សម្តេចតេជោ ហ៊ុន សែន ផ្ញើសារជូនជនរួមជាតិ អំពីជោគជ័យ និងមោទនភាពរបស់កម្ពុជា ក្នុងការដាក់ «គុនល្បុក្កតោ» ក្នុងបញ្ជីបេតិកភណ្ឌពិភពលោក

(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា នៅថ្ងៃទី៣០ ខែវិច្ឆិកា ឆ្នាំ២០២២នេះ បានផ្ញើសារជូនជនរួមជាតិ អំពីជោគជ័យ និងមោទនភាពរបស់កម្ពុជា ក្នុងការដាក់ «គុនល្បុក្កតោ» ក្នុងបញ្ជីបេតិកភណ្ឌពិភពលោក។

តាមរយៈសារលិខិតនេះ សម្តេចតេជោ ហ៊ុន សែន បញ្ជាក់ថា កាលពីថ្ងៃអង្គារ ៦កើត ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៩ ខែវិច្ឆិកា ឆ្នាំ២០២២ វេលាម៉ោង១៦:៣១នាទី នៅទីក្រុងរ៉ាបាត ព្រះរាជាណាចក្រម៉ារ៉ុក ត្រូវនឹងម៉ោង ២២៖៣១ នាទី ម៉ោងនៅកម្ពុជា បានក្លាយជាទិវាប្រវត្តិសាស្ត្រដ៏សំខាន់មួយរបស់ជាតិកម្ពុជាទាំងមូល ដោយគណៈកម្មាការអន្តររដ្ឋាភិបាលដើម្បី ការការពារបេតិកភណ្ឌវប្បធម៌អរូបីរបស់អង្គការយូណេស្កូ បានអនុម័តយល់ព្រមចុះ «គុនល្បុក្កតោ» ក្នុងបញ្ជីតំណាងបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ ក្នុងសេចក្ដីសម្រេច 17.COM 7.b.1។

សម្តេចបានបញ្ជាក់ថា៖ «នេះគឺជាមោទកភាពថ្មីមួយបន្ថែមទៀតនាចុងអាណត្តិទី៦ នៃរាជរដ្ឋាភិបាលសម្រាប់ប្រជាជនយើងទាំងក្នុង និងក្រៅប្រទេស ក៏ដូចជាសម្រាប់ប្រជាពលរដ្ឋនានានៅក្នុងតំបន់ និងពិភពលោកផងដែរ។ ការចុះ បញ្ជីនេះ បានផ្តល់ទាំងតម្លៃ ទន្ទឹមគ្នានឹងកាតព្វកិច្ចចំពោះកម្ពុជា និងសហគមន៍អន្តរជាតិក្នុងកិច្ចសហប្រតិបត្តិការ រួមគ្នាក្នុងការថែរក្សា ការពារក្បាច់គុនបុរាណខ្មែរដ៏កម្រមិនអាចកាត់ថ្លៃបាន ទុកជាកេរ្តិ៍មរតកសម្រាប់មនុស្សជាតិ ជំនាន់ក្រោយតរៀងទៅ»។

សម្តេចតេជោ សូមព្រះរាជានុញ្ញាតសម្តែងនូវអំណរព្រះគុណដ៏ជ្រាលជ វិសេសវិសាលថ្វាយចំពោះព្រះករុណាព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី ដែលព្រះអង្គទ្រង់តែងប្រោសប្រទាននូវការគាំទ្រជានិច្ចកាលចំពោះកិច្ចខិតខំប្រឹងប្រែងរបស់រាជរដ្ឋាភិបាលក្នុង វិស័យបេតិកភណ្ឌវប្បធម៌ជាតិ ជាពិសេសបេតិកភណ្ឌវប្បធម៌អរូបីដែលងាយប្រឈមនឹងការបាត់បង់។

សម្តេចសូមឆ្លៀតក្នុងឱកាសនេះ សម្តែងនូវការកោតសរសើរ ចំពោះការយកចិត្តទុកដាក់ខិតខំប្រឹងប្រែង គាំទ្រនិងសហការគ្នាយ៉ាងជិតស្និទ្ធរវាងក្រសួងវប្បធម៌ និងវិចិត្រសិល្បៈ ដែលជាសេនាធិការរបស់រាជរដ្ឋាភិបាល រួមជាមួយសហព័ន្ធកីឡាគុនល្បុក្កតោកម្ពុជា គណ:កម្មការអូឡាំពិកកម្ពុជា ព្រមទាំងស្ថាប័នពាក់ព័ន្ធនានា អ្នកជំនាញជាតិ-អន្តរជាតិ ជាពិសេសសហគមន៍សាលាតុន គ្រូនិងសិស្សគុនល្បុក្កតោ ក៏ដូចជាអាជ្ញាធរមូលដ្ឋាន នៅតាមបណ្តារាជធានី-ខេត្តនានារហូតសម្រេចបានជោគជ័យក្នុងការចុះ « គុនល្បុក្កតោ » ក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ។

ដើម្បីអបអរសាទរព្រឹត្តិការណ៍ជាប្រវត្តិសាស្ត្រនេះ សម្តេចសូមអំពាវនាវចំពោះស្ថានីយ៍វិទ្យុ ទូរទស្សន៍ និង បណ្ដាញព័ត៌មានទាំងអស់មេត្តាចូលរួមសហការផ្សព្វផ្សាយព្រឹត្តិការណ៍ជាមោទកភាពជាតិដ៏មានសារៈសំខាន់ នេះឲ្យបានទូលំទូលាយបំផុត៕

ផ្សាយបន្តផ្ទាល់៖ ពិធីបិទកីឡាជាតិលើកទី៣ និងកីឡាជនពិការលើកទី១ ឆ្នាំ២០២២ នៅពហុកីឡដ្ឋានជាតិមរតកតេជោ

នៅល្ងាច ថ្ងៃពុធ ៧កើត ខែមិគសិរ ឆ្នាំខាល ចត្វាស័ក ព.ស. ២៥៦៦ ត្រូវនឹង ថ្ងៃទី៣០ ខែវិច្ឆិកា ឆ្នាំ២០២២ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញជាអធិបតីភាពដ៏ខ្ពង់ខ្ពស់ក្នុងពិធីបិទ ការប្រកួតកីឡាជាតិលើកទី៣ និងកីឡាជនពិការជាតិ លើកទី១ នៅពហុកីឡដ្ឋាន ជាតិមរតកតេជោ។

សូមជម្រាបថា ពិធីបើក ព្រឹត្តិការណ៍កីឡាជាតិលើកទី៣ និង កីឡាជនពិការជាតិលើកទី១ បានធ្វើឡើងកាលពីល្ងាច ថ្ងៃទី២១ ខែវិច្ឆិកា ឆ្នាំ២០២២ ក្រោមអធិបតីភាពសម្តេចតេជោនាយករដ្ឋមន្ត្រី។

ការ ប្រកួត កីឡា ជាតិលើក ទី ៣ មាន កីឡា៣៨ ប្រភេទ និង កីឡា ប៉ា រ៉ា ហ្គេ ម ឬកីឡាជនពិការជាតិ មាន៧ប្រភេទ ដោយមានកីឡាករកីឡាការិនីចូលរួម ប្រកួតប្រជែង មក ពីរាជធានី ខេត្ត និង ក្រសួង ចំនួន២៨។ ការ ប្រកួត ចាប់ផ្តើម ពី ថ្ងៃ ទី ១៩-៣០ ខែវិច្ឆិកា ឆ្នាំ ២០២២ ។ ពិធីបិទព្រឹត្តិការណ៍កីឡាជាតិ និងកីឡាជនពិការនាល្ងាចនេះ នឹងមានការអញ្ជើញចូលរួមពីមហាជនយ៉ាងច្រើនកុះករ ព្រមទាំងមានកម្មវិធីសំខាន់ៗ និងទាក់ទាញជាច្រើនទៀតផងដែរ។

 

រដ្ឋមន្ត្រីការងារ៖ កម្ពុជាទទួលបានការទុកចិត្តពីវិនិយោគិន តាមរយៈការខិតខំរបស់សហព័ន្ធនិយោជក និងសមាគមពាណិជ្ជកម្ម

