អគ្គនាយកអាជ្ញាធរជាតិអប្សរាកោតសរសើរចំពោះកូរ៉េលើកិច្ចសហប្រតិបត្តិការជួសជុល អភិរក្សប្រាសាទក្នុងឧទ្យានអង្គរ

ក្នុងដំណើរទស្សនកិច្ចនៅប្រទេសកូរ៉េ ដើម្បីពិនិត្យនិងមានជំនឿចិត្តលើការអភិរក្សបេតិកភណ្ឌវប្បធម៌កូរ៉េ លោកបណ្ឌិត ស៊ុំ ម៉ាប់ អគ្គនាយកអាជ្ញាធរជាតិអប្សរាបានមានប្រសាសន៍ក្នុងជំនួបដ៏រីករាយនៅសារមន្ទីររាជវាំង Jongro-gu ក្រុងសេអ៊ូល កាលពីថ្ងៃទី៨ កន្លងទៅនេះថា “ស្របនឹងជំនួយរបស់កូរ៉េ ខ្ញុំចង់ឱ្យប្រជាជនកូរ៉េមកទស្សនាឧទ្យានអង្គររបស់យើងខ្ញុំកាន់តែច្រើនឡើង”។

លោកបន្តទៀតថា ចំពោះការផ្តល់ជំនួយរបស់រដ្ឋបាលបេតិកភណ្ឌវប្បធម៌ បានធ្វើឱ្យខ្ញុំឃើញជាក់នូវបេតិកភណ្ឌវប្បធម៌បែបពុទ្ធសាសនាដ៏ស្រស់ស្អាតរបស់កូរ៉េ ដូចជា៖ ប្រាសាទ Seokguram Grotto និងប្រាសាទ Bulguksa ដែលមានភាពស្រដៀងទៅនឹងឧទ្យានអង្គរកម្ពុជា ហើយបានធ្វើឱ្យខ្ញុំលង់ទៅនឹងភាពទាក់ទាញដ៏ប្លែកមួយនេះផងដែរ។

ជាការពិតណាស់ ឧទ្យានអង្គរ គឺជានិមិត្តរូបដ៏ធំមួយដែលអាចចាត់ទុកថាជារាជធានីនៃប្រជាជនកម្ពុជានិងត្រូវបានដាក់បញ្ចូលជាតំបន់បេតិកភណ្ឌពិភពលោករបស់អង្គការយូណេស្កូ ក្នុងឆ្នាំ១៩៩២។ ប៉ុន្តែនៅពេលនោះអង្គការយូណេស្កូ បានបញ្ជាឱ្យបង្កើតស្ថាប័នរដ្ឋបាលមួយ ដែលមានគោលការណ៏នៃលក្ខខណ្ឌជួសជុលប្រាសាទ គឺអាជ្ញាធរជាតិអប្សរា (APSARA) ជាស្ថាប័នរដ្ឋបាលពិសេសមួយ ដែលទទួលខុសត្រូវចំពោះសកម្មភាពអភិរក្សនិងការជួសជុលក្នុងឧទ្យានអង្គរ ដែលជានិមិត្តរូបនៃកម្ពុជា។

បន្ថែមពីនោះ ក៏បានបង្កើតគណៈកម្មាធិការសហប្រតិបត្តិការអន្តរជាតិ ដើម្បីការអភិវឌ្ឍ និងការពារឧទ្យានប្រវត្តិសាស្រ្ត អង្គរ (ICC-Angkor) ជាមួយអាជ្ញាធរជាតិអប្សរា។ ក្នុងការប្រជុំ ICC-Angkor ភាគច្រើនមានការចូលរួមពីបណ្តាប្រទេសអភិវឌ្ឍន៍ផ្នែកបច្ចេកទេសអភិរក្សបេតិកភណ្ឌ ដូចជា៖ សហរដ្ឋអាមេរិក ជប៉ុន បារាំង និងប្រទេសដទៃទៀត។

នៅក្នុងបេសកកម្មជួសជុលបុរាណដ្ឋានក្នុងឧទ្យានអង្គរ ប្រទេសកូរ៉េបានចាប់ផ្តើមចូលរួមក្នុងគម្រោងជួសជុលប្រាសាទព្រះពិធូរក្នុងតំបន់អង្គរនៅឆ្នាំ២០១៥។ ក្រុមប្រាសាទព្រះពិធូរ មានប្រាសាទហិណ្ឌូសាសនាចំនួន៤ និងប្រាសាទពុទ្ធសាសនា១ ត្រូវបានគេប៉ាន់ស្មានថា គេសាងសង់ក្នុងកំឡុងសតវត្សទី១២ និងទី១៥ ដែលមានទំហំប្រហែល១២៦០០០ម៉ែត្រការ៉េ។

ទោះជាយ៉ាងណា ផលប៉ះពាល់បរិស្ថានព្រៃឈើដែលព័ទ្ធជុំវិញ ព្រមទាំងអាកាសធាតុរយៈពេលយូរ គឺបានធ្វើឱ្យការអភិរក្សប្រាសាទទាំងមូលមានការថយចុះ។

នៅក្នុងកិច្ចប្រជុំ ICC-Angkor ប្រទេសកូរ៉េ គឺជាប្រទេសក្មេងជាងគេបំផុតក្នុងការចូលរួមជាមួយបណ្តាប្រទេសផ្សេងៗ។ ប៉ុន្តែ ពួកគេមានជំនាញខ្ពស់ក្នុងការជួសជុល ហើយសកម្មក្នុងការចែករំលែកលទ្ធផល និងការស្រាវជ្រាវជាមួយអ្នកជំនាញកម្ពុជា ព្រមទាំងបានបង្កើតនូវបន្ទប់ពិសោធន៏រចនាសម្ពន្ធប្រាសាទមួយនៅការិយាល័យផងដែរ។

ប្រទេសកូរ៉េ គឺជាប្រទេសដែលផ្តល់ជំនួយជាក់ស្តែងច្រើនបំផុត ទៅលើការលើកកម្ពស់បេតិកភណ្ឌវប្បធម៌កម្ពុជា។  ចំពោះការជួសជុលក្រុមប្រាសាទព្រះពិធូរ ដែលបានចាប់ផ្តើមដំណើរការកាលពី ខែកញ្ញា ឆ្នាំ២០១៥ មូលនិធិបេតិកភណ្ឌវប្បធម៌កូរ៉េ គ្រោងនឹងបញ្ចប់ដំណាក់កាលដំបូងនេះ នៅក្នុងខែកញ្ញាឆ្នាំនេះ។

ទីភ្នាក់ងារសហប្រតិបត្តិការអន្តរជាតិកូរ៉េ (KOICA) បានផ្តល់ថវិកាចំនួន៤០០ពាន់លានវ៉ុន ដែលជាទំហំធំបំផុតនៃជំនួយអភិវឌ្ឍន៍ផ្លូវការ (ODA) របស់បេតិកភណ្ឌវប្បធម៌កូរ៉េ ដែលមានគម្រោងជួសជុលប្រាសាទហុងណាងស៊ីដា ក្នុងរដ្ឋបាលបេតិកភណ្ឌវប្បធម៌ឡាវ។

ជាចុងបញ្ចប់ លោក ស៊ុំ ម៉ាប់ បានមានប្រសាសន៏ថា “ដោយសារតែភាពជោគជ័យរបស់ក្រុមការងារជួសជុលបេតិកភណ្ឌកូរ៉េ ខ្ញុំក៏ស្នើសុំឱ្យមានការចូលរួមបន្ថែមទៀត ទៅលើគម្រោងជួសជុលទីលានជល់ដំរី ដែលជារមណីយដ្ឋានដ៏ល្បីល្បាញមួយក្នុងតំបន់អង្គរ”។ ម្យ៉ាងទៀត “ប្រទេសកូរ៉េនិងកម្ពុជា មានចំណុចរួមជាច្រើននៃពុទ្ធសាសនានិងសម្បត្តិវប្បធម៌ សិលា ដែលធ្វើឱ្យខ្ញុំទន្ទឹងរង់ចាំនូវការផ្លាស់ប្តូរវប្បធម៌គ្នាទៅវិញទៅមកផ្សេងៗទៀតនាពេលអនាគត “៕

លោកនាយករដ្ឋមន្ត្រី ហ៊ុន សែន៖ គ្មានភ្ញៀវទេសចរណ៍ទៅលេងប្រទេសដែលមានសង្គ្រាម និងភេរវកម្មនោះទេ!

