ្នឹង​មានស្គាល់អ្វី​ហៅថា ផែនទី​ Bonne ១/១០០​.០០០អត់?​ រឺគ្រាន់តែចេះតែថាទេ?​ ចាប់ពីពេល​យើងផ្ទៀងផ្ទាត់នេះសូ​មឈប់យករឿង​ព្រំដែន និង​ផែនទី ​ទៅធ្វើនយោបាយដើ​ម្បីកេងចំណេញ​សំរាប់បក្សខ្លួនទៅ ​ហើយសូមធ្វើន​យោបាយឲ្យមានសុច្ច​រិតភាពផង»​។

ឯកឧត្តម​ឧបនាយក​រដ្ឋមន្ត្រីបន្តថា ​«កន្លងមកគេ​ប្រើពាក្យចាក់ក្រឡេក​ ការពិតជាកា​រវ៉ៃប្រហារយើង (​រាជរដ្ឋាភិបាល)​ យ៉ាងខ្លាំង។ ​អ្នកខ្លះថា ​បើដឹងថាផែនទី​រាជរដ្ឋាភិបាល ​ត្រឹមត្រូវហើយ ចំាំបាច់​ផ្ទៀងផ្ទាត់ធ្វើអី?​ ជាការពិតយើងធ្វើ​ការផ្ទៀងផ្ទាត់​ ព្រោះចង់ឲ្យ​អ្នកនយោបាយខ្លះភ្លឺភ្នែក​, យើងប្រើផែន​ទីផ្លូវការហើយ ​យើងប្រើទាំងច្បាប់​អន្តរជាតិ ​និងច្បាប់ជាតិទៀត»​។

ឯកឧត្តម​ឧបនាយ​ករដ្ឋមន្ត្រី ​ហោ ណាំហុង ​បន្ថែមថា ​«មានអ្នកតំណាង​រាស្ត្រខ្លះ ធ្វើការបញ្ជារាជរដ្ឋា​ភិបាលឲ្យរកផែនទី ​ដែលបោះពុម្ភនៅ​ឆ្នាំ១៩៦៤ ​ឲ្យឃើញ!​ តើអ្នកនោះជាស្អី? ​ម៉េចមកបញ្ជារាជរដ្ឋាភិ​បាលចឹង? ​ពួកគេមាន​ភាពព្រហើនកំរិតណា? ​រាជរដ្ឋាភិបាល​មិនអាចរត់តាមការ​ញុះញង់របស់​បក្សប្រឆាំង ​ហើយយើងមិន​អាចយកផែនទី​ទិញតាមផ្សារ​ត្រីមកផ្ទៀងផ្ទាត់ទេ ​គឺយើងប្រើផែន​ទីផ្លូវការ ​គឺសុទ្ធតែមានត្រាត្រឹ​មត្រូវ។ ហេតុអ្វីមិ​នធ្វើការឃោសនា​តាមកម្មវិធី​នយោបាយរបស់ខ្លួន​ឲ្យប្រជាជនទៅ»។​

គួរបញ្ជាក់ថា​ ឯកឧត្តមភារ​ធារីស្ថានទូត​បារាំងប្រចាំកម្ពុជា ​នៅក្នុងពិធី​ប្រគល់ ទទួល ​និងផ្ទៀងផ្ទាត់ផែនទី​ ពីស្ថានទូត​បារាំងនៅភ្នំ​ពេញ ជូនរាជ​រដ្ឋាភិបាលកម្ពុជាដើ​ម្បីផ្ទៀងផ្ទាត់​នៅថ្ងៃនេះ បានមានប្រ​សាសន៍ថា នៅ​ក្នុងលិខិតរបស់​ឯកឧត្តម​ Francois HOLLANDE ប្រធានាធិប​តីនៃសាធារណរដ្ឋ​បារាំង ​បានបញ្ជាក់ថា ​ការសំរេចផ្តល់ផែ​នទីដល់រាជ​រដ្ឋាភិបាលកម្ពុជានៅ​ពេលនេះ ​គឺផ្អែកលើការប្តេ​ជ្ញាចិត្តរបស់​រាជរដ្ឋាភិបាល​កម្ពុជា ដែលបាន​បញ្ជាក់ក្នុងលិខិត​របស់សម្តេចតេជោ ​ហ៊ុន សែន ​នាយករដ្ឋមន្ត្រីថា ​កម្ពុជាមាន​ការប្តេជ្ញាចិត្តដ៏មោះ​មុតឥតងាក​រេក្នុងការអនុវត្ត​គោលនយោបាយ​របស់ខ្លួន ​សំដៅកសាង​ខ្សែបន្ទាត់ព្រំដែនមួ​យច្បាស់លាស់ ​ប្រកបដោយសន្តិភាព​ មិត្តភាព ​សហប្រតិបត្តិការ ​និងអភិវឌ្ឍជាមួយ​ប្រទេសជិតខាង។ ​ស្របតាម​ស្មារតីនេះ ​រាជរដ្ឋាភិបាល​បារាំងសំរេច​ផ្តល់ឯកសារផែនទី​ Bonne​ ខ្នាត ១/១០០.​០០០ ដល់កម្ពុជា​ ដែលជាផែន​ទីថតចម្លង​ពីផែនទីដើម បោះពុម្ភ​ដោយក្រុមភូមិសាស្ត្រឥ​ណ្ឌូចិន។​


