Thursday, March 26, 2015
សហប្រធាន ICC អង្គរ ឯកភាពគ្នាកសាងទិន្នន័យថ្មីៗបន្ថែម សម្រាប់ការងារអភិរក្ស និងអភិវឌ្ឍតំបន់រមណីដ្ឋានប្រវត្តិសាស្ត្រអង្គរ
ចេញផ្សាយថ្ងៃ: ( ២៦ - មិនា - ២០១៥ )
នៅរសៀលថ្ងៃទី២៥ ខែមីនា ឆ្នាំ២០១៥ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី បានអនុញ្ញាតឲ្យសហប្រធានគណៈកម្មាធិការសម្របសម្រួលអន្ដរជាតិអង្គរ ICC ចូលជួបសវនាការការងារនៃដំណើររបស់ការគណៈកម្មាធិការសម្របសម្រួល អន្ដរជាតិនេះ។
សហប្រធានរបស់ ICC អង្គរ ដែលជួបពិភាក្សាការងារជាមួយឯកឧត្តមបណ្ឌិតសភាចារ្យ សុខ អាន គឺឯកឧត្តម Kumamaru Yuji ឯកអគ្គរាជទូតជប៉ុនប្រចាំកម្ពុជា និងឯកឧត្តម Jean-Claude Poimboeuf ឯកអគ្គរដ្ឋទូបារាំងប្រចាំកម្ពុជា។
សូមជម្រាបផងដែរថា គណៈកម្មាធិការសម្របសម្រួលអន្ដរជាតិ ICC បានដំណើរការជាង ២០ឆ្នាំមកហើយ ប្រកបដោយជោគជ័យ ហើយមិនត្រឹមតែការងារអភិរក្ស អភិវឌ្ឍ និងរក្សាការពារប្រាសាទនោះទេ គឺគណៈកម្មាធិការនេះ បានធ្វើឲ្យពិភពលោកចាប់អារម្មណ៍ ហើយការងាររបស់ ICC នោះ ក៏ក្លាយទៅជាឧទារហណ៍ជាក់ស្ដែង ចែកជូនដល់អន្ដរជាតិ ក្នុងវិស័យអភិរក្ស និងថែរក្សាការពារប្រាសាទ ជាពិសេសតំបន់រមណីដ្ឋានឧទ្យានអង្គរ។
ក្នុងកិច្ចជំនួបនោះ អង្គប្រជុំបានលើកឡើង និងឯកភាពគ្នាក្នុងកិច្ចការកសាងទិន្នន័យ កសាងសកម្មភាពថ្មី ការតាមដាន និងផលិតនូវឯកសារសាមញ្ញខ្នាតតូចៗ ដើម្បីសាធារណជនការកសាងប្រតិទិនសម្រាប់អ្នកជំនាញ ដែលអនុញ្ញាតឲ្យអ្នកជំនាញទាំងអស់នោះ ស្នាក់នៅឲ្យមានរយៈពេលយូរដើម្បីការងារប្រកបដោយកិច្ចការ ច្នៃប្រឌិត ជាពិសេសការប្រើប្រាស់ឲ្យអស់លទ្ធភាព នូវអ្វីដែលកម្ពុជាមានស្រាប់។
សូមជម្រាបផងដែរថា មជ្ឈមណ្ឌលអប្សរា គឺបានកសាងជានូវមជ្ឈមណ្ឌលមួយ ដែលមិនមែនគ្រាន់តែជាការសិក្សា ការធ្វើរដ្ឋបាលនោះទេ គឺជាកន្លែងសម្រាប់ស្នាក់នៅដល់អ្នកស្រាវជ្រាវ ដោយរាប់ទាំងម្ហូបអាហារ និងសកម្មភាពដទៃទៀត។
ការជួបពិភាក្សាគ្នានេះដែរ គឺមានលក្ខណៈប្រកបដោយភាពស្និទស្នាលជាមួយនឹងមោទនភាពចំពោះកិច្ច ការអភិវឌ្ឍ និងថែរក្សា ជួសជុលប្រាង្គប្រាសាទទាំងអស់នោះ ជាពិសេសសហប្រធាននៃគណ
ៈកម្មការសម្របសម្រួលអន្ដរជាតិ ដែលមានជប៉ុន និងបារាំង ដែលបានវាយតម្លៃខ្ពស់ជាមួយនឹងការថ្លែងអំណរគុណចំពោះវត្តមានរបស់ ឯកឧត្តមឧបនាយករដ្ឋមន្ដ្រី បណ្ឌិតសភាចារ្យ សុខ អាន ដែលលោកតែងតែមានវត្តមានរហូត ចាប់តាំងពីថ្ងៃបើករហូតដល់ថ្ងៃបិទនៃអង្គសិក្ខាសាលាស្ដីអំពី កិច្ចការអភិរក្ស ថែរក្សា និងការពារប្រាសាទអង្គរនេះ ជារៀងរាល់ឆ្នាំ៕
សម្តេចតេជោ បើកឱកាសដល់សិស្សជាប់បាក់ឌុបនិទ្ទេស D និង E ប្រលងចូលរៀនផ្នែកពេទ្យ
ចេញផ្សាយថ្ងៃ: ( ២៦ - មិនា - ២០១៥ )
សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសសំរេច ជាគោលការណ៍អនុញ្ញាតឲ្យសិស្សដែលទទួលបាននិទ្ទេសD និង និទ្ទេស E ក្នុងការប្រលង មធ្យមសិក្សាទុតិយភូមិ ក្នុងឆ្នាំ ២០១៤ និងឆ្នាំ បន្តបន្ទាប់ទៀតអាច ធ្វើការប្រលង ចូល សិក្សា ជំនាញពេទ្យ នៅសាកលវិទ្យា ល័យសុខាភិបាល ។
ការប្រកាសរបស់សម្តេចតេជោ នាយករដ្ឋមន្ត្រីនាពេលនេះ គឺនៅគ្រាដែលក្រសួងអប់រំ យុវជន និងកីឡា បាននឹងកំពុង ធ្វើ កំណែ ទំរង់ប្រពន្ធ័អប់រំនៅកម្ពុជា ពិសេសការប្រលងមធ្យម សិក្សាទុតិយភូមិ ក្នុង ឆ្នាំ ២០១៤កន្លងទៅ។
ថ្លែងនៅក្នុងពិធីបិទសន្និបាតក្រសួងអប់រំ យុវជន និងកីឡា នារសៀល ថ្ងៃទី ២៦ មីនា នៅ សាលសន្និសីទនៃវិទ្យាស្ថានបច្ចេកវិទ្យាកម្ពុជា សម្តេចតេជោ បានបញ្ជាក់ថា ដោយយោង ទៅ លើបរិបទថ្មី នៃកំណែទំរង់ក្នុងការ ប្រលងមធ្យមសិក្សាទុតិយភូមិ របស់ក្រសួងអប់រំ ដែល អត្រា សិស្សជាប់មាន ចំនួនតិច ដូច្នោះចាប់ពីពេលនេះតទៅរាជរដ្ឋាភិបាល ផ្តល់ឱកាស សំរាប់សិស្ស ដែលមាននិទ្ទេស D និង E អាចចូលប្រលងមុខវិជ្ជាពេទ្យ។