លោកនាយករដ្ឋមន្ត្រី ហ៊ុន សែន មុន​នេះ​បន្តិច​បាន​បញ្ជាក់ថា​ «គ្មានប្រទេស​ណាមួយ​មាន​ទេសចរណ៍​ទៅកាន់ទីនោះ នៅ​ពេល​ដែល​ប្រទេស​នោះ​មាន​ការ​ប្រយុទ្ធគ្នា​នោះទេ​ ហើយ​ក៏​គ្មាន​គោល​ដៅ​ទេសចរណ៍​ទាក់​ទាញ​ណាមួយ​ដែល​ផ្តល់​ឱកាស​ឱ្យ​ពួក​ភេរវកម្ម​ វាយ​ប្រហារ​ភេរវកម្ម​ បង្កើត​នូវ​សោកនាដកម្ម សម្រាប់​វិស័យ​ទេសចរណ៍»។

លោក​នាយករដ្ឋមន្ត្រី ហ៊ុន សែន មានប្រសាសន៍​ដូចនេះ ក្នុងពិធីអញ្ជើញជាអធិបតីភាព​ក្នុងពិធី បិទសន្និបាតបូកសរុបការងារទេចរណ៍ និង ចែកជ័យលាភីទីក្រុងស្អាតលើកទី២ នៅសណ្ឋាគារ រ៉េស៊ីដង់សុខាភ្នំពេញ រាជធានីភ្នំពេញ នារសៀលថ្ងៃពុធ ១៤កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៨ ខែកុម្ភៈ ឆ្នាំ២០១៨នេះ។

លោកនាយករដ្ឋមន្ត្រី​បាន​បន្តថា «សង្ឃឹមថា​អ្នក​ទាំង​អស់គ្នា ខិតខំធ្វើយ៉ាង​ម៉េច ទប់​ស្កាត់កុំ​ឱ្យ​មាន​ភេរវកម្ម​ចូល​មក​ក្នុង​ប្រទេស​ ការពារ​នូវ​សន្តិភាព​ កុំ​ឱ្យ​ប្រទេស​យើង​ធ្លាក់​លេចលង់​ទៅ​ក្នុង​សង្គ្រាម​សារជាថ្មី​ម្តងទៀត​ យើង​មាន​បទពិសោធន៍​ឈឺចាប់​គ្រប់​គ្រាន់​ណាស់​ហើយ​ ហើយ​យើង​ក៏​មាន​បទពិសោធន៍​មើលឃើញ​អំពី​ការ​អភិវឌ្ឍ ក្នុង​រយៈពេល​ ដែល​ប្រទេស​កម្ពុជា​យើង​មាន​សន្តិភាព»។​

លោកនាយករដ្ឋមន្ត្រី ហ៊ុន សែន ​បាន​បញ្ជាក់​ទៀត​ថា​ «ដូច្នេះ​សង្ឃឹម​ថា មិនមែន​គ្រាន់​តែ​ជា​បញ្ហា​ភេរវកម្ម​វាយ​ប្រហារ​ប៉ុណ្ណោះទេ​ ក៏​ប៉ុន្តែ​គ្រាន់​តែ​ចោលួច​តូចតាច​ក៏​មិន​ត្រូវ​មាន​នៅ​តាម​តំបន់​ទេចរណ៍​នានាដែរ​ យើង​មាន​នគបាល​សម្រាប់​ផ្នែក​ទេសចរណ៍​របស់​យើង ដែល​ចាំបាច់​ត្រូវ​ខិត​ខំពង្រឹង​វិស័យ​នេះ​ព្រោះថា​មាន​តែ​តំបន់​សុវត្ថិភាព​ប៉ុណ្ណោះ​ ដែល​ទេសចរណ៍​មក​លេង​ ហើយ​ទាក់ទាញ​គេ​មក​លេង​ម្តងហើយ គេនឹង​មក​លេង​សារជាថ្មី​ម្តងទៀត​ដោយ​នាំ​មក​ជាមួយ​នឹង​ក្រុម​គ្រួសារ​របស់​ពួកគេ​ ចំណុច​អស់​ទាំង​នេះ គឺជាចំណុច​ដែល​យើង​ប្តូរ​ផ្តាច់»។​

លោក​នាយករដ្ឋមន្ត្រី ក៏​បាន​លើកឡើង​ផងដែរថា «បើទោះបីជានរណាគេ​ថា​យ៉ាង​ណា​ក៏​ដោយ ប៉ុន្តែ​សន្តិភាព​វា​មាន​តម្លៃ​ណាស់​សម្រាប់​ជីវិត​របស់​យើង​ទាំងអស់គ្នា សម្រាប់​ការ​អភិវឌ្ឍ​របស់​យើង​ទាំង​អស់​គ្នា សម្រាប់​អ្នក​ដែល​គេ​មិន​សប្បាយ​ចិត្ត​នឹង​យើង គឺជារឿង​របស់​គេ​ ប៉ុន្តែ​ជាតិ​សាស្ត្រ​របស់​គេ​មិន​បាន​មក​ស្លាប់​ជា​មួយ​យើង​នោះទេ គឺ​មាន​តែ​ប្រជាជន​យើង​តែ​ប៉ុណ្ណោះ យើង​មាន​បទពិសោធន៍​គ្រប់​គ្រាន់​ណាស់​យើង ដែល​យើង​ងើប​ឈឡើង​ទាំង​លំបាក​វេទនា​ទម្រាំ​មាន​ពេលនេះ​»៕

លោកនាយករដ្ឋមន្រ្ដី ហ៊ុន សែន កែសម្រួលសមាសភាព គណៈកម្មាធិការជាតិវាយតម្លៃទីក្រុងស្អាត

លោកនាយករដ្ឋមន្រ្ដី ហ៊ុន សែន បានចេញសេចក្តីសម្រេចមួយស្តីពី ការកែសម្រួលសមាសភាព គណៈកម្មាធិការជាតិ វាយតម្លៃទីក្រុងស្អាត។ នេះបើតាមសេចក្តីសម្រេចរបស់ រាជរដ្ឋាភិបាលកម្ពុជា ដែលទទួលបាននៅថ្ងៃទី២៨ ខែកុម្ភៈ ឆ្នាំ២០១៨នេះ។

តាមសេចក្តីសម្រេចបានឲ្យដឹងថា គណៈកម្មាធិការជាតិវាយតម្លៃទីក្រុងស្អាតមាន ៤០រូប ក្នុងនោះ លោកនាយករដ្ឋមន្រ្ដី ជាប្រធានកិត្តិយស និងមានលោកឧបនាយករដ្ឋមន្រ្ដី ថោង ខុន រដ្ឋមន្រ្តីក្រសួងទេសចរណ៍ ជាប្រធានគណៈកម្មាធិការជាតិវាយតម្លៃទីក្រុងស្អាត ដោយមានការចូលរួមពី ក្រសួងស្ថាប័នពាក់ព័ន្ធ និងអភិបាលរាជធានី-ខេត្ត អគ្គស្នងការ និងមេបញ្ជាការកងរាជអាវុធហត្ថ និងមានអគ្គលេខាធិការដ្ឋាន០១ រូប។

