ឯកឧត្ត កែវ រ៉េមី រដ្ឋលេខាធិការនៃទីស្តីការគណៈរដ្ឋមន្ត្រី ក្នុងនាមជាអ្នកនាំពាក្យរាជរដ្ឋាភិបាលកម្ពុជា និងអង្គភាពព័ត៌មាន និងប្រតិកម្មរហ័ស នាព្រឹកថ្ងៃទី១៧ ខែកក្កដា ឆ្នាំ២០១៣ បានប្រកាសជូនរង្វាន់ចំពោះអ្នកដែលពាក់ព័ន្ធក្នុងការ ប្រើឈ្មោះវិទ្យាស្ថានសាធារណរដ្ឋអន្តរ (IRI) អាមេរិកាំង ផលិត និងចែកចាយលទ្ធផលស្ទង់មតិប៉ាន់ស្មាន អំពីការទទួលបានអសនៈតាមរាជធានី និងខេត្តនីមួយៗ ដែលចេញសារភាព។
នៅក្នុងសន្និសីទ្ធកាសែតដែលធ្វើនៅទីស្តីការគណៈរដ្ឋមន្ត្រី ឯកឧត្ត កែវ រ៉េមី បានមានប្រសាសន៍ឲ្យដឹងថា នៅក្នុងរយៈពេលកន្លងទៅថ្មីៗនេះ មានជនទុច្ចរិត ដែលជាសកម្មជន និងឃោសនិករបស់គណបក្សមួយ បានផលិតក្លែងបន្លំឯកសារស្ទង់មតិរបស់វិទ្យាស្ថានសាធារណរដ្ឋអន្តរជាតិ (IRI) ហើយបាន និងកំពុងចែកផ្សាយ និងឃោសនានូវឯកសារក្លែងក្លាយ ស្តីអំពីលទ្ទផលនៃការស្ទង់មតិប៉ាន់ស្មាន អំពីការទទួលបានអសនៈតាម រាជធានី និងខេត្តនីមួយៗ។
ឯកឧត្ត កែវ រ៉េមី បានមានប្រសាសន៍បញ្ជាក់ថា នេះជាទង្វើដ៏ថោកទាប ដែលបាននិងកំពុងបំផ្លាញនូវដំណើរការបោះឆ្នោតមួយ ដែលត្រូវមានសេរីភាព តម្លាភាព និងជាពិសេសភាពត្រឹមត្រូវ និងយុត្តិធម៌។ ជាពិសេសធ្វើឲ្យប៉ះពាល់ដល់ស្ថិរភាពសង្គម បង្ករឡើងនូវភាពអសន្តិសុខ ប៉ះពាល់ដល់ស្ថានភាពសេដ្ឋកិច្ច និងហិរញ្ញវត្ថុ ដែលកំពុងមានស្ថានភាពល្អប្រសើរ។ ព្រោះធ្វើឲ្យប្រជាពលរដ្ឋ និងអ្នកវិនិយោទុនខ្លះទៅដកលុយពីធនាគារ ដោយសារនាពេលកន្លងមកអ្នកនយោបាយប្រឆាំងបានឃោសនាថា បើគេឈ្នះឆ្នោតគេនឹងរឹបអូសដកហូតទ្រព្យសម្បត្តិដីធ្លីពីម្ចាស់កម្មសិទ្ធិស្របច្បាប់បច្ចុប្បន្ន យកទៅចែកចាយ។
ជាមួយនឹងការប្រកាសឲ្យដឹងថា លោកស្រី ជេស៊ីកា ឃីនហ្គេន (JESSICA KEEGAN) ប្រធានវិទ្យាស្ថានសាធារណរដ្ឋអន្តរជាតិ (IRI) បានបដិសេធជាផ្លូវការចំពោះ ឯកសារដែលជនទុច្ចរិតបានផលិត និងកំពុងចែកផ្សាយនេះ ឯកឧត្តម កែវ រ៉េមី បានស្នើសុំឲ្យសមត្តកិច្ចគ្រប់ជាន់ថ្នាក់ធ្វើការស្រាវជ្រាវរកចាប់ខ្លួនជាបន្ទាន់ ជនទាំងឡាយណាដែលធ្វើ និងប្រើប្រាស់ឯកសារក្លែងបន្លំនេះ ព្រោះជាទង្វើដែលខុសនឹងមាត្រា ៦២៦, ៦២៧, ៦២៨ នៃក្រមព្រហ្មទណ្ឌ។
ក្នុងនាមរាជរដ្ឋាភិបាល ឯកឧត្ត កែវ រ៉េមី បានអំពាវនាវសុំឲ្យប្រជាពលរដ្ឋក៏ដូចជាអ្នកវិនិយោគិននានា រក្សានូវភាពស្ងប់ស្ងាត់ ជឿទុកចិត្តមកលើរាជរដ្ឋាភិបាល ក្នុងការរៀបចំការបោះឆ្នោតឲ្យប្រព្រឹត្តទៅដោយរលូន សេរី យុត្តិធម៌ និងត្រឹមត្រូវ ដោយមិនអនុញ្ញាតឲ្យបុគ្គលណាធ្វើឲ្យចលាចលក្នុងពេលបោះឆ្នោតនេះបានឡើយ៕