ខ្មែរតែមួយ - Khmer Unity: 12/03/15

Thursday, December 03, 2015

សម្តេចតេជោ៖ មណ្ឌលកីឡាហែលទឹកតេជោសែន គឺជាសមិទ្ធផលថ្មីមួយទៀត ស្របពេលដែល កម្ពុជាកំពុងឆ្ពោះទៅមុខដោយប្រសិទ្ធភាព និងគ្មានការគំរាមគំហែងក្នុងបញ្ហាភេរវកម្ម

នារសៀលថ្ងៃទី២ ខែធ្នូ ឆ្នាំ២០១៥ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានអញ្ជើញសម្ពោធសមិទ្ធផលជាតិថ្មីមួយទៀត ខាងវិស័យកីឡា គឺមណ្ឌលកីឡាហែលទឹកតេជោសែន ដែលស្ថិតក្នុងខេត្តកំពង់ចាម រួមនិងការ ប្រកួតកីឡាហែលទឹក ដណ្តើមពានរង្វាន់កីឡាហែលទឹកតេជោសែន ឆ្នាំ២០១៥ផងដែរ។

ទេសរដ្ឋមន្រ្តីរដ្ឋមន្រ្តីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាហែលទឹក ឯកឧត្តម ស៊ុន ចាន់ថុល បានឲ្យដឹងថា មណ្ឌលកីឡាហែលទឹកតេជោសែននេះ ត្រូវបានសាងសង់ក្នុង កំរិតអន្តរជាតិមួយ ដែលចំណាយថវិកាសាងសង់អស់ជាង១លាន៥សែនដុល្លារអាមេរិក ក្នុងនោះ មានអាងហែលទឹកទំហំ ២៥ម៉ែត្រ គុណ៥០ម៉ែត្រ ជម្រៅ២ម៉ែត្រ២ និងអាងលោតទឹក ទំហំ២៥ម៉ែត្រ គុណ២៥ម៉ែត្រ ជម្រៅ៥ម៉ែត្រ។ អាងហែលកំដៅសាច់ដុំមុនប្រកួត មានទំហំ ១០ម៉ែត្រ គុណ១៥ម៉ែត្រ ជម្រៅ១ម៉ែត្រ៥០។ អាងទឹកសម្រាប់រក្សាតុល្យភាពប្រព័ន្ធចម្រោះ ទំហំ២៥ម៉ែត្រ គុណ៨ម៉ែត្រ ជម្រៅ១ម៉ែត្រ៥០។ មណ្ឌលកីឡាហែលទឹកតេជោសែននេះ មានកន្លែងអង្គុយធម្មតា ចំនួន៦១៥កន្លែង រួមនិងកន្លែងទស្សនាVIPចំនួន៩០កន្លែង។ មណ្ឌលកីឡាហែលទឹកនេះ ចាប់ផ្តើមសាងសង់ពីខែមីនា ឆ្នាំ២០១៣ និងបានបញ្ចប់ការសាងសង់ក្នុងចុងឆ្នាំ២០១៥នេះ។

នៅក្នុងពិធីសម្ពោធមណ្ឌលកីឡាហែលទឹកតេជោសែននេះ ក៏មានការរៀបចំការប្រកួតដណ្តើម ពានរង្វាន់កីឡាហែលទឹកតេជោសែនឆ្នាំ២០១៥ ដែលមានកីឡាករចំនួន១១៥នាក់ មកពីក្លឹបកីឡា ហែលទឹកចំនួន៧ ក្នុងនោះក៏មានកីឡាករពិការផងដែរ ដែលបានចូលរួមប្រកួតទាំងក្នុងវិញ្ញាសារ ហែលទឹកនិងលោតទឹក។ ដែលជ័យលាភីលេខ១ បានទៅលើកីឡាករមកពីក្លឹបកីឡាហែលទឹក ព្រឹទ្ធាចារ្យ ហែម ថុន។ ជ័យលាភីលេខ២ បានទៅលើកីឡាករ របស់ក្លឹបក្រសួងមហាផ្ទៃ។ និងជ័យលាភីលេខ៣ បានទៅលើកីឡាករ នៃក្លឹបជ្រោយចង្វារ។