សូមជម្រាបជូនថា តួនាទី និងភារកិច្ចចំបង របស់គណៈកម្មាធិការជាតិវាយតម្លៃទីក្រុងស្អាត គឺរៀបចំចលនាប្រឡងប្រណាំងទីក្រុងស្អាត ហើយជ័យលាភី ទីក្រុងស្អាតលើកទី២ គ្រោងនឹងប្រកាសនៅថ្ងៃអបអរសាទរទិវាជាតិទីក្រុងស្អាត គឺនៅថ្ងៃទី២៨ ខែកុម្ភៈ ឆ្នាំ២០១៨នេះតែម្តង៕

ខាងក្រោមនេះជាសេចក្តីសម្រេចរបស់រាជរដ្ឋាភិបាល ៖

លោកនាយករដ្ឋមន្ត្រី ហ៊ុន សែន លើកឡើងថា អាស៊ានមិនអាចបែកបាក់ដោយសារតែប្រទេសនៅខាងក្រៅតំបន់នោះទេ!

បន្ទាប់ពី​លេចលឺព័ត៌មានប្រឌិត​ថា កិច្ចប្រជុំ អាស៊ាន-អូស្ត្រាលី ដែលនឹងប្រព្រឹត្តនៅប្រទេសអូស្ត្រាលីនាពេលខាងមុខ អាស៊ាន និងអូស្ត្រាលី នឹងគាបសង្កត់មកលើកម្ពុជា លោក​នាយករដ្ឋមន្ត្រី ហ៊ុន សែន បាន​លើកឡើងថា «ក្នុង​ក្របខណ្ឌ​អាស៊ាន​ យើង​ក៏​ជា​សមាជិក​ដែល​មាន​ការ​ទទួល​ខុស​ត្រូវ​​ អាស៊ាន​មិន​អាច​បែកបាក់​ដោយ​សារ​តែ​ប្រទេស​នៅ​ខាង​ក្រៅ​តំបន់​នោះទេ​ អាស៊ាន​ត្រូវ​តែ​មាន​សាមគ្គីភាព​ ហើយ​អាស៊ាន​មាន​សាមគ្គីភាព​ទើប​អាស៊ាន​អាច​ចេញ​សេចក្តី​​ថ្លែងការណ៍​ណាមួយ​ ឬចេញ​នូវ​ក្របខណ្ឌ​​ឯកសារណាមួយ​មក​សម្រាប់​អាស៊ាន​»។

លោក​​នាយករដ្ឋមន្ត្រី ហ៊ុន សែន ថ្លែង​ដូចនេះ​ ក្នុង​ឱកាស​ដែលលោក​អញ្ជើញចុះ​ជួបសំណេះសំណាល ជាមួយជាមួយកូនក្មួយកម្មករ កម្មការិ​នីសរុបប្រមាណ១៧,៨២៨នាក់ មកពីរោងចក្រ សហគ្រាសចំនួន៨ នៅស្រុកសំរោងទង ខេត្តកំពង់ស្ពឺ នាព្រឹកថ្ងៃ​ពុធ ១៤កើត ខែផល្គុន ឆ្នាំរកា ព.ស២៥៦១ ត្រូវនឹងថ្ងៃទី២៨ ខែកុម្ភៈ ឆ្នាំ២០១៨នេះ។

លោកនាយករដ្ឋមន្ត្រី បានបន្តថា «យើង​ត្រូវ​ការ​សហប្រតិបត្តិ​ការ​ជាមួយ​គេ​ គេ​ក៏​ត្រូវ​ការ​សហប្រតិបត្តិការ​ជាមួយ​យើង​ដែរ យើង​ជា​ប្រទេស​​នៃ​សមាជិក​អង្គការ​សហប្រជាជាតិ​ គេ​ក៏​ត្រូវ​ការ​យើង​គាំទ្រ​គេ យើង​ក៏​ត្រូវ​ការ​គេ​គាំទ្រ​យើង​នៅ​ពេល​បោះ​ឆ្នោត​ម្តងៗ គេ​ជា​ប្រទេស​មួយ​មាន​សិទ្ធិ​ប្រើប្រាស់​ឆ្នោត​មួយ​សន្លឹក យើង​ក៏​មាន​សិទ្ធិ​ប្រើប្រាស់​មួយ​សន្លឹកឆ្នោត​ ដូច្នេះ​មិន​មែន​យើង​ពឹងតែគេទេ គេក៏​ពឹង​យើង»​។

គួររំលឹកផងដែរថា លោកនាយករដ្ឋមន្ត្រី ហ៊ុន សែន ​ក៏​បាន​​បញ្ជាក់ការពិតទៅលើការប្រឌិតព័ត៌មានដូចដែល​រៀបរាប់ខាងលើម្តងហើយ កាលពីថ្ងៃទី២១ ខែកុម្ភៈ កន្លងទៅដោយ​លោក​បាន​មាន​ប្រសាសន៍ថា « «រឿងអីបានជានាំគ្នានិយាយថា បន្តិចទៀត ហ៊ុន សែន ទៅអូស្ត្រាលីគឺគេហៅទៅគាប? នាយករដ្ឋមន្ត្រីនៃប្រទេសមួយ ដែលមានឯករាជ្យ ហើយគឺជាសមាជិកស្មើភាពស្មើសិទ្ធិ និងមានសិទ្ធិវេតូផងដែរ សេចក្តីថ្លែងការណ៍របស់អាស៊ានក៏ចេញមិនរួចដែរបើមានការបង្គាប់បញ្ជា ឬការធ្វើសកម្មភាពណាមួយ ដែលផ្ទុយនឹងឯករាជ្យ អធិបតេយ្យភាព និងការជ្រៀតជ្រែកចូលកិច្ចការផ្ទៃក្នុងរបស់កម្ពុជា សូមផ្តាំទុកឱ្យហើយទៅ!»៕

(សូមទស្សនាវីដេអូ)លោកនាយករដ្ឋមន្ត្រី ហ៊ុន សែន បញ្ជាក់ថាប្រាក់បៀវត្សន៍កម្មករ មន្ត្រីរាជការ កងកម្លាំងប្រដាប់អាវុធ និងអ្នកចូលនិវត្តគឺត្រូវតម្លើងជារៀងរាល់ឆ្នាំ

(សូមទស្សនាវីដេអូ) លោកនាយករដ្ឋមន្ត្រី ហ៊ុន សែន បញ្ជាក់ថា យើងមិនខ្លាចនឹងការលះបង់អ្វីទាំងអស់ ឱ្យតែប្រជាជនរបស់យើងទទួលបានសេចក្តីសុខ

(សូមទស្សនា​វីដេអូ)៖ លោកនាយករដ្ឋមន្រ្តី ហ៊ុន សែន ថ្លែងថា នៅថ្ងៃទី២៩ ខែធ្នូ ២០១៨ខាងមុខ នឹងត្រូវរៀបចំពិធីខួប២០ឆ្នាំ នៃនយោបាយឈ្នះ-ឈ្នះ

លោកនាយករដ្ឋមន្រ្តី ហ៊ុន សែន នឹងអញ្ជើញជាអធិបតីក្នុងពិធី បិទសន្និបាតបូកសរុបការងារទេចរណ៍ និងចែកជ័យលាភីទីក្រុងស្អាតលើកទី២