យ៉ាងណាក្តីសម្តេច បានបញ្ជាក់ថា មិនមែនយកសិស្សដែលបានប្រលងក្នុងឆ្នាំសិក្សា ២០១២ រឺ ២០១៣នោះទេ គឺយកត្រឹមឆ្នាំ ២០១៤ តទៅ ប៉ុណ្ណោះ។
គួររំលឹកថាកន្លង ទៅក្រសួង សុខាភិបាល បានសំរេចជ្រើសរើសសិស្សដែលជាប់បាក់ឌុប ចាប់ពី និទ្ទេស A B និង C ទើបអាចមានលទ្ធភាពប្រលងចូលរៀននៅសាលាពេទ្យបាន ដោយ សារអ្នកប្រលងជាប់មានចំនួនច្រើន រហូតដល់ទៅជាង៩០%។ ប៉ុន្តែឆ្នាំ ២០១៤ ផ្ទុយពីឆ្នាំ ២០១៣ ការប្រលងមធ្យមសិក្សាទុតិយភូមិ មានភាពតឹងរ៉ឹងខ្លាំង ដែលធ្វើឲ្យអត្រា ធ្លាក់មាន រហូតដល់ជាង៦០% ដូច្នេះការលើកទឹកចិត្ត និងផ្តល់ឱកាសឲ្យសិស្សនិទ្ទេស D និង E អាច ចូលប្រលង គឺជាភាពចាំបាច់។
គួររំលឹកថា ការប្រលងមធ្យមសិក្សាទុតិយភូមិឆ្នាំ ២០១៤ចំនួនពីរលើកកន្លងទៅ ចំនួនអ្នក ប្រលងជាប់មានប្រមាណ៤០%ប៉ុណ្នោះ ក្នុងចំណោមបេក្ខជនមានសិទ្ធិប្រលងចំនួនជាង ៩ម៉ឺននាក់ នោះក៍ដោយសារការធ្វើកំណែទំរង់ស៊ីជំរៅរបស់រដ្ឋមន្ត្រី ក្រសួងអប់រំថ្មី ឯកឧត្តម ហង់ ជួនណារ៉ុន។
សម្តេចតេជោ នាយករដ្ឋមន្ត្រីបានផ្តល់អនុសាសន៍ដល់ថ្នាក់ដឹកនាំ និងមន្ត្រីគ្រប់លំដាប់នៃក្រសួងអប់រំ យុវជន និងកីឡា ដោយជំរុញ និងពង្រីកកម្ម វិធីអប់រំកុមារតូច ឲ្យបានល្អ បន្តយកចិត្តទុកដាក់លើការពង្រីកកម្មវិធីផ្តល់ អាហារូបករណ៍សំរាប់សិស្សពូកែ និង សិស្សជួបការលំបាក សិស្សនារីជាដើម ដើម្បីធានានូវការផ្តល់ឱកាសដល់ពួកគាត់។ ក្នុងនោះត្រូវធានាប្រសិទ្ធភាពនៃ ការអនុវត្តកម្មវិធីសិក្សាផ្នែកគណិតវិទ្យា វិទ្យាសាស្ត្រ បច្ចេកវិទ្យា ភាសាបរទេស និងវិទ្យាសាស្ត្រសង្គមឲ្យមានប្រសិទ្ធិភាព ពិសេសអនុវត្តឲ្យសកម្មលើគោលនយោបាយលើកកំពស់គុណភាព និងប្រសិទ្ធិភាពអប់រំនៅកំរិត ឧត្តមសិក្សា។
នៅក្នុងឱកាសនោះដែរ សម្តេចតេជោ ហ៊ុន សែន បានបំពាក់គ្រឿង ឥស្សរិយយសថ្នាក់មហាសេរីវឌ្ឍ ជាមួយទឹកប្រាក់១០០លានរៀល ដើម្បីជាគំរូដល់គ្រូទូទៅនៅកម្ពុជា។ ក្នុងនោះដែរ សម្តេចតេជោ ក៍បានផ្តល់រង្វាន់ នាយកសាលាឆ្នើមចំនួន៣រូប និងគ្រូបង្រៀនឆ្នើមទូទាំងប្រទេសចំនួន៥នាក់ ផងដែរ៕
ឯកឧត្តមបណ្ឌិតសភាចារ្យ សុខ អាន៖ បូជនីយដ្ឋាន នៃការចងចាំជាសមទ្ធិផលថ្មីនៅក្នុងគំរោងសំណង់ជាលក្ខណៈផ្លូវចិត្តនៃ អវតក
នៅព្រឹកថ្ងៃទី២៦ ខែមីនា ឆ្នាំ២០១៥
នៅសារមន្ទីរប្រល័យពូជសាសន៍ទួលស្លែង ក្រោមអធិបតីភាព
ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួល
បន្ទុក ទីស្តីការគណៈរដ្ឋមន្ត្រី និងវត្តមានចូលរួមពីឯកឧត្តម ចូវចីម
បារ៉ុន វុន ម៉ាស់ ស្កាល (Joachim Baron von Marschall)
ឯកអគ្គរដ្ឋទូតអាល្លឺម៉ង់ប្រចាំកម្ពុជា
ព្រមទាំងតំណាងអង្គការសហប្រជាជាតិ
និងតំណាងស្ថានទូតមួយចំនួនប្រចាំនៅកម្ពុជា
រួមទាំងក្រុមគ្រួសារជនរងគ្រោះក្នុងរបបខ្មែរក្រហមផងដែរ
បូជនីយដ្ឋាននៃការចងចាំ និងរំលឹកវិញ្ញាណក្ខន្ធជនរងគ្រោះ
ក្នុងរបបកម្ពុជាប្រជាធិបតេយ្យ
ដែលសាងសង់ឡើងក្រោមជំនួយឧបត្ថម្ភពីរដ្ឋាភិបាលអាល្លឺម៉ង់
តម្លៃប្រមាណ ៩ម៉ឺនដុល្លារ តាមរយៈអង្គភាពគាំពារជនរងគ្រោះនៃ
(អវតក) ត្រូវបានសម្ពោធដាក់ឲ្យដំណើរការ។
ឯកឧត្តមបណ្ឌិតសភាចារ្យ សុខ អាន
បានចាត់ទុកពិធីសម្ពោធបូជនីយដ្ឋាននៃការចងចាំ
និងរំលឹកវិញ្ញាណក្ខន្ធជនរងគ្រោះក្នុងរបបកម្ពុជាប្រជាធិបតេយ្យនាពេល
នេះថា គឺជាសមទ្ធិផលថ្មីដ៏សំខាន់មួយទៀត
នៅក្នុងគំរោងសំណង់ជាលក្ខណៈផ្លូវចិត្ត និងសមូហភាព
ដល់ជនរងគ្រោះនៃរបបខ្មែរក្រហម
ដែលអង្គជំនុំជម្រះវិសាមញ្ញក្នុងតុលាការកម្ពុជាបានសម្រេចឡើង។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា
