Wednesday, April 01, 2015
ប្រសាសន៍ សម្តេចតេជោ ហ៊ុន សែន ក្នុងពិធីសម្ភោធដាក់ឱ្យប្រើប្រាស់ជាផ្លូវការ ផ្លូវជាតិលេខ៩
ប្រសាសន៍ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងពិធីសម្ភោធដាក់ឱ្យប្រើប្រាស់ជាផ្លូវការ ផ្លូវជាតិលេខ៩ ប្រវែង១៤៣.៣៣គម ពីក្រុងស្ទឹងត្រែង ខេត្តស្ទឹងត្រែង ទៅដល់ក្រុងព្រះវិហារ និងស្ពានមិត្តភាពកម្ពុជា-ចិន ស្ទឹងត្រែងប្រវែង១៧៣១ម៉ែត្រ ក្រោមហិរញ្ញបទានពីរដ្ឋាភិបាល នៃសាធារណរដ្ឋប្រជាមានិតចិន
សម្តេចតេជោ ប្រកាសជំហរមិនផ្លាស់ប្តូរ ការសម្រេចចិត្តរួមគ្នារវាងសម្តេច និងឯកឧត្តម សម រង្ស៊ី ក្នុងការជ្រើសរើស លោក ហង្ស ពុទ្ធា ជាសមាជិកទី៩ នៃ គ.ជ.ប
នាយករដ្ឋមន្រ្តីកម្ពុជា
សម្តេចតេជោ ហ៊ុន សែន បានប្រកាសបង្ហាញជំហរនៅតែរក្សាជ្រើសតាំងលោក
ហង្ស ពុទ្ធា ជាសមាជិកទី៩ នៃគណៈកម្មាធិការជាតិរៀបចំការ បោះឆ្នោត (គ.ជ.ប) ពោលមិនត្រូវការបេក្ខភាពដទៃនោះឡើយ។
សម្តេចបានបញ្ជាក់ថា ជំហរនេះ គឺរក្សាតាមការព្រមព្រៀងគ្នាតាមទូរស័ព្ទរវាងសម្តេច និង ឯកឧត្តម សម រង្ស៊ី
ប្រធានគណបក្សសង្រ្គោះជាតិ កាលពីថ្ងៃទី២៩ ខែមីនា ឆ្នាំ២០១៥។
នៅក្នុងឱកាសអញ្ជើញជាអធិបតីសម្ពោធដាក់ឲ្យប្រើប្រាស់ស្ពានមិត្តភាពកម្ពុជា-ចិន
មេគង្គស្ទឹងត្រែង និងផ្លូវជាតិលេខ៩ (ស្ទឹងត្រែង-ព្រះវិហារ) នៅខេត្តស្ទឹងត្រែង
នាព្រឹកថ្ងៃទី០១ ខែមេសា ឆ្នាំ២០១៥នេះ សម្តេចតេជោ បានប្រកាសថា គណបក្សប្រជាជនកម្ពុជា នៅតែរក្សាជំហរជ្រើសយក
លោក ហង្ស ពុទ្ធា ជាសមាជិកទី៩ នៃ គ.ជ.ប មិនត្រូវការ បេក្ខភាពដទៃនោះឡើយ បើមិនដូច្នោះសមាភាព
គ.ជ.ប នឹងរក្សាដដែល។
ពាក់ព័ន្ធនឹងការជ្រើសតាំងបេក្ខភាពលោក