បន្ទាប់ពីទទួល​ផែនទី ពីភារធារី​ស្ថានទូតបារាំង​នៅភ្នំពេញ ​ឯកឧត្តម​ឧបនាយករដ្ឋមន្ត្រី ហោ ​ណាំហុង ​បានបញ្ជាក់ថា ​ផែនទីទាំងអស់​គឺមានចំនួន​២៦សន្លឹកគ្រប់ចំ​នួន ហើយមានបោះ​ត្រាស្ថានទូត​បារាំងទាំង​ផ្អែកខាងមុខ​ និងខ្នង។ ​បន្ទាប់ពីភាគី​ទាំងពីរ គឺកម្ពុជា ​-បារាំង បានចុះហត្ថ​លេខាប្រគល់ ​និងទទួលរួច​មក ឯកឧត្តម​ទេសរដ្ឋមន្ត្រី ​វ៉ា គឹមហុង ​ប្រធានគណៈកម្មាធិការ​ព្រំដែនចម្រុះកម្ពុជា ​បានធ្វើការផ្ទៀ​ងផ្ទាត់១ផ្ទាំងម្តងៗ ​ដែលក្នុងចំណោម២៦ផ្ទាំង​ មាន១ផ្ទាំង​ជាផែនទី ​UTM ខ្នាត១/១០០​.០០០។ ​ការផ្តល់ជូន​ផែនទី UTM ​១ផ្ទាំងនេះព្រោះបារាំង​រកផែនទី​ Bonne ​១/១០០.០០០ ​មួយផ្ទាំងនោះមិន​ឃើញ ទើបបារាំ​ងឲ្យ UTM​​ មួយមកជំនួស។​ ចំពោះវិធីសាស្ត្រ​ផ្ទៀងផ្ទាត់គឺ​ប្រើវិធីសាស្ត្របុរាណ ​ដោយយកក្រដាសកាល់ ​មកកាល់​លើផែនទីដើម​របស់កម្ពុជា ​រួចយកក្រដាស​កាល់ដោយមាន​ស្នាមកាល់ខ្សែព្រំដែន​ និងខានលេខា​នោះមកត្រួត​ពីលើផែនទី ​ដែលបារាំងផ្ត​ល់ឲ្យ។ ជា​លទ្ធផលនៃការផ្ទៀងផ្ទាត់​នេះគឺដូចគ្នា​បេះបិទ៕​




ផែនទីបោនខ្នាត១/១០០ .០០០ ពីបារាំងទាំង២៦ផ្ទាំង ផ្ទៀងផ្ទាត់ជាមួយផែនទីផ្លូវការរបស់រាជរដ្ឋាភិបាល មានខ្សែបន្ទាត់ព្រំដែនដូចគ្នាបេះបិទ

ការផ្ទៀងផ្ទាត់​ផែនទីកម្ពុជា ​បោន ខ្នាត១​ លើ ១០០.០០០ ​ដែលផ្តល់ជូន​ដោយរដ្ឋាភិបាល​បារាំង ​និងផែនទី​របស់រាជរដ្ឋាភិបាល​ដែលកំពុង​ប្រើប្រាស់នា​ពេលបច្ចុប្បន្ន​ទាំង២៦ផ្ទាំង បាន​បញ្ចប់ហើយ​នៅម៉ោង ​១១៖៣០នាទី ​ព្រឹកថ្ងៃទី០៣ ​ខែកញ្ញានេះ ​ជាលទ្ធផល​បង្ហាញថា ខ្សែបន្ទាត់​ព្រំដែនកម្ពុជា​ នៅលើផែនទី​ខ្មែរផ្តល់​ជូនដោយបារាំង​ និងផែនទី​របស់រាជ​រដ្ឋាភិបាល​ គឺដូចគ្នាបេះបិទ​ នេះបើតាម​ការបញ្ជាក់របស់ ​ឯកឧត្តម​ទេរដ្ឋមន្ត្រី ​វ៉ា គឹមហុង ប្រធានគណៈកម្មា​ធិការព្រំដែន​ចម្រុះកម្ពុជា​នៅពេលបញ្ចប់ការ​ផ្ទៀងផ្ទាត់ ​នៅវិមាន​សន្តិភាព។​