នៅរសៀលថ្ងៃពុធ ១៤កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹង ទី២៨ ខែកុម្ភៈ ឆ្នាំ២០១៨ នេះ លោកនាយករដ្ឋមន្រ្តី ហ៊ុន សែន នឹងអញ្ជើញជាអធិបតីក្នុងពិធីបិទសន្និបាតបូកសរុបការងារទេចរណ៍ឆ្នាំ២០១៧ និងលើកទិសដៅឆ្នាំ២០១៨ អមជាមួយពិធីអបអរសាទរទិវាទីក្រុងស្អាតក្រោមប្រធានបទ «ទីក្រុងស្អាតដើម្បីទាំងអស់គ្នា និងពិធីចែកជ័យលាភីទីក្រុងស្អាតលើកទី២ សម្រាប់ឆ្នាំ២០១៨-២០២១»។

ពិធីនេះមានការអញ្ជើញចូលរួមពីសំណាក់មន្ត្រីនៃរាជរដ្ឋាភិបាលកម្ពុជា ដៃគូអភិវឌ្ឍន៍ អង្គការជាតិ អន្តរជាតិ តំណាងមន្ទីទេចរណ៍ខេត្ត តំណាងក្រុមហ៊ុនទេសចរណ៍ និងមន្ត្រីជំនាញពាក់ព័ន្ធ ជាច្រើនរូបទៀតផងដែរ៕

ក្រុមប្រឹក្សាធម្មនុញ្ញ ប្រកាសថាវិសោធនកម្ម ស្តីពីការរៀបចំ និងប្រព្រឹត្តិទៅ នៃក្រុមប្រឹក្សាធម្មនុញ្ញ គឺធ្វើឡើងដោយស្របតាមរដ្ឋធម្មនុញ្ញ

បន្ទាប់ពីពិនិត្យលើ ធម្មនុញ្ញភាព ទៅលើច្បាប់ស្តីពីវិសោធនកម្ម នៃច្បាប់ស្តីពីការរៀបចំ និងការប្រព្រឹត្តិទៅ នៃក្រុមប្រឹក្សាធម្មនុញ្ញនោះ ក្រុមប្រឹក្សាធម្មនុញ្ញ ដែលជាស្ថាប័នកំពូលមួយ បានប្រកាសថា វិសោធនកម្ម ច្បាប់នេះ បានដើរស្រប នឹងរដ្ឋធម្មនុញ្ញហើយ។ នេះបើតាមសេចក្តីសម្រេចរបស់ ក្រុមប្រឹក្សាធម្មនុញ្ញ នៅថ្ងៃទី២៨ ខែកុម្ភៈ ឆ្នាំ២០១៨។

សេចក្តីសម្រេចនេះ បានបញ្ជាក់ថា ច្បាប់ស្តីពីវិសោធនកម្ម មាត្រា២៦ មាត្រា២៧ថ្មី មាត្រា២៨ មាត្រា៣១ និងមាត្រា៣២ នៃច្បាប់ស្តីពីការរៀបចំ និងការប្រព្រឹត្តិទៅ នៃក្រុមប្រឹក្សាធម្មនុញ្ញ ដែលរដ្ឋសភាបានអនុម័ត កាលពីថ្ងៃទី១៤​ ខែកុម្ភៈ ឆ្នាំ២០១៨ នាសម័យប្រជុំរដ្ឋសភាជាវិសាមញ្ញ នីតិកាលទី៥ និងព្រឹទ្ធសភា បានពិនិត្យ និងឱ្យយោបល់ឯកភាពទាំងស្រុងលើទម្រង់ និងគិតច្បាប់ ដោយឥតកែប្រែ និងចាត់ទុកជាការប្រញ៉ាប់ ក្នុងសម័យប្រជុំលើកទី១១ នីតិកាលទី៣ នាថ្ងៃទី២១ ខែកុម្ភៈ ឆ្នាំ២០១៨ ត្រូវបានប្រកាសថា ស្របនឹងរដ្ឋធម្មនុញ្ញ។

សេចក្តីសម្រេចនេះ បានធ្វើឡើង នៅថ្ងៃទី២៨ ខែកុម្ភៈ ឆ្នាំ២០១៨ ក្នុងកិច្ចប្រជុំពេញអង្គ នៃក្រុមប្រឹក្សាធម្មនុញ្ញ ជាសេចក្តីសម្រេចស្ថាពរ បិទផ្លូវតវ៉ា ហើយមានអានុភាពអនុវត្តទៅលើអំណាចទាំងអស់ ដែលមានចែងក្នុង រដ្ឋធម្មនុញ្ញ និងត្រូវផ្សាយក្នុងរាជកិច្ច។

ខាងក្រោមនេះជាសេចក្តីសម្រេចរបស់ក្រុមប្រឹក្សាធម្មនុញ្ញ ៖

លោកនាយករដ្ឋមន្ត្រី ហ៊ុន សែន លើកឡើងថា គ្មានអ្វីល្អជាងរក្សាអ្វីដែលកំពុងមាននៅក្នុងដៃនោះទេ មានអ្នកខ្លះស្រែកថាដូរ ដោយមិនដឹងថាដូរទៅជាអ្វី

លោក​នាយករដ្ឋមន្ត្រី ហ៊ុន សែន បាន​ថ្លែងថា «គ្មាន​អ្វី​ល្អ​ជាង​រក្សា​អ្វី​ដែល​កំពុង​មាន​នៅ​ក្នុង​ដៃ​ មាន​អ្នក​ខ្លះ​ ដូរដូរ ដូរឬមិនដូរ ដូរ រួចចុះ​ដូរ​ហ្នឹង​បែរមុខទៅ​ខាងណា?» លោក​បាន​បន្តថា «អាដូរដែលមិនដឹងរឿងរ៉ាវហ្នឹងហើយ​ ដូរពី​សម្តេច​ព្រះ​នរោត្តម​សីហនុ តាមរយៈរដ្ឋប្រហារ​ទៅជា លន់ នល់​ បាន​មក​នូវ​សង្គ្រាម​ ចង់ដូរទៀត​ ក៏​បាន​មួយសារទៀត​ អស់​ ៣លាននាក់​ អាហ្នឹង​បាន​ត្បូង​ចប​បណ្តោយ​​ ដល់​ឥឡូវនេះ​មិនគិតធ្វើអីទេ​គិត​តែពី​ដូរ​ អាធ្វើ​បង្គន់​មួយ​មិន​ទាន់​ធ្វើ​បាន​ផង​ដូរទៀត​ ឯងធ្វើ​សាលាម៉ាកាគោក មកបបួលមិនដូរទេ​»។

​លោក​​នាយករដ្ឋមន្ត្រី ហ៊ុន សែន ថ្លែង​ដូចនេះ​ ក្នុង​ឱកាស​ដែលលោក​អញ្ជើញចុះ​ជួបសំណេះសំណាល ជាមួយជាមួយកូនក្មួយកម្មករ កម្មការិ​នីសរុបប្រមាណ១៧,៨២៨នាក់ មកពីរោងចក្រ សហគ្រាសចំនួន៨ នៅស្រុកសំរោងទង ខេត្តកំពង់ស្ពឺ នាព្រឹកថ្ងៃ​ពុធ ១៤កើត ខែផល្គុន ឆ្នាំរកា ព.ស២៥៦១ ត្រូវនឹងថ្ងៃទី២៨ ខែកុម្ភៈ ឆ្នាំ២០១៨នេះ។