 លោក អ៉ិត សំហេង រដ្ឋមន្ត្រីក្រសួងការងារ និងបណ្ដុះបណ្តាលវិជ្ជាជីវៈ បានវាយតម្លៃខ្ពស់ចំពោះសហព័ន្ធនិយោជក និងសមាគមពាណិជ្ជកម្មកម្ពុជា CAMFEBA នាពេលកន្លងទៅ ដែលរក្សាបាននូវភាពរីកចម្រើនរឹងមាំ ទទួលបានការទុកចិត្តពីវិនិយោគិន និងពីសមាជិករបស់ខ្លួនគួរជាទីមោទនៈ។

លោកវាយតម្លៃលោកឱកាសចូលរួមក្នុងពិធីលៀងសាយភោជនអបអរសាទរមហាសន្និបាតប្រចាំឆ្នាំ២០២២ និងស្វាគមន៍សមាជិកក្រុមប្រឹក្សាភិបាលថ្មី សម្រាប់អាណត្តិ ២០២៣-២០២៤ របស់សហព័ន្ធនិយោជក និងសមាគមពាណិជ្ជកម្មកម្ពុជា នៅសណ្ឋាគារសុខាភ្នំពេញ នាល្ងាចថ្ងៃទី២៩ ខែវិច្ឆិកា ឆ្នាំ២០២២។

លោករដ្ឋមន្ត្រីបានសម្ដែងនូវការអបអរសាទរចំពោះលោកឧកញ៉ា សុខ ពិសិដ្ឋ ដែលត្រូវបានបោះឆ្នោតជ្រើសរើសឱ្យធ្វើជាប្រធានថ្មីរបស់សហព័ន្ធនិយោជក និងសមាគមពាណិជ្ជកម្មកម្ពុជា សម្រាប់អាណត្តិ ២០២៣-២០២៤។ លោកឧកញ៉ា សុខ ពិសិដ្ឋ ក៏ជាវិនិយោគិនជាទីទុកចិត្តម្នាក់ ដែលមានកេរិ៍ឈ្មោះល្អ បទពិសោធន៍រកស៊ី និងការទទួលខុសត្រូវ និងក៏ជាដៃគូដែលបានចូលរួមយ៉ាងសកម្មក្នុងការលើកកម្ពស់វិស័យការងារ និងបណ្តុះបណ្តាលវិជ្ជាជីវៈនៅកម្ពុជា។

លោករដ្ឋមន្ត្រីបានលើកឡើងថា ការសម្រេចបាននូវលទ្ធផលនានារហូតមកដល់ថ្ងៃនេះ គឺបានបង្ហាញយ៉ាងច្បាស់ពីការខិតខំប្រឹងប្រែង និងការចូលរួមចំណែកប្រកបដោយស្មារតីទទួលខុសត្រូវរបស់ CAMFEBA ក្នុងនាមជាតំណាងភាគីនិយោជកក្នុងការចូលរួមចំណែកលើកកម្ពស់ធ្វើឱ្យប្រសើរឡើងនូវលក្ខខណ្ឌការងារ, សុខុដុមរមនាក្នុងទំនាក់ទំនងវិជ្ជាជីវៈ, របបសន្តិសុខសង្គម, និងការអប់រំបណ្តុះបណ្តាលបច្ចេកទេសនិងវិជ្ជាជីវៈ ក្នុងយន្តការត្រីភាគីនានា ដូចជា គណៈកម្មការប្រឹក្សាការងារ, គណៈកម្មការជាតិសុខភាពនិងសុវត្ថិភាពការងារ, ក្រុមប្រឹក្សាជាតិប្រាក់ឈ្នួលអប្បបរមា, ក្រុមប្រឹក្សាភិបាលនៃបេឡាជាតិសន្តិសុខសង្គម និងគណៈកម្មការជាតិបណ្តុះបណ្តាល។

ទន្ទឹមនឹងនេះ CAMFEBA ក៏បានដើរតួនាទីយ៉ាងសំខាន់ក្នុងនាមសហប្រធានក្រុមការងារផ្នែកទំនាក់ទំនងវិជ្ជាជីវៈ (ក្រុមការងារទី៨) ក្នុងភាពជាដៃគូរវាងរដ្ឋ-ឯកជន ដែលបានផ្តល់កិច្ចសហប្រតិបត្តិយ៉ាងល្អជាមួយក្រសួងការងារនិងបណ្តុះបណ្តាលវិជ្ជាជីវៈក្នុងការធ្វើឱ្យប្រសើរឡើងនូវសុខុដុមរមនាក្នុងទំនាក់ទំនងវិជ្ជាជីវៈ ដោយបានស្វះស្វែងរកនូវដំណោះស្រាយនានាចំពោះបញ្ហាប្រឈមនានាជូនវិនិយោគិន និងកម្មកនិយោជិតប្រកបដោយផ្លែផ្កានាពេលកន្លងមក។

លោក អ៉ិត សំហេង បានស្នើឱ្យ CAMFEBA និងភាគីពាក់ព័ន្ធបន្តផ្តល់កិច្ចសហការដ៏ល្អជាមួយក្រសួងការងារ និងបណ្តុះបណ្តាលវិជ្ជាជីវៈ និងក្រសួង/ស្ថាប័នពាក់ព័ន្ធ ទាំងក្នុងក្របខណ្ឌទ្វេភាគី ត្រីភាគី ជាពិសេសអនុវត្តឱ្យបានត្រឹមត្រូវតាមច្បាប់ និងលិខិតបទដ្ឋានគតិយុត្តពាក់ព័ន្ធនឹងវិស័យការងារ និងបណ្តុះបណ្តាលវិជ្ជាជីវៈ។

ជាមួយគ្នានោះដែរ លោកឧកញ៉ា សុខ ពិសិដ្ឋ បានប្តេជ្ញាចិត្តបន្តដឹងនាំកសាង និងអនុវត្តគោលនយោបាយការងារ ព្រមទាំងលើកស្ទួយភាពជាតំណាងបំផុតរបស់ CAMFEBA ក្នុងការចូលរួមជាមួយរាជរដ្ឋាភិបាលជាពិសេស ក្រសួងការងារនិងបណ្ដុះបណ្តាលវិជ្ជាជីវៈ និងដៃគូរនានាៗក្នុងការជំរុញលើកកម្ពស់ និងគាំទ្រសុខមាលភាពនៃវិស័យទំនាក់ទំនងវិជ្ជាជីវៈ ដែលនឹងរួមចំណែកយ៉ាងសំខាន់ក្នុងការជំរុញផលិតភាពការងារ ជំរុញនូវបរិយាកាសវិនិយោគ និងធុរកិច្ចនៅកម្ពុជា៕

វិភាគអន្តរជាតិ៖ លោក ពូទីន នឹងទម្លាក់គ្រាប់បែក រហូតដល់អ៊ុយក្រែនទន់ជង្គង់

(វ៉ាស៊ីនតោន)៖ ខឺសុន (Kherson) ដែលជាទីក្រុងយុទ្ធសាស្ត្រដ៏សំខាន់ បានត្រឡប់មកនៅក្នុងដៃកងទ័ពអ៊ុយក្រែនវិញហើយ បើទោះជាកំពុងស្ថិតនៅក្រោមការគំរាម ទម្លាក់គ្រាប់បែកពីរុស្ស៉ី និងការវាយប្រហារលើបណ្ដាញផ្គត់ផ្គង់អគ្គិសនីក៏ដោយ។ ក៏ប៉ុន្តែ ខណៈកងទ័ពទាំងសងខាង កំពុងត្រៀមខ្លួនសម្រាប់ «សង្រ្គាមរដូវរងា» សមរភូមិ ចំនួន២ ដាច់ដោយឡែកពីគ្នា កំពុងលេចចេញជារូបរាងឡើង នោះគឺ «សង្រ្គាមផ្លូវគោក និងសង្រ្គាមផ្លូវអាកាស»។ ដូច្នេះថាតើលោកខាងលិចអាចធ្វើអ្វីខ្លះបន្ថែមទៀត ដើម្បីជួយអ៊ុយក្រែន ដោះស្រាយបញ្ហាប្រឈមបន្ទាន់ និងរក្សាជ័យជម្នះរយៈពេលវែង?