តាងនាមឲ្យរាជរដ្ឋាភិបាលកម្ពុជា
និងក្នុងនាមក្រុមការងារសាលាក្តីខ្មែរក្រហម
និងភាគីហត្ថលេខីកិច្ចព្រមព្រៀង សូមសម្តែងនូវការកោតសរសើរ
និងវាយតម្លៃខ្ពស់ចំពោះកិច្ចសហការដ៏ល្អ
និងការចូលរួមចំណែកដ៏ថ្លៃថ្លារបស់បណ្តាប្រទេសម្ចាស់ជំនួយ
ជាពិសេសសាធារណរដ្ឋសហព័ន្ធអាល្លឺម៉ង់
ដែលបានផ្តល់ការគាំទ្រដល់ការចូលរួមរបស់ជនរងគ្រោះ
ក្នុងនាមជាដើមបណ្តឹងរដ្ឋប្បវេណី និងក្នុងគំរោងសំណងដល់ជនរងគ្រោះ។
ឯកឧត្តមបណ្ឌិតសភាចារ្យ សុខ អាន
ដែលជាប្រធានក្រុមការងារសាលាក្តីខ្មែរក្រហម
និងភាគីហត្ថលេខីលើកិច្ចព្រមព្រៀងរវាងរាជរដ្ឋាភិបាលកម្ពុជា
និងអង្គការសហប្រជាជាតិក៏បានរម្លឹកថា នៅឆ្នាំ១៩៩៧
រាជរដ្ឋាភិបាលកម្ពុជាបានស្នើសុំការជួយឧបត្ថម្ភគាំទ្រ
និងការចូលរួមពីអង្គការសហប្រជាជាតិ
ដើម្បីស្វែងរកយុត្តិធម៌ចំពោះឧក្រិដ្ឋកម្មដ៏សាហាវយង់ឃ្នង
(បណ្តាលឲ្យប្រជាជនជាង ៣លាននាក់ បានបាត់បង់ជីវិត) នៅក្នុង
ប្រទេសកម្ពុជា ពីឆ្នាំ១៩៧៥ ដល់ឆ្នាំ១៩៧៩
បង្កឡើងដោយរបបប្រល័យពូជសាសន៍ ប៉ុល ពត
ដែលពុំបានរកយុត្តិធម៌ជាយូរណាស់មកហើយ។ អង្គការសហប្រជាជាតិ
បានឆ្លើយតបវិជ្ជមានចំពោះសំណើនេះ
ហើយបានធ្វើកិច្ចសហការយ៉ាងជិតស្និទ្ធជាមួយរាជរដ្ឋាភិបាលកម្ពុជា
ដើម្បីបង្កើតអង្គជំនុំជម្រះវិសាមញ្ញក្នុងតុលាការកម្ពុជា
ដែលជាយន្តការថ្មីមួយដ៏មានសារៈសំខាន់
សម្រាប់ប្រព័ន្ធយុត្តិធម៌អន្តរជាតិ។ ឯកឧត្តមបណ្ឌិតសភាចារ្យ សុខ អាន
បានមានប្រសាសន៍បញ្ជាក់ថា
ដើម្បីរកយុត្តិធម៌ចំពោះឧក្រិដ្ឋកម្មដ៏សាហាវយង់ឃ្នងទាំងនេះ
ដែលមិនមែនគ្រាន់តែជាឧក្រិដ្ឋកម្មប្រឆាំងនឹងប្រជាជនកម្ពុជា
ប៉ុណ្ណោះទេ
ប៉ុន្តែថែមទាំងជាឧក្រិដ្ឋកម្មប្រឆាំងនឹងមនុស្សជាតិទាំងមូលផង
រាជរដ្ឋាភិបាលកម្ពុជា
ក្រោមការដឹកនាំប្រកបដោយកិត្តិបណ្ឌិតសម្តេចអគ្គមហាសេនាបតីតេជោ
ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
បាននិងកំពុងធ្វើកិច្ចសហការយ៉ាងជិតស្និទ្ធជាមួយសហគមន៍អន្តរជាតិ
ក្នុងក្របខ័ណ្ឌអង្គជំនុំជម្រះវិសាមញ្ញក្នុងតុលាការកម្ពុជា
ដើម្បីធ្វើការកាត់ទោសមេដឹកនាំកំពូល
និងអ្នកដែលទទួលខុសត្រូវខ្ពស់បំផុតរបស់របបខ្មែរក្រហម។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា
បូជនីយដ្ឋាននៃការចងចាំ
និងរំលឹកវិញ្ញាណក្ខន្ធដល់ជនរងគ្រោះក្នុងរបបកម្ពុជាប្រជាធិបតេយ្យ
នេះ ត្រូវបានសាងសង់ឡើង នៅលើទីតាំងបូជនីយដ្ឋានចាស់
ដែលសាងសង់ពីឈើនៅទសវត្សរ៍ឆ្នាំ១៩៨០ ដោយរដ្ឋាភិបាលកម្ពុជា
បន្ទាប់ពីរបបប្រល័យពូជសាសន៍ ប៉ុល ពត បានដួលរលំ។ កាលពី
៥០ឆ្នាំមុនទីនេះ (វិទ្យាល័យពញ្ញាយ៉ាត
ក្រោយមកវិទ្យាល័យទួលស្វាយព្រៃ)
គឺជាទីធ្លាសម្រាប់សិក្សានុសិស្សរត់លេងដែលពោរពេញដោយសម្លេងសើច
ក្អាកក្អាយ និងប្រកបដោយសុទិដ្ឋិនិយមពីអនាគត ហើយកាលពី ៤០ឆ្នាំមុន
ស្រមោលនៃសង្គ្រាមបានគ្របដណ្តប់មកលើទីធ្លាសាលារៀននេះ
ប៉ុន្តែគ្មាននរណាម្នាក់អាចដឹងបានថា
ភាពខ្មៅងងឹតនោះមានទំហំប៉ុណ្ណាទេ នៅឆ្នាំបន្តបន្ទាប់នោះ។
ទីធ្លានេះបានក្លាយជាកន្លែងប្រកបដោយអំពើយង់ឃ្នង ការឈឺចាប់
និងការភ័យរន្ធត់។
ប៉ុន្តែស្លាកស្នាមនៃអំពើយង់ឃ្នងការឈឺចាប់នេះហើយ
ដែលជាហេតុនាំដល់ការកាត់ទោសអ្នកដែលទទួលខុសត្រូវចំពោះ
ឧក្រិដ្ឋកម្ម ដែលបានប្រព្រឹត្តិនៅទីនេះ
(សារមន្ទីរប្រល័យពូជសាសន៍ទួលស្លែង)។
ឯកឧត្តមបណ្ឌិតសភាចារ្យ សុខ អាន បានបញ្ជាក់ថា “ថ្ងៃនេះ
យើងមកជួបជុំគ្នា ចូលរួមក្នុងពិធីសម្ពោធបូជនីយដ្ឋាននៃការចងចាំ
និងរំលឹកវិញ្ញាណក្ខន្ធដល់ជនរងគ្រោះក្នុងរបបកម្ពុជាប្រជាធិបតេយ្យ
ដើម្បីជាការឧទ្ទិសដល់ជនរងគ្រោះ ដែលបានបាត់បង់ជីវិត