ដោយ​ឃើញ​ជាក់ស្តែង​ចំពោះ​បក្ស​ប្រឆាំង​កន្លងមក មិនដែល​អបអរសារទរ សប្បាយរីករាយ​ជាមួយ​ភាព​រីកចំរើន និងល្បីល្បាញ​របស់កម្ពុជាលើឆាកអន្តរជាតិ​នោះ លោកនាយករដ្ឋមន្ត្រី ហ៊ុន សែន បាន​មាន​ប្រសាសន៍ថា «យើង​ពិនិត្យ​មើល​ប៉ុណ្ណេះ​ តើ​គេ​បាន​អបអរ​សាទរ​ ស៊ន ស៊ីវមី​ ដែល​ទទួល​មេដាយ​មាស​ទេ​? អត់ទេ តើ​គេបាន​អបអរ​សាទរ​ព្រះ​វិហារ​ សំបូរ​ព្រៃគុក​ ចូល​ជាបេតិកភណ្ឌ​ពិភពលោកទេ? អត់ទេ​ តើគេបានអបអរសាទរ​កីឡាករ កីឡាការនីរបស់​យើង​ដែល​ចេញ​ទៅ​ប្រកួត​នៅ​ខាង​ក្រៅ​បាន​មេដាយ​កំរិត​ពិភពលោក​ កម្រិត​អាស៊ី និង​កម្រិត​​អាស៊ាន​​ សូម្បី​តែ​រឿង​ប៉ុណ្ណឹងគេ​មិន​ហ៊ាន​អបអរសាទរផង​ តើគេអាចធ្វើជាមេដឹកនាំ​កម្ពុជា​បាន​ទេ​?»។

លោក​នាយករដ្ឋមន្ត្រី ហ៊ុន សែន ក៏​បាន​លើកឡើង​អំពី​គោលនយោបាយ​របស់​បក្ស​ប្រឆាំង​ដែល​ផ្ទុយ​គ្នា​ស្រឡះជាមួយ​គោលនយោបាយ​បក្ស​កាន់អំណាច «នៅ​ពេល​ដែល​យើង​បាន​អនុវត្ត​ន៍​នូវ​​គោល​នយោបាយ​មួយ​ជាក់លាក់​ ស្តី​ពី​ការ​បង្រួប​បង្រួមជាតិ​ ក្នុង​ពេល​ដែល​គេ​ដាក់​ចេញ​នូវ​ទិស​ដៅ​នយោបាយ​ មានឯង​អត់​អញ មាន​អញ​អត់​ឯង​ បើឈ្នះ រឹបអូសពីអ្នកមាន​ឱ្យអ្នកក្រ​ ហើយចុះ​អាគេអ្នកមានហ្នឹងគេខ្វះមធ្យោបាយណាស់ទៅហី? វាមិននាំ​ទៅ​រក​ការ​កាប់គ្នា?»  លោក​បាន​បន្តថា «ប៉ុន្តែ​ដោយសារ​តែ​មធ្យោបាយ​អញ្ចឹងហើយ បានវាអញ្ចឹង​ យល់ទេ? ទី១ មិនដែលឈ្នះ ទី២​ មាន​តែ​រក​អន្តរាយ​មក​ខ្លួន​ឯង​ប៉ុណ្ណឹង​ អត់​មាន​អី ខុសពីហ្នឹងទេ​»៕

(សូមទស្សនាវីដេអូ)៖ លោកនាយករដ្ឋម​ន្ត្រី ហ៊ុន សែន ថ្លែងថា ចក្ខុវិស័យស្តីពីការអភិវឌ្ឍ កាលពី ២០ឆ្នាំមុន បានក្លាយជាការពិត​ហើយ!

លោកនាយករដ្ឋមន្រ្តី ហ៊ុន សែន ថ្លែងថា ប្រទេសជាតិមួយដាច់ខាតត្រូវតែមានមធ្យោបាយការពារជាតិរបស់ខ្លួន

លោកនាយករដ្ឋមន្រ្តី ហ៊ុន សែន បានថ្លែងបង្ហើបឱ្យដឹងថា នៅយប់មិញនេះគ្រឿងសព្វាវុធទម្ងន់រាប់ម៉ឺនតោនត្រូវបានដឹកជញ្ជូនមកដល់កម្ពុជា ហើយបានដឹកយកទៅទុកដាក់រួចរាល់ផងដែរ ដោ​យលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិជាអ្នកទទួលខុសត្រូវ។ លោ​កបានថ្លែងដូចនេះ នៅព្រឹកថ្ងៃពុធ ១៤កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៨ ខែកុម្ភៈ ឆ្នាំ២០១៨ នេះ ក្នុងឱកាសអញ្ជើញជួបសំណេះសំណាលជាមួយកម្មករកម្មការិនីចំនួនជិត២ម៉ឺននាក់ មកពីរោងចក្រសហគ្រាសចំនួន៨ នៅភូមិរំដួល ឃុំត្រពាំងគង ស្រុកសំរោងទង ខេត្តកំ​ពង់ស្ពឺ។

លោកនាយករដ្ឋមន្រ្តី ហ៊ុន សែន បានគូសបញ្ជាក់ថា ប្រទេសជាតិមួយដាច់ខាតត្រូវតែមានមធ្យោបាយការពារជាតិរបស់ខ្លួន ហើយលោកបានចាត់ទុកសព្វាវុធទាំងនេះ គឺជាទំនិញពិ​សេសសម្រាប់ជាតិ ប៉ុន្តែលោកមិនបានបង្ហាញថា សព្វាវុធទាំងនោះមានអ្វីខ្លះនោះទេ គ្រាន់តែបានប​ញ្ជាក់ថាសព្វាវុធទាំងនេះគឺជាការពង្រឹងនូវមធ្យោបាយការពារជាតិកម្ពុជាតែប៉ុណ្ណោះ៕

ស្នងការដ្ឋាននគរបាលខេត្តស្វាយរៀង ប្រារព្ធទិវាជាតិ បង្ការ និងពន្លត់អគ្គីភ័យ លើកទី៣

ស្វាយរៀង៖ នៅព្រឹកថ្ងៃ ពុធ ១៤កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៨ ខែកុម្ភៈ ឆ្នាំ២០១៨ នៅសាលប្រជុំស្នងការដ្ឋាននគរបាលខេត្តស្វាយរៀង បានប្រារព្ធទិវាជាតិ បង្ការ និងពន្លត់អគ្គីភ័យ លើកទី៣ ថ្ងៃទី២២ ខែកុម្ភៈ ក្រោមអធិបតីភាព លោក ហ៊ូ វតន: អភិបាលរង នៃគណៈអភិបាលខេត្ត តំណាងលោក ម៉ែន វិបុល អភិបាលនៃគណៈអភិបាលខេត្ត ព្រមទាំង លោកឧត្តមសេនីយ៍ត្រី ខៀវ សុខុម ស្នងការស្តីទី លោកមេបញ្ជការរងកងរាជអាវុធហត្ថខេត្ត លោកមេបញ្ជារងតំបន់ប្រតិបត្តិការសឹករងខេត្ត និង លោក លោកស្រីឧត្តមសេនីយ៍ វរសេនីយ៍ស្នងការរងដោយមានការអញ្ជើញចូលរួមពី លោក លោកស្រី ប្រធានមន្ទីរអង្គភាពនានាជុំវិញខេត្ត អភិបាល ក្រុង/ស្រុក លោកអនុប្រធានសេនាធិការ លោកអនុប្រធានការិយាល័យ លោក លោកស្រីនាយការិយាល័យ លោកអធិការនគរបាលក្រុង/ស្រុក លោកមេបញ្ជាការវរៈទាំងពីរ លោកគ្រូអ្នកគ្រូ សិស្សានុសិស្ស និងតំណាងរោងចក្រសហគ្រាស សរុបវត្តមាន ៣១៥ នាក់៕