ថ្លែងនៅក្នុងពិធីមណ្ឌលកីឡាហែលទឹកតេជោសែននេះ សម្តេចតេជោ ហ៊ុនសែន បានកោតសរសើរ ចំពោះសប្បុរសជនរួម និងអាជ្ញាធរខេត្តកំពង់ចាម ដែលបានសាងសង់មណ្ឌលកីឡាហែលទឹកនេះ ដែលជាសមិទ្ធផលថ្មីមួយទៀតក្នុងវិស័យកីឡា ស្របពេលដែលប្រទេសកម្ពុជា កំពុងឆ្ពោះទៅមុខ ដោយប្រសិទ្ធភាព និងគ្មានការគំរាមគំហែងក្នុងបញ្ហាភេរវកម្មនោះទេ។ ជាងនេះទៀត សម្តេចតេជោ ក៏បានកោតសរសើរដល់ការប្រឹងប្រែងហ្វឹកហាត់របស់កីឡាករហែលទឹក ខេត្តកំពង់ចាម ដែលកន្លង មកពេលមិនទាន់មានអាងហែលទឹកនេះ ក៏កីឡាករនៅតែហ្វឹកហាត់នៅតាមទន្លេបិទ និងបឹងទន្សោង ជាដើម។ ប៉ុន្តែនៅពេលនេះមណ្ឌលហែលទឹកនេះ នឹងត្រូវប្រើប្រាស់សំរាប់ការហ្វឹកហាត់ថ្នាក់ជាតិ និងសំរាប់ត្រៀមក្នុងការ ប្រកួតនៅក្នុងកីឡាស៊ីហ្គេម ឆ្នាំ២០២៣ ដែលកម្ពុជាជាម្ចាស់ផ្ទះទៀតផង។

ក្នុងឱកាសនេះដែរ សម្តេចតេជោ ហ៊ុន សែន ក៏បានលើកឡើងពីការកកើតឡើងនៃរណសិរ្ស សាមគ្គីអភិវឌ្ឍន៍មាតុភូមិកម្ពុជាលើកទី៣៧ ដែលចំថ្ងៃទី២ធ្នូនេះដែរ។ ដោយសម្តេច បានគូស បញ្ជាក់ថា សត្រូវពិតប្រាកដរបស់រណសិរ្សសាមគ្គីអភិវឌ្ឍន៍មាតុភូមិកម្ពុជា គឺអង្គការ ចាត់តាំង នយោបាយយោធាប៉ុលពត ដែលបានសម្លាប់ប្រជាជនកម្ពុជា។ ហើយការបង្កើតរណសិរ្សសាមគ្គី អភិវឌ្ឍន៍មាតុភូមិកម្ពុជា ២ធ្នូ ១៩៧៨នេះ ក៏បានធ្វើអោយឈានទៅដល់ការចរចារ ហ៊ុនសែន សីហនុ នៅហ្វែអង់តាដឺន័រ ដើម្បីស្វែងរកសន្តិភាព និងឈានទៅដល់ការចុះកិច្ចព្រមព្រៀង សន្តិភាពទីក្រុងប៉ារីស ២៣តុលា ១៩៩១ផងដែរ។

ជាងនេះទៀតសម្តេចតេជោ ហ៊ុន សែន ក៏បានរំលឹកពីថ្ងៃទី០២ ធ្នូ១៩៩៨ ដែលសភាបានអនុម័ត យុទ្ធសាស្រ្តត្រីកោណរបស់រាជរដ្ឋាភិបាលកម្ពុជា ដែលយុទ្ធសាស្រ្តនោះ មានមុំសំខាន់ចំនួន៣ គឺទី១ ដើម្បីពង្រឹងសន្តិភាព ក្នុងប្រទេស ទី២ដើម្បីធ្វើសមាហរណកម្ម ឆាប់បំផុតចូលទៅក្នុងអន្តរជាតិ និងទី៣ដើម្បីអភិវឌ្ឍន៍សេដ្ឋកិច្ចសង្គម និងកាត់បន្ថយភាពក្រីក្រ តាមរយៈការកែទម្រង់លើ គ្រប់វិស័យ។ ទើបបន្តមកយុទ្ធសាស្ត្រចតុកោណត្រូវបានអនុវត្ត រហូតមកដល់ពេលនេះ។