ខណៈព្រិលកំពុងធ្លាក់ដែលនឹងធ្វើឱ្យស្ថានភាពផ្ទៃដីប្រែទៅជាឧបសគ្គពន្យឺតដល់ការធ្វើប្រតិបត្តិការយោធា ទាំងរុស្ស៉ី និងអ៊ុយក្រែនសុទ្ធតែត្រូវការពេលសម្រាក ដើម្បី ពង្រឹងកម្លាំងទ័ព និងបំពេញបរិក្ខារយោធាឡើងវិញ។ នេះមានន័យថា សង្រ្គាម ឬប្រតិបត្តិការយោធាពេញទំហឹងទំនងជានឹងអាចធ្វើឡើងក្នុងពេលដ៏ខ្លីឡើយ ដោយនឹងត្រូវ រង់ចាំរហូតដល់ចុងរដូវងា ជាពេលផ្ទៃដីប្រែជា «ទឹកកក» ដែលអំណោយផលល្អដល់ «ភាគីណា» ដែលមានអាវុធធន់ធ្ងរ។ បច្ចុប្បន្ន អ៊ុយក្រែនកំពុងមានប្រៀបជាងរុស្ស៉ី នៅលើសមរភូមិសង្រ្គាមជើងគោក តែនៅក្រោយការបោះបង់ចោលទីក្រុងខឺសុន ទីតាំងការពាររបស់រុស្ស៉ីត្រូវបានបង្រួមឱ្យតូច និងពិបាកសម្រាប់អ៊ុយក្រែន ក្នុងការវាយលុក។

នៅក្នុងទ្រឹស្ដីយោធា សង្រ្គាមជើងគោក គឺអំណោយដល់ភាគីម្ខាងដែលកំពុងការពារ ជាជាងភាគីម្ខាងទៀតដែលកំពុងវាយលុក។ ពោលគឺ ដើម្បីអាចវាយលុកលើកងទ័ពដែល បានជីក «លេណដ្ឋាន» ការពារដ៏រឹងមាំមួយ ភាគីវាយលុកត្រូវការកងទ័ពច្រើនជាងភាគីការពារ ឬអាចនិយាយបានថា កងទ័ព ៣នាក់ ត្រូវប្រយុទ្ធទល់នឹងកងទ័ពម្នាក់។ យ៉ាងណាក៏ដោយ តាមរយៈការដណ្ដើមបានទីក្រុងខឺសុនមកវិញ ក្រុមអ្នកជំនាញយោធាលោកខាងលិចជឿថា កងទ័ពអ៊ុយក្រែននៅតែអាចរក្សាឧត្ដមភាពរបស់ខ្លួនខាង សង្រ្គាមជើងគោក។ តែចុះសង្រ្គាមតាមផ្លូវអាកាសវិញ? នៅក្នុងសង្រ្គាមផ្លូវអាកាសសព្វថ្ងៃ រុស្ស៉ីគឺកំពុងមានប្រៀបជាងអ៊ុយក្រែន នោះគឺដោយសារតែរុស្ស៉ីមាន កងកម្លាំងជើងអាកាសដ៏ធំ ហើយបានស្រង់បទពិសោធន៍ជាច្រើនពីសង្រ្គាមនៅស៊ីរី។

ក្នុងសង្រ្គាមស៊ីរី កងទ័ពអាកាសរុស្ស៉ីបានទម្លាក់គ្រាប់បែកលើទីក្រុងជាច្រើនរបស់ស៊ីរី ជាពិសេសគឺទីក្រុងអាឡិបប៉ូ (Aleppo) ដែលបានធ្វើឱ្យអគារ និងផ្ទះខ្ទេចខ្ទីជាច្រើន សឹងតែក្លាយទៅជាផេះ ក្នុងចេតនាកាត់ផ្ដាច់ការគាំទ្រនានាសម្រាប់ក្រុមឧទ្ទាមស៊ីរី ដែលប្រយុទ្ធប្រឆាំងនឹងកងកម្លាំងលោកប្រធានាធិបតី បាស្ហា អាល់អាសាដ ជាសម្ព័ន្ធមិត្ត របស់លោក ពូទីន។ យុទ្ធសាស្ត្របំផ្លិចបំផ្លាញនេះឯង កំពុងត្រូវបានរុស្ស៉ីយកមកអនុវត្តលើអ៊ុយក្រែន ក្រោមការបញ្ជាពីឧត្ដមសេនីយ៍ លោក សឺហ្គៃ ស៊ូរ៉ូវីគីន (Sergei Surovikin) ដែលជាមេបញ្ជាការរុស្ស៉ីថ្មីដឹកនាំសង្រ្គាមនៅអ៊ុយក្រែន និងធ្លាប់ជាអ្នកដឹកនាំយុទ្ធនាការទម្លាក់គ្រាប់បែកនៅស៊ីរី។ ប្រតិបត្តិការទម្លាក់គ្រាប់បែករបស់រុស្ស៉ីលើ បណ្ដាញផ្គត់ផ្គង់អគ្គិសនី និងប្រព័ន្ធចែកចាយទឹកស្អាតរបស់អ៊ុយក្រែន គឺមានគោលដៅបំបាក់ស្មារតីតស៊ូប្រយុទ្ធរបស់ប្រជាជនអ៊ុយក្រែន តាមរយៈការបង្កកពួកគេឱ្យ ទន់ជង្គង់។

នៅក្នុងសង្រ្គាមជាង ៩ខែមកនេះ មីស៊ីលស៊េរីទំនើបរបស់រុស្ស៉ីបានធ្លាក់ចុះយ៉ាងខ្លាំងចេញពីឃ្លាំងស្ដុក រហូតដល់បង្ខំឱ្យទីក្រុងមូស្គូ ងាកទៅទិញអាវុធពីសម្ព័ន្ធមិត្តមួយចំនួន របស់ខ្លួនដូចជាអ៉ីរ៉ង់។ ប៉ុន្តែ លោក ពូទីន នៅមានគ្រាប់បែក និងមីស៊ីល សេសសល់ពីសម័យសង្រ្គាមត្រជាក់ច្រើនសន្ធឹកសន្ធាប់ ដែលអាចឱ្យរុស្ស៉ីបន្តទម្លាក់គ្រាប់បែកលើអ៊ុយក្រែន។ លោកប្រធានាធិបតី ហ្សេលេនស្គី ធ្លាប់បានស្នើម្ដងហើយម្ដងទៀតឱ្យសហរដ្ឋអាមេរិក និង NATO បង្កើត «​តំបន់គ្មានការហោះហើរ» នៅក្នុងប្រទេសអ៊ុយក្រែន ព្រមទាំង ស្នើសុំប្រព័ន្ធការពារដែនអាកាស Iron Dome ផលិតរួមគ្នាដោយអាមេរិក និងអ៉ីស្រាអែល, ប្រព័ន្ធមីស៊ីលអាមេរិក Patriot យន្ដហោះចម្បាំង និងរថក្រោះ។

មកទល់នឹងពេលនេះ លោកខាងលិច ក្នុងនោះរួមមានទាំងសហរដ្ឋអាមេរិក នៅតែស្ទាក់ស្ទើរក្នុងការបញ្ជូនអាវុធទាំងនេះឱ្យអ៊ុយក្រែន ដោយសារតែខ្លាចធ្វើឱ្យសង្រ្គាម សព្វថ្ងៃ រាលដាលកាន់តែធំ ផ្ទុះទៅជាសង្រ្គាមនុយក្លេអ៊ែរ ឬសង្រ្គាមលោកជាមួយរុស្ស៉ី។ តែបើគ្មានអាវុធទាំងនេះទេ សង្រ្គាមជើងអាកាស នៅតែផ្អៀងទៅខាងលោក ពូទីន ហើយលោកនឹងបន្តទម្លាក់គ្រាប់បែកឥតឈប់ឈររហូតដល់លោកខាងលិចព្រមធ្វើសកម្មភាព និងដូចដែលលោក ហ្សេលេនស្គី បានព្រមានថាលោក ពូទីននឹងបន្តទម្លាក់ គ្រាប់បែកបំផ្លិចបំផ្លាញអ៊ុយក្រែន រហូតទាល់តែលោកអស់មីស៊ីល និងគ្រាប់បែកពីស្ដុក៕ Fresh News