ជាពិសេសអ្នកដែលត្រូវបានឃុំឃាំង ធ្វើទារុណកម្ម
និងបាត់បង់ជីវិតនៅគុកទួលស្លែងនេះ ក៏ដូចជាកន្លែងពាក់ព័ន្ធផ្សេងទៀត
ដូចជាវាលពិឃាតជើងឯក និងការដ្ឋានបង្ខំឲ្យធ្វើការនៅព្រៃស (មន្ទីរ
ស-២៤)”។ ថ្ងៃនេះ យើងទាំងអស់គ្នាឈរនៅទីនេះ ដើម្បីផ្តល់កិត្តិយស
និងចងចាំដល់អ្នកដែលបានបាត់បង់ជីវិត
និងប្រកាសនូវការប្តេជ្ញាចិត្តរបស់យើងក្នុងការទប់ស្កាត់នូវ
ឧក្រិដ្ឋកម្មបែបនោះ មិនឲ្យវិលត្រឡប់មកវិញទាំងនៅកម្ពុជា
ក៏ដូចជាទីកន្លែងដទៃទៀតនៅលើពិភពលោកនេះ។
ឯកឧត្តម ក្រាញ់ តូនី ប្រធានការិយាល័យរដ្ឋបាលស្តីទីនៃ (អវតក)
បានឲ្យដឹងថា យោងតាមសំណើរបស់លោក ជុំ ម៉ី និងលោក ប៊ូ ម៉េង
ដែលជាដើមបណ្ដឹងរដ្ឋប្បវេនី
និងជនរងគ្រោះដទៃទៀតនៃអង្គជំនុំជម្រះវិសាមញ្ញក្នុងតុលាការកម្ពុជា
អង្គភាពគាំពារជនរងគ្រោះបានស្វះស្វែងរកថវិកា
ដើម្បីសាងសង់បូជនីយដ្ឋាននេះឡើងវិញ
ដោយមានការឧបត្ថម្ភថវិកាពីក្រសួងសហប្រតិបត្តិការសេដ្ឋកិច្ច
និងការអភិវឌ្ឍន៍អាល្លឺម៉ង់ (BMZ) នាឆ្នាំ២០១២។
អង្គភាពគាំពារជនរងគ្រោះសហការជាមួយអគ្គនាយកដ្ឋានបេតិកភណ្ឌនៃក្រសួង
វប្បធម៌ និងវិចិត្រសិល្បៈ រួមទាំងសារមន្ទីរប្រល័យពូជសាសន៍ទួលស្លែង
ក៏បានផ្តួចផ្តើមពិភាក្សា
និងរៀបចំផែនការកសាងបូជនីយដ្ឋានរលឹកវិញ្ញាណក្ខន្ធនេះឡើង។
ក្រសួងវប្បធម៌ និងវិចិត្រសិល្បៈ
ក៏បានស្នើសុំគោលការណ៍សាងសង់បូជនីយដ្ឋានពីរាជរដ្ឋាភិបាល
ដែលបានអនុញ្ញាត្ត និងយល់ព្រមតាមរយៈលិខិតលេខ ០៧ សជណ ចុះថ្ងៃទី ០៣
ខែមករា ឆ្នាំ២០១៣។
តាងនាមឲ្យលោក ប៊ូ ម៉េង និងលោក នង ច័ន្ទផល ដែលនៅរស់ពីគុកទួលស្លែង
លោក ជុំ ម៉ី
បានសម្តែងការរំជួលចិត្តចំពោះការស្វែងរកយុត្តិធម៌ជូនជនរងគ្រោះនៃ
របបខ្មែរក្រហម ដោយ (អវតក) និងថ្លែងអំណរគុណចំពោះរាជរដ្ឋាភិបាលកម្ពុជា
អង្គភាពគាំពារជនរងគ្រោះ និងស្ថានទូតសហព័ន្ធអាល្លឺម៉ង់
ដែលបានផ្តល់ការគាំទ្រក្នុងការសាងសង់បូជនីយដ្ឋាននៃការចងចាំ
នៅក្នុងសារមន្ទីរគុកទួលស្លែង៕
សម្តេចតេជោ រំលឹកពីបញ្ហាថ្មក្តៅសម្រាប់កម្ពុជា
ក្នុងឱកាសអញ្ជើញជាអធិបតី ក្នុងពិធីប្រគល់សញ្ញាបត្រគ្រូបង្រៀន កម្រិតឧត្តមជំនាន់ទី១៩ គ្រូបង្រៀនកម្រិតមូលដ្ឋានឯកទេសភាសាបារាំងខ្មែរជំនាន់ទី១៦ និងប្រកាសដាក់ឱ្យប្រើប្រាស់ជាផ្លូវការអគារ ១ខ្នង របស់វិទ្យាស្ថានជាតិអប់រំ នាព្រឹកថ្ងៃទី២៥ ខែមីនា ឆ្នាំ២០១៥ សម្តេចអគ្គមហាសេនាបតីតេជោ ហ៊ុន សែន មានប្រសាសន៍រំលឹកពីបញ្ហាមួយចំនួនពាក់ព័ន្ធនិងអន្តរជាតិដែល សម្តេចហៅថា ជាថ្មក្តៅសម្រាប់កម្ពុជា។
សម្តេចតេជោនាយករដ្ឋមន្ត្រីមានប្រសាសន៍ឲ្យដឹងថា មេដឹកនាំអាស៊ានមួយចំនួនបានយកពាក្យខ្ញុំទៅប្រើ។ ខ្ញុំបាននិយាយថា បញ្ហាសមុទ្រចិនខាងត្បូងជាដុំថ្មក្តៅមិនមែនជាដំឡូងក្តៅទេ បើសិនជាដំឡូងក្តៅ ខ្ញុំទ្រាំចាប់ហើយ ព្រោះបន្តិចទៅ វាត្រជាក់យើងទទួលទានបាន ប៉ុន្តែថ្មក្តៅអត់ទេ។
សម្តេចតេជោមានប្រសាសន៍រំលឹកថា អញ្ចឹងហើយបានជា ស៊ុលតង់ព្រុយណេ និងប្រធានាធិបតីថេនសេន របស់ ប្រទេសមីយ៉ាន់ម៉ាបាននិយាយថា សូមឯកឧត្តម ធ្វើយ៉ាងណាឱ្យថ្មក្តៅឱ្យវាត្រជាក់នៅកម្ពុជានៅឆ្នាំ២០១២ ក្នុងពេលដែលកម្ពុជា ធ្វើជាម្ចាស់ផ្ទះកិច្ចប្រជុំកំពូលអាស៊ានទៅ។ ខ្ញុំបាននិយាយហើយថា ត្រជាក់ឬមិនត្រជាក់វាស៊ីសងហ្នឹងអ្នកពាក់ព័ន្ធទេ។ ករណីបញ្ហាសមុទ្រចិនខាងត្បូងនេះ សម្តេចតេជោមានប្រសាសន៍លើកជាសំនួរថា ផុតពីកម្ពុជាទៅសួរថា ព្រុយណេដែលធ្វើជាម្ចាស់ផ្ទះកិច្ចប្រជុំកំពូលអាស៊ានដោះស្រាយបាន ទេ? អត់បាន។ រហូតទៅដល់ប្រទេសមីយ៉ាន់ម៉ា ធ្វើជាម្ចាស់ផ្ទះដោះស្រាយបានទេ ? អត់បាន។ ឥឡូវខ្ញុំរង់ចាំមើលនៅម៉ាឡេស៊ី ដោះស្រាយបាន ឬមិនបាន ។ អត់បាន ។ ខ្ញុំជឿថា វាអត់ទៅរួចហើយមកធ្វើបាបតែកម្ពុជា។
