Thursday, July 21, 2016

សម្តេច​តេជោ​ ផ្តល់​កាដូ​ពិសេស ៤បន្ថែម​ទៀតតាម​រយៈ​ក្រសួង​ឧស្សាហកម្ម​​ជូនប្រជា​ពលរដ្ឋ ១៤៩​គ្រួសារ នៅ​ខេត្តបាត់​ដំបង

ដើម្បីជាចំណងដៃនៅថ្ងៃសម្ពោធ ដាក់ឲ្យដំណើរការប្រព័ន្ធផ្គត់ផ្គង់ទឹកស្អាតនៅទីរួម​ខេត្ត​បាត់​ដំបង សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានសម្រេចប្រគល់សិទ្ធិ កាន់​កាប់​ដីធ្លីស្របច្បាប់ ចំនួន០៤ទីតាំងបន្ថែមទៀត ជូនប្រជាពលរដ្ឋចំនួន១៤៩គ្រួសារ ដែល​កំពុង​រស់​នៅលើដីកម្មសិទ្ធិសាធារណៈរបស់រដ្ឋ នៅក្នុងខេត្តបាត់ដំបង តាមរយៈ ឯកឧត្តម​ទេស​រដ្ឋមន្រ្តី ចម ប្រសិទ្ធ រដ្ឋមន្រ្តីក្រសួងឧស្សាហកម្ម និងសិប្បកម្ម បន្ទាប់ពីបានសម្រេចប្រគល់ ជូនមួយ​ទីតាំង​រួចមកហើយ នៅក្នុងបុរីកម្មករ នៃរោងចក្រត្បាញសំពត់ ខេត្តបាត់ដំបង ជូនប្រជាជន​ចំនួន ៤៩គ្រួសារ កាលពីពេលថ្មីៗកន្លងទៅនេះ។
សូមជំរាបផងដែរថា ផ្ទៃដីទាំង០៤ទីតាំងបន្ថែមដែលនឹង ត្រូវប្រគល់សិទ្ធិកាន់កាប់ ស្រ​ប​ច្បាប់​ជូនប្រជាពលរដ្ឋ នៅពេលនេះគឺជាដីកម្មសិទ្ធិសាធារណៈរបស់រដ្ឋ ស្ថិតក្នុងបញ្ជីសារពើភ័ណ្ឌ របស់ក្រសួងឧស្សាហកម្ម និងសិប្បកម្ម។ គិតចាប់តាំងពីឆ្នាំ ១៩៧៩ មកទល់បច្ចុប្បន្ន​ ពួកគាត់​ដែលភាគច្រើនជាអតីតគ្រួសារកម្មករ បានរស់នៅលើដីនេះ​ ដោយមិនមានឯកសារស្របច្បាប់ ណាមួយដើម្បីធានានូវនិរន្តរភាព នៃទីជម្រករបស់ពួកគាត់ឡើយ ព្រោះដីនេះ​ជាកម្មសិទ្ធិ​របស់​រដ្ឋ។
ដោយមើលឃើញពីតម្រូវការចាំបាច់ និងកង្វល់របស់បងប្អូនប្រជាពលរដ្ឋ ទាំង១៤៩ គ្រួសារ និងដោយទទួលបាននូវរបាយការណ៍ ជាក់លាក់ពីក្រសួងឧស្សាហកម្ម និងសិប្បកម្ម សម្តេច​តេជោ នាយករដ្ឋមន្រ្តី បានសម្រេចប្រគល់សិទ្ធកាន់កាប់ ស្របច្បាប់ជូនពួកគាត់ទាំង ១៤៩​គ្រួសារ ដែលក្នុងនោះរួមមាន៖
១-ទីតាំងដីអតីតពហុសិប្បកម្ម នៅភូមិអូរតាគាំ១ សង្កាត់ទួលតាឯក ក្រុងបាត់ដំបង ខេត្ត​បាត់​ដំបង លើផ្ទៃដីទំហំ ៧.០៩០ម៉ែត្រការ៉េ ជូនប្រជាពលរដ្ឋចំនួន ៩៧គ្រួសារ។
