សម្ដេចតេជោ​ ហ៊ុន​ សែន​ អញ្ជើញដឹកនាំគណៈប្រតិភូដល់ទីក្រុងសេអ៊ូល​ ដោយសុវត្ថិភាព

នៅរសៀលម៉ោង២.៣៥នាទី(ម៉ោងនៅទីក្រុងសេអ៊ូល សាធារណរដ្ឋកូរ៉េ​ ត្រូវនឹងម៉ោង​១២.៣៥នាទី​ ម៉ោងនៅកម្ពុជា)​  សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី ណៃព្រះរាជាណាចក្រកម្ពុជា និងគណៈប្រតិភូជាន់ខ្ពស់ ព្រះរាជាណាចក្រកម្ពុជា បានអញ្ជើញទៅដល់រដ្ឋធានីសេអ៊ូល សាធារណរដ្ឋកូរ៉េ  ដោយសុវត្ថិភាពហើយ ដើម្បីបំពេញទស្សនកិច្ចនៅក្នុងសាធារណរដ្ឋកូរ៉េ និងចូលរួមកិច្ចប្រជុំកំពូលសន្តិភាពពិភពលោក ឆ្នាំ២០២២  ចាប់ពីថ្ងៃទី១១ ដល់ថ្ងៃទី១៣កុម្ភៈ ឆ្នាំ២០២២។ 

នៅក្នុងដំណើរនៃការអញ្ជើញមកដល់ អាកាសយានដ្ឋានអន្តរជាតិអ៉ីនឆន់​ ទីក្រុងសេអ៊ូលរបស់ សម្ដេចតេជោ នាយករដ្ឋមន្ត្រី និងគណៈប្រតិភូ គឺត្រូវបានទទួលស្វាគមន៍យ៉ាងកក់ក្តៅបំផុតអគ្គនាយករង នៃក្រសួងការបរទេសកូរ៉េ លោកជំទាវ ជ្រឹង បុទុមរង្សី ឯកអគ្គរាជទូត ព្រះរាជាណាចក្រកម្ពុជា ប្រចាំសាធារណរដ្ឋកូរ៉េ ព្រមទាំងវត្តមាន ឯកឧត្តម លោកជំទាវ ជាឥស្សរជនជាន់ខ្ពស់ ក្រសួងការបរទេសកូរ៉េ និងឥស្សរជនការទូត របស់ព្រះរាជាណាចក្រកម្ពុជា ជាច្រើនរូប។ 

តាមកម្មវិធីដែលបានគ្រោងទុក សម្តេចតេជោនាយករដ្ឋមន្រ្តី ក្រៅពីការថ្លែងសុន្ទរកថាគន្លឹះចំនួន៣ ក្នុងកិច្ចប្រជុំកំពូលសន្តិភាពពិភពលោក ឆ្នាំ២០២២ សម្តេចតេជោនាយករដ្ឋមន្រ្តី នឹងជួបពិភាក្សាទ្វេភាគីជាមួយ ឯកឧត្តម ម៊ូន ចេអ៊ីន ប្រធានាធិបតី នៃសាធារណរដ្ឋកូរ៉េ ឯកឧត្តម បាន គីមូន អតីតអគ្គលេខាធិការអង្គការសហប្រជាជាតិ និងជាសហប្រធានកិច្ចប្រជុំកំពូលសន្តិភាពពិភពលោក ឆ្នាំ២០២២ រួមទាំងការជួបសន្ទនាជាមួយ ឯកឧត្តម លី ចេមីយ៉ុង បេក្ខភាពប្រធានាធិបតី មកពីគណបក្សប្រជាធិបតេយ្យកូរ៉េ ឯកឧត្តម យ៊ូន សឹកយូល បេក្ខជនប្រធានាធិបតេយ្យ មកពីគណបក្សអំណាចប្រជាជនកូរ៉េ និងជួបដោយឡែកជាមួយ លោកជំទាវ បណ្ឌិត ហាក់ ចាហាន់ម៉ូន ស្ថាបនិកមូលនិធិសហព័ន្ធសន្តិភាពសកល។