ទាក់ទងបញ្ហានេះសម្តេចតេជោថ្លែងថា ប៉ុន្តែឥឡូវខ្ញុំរង់ចាំមើលមួយជុំ ព្រោះទីចុងបំផុតបញ្ហាវាមិនមែនបញ្ហាអាស៊ានទាំងមូលឯណា វាជាបញ្ហាពាក់ព័ន្ធផ្ទាល់រវាងប្រទេស ដែលជាប់ពាក់ព័ន្ធត្រូវនិយាយគ្នា។ ពិតមែនហើយយន្តការ COC យន្តការអាស៊ាន-ចិន គឺត្រូវតែធ្វើហើយព្រោះខែក្រោយហ្នឹងដល់ខែក្តៅហើយថ្ម សមុទ្រខាងត្បូង (បញ្ហាសមុទ្រចិនខាងត្បូង) ក្តៅនៅគួឡាឡាំពួរ និងនៅឡាំងកាវី។ បញ្ហានេះសម្តេចតេជោវាយតម្លៃថា បញ្ហាសមុទ្រចិនខាងត្បូងមិនមែនជាបញ្ហាអាស៊ានទាំងមូលទេ ប៉ុន្តែជាបញ្ហាពាក់ព័ន្ធផ្ទាល់រវាងប្រទេសដែលជាប់ពាក់ព័ន្ធត្រូវ និយាយគ្នា។
សម្តេចតេជោ ក៏បានមានប្រសាសន៍បន្ថែមទៀតថា បញ្ហាថ្មក្តៅនៅកម្ពុជាមានច្រើនណាស់ ។ សម្តេចតេជោនាយករដ្ឋមន្ត្រីមានប្រសាសន៍ឲ្យដឹងថា អង្គការកម្មវិធីស្បៀងអាហារពិភពលោក (WFP) គាត់បង្កើតកម្មវិធីផ្តល់អាហារសម្រាប់កូនសិស្ស (នៅកម្ពុជា) នៅពេលដែលគាត់ដកជំនួយ គាត់ឱ្យរាជរដ្ឋាភិបាលជាអ្នកចេញ។ សម្តេចតេជោមានប្រសាសន៍បញ្ជាក់ថា យើងបានចេញអង្ករ ២.០០០ តោនក្នុងមួយឆ្នាំ។ សូមកុំនិយាយថា អង្ករនោះអង្គការកម្មវិធីស្បៀងអាហារពិភពលោក ( WFP ) ជាអ្នកឱ្យ ។ WFP គាត់សុំអង្ករយើងៗឱ្យតាមរយៈគាត់ ហើយគាត់យកមកឱ្យយើងវិញ វាឆ្ងាញ់ត្រង់កន្លែងហ្នឹង ហើយបានឈ្មោះគាត់ទៀត ។
សម្តេចតេជោនាយករដ្ឋមន្រ្តីមានប្រសាសន៍ឲ្យដឹងករណីផ្សេងមួយទៀតថា នៅពេលដែលកម្ពុជាបានជួបប្រទះបញ្ហាជំងឺផ្តាសាយបក្សី អង្គការសុខភាពពិភពលោក (WHO) បបួលកម្ពុជាឱ្យសម្លាប់មាន់ ដោយត្រូវសងប្រជាជន។ កាលនោះខ្ញុំថា ប្រសិនបើអង្គការសុខភាពពិភពលោក (WHO) ចង់ធ្វើដូចនេះ ត្រូវផ្ទេរប្រាក់រាប់រយលានដុល្លារទុកក្នុងធនាគារខ្មែរទើបបាន។ ដោយឡែកទាក់ទិននិងធនាគារពិភពលោក (WB) វិញ សម្តេចតេជោថ្លែងថា ខ្ញុំចង់ខ្ចីលុយគាត់ដើម្បីកសាងសាលា ប៉ុន្តែខាងធនាគារពិភពលោក (WB) បានប្រាប់ថា ឱ្យខ្ចីតែសម្រាប់អាហារូបករណ៍។ សម្តេចតេជោបានមានប្រសាសន៍លើកជាជម្ងល់ថា បើឱ្យខ្ចីសម្រាប់អាហារូបករណ៍ តើបានសាលារៀនមកពីណា បើមិនឱ្យខ្ចីសម្រាប់កសាងសាលារៀនផងនោះ៕
សុន្ទរកថា ឯកឧត្តមបណ្ឌិតសភាចារ្យ សុខ អាន ក្នុងពិធីសម្ពោធបូជនីយដ្ឋាន នៃការចងចាំ និងរំឮកវិញ្ញណក្ខន្ធជនរងគ្រោះ ក្នុងរបបកម្ពុជាប្រជាធិបតេយ្យ នៅសារមន្ទីរប្រល័យពូជសាសន៍ទួលស្លែង
ចេញផ្សាយថ្ងៃ: ( ២៦ - មិនា - ២០១៥ )
សុន្ទរកថា
ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី
ក្នុងពិធីសម្ពោធបូជនីយដ្ឋាននៃការចងចាំ និងរំឮកវិញ្ញណក្ខន្ធជនរងគ្រោះ ក្នុងរបបកម្ពុជាប្រជាធិបតេយ្យ នៅសារមន្ទីរប្រល័យពូជសាសន៍ទួលស្លែង
រាជធានីភ្នំពេញ ថ្ងៃទី២៦ ខែមីនា ឆ្នាំ២០១៥
- ឯកឧត្តម Joachim Baron von Marschall ឯកអគ្គរដ្ឋទូតនៃសាធារណៈសហព័ន្ធអាល្លឺម៉ង់ប្រចាំកម្ពុជា និងលោកជំទាវ
- ឯកឧត្តម លោកជំទាវ រដ្ឋមន្រ្តី រដ្ឋលេខាធិការ
- ឯកឧត្តម លោកជំទាវ អស់លោក លោកស្រី ជាដើមបណ្តឹងរដ្ឋប្បវេណី និងបងប្អូនជនរងគ្រោះនៃរបបកម្ពុជាប្រជាធិបតេយ្យទាំងអស់
- ឯកឧត្តម លោកជំទាវ អស់លោក លោកស្រី បងប្អូនប្រជាពលរដ្ឋ និងក្មួយៗសិស្សា នុសិស្សទាំងអស់
ឆ្លៀតក្នុងឱកាសនេះ ខ្ញុំសូមចូលរួមរំលែកទុក្ខយ៉ាងក្រៀមក្រំជាមួយគ្រួសាររបស់ជនរងគ្រោះ ដែលបានបាត់បង់ជីវិតនៅក្នុងគ្រោះថ្នាក់នៃការធ្លាក់យន្តហោះ Airbus A320 ជើងហោះហើរលេខ 4U9525 របស់ក្រុមហ៊ុន Germanwings កាលពីថ្ងៃអង្គារកន្លងទៅនេះ ដែលក្នុងនោះភាគច្រើននៃជនរងគ្រោះ គឺជាជនជាតិអាល្លឺម៉ង់។