ហង្ស ពុទ្ធា ជាសមាជិកទី៩ នៃ គ.ជ.ប នេះ សម្តេចបានរំលឹកផងដែរថា សម្តេច និង ឯកឧត្តម សម រង្ស៊ី បានព្រមព្រៀងគ្នារួចហើយកាលពីថ្ងៃទី២៩
ខែមីនា ឆ្នាំ២០១៥ តាមរយៈការសន្ទនាគ្នាតាម SMS គ្រាដែលលោក សម រង្ស៊ី កំពុងស្ថិតនៅប្រទេសបារាំង
ប៉ុន្តែពេលវិលត្រឡប់មកប្រទេសកម្ពុជាវិញ លោក សម រង្ស៊ី ចង់ផ្លាស់ប្តូរជំហរទៅវិញ។
សម្តេចបន្ថែមថា «ខ្ញុំបញ្ជាក់ច្បាស់ហើយ គឺអត់និយាយអីតទៀតទេ សុំទោសព្រមឬមិនព្រមបើមិនព្រមទេកុំបោះ ថ្ងៃទី១៣ មេសា ខាងមុខនេះ។ បើមិនអាចឯកភាពគ្នាបានទេ
ទុកឯកឧត្តម អ៊ឹម សួស្តី បន្តធ្វើជាប្រធាន គ.ជ.ប រហូតទៅកុំពិបាកពេក។អាថ្មីមិនចេញ អាចាស់បន្ត
កុំទារភាគហ៊ុនច្រើនពេក។ សង្ឃឹមថា ឯកឧត្តម សម រង្ស៊ី នឹង បន្តគ្រប់គ្រងបក្សនេះបន្តទៀត។
គាត់ឯកភាពជាមួយខ្ញុំនៅប៉ារីស ហេតុអីមកដល់កម្ពុជាគាត់អត់ព្រម? តើមានបញ្ហាផ្ទៃក្នុងអី? ហើយកុំថា គេបំបែកអាងអីអាងថា គេបំបែក នេះមិនមែន ឯកឧត្តមសម រង្ស៊ីជាអ្នកនិយាយទេ
គឺ អ្នកដទៃ»។
សម្តេចបានបន្ថែមថា
«លទ្ធភាពមានពីរ គឺមួយបោះឆ្នោតបាន ប៉ុន្តែបេក្ខភាពត្រូវតែជា លោក ហង្ស ពុទ្ធា។
មួយទៀតមិនចាំបាច់បោះឆ្នោតទេ គណៈកម្មការនេះ ដំណើរការទៅ ប៉ុន្តែយកច្បាប់ថ្មីមកអនុវត្ត»។
សម្តេចបានបញ្ជាក់ថា
តាមការឆ្លើយឆ្លងគ្នារវាងសម្តេចតេជោ ហ៊ុន សែន និង ឯកឧត្តម សម រង្ស៊ី តាមសារទូរស័ព្ទ
ថ្ងៃទី២៩ មីនា កន្លងទៅនេះ ឯកឧត្តម សម រង្ស៊ី បានសរសេរថា សហការីទាំងអស់របស់ឯកឧត្តម
ក៏ពេញចិត្តទាំងអស់គ្នា ចំពោះការព្រមព្រៀងគ្នាជាគោលការណ៍ រវាងសម្តេច និង រូបខ្ញុំ ដែលបានឯកភាពជ្រើស រើសលោក ហង្ស ពុទ្ធា
ដែរ។ តែក្រោយមក ឯកឧត្តម សម រង្ស៊ី បានផ្លាស់ប្តូរចិត្ត