ជូនដំណឹងម្តងទៀត! រដ្ឋបាលរាជធានីភ្នំពេញ នឹងអុជកាំជ្រួចជាច្រើនគ្រាប់ ដើម្បីអបអរសាទរពិធីបិទការប្រកួតកីឡាជាតិលើកទី៣ នៅពហុកីឡដ្ឋានជាតិមរតកតេជោ

  រដ្ឋបាលរាជធានីភ្នំពេញ នឹងអុជកាំជ្រួចជាច្រើនគ្រាប់ ដើម្បីអបអរសាទរពិធីបិទការប្រកួតកីឡាជាតិ លើកទី៣ នៅពហុកីឡដ្ឋានជាតិមរតកតេជោ នាថ្ងៃទី៣០ ខែវិច្ឆិកា ឆ្នាំ២០២២ ស្ថិតនៅភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រីកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។

ក្នុងសេចក្ដីជូនដំណឹងដែលបណ្ដាញព័ត៌មាន  ទទួលបានបញ្ជាក់ថា ការអុជកាំជ្រួចនេះ នឹងធ្វើឡើងចាប់ពីម៉ោង០៧យប់ ថ្ងៃទី៣០ ខែវិច្ឆិកា ឆ្នាំ២០២២តទៅ ដោយមានការសហការជាមួយក្រសួងអប់រំ យុវជន និងកីឡា និងគណៈកម្មាធិការជាតិ អូឡាំពិកកម្ពុជា គណៈកម្មាធិការជាតិប៉ារ៉ាឡាំពិកកម្ពុជា សហព័ន្ធកីឡាជាតិ៕

ព្រះមហាក្សត្រចេញព្រះរាជក្រឹត្យតែងតាំងលោក គឹម វាសនា អនុរដ្ឋលេខាធិការក្រសួងអភិវឌ្ឍន៍ជនបទ

 ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានចេញព្រះរាជក្រឹត្យត្រាស់បង្គាប់តែងតាំង លោក គឹម វាសនា ជាអនុរដ្ឋលេខាធិការក្រសួងអភិវឌ្ឍន៍ជនបទ។ 

រដ្ឋសភា ចេញសេចក្តីប្រកាសព័ត៌មានពីលទ្ធផលសម័យប្រជុំរដ្ឋសភា លើកទី៨ នីតិកាលទី៦

 រដ្ឋសភា បានចេញសេចក្តីប្រកាសព័ត៌មាន ស្តីពីលទ្ធផលសម័យប្រជុំរដ្ឋសភា លើកទី៨ នីតិកាលទី៦។ នេះបើតាមសេចក្តីប្រកាសព័ត៌មាន ដែលបណ្តាញព័ត៌មាន Fresh News ទទួលបាននៅថ្ងៃទី២៩ ខែវិច្ឆិកា ឆ្នាំ២០២២នេះ។

កិច្ចប្រជុំនេះដឹកនាំដោយលោកកិត្តិសេដ្ឋាបណ្ឌិត ជាម យៀប ប្រធានរដ្ឋសភាស្តីទី ដោយមានវត្តមានសមាជិក សមាជិការដ្ឋសភា ពេលផ្តើមសម័យប្រជុំ ចំនួន ៩៨រូប៕

ខាងក្រោមនេះជាសេចក្តីប្រកាសព័ត៌មានរបស់រដ្ឋសភា៖

លោក ខាត់​ សុធី ប្រកាសលាលែងពីគណបក្សប្រជាធិបតេយ្យមូលដ្ឋាន ហើយគោរពស្នើសុំសម្តេចតេជោ ហ៊ុន សែន ចូលរួមរស់ជាមួយគណបក្សប្រជាជនកម្ពុជា

 លោក ខាត់ សុធី ប្រធានប្រតិបត្តិគណបក្សប្រជាធិបតេយ្យមូលដ្ឋានរាជធានីភ្នំពេញ និងជាសមាជិកគណៈកម្មាធិការនាយក នៃគណបក្សប្រជាធិបតេយ្យមូលដ្ឋាន បានសម្រេចលាលែងពីគណបក្សនេះ ដើម្បីចូលរួមជីវភាពនយោបាយជាមួយគណបក្សប្រជាជនកម្ពុជា ដែលមានសម្តេចតេជោ​ ហ៊ុន សែន ជាប្រធានគណបក្ស។

ក្នុងលិខិតសំណើទៅកាន់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា នៅថ្ងៃទី២៩ ខែវិច្ឆិកា ឆ្នាំ២០២នេះ លោក ខាត់ សុធី បានរៀបរាប់ថា លោកបានប្រឡូកក្នុងនយោបាយជាមួយគណបក្សប្រជាធិបតេយ្យមូលដ្ឋាន តាំងពីឆ្នាំ២០១៥មក ជាមួយក្រុមបញ្ញវន្តខ្មែរ ក្នុងចេតនាកសាងប្រជាធិបតេយ្យឱ្យកាន់តែរស់រវើក និងមានឱកាសចូលរួមជាមួយ លោកបណ្ឌិត យ៉ង សាំងកុមារ ដែលជាបញ្ញវន្តខ្មែរមួយរូប មានជំនាញច្បាស់លាស់ លើវិស័យសេដ្ឋកិច្ចជនបទ និងកសិកម្ម ដោយរំពឹងថានឹងបានរួមចំណែកកសាងសង្គមជាតិ ដោយលើកស្ទួយជីវភាពកសិករខ្មែរដែលមានចំនួនដ៏ច្រើនលើសលប់ ឲ្យមានជីវភាព កាន់តែប្រសើរឡើង។ ប៉ុន្តែ មកដល់ពេលនេះ ក្រោមការដឹកនាំដ៏ឈ្លាសវៃរបស់សម្ដេចតេជោ លទ្ធិប្រជាធិបតេយ្យកំពុងតែរស់រវើក ប្រជាពលរដ្ឋខ្មែររស់នៅក្រោមដំបូលសន្តិភាពដ៏ត្រជាក់ ក៏ញ៉ាំងឱ្យពលរដ្ឋគ្រប់រូប ផ្ដល់ការគាំទ្រដល់គណបក្សប្រជាជនកម្ពុជា បន្តដឹកនាំនាវាកម្ពុជា ជានិរន្តរ៍តទៅមុខទៀតដោយភាពកក់ក្ដៅជាទីបំផុត។

លោកបានបន្តថា «ម្យ៉ាងវិញទៀត ខ្ញុំបាទ បានកត់សម្គាល់ឃើញកាន់តែច្បាស់ពីអត្តចរិតនៃក្រុមអ្នកប្រឆាំងដែលអះអាងថា ជាអ្នកប្រជាធិបតេយ្យ នូវ ភាពគ្មានសណ្តាប់ធ្នាប់ គ្មានវិន័យ អំនួត តួឯក ចេះតែដាក់បន្ទុក ប្រឆាំងជាន់ពន្លិច កេងចំណេញទំនុកចិត្តរបស់ប្រជាពលរដ្ឋ ....។ តាមរយៈលទ្ធផលបោះឆ្នោតឃុំ សង្កាត់ ២០២២ កន្លងទៅនេះ ខ្ញុំយល់ថា ពលរដ្ឋលែងត្រូវការបក្សប្រឆាំងរបៀបដូចសព្វថ្ងៃនេះទៀត ហើយ។ ដូច្នេះ មានតែការចូលរួម ជាមួយគណបក្សប្រជាជនកម្ពុជា តែប៉ុណ្ណោះ ទើបមានឱកាសបានបម្រើជាតិមាតុភូមិឱ្យកាន់តែរីក ចម្រើនថែមទៀត»។

លោកបានបន្តថា «ថ្មីៗនេះ ដោយឃើញនូវគោលនយោបាយរបស់សម្តេចតជោលើវិស័យកសិកម្ម ដែលសម្តេចទើបបានប្រកាស ក្នុងនោះមាន គោលនយោបាយលើកកម្ពស់ជីវភាពកសិករប្រកបដោយវិធានការជាក់ស្តែង ដែលរំពឹងថា នឹងបានជាប្រយោជន៍ដល់ប្រជាកសិករ យើង»។

លោកបានសូមការអនុញ្ញាតពីសម្ដេចតេជោ ចូលរួមជីវភាពនយោបាយជាមួយគណបក្សប្រជាជនកម្ពុជា ចាប់ពីពេលនេះតទៅ៕