គួររំលឹកថាកាលពីទសវត្សរ៍ទី៦០ ខេត្តកំពង់ចាម មានវិញ្ញាសារកីឡាហែលទឹកខ្លាំងជាងគេ នៅកម្ពុជា ហើយកីឡាករហែលទឹករបស់ខេត្តកំពង់ចាម បានទទួលមេដាយច្រើនជាងគេទាំង មេដាយមាស ប្រាក់ និងសំរឹទ្ធក្នុងការប្រកួតអន្តរជាតិដូចជាការប្រកួតកីឡាស៊ីហ្គេម អាស៊ានហ្គេម និងកីឡាអូឡាំពិកជាដើម៕

ប្រធាននាយកដ្ឋានកិច្ចការបោះឆ្នោត និងនីតិកម្មនៃគណបក្សសង្គ្រោះជាតិសុំលាលែងពីគណបក្ស

លោក អ៊ុក ស៊ុយ សមាជិកគណៈកម្មាធិការនាយក និងជាប្រធាននាយកដ្ឋានកិច្ចការបោះឆ្នោត និងនីតិកម្មនៃគណបក្សសង្គ្រោះជាតិ នៅថ្ងៃទី០៣ ខែធ្នូ ឆ្នាំ២០១៥ បានធ្វើលិខិតសុំលាលែងចេញ ពីគណបក្សសង្គ្រោះជាតិ។

យោងតាមលិខិតសុំលាលែងរបស់លោក អ៊ុក ស៊ុយ បានបញ្ជាក់ឲ្យដឹងពីមូលហេតុនៃការលាលែង របស់ខ្លួនថា ដោយសារប្រធាន អនុប្រធាន និងថ្នាក់ដឹកនាំក្នុងបក្សចំនួន៤រូបទៀតដឹកនាំបក្ស គ្មានសីលធម៌ និងគ្មានគុណធម៌មកលើថ្នាក់ដឹកនាំក្នុងបក្ស ជាពិសេសមកលើប្រជាពលរដ្ឋខ្មែរ រាប់លាននាក់ ដែលលោកបានខិតខំផ្តល់សេចក្តីទុកចិត្តអោយគណបក្សសង្គ្រោះជាតិកន្លងមក។

លោកបានបញ្ជាក់បន្ថែមថា ការដឹកនាំរបស់គណបក្សសព្វថ្ងៃនេះ គឺប្រធាន និងអនុប្រធានបាន ឃុបឃិតគ្នាជាមួយថ្នាក់ដឹកនាំ ក្នុងបក្សចំនួន៤រូបទៀត ប្រព្រឹត្តអំពើអយុត្តិធម៌ផ្ទៃក្នុងបក្សតែងតាំង មនុស្សចាប់ពីថ្នាក់ជាតិរហូតមកដល់ថ្នាក់ រាជធានី/ខេត្ត ក្រុង ស្រុក/ខណ្ឌ ឃុំ/សង្កាត់ ហើយខ្ញុំក៏បាន ស្នើសុំអោយកែចរិកដឹកនាំក្នុងពេលប្រជុំ គណៈកម្មាធិការនាយកម្តងៗ ប្រធាន អនុប្រធាន យកអង្គប្រជុំ របស់គណៈកម្មាធិការនាយកគណបក្ស ទាត់លេងដូចបាល់ ជាពិសេសមិនគោរពសម្តីរបស់ខ្លួន ដែលសន្យាមកលើប្រជាពលរដ្ឋខ្មែររាប់លាននាក់ថា មិនចូលរដ្ឋសភា តែទីបញ្ចប់ចូលដើម្បីយកតំណែង រឺឯថាសំឡុតមិនខ្លាច គេមិនទាន់នឹងធ្វើអីផង គ្រាន់តែចេញដីកាកោះរត់បាត់អស់៕