២-ទីតាំងគម្រោងពង្រីកប្រព័ន្ធផ្គត់ផ្គង់ទឹកស្អាត (វត្តលាប) និងជាទីតាំងអតីតរោងចក្រទឹកកក ទឹកក្រូច ស្ថិតនៅភូមិវត្តលាប សង្កាត់ចំការសំរោង ក្រុងបាត់ដំបង ខេត្តបាត់ដំបង លើផ្ទៃដីទំហំ ១.៣៧៩ម៉ែត្រការ៉េ ជូនប្រជាពលរដ្ឋចំនួន ២៤គ្រួសារ។
៣-ទីតាំងអតីតរោងសិប្បកម្មស្ករអំពៅ ស្ថិតនៅភូមិដំណាក់លួង សង្កាត់វត្តគរ ក្រុងបាត់ដំបង ខេត្តបាត់ដំបង លើផ្ទៃដីទំហំ ៣.២៤៦ ម៉ែត្រការ៉េ ជូនប្រជាពលរដ្ឋចំនួន ២៧គ្រួសារ។
៤-ទីតាំងបរិវេណអង្គភាពរដ្ឋាករទឹកបាត់ដំបង ស្ថិតនៅភូមិកម្មករ សង្កាត់ស្វាយប៉ោ ក្រុងបាត់​ដំបង ខេត្តបាត់ដំបង លើផ្ទៃដីទំហំ ៥៦០ម៉ែត្រការ៉េ ក្នុងនោះដីទំហំ ២៨០ម៉ែត្រការ៉េ ផ្តល់ជូន​កម្មករមួយគ្រួសារ និងដីទំហំ ២៨០ម៉ែត្រការ៉េទៀត សម្រាប់ដោះស្រាយគោលនយោបាយ ជូន​កម្មករដែលមានការពាក់ព័ន្ធ។
គួររំឭកផងដែរថា នៅថ្ងៃទី២០ ខែកក្កដា ឆ្នាំ២០១៦ ម្សិលមិញ បន្ទាប់ពីបានអញ្ជើញចុះ​សួរ​សុខ​ទុក្ខជាមួយប្រជាពលរដ្ឋចំនួន ៤៩ នៅបុរីកម្មករ នៃរោងចក្រត្បាញសំពត់ ដែលទើប​ទទួល​បាន ការឯកភាពថ្មីៗ ពី សម្តេចតេជោនាយករដ្ឋមន្រ្តី នូវកម្មសិទ្ធិ​ស្របច្បាប់លើផ្ទៃដីរដ្ឋ​ចំនួន ៥.៧៧១ម៉ែត្រការ៉េរួចមក លោកទេសរដ្ឋមន្រ្តី ចម ប្រសិទ្ធ រដ្ឋមន្ត្រីក្រសួងឧស្សាកម្ម និង​សិប្បកម្ម ក៏បានអញ្ជើញចុះជួបផ្ទាល់ផងដែរ ជាមួយបងប្អូនប្រជាពលរដ្ឋ នៅ ០៤ទីតាំងខាង​លើហើយ ឯកឧត្តម បានពាំនាំនូវប្រសាសន៍ផ្តាំសួរសុខទុក្ខ និងការនឹករលឹកពីសំណាក់ សម្តេច​​​តេជោ និងសម្តេចកិត្តិព្រឹទ្ធបណ្ឌិត ជូនចំពោះបងប្អូនប្រជាពលរដ្ឋទាំងអស់គ្នា និង​បាន​ជម្រាប​ប្រាប់បងប្អូនអោយរស់នៅ និងរកទទួលទាន ដោយស្ងប់អារម្មណ៍ កុំមានការព្រួយ​បារ​ម្មណ៍​ចំពោះ ការបាត់បង់លំនៅដ្ឋាន របស់ខ្លួន ព្រោះពេលនេះ ក្រោមការគិតគូ និងយក​ចិត្ត​ទុក​ដាក់ ពី សម្តេចតេជោ និងសម្តេចកិត្តិព្រឹទ្ធបណ្ឌិត បងប្អូនប្រជាពលរដ្ឋ គឺបានទទួលនូវសិទ្ធិ​ស្របច្បាប់លើការកាន់កាប់ដីធ្លី ដែលខ្លួនកំពុងរស់នៅ និងប្រកបរបរចិញ្ចឹមជីវិតជាប្រចាំថ្ងៃ។