ដោយលើកហេតុផលថា លោក ហង្ស ពុទ្ធា ព្រមទាំងភរិយាគាត់ មានបញ្ហាសុខភាព ដែលគួរពិចារណាឡើងវិញ។
ក្រៅពីនោះ ឯកឧត្តម
សម រង្ស៊ី ក៏បានស្នើទៅសម្តេច នូវបេក្ខភាព៣រូបផ្សេងទៀត គឺមានលោក គល់ បញ្ញា នាយកប្រតិបត្តិគណៈកម្មាធិការ ដើម្បីការបោះឆ្នោតដោយសេរី
និង យុត្តិធម៌នៅកម្ពុជា ហៅកាត់ថា
COMFREL, លោក នី
ចរិយា ប្រធានផ្នែកសិទ្ធិមនុស្ស របស់សមាគមសិទ្ធិមនុស្សអាដហុក ADHOC ហើយដែលជាមន្ត្រីរបស់
COMFREL និងលោក ហ៊ីង ធីឬទ្ធិ ជាព្រះរាជអាជ្ញាតុលាការកំពូល ហើយដែលជាអ្នកជំនាញច្បាប់។
សម្តេចតេជោ ហ៊ុន សែន
បានឆ្លើយតបសាររបស់ ឯកឧត្តម សម រង្ស៊ី វិញថា ខ្ញុំសុំអាធ្យាស្រ័យដែលមិនអាចទទួលយកនូវសំណើរឯកឧត្តម
បានដោយមូលហេតុដូចខាងក្រោម៖
១. យើងបានយល់ព្រមជាមួយគ្នាតាមរយ: SMS
លើបេក្ខភាពលោក ហង្ស ពុទ្ធា ដូចមានក្នុងលិខិតរបស់ខ្ញុំថ្ងៃ
២៩ មីនា ផ្ញើជូនឯកឧត្តម ថ្នាក់ដឹកនាំ CPP សុទ្ធតែបានដឹងរឿងនេះ។ សារព័ត៌មានមួយចំនួន
ក៏បានចុះផ្សាយហើយ ដែរ។ ការផ្លាស់ប្តូរគោលជំហរមិនមែនជាទម្លាប់នយោបាយរបស់ខ្ញុំនឹង
CPP នោះទេ លើកលែងតែសាមីខ្លួនមិនអាចបំពេញលក្ខខណ្ឌតាមផ្លូវច្បាប់បានដូចករណី
លោកស្រី ពុង ឈីវកេក លើបញ្ហាសញ្ជាតិខ្មែរតែ១។
២.តាមដឹងលោក ហង្ស ពុទ្ធា
គ្មានជំងឺទឹកនោមផ្អែមទេ។ បើទោះជាគាត់មានជំងឺនេះមែន ក៏ច្បាប់មិនបានហាម
ឃាត់មិនឲ្យឈរឈ្មោះនោះដែរមិនថា ជំងឺទឹកនោមផ្អែម សូម្បីជំងឺអេដស៍ ក៏នៅតែឈរឈ្មោះបានដែរ, CPP មិន យល់ព្រមយកបញ្ហាជំងឺនេះ ឬ ជំងឺនោះ ដើម្បីផ្លាស់ប្តូរបេក្ខភាពលោក ហង្ស
ពុទ្ធា តាមសំណើ ឯ.ឧបានទេ។ ពេលវេលា បានមកដល់ដំណាក់ការផ្តាច់ព្រ័ត្រ ហើយខ្ញុំសុំផ្តល់ជម្រើស
២ជូន ឯកឧត្តម គឺ៖ ១.