Handover Ceremony heavy Equipment for use on the Restoration of the Western Causeway at Angkor Wat from Government of Japan to the Royal Government of Cambodia

សម្តេចតេ ជោ៖ កម្ពុជាគ្មានវិបត្តិនយោបាយ និងកំពុងដំណើរការអភិវឌ្ឍឥតឈប់ឈរ

ថ្លែងក្នុងឱកាសអញ្ជើញជាអធិបតីសម្ពោធដាក់ឲ្យប្រើប្រាស់ជាផ្លូវការ «មណ្ឌលកីឡាហែលទឹក តេជោសែន»នាខេត្តកំពង់ចាម នៅថ្ងៃទី ០២ ខែធ្នូ ឆ្នាំ២០១៥ សម្តេចតេជោ ហ៊ុន សែន នាយករដ្ឋមន្ត្រី បានបញ្ជាក់ថា កម្ពុជាបច្ចុប្បន្នមិនមានវិបត្តិនយោបាយកើតឡើងនោះឡើយ ហើយកំពុងដើរនៅលើផ្លូវអភិវឌ្ឍយ៉ាងលឿនលយក្រោមដំបូលសន្តិភាព និងស្ថេរភាព នយោបាយ ខណៈមានការលើកឡើងមួយចំនួនថា នៅប្រទេសកម្ពុជាកំពុងមានការកើនឡើង នូវកំដៅនយោបាយ រហូតប្រធានគណបក្សប្រឆាំងរត់ទៅប្តឹងបរទេសឲ្យផ្តាច់ជំនួយខ្មែរ។

សម្តេចតេជោបានលើកឡើងថាសមិទ្ធផលជាច្រើន នៃវឌ្ឍនភាពរបស់កម្ពុជា បូករួមទាំងមណ្ឌល កីឡាហែលទឹកតេជោសែន បញ្ជាក់ថាសមិទ្ធផលទាំងនេះ បានកើតចេញពីសន្តិភាព និងស្ថេរភាពនយោបាយនៅកម្ពុជា។សម្តេចតេជោ ហ៊ុន សែន បានបញ្ជាក់យ៉ាងដូច្នេះថា «ខ្ញុំគិតថាយើងទាំងអស់គ្នាពិតជាមានមោទនភាព និងអ្វីដែលយើងបានកសាង។ ថ្ងៃនេះបាន បង្ហាញឲ្យប្រជាជនកម្ពុជា និងពិភពលោកឃើញច្បាស់ថា កម្ពុជាមានសុខសន្តិភាពពេញលេញ មានស្ថេរភាពនយោបាយ ហើយក៏គ្មានការគំរាមកំហែងវាយប្រហារដោយភេរវកម្ម និងការញ៉ាំញី ដោយវិបត្តិនយោបាយណាមួយនោះទេ។ យើងកំពុងធ្វើដំណើរទៅមុខ ហើយកាន់តែធ្វើដំណើរកាន់តែលឿនកាន់តែវែងឆ្ងាយ និងកាន់តែមានប្រសិទ្ធភាពជាងមុន»៕

កិច្ចសម្ភាសន៍លោក ប៊ុន ហុក អ្នកសម្របសម្រួលវេទិការយុវជនអាស៊ី ស្តីពី វេទិការយុវជនអាស៊ីប៉ាស៊ីហ្វឹកលើកទី១ និងប្រាសាទអង្គរបេតិកភណ្ឌពិភពលោក ខេត្តសៀមរាប, ថ្ងៃទី០២ ខែធ្នូ ឆ្នាំ២០១៥

ជប៉ុនផ្តល់ជំនួយដល់កម្ពុជាជាង៩០លានយ៉េន សម្រាប់ជួសជុលផ្លូវចូលខាងលិចប្រាសាទអង្គរវត្ត

