រាជធានីភ្នំពេញ ថ្ងៃទី២៦ ខែកញ្ញា ឆ្នាំ២០១៤
- សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា
- លោកជំទាវ Bu Jianguo ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា
- ឯកឧត្តម លោកជំទាវឯកអគ្គរាជទូត-ឯកអគ្គរដ្ឋទូត និងប្រធានបេសកកម្មការទូត
- ឯកឧត្តម លោកជំទាវសមាជិក-សមាជិកាព្រឹទ្ធសភារដ្ឋសភានិងរាជរដ្ឋាភិបាល
- ឯកឧត្ដម លោកជំទាវ លោកឧកញ៉ា អស់លោក-លោកស្រី និងភ្ញៀវកិត្តិយសទាំងអស់ជាទីមេត្រី
ថ្ងៃនេះ ខ្ញុំនិងភរិយាមានសេចក្ដីសោមនស្សរីករាយចូលរួមជាមួយឯកឧត្តម លោកជំទាវលោកឧកញ៉ា អស់លោក-លោកស្រី និងភ្ញៀវកិត្តិយសទាំងអស់ ក្នុងពិធីប្រារព្ធខួបលើកទី៦៥នៃការបង្កើតសាធារណរដ្ឋប្រជាមានិតចិននាពេលនេះ។ ឆ្លៀតក្នុងឱកាសដ៏មហោឡារិកនេះ ក្នុងនាមរាជរដ្ឋាភិបាល និងប្រជាជនកម្ពុជា ខ្ញុំសូមសម្តែងនូវការអបអរសាទរយ៉ាងកក់ក្តៅ និងសូមថ្លែងអំណរគុណយ៉ាងជ្រាលជ្រៅ ជូនចំពោះរដ្ឋាភិបាល និងប្រជាជននៃសាធារណរដ្ឋប្រជាមានិតចិនដែលជានិច្ចកាលតែងតែបានចូលរួមវិភាគទានដ៏ថ្លៃថ្លាដល់ការអភិវឌ្ឍនៃព្រះរាជាណាចក្រកម្ពុជា។
ខ្ញុំមានជំនឿយ៉ាងមុតមាំថា ចំណងមិត្តភាពដ៏យូរលង់ជាប្រពៃណី និងកិច្ចសហប្រតិបត្តិការល្អរវាងប្រជាជន និងប្រទេសយើងទាំងពីរនឹងត្រូវបានពង្រឹងនិងពង្រីកបន្ថែមទៀត ជាពិសេសតាមរយៈ «ភាពជាដៃគូយុទ្ធសាស្រ្តគ្រប់ជ្រុងជ្រោយ» ដែលព្រះរាជាណាចក្រកម្ពុជា និងសាធារណរដ្ឋប្រជាមានិតចិនទើបបានសម្រេចឡើងនាពេលកន្លងមក។
ក្នុងឱកាសដ៏វិសេសវិសាលនៃការប្រារព្ធពិធីខួបលើកទី៦៥ ថ្ងៃបង្កើតសាធារណរដ្ឋប្រជាមានិតចិននាពេលនេះ ខ្ញុំសូមអញ្ជើញឯកឧត្តម លោកជំទាវ លោកឧកញ៉ា អស់លោក-លោកស្រី និងភ្ញៀវកិត្តិយសទាំងអស់លើកកែវឡើងដើម្បី៖
- សុខភាពល្អបរិបូរណ៍ និងជន្មាយុយឺនយូររបស់ឯកឧត្តម ស៊ី ជីនភីង ប្រធានាធិបតីនៃសាធារណរដ្ឋប្រជាមានិតចិន និងលោកជំទាវ
- ព្រះរាជសុខភាពល្អបរិបូរណ៍ និងព្រះជន្មាយុយឺនយូររបស់ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា
- ព្រះរាជសុខភាពល្អបរិបូរណ៍ និងព្រះជន្មាយុយឺនយូររបស់សម្ដេចព្រះមហាក្សត្រី នរោត្ដម មុនិនាថ សីហនុ
- មិត្ដភាពដ៏រឹងមាំ និងទំនាក់ទំនងដ៏ល្អប្រពៃ រវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន
- សុភមង្គល និងវិបុលភាពនៃប្រជាជាតិយើងទាំងពីរ និង
- សុខភាពល្អ ជោគជ័យលើគ្រប់ភារកិច្ច និងសុភមង្គលក្នុងក្រុមគ្រួសារជូនចំពោះឯកឧត្ដម លោកជំទាវ លោកឧកញ៉ា អស់លោក-លោកស្រីទាំងអស់ដែលមានវត្តមាននៅក្នុងពិធីនេះ!
សូមអរគុណ