ខេត្តបាត់ដំបង រៀបចំសន្និបាទបូកសរុបការងារទេសចរណ៍ឆ្នាំ២០១៧ និងទិសដៅអនុវត្តបន្តឆ្នាំ២០១៨ អមជាមួយពិធី​អបអរសាទរ​ទិវាជាតិ​ទីក្រុងស្អាត​ ក្រោមប្រធានបទ​ “ទីក្រុងស្អាត​ ដើម្បីទាំងអស់គ្នា”​

បាត់ដំបង៖ នៅថ្ងៃពុធ ១៤កើត ខែផល្គុន ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៨ ខែកុម្ភៈ ឆ្នាំ២០១៨នេះ លោក ងួន រតនៈ អភិបាលនៃគណៈអភិបាលខេត្តបាត់ដំបង លោក សឿម ប៊ុនរិទ្ធ អភិបាលរងនៃគណៈអភិបាលខេត្ត និងលោកអភិបាលនៃគណៈអភិបាលក្រុងបាត់ដំបង បានអញ្ជើញចូលរួមក្នុងសន្និបាទបូកសរុបការងារទេសចរណ៍ឆ្នាំ២០១៧ និងទិសដៅអនុវត្តបន្តឆ្នាំ២០១៨ អមជាមួយពិធីអបអរសាទរទិវាជាតិទីក្រុងស្អាត ក្រោមប្រធានបទ “ទីក្រុងស្អាត ដើម្បីទាំងអស់គ្នា” និងពិធីចែកជ័យលាភីទីក្រុងស្អាតលើកទី២ សម្រាប់ឆ្នាំ២០១៨-២០២១ ក្រោមអធិបតីភាព លោក ថោង ខុន រដ្ឋមន្រ្តីក្រសួងទេសចរណ៍ និងជាប្រធានគណៈកម្មាធិការជាតិវាយតម្លៃទីក្រុងស្អាត នៅសណ្ឋាគាររ៉េស៊ីដង់សុខាភ្នំពេញ។

ក្នុងពិធីនេះផងដែរ លោកអភិបាលខេត្តបាត់ដំបង បានឡើងធ្វើបទបង្ហាញស្តីពីការដែលក្រុងបាត់ដំបង នៃខេត្តបាត់ដំបង ទទួលបានជ័យលាភីទីក្រុងទេសចរណ៍ស្អាតអាស៊ាន និងជ័យលាភីទីក្រុងស្អាតលើកទី២។

សូមបញ្ជាក់ថា៖ ក្រុងបាត់ដំបង នៃខេត្តបាត់ដំបង ធ្លាប់បានទទួលពានរង្វាន់ជ័យលាភីចំនួន០៣លើករួចមកហើយ ទី១- ទីក្រុងជ័យលាភីនិរន្តរភាពបរិស្ថានទីក្រុងអាស៊ាន ដែលពិធីទទួលធ្វើនៅទីក្រុងវៀងច័ន្ទ ប្រទេសឡាវ (២០១៥ ) ទី២- ទីក្រុងស្អាតជ័យលាភីលេខ១ ផ្ការំដួល៣ទង (២០១៥-២០១៨) ដែលពិធីទទួលធ្វើ នៅរាជធានីភ្នំពេញ ទី៣- ជ័យលាភីទីក្រុងទេសចរណ៍ស្អាតអាស៊ាន (២០១៨) នៅទីក្រុឈៀងម៉ៃ ប្រទេសថៃ និងទី៤- គឺជ័យលាភីទីក្រុងស្អាតផ្ការំដួល៣ទងលើកទី២ (២០១៨-២០២១) ដែលនឹងប្រារព្ធពិធីនៅរសៀលថ្ងៃទី២៨ ខែកុម្ភៈ ឆ្នាំ២០១៨នេះ ក្រោមអធិបតីភាពលោកនាយករដ្ឋមន្ត្រី ហ៊ុន សែន នៅសណ្ឋាគាររ៉េស៊ីដង់សុខាភ្នំពេញ៕

លោកនាយករដ្ឋមន្រ្តី ហ៊ុន សែន ថ្លែងថា នៅថ្ងៃទី២៩ ខែធ្នូ ២០១៨ខាងមុខនឹងត្រូវរៀបចំពិធីខួប២០ឆ្នាំនៃនយោបាយឈ្នះ-ឈ្នះ

លោកនាយករដ្ឋមន្រ្តី ហ៊ុន សែន បានថ្លែងថា នៅថ្ងៃទី២៩ ខែធ្នូ ឆ្នាំ២០១៨ខាងមុខ នឹងមានរៀបចំធ្វើពិធីខួបរំលឹកលើកទី២០នៃនយោបាយឈ្នះ-ឈ្នះតាមរយៈការសាងសង់នូវវិមានឈ្នះ​​-ឈ្នះដ៏ធំមួយដើម្បីរំលឹកអំពីការបញ្ចប់សង្រ្គាមតាមរយៈនៃនយោបាយឈ្នះ-ឈ្នះ។ លោ​កបានថ្លែងដូចនេះ នៅព្រឹកថ្ងៃពុធ ១៤កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៨ ខែកុម្ភៈ ឆ្នាំ២០១៨ នេះ ក្នុងឱកាសអញ្ជើញជួបសំណេះសំណាលជាមួយកម្មករកម្មការិនីចំនួនជិត២ម៉ឺននាក់ មកពីរោងចក្រសហគ្រាសចំនួន៨ នៅភូមិរំដួល ឃុំត្រពាំងគង ស្រុកសំរោងទង ខេត្តកំ​ពង់ស្ពឺ។

លោកនាយករដ្ឋមន្រ្តី ហ៊ុន សែន បានគូសបញ្ជាក់ថា ប្រសិនបើកាលពីពេលនោះពុំមានការអនុវត្តន៍នូវនយោបាយឈ្នះ-ឈ្នះនោះទេដែលអាចបញ្ចប់បាននូវសង្រ្គាម កុំថាឡើយឱកាសដែលយើងមានការងារធ្វើ គឺមានតែឱកាសរត់លូនក្រាបច្រើនជាងឱកាសរស់នៅបានសុខស្រួលប្រកបដោយសុភមង្គលដូចសព្វថ្ងៃនេះ។ លោកបានបន្ថែមថា នៅពេលដែលប្រទេសជាតិមួយមានសង្រ្គាមហើយ មិនត្រឹមតែលំបាកតែអ្នកដែលប្រឈមមុខដាក់គ្នានោះទេ អ្នកដែលនៅផ្នែកខាងក្រោយក៏លំបាកដែរ។ សូម្បីតែពលរដ្ឋស៊ីវិលក៏ត្រូវបានប្រមូលដើម្បីឱ្យជួយដឹកស្បៀងទៅកាន់សមរភូមិដែរ មានពេលខ្លះវាយទៅវាយមករាប់ទាំងការបោកគ្រាប់បែកគ្រប់កន្លែង វាយផ្តាច់ផ្លូវ វាយផ្តាច់ស្ពាន និងវាយរំខានដើម្បីកុំឱ្យកងទ័ពរដ្ឋាភិបាលមានលទ្ធភាពទៅវាយនៅកន្លែងដទៃបាន។

ប្រមុខរាជរដ្ឋាភិបាលកម្ពុជា ក៏បានសង្កត់ធ្ងន់ថា ប្រទេសកម្ពុជាយើងឆ្លងកាត់ការលំបាកគ្រប់បែបយ៉ាងច្រើនពេកហើយ ដោយសារនយោបាយឈ្នះ-ឈ្នះដែលមានឪពុកម្តាយជីដូនជីតារបស់កម្មករកម្មការិនីដែលបានចូលរួមចំណែកគាំទ្រអនុវត្តនូវនយោបាយឈ្នះ-ឈ្នះរបស់លោក ទើបធានាបាននូវការបញ្ចប់ទាំងស្រុងនៃសង្រ្គាម រក្សាបាននូវសុខសន្តិភាពនិងការអភិវឌ្ឍដែលអាចលើកកម្ពស់បាននូវជីវភាពរស់នៅរបស់កម្មករកម្មការិនីនៅពេលនេះ៕