ដោយឡែកនៅសណ្ឋាគារឡូតេវើល ដែលជាទីកន្លែងស្នាក់អាស្រ័យរបស់សម្តេចតេជោនាយករដ្ឋមន្រ្តី ក៏នឹងវត្តមាននៃការអញ្ជើញដល់របស់សម្តេចតេជោ ត្រូវបានការធ្វើគារវកិច្ចស្វាគមន៍យ៉ាងកក់ ក្តៅ ពីឯកឧត្តម Yun Young-Ho អគ្គនាយកអង្គការសហព័ន្ធសន្តិភាពសកល លោកបណ្ឌិត Thomas G Walsh ប្រធានអអ្គការសហព័ន្ធសន្តិភាពសកល ព្រមទាំងវត្តមាន អស់លោក លោកស្រី នៃអង្គការសហព័ន្ធសន្តិភាពសកល រួមទាំងនិស្សិតនិងបងប្អូនជនរួមជាតិកម្ពុជា ដែលកំពុងបំពេញការសិក្សា និងប្រកបការងារនៅសាធារណរដ្ខកូរ៉រ ជាច្រើនរូប។ 

សម្រាប់ព័ត៌មាននៃដំណើរទស្សនកិច្ច និងកិច្ចប្រជុំផ្សេងៗ នឹងធ្វើការផ្សាយជូនបងប្អូនជនរួមជាតិជាបន្តបន្ទាប់៕

សម្តេចតេជោ ហ៊ុន សែន បានអញ្ជើញចាកចេញពីកម្ពុជាហើយ ដើម្បីបំពេញទស្សនកិច្ចនៅកូរ៉េខាងត្បូង និងធ្វើជាសហប្រធានកិច្ចប្រជុំកំពូលសន្តិភាពពិភពលោកឆ្នាំ២០២២

(ភ្នំពេញ)៖ នៅវេលាម៉ោង៨ព្រឹកថ្ងៃព្រហស្បតិ៍ ទី១០ ខែកុម្ភៈ ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា ដឹកនាំគណៈប្រតិភូជាន់ខ្ពស់អញ្ជើញចាកចេញពីរាជធានីភ្នំពេញហើយ ទៅបំពេញទស្សនកិច្ច នៅប្រទេសកូរ៉េខាងត្បូង និងធ្វើជាសហប្រធានកិច្ចប្រជុំកំពូលសន្តិភាពពិភពលោកឆ្នាំ២០២២ ក្រោមមូលបទ «ឆ្ពោះទៅកាន់សន្តិភាពនៅឧបទ្វីបកូរ៉េ»។

យោងតាមការជូនព័ត៌មានរបស់ក្រសួងការបរទេសបានឱ្យដឹងថា សម្តេចតេជោ ហ៊ុន សែន និងគណៈប្រតិភូ នឹងទស្សនកិច្ចនៅប្រទេសកូរ៉េខាងត្បូងចាប់ពីថ្ងៃទី១០ កុម្ភៈ រហូត ដល់ថ្ងៃទី១៣ ខែកុម្ភៈ ទើបត្រឡប់មកកម្ពុជាវិញ។ ក្រសួងការបរទេសបានគូសបញ្ជាក់ថា កិច្ចប្រជុំកំពូលសន្តិភាពពិភពលោកឆ្នាំ២០២២ ក្រោមមូលបទ «ឆ្ពោះទៅកាន់សន្តិភាព នៅឧបទ្វីបកូរ៉េ» នៅទីក្រុងសេអ៊ូល សម្តេចតេជោ ហ៊ុន សែន នឹងធ្វើជាសហប្រធាន ជាមួយលោកស្រីបណ្ឌិត ហាក់ ចាហាន់មូន សហស្ថាបនិកនៃសហព័ន្ធសន្តិភាពសកល (UPF) និង លោក បាន គីមូន អតីតអគ្គលេខាធិការអង្គការសហប្រជាជាតិផងដែរ។

ក្នុងកិច្ចប្រជុំកំពូលសន្តិភាពពិភពលោកឆ្នាំ២០២២នេះ នឹងមានការចូលរួមពីបណ្តាវាគ្មិនសំខាន់ៗ និងអ្នកចូលរួមមកពី ១៥៧ប្រទេស ដើម្បីស្វែងរកក្តីសង្ឃឹមក្នុងការបង្រួបបង្រួមឧបទ្វីបកូរ៉េប្រកបដោយសន្តិវិធី។