យោងតាមសេចក្តីប្រកាសព័ត៌មានរបស់ស្ថានទូតជប៉ុនប្រចាំព្រះរាជាណាចក្រកម្ពុជា ថ្ងៃទី០៣ ខែធ្នូ ឆ្នាំ២០១៥ បានឲ្យដឹងថា រដ្ឋាភិបាលជប៉ុនបានសម្រេចផ្តល់ជំនួយឥតសំណង ដែលមាន ថវិកាសរុបចំនួន ៩៤,៧០០,០០០ យ៉េន (កៅសិបបួនលានប្រាំពីររយពាន់) ជូនដល់រាជរដ្ឋាភិបាលកម្ពុជា ដើម្បីផ្តត់ផ្គង់គ្រឿងបរិក្ខារធុនធ្ងន់ ដែលស័ក្តសមសម្រាប់ការងារជួសជុលផ្លូវចូលខាងលិច នៃប្រាសាទអង្គរវត្ត។

ពិធីប្រគល់ជំនួយត្រូវបានរៀបចំឡើងនៅម៉ោង២:៣០នាទីរសៀល ថ្ងៃទី០៣ ខែធ្នូ ឆ្នាំ២០១៥ នៅសាលសន្និសីទអាជ្ញាធរជាតិអប្សរា ក្រោមអធិបតីភាព ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា និងឯកឧត្តម គូម៉ាម៉ារ៉ូ យូជិ ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុន ប្រចាំព្រះរាជាណាចក្រកម្ពុជា៕

ព្រះរាជសារ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ប្រោសព្រះរាជទានក្នុងឱកាសប្រារព្ធទិវាពិការកម្ពុជាលើកទី១៧ និងទិវាជនពិការអន្តរជាតិលើកទី៣៣

សេចក្តីប្រកាសព័ត៌មានស្តីពី៖ ពិធីប្រគល់ជំនួយឥតសំណងរបស់ជប៉ុន

សម្តេចតេជោ ៖ យើងពិការតែរាងកាយ តែមិនពិការផ្លូវចិត្តទេ

ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នៅថ្ងៃទី ០៣ ខែធ្នូ ឆ្នាំ២០១៥នេះ បានផ្ញើរសារដ៏ក្តុកក្តួលដល់បងប្អូនជនពិការទាំងអស់ ក្នុងឱកាសទិវា ជនពិការកម្ពុជាលើកទី១៧ និងទិវាជនពិការអន្តរជាតិលើកទី៣៣ថា «បងប្អូនជនពិការ ជាទីគោរពស្រឡាញ់ ខ្ញុំបានចេញ សារាចរណែនាំមួយហើយ លើការរៀបចំទិវាជនពិការ ថ្ងៃទី០៣ ខែធ្នូ ២០១៥នេះ តែថ្ងៃនេះខ្ញុំចង់និយាយទៅកាន់បងប្អូន ក្នុងឋានៈជាជនពិការដូចគ្នាថា យើងពិការតែរាងកាយ តែយើងមិនពិការផ្លូវចិត្តទេ»។ នៅក្នុងគណនី Facebook ផ្លូវការរបស់សម្តេចតេជោ Samdech Hun Sen, Cambodian Prime Minister បានបង្ហោះផ្សាយជាសាធារណៈនៅថ្ងៃនេះថា «សូមបងប្អូន ដែលមិនពិការមេត្តា កុំរើសអើងជាមួយពួកយើង រហូតប្រមាថយើងថា អាខ្វាក់ អាកំបុត អាគ អាថ្លង់។ល។

