សេចក្តីជូនដំណឹងស្តីពីការបិទដំណើរការជាបណ្តោះអា សន្នរយ:ពេល០២សប្ដាហ៍ រោងភាពយន្ត រោងសម្តែងសិល្ប: និងសារមន្ទីរ នៅក្នុងរាជធានីភ្នំពេញ និងខេត្តកណ្តាល

នៅថ្ងៃទី២៣ ខែកុម្ភៈ ឆ្នាំ២០២១ ក្រសួងវប្បធម៌ និងវិចិត្រសិល្បៈ បានចេញសេចក្តីជូនដំណឹង ស្តីពីការបិទដំណើរការជាបណ្តោះអាសន្នរយ:ពេល០២សប្ដាហ៍ រោងភាពយន្ត រោងសម្តែងសិល្ប: និងសារមន្ទីរ នៅក្នុងរាជធានីភ្នំពេញ និងខេត្តកណ្តាល។

សូមអានសេចក្តីជូនដំណឹងខាងក្រោម៖

សេចក្តីជូនដំណឹងស្តីពីការផ្អាកដំណើរការសិក្សានៅតាមគ្រឹះស្ថានអប់រំបណ្តុះបណ្តាលបច្ចេកទេសនិងវិជ្ជាជីវៈជាបណ្តោះអាសន្នរយៈពេល ០២សប្តាហ៍ នៅរាជធានីភ្នំពេញ និងខេត្តកណ្តាល

ក្រសួងការងារ និងបណ្តុះបណ្តាលវិជ្ជាជីវៈ ចេញសេចក្តីជូនដំណឹងស្តីពីការផ្អាកដំណើរការសិក្សានៅតាមគ្រឹះ ស្ថានអប់រំបណ្តុះបណ្តាលបច្ចេកទេសនិងវិជ្ជាជីវៈ ជាបណ្តោះអាសន្នរយៈពេល ០២សប្តាហ៍ នៅរាជធានីភ្នំពេញ និងខេត្តកណ្តាល។

សូមអានសេចក្តីជូនដំណឹងខាងក្រោម៖

ពិធីសំណេះសំណាលជាមួយបងប្អូនអតីតយុទ្ធជន២០០គ្រួសារ នៅទីបញ្ជាការដ្ឋានតំបន់ប្រតិបត្តិការសឹករងខេត្តកោះកុង

កោះកុង៖ នៅថ្ងៃទី២២ ខែកុម្ភៈ ឆ្នាំ២០២១ លោកស្រី មិថុនា ភូថង អភិបាលនៃគណៈអភិបាលខេត្តកោះកុង បានអញ្ជើញស្វាគមន៍នាយឧត្តមសេនីយ៍ គន់ គីម ទេសរដ្ឋមន្រ្តី ទទួលបន្ទុកបេសកកម្មពិសេស អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា បានអញ្ជើញជួបសំណេះសំណាល ជាមួយបងប្អូនអតីតយុទ្ធជន២០០គ្រួសារ នៅទីបញ្ជាការដ្ឋាន តំបន់ប្រតិបត្តិការសឹករងខេត្តកោះកុង។

លោកទេសរដ្ឋមន្រ្តី អនុប្រធាន  និងជាអគ្គលេខាធិការ សមាគមអតីតយុទ្ធជនកម្ពុជា បាននាំនូវការផ្តាំផ្ញើសួរសុខទុក្ខពីលោកនាយករដ្ឋមន្រ្តី ហ៊ុន សែន ប្រធានសមាគម អតីតយុទ្ធជនកម្ពុជានិងភរិយា ជូនដល់បងប្អូនសមាជិកអតីតយុទ្ធជនទូទាំងខេត្តកោះកុង ដែលបានវាយតម្លៃខ្ពស់ចំពោះការធ្វើពលីកម្មគ្រប់បែបយ៉ាងរបស់បងប្អូនអតីតយុទ្ធជនក្នុងបុព្វហេតុសុខសន្តិភាព របស់ប្រទេសជាតិទាំងមូល។ 

ក្នុងឱកាសនោះដែរ លោក ក៏បានអរគុណចំពោះថ្នាក់ដឹកនាំសមាគមអតីតយុទ្ធជន ក្រុងស្រុក ខេត្ត  និងសាខាឃុំ  សង្កាត់ដែលបានយកចិត្តទុកដាក់មេីលថែបងប្អូនអតីតយុទ្ធជន និងសូមអោយខេត្តខិតខំគ្រប់គ្រងដីសម្បទានសម្រាប់អតីតយុទ្ធជន អោយបានល្អដើម្បីទុកសម្រាប់ដោះស្រាយជូនបងប្អូនជាបន្តទៀតនិងបន្តដោះស្រាយជីវភាពបងប្អូនដែលជួបលំបាកអោយទាន់ពេលវេលា។ 