អញ្ជើញអមដំណើរសម្តេចតេជោនាយករដ្ឋមន្ត្រី ទៅកាន់ប្រទេសកូរ៉េខាងត្បូងនាពេលនេះ រួមមាន៖ លោក សួស យ៉ារ៉ា ប្រធានគណៈកម្មាធិការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា និងលោកស្រី អ៉ឹង កន្ថាផាវី រដ្ឋមន្ត្រីក្រសួងកិច្ចការនារី ព្រមទាំងមន្ត្រីជាន់ខ្ពស់រាជរដ្ឋាភិបាល និងរដ្ឋសភាកម្ពុជាមួយចំនួនទៀតផងដែរ ។

ក្រសួងការបរទេស បានឱ្យដឹងផងដែរថា ក្នុងអំឡុងពេលស្នាក់នៅទីក្រុងសេអ៊ូល សម្តេចតេជោនាយករដ្ឋមន្ត្រី នឹងមានជំនួបជាមួយ លោក មូន ចេ-អ៉ីន ប្រធានាធិបតីសាធារណរដ្ឋកូរ៉េ ដើម្បីពិភាក្សាអំពីទំនាក់ទំនង និងកិច្ចសហប្រតិបត្តិការទ្វេភាគី រួមមាន៖ កិច្ចសហប្រតិបត្តិការលើវិស័យនយោបាយ សេដ្ឋកិច្ច និងសង្គម-វប្បធម៌ និងធ្វើការផ្លាស់ប្តូរទស្សនៈលើបញ្ហាតំបន់ និងអន្តរជាតិ ដែលជាកង្វល់ និងចំណាប់អារម្មណ៍រួមគ្នា។

សម្តេចតេជោនាយករដ្ឋមន្ត្រី ក៏នឹងទទួលជំនួបសម្តែងការគួរសមពីសំណាក់ លោក បាន គី-មូន អតីតអគ្គលេខាធិការអង្គការសហប្រជាជាតិផងដែរ។ សម្តេចតេជោរំពឹងថា នឹងមានជំនួបជាមួយប្រមុខរដ្ឋ/រដ្ឋាភិបាល នៃប្រទេសមួយចំនួន ក៏ដូចជាទទួលសាវនាការពីសំណាក់ឥស្សរជននយោបាយ និងធុរជនផ្សេងទៀតផងដែរ។

នៅថ្ងៃទី១២ ខែកុម្ភៈ ក្នុងកិច្ចប្រជុំកំពូលសន្តិភាពពិភពលោក នឹងមានការប្រគល់ជាផ្លូវការនូវពានរង្វាន់សន្តិភាពស៊ុនហាក់លើកទី៥ ជូនដល់សម្តេចតេជោ ហ៊ុន សែន សម្រាប់ភាពជាអ្នកដឹកនាំដ៏ខ្ជាប់ខ្ជួនរបស់សម្តេចក្នុងរយៈពេលជាច្រើនឆ្នាំមកនេះ ក្នុងនាមជានាយករដ្ឋមន្ត្រីកម្ពុជា ដែលបានរួមចំណែកដល់ស្ថិរភាព ការអភិវឌ្ឍសេដ្ឋកិច្ច និងសន្តិភាពនៅកម្ពុជា និងតំបន់អាស៊ីអាគ្នេយ៍ទាំងមូល។

ពាក់ព័ន្ធនឹងពានរង្វាន់សន្តិភាពស៊ុនហាក់នេះ លោកបណ្ឌិត Thomas G. Walsh ប្រធានមូលនិធិសន្តិភាពស៊ុនហាក់ បានបញ្ជាក់ថា ការផ្តល់ពានរង្វាន់សន្តិភាពស៊ុនហាក់ គឺជាសក្ខីភាពនៃការទទួលស្គាល់លើការរួមចំណែករបស់ សម្តេចតេជោ ក្នុងការកសាងសន្តិភាព និងការអភិវឌ្ឍមនុស្សជាតិ។ ពានរង្វាន់នេះត្រូវបានបង្កើតឡើងដើម្បីទទួលស្គាល់ឥស្សរជន និងស្ថាប័ននានា ដែលបានបម្រើមនុស្សជាតិដែលអាចជាគំរូមួយ ធ្វើឱ្យពិភពលោកកាន់តែមានភាពប្រសើរឡើងសម្រាប់មនុស្សជំនាន់ក្រោយ។