បន្ទាប់ពីទទួលបាននូវដំណឹងដ៏ល្អនេះ បងប្អូនប្រជាពលរដ្ឋទាំង ១៤៩គ្រួសារ បានសម្តែង​នូវសេចក្តីរីករាយជាពន់ពេកក្រៃលែង និងបានថ្លែងអំណរគុណ យ៉ាងជ្រាលជ្រៅជាទីបំផុត តាមរយៈ ឯកឧត្តមទេសរដ្ឋមន្ត្រី ចម ប្រសិទ្ធ ជូនចំពោះ សម្តេចតេជោ និងសម្តេចកិ​ត្តិព្រឹទ្ធ​បណ្ឌិត ដែលលោកទាំងពីរ តែងគិតគូពីសុខទុក្ខ របស់ប្រជាពលរដ្ឋ និងដោះ​ស្រាយបញ្ហា​ជូន​ពួកគាត់ គ្រប់កាលៈទេសៈ ហើយនិងបានជូនពរ សម្តេចទាំងពីរ ទទួលបាននូវសុខភាពល្អ កម្លាំង​ពលាំងមាំមួន ដើម្បីបន្តដឹកនាំប្រទេសជាតិ អោយកាន់តែរីកចម្រើនទៅមុខ៕




ប្រសាសន៍​សំខាន់ៗ​របស់សម្តេច​តេជោ ហ៊ុន សែន ​នៅក្នុង​ពិធីសម្ពោធ​ដាក់ឲ្យ​ប្រើ​ប្រាស់ប្រព័ន្ធ​ផ្គត់ផ្គង់​ទឹកស្អាត​នៅខេត្ត​បាត់ដំបង

នៅព្រឹកថ្ងៃទី២១ ខែកក្កដា ឆ្នាំ២០១៦នេះ សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានអញ្ជើញជាអធិបតីភាព នៅក្នុងកម្មវិធីសម្ពោធដាក់ឲ្យប្រើប្រាស់ប្រព័ន្ធចម្រោះទឹកស្អាត ជូនប្រជាពលរដ្ឋខេត្តបាត់ដំបង និងខេត្តកំពង់ចាម។​(សម្ពោធទាំងពីរ​ខេត្តតែ​ម្តង)​។​ គម្រោង​នេះជាជំនួយហិរញ្ញប្បទានឥតសំណងរបស់រដ្ឋាភិបាលជប៉ុន ដែលត្រូវចំណាយទឹក​ប្រាក់​សរុប​​​ចំនួន៣៣៥៥លានយ៉េន (៣៣,៥៥ លានដុល្លារ) ដែលមានកម្លាំងផលិត​ទឹកជាងបី​ម៉ឺន​ម៉ែត្រ​គីបក្នុងមួយថ្ងៃ ហើយបើកចេញពីក្បាលរ៉ូប៊ីណេមកភ្លាមគឺទទួលទានបានតែម្តង។
ខាងក្រោមនេះជាប្រសាសន៍សំខាន់ៗរបស់សម្តេចតេជោ ហ៊ុន សែន៖
* សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានលើកឡើងថា បច្ចុប្បន្នកម្ពុជាមាន​ក្រុមហ៊ុន​ផលិតទឹកស្អាតច្រើន ធ្វើឲ្យប្រជាពលរដ្ឋបានប្រើប្រាស់ទឹកស្អាតច្រើនឡើងៗ។ សម្តេច​តេជោ សូមអរគុណចំពោះរដ្ឋាភិបាលជប៉ុន ដែលបានផ្តល់រោងចក្រផលិត​ទឹកស្អាត​ដល់ប្រជាជនកម្ពុជាសម្រាប់ប្រើប្រាស់។​