បន្តគាំទ្របេក្ខភាព លោក ហង្ស ពុទ្ធា តាមការព្រមព្រៀងថ្ងៃ២៩ មីនា រវាង ឯកឧត្តម និង ខ្ញុំ ហើយចុះហត្ថលេខាលើលិខិតផ្ញើជូនគណៈ
អចិន្ត្រៃយ៍រដ្ឋសភា ដែលខ្ញុំ បានចុះហត្ថលេខារួចហើយ។
២. មិនបាច់បោះឆ្នោតរើស
គ.ជ.ប ថ្មីថ្ងៃ ១៣ មេសា ទេ ដោយយកមូលហេតុគណៈបក្សទាំង២
មិនឯកភាពគ្នាលើការរើសបេក្ខភាពទី៩។ ក្នុងករណីបែបនេះ គ.ជ.ប បច្ចុប្បន្ននឹងបន្តការងាររហូត
គ.ជ.ប ថ្មី ត្រូវបានជ្រើសតាំងឡើង។
សម្តេច ហ៊ុន សែន បានប្រកាសបដិសេធថា ការលើកឡើងពីបញ្ហាសុខភាពរបស់លោក ហង្ស
ពុទ្ធា គឺជាការប្រមាថមួយដ៏ធ្ងន់ណាស់។ ពេលនេះ លោកហង្សពុទ្ធា
ទើបតែអាយុ ៥០ ឆ្នាំ ហើយតាមដំណឹងដែលសម្តេចទទួលបាន គឺលោក ហង្ស ពុទ្ធា មិនមានជំងឺអ្វីទេ។
បន្ទាប់ពីមានការឯកភាពរវាង
សម្តេចតេជោ និងឯកឧត្តម សម រង្ស៊ី ជុំវិញការជ្រើសតាំង លោក ហង្ស ពុទ្ធា
ជាសមាជិកទី៩ នៃ គ.ជ.ប ផ្ទៃក្នុងរបស់គណបក្សសង្គ្រោះជាតិត្រូវបានគេទម្លាយឲ្យដឹងថាមានការឯកភាព
និងស្រុះស្រួលគ្នាហើយក្នុងការទទួលយក លោក ហង្ស ពុទ្ធា។
គួរបញ្ជាក់ថា លោកបណ្ឌិត
ហង្ស ពុទ្ធា បច្ចុប្បន្ន ជានាយកប្រតិបត្តិនៃគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា
(និចហ្វិច) ហើយលោក ហង្ស ពុទ្ធា ក៏ត្រូវបានគេសង្កេតឃើញថា ជាញឹកញាប់លោកតែងបានចូលរួមក្នុងសកម្មភាពសង្គមជាបន្តបន្ទាប់ ពិសេសលោក ហង្ស ពុទ្ធា មានការសហការយ៉ាងល្អជាមួយនិងបណ្តាអង្គការសង្គមស៊ីវិល។
ការជ្រើសរើសរូប លោក ហង្ស ពុទ្ធា ជាសមាជិកទី៩ នៃ គ.ជ.ប ដែលជាសមាជិកឯករាជ្យនោះ
ត្រូវបានគេមើលឃើញថា លោកពិតជាអាចបំពេញតួនាទីនេះបានយ៉ាងល្អប្រសើរ៕
អត្ថបទ៖ ច័ន្ទ ទេវី
សម្តេចតេជោ ហ៊ុន សែន អញ្ជើញសម្ពោធ ស្ពានមិត្តភាព កម្ពុជា-ចិន មេគង្គស្ទឹងត្រែង និងផ្លូវជាតិលេខ៩
នៅព្រឹកថ្ងៃទី០១ ខែមេសា
ឆ្នាំ២០១៥នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា
បានអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធស្ពានឆ្លងកាត់ទន្លេមេគង្គ និង
ផ្លូវជាតិលេខ៩ តភ្ជាប់ខេត្តស្ទឹងត្រែង និង ខេត្តព្រះវិហារ។