បើតាមលោក Thomas G. Walsh ពានរង្វាន់សន្តិភាពស៊ុនហាក់ គឺជាពានរង្វាន់សន្តិភាពអន្តរជាតិ ដែលត្រូវបានបង្កើតឡើងក្នុងឆ្នាំ២០១៥ ដើម្បីរំលឹកដល់ទស្សនវិស័យសន្តិភាពរបស់ស្ថាបនិក គឺលោក ស៊ុន យ៉ុនមូន និងលោកស្រីបណ្ឌិត ហាក់ ចា ហាន់ មូន៕

បទវិភាគអន្តរជាតិ៖ អ្វីទៅនៅពីក្រោយភាពផ្អែមល្ហែម រវាងលោក ស៊ី ជិនពីង និងលោក ពូទីន?

(ប៉េកាំង)៖ ខណៈបណ្ដាប្រទេសលោកខាងលិចមួយចំនួនដឹកនាំដោយសហរដ្ឋអាមេរិក នាំគ្នាធ្វើពហិការការទូតប្រឆាំងនឹងព្រឹត្តិការណ៍កីឡាអូឡាំពិករដូវរងា ទីក្រុងប៉េកាំង ចិន និងរុស្ស៊ីបានយកឱកាសនៃការប្រារព្ធព្រឹត្តិការណ៍ដ៏ធំមួយនេះបង្ហាញពីការកើនឡើងជាលំដាប់នៃទំនាក់ទំនងទ្វេភាគីនៃប្រទេសរបស់ ពួកគេ។

លោកប្រធានាធិបតីរុស្ស៊ី វ្ល៉ាឌីមៀ ពូទីន បានបង្ហោះរូបភាពជាច្រើនសន្លឹកដែលថតជាមួយលោកប្រធានាធិបតីចិន ស៊ី ជិនពីង នៅថ្ងៃបើកការប្រកួត ព្រឹត្តិការណ៍កីឡាអូឡាំពិករដូវរងាទីក្រុងប៉េកាំង ឆ្នាំ២០២២។ មិនតែប៉ុណ្ណោះ លោក ពូទីន ផ្ទាល់ថែមទាំងប្រកាសពីភាពជាដៃគូយុទ្ធសាស្ត្រគ្មានព្រំដែន 

ដើម្បីទប់ទល់នឹងការពង្រីកឥទ្ធិពលរបស់អង្គការ NATO ព្រមទាំងបានអំពាវនាវឱ្យលោកខាងលិចបោះបង់ចោលមនោគមន៍វិជ្ជាសម័យសង្រ្គាមត្រជាក់។

នៅក្នុងសេចក្ដីថ្លែងការណ៍រួមមួយ លោក ពូទីន និងលោក ស៊ី ជិនពីន ក៏បាននិយាយដែរថា NATO ត្រូវតែគោរពដែនអធិបតេយ្យភាព, សន្តិសុខ និងផលប្រយោជន៍នៃបណ្ដាប្រទេសទាំងឡាយ ហើយប្រកាន់ឥរិយាបថស្មើភាពចំពោះការអភិវឌ្ឍដោយសន្តិវិធីរបស់បណ្ដាប្រទេសនានា។ តើហេតុអ្វីបានចិន និងរុស្ស៊ីអាចសម្រេចបានទំនាក់ទំនងល្អដូចសព្វថ្ងៃ?