សម្តេចតេជោ បានបន្ថែមថា បទពិសោធន៍ដែលសម្តេច ជាជនពិការម្នាក់អាចដឹកនាំចលនាតស៊ូ រំដោះជាតិបាន រកសន្តិភាព និងការអភិវឌ្ឍបានរហូតកាន់តំណែងកំពូលជាង៣០ឆ្នាំបាន នោះគឺផ្តើមចេញពីការខិតខំតស៊ូដោយខ្លួនឯង និងមានការគាំទ្រពីប្រជាជន។ មិនមាន ជោគជ័យណាមួយ រត់មករកយើងដោយខ្លួនឯងទេ គឺមានតែយើងទេដែលត្រូវរត់ទៅរក ជោគជ័យនោះ។ សម្តេចក៏បានអំពាវនាវទៅកាន់ស្ថាបន័រដ្ឋ និងផ្នែកឯកជនជួយបង្កលក្ខណៈ ឲ្យបងប្អូនជនពិការទទួលបាននូវការបណ្តុះបណ្តាល និងទទួលបាននូវការងារធ្វើសមរម្យ។

សូមស្ថាប័នពាក់ព័ន្ធនានា ជួយរៀបចំកន្លែងសំរាប់ធ្វើដំណើររបស់ជនពិការនៅតាមអាគារ នៃស្ថាបន័រដ្ឋ និងក្រុមហ៊ុនឯកជន ព្រមទាំងតាមទីកន្លែងផ្សេងទៀតដូចជាព្រលានយន្តហោះ កំពង់ផែ។ល។ សូមស្ថានីយទូរទស្សន៍ជួយ រៀបចំឲ្យមានអ្នកប្រើភាសាសញ្ញាដើម្បីជួយ ឲ្យអ្នកគ ថ្លង់អាចទទួលបាននូវព័ត៌មាន។ សម្តេចតេជោ ហ៊ុន សែន បានថ្លែងអំណរគុណ ដល់សប្បុរសជនទាំងអស់ ដែលបានជួយ ដល់ជនពិការ ហើយសម្តេចមិនភ្លេចអរគុណ ចំពោះភរិយាសម្តេច ដែលបានទទួលយកសម្តេចជាជនពិការជាស្វាមីតាំងពីគ្រាក្រ និងពេល វេលាដ៏លំបាកបំផុត៕

តុលាការចេញដីកាក្នុងសំណុំរឿងព្រហ្មទណ្ឌជាបន្តបន្ទាប់ដើម្បីចាត់វិធានការផ្លូវច្បាប់លើ លោកសម រង្ស៊ី ដែលបានប្រព្រឹត្តបទល្មើសនានា

វាមិនមែនជារឿងនយោបាយដូចមតិមួយចំនួនបានលើកឡើងនោះទេ យោងតាមដីការកោះអញ្ជើញរបស់អយ្យការអមសាលាដំបូងរាជធានីភ្នំពេញ ដែលចុះហត្ថលេខាដោយព្រះរាជអាជ្ញារង វង្ស ប៊ុនវិសុទ្ធ ចុះថ្ងៃទី០១ ខែធ្នូ ឆ្នាំ២០១៥ បានបញ្ជាក់ថា ដើម្បីសាកសួរពីដំណើររឿង បរិហាកេរ្តិ៍តាមរយៈបណ្តាញសង្គមហ្វេសប៊ុក កាលពីថ្ងៃទី១៧ ខែវិច្ឆិកា ឆ្នាំ២០១៥ តាមពាក្យបណ្តឹងរបស់លោក គី តិច មេធាវីតំណាង សម្តេចអគ្គមហាពញ្ញាចក្រី ហេង សំរិន តំណាងអយ្យការអមសាលាដំបូងរាជធានីភ្នំពេញ សូមអញ្ជើញឈ្មោះសម រង្ស៊ី ភេទប្រុស អាយុ ៦៥ ឆ្នាំ ជនជាតិខ្មែរ សញ្ជាតិខ្មែរ អាស័យដ្ឋាន ផ្ទះលេខ ៥៧៦ ផ្លូវជាតិលេខ២ ភូមិព្រែកតាគង់២ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដើម្បីធ្វើការសាកសួរ។

សាមីខ្លួនត្រូវចូលមកកាន់អយ្យការអមសាលាដំបូងរាជធានីភ្នំពេញ នៅថ្ងៃទី០៤ ខែមករា ឆ្នាំ២០១៦ វេលាម៉ោង ៨និង៣០នាទីព្រឹក ហើយយោងលើដីកាកោះនេះ គឺសាមីខ្លួនត្រូវចូលខ្លួនឱ្យបានទាន់ពេលវេលា។