* សម្តេចតេជោ ហ៊ុន សែន បានបញ្ជាក់សារជាថ្មី នៅខែកញ្ញាខាងមុខ កម្ពុជា-ជប៉ុន នឹងមាន​ជើង​ហោះហើរត្រង់រវាងប្រទេសទាំងពីរ ធ្វើឲ្យការធ្វើដំណើររបស់ភ្ញៀវទេសចរណ៍ងាយស្រួល និងទាក់ទងអ្នកវិនិយោគមកកាន់កម្ពុជា។ ខណៈដែលទំហំពាណិជ្ជកម្ម កម្ពុជា-ជប៉ុន មានជាង​១ពាន់លានដុល្លារ។
* សម្តេចតេជោ ហ៊ុន សែន ស្នើឲ្យមន្រ្តីទូតជប៉ុនជួយបំភ្លឺ និងកែតម្រូវនូវការផ្សាយ​ខុសការពិត​អំពី​ជំនួបរវាងសម្តេច និងនាយករដ្ឋមន្រ្តីជប៉ុនលោក អាបេ របស់សារព័ត៌មានក្នុងស្រុក ដែល​មាន​ភាសាខ្មែរ និងអង់គ្លេស។ កាសែត Cambodia Daily បានផ្សាយថា លោក ស៊ិនហ្សូ អាបេ នាយករដ្ឋមន្រ្តីជប៉ុន បានស្តីបន្ទោសឱ្យនាយករដ្ឋមន្រ្តីកម្ពុជា នៅក្នុងជំនួបទ្វេភាគីក្រៅកិច្ចប្រជុំ​អាស៊ី-អឺរ៉ុប កាលពីសប្តាហ៍មុន។ សម្តេចថា នេះគឺជាការផ្សាយមួលបង្កាច់ និងខុសពីការពិត។
* សម្តេចតេជោ ហ៊ុន សែន បានលើកឡើងថា អ្នកបាត់ដំបងពិតជាសំណាង ដែលទទួល​បាន​លោក ច័ន្ទ សុផល ជាអភិបាលខេត្តដ៏ល្អម្នាក់។ សម្តេចសង្ឃឹមថា នៅទូទាំងប្រទេសនឹង​មាន​មន្រ្តីល្អៗដើម្បីបម្រើដល់ប្រជាពលរដ្ឋពិតប្រាកដ។ សម្តេចថា នឹងដើរពិនិត្យនៅតាមមូល​ដ្ឋាន​នានា ដោយចាប់ផ្តើមពីខេត្តបាត់ដំបងនេះតទៅ។
* សម្តេចតេជោ ហ៊ុន សែន សរសើរហាងលក់គុយទាវដែលសម្តេចទទួលទានពីម្សិលមិញ នៅ​ផ្សារក្រគរ ឆ្ងាញ់ ទឹកស៊ុបឆ្ងាញ់។ សម្តេចបានថ្លែងថា «បើកុំខ្មាស់គេ លើកចានហុតទឹក​ស៊ុប​ដល់​អស់»
* សម្តេចតេជោ ហ៊ុន សែន បានលើកឡើងថា កម្ពុជាគ្រោះថ្នាក់បំផុត គឺខ្មែរលាបពណ៌​ខ្មែរ​គ្នាឯង។ សម្តេចតេជោ ហ៊ុន សែន​ បានមានប្រសាសន៍បន្តថា បច្ចុប្បន្នកម្ពុជា មានតំបន់​ត្រួត​ត្រាតែមួយ ក្រោមព្រះមហាក្សត្រតែមួយ ក្រោមរាជរដ្ឋាភិបាលកម្ពុជាតែមួយ និងក្រោមកង​កម្លាំងប្រដាប់អាវុធតែមួយ ដែលនេះខុសពីមុនមានតំបន់ត្រួតត្រា៤ និងកងកម្លាំងប្រដាប់​អាវុធ​៤ ការកសាងសន្តិភាពនៅកម្ពុជា មិនមែនជាការងាយស្រួលនោះទេ។