បើតាមអ្នកជំនាញភាគច្រើន, ចិន និងរុស្ស៊ីមានទំនាក់ទំនងល្អ គឺដោយសារតែពួកគេចាត់ទុកលោកខាងលិច ជាពិសេសអាមេរិក ជា «សត្រូវរួម» ហើយឈរលើ គោលជំហរបែបនេះធ្វើឱ្យគេយល់ថាប្រទេសទាំង២ ដែលធ្លាប់មានជម្លោះមនោគមន៍វិជ្ជានឹងគ្នាក្នុងសម័យសង្រ្គាមត្រជាក់ កំពុងឆ្ពោះទៅរកការប្រែក្លាយ ទំនាកទំនងរបស់ពួកគេ ឱ្យទៅជាប្រព័ន្ធសម្ព័ន្ធមិត្តតែម្ដង។

*កិច្ចសហប្រតិបត្តិការយោធារវាងចិន និងរុស្ស៊ី ភាគច្រើនពាក់ព័ន្ធនឹងនយោបាយ

ក្រុមអ្នកជំនាញលោកខាងលិច មើលឃើញកិច្ចសហប្រតិបត្តិការយោធារវាងចិន និងរុស្ស៊ី មានលក្ខណៈនយោបាយ ជាជាងការត្រៀមខ្លួនសម្រាប់ការចូលរួម ក្នុងសកម្មភាពយោធារួមគ្នា។ កាលពីប៉ុន្មានខែមុន ទីក្រុងម៉ូស្គូបានបង្ហាញការគាំទ្រត្រង់ៗរបស់ខ្លួន ចំពោះការប្រើប្រាស់កម្លាំងយោធារបស់ចិនជាមធ្យោបាយ ដាក់សម្ពាធលើជប៉ុន និងកូរ៉េខាងត្បូង។

កាលពីខែតុលា ឆ្នាំ២០២១ កងទ័ពជើងទឹកចិន និងរុស្ស៊ីបានដឹកនាំាការធ្វើប្រតិបត្តិការល្បាតរួមគ្នា ជុំវិញប្រទេសជប៉ុន ហើយនៅខែវិច្ឆិកា ឆ្នាំ២០២១, យន្ដហោះទម្លាក់គ្រាប់បែកយុទ្ធសាស្ត្រជាច្រើនគ្រឿងនៃប្រទេសទាំង២ បានចូលរួមក្នុងប្រតិបត្តិការល្បាតអាកាសជាលើកទី៣ ពីលើតំបន់សមុទ្រជប៉ុន និងសមុទ្រចិនខាងកើត ដែលនេះត្រូវបានគេមើលឃើញថាចិន និងរុស្ស៊ីចង់បង្ហាញថាខ្លួនមានបំណងរួមដៃគ្នា ដើម្បីទប់ទល់សម្ព័ន្ធមិត្តអាមេរិក-ជប៉ុន។

ប៉ុន្តែ ទីក្រុងប៉េកាំងវិញ ហាក់ដូចជាមិនបានធ្វើដូចរុស្ស៊ីនោះទេ ដោយពួកគេមានការស្ទាក់ស្ទើរបង្ហាញការគាំទ្រត្រង់ៗចំពោះសកម្មភាពយោធារុស្ស៊ីនៅក្នុង តំបន់អឺរ៉ុប។ កងទ័ពចិនមិនបានចូលរួមក្នុងការធ្វើសមយុទ្ធយោធាឈ្មោះថា Zapad-21 ដែលរៀបចំឡើងដោយរុស្ស៊ី និងបេឡារុសនោះទេ។ ផ្ទុយទៅវិញ កងទ័ពរុស្ស៊ី បានចូលរួមជាក្នុងសមយុទ្ធយោធារួមនៅក្នុងប្រទេសចិន។

ការស្ទាក់ស្ទើររបស់ចិនក្នុងការបង្ហាញការគាំទ្រត្រង់ៗ ដល់សកម្មភាពយោធារុស្ស៊ីក្នុងតំបន់អឺរ៉ុប ត្រូវបានគេបកស្រាយថាអាចមកពីចិនខ្លាចថាវាធ្វើឱ្យ សហភាពអឺរ៉ុប កាន់តែខិតជិតទៅរកសហរដ្ឋអាមេរិក។ ម្យ៉ាងវិញទៀត ខណៈរុស្ស៊ីគាំទ្រគោលនយោបាយចិនតែមួយចំពោះកោះតៃវ៉ាន់ ចិនវិញមិនដែលបាន លើកឡើងពីបំណងជាក់លាក់ពាក់ព័ន្ធនឹងបញ្ហាអ៊ុយក្រែនឡើយ៕

ប្រភព៖ CNA (ថ្ងៃពុធ ទី៩ ខែកុម្ភៈ ឆ្នាំ២០២២)

ដោយៈ Fresh News