ក៏ប៉ុន្តែស្រាប់តែនៅថ្ងៃទី០២ ខែធ្នូ ឆ្នាំ២០១៥ កន្លងទៅនេះ មន្ត្រីជាន់ខ្ពស់គណបក្សសង្គ្រោះជាតិមួយរូប បានហៅការចេញដីកាចាប់ខ្លួនមន្ត្រីគណបក្សប្រឆាំងជាបន្តបន្ទាប់ ថាជារឿងនយោបាយ និងកៀបសង្កត់លើគណបក្សប្រឆាំងទៅវិញ ដែលតាមការពិតលោក សម រង្ស៊ី បានប្រព្រឹត្តនូវទោសកំហុសជាច្រើនដូចជា ការសមគំនិតក្នុងការបង្ហោះឯកសារសាធារណៈក្លែង បទបរិហាកេរ្តិ៍ជាសាធារណៈ និងញុះញង់ឱ្យមានការរើសអើង និងបទញុះញង់ជាច្រើន ករណីផ្សេងទៀត។ ហើយយើងក៏សូមសួរទៅកាន់មន្រ្តីរូបនោះថា តើនៅប្រទេសណាដែលរារាំងមន្រ្តីមានសមត្ថកិច្ច ដែលជានគរបាលយុត្តិធម៌ ជាអ្នកអនុវត្តច្បាប់ មិនឱ្យអនុវត្តតាមសាលដីកា ឬដីកាកោះរបស់តុលាការនោះ?

តាមការពិតពាក្យបណ្តឹងព្រហ្មទណ្ឌចោទទៅលើបុគ្គលមួយចំនួនក្នុងគណបក្សសង្រ្គោះជាតិ មានចំនួនច្រើនជាងនេះទៅទៀត ដែលតុលាការមិនទាន់បានអនុវត្ត ព្រោះជានីតិវិធីផ្លូវច្បាប់របស់តុលាការ ដែលវាជាផ្នែកមួយ នៃការបង្ហាញគោលជំហរឥតងាករេ ក្នុងការពង្រឹងនីតិរដ្ឋ ហើយក៏បញ្ជាក់ថាប្រទេសកម្ពុជាជាប្រទេសនីតិរដ្ឋពិតប្រាកដ ហើយតុលាការជាស្ថាប័នឯករាជ្យ មានសិទ្ធិទទួលពាក្យបណ្តឹង និង ធ្វើការចោទប្រកាន់ចំពោះជនជាប់ចោទគ្រប់រូបដោយមិនប្រកាន់ថា បុគ្គលនោះស្ថិតនៅក្នុង គណបក្សណានោះឡើយ៕

វេទិការយុវជនអាស៊ីប៉ាស៊ីហ្វិកលើកទី១អំពាវនាវសុំការគាំទ្រគំនិតផ្តួចផ្តើមរបស់យុវជនក្នុងការចូលរួមការពារនិងអភិរក្សបេតិកភណ្ឌពិភពលោក

វេទិការយុវជនអាស៊ីប៉ាស៊ីហ្វិកលើកទី១ មកពី២១បានចេញសេចក្តីថ្លែងការណ៍មួយដោយអំពាវនាវដល់រដ្ឋភាគីនៃអនុសញ្ញាឆ្នាំ១៩៧២នៃបេតិកភណ្ឌពិភពលោក និងដៃគូពាក់ពន្ធ័គាំទ្រគំនិតផ្តួចផ្តើមរបស់យុវជនក្នុងការចូលរួមការពារនិងអភិរក្សបេតិកភណ្ឌពិភពលោក។ សេចក្តីថ្លែងការណ៍ដែលធ្វើនៅថ្ងៃ២ធ្នូឆ្នាំ២០១៥ក្នុងកិច្ចប្រជុំគណៈកម្មាធិកាសម្របសម្រួលបច្ចេកទេសអង្គរ (ICC ANGKOR) លើកទី២៥នៅមជ្ឈមណ្ឌលវប្បធមិនៃអាជ្ញាធរជាតិអប្សារាវេទិការយុវជន អាស៊ីប៉ាស៊ីហ្វិកលើកទី១បានលើកឡើងថា៖ក្នុងនាមជាអ្នកដឹកនាំជំនាន់ក្រោយចំណាប់អារម្មណ៍របស់យុវជនគឺការចូលរួមការពារ បេតិកភណ្ឌដែលជាកេរ្តិ៍ដំណែលរួមជាទីគោរពរបស់ដូនតាដែលមិនត្រឹមតែនៅក្នុងតំបន់អាស៊ីប៉ាស៊ីហ្វិកតែនៅក្នុងពិភពលោកទាំងមូលផងដែរ។