នាឱកាសនោះផងដែរ បងប្អូនទាំង២០០គ្រួសារ  បានសម្តែងការអរគុណយ៉ាងជ្រាលជ្រៅ ចំពោះលោកនាយករដ្ឋមន្រ្តី ហ៊ុន សែន និងភរិយា ដែលតែងតែយកចិត្តទុកដាក់ដល់ពួកគាត់ជាក់ស្តែងថ្ងៃនេះក្នុងនាមលោកទាំងពីរ តែងតែ បានចុះមកជួបបងប្អូនដោយផ្ទាល់។ ដោយមើលឃើញការលំបាករបស់បងប្អូនដែលជួបការលំបាក លោកបានចលនាថ្នាក់ដឹកនាំជុំវិញខេត្តជួយសង់ផ្ទះអំណោយសម្តេចជូន១០ខ្នង។ ចំពោះអ្នកអត់ដីអ់ត់ផ្ទះ ១០១គ្រួសារ សូមអោយខេត្តរៀបចំដីសម្បទាននៅត្រពាំងរូង ជូនបងប្អូន។ 

លោក ក៏បានណែនាំឱ្យបងប្អូនបន្តយកចិត្តទុកដាក់ចំពោះបញ្ហាជំងឺកូវីដ-១៩ ផងដោយត្រូវអនុវត្តន៍តាមវិធានការណ៍ កាពារកូវីដ-១៩ របស់លោកនាយករដ្ឋមន្រ្តី ហ៊ុន សែន គឺ  ៣ការពារ គឺត្រូវពាក់ម៉ាស់ លាងដៃ និងគម្លាតសង្គម  គម្លាតបុគ្គល និង៣កុំ គឺកុំចូលកន្លែងបិតជិត  គ្មានខ្យល់ចេញចូល  និងម៉ាស៊ីនត្រជាក់ច្រើនពេក កុំទៅកន្លែងមានមនុស្សច្រើន និងកុំប៉ះពាល់គ្នា កុំចាប់ដៃគ្នា កុំកៀកស្មា កុំឱបគ្នាជាដើម។

បងប្អូនទាំង២០០គ្រួសារ  បានទទួលអំណោយក្នុងមួយគ្រួសារ  អង្ករ ៣០គីឡូក្រាម  ឃីត១  ភួយ១  កន្ទេល១  ធុងទឹក១  ទឹក ត្រី ១យួរ  មី១០កញ្ចប់  ប្រេងឆា ២ដប  អំបិល ២គីឡូក្រាម  ថវិកា  ៨ម៉ឺន រៀល៕

ក្រសួងសុខាភិបាលប្រកាសថា មេរោគកូវីដដែលចម្លងក្នុងព្រឹត្តិការណ៍សហគមន៍២០កុម្ភៈ ជាកូវីដបំប្លែងខ្លួនថ្មី ដែលមានភាពកាចសាហាវ និងឆ្លងលឿនជាងធម្មតា

 (ភ្នំពេញ)៖ ក្រសួងសុខាភិបាលកម្ពុជា នៅព្រឹកថ្ងៃទី២៣ ខែកុម្ភៈ ឆ្នាំ២០២១នេះ បានចេញប្រកាសមួយទៀតដោយបញ្ជាក់ថា មេរោគកូវីដ១៩ ដែលចម្លងនៅក្នុងព្រឹត្តិការណ៍សហគមន៍២០កុម្ភៈ កន្លងទៅនេះ គឺជាមេរោគកូវីដ១៩ បំប្លែងខ្លួន ដែលជាមេរោគកាចសាហាវ និងចម្លងឆាប់រហ័សជាងធម្មតា ដែលកន្លងមកដឹងថាមានប្រភពពីប្រទេសអង់គ្លេស។ 

ក្រសួងសុខាភិបាល នៅព្រឹកថ្ងៃទី២៣ ខែកុម្ភៈ ឆ្នាំ២០២១នេះ បានប្រកាសរកឃើញអ្នកឆ្លងកូវីដ១៩ថ្មីចំនួន២៥នាក់ទៀត ក្នុងនោះមាន២៣នាក់ជាករណីឆ្លងចូលសហគមន៍ ដែលពាក់ព័ន្ធ «ព្រឹត្តិការណ៍សហគមន៍២០ កុម្ភៈ» សំខាន់នោះក្រសួងបញ្ជាក់ថា រកឃើញវីរុសបម្លែងថ្មី៣ករណី។

ការរកឃើញមេរោគកូវីដ១៩ បំប្លែងខ្លួន ក្នុងព្រឹត្តិការណ៍សហគមន៍២០កុម្ភៈនេះ ត្រូវបានពិនិត្យ និងពិសោធន៍ដោយវិទ្យាស្ថានប៉ាស្ទ័រកម្ពុជា។ ជាមួយនឹងការរកឃើញមេរោគកូវីដ១៩ បំប្លែងខ្លួនថ្មី ក្នុងសហគមន៍កម្ពុជានេះ ក្រសួងសុខាភិបាល ក៏បានប្រកាសអំពាវនាវឱ្យប្រជាពលរដ្ឋបន្តប្រុងប្រយ័ត្ន និងអនុវត្តវិធានការសុខាភិបាលឱ្យបានត្រឹមត្រូវ ដើម្បីទប់ស្កាត់ការរាតត្បាតនៃមេរោគកូវីដ១៩៕

ខាងក្រោមជាសេចក្តីប្រកាសផ្លូវការរបស់ក្រសួងសុខាភិបាល៖