លោក យ៉ង សាំងកុមារ ត្រូវបានតែងតាំងជារដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងកសិកម្ម ខណៈលោក ឡឹក សុធារ តែងតាំងជាអនុរដ្ឋលេខាធិការ

 (ភ្នំពេញ)៖ លោក យ៉ង សាំងកុមារ អតីតថ្នាក់ដឹកនាំដ៏សំខាន់របស់គណបក្សប្រជាធិបតេយ្យមូលដ្ឋាន ត្រូវបាន ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រកម្ពុជា  ចេញព្រះរាជក្រឹត្យនៅថ្ងៃទី២៩ ខែវិច្ឆិកា ឆ្នាំ២០២២នេះ ត្រាស់បង្គាប់តែងតាំងជារដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការ ក្រសួងកសិកម្ម ខណៈលោក ឡឹក សុធារ ដែលជាមនុស្សជំនិតមួយរូបរបស់លោក ត្រូវបានតែងតាំងជា អនុរដ្ឋលេខាធិការក្រសួងកសិកម្ម។

ការតែងតាំងនេះ បានធ្វើឡើងបន្ទាប់ពីមានសំណើទូលថ្វាយរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។

សូមជំរាបថា កាលពីថ្ងៃទី២៣ ខែវិច្ឆិកា ឆ្នាំ២០២២ លោកបណ្ឌិត យ៉ង សាំង កុមារ និងលោក ឡឹក សុធារ ដែលជាថ្នាក់ដឹកនាំ គណបក្សប្រជាធិបតេយ្យមូលដ្ឋាន បានស្នើសុំចូលរួមជីវភាពនយោបាយជាមួយគណបក្សប្រជាជនកម្ពុជា។ ជាមួយនឹងការស្នើសុំនេះ លោក យ៉ង សាំង កុមារ ក៏បានធ្វើលិខិតគោរពជូន សម្តេចតេជោដាច់ដោយឡែកមួយទៀត ស្នើសុំចូលរួមជាមួយរាជរដ្ឋាភិបាល ក្នុងការអភិវឌ្ឍវិស័យកសិកម្ម ជាពិសេសវិស័យស្រូវអង្ករ។

បន្ទាប់ពីស្នើសុំចូលរួមជីវភាពនយោបាយនេះ លោក យ៉ង សាំងកុមារ និង លោក ឡឹក សុធារ ត្រូវបានសម្តេចតេជោ ហ៊ុន សែន អនុញ្ញាតឱ្យចូលជួបពិភាក្សាការងារ នៅថ្ងៃទី២៨ ខែវិច្ឆិកា ឆ្នាំ២០២២នេះ ដោយក្នុងនោះក៏មានការចូលរួមពី លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទផងដែរ។

ក្រោយបញ្ចប់ជំនួប លោកបណ្ឌិត យ៉ង សាំងកុមារ បានបង្ហាញចំណាប់អារម្មណ៍របស់លោក បា នលើកឡើងថា ភាគីទាំងអស់ មានទស្សនវិស័យដូចគ្នា ទាក់ទងនឹងវិស័យកសិកម្ម ដែលអាចធ្វើការជាមួយគ្នាបាន។

«ជាទូទៅយើងមានទស្សនវិស័យដូចគ្នា ទាក់ទងនឹងបញ្ហាប្រឈម និងដំណោះស្រាយក្នុងវិស័យកសិកម្មនៅកម្ពុជា ហើយយើងអាចធ្វើការជាមួយគ្នាបាន»។ នេះជាការបញ្ជាក់របស់លោកបណ្ឌិត នៅលើបណ្តាញសង្គមហ្វេសប៊ុក៕

វិភាគអន្តរជាតិ៖ រវាងសង្រ្គាមត្រជាក់អាមេរិក-ចិន និងសង្រ្គាមត្រជាក់អាមេរិក-សូវៀត

(តូក្យូ)៖ ជាធម្មតា មនុស្សដែលឈ្លោះប្រកែក និងវាយតប់គ្នាលើបញ្ហាអ្វីមួយ នៅតែអាចក្លាយជាមិត្តភក្តិនឹងគ្នាម្ដងទៀត តាមរយៈការដោះស្រាយការខ្វែងគំនិតគ្នា។ ប៉ុន្តែ ប្រសិនបើមនុស្សមិនទុកចិត្តគ្នាទៅវិញទៅមកលើបញ្ហា «អត្តចរិត និងមហិច្ឆតា» នោះវាមិនងាយនឹងផ្សះផ្សាគ្នាឡើយ​ តួយ៉ាងដូចជា សហរដ្ឋអាមេរិក និងចិន។ ជំនួបទល់មុខ កាលពីថ្ងៃទី១៤ ខែវិច្ឆិកាកន្លងទៅនេះរវាងប្រធានាធិបតីអាមេរិក លោក ចូ បៃដិន និងប្រធានាធិបតីចិន លោក ស៊ី ជិនពីង បានបង្ហាញថាទំនាក់ទំនងរវាងប្រទេសទាំងពីរ បានធ្លាក់ដល់កម្រិតដ៏ទាបមួយដែលពិបាកខ្លាំងណាស់ក្នុងការផ្សះផ្សាគ្នាឡើងវិញ។ ជាការពិតណាស់ លោក បៃដិន និងលោក ស៊ី ជិនពីង បានឯកភាពគ្នាបន្តកិច្ចសន្ទនា ដើម្បីបញ្ចៀសកុំឱ្យការប្រកួតប្រជែងរវាងសហរដ្ឋអាមេរិក និងចិន នាពេលបច្ចុប្បន្នផ្ទុះទៅជាជម្លោះ ឬសង្រ្គាម ហើយកិច្ចការបន្ទាប់ គឺដល់វេនរដ្ឋមន្ត្រីការបរទេសអាមេរិក លោក អាន់តូនី ប្ល៊ីនខិន (Antony Blinken) ដែលត្រូវបានគេរំពឹងថានឹងបំពេញដំណើរទស្សនកិច្ចទៅកាន់ប្រទេសចិន នៅដើមឆ្នាំ២០២៣ ជាមួយក្ដីសង្ឃឹមបើកកិច្ចសន្ទនា ទ្វេភាគីឡើងវិញ ពាក់ព័ន្ធនឹងកិច្ចការយោធា ការប្រែប្រួលអាកាសធាតុ និងជាបញ្ហាជាច្រើនទៀត។

ក្នុងខែវិច្ឆិកានេះដែរ ក៏មានផងដែរនូវសញ្ញាបង្ហាញថាកិច្ចសន្ទនារវាងយោធាអាមេរិក និងចិន កំពុងត្រូវបានស្ដារឡើងវិញ បន្ទាប់ពីទីក្រុងប៉េកាំងបានសម្រេចចិត្តកាត់ផ្ដាច់ ចោល ជាការសងសឹកទៅនឹងដំណើរទស្សនកិច្ចរបស់ប្រធានសភាតំណាងរាស្ត្រអាមេរិក លោកស្រី ណាន់ស៊ី ផេឡូស៊ី នៅកោះតៃវ៉ាន់កាលពីខែសីហាកន្លងទៅ។ រដ្ឋមន្ត្រីការពារជាតិអាមេរិក លោក ឡយដ៍ អូស្ទីន (Lloyd Austin) បានជួបសមភាគីចិនរបស់លោក គឺលោក វ៉ី ហ្វឹងហឺ (Wei Fenghe) ក្នុងខេត្តសៀមរាប ប្រទេសកម្ពុជា កាលពីថ្ងៃទី២២ ខែវិច្ឆិកានេះ ដើម្បីជជែកគ្នាពីសារៈសំខាន់នៃកិច្ចសន្ទនា ក្នុងការកាត់បន្ថយហានិភ័យនៃជម្លោះ។