ស្ពាន និងផ្លូវនេះ
ត្រូវបានដាក់ឲ្យប្រជាពលរដ្ឋធ្វើដំណើរឆ្លងកាត់តាំងពីឆ្នាំ២០១៤មកម្ល៉េះ។ ស្ពានមិត្តភាពកម្ពុជា-ចិនមេគង្គស្ទឹងត្រែង
ដែលជាស្ពានឆ្លងកាត់ទន្លេមេគង្គនេះ មានប្រវែង ១.៧៣១ម៉ែត្រ ទទឹង ១៣,៥
ម៉ែត្រ។ ស្ពានមិត្តភាព កម្ពុជា-ចិន មេគង្គស្ទឹងត្រែង ជាស្ពានដែលស្ថិតក្នុងគម្រោងសាងសង់ផ្លូវជាតិលេខ៩
តភ្ជាប់ពីក្រុងស្ទឹងត្រែង ផ្លូវជាតិលេខ៧ ទៅកាន់ខេត្តព្រះវិហារ ដែលមានប្រវែង
១៤៤គីឡូម៉ែត្រ ដោយចំណាយ ទឹកប្រាក់ប្រមាណ ១១៦ លានដុល្លារ ជាហិរញ្ញប្បទានរបស់ប្រទេសចិន។
ក្រោយដាក់ឲ្យដំណើរការស្ពាន
និងផ្លូវ បានចូលរួមចំណែកយ៉ាងសំខាន់ ដល់ការធ្វើដំណើររបស់ប្រជាពលរដ្ឋ ជាពិសេសប្រជាពលរដ្ឋ ក្នុងខេត្តស្ទឹងត្រែងតែម្តង។
ស្ពានមិត្តភាពកម្ពុជា-ចិនមេគង្គស្ទឹងត្រែងនេះ បានចួលរួមចំណែកយ៉ាងសំខាន់
សម្រួលដល់ការដឹកកសិផលរបស់ប្រជាពលរដ្ឋក្នុងខេត្តស្ទឹងត្រែង ដែលពីមុនមក កសិផលរបស់គាត់ត្រូវដឹកតាមទូក
ហើយប្រឈមនិងការលំបាកខ្លាំងនៅរដូវវស្សាដែលមានទឹកជំនន់។
គួរបញ្ជាក់ថា គម្រោងស្ថាបនាស្ពាន
និងផ្លូវនេះ បានចាប់ផ្តើម នៅខែមេសា ឆ្នាំ២០១១ ហើយគ្រោងនឹងបញ្ចប់គម្រោងនា ខែមករា
ឆ្នាំ២០១៦ ប៉ុន្តែស្ពាន និងផ្លូវ ដែលសម្ពោធដាក់ឲ្យប្រើប្រាស់នាព្រឹកនេះ ត្រូវបានសាងសង់ចប់សព្វគ្រប់មុនការគ្រោងទុក
ដែលជាសមិទ្ធផលថ្មីមួយទៀត របស់រាជរដ្ឋាភិបាលកម្ពុជា ក្នុងឆ្នាំ២០១៥ មុនចូលឆ្នាំថ្មីប្រពៃណីជាតិខ្មែរ
ដែលនឹងមកដល់ក្នុងពេលខាងមុខ៕
អត្ថបទ៖ ច័ន្ទ ទេវី
ក្រសួងការងារ ជូនដំណឹងឱ្យ គ្រឹះស្ថាន សហគ្រាស អនុញ្ញាត ឱ្យកម្មករ ឈប់សម្រាក ដោយមានប្រាក់ឈ្នួល ៣ថ្ងៃនៅបុណ្យចូលឆ្នាំខ្មែរ
យោងតាមសេចក្តីជូនដំណឹងស្តីពីថ្ងៃឈប់បុណ្យចូលឆ្នាំខ្មែរប្រពៃណីជាតិ
របស់ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី ៣១ ខែមីនា
ឆ្នាំ២០១៥ បានបញ្ជាក់ថា ក្រសួងសូមជូនដំណឹងដល់ម្ចាស់ និងនាយកសហគ្រាស គ្រឹះស្ថានទាំងអស់
ដែលស្ថិតនៅក្នុងដែនអនុវត្តនៃច្បាប់ស្តីពីការងារបានជ្រាបថា
យោងតាមច្បាប់ស្តីពីការងារ និងប្រកាសរបស់ប្រសួងលេខ ២៤៨ កប/ប្រ.ក