* សម្តេចតេជោ ហ៊ុន សែន បានថ្លែងថា ផ្លូវជាតិលេខ៥ នឹងត្រូវធ្វើការពង្រីកក្នុង៣ដំ​ណាក់​កាល ក្រោមជំនួយរបស់រដ្ឋាភិបាលជប៉ុន ដែលនេះជាផ្លូវភ្ជាប់អាស៊ាន។ ដំណាក់កាលទី១ ពីបាត់ដំបង ទៅប៉ោយប៉ែត, ដំណាក់កាលទី២ ពីព្រែកក្តាម ទៅកាន់ខេត្តពោធិ៍សាត់ និង​ដំណាក់កាលទី៣ ពីខេត្តពោធិ៍សាត់ ទៅកាន់ខេត្តដំបង៕




សម្តេចតេជោ ហ៊ុន សែន នឹងបើកយុទ្ធ​នាការ​ជួបមន្រ្តីរាជការ​-​ប្រជាពលរដ្ឋ២៥ រាជធានី ខេត្ត- ក្រុង ដោយចាប់​ផ្តើមពីខេត្ត​បាត់ដំបងមុនគេ

នៅថ្ងៃទី២០ ខែកក្កដា ឆ្នាំ២០១៦នេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បាន លើកឡើងថា សម្តេចនឹងបើកយុទ្ធនាការជួបសំណេះសំណាលដោយផ្ទាល់ជាមួយមន្រ្តីរាជការ និងប្រជាពលរដ្ឋនៅទូទាំងប្រទេស ២៥រាជធានីខេត្តក្រុង ហើយខេត្តបាត់ដំបូងជាខេត្តដំបូងគេ ដែលសម្តេចតេជោចាប់ផ្តើម។
នៅក្នុង Facebook របស់សម្តេចតេជោ បានឲ្យដឹងថា បន្ទាប់ពីខេត្តបាត់ដំបង សម្តេចនឹងបន្ត​ដំណើរទៅខេត្តបន្ទាយមានជ័យ និងខេត្តសៀមរាប បន្ទាប់មកគឺខេត្តកំពង់ធំ។
សម្តេចបានរៀបរាប់យ៉ាងដូច្នេះថា «នៅរសៀលថ្ងៃនេះ ខ្ញុំសប្បាយរីករាយណាស់ដែល​បាន​ជួប​សំណេះសំណាល ជាមួយមន្រ្តីរាជការរបស់ យើងនៅខេត្តបាត់ដំបង។ នេះជាខេត្តទី១ ដែល​ខ្ញុំបានចាប់ធ្វើពិធីនេះមុនគេ ហើយជាបន្ទាប់មកគឺនឹងធ្វើនៅគ្រប់ទូទាំង២៥ រាជធានី ខេត្ត​ក្រុង។ បន្ទាប់ពីខេត្តបាត់ដំបងថ្ងៃនេះ គឺថ្ងៃស្អែកខ្ញុំនឹងបន្តដំណើរទៅខេត្តបន្ទាយមានជ័យ និង​ខេត្តសៀមរាប ហើយបន្ទាប់មកគឺខេត្តកំពង់ធំ។ នេះជាឱកាស ដែលខ្ញុំត្រូវតែចុះសួរសុខ​ទុក្ខ​បងប្អូន​មន្រ្តីរាជការ ប្រជាពលរដ្ឋ ព្រមទាំងពិនិត្យអំពីសមិទ្ធផលនៅតាមបណ្តាខេត្ត និង បញ្ហា​ប្រឈមនានា»។