តែទោះជាក្នុងករណីដែលប្រទេសទាំងពីរ អាចស្ដារកិច្ចសន្ទនានឹងគ្នាឡើងវិញក៏ដោយ ក៏អាមេរិក និងចិនមិនអាចធ្វើឱ្យទំនាក់ទំនងរបស់ខ្លួនមានភាពល្អប្រសើរឡើងវិញ ក្នុង ពេលដ៏ខ្លីនោះដែរ ខណៈការមើលឃើញគ្នាទៅវិញទៅមកថាជា «សត្រូវ» កាន់តែមានលក្ខណៈស៊ីជម្រៅ ដែលនេះមានន័យថាការដោះស្រាយភាពជាប់គាំងតាមរយៈ កិច្ចសន្ទនានឹងកាន់តែពិបាក។ នៅក្រោមរដ្ឋបាលលោក បៃដិន ពោលដូចគ្នាទៅនឹងជំនាន់លោក ដូណាល់ ត្រាំដែរ គឺយល់ថាចិនកំពុងព្យាយាមទាញទម្លាក់សហរដ្ឋអាមេរិក ចេញពីតំណែងជាកំពូលមហាអំណាចពិភពលោក តាមរយៈការធ្វើឱ្យឥទ្ធិពលអាមេរិកនៅក្នុងតំបន់អាស៊ីចុះខ្សោយ។ ជាក់ស្ដែង នៅក្នុងយុទ្ធសាស្ត្រសន្តិសុខជាតិថ្មីមួយត្រូវ បានបញ្ចេញខ្លះៗកាលពីខែតុលាកន្លងទៅ រដ្ឋបាលលោក បៃដិន បានអនុម័តគោលនយោបាយមួយដែលគោលដៅខ្ទប់ការកើនឡើងឥទ្ធិពលចិន និងចាត់ទុកចិន ជាគូប្រជែងធំបំផុតរបស់ខ្លួន បើទោះជាសហរដ្ឋអាមេរិកមើលឃើញថារុស្ស៉ីជា «ការគំរាមកំហែងបន្ទាន់» ក៏ដោយ។

ដោយឡែក ចំណែកឯចិនវិញ ក៏កាន់តែមិនទុកចិត្តលើទីក្រុងវ៉ាស៊ីនតោន រឹតតែខ្លាំងឡើងផងដែរ ដ្បិតប៉េកាំងយល់ថាសហរដ្ឋអាមេរិក ចង់បំផ្លាញរបបដឹកនាំកុម្មុយនិស្ដរបស់ ខ្លួន។ កាលពីឆ្នាំ២០០៤ សហរដ្ឋអាមេរិក បានបង្ហាញការគាំទ្រយ៉ាងខ្លាំងដល់ចលនាបដិវត្តន៍ពណ៌ទឹកក្រូចនៅក្នុងប្រទេសអ៊ុយក្រែន ដែលបានទម្លាក់រដ្ឋាភិបាលអ៊ុយក្រែន គាំទ្ររុស្ស៉ីពីអំណាច។ លោក ស៊ី ជិនពីង និងមនុស្សជំនិតរបស់លោក ធ្លាប់បានលើកឡើងម្ដងហើយម្ដងទៀតថាទីក្រុងវ៉ាស៊ីនតោន បាន និងកំពុងព្យាយាមធ្វើដូចគ្នានេះ មកលើចិន ដោយការលូកលាន់កិច្ចការផ្ទៃក្នុងរបស់ទីក្រុងប៉េកាំង ពិសេសគឺបញ្ហាហុងកុង និងតៃវ៉ាន់ ដែលចិនចាត់ទុកថាជាទង្វើព្យាយាមបំផ្លាញរបបដឹកនាំ នៃគណបក្សកុម្មុយនិស្ដចិន។

បើតាមក្រុមអ្នកជំនាញ វាអាចទៅរួចដែលសហរដ្ឋអាមេរិក និងចិន នឹងផ្សះផ្សា ឬដោះស្រាយជម្លោះនឹងគ្នាតាមរយៈកិច្ចសន្ទនាលើបញ្ហាមួយចំនួនដូចជា បច្ចេកវិទ្យា ពាណិជ្ជកម្ម និងផលប្រយោជន៍រវាងប្រទេសទាំងពីរ ក្នុងតំបន់អាស៊ីបូព៌ា។ ប៉ុន្តែ ព្រមពេលជាមួយ ការមិនជឿទុកចិត្តគ្នាបានកើនឡើងដល់កម្រិតមួយ ដែលធ្វើឱ្យអាមេរិក និងចិន មើលឃើញថាសកម្មភាពរបស់ភាគីម្ខាងបំផ្លាញប្រយោជន៍របស់ភាគីម្ខាងទៀត។ លើសពីនេះទៅទៀត លទ្ធផលនៃការបោះឆ្នោតពាក់កណ្ដាលអាណត្តិអាមេរិក កាលពីថ្ងៃទី៨ ខែវិច្ឆិកា ក៏ទំនងជាកាន់តែនឹងបង្កឱ្យមានភាពតានតឹងរវាងចិន និងអាមេរិកដែរ។ គណបក្សសាធាណរដ្ឋដែលនឹងឡើងមកគ្រប់គ្រងសភាតំណាងរាស្ត្រ មានគោលបំណងបង្កើតគណៈកម្មាធិការថ្មីមួយ មានតួនាទីត្រួតពិនិត្យគោលនយោបាយអាមេរិកចំពោះចិន ព្រមទាំងមានផែនការត្រួតពិនិត្យឡើងវិញលើការដោះស្រាយ កិច្ចការពាក់ព័ន្ធនឹងចិនរបស់រដ្ឋបាលលោក បៃដិន ហើយនឹងជំរុញការបង្កើនការដាក់សម្ពាធលើចិន ទាំងផ្នែកសន្តិសុខ និងសេដ្ឋកិច្ច។

មួយវិញទៀត ប្រសិនបើ លោក Kevin McCarthy មកពីបក្សសាធារណរដ្ឋ ពិតជាឡើងកាន់តំណែងជាប្រធានសភាតំណាងរាស្ត្រអាមេរិកមែន នោះលោកត្រូវបានគេរំពឹង ខ្ពស់ថាអាចនឹងដឹកនាំប្រតិភូសភាតំណាងរាស្ត្រអាមេរិក ទៅបំពេញទស្សនកិច្ចនៅកោះតៃវ៉ាន់ ក្នុងឆមាសទី១ នៅឆ្នាំ២០២៣ខាងមុខ បន្ទាប់ពីកាលពីខែសីហា ដំណើរទស្សនកិច្ចរបស់លោកស្រី ផេឡូស៊ី នៅតៃវ៉ាន់ បានធ្វើឱ្យចិនក្ដៅប្រហាយយ៉ាងខ្លាំង។ ម្លោះហើយ ក្រុមអ្នកជំនាញមើលឃើញថាការវិវត្តស្ថានការណ៍សព្វថ្ងៃ បង្ហាញថាសហរដ្ឋអាមេរិក និងចិន កំពុងធ្វើ «សង្រ្គាមត្រជាក់ថ្មីមួយ» ហើយការទាស់ទែងគ្នារវាងមហាអំណាចទាំងពីរ មិនមែនកំណត់នៅត្រឹមសេដ្ឋកិច្ច ឬកិច្ចការដែនសមុទ្រ នោះទេ ប៉ុន្តែវាលាតសន្ធឹងដល់ប្រព័ន្ធនយោបាយ រួមទាំងមហិច្ឆតាធ្វើជាមេដឹកនាំពិភពលោករៀងៗខ្លួន។

«សង្រ្គាមត្រជាក់ថ្មី» រវាងសហរដ្ឋអាមេរិក និងចិន គឺមានភាពខុសប្លែកគ្នាខ្លាំងពីសង្រ្គាមត្រជាក់រវាងសហរដ្ឋអាមេរិក និងអតីតសហភាពសូវៀត។ អាមេរិក និងចិនមាន ទំនាក់ទំនងសេដ្ឋកិច្ចជិតស្និទ្ធនឹងគ្នា រីឯទំនាក់ទំនងសេដ្ឋកិច្ចរវាងអាមេរិក និងអតីតសហភាពសូវៀតគឺមានការរឹតត្បិតយ៉ាងខ្លាំង ហើយខណៈសូវៀតព្យាយាម «នាំចេញ មនោគមន៍វិជ្ជាកុម្មុយនិស្ដ» ទៅកាន់ពាសពេញពិភពលោក ចិនវិញមិនបានព្យាយាមពង្រីក «មនោគមន៍វិជ្ជាកុម្មុយនិស្ដ» នោះទេដែលនេះអាចធ្វើឱ្យមនុស្សមួយចំនួន មានគំនិតសុទិដ្ឋិនិយមថាទំនាក់ទំនងរវាងអាមេរិក និងចិន ​នឹងមិនក្លាយជាសត្រូវនឹងគ្នាដូចរវាងសហរដ្ឋអាមេរិក និងសូវៀតឡើយ។ តែតាមពិតទៅ សង្រ្គាមត្រជាក់ថ្មីរវាង អាមេរិក និងចិន មានគ្រោះថ្នាក់ខ្លាំងជាងសង្រ្គាមត្រជាក់រវាងសហរដ្ឋអាមេរិក និងអតីតសហភាពសូវៀតទៅទៀត នៅក្រោមទិដ្ឋភាពជាច្រើន។