ចុះថ្ងៃទី២២ ខែតុលា ឆ្នាំ២០១៤ ស្តីពីការឈប់បុណ្យដែលមានប្រាក់ឈ្នួលប្រចាំឆ្នាំ
២០១៥ សូមលោក លោកស្រី អនុញ្ញាតឲ្យកម្មករនិយោជិតទាំងអស់របស់ខ្លួន ឈប់សម្រាកដោយមានប្រាក់ឈ្នួលនាឱកាសបុណ្យចូលឆ្នាំខ្មែរ
ខាងមុខនេះ ក្នុងរយៈពេលបីថ្ងៃ គឺថ្ងៃទី ១៤-១៥ និងថ្ងៃទី ១៦ ខែមេសា ឆ្នាំ២០១៥។
សេចក្តីជូនដំណឹងដដែល
ក៏បានបញ្ជាក់ថា ក្នុងករណីចាំបាច់បំផុត ដែលសហគ្រាស គ្រឹះស្ថាន មិនអាចបញ្ឈប់សកម្មភាពរបស់ខ្លួនបានក្នុងឱកាសថ្ងៃឈប់បុណ្យចូលឆ្នាំខ្មែរខាងមុខនេះ
ម្ចាស់ និងនាយកសហគ្រាស គ្រឹះស្ថាន ត្រូវសម្របសម្រួលជាមួយកម្មករនិយោជិតឲ្យមានការស្ម័គ្រចិត្ត
ព្រមទាំងបែងចែកឲ្យមានពេលវេលា និងថ្ងៃឈប់សម្រាកបុណ្យបានសមស្រប។ កម្មករនិយោជិតដែលធ្វើការថ្ងៃឈប់បុណ្យចូលឆ្នាំនេះ
មានសិទ្ធិទទួលបាននូវប្រាក់បំណាច់បន្ថែមដែលមានចំនួនស្នើនឹងប្រាក់ឈ្នួលថ្ងៃធ្វើការធម្មតា។
ក្នុងករណីមានលទ្ធភាព ម្ចាស់ ឬនាយកសហគ្រាស គ្រឹះស្ថាន គួរចាត់តាំងឲ្យមានការលេងល្បែងកំសាន្តនានា
នៅតាមសហគ្រាសគ្រឹះសា្ថនរបស់ខ្លួន ដើម្បីចូលរួមអបអរសាទរពិធីបុណ្យចួលឆ្នាំ
និងដើម្បីលើកទឹកចិត្តដល់បងប្អូនកម្មករនិយោជិតដែលបានបំពេញការងារកន្លងមក។
ក្រសួងការងារ និងបណ្តុះបណ្តាលវិជ្ជាជីវៈ មានក្តីសង្ឃឹមជឿជាក់ថា លោក
លោកស្រី ដែលជាម្ចាស់ និងជានាយក សហគ្រាស គ្រឹះស្ថានទាំងអស់ ប្រាកដជាអនុវត្តតាមសេចក្តីជូនដំណឹងនេះ
បានល្អត្រឹមត្រូវជាពុំខាន។
គួរបញ្ជាក់ថា ពិធីបុណ្យចួលឆ្នាំថ្មីប្រពៃណីខ្មែរ
នឹងឈានចូលមកដល់ក្នុងពេលដ៏ខ្លីខាងមុខនេះ គឺនៅថ្ងៃទី ១៤ រហូតដល់ថ្ងៃទី ១៦
ខែមេសា។ តាមទំនៀមទម្លាប់ប្រពៃជាតិ បងប្អូនប្រជាជនខ្មែរតែងតែរៀបចំផ្ទះសំបែង
បោសសម្អាត និងតុបតែងជាគ្រឿងលម្អផ្សេងៗ រួមជាមួយ និងការរៀបចំគ្រឿងសការៈបូជាមួយចំនួន
មានដូចជាទៀន ធូប ផ្កាផ្ញី ផ្លែឈើ និងនំចំណី ជាដើម ដើម្បីរង់ចាំទទួលទេវតាឆ្នាំថ្មី
និងបែរបន់សូមពរជ័យសេរីសួស្តី ពីទេវតាឆ្នាំថ្មីដល់គ្រប់ក្រុមគ្រួសារខ្មែរ៕
អត្ថបទ៖ ច័ន្ទ ទេវី
Subscribe to:
Posts (Atom)