វេទិការយុវជនជនត្រូវបានរៀបចំឡើងជារៀងរាល់ឆ្នាំ តាមបណ្ដាប្រទេសនានានៅលើពិភពលោកមុនកិច្ចប្រជុំការងារបេតិកភណ្ឌ ដើម្បី ស្វែងយល់អំពីការងារការគ្រប់គ្រងការអភិរក្ស និងការអភិវឌ្ឍបេតិកភណ្ឌ ដើម្បីឲ្យពួកគាត់ស្វែងយល់និងចូលរួមថែរក្សាការពារ។

សម្រាប់ព្រះរាជាណាចក្រកម្ពុជា នេះជាលើកទី១ហើយ ដែលបានរៀបចំនូវវេទិការ យុវជនមកពីតំបន់អាស៊ីប៉ាស៊ីហ្វិក ដែលមានយុវជនមកពីបណ្តាប្រទេស ចំនួន២១ រួមមានជាអាទិ៍ ចិន ជប៉ុន ប៉ាគីស្ថានថៃ ឡាវ កូរ៉េ ម៉ាឡេស៊ី និងយុវជនកម្ពុជាយើងផងដែរចូលរួម។ លោកប៊ុន ហុក អ្នកសម្របសម្រួលវេទិការយុវជនអាស៊ីប៉ាស៊ីហ្វិកបានឲ្យដឹងថា៖ ការរៀបចំអោយមានវេទិការយុវជនអាស៊ីនេះឡើង ក្នុងគោលបំណងសំខាន់ជួយលើកទឹកចិត្តដល់យុវជនដែលជាអ្នកបន្តវេនដឹកនាំ ឲ្យយល់ពីតម្លៃជាសកលរបស់បេតិកភណ្ឌជាតិ និងបេតិកភណ្ឌពិភពលោក ។

លោកប៊ុនហុកបានបន្តទៀតថាសម្រាប់ការរៀបចំវេទិការនៅក្នុងប្រទេសកម្ពុជានេះ អាជ្ញាធរជាតិអប្សរាបានរៀបចំឲ្យយុវជនទាំង២១ប្រទេស ចុះទៅផ្ទាល់តាមបណ្តាទីតាំងការដ្ឋានដែលអាជ្ញាធរកំពុងធ្វើការជួសជុលនិងថែទាំ នៅក្នុងតំបន់បេតិកភណ្ឌវប្បធម៌ប្រវត្តិសាស្ត្រទាំងមូល ដើម្បីឲ្យក្រុមយុវជនទាំងនោះមានការយល់ដឹងកាន់តែច្បាស់និងរួមគ្នាជួយថែរក្សាបេតិកភណ្ឌពិភពលោក និងបេតិកភណ្ឌរបស់ជាតិ។។វេទិការយុវជនអាស៊ីប៉ាស៊ីហ្វិកលើកទី១បានប្រារព្ធធ្វើនៅមជ្ឈមណ្ឌលវប្បធមិនៃអាជ្ញាធរជាតិអប្សារាចាប់ពីថ្ងៃទី២៥វិច្ឆិកាដល់ថ្ងៃទី២ធ្នូឆ្នាំ២០១៥៕

Pages