ម្យ៉ាង ក្នុងនាមជាមហាអំណាចសេដ្ឋកិច្ចលេខ២ នៅលើពិភពលោក ចិនមានសេដ្ឋកិច្ចធំជាងអតីតសហភាពសូវៀតឆ្ងាយណាស់។ វិទ្យាស្ថាន Japan Center for Economic Research បានព្យាករថាចិនអាចនឹងវ៉ាដាច់សហរដ្ឋអាមេរិក លើ Nominal GDP ឬ GDP សរុប មិនរាប់បញ្ចូលអតិផរណា នៅឆ្នាំ២០៣៣។ ដូច្នេះហើយដោយសារតែ សហរដ្ឋអាមេរិក និងចិនប្រកួតប្រជែងគ្នាយ៉ាងប្រកៀកប្រកិត វានឹងធ្វើឱ្យមានការប្រឈមមុខដាក់គ្នាយ៉ាងពេញទំហឹង និងយូរអង្វែងជាងការប្រជែងគ្នារវាងអាមេរិក និងសូវៀត។ ទី២៖ ភូមិសាស្ត្រនយោយបាយ មានភាពខុសគ្នាខ្លាំង។ នៅពេល សហរដ្ឋអាមេរិក និងសូវៀតចាប់ផ្ដើមប្រជែងដណ្ដើមឥទ្ធិពលគ្នានៅក្នុងតំបន់អឺរ៉ុប មហាអំណាចទាំងពីរ សុទ្ធតែមានប្លុកយោធាផ្ទាល់ខ្លួន និងមានការខណ្ឌចែកដែនឥទ្ធិពលច្បាស់លាស់រវាងអឺរ៉ុបខាងលិច និងអឺរ៉ុបខាងកើត។ តែសម្រាប់សហរដ្ឋអាមេរិក និងចិនវិញ កំពុងប្រជែងគ្នាដោយផ្ដោតជាសំខាន់នៅក្នុងតំបន់ឥណ្ឌូប៉ាស៊ីហ្វិក ដែលមិនមានការគូស ឬបែងចែកដែនឥទ្ធិពលច្បាស់លាស់នោះទេ ហើយនេះជាកត្តាមួយ ពិបាកក្នុងការរក្សាស្ថិរភាពនៃតុល្យភាពយោធា ក្នុងបរិបទតៃវ៉ាន់ត្រូវបានគេជឿជាក់ថាជាចំណុចក្ដៅដែលអាចធ្វើសង្រ្គាមផ្ទុះឡើងគ្រប់ពេលវេលារវាងអាមេរិក និងចិន។

ទី៣៖ មកទល់នឹងពេលនេះ មានយន្ដការតិចតួចប៉ុណ្ណោះ ក្នុងការបញ្ចៀស ឬទប់ស្កាត់ជម្លោះរវាងសហរដ្ឋអាមេរិក និងចិន។ សហរដ្ឋអាមេរិក និងសូវៀតបានបង្កើត ខ្សែទូរស័ព្ទបន្ទាន់មួយ ជាទូទៅគេហៅថា «ខែ្សទូរស័ព្ទក្រហម» មួយឆ្នាំបន្ទាប់ពីវិបត្តិមីស៊ីលគុយបា ឆ្នាំ១៩៦២ ដែលសឹងតែរុញឱ្យប្រទេសទាំង២ធ្លាក់ចូលក្នុង សង្រ្គាមនុយក្លេអ៊ែរ។ យន្ដការនេះអាចអនុញ្ញាតឱ្យមេដឹកនាំធ្វើការទំនាក់ទំនងគ្នាក្នុងករណីបន្ទាន់ ឬអាសន្នណាមួយ ហើយក្នុងឆ្នាំ១៩៧២ សហរដ្ឋអាមេរិក និងសូវៀត ក៏បានចុះហត្ថលេខាដែរលើកិច្ចព្រមព្រៀងមួយចំនួនស្ដីពីមីស៊ីល និងអាវុធនុយក្លេអ៊ែរ។

ប៉ុន្តែ យន្ដការបែបនេះមិនមានឡើយរវាងសហរដ្ឋអាមេរិក និងចិន។ ទីក្រុងប៉េកាំង បានច្រានចោលសំណើពីសហរដ្ឋអាមេរិក ដើម្បីចូលរួមក្នុងកិច្ចចរចាស្ដីពីការគ្រប់គ្រង អាវុធ និងបើទោះជាមានខែ្សទូរស័ព្ទបន្ទាន់រវាងក្រសួងការពារជាតិអាមេរិក និងក្រសួងការពារជាតិចិនក៏ពិតមែន ក៏មធ្យោបាយទំនាក់ទំនងនេះមិនមានភាពល្អប្រសើរ នោះដែរ។ ក្រុមមន្ត្រីអាមេរិកជារឿយៗតែងតែអះអាងថាខ្លួនព្យាយាមទំនាក់ទំនងជាមួយចិន តែខាងទីក្រុងប៉េកាំង មិនបានឆ្លើយតបទាន់ពេលនោះទេ ដោយសារតែ មន្ត្រីយោធាកំពូលចិន មិនត្រូវបានអនុញ្ញាតឱ្យធ្វើការចរចា ឬសន្ទនាលើបញ្ហានយោបាយរសើបៗជាមួយសហរដ្ឋអាមេរិកឡើយ។

គួរបញ្ជាក់ថា កាលពីខែតុលាកន្លងទៅ គឺជាខួបលើកទី៦០ នៃវិបត្តិមីស៊ីលគុយបា ចំពេលពិភពលោកកំពុងស្ថិតនៅក្នុងគ្រោះថ្នាក់នៃសង្រ្គាមនៅអ៊ុយក្រែន។ ប្រសិនបើ វិបត្តិដូចគ្នានេះកើតឡើងនៅក្នុងតំបន់ច្រកសមុទ្រតៃវ៉ាន់ ក្រុមអ្នកជំនាញភាគច្រើនជឿថាវានឹងអាចរាលដាលទៅជាសង្រ្គាមទ្រង់ទ្រាយធំក្នុងពេលដ៏ខ្លី៕ Fresh News

សម្តេចតេជោ ហ៊ុន សែន អញ្ជើញជួបសំណេះសំណាល ជាមួយ មន្ត្រីគណបក្សប្រជាជនកម្ពុជានៅក្នុងរាជធានីភ្នំពេញ ជាង៣ពាន់នាក់

នៅព្រឹកថ្ងៃសៅរ៍ ទី២៦ ខែវិច្ឆិកា ឆ្នាំ២០២២នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា បានអញ្ជើញជួបសំណេះសំណាលជាមួយ មន្ត្រីគណបក្សប្រជាជនកម្ពុជាចំនួនប្រមាណជាង៣ពាន់នាក់ នៅក្នុងរាជធានីភ្នំពេញ ដែលបានធ្វើឡើងនៅវិមាន៧មករា។ 