ខ្ញុំសូមរំឮកថា នៅឆ្នាំ១៩៩៧ រាជរដ្ឋាភិបាលកម្ពុជាបានស្នើសុំការជួយឧបត្ថម្ភគាំទ្រនិងការចូលរួមពី អង្គការសហប្រជាជាតិ ដើម្បីស្វែងរកយុត្តិធម៌ចំពោះឧក្រិដ្ឋកម្មដ៏សាហាវយង់ឃ្នងនៅក្នុង ប្រទេសកម្ពុជា ពីឆ្នាំ១៩៧៥ ដល់ឆ្នាំ១៩៧៩ បង្កឡើងដោយរបបប្រល័យពូជសាសន៍ ប៉ុល ពត ដែលពុំបានរកយុត្តិធម៌ជាយូរណាស់មកហើយ។ អង្គការសហប្រជាជាតិបានឆ្លើយតបជាវិជ្ជមានចំពោះសំណើនេះ ហើយបានធ្វើកិច្ចសហការយ៉ាងជិតស្និទ្ធជាមួយរាជរដ្ឋាភិបាលកម្ពុជា ដើម្បីបង្កើតអង្គជំនុំជម្រះវិសាមញ្ញក្នុងតុលាការកម្ពុជា ដែលជាយន្តការថ្មីមួយដ៏មានសារៈសំខាន់សម្រាប់ប្រព័ន្ធយុត្តិធម៌ អន្តរជាតិ ។
អង្គជំនុំជម្រះវិសាមញ្ញក្នុងតុលាការកម្ពុជា បានចាប់ផ្តើមដំណើរការនៅដើមឆ្នាំ២០០៦។ នៅក្នុងឆ្នាំដំបូងនៃដំណើរការនេះ ផ្នែកមួយចំនួននៃសាលាក្ដីបានផ្តោតជាសំខាន់លើបញ្ហានីតិវិធី និងការរៀបចំដំណើរការការងារ រីឯសហព្រះរាជអាជ្ញាបានរៀបចំដីកាសន្និដ្ឋានបញ្ជូនរឿងឲ្យស៊ើបសួរ និងបានដាក់ដីកានេះនៅពាក់កណ្តាលឆ្នាំ២០០៧។ ក្នុងរយៈពេល៨ឆ្នាំបន្ទាប់ អង្គជំនុំជម្រះវិសាមញ្ញក្នុងតុលាការកម្ពុជា បានសម្រេចនូវសមិទ្ធផលការងារជាច្រើន ដូចដែលឯកឧត្តម ក្រាញ់ តូនី បានបញ្ជាក់នៅក្នុងរបាយការណ៍ខាងលើស្រាប់។ ជាក់ស្ដែង រហូតមកដល់ពេលនេះ អង្គជំនុំជម្រះវិសាមញ្ញក្នុងតុលាការកម្ពុជា បានចេញសាលក្រមដ៏សំខាន់ចំនួនពីរ គឺសាលក្រមស្ថាពរក្នុងសំណុំរឿង០០១ និងសាលក្រមនៃសំណុំរឿង០០២ ដំណាក់កាលទីមួយ ហើយអ្នកដែលទទួលខុសត្រូវនៃឧក្រិដ្ឋកម្មទាំងនោះ ត្រូវបានរកឃើញថាមានពិរុទ្ធភាព និងត្រូវបានផ្តន្ទាទោសដាក់ពន្ធនាគារអស់មួយជីវិត។
បន្ទាប់ពីមានការពន្យារពេលអស់ជាច្រើនឆ្នាំ ការចេញសាលក្រមទាំងនោះ គឺជាសមិទ្ធផលយ៉ាងធំធេងនៅក្នុងការផ្តល់យុត្តិធម៌ដល់ជនរងគ្រោះ និងគ្រួសាររបស់ពួកគេ។ បន្ថែមលើនេះ អង្គជំនុំជម្រះវិសាមញ្ញក្នុងតុលាការកម្ពុជា បានផ្តល់ឱកាសឱ្យជនរងគ្រោះចូលរួមក្នុងអង្គជំនុំជម្រះ ដែលប្រការនេះមិនធ្លាប់មានពីមុនមកឡើយ។ ជនរងគ្រោះចំនួនប្រមាណ ៤០០០ នាក់ បានចូលរួមជាភាគីដើមបណ្តឹងរដ្ឋប្បវេណីនៅក្នុងដំណើរការព្រហ្មទណ្ឌ និងបានស្នើសុំសំណងជាលក្ខណៈផ្លូវចិត្ត និងសមូហភាព ដូចមានចែងនៅក្នុងវិធានផ្ទៃក្នុង នៃអង្គជំនុំជម្រះវិសាមញ្ញក្នុងតុលាការកម្ពុជា។ គម្រោងសំណងជាច្រើនចំពោះដើមបណ្តឹងរដ្ឋប្បវេណី ត្រូវបានចៅក្រមនៃអង្គជំនុំជម្រះសាលាដំបូងទទួលស្គាល់ ហើយសង្ឃឹមថាអាចជួយបន្ធូរបន្ថយដល់ភាពឈឺចាប់របស់បងប្អូនអស់រយៈពេលជាយូ រណាស់មកហើយ។ ក្រៅពីសំណងដែលសម្រេចនិងទទួលស្គាល់ដោយតុលាការ អង្គភាពគាំពារជនរងគ្រោះនៃអង្គជំនុំជម្រះវិសាមញ្ញក្នុងតុលាការ កម្ពុជា ដោយសហការជាមួយនឹងស្ថាប័នរាជរដ្ឋាភិបាល និងអង្គការក្រៅរដ្ឋាភិបាលដែលពាក់ព័ន្ធ បានបង្កើតនូវគម្រោងសំខាន់ផ្សេងៗទៀត ហៅថា«សំណងក្រៅតុលាការ» ដើម្បីផ្តល់ជាប្រយោជន៍ឲ្យកាន់តែទូលំទូលាយដល់ជនរងគ្រោះទូទៅ។
ឯកឧត្តម លោកជំទាវ អស់លោក លោកស្រី និងក្មួយៗសិស្សានុសិស្ស
ដូចយើងទាំងអស់គ្នាបានដឹងហើយថា នៅក្នុងរបបប្រល័យពូជសាសន៍ ប៉ុល ពត ប្រជាជនកម្ពុជាជាងបីលាននាក់បានបាត់បង់ជីវិត។ អ្នកទាំងនោះ គឺជាជីដូនជីតា ឪពុកម្តាយ កូនចៅ សាច់ញាតិ សហសេវិក និងមិត្តភក្តិរបស់យើង។ យើងទាំងអស់គ្នាដែលរស់រានមានជីវិតពីរបបនេះ បានរស់នៅដោយក្តីឈឺចាប់ និងសេចក្តីសោកសង្រេងអស់រយៈពេលជាងបីទសវត្សរ៍មកហើយ ដោយសារតែការបាត់បង់អ្នកដែលជាទីស្រឡាញ់របស់យើង ហើយយើងតែងតែមានសុបិន្តអាក្រក់អំពីអតីតកាលនោះជានិច្ច។ សូម្បីតែក្មួយៗដែលកើតក្រោយឆ្នាំ១៩៧៩ ដែលមិនបានជួបប្រទះដោយផ្ទាល់នូវឧក្រិដ្ឋកម្មទាំងនោះក៏ដោយ ក៏ត្រូវប្រឈមនឹងបន្ទុកដ៏ធ្ងន់ធ្ងរដែរ ដោយក្មួយៗបានមើលឃើញឪពុកម្តាយ បងប្រុស បងស្រី របស់ខ្លួននៅមានក្តីឈឺចាប់នៅឡើយ និងបានឃើញការអភិវឌ្ឍរបស់ប្រទេសដើរថយក្រោយនាពេលនោះ បើប្រៀបធៀបទៅនឹងប្រទេសនានានៅក្នុងតំបន់ និងពិភពលោក។