ការផ្ទៀង​ផ្ទាត់ផែនទីនេះ​ ក្រុមការងារ​បច្ចេកទេស​ព្រំដែនរបស់ឯកឧត្តម​ វ៉ា គឹមហុង ​គេបានប្រើ​វិធីសាស្រ្តដោយ​យកផែនទីទាំង​ពីរដាក់ត្រួត​លើគ្នា ​ហើយឆ្លុះជាកាល់ ​ដើម្បីមើលខ្សែ​បន្ទាត់ព្រំដែន។​ ការផ្ទៀងផ្ទាត់​ត្រូវបានធ្វើ​ឡើងម្តងមួយ​ផ្ទាំងៗ តាមវី​ធីដូចៗគ្នា ​រហូតគ្រប់​ទាំង ២៦ផ្ទាំង​។

ការផ្ទៀង​ផ្ទាត់ក្រោមក្រ​សែខ្សែភ្នែកមន្រ្តី​កម្ពុជាមកពី​គ្រប់ភាគីពាក់ព័ន្ធ​ បូករួមទាំង​តំណាងគណបក្ស​នយោបាយប្រឆាំង​ ក៏ដូចជាអ្នក​ព័ត៌មានជាសា​ក្សីជាច្រើននាក់​ផងនោះ បានរក​ឃើញខ្សែបន្ទាត់​ព្រំដែន ​នៅលើផែនទីផ្ត​ល់ជូនដោយបារាំង​ អតីតម្ចាស់​អាណានិគមកម្ពុជា ​និងផែនទី ​របស់រាជរដ្ឋាភិបាល​ប្រើសម្រាប់បោះបង្គោល​ព្រំដែន ជាមួយ​វៀតណាម ​គឺដូចគ្នាបេះបិទ។​

ឯកឧត្តម ​ វ៉ា គឹមហុង ​ប្រធានគណៈកម្មាធិការ​ព្រំដែនចម្រុះកម្ពុជា ​បានបញ្ជាក់ថា ​ផែនទីបោន​ ខ្នាត ១ លើ១០០.​ ០០០ ដែលផ្តល់​ដោយបារាំងនេះ ​មានចំនួនតែ ​២៥ផ្ទាំង បោះពុម្ព​ដោយក្រុមភូមិសាស្រ្ត​ឥណ្ឌូនចិន​ ចន្លោះឆ្នាំ១៩ ៥១​-១៩៥៣​ ហើយមួយផ្ទាំង​ទៀតបារាំង​រកមិនឃើញ​នោះទេ  ប៉ុន្ត​ ផែនទីមួយផ្ទាំង​ ដែលរកមិ​នឃើញនេះ ​បារាំង បានផ្តល់​ជំនួសដោយ ​ផែនទី ​UTM ខ្នាត ១ លើ ​១០០.០០០​ ដែលមាន​ខ្សែព្រំដែនក៏ដូច​គ្នាដែរ។​

នៅពេល​ផ្ទៀងផ្ទាត់ ​បង្ហាញថា ​ខេត្តរបស់កម្ពុជា ​ដែលមានព្រំដែន​ជាប់ប្រទេសវៀត​ណាមរួមមាន៖​ កណ្តាល ​ស្វាយរៀង ​ព្រៃវែង កំពត ​តាកែវ កំពង់ចាម ​ត្បូងឃ្មុំ ក្រចេះ មណ្ឌលគិរី​ និង រតនគិរី ​គឺមានខ្សែព្រំ​ដែនច្បាស់លាស់ ​និងដូចគ្នារវាង​ផែនទីបានមកពីបារាំង ​ផ្ទៀងផ្ទាត់ជាមួយផែ​នទីផ្លូវការ ​ស្របច្បាប់រ​បស់កម្ពុជា។​

លោកបណ្ឌិត​ សុខ ទូច​ ប្រធានក្រុម​ស្រាវជ្រាវព្រំដែនកម្ពុជា ​នៃរាជ្យបណ្ឌិត្យ​សភាកម្ពុជា ក្រោយ​ពីពិនិត្យកា​រផ្ទៀងផ្ទាត់ផែនទី​នាព្រឹកនេះ ​បានផ្តល់កិច្ចស​ម្ភាសន៍ដល់​អ្នកសារព័ត៌មាន ​ដោយធ្វើកា​រអំពាវនាវ​ ឲ្យខ្មែរមានការ​ឯកភាពជាតិ​ទៅលើបញ្ហាផែ​នទី និងបញ្ចប់ការ​ចោទប្រកាន់​គ្នាក្នុងសំណុំរឿងផែនទីនេះ។​ លោកបណ្ឌិត ​សុខ ទូច ​បានអំពាវនាវ​យ៉ាងដូច្នេះ «​ត្រូវតែបញ្ចប់​បញ្ហាផែនទី​គ្រប់និន្នាកា​រនយោបាយ ​យើងត្រូវតែមាន​ឯកភាពជាតិ​ ទៅលើផែនទី​ក្នុងការកំណត់​ព្រំដែនប្រទេសយើង»​។