តាមរបាយការណ៍របស់ ឯកឧត្តម ឃួង ស្រេង ប្រធានគណបក្សរាជធានីភ្នំពេញ បានលើកឡើងថា ការអញ្ជើញសំណេះសំណាលរបស់សម្ដេចតេជោ នាពេលនេះគឺបាន បង្ហាញឱ្យឃើញពីការយកចិត្តទុកដាក់ខ្ពស់ ចំពោះសុខទុក្ខ សមាជិក សមាជិកាគណបក្សប្រជាជនកម្ពុជាក្នុងរាជធានីភ្នំពេញ ។ ឯកឧត្តមក៏បានជម្រាបសម្តេចតេជោ និងអង្គពិធីអំពីសភាពការណ៍រួមរបស់ រាជធានីភ្នំពេញ រួមមានការងារសន្តិសុខ សណ្តាប់សាធារណៈ របាយការណ៍ពាក់ព័ន្ធមន្ត្រីរាជការ និងការងារអភិវឌ្ឍនៅក្នុងរាជធានីភ្នំពេញ។  ពាក់ព័ន្ធការងារសន្តិសុខ និងសណ្តាប់ធ្នាប់សាធារណៈ  ឯកឧត្តម ឃួង ស្រេង បានគូសបញ្ជាក់ថា អាជ្ញាធររាជធានីភ្នំពេញបានយកចិត្តទុកដាក់ រក្សា ការពារ និងពង្រឹងជាប្រចាំហើយជារួម ធានាបាននូវសន្តិសុខ និងសុវត្ថិភាពល្អប្រសើរជូនប្រជាពលរដ្ឋ។ ទន្ទឹមនេះ រដ្ឋបាលគ្រប់ថ្នាក់ក្នុងរាជធានីភ្នំពេញ បាននឹងកំពុងចូលរួមសហការក្នុងការបង្កលក្ខណៈល្អប្រសើរ ។ 

សម្តេចតេជោ ហ៊ុន សែន បានបង្ហាញនូវក្តីរីករាយ ដែលបានជួបសំណេះសំណាលជាមួយ សមាជិក សមាជិកាគណបក្ស ថ្នាក់ភូមិ សង្កាត់ ខណ្ឌ ចំណុះរាជធានីភ្នំពេញ រួមជាមួយថ្នាក់ដឹកនាំគណបក្សក្នុងស្ថាប័ន ក្រសួងមួយចំនួនទៀតនៅក្នុងថ្ងៃនេះ។  សម្តេចតេជោ ហ៊ុន សែន បានថ្លែងអបអរសាទរចំពោះក្រុមប្រឹក្សាឃុំ/សង្កាត់  ក្នុងរាជធានីភ្នំពេញទាំងអស់ ដែលទទួលបានការគាំទ្រពីប្រជាពលរដ្ឋ តាមរយៈការបោះឆ្នោត ឃុំ សង្កាត់ កន្លងទៅនេះ។ សម្តេចតេជោ ហ៊ុន សែន ក៏បានកោតសរសើរ និងវាយតម្លៃខ្ពស់ចំពោះមន្ត្រីរាជការ និងកងកម្លាំងប្រដាប់អាវុធទាំងអស់ ដែលបានប្រឹងប្រែងរក្សាស្ថិរភាពនយោបាយ សន្តិសុខ សណ្ដាប់ធ្នាប់សង្គមបានល្អ  ការរួមគ្នាទប់ស្កាត់ការរីករាលដាលជំងឺកូវីដ១៩  ទប់ស្កាត់បាននូវទង្វើបង្កចលាចលនានាក្នុងសង្គម។ 

នៅក្នុងពិធីសំណេះសំណាលនេះដែរ សម្ដេចតេជោ ក៏បានលើកឡើងនូវសមិទ្ធិផលធំៗមួយចំនួនគួរអោយកត់សម្គាល់របស់រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជាបានធ្វើរួមាន ការក្សាបានស្ថិរភាពនយោបាយ សន្តិសុខ សណ្ដាប់ធ្នាប់សង្គម  ភាពជោគជ័យនៃការប្រយុទ្ធទប់ស្កាត់ជម្ងឺកូវីដ១៩ ជាពិសេសគឺការដាក់ចេញនូវយុទ្ធសាស្ត្រវ៉ាក់សាំងស្រោចជូនប្រជាពលរដ្ឋដែលបានបង្កើតភាពស៊ាំបានយ៉ាងល្អ ការរក្សាកំណើនសេដ្ឋកិច្ច ការគ្រប់គ្រងដោះស្រាយឆ្លើយតបទៅនឹងគ្រោះមហន្តរាយបានទាន់ពេលវេលា ពិសេសគឺពេលគ្រោះទឹកជំនន់បានកើតឡើង  ការគ្រប់គ្រងដំណើរការនៃការបោះឆ្នោតបានយ៉ាងល្អនាពេលកន្លងទៅ លើសពីនេះការអនុវត្តការទូតឯករាជ្យផ្អែកដោយច្បាប់ ពាក់ព័ន្ធនឹងការបោះឆ្នោតនៅអង្គការសហប្រជាជាតិលើបញ្ហា រុស្ស៉ី-អ៊ុយក្រែន   និងភាពជោគជ័យយ៉ាងត្រចះត្រចង់ក្នុងនាមជាម្ចាស់ផ្ទះនៃការរៀបចំកិច្ចប្រជុំកំពូលអាស៊ាន២០២២នៅកម្ពុជា ។ 

សម្តេចតេជោ ហ៊ុន សែន បានក្រើនរំលឹកដល់ សមាជិក សមាជិកា គណបក្សទាំងអស់ដែលមានតួនាទីនៅរាជរដ្ឋាភិបាលត្រូវបន្តយកចិត្តទុកដាក់បំពេញតួនាទីភារកិច្ចបម្រើជាតិ និងប្រជាជន ជាពិសេសបន្តយកចិត្តទុកដាក់រក្សា សន្តិសុខ សណ្ដាប់ធ្នាប់ សង្គម ដោយអនុវត្តគោលនយោបាយភូមិ ឃុំ មានសុវត្ថិភាព រួមមាន ការបង្ក្រាបនូវបទល្មើសផ្សេងៗ ដូចជា ចោរឆក់ ចោរប្លន់ និងការជួញដូរគ្រឿងញៀនជាដើម ដើម្បីផ្តល់ភាពកក់ក្តៅ និងធានាដល់សុវត្ថិភាពនៃការរស់នៅ របស់ប្រជាពលរដ្ឋ។ ទន្ទឹមនេះ ត្រូវយកចិត្តទុកដាក់ផ្តល់នូវសេវាសាធារណៈ រួមមានសេវាតម្រូវការចាំបាច់ទាំងឡាយ និងសេវាសំណូមពរនានា ជូនប្រជាពលរដ្ឋ អោយបានលឿន និងមានប្រសិទ្ធិភាព ហើយត្រូវខិតខំបំបាត់អោយអស់នូវភាពអសកម្មនានា។ អាជ្ញាធរត្រូវយកចិត្តទុក ដាក់ដោះស្រាយជម្លោះដីធ្លីជូនប្រជាពលរដ្ឋអោយបានរហ័ស និងមានប្រសិទ្ធិភាព  ផ្តល់នូវសេវាចាំបាច់នានាជូនប្រជាពលរដ្ឋឱ្យបានលឿន រហ័ស ចៀសវាងបង្កនូវបញ្ហានានា។ ត្រូវរួមគ្នាបន្តការទប់ស្កាត់ជម្ងឺកូវីដ១៩ និងជម្ងឺរាតត្បាតនានា យកចិត្តទុកដាក់ដោះស្រាយបញ្ហាលក់ដូររបស់ប្រជាជនដែឡកើតមានឡើងនៅតាមផ្សារ បញ្ហាចរាចរណ៍ បញ្ហាទឹក ភ្លើង ។ល។ លើសពីនេះសម្ដចតេជោ បានជម្រុញអោយមានការខិតខំដោះស្រាយបញ្ហាជម្លោះរវាង កម្មករ ជាមួយរោងចក្រ ឬ បុគ្គលិកក្រុមហ៊ុន ជាមួយ ក្រុមហ៊ុន និងលើកទឹកចិត្តអោយអាជ្ញាធរព្យាយាមដោះស្រាយបញ្ហាជម្លោះរបស់ប្រជាពលរដ្ឋតាមបែបក្រៅប្រព័ន្ធតុលាការ។ 

សម្តេចតេជោ ហ៊ុន សែន ក៏បានកោតសរសើរដល់ ថ្នាក់ដឹកនាំ សមាជិក សមាជិកាគណបក្សទាំងអស់ ដែលបានរួមសហការគ្នា ធ្វើកិច្ចការអភិវឌ្ឍនៅក្នុងរាជធានីភ្នំពេញបានយ៉ាងល្អ ទទួលបាននូវការការរីកចម្រើនជាបន្តបន្ទាប់មក៕