ដើម្បីរកយុត្តិធម៌ចំពោះឧក្រិដ្ឋកម្មដ៏សាហាវយង់ឃ្នងទាំងនេះ ដែលមិនមែនគ្រាន់តែជាឧក្រិដ្ឋកម្មប្រឆាំងនឹងប្រជាជនកម្ពុជាប៉ុណ្ណោះទេ ប៉ុន្តែថែមទាំងជាឧក្រិដ្ឋកម្មប្រឆាំងនឹងមនុស្សជាតិទាំងមូលផង រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បាននិងកំពុងធ្វើ កិច្ចសហការយ៉ាងជិតស្និទជាមួយសហគមន៍អន្តរជាតិ នៅក្នុងក្របខ័ណ្ឌនៃអង្គជំនុំជម្រះវិសាមញ្ញក្នុងតុលាការកម្ពុជា ដើម្បីធ្វើការកាត់ទោសមេដឹកនាំកំពូល និងអ្នកដែលទទួលខុសត្រូវខ្ពស់បំផុតរបស់របបខ្មែរក្រហម។
ថ្ងៃនេះ យើងមកជួបជុំគ្នា ចូលរួមក្នុងពិធីសម្ពោធបូជនីយដ្ឋាននៃការចងចាំ និងរំឮកវិញ្ញាណក្ខន្ធដល់ជនរងគ្រោះក្នុងរបបកម្ពុជាប្រជាធិបតេយ្យ ដើម្បីជាការឧទ្ទិសដល់ជនរងគ្រោះដែលបានបាត់បង់ជីវិត ជាពិសេសអ្នកដែលត្រូវបានឃុំឃាំង ធ្វើទារុណកម្ម និងបាត់បង់ជីវិតនៅគុកទួលស្លែងនេះ ក៏ដូចជាទីកន្លែងពាក់ព័ន្ធផ្សេងទៀត ដូចជាវាលពិឃាតជើងឯកនិងការដ្ឋានបង្ខំឲ្យធ្វើការនៅព្រៃស (មន្ទីរ ស-២៤)។
បូជនីយដ្ឋាននៃការចងចាំ និងរំឮកវិញ្ញាណក្ខន្ធដល់ជនរងគ្រោះក្នុងរបបកម្ពុជាប្រជាធិបតេយ្យ នេះ ត្រូវបានសាងសង់ឡើងនៅលើទីតាំងបូជនីយដ្ឋានចាស់ ដែលសាងសង់ពីឈើនៅទសវត្សរ៍ឆ្នាំ១៩៨០ ដោយរដ្ឋាភិបាលកម្ពុជាបន្ទាប់ពីរបបប្រល័យពូជសាសន៍ ប៉ុល ពត បានដួលរលំ។ កាលពី៥០ ឆ្នាំមុន ទីនេះគឺជាទីធ្លាសម្រាប់សិស្សានុសិស្សរត់លេង ដែលពោរពេញទៅដោយសំឡេងសើចក្អាកក្អាយ និងប្រកបដោយសុទិដ្ឋិនិយមអំពីអនាគត ហើយ កាលពី៤០ ឆ្នាំមុន ស្រមោលនៃសង្គ្រាមបានគ្របដណ្តប់មកលើទីធ្លាសាលារៀននេះ ប៉ុន្តែគ្មាននរណាម្នាក់អាចដឹងបានថា ភាពខ្មៅងងឹតនោះ នឹងមានទំហំធំប៉ុណ្ណាទេ នៅឆ្នាំបន្តបន្ទាប់នោះ។ ទីនេះបានក្លាយជាទីកន្លែងប្រកបដោយអំពើយង់ឃ្នង ការឈឺចាប់ និងការភ័យរន្ធត់។ ប៉ុន្តែ ស្លាកស្នាមនៃអំពើយង់ឃ្នង ការឈឺចាប់នេះហើយ ដែលជាហេតុនាំទៅដល់ការកាត់ទោសអ្នកដែលទទួលខុសត្រូវចំពោះឧក្រឹដ្ឋកម្ម ដែលបានប្រព្រឹត្តិនៅទីនេះ។ ថ្ងៃនេះ យើងទាំងអស់គ្នាឈរនៅទីនេះ ដើម្បីផ្តល់កិត្តិយស និងចងចាំដល់អ្នកដែលបានបាត់បង់ជិវិត និងប្រកាសនូវការប្តេជ្ញាចិត្តរបស់យើងក្នុងការទប់ស្កាត់នូវឧក្រឹដ្ឋកម្មបែបនោះមិនឲ្យវិលត្រឡប់មកវិញ ទាំងនៅកម្ពុជាក៏ដូចជាទីកន្លែងដទៃទៀតនៅលើពិភពលោកនេះ។ ដូច្នេះ ខ្ញុំជឿជាក់ថា បូជនីយដ្ឋានដែលទើបសាងសង់ថ្មីនេះ មានគោលដៅដូចខាងក្រោម៖
១. បូជនីយដ្ឋាននេះ គឺជាទីកន្លែងដ៏សំខាន់មួយសម្រាប់អ្នករស់រានមានជីវិត និងក្រុមគ្រួសារជនរងគ្រោះ ដើម្បីរំឮកដល់សាច់ញាតិដែលបានស្លាប់បាត់បង់ជីវិត និងដើម្បីបន្ធូរបន្ថយនូវក្តីឈឺចាប់ និងសេចក្តីសោកសង្រេងរបស់ខ្លួន។
២. តាងនាមឱ្យប្រជាជនកម្ពុជាបច្ចុប្បន្ន បូជនីយដ្ឋាននេះគឺជាការទទួលស្គាល់នូវការរងទុក្ខវេទនាដ៏ធំធេងនិង មិនអាចបំភ្លេចបានរបស់ជនរងគ្រោះ និងអ្នកដែលនៅរស់រានមានជីវិតពីគុកទួលស្លែង ក៏ដូចជារបបកម្ពុជាប្រជាធិបតេយ្យទំាងមូល។
៣. បូជនីយដ្ឋាននេះ គឺជាការរំលឹកដល់ប្រជាជនកម្ពុជា និងអ្នកដែលមកទស្សនាទីនេះទាំងអស់ ឱ្យនឹកឃើញជានិច្ច និងមិនអាចបំភ្លេចបាន នូវឧក្រិដ្ឋកម្មដ៏រន្ធត់ ដែលបានកើតឡើងនៅក្នុងរបបកម្ពុជាប្រជាធិបតេយ្យ។
៤. សម្រាប់កូនចៅរបស់យើង បូជនីយដ្ឋាននេះ រួមជាមួយនឹងសារមន្ទីរប្រល័យពូជសាសន៍ទួលស្លែងផង គឺជាទីកន្លែងមួយសម្រាប់អប់រំដល់មនុស្សជំនាន់ក្រោយឱ្យចងចាំ និងចូលរួមទប់ស្កាត់កុំឱ្យរបបដ៏ខ្មៅងងឹតនេះវិលត្រឡប់មកជាថ្មី ម្តងទៀត។