អ្នកនាំពាក្យ​ទីស្តីការគណៈ​រដ្ឋមន្រ្តី ​ឯកឧត្តម ​ផៃ ស៊ីផាន ​បានថ្លែងផង​ដែរថា ការផ្ទៀង​ផ្ទាត់នេះ​ ដើម្បីធនាតម្លាភាព ​បញ្ជាក់ឲ្យបាន​ហ្មត់ចត់ ត្រឹមត្រូវ​ពិតប្រាកដ​ ក្នុងកិច្ចទទួលខុ​សត្រូវខ្ពស់​របស់រាជរដ្ឋាភិ​បាលកម្ពុជា ​ក្នុងការបោះ ​បង្គោលព្រំដែន​រវាងព្រះរាជាណាច​ក្រកម្ពុជា ​និងវៀតណាម​ និង  បញ្ចប់នូ​វការញុះញង់ ​ដោយគ្មានការទ​ទួលខុសត្រូវ​ បង្កើតស្មារតី​ជាតិនិយមជ្រុល​ ធ្វើឲ្យមានការ​បែកបាក់ជាតិ។​

ឯកឧត្តម ​ផៃ ស៊ីផាន​ បានបញ្ជាក់​ទៀតថា ​ការផ្ទៀងផ្ទាត់នេះ ​ក៏ដើម្បីបញ្ជាក់​ពីការប្តេជ្ញាចិត្ត​របស់រាជ​រដ្ឋាភិបាល ​ក្នុង ការកសាង​ខ្សែបន្ទាត់ព្រំដែន​ច្បាស់លាស់ ​ប្រកបដោយសន្តិភាព​ មិត្តភាព​ សហប្រតិបត្តិការ​ និង ការអភិវឌ្ឍន៍ជា ​មួយប្រទេស​ជិតខាង​។

សូមបញ្ជាក់ថា ​កាលពីថ្ងៃទី​២០ ខែសីហា ឆ្នាំ​២០១៥កន្លងទៅ​ថ្មីៗនេះ ​អង្គការសហ​ប្រជាជាតិ​ ក៏បានផ្តល់ផែនទី ​UTM ខ្នាត ​១ លើ ១០០.០០០ ​ចំនួន១៨ ផ្ទាំង ​មកឲ្យរាជ​រដ្ឋាភិបាលក​ម្ពុជា ដើម្បីធ្វើការ​ផ្ទៀងផ្ទាត់ជាមួយ​ផែនទីរបស់រា​ជរដ្ឋាភិបាល​ផងដែរ ​ដែលការផ្ទៀងផ្ទាត់ ​ក៏បានរកឃើញថា ​ខ្សែបន្ទាត់ព្រំដែន​នៅលើផែនទី​ប្រើដោយរាជ​រដ្ឋាភិបាលកម្ពុជា ​និង ផែនទី ​UTM ​របស់ខ្មែរ​យកទៅប្រគល់​ជូនអង្គការ​សហប្រជាជាតិ​ឆ្នាំ១៩៦៤ ​គឺដូចគ្នា។​

តាមរយ:ការ​ផ្ទៀងផ្ទាត់ផែន​ទីពីបារាំង​ ជាមួយផែនទីរ​បស់រាជរដ្ឋាភិបាលកំ​ពុងប្រើប្រាស់ ផែនទីបោន ​ខ្នាត១លើ១០០ពាន់ដូចគ្នានេះ គឺ​ជាការយកគោ​មកផ្ទៀងផ្ទាត់​ជាមួយគោ គឺជាលទ្ធផល​នៅតែជាគោ ​គឺសូមគណបក្សប្រឆាំ​ងបញ្ឈប់ទៅការ​យកបញ្ហាព្រំដែន​ បញ្ហាផែនទី​ ដែលពួក​ខ្លួនចេះតែចោទ ​ប៉ុន្តែ គ្មានជំនាញព្រំ​ដែនអ្វីបន្តិច​ទាល់តែសោះ ម​កកេងចំណេញន​យោបាយត​ទៅទៀត។​