ក្រសួងអប់រំគ្រោងបង្កើតសាលាជំនាន់ថ្មី ជាង២០០កន្លែងនៅគ្រប់ខេត្ត-ក្រុង ដោយផ្ដោតទៅលើមុខវិជ្ជា វិទ្យាសាស្រ្ត បច្ចេកទេស វិស្វកម្ម និងគណិតវិទ្យា

លោក ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា នៅថ្ងៃពុធ ១៤កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៨ ខែកុម្ភៈ ឆ្នាំ២០១៨នេះ បានបញ្ជាក់ឲ្យដឹងថា ក្រសួងគ្រោងបង្កើត សាលាជំនាន់ថ្មី ចំនួនជាង២០០សាលា នៅគ្រប់ខេត្ត-ក្រុង ដោយផ្ដោតទៅលើមុខវិជ្ជា វិទ្យាសាស្រ្ត បច្ចេកទេស វិស្វកម្ម និងគណិតវិទ្យា (STEM)។

ការបញ្ជាក់ឲ្យដឹងបែបនេះ បានធ្វើឡើងនៅក្នុង សិក្ខាសាលា ស្តីពីការសិក្សាមុខវិជ្ជា វិទ្យាសាស្រ្ត បច្ចេកទេស វិស្វកម្ម និងគណិតវិទ្យា (STEM) របស់គំរោងផ្តួចផ្តើម ស្តីពីមេដឹកនាំយុវជន វ័យក្មេងនៅអាស៊ីអាគ្នេយ៍ (YSEALI) ដោយរៀបចំធ្វើឡើងដោយ ស្ថានទូតអាមេរិក រួមជាមួយនឹងមូលនិធិអាស៊ី និងគំរោង STEM Cambodia នៅព្រឹកថ្ងៃទី២៨ ខែកុម្ភៈ ឆ្នាំ២០១៨នេះ។

ក្នុងការថ្លែងប្រាប់ក្រុមអ្នកយកព័ត៌មាន លោក ហង់ ជួនណារ៉ុង បានបញ្ជាក់ផងដែរថា «ជាការពិតណាស់ នៅទីតាមជនបទ មានការខ្វះខាតបើប្រៀបធៀបនឹងទីក្រុង ទាំងគ្រូបង្រៀន ទាំងបន្ទប់ពិសោធ​ន៍នៅមានកម្រិត ប៉ុន្ដែក្រសួងនឹងបង្កើត សាលាជំនាន់ថ្មី ឬក៏ថាជាសាលាគំរូ ជាង២០០សាលា នៅគ្រប់ខេត្ត-ក្រុង ដោយផ្ដោតទៅលើ STEM»។

លោកបានលើកឡើងទៀតថា ក្នុងពេលបច្ចុប្បន្ន ក្រសួង បានចំណាយថវិកាជាង៥០% ផ្ដោតទៅលើ STEM ដោយសារតែ STEM នេះ មិនមែនផ្ដល់ទៅដល់ តែសិស្សធំៗនោះទេ គឺផ្ដល់តាំងពីនៅក្មេង ដោយរៀនចាប់ ផ្ដើមពីមូលដ្ឋានតែម្ដង។

លោក ហង់ ជួនណារ៉ុន បានកត់សម្គាល់ថា ប្រទេសកម្ពុជា មានការប្ដេជ្ញាចិត្តនៅក្នុងការកសាង និងបណ្ដុះបណ្ដាលកម្លាំងពលកម្ម ដើម្បីបំពេញបាននូវតំរូវការថ្នាក់ជាតិ និងដោយឡែក តំរូវការក្នុងការ អភិវឌ្ឍឧស្សាហកម្ម និងដើម្បីមានសមត្ថភាពប្រកួតប្រជែង នៅក្នុងទីផ្សារពលកម្ម ក្នុងតំបន់ដែលកាន់ តែមានភាពបើកចំហរខ្លាំងឡើង។

លោក បានបន្ថែមទៀតថា ពេលនេះ គេមើលឃើញថា អាស៊ានមានការធ្វើសមាហរណកម្មកាន់តែច្រើន ហើយការសិក្សាមុខវិជ្ជា វិទ្យាសាស្រ្ត បច្ចេកទេស វិស្វកម្ម និងគណិតវិទ្យា (STEM) បានបើកឲ្យមានឱកាសធំទូលាយ ឆ្លងព្រំដែន។

លោក William Heidt ឯកអគ្គរដ្ឋទូតអាមេរិក ប្រចាំនៅកម្ពុជា បានថ្លែងថា ប្រជាជនកម្ពុជាដែលភាគច្រើន ស្ថិតនៅក្នុងវ័យក្មេង គឺជាអត្ថប្រយោជន៍មួយយ៉ាងធំ សម្រាប់ប្រទេស ហើយជាទុនមួយយ៉ាងធំ សម្រាប់ប្រទេសកម្ពុជា។

លោក William Heidt បន្ដថា «ខ្ញុំជឿយុវជនទាំងអស់ គួរតែមានឱកាសបានក្លាយជាអ្នក បង្កើតថ្មី អ្នកជំនាញ ផ្នែកសិក្សាអប់រំ អ្នកស្រាវជ្រាវ និងជាអ្នកដឹកនាំ ដែលអាចដោះស្រាយ បញ្ហាប្រឈមបន្ទាន់បំផុតរបស់ ប្រទេសកម្ពុជា និងពិភពលោក។ ការសិក្សា មុខវិជ្ជា STEM គឺជាមធ្យោបាយមួយ ដ៏ប្រពៃក្នុងការរៀបចំសិស្ស និស្សិតជំនាន់ក្រោយ ឲ្យប្រែក្លាយចក្ខុវិស័យ នេះ ឲ្យទៅជាការពិត»។

សូមបញ្ជាក់ថា សិក្ខាសាលាស្ដីពីការសិក្សាមុខវិជ្ជា STEM របស់គំរោងមេដឹកនាំ យុវជនវ័យក្មេងនៅ អាស៊ីអាគ្នេយ៍នេះ ប្រព្រឹត្ដទៅចាប់ពីថ្ងៃទី២៨ ខែកុម្ភៈ ដល់ថ្ងៃទី៣ ខែមីនា ដោយមានការចូលរួមនៃយុវជន យុវនារីវ័យក្មេងចំនួន៥៩នាក់ ដែលមកពីប្រទេសអាស៊ានទាំង១០ ដោយរួមទាំងប្រទេសកម្ពុជាផងដែរ ដើម្បីជំរុញការសិក្សាមុខវិជ្ជា STEM។

សិក្ខាសាលានេះ នឹងផ្តោតលើសារៈសំខាន់ នៃការសិក្សាមុខវិជ្ជា STEM ភាពខ្វះចន្លោះ ក្នុងជំនាញមុខវិជ្ជា STEM នារី ដែលសិក្សាមុខវិជ្ជា STEM និងគំនិតថ្មីៗ ទាក់ទងនឹងមុខវិជ្ជា STEM ផងដែរ ៕

អភិបាល​ខេត្តព្រះសីហនុ​ ចូលរួមជាអធិបតី​ក្នុងទិវាជាតិបង្ការ​ និងពន្លត់​អគ្គិភ័យ ខេត្ត​