ឯកឧត្តម លោកជំទាវ អស់លោក លោកស្រី និងក្មួយៗសិស្សានុសិស្ស
ក្នុងឱកាសដ៏វិសេសវិសាលនេះ និងដោយមានវត្តមានជនរងគ្រោះជាច្រើននាក់ ជាពិសេសអ្នកដែលនៅរស់រានមានជីវិតពីឧក្រិដ្ឋកម្មនៃគុកទួលស្លែងនេះផង ខ្ញុំសង្ឃឹមយ៉ាងមុតមាំថា ការសាងសង់បូជនីយដ្ឋាននេះឡើង នឹងជួយបន្ធូរបន្ថយផ្នែកផ្លូវចិត្តរបស់បងប្អូន និងសាច់ញាតិរបស់ជនរងគ្រោះដែលបានបាត់បង់អាយុជីវិត ក្នុងរបបកម្ពុជាប្រជាធិបតេយ្យ។
ខ្ញុំសូមអរគុណជាពិសេសដល់លោកពូ ជុំ ម៉ី និងលោកពូ ប៊ូ ម៉េង ដើមបណ្តឹងរដ្ឋប្បវេណី និងជនរងគ្រោះដទៃទៀតនៃអង្គជំនុំជម្រះវិសាមញ្ញក្នុងតុលាការកម្ពុជា ដែលបានស្នើសុំឲ្យមានការសាងសង់បូជនីយដ្ឋាននៅសារមន្ទីប្រល័យពូជ សាសន៍ទួលស្លែងនេះ និង ផ្តល់មតិយោបល់ដ៏មានអត្ថន័យក្នុងការធ្វើឲ្យបូជនីយដ្ឋាននេះលេចចេញជារូប រាងពិតប្រាកដឡើង។
ខ្ញុំសូមកោតសរសើរ និងវាយតម្លៃខ្ពស់ដល់អង្គភាពគាំពារជនរងគ្រោះ នៃអង្គជំនុំជម្រះវិសាមញ្ញក្នុងតុលាការកម្ពុជា ចំពោះការរៀបចំ និងសម្របសម្រួលការសាងសង់នេះ ដោយសហការជាមួយនឹងអាជ្ញាធរពាក់ព័ន្ធនៃក្រសួងវប្បធម៌និងវិចិត្រសិល្បៈ ជាពិសេសអគ្គនាយកដ្ឋានបេតិកភណ្ឌ។ ការសាងសង់បូជនីយដ្ឋាននេះឡើង គឺជាផ្នែកមួយនៃកម្មវិធីសំណងមានលក្ខណៈផ្លូវចិត្តនិងសមូហភាពរបស់អង្គជំនុំ ជម្រះវិសាមញ្ញក្នុងតុលាការកម្ពុជា ដែលរាជរដ្ឋាភិបាលកម្ពុជា ជានិច្ចជាកាលតែងតែបានគាំទ្រយ៉ាងសកម្ម នាពេលកន្លងមក ក៏ដូចជាទៅអនាគត ដើម្បីបន្តកសាងសមិទ្ធផលនិងកិច្ចខិតខំប្រឹងប្រែងនានា សំដៅផ្តល់សំណងលក្ខណៈផ្លូវចិត្តនិងសមូហភាពផ្សេងៗទៀតជូនដល់ជនរងគ្រោះ និងនាំមកនូវសន្តិភាព ស្ថិរភាព និងភាពសម្បូរណ៍រុងរឿងជូនប្រជាជន និងប្រទេសកម្ពុជាទាំងមូល។
ខ្ញុំមានជំនឿថា ប្រជាជនកម្ពុជា ក៏ដូចជាអ្នកដែលបានជួយឧបត្តម្ភគ្រាំទ្រ នឹងមានអារម្មណ៍ធូរស្បើយ ហើយបន្តកិច្ចសហការល្អជាមួយរាជរដ្ឋាភិបាល ក្នុងការផ្តល់នូវយុត្តិធម៌ និងសំណងដល់ជនរងគ្រោះ។
ជាថ្មីម្តងទៀត ខ្ញុំសូមសម្តែងអំណរគុណយ៉ាងស្មោះចំពោះរដ្ឋាភិបាល និងប្រជាជនអាល្លឺម៉ង់ តាមរយៈឯកឧត្តមឯកអគ្គរដ្ឋទូត Joachim Baron von Marschall ដែលជានិច្ចកាលបានជួយគាំទ្រដល់ដំណើរការស្វែងរកយុត្តិធម៌ និងការផ្សះផ្សារជាតិនៅកម្ពុជា ដោយសហការយ៉ាងជិតស្និទ្ធជាមួយអង្គជំនុំជម្រះវិសាមញ្ញក្នុងតុលាការ កម្ពុជាតាំងពីដើមដំបូងមក ជាពិសេសបានជួយគាំទ្រដល់អង្គភាពគាំពារជនរងគ្រោះ និងកម្មវិធីសំណងរបស់អង្គជំនុំជម្រះវិសាមញ្ញក្នុងតុលាការកម្ពុជា និងបានធ្វើឲ្យបូជនីយដ្ឋាននេះលេចចេញជារូបរាងឡើង។
មុននឹងបញ្ចប់ តាងនាមឱ្យរាជរដ្ឋាភិបាលកម្ពុជា ខ្ញុំសូមសម្តែងនូវការប្តេជ្ញាចិត្តខ្ពស់ក្នុងការបន្ត គាំទ្រពេញទំហឹងដល់អង្គជំនុំជម្រះវិសាមញ្ញក្នុងតុលាការកម្ពុជា ហើយខ្ញុំក៏សូមបញ្ជាក់សារជាថ្មីម្តងទៀតនូវឆន្ទៈរបស់រាជរដ្ឋាភិបាល ក្នុងការបន្តកិច្ចសហប្រតិបត្តិការល្អជាមួយដៃគូ និងភាគីពាក់ព័ន្ធទាំងអស់ ដើម្បីឱ្យអង្គជំនុំជម្រះវិសាមញ្ញក្នុងតុលាការកម្ពុជាសម្រេចបេសកកម្ម របស់ខ្លួនដោយជោគជ័យ និងដើម្បីផ្ទេរនូវកេរដំណែលដ៏មានអត្ថន័យ និងយូរអង្វែងសម្រាប់ប្រជាជនកម្ពុជា ក៏ដូចជាមនុស្សជាតិទាំងមូលផងដែរ។
ជាទីបញ្ចប់ ខ្ញុំសូមប្រគេនពរដល់ព្រះថេរានុត្ថេរៈគ្រប់ព្រះអង្គ និងសូមជូនពរដល់ឯកឧត្តម លោកជំទាវ តំណាងស្ថានទូតទាំងអស់ ព្រមទាំងឯកឧត្តម លោកជំទាវ ភ្ញៀវជាតិ និងអន្តរជាតិ លោក លោកស្រី និងជនរងគ្រោះទាំងអស់ដែលមានវត្តមាននៅទីនេះ សូមមានសុខភាពល្អ ទទួលបានជោគជ័យក្នុងការងារ និងមានសុភមង្គលក្នុងក្រុមគ្រួសារ។
Subscribe to:
Posts (Atom)