សម្តេចតេជោ បានរៀបរាប់ទៀតថា ខេត្តបាត់ដំបង ជាអតីតទីសមរភូមិក្តៅ​ដែលយើងមិន​នឹក​ស្មានថា បានក្លាយជាខេត្តដែលមានសុខសន្តិភាព និងអភិវឌ្ឍន៍រីកចម្រើនមកទល់សព្វថ្ងៃ។ ដោយ​សារស្មារតីនៃនយោបាយ ឈ្នះ-ឈ្នះ យើងបានបញ្ចប់សង្រ្គាម ហើយបាន​នាំមកនូវ​សន្តិភាព​ពេញលេញ និងឯកភាពជាតិ ដោយបានប្រែក្លាយទីសមរភូមិមរណៈមកជាទីផ្សារ និង សហគមអភិវឌ្ឍន៍។
ក្រៅពីនោះសម្តេចតេជោ ហ៊ុន សែន បានបញ្ជាក់ទាំងស្រុងដែលមានខ្លឹមសារយ៉ាងដូច្នេះថា៖
«ខ្ញុំសូមរំលឹក និងផ្តាំផ្ញើដល់មន្រ្តីរាជការយើង គឺត្រូវខិតខំយកចិត្តទុកដាក់ដោះស្រាយ​សេវា​តម្រូវ​ការចាំបាច់នានាជូនប្រជាពលរដ្ឋឲ្យបានឆាប់រហ័ស និងមានប្រសិទ្ធភាព។ ត្រូវតែ​លុប​បំបាត់រាល់កំហុសឆ្គង ការថ្នាំងថ្នាក់ ភាពអសកម្មទាំងឡាយ ហើយត្រូវខិតខំកសាងអំពើ​ល្អ​អោយបានច្រើន។ ចំពោះកុងត្រូលទាំងជជុះ ឬមិនជជុះគឺត្រូវលុបបំបាត់ឲ្យអស់ រួមទាំង​ជញ្ជីង​ថ្លឹងអនាធិបតេយ្យផងដែរ។
មិនមែនអ្វីៗដែលខាងលើដាក់មកសុទ្ឋតែត្រូវទាំងអស់នោះទេ ឬចេះតែថាល្អទាំងអស់​នោះ​ដែរ។ គឺយើងត្រូវចេះពិនិត្យ និងកែលម្អឡើងវិញ បើមានអ្វីមិនល្អ ឬមិនប្រក្រតី។ មន្រ្តីរាជការ និងកងប្រដាប់អាវុធទាំងអស់ត្រូវចូលរួមគាំទ្រសមត្ថកិច្ចគយ និងពន្ឋដារក្នុង​ការប្រមូល​ចំ​ណូល​​។ មន្រ្តីពាក់ព័ន្ឋ និងអាជ្ញាធរមានសមត្ថកិច្ចត្រូវយកចិត្តទុកដាក់ការពារព្រៃឈើ និង​ដោះ​ស្រាយទំនាស់ដីធ្លីក្នុងខេត្តនីមួយៗ របស់ខ្លួនឲ្យបានល្អនិងមានប្រសិទ្ឋភាព។ ទន្ទឹមនឹងនេះ គឺ​យើង​ទាំងអស់គ្នាត្រូវចូលរួមពង្រឹងនីតិរដ្ឋអោយបានល្អរឹងមាំ ហើយកុំភ្លេចទៅចុះឈ្មោះ​បោះ​ឆ្នោត​ឲ្យបានគ្រប់ៗគ្នា។ ត្រូវមានសាមគ្គីភាពរវាងគ្នា​ទៅវិញទៅមក ហើយត្រូវខិតខំ​រក្សាមិត្ត​ភាព និងសហប្រតិបតិ្តការជាមួយប្រទេសថៃជាប់ព្រំដែនជាមួយខេត្តឲ្យបានល្អ។

ខ្ញុំសូមកោតសរសើររាល់នូវការខិតខំប្រឹងប្រែងរបស់ខេត្ត និងសូមជូនពរបងប្អូនមន្រ្តីរាជការ​នៅក្នុងខេត្តបាត់ដំបងទាំងមូលជួបតែសេចក្តីសុខ និងសំណាងល្អគ្រប់ៗគ្នា»៕