ព្រះសីហនុ៖ នៅក្នុងវេទិកាបុណ្យជាតិ ស្ថិតក្នុងសង្កាត់លេខ៣ ក្រុង-ខេត្តព្រះសីហនុ នៅថ្ងៃទី១២កើត ខែផល្គុន ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៦ ខែកុម្ភៈ ឆ្នាំ២០១៨ អាជ្ញាធរខេត្តព្រះសីហនុ បានប្រារព្ធពិធីអបអរសាទរខួបលើកទី៣ ទិវាជាតិបង្ការ និងពន្លត់អគ្គិភ័យ ដោយមានថ្នាក់ដឹកនាំ មន្ត្រីរាជការ មន្ទីរ អង្គភាព ស្ថាប័នរដ្ឋ ប្រជាពលរដ្ឋ និងសិស្សានុសិស្សចូលរួមក្រោមអធិបតីភាពលោក យន្ត មីន អភិបាលនៃគណៈអភិបាលខេត្តព្រះសីហនុ។

លោកឧត្តមសេនីយ៍ត្រី ប៊ួរ សុធី ស្នងការរងទទួលការងារអាវុធជាតិផ្ទុះ និងអគ្គិភ័យបានឲ្យដឹងថា ក្នុងឆ្នាំ២០១៧ កន្លងមក មានករណីអគ្គិភ័យកើតឡើងចំនួន ១៩លើក ក្នុងនោះឆេះផ្ទះ៧លើក ឆេះបន្ទប់ផ្ទះសំណាក់៣លើក ឆេះរថយន្តកំពុងបើបរ ៣លើក ឆេះឡក្នុងរោងចក្រ២លើក ឆេះរោងសិប្បកម្ម ១លើក ឆេះដំបូលបឹងកាឡូ ២លើក និងឆេះបន្ទប់ខារ៉ាអូខេ ១លើក។

លោកឧត្តមសេនីយ៍ត្រី បានបន្តទៀតថា គ្រោះថ្នាក់អគ្គិភ័យខាងលើបណ្ដាលឲ្យស្លាប់មនុស្សម្នាក់ និងរងរបួស៤នាក់ ។ ក្នុងត្រីមាសទី១ ឆ្នាំ២០១៨នេះ មានអគ្គិភ័យកើតឡើងចំនួន៦លើក បណ្ដាលឲ្យស្លាប់មនុស្ស ០១នាក់។

លោក យន្ត មីន អភិបាលខេត្តព្រះសីហនុ បានកោតសរសើរចំពោះការខិតខំប្រឹងប្រែងរបស់កងកម្លាំងនគរបាល ក៏ដូចជាកងរាជអាវុធហត្ថខេត្ត ដែលបានចូលរួមអន្តរាគមន៍ជួយពន្លត់អគ្គិភ័យនៅក្នុងខេត្តបានទាន់ពេលវេលា ធ្វើឱ្យប្រជាពលរដ្ឋមានទំនុកចិត្ត។ ទិវាជាតិបង្ការ និងពន្លត់អគ្គិភ័យនាពេលនេះ គឺជាយុទ្ធនាការដ៏ធំមួយក្នុងការបំផុសស្មារតីប្រជាពលរដ្ឋឱ្យមានការប្រុងប្រយ័ត្ន និងមានការចូលរួមពីស្ថាប័នជាតិ អង្គការសង្គមស៊ីវិល វិស័យឯកជន ជាពិសេសប្រជាពលរដ្ឋអំពីគ្រោះមហន្តរាយផ្សេងៗបណ្តាលមកពីអគ្គិភ័យ ដើម្បីជំរុញឱ្យមន្រ្តីពន្លត់អគ្គិភ័យទាំងអស់មានសមត្ថភាពបន្ថែមទៀតនៅពេលមានករណីអគ្គិភ័យកើតឡើងដោយយថាហេតុណាមួយ ក្នុងសកម្មភាពជួយសង្គ្រោះឱ្យបានទាន់ពេលវេលា ពិសេសត្រូវយកចិត្តទុកដាក់ទប់ស្កាត់ភ្លើងឆេះព្រៃនៅរដូវប្រាំងផងដែរ៕

ខេត្តព្រះសីហនុ បើកកិច្ចប្រជុំពិភាក្សាអំពីការរៀបចំពិធីដុតបំផ្លាញគ្រឿងញៀនខុសច្បាប់

ព្រះសីហនុ៖ នៅសាលាខេត្តព្រះសីហនុ មានបើកកិច្ចប្រជុំរវាងប្រតិភូក្រសួងយុត្តិធម៌ដែលដឹកនាំដោយលោក ប៉ុក ម៉ាន់នី អនុរដ្ឋលេខាធិការក្រសួងយុតិ្តធម៌ ជាមួយលោក គង់ វិតាណៈ អភិបាលរងខេត្តព្រះសីហនុ ក្នុងគោលបំណងពិភាក្សាអំពីការរៀបចំពិធីការដុតបំផ្លាញគ្រឿងញៀនខុសច្បាប់ នៅថ្ងៃទី២៧ ខែកុម្ភៈ ឆ្នាំ២០១៨ ។

តាមប្រសាសន៍លោក ប៉ុក ម៉ាន់នី អនុរដ្ឋលេខាធិការក្រសួងយុតិ្តធម៌ បានអោយដឹងថា លោកឩបនាយករដ្ឋមន្ត្រី ស ខេង ស្នើឱ្យក្រសួងយុត្តិធម៌ជ្រើសរើសខេត្តចំនួនប្រាំ ជាកន្លែងសម្រាប់ដុតបំផ្លាញគ្រឿងញៀន ដោយយោងតាមអនុសាសន៍របស់លោកឩបនាយករដ្ឋមន្ត្រី ស ខេង ក្រសួងយុត្តិធម៌ ក៏បានសម្រេចជ្រើសរើសយកខេត្តព្រះសីហនុ ព្រោះកន្លងមកខេត្តព្រះសីហនុធ្វើការដុតបំផ្លាញគ្រឿងញៀន គឺតែងតែធ្វើនៅថ្ងៃទិវាប៉ុណ្ណោះ។

ក្នុងឱកាសនេះ លោក គង់ វិតាណៈ អភិបាលរងខេត្តព្រះសីហនុ បានមានប្រសាសន៍ ថ្លែងអំណរគុណគណៈប្រតិភូដែលបានអញ្ជើញចូលរួមប្រជុំនាថ្ងៃនេះ។លោកក៏បានឱ្យដឹងថា ចំពោះទីតាំងសម្រាប់ការដុតបំផ្លាញគ្រឿងញៀននេះ គឺមានតែទីតាំងមួយប៉ុណ្ណោះ ដែលអាចដុតបំផ្លាញបាននោះគឺតំបន់ក្បាលឆាយ នឹងមានអ្នកចូលរួមចំនួនពីរពាន់នាក់ សម្រាប់ខេត្តព្រះសីហនុ។
បន្ថែមពីលើនេះអង្គប្រជុំនេះក៏បានពិភាក្សាអំពីការរៀបចំថវិកា និងការរៀបចំសមាសភាពចូលរួមជាដើម។

ក្រោយពីកិច្ចប្រជុំនេះបានបញ្ចប់លោក ប៉ុក ម៉ាន់នី អនុរដ្ឋលេខាធិការក្រសួងយុតិ្តធម៌ ជាមួយលោក គង់ វិតាណៈ អភិបាលរងខេត្តព្រះសីហនុ ព្រមទាំងសមាជិកអង្គប្រជុំចុះពិនិត្យទីកន្លែងត្រៀមប្រារព្ធពិធីដែលស្ថិតនៅក្នុងតំបន់ក្បាលឆាយ សង្កាត់លេខ១ ក្រុងព្រះសីហនុ៕