(ភ្នំពេញ)៖ លោកនាយករដ្ឋមន្ត្រី ហ៊ុន សែន នៅរសៀលថ្ងៃទី២១ ខែតុលានេះ បានចេញសេចក្តីសម្រេច ស្តីពីការតែងតាំងសមាសភាពក្រុមប្រឹក្សាជាតិសេដ្ឋកិច្ច និងសង្គមឌីជីថល។
ក្រុមប្រឹក្សាជាតិសេដ្ឋកិច្ច និងសង្គមឌីជីថល មានលោកនាយករដ្ឋមន្រ្តី ហ៊ុន សែន ជាប្រធាន និងមានអនុប្រធាន សមាជិក ជាឧបនាយករដ្ឋមន្ត្រី ទេសរដ្ឋមន្ត្រី និងរដ្ឋមន្ត្រីនៃបណ្តាក្រសួងស្ថាប័ននានាជាច្រើនរូប៕
(ពោធិ៍សាត់)៖ នារសៀលថ្ងៃទី២០ ខែតុលា ឆ្នាំ២០២១ នៅវេទិកាក្នុងសាលាខេត្ត លោក ជាវ តាយ អភិបាលនៃគណៈអភិបាលខេត្តពោធិ៍សាត់ និងជាប្រធានគណៈកម្មការខេត្ត ប្រយុទ្ធប្រឆាំងជំងឺកូវីដ១៩ ដោយមានការចូលរួមពីថ្នាក់ដឹកនាំខេត្តមួយចំនួន បានទទួលអំណោយសប្បុរសធម៌ ជាអង្ករចំនួន១០តោន ពីស្ថាប័នស្នងការដ្ឋាននគរបាលខេត្តពោធិ៍សាត់ ដើម្បីទុកចែកជូនប្រជាពលរដ្ឋក្រីក្រខ្វះខាត ក្នុងអំឡុងនៃការរីករាលដាលជំងឺកូវីដ១៩។
មានប្រសាសន៍ក្នុងឱកាសនោះលោក ជាវ តាយ បានលើកបញ្ជាក់ថា បញ្ហាការឆ្លងរីករាលដាលជំងឺកូវីដ១៩ គឺជាបញ្ហាសកល ដែលធ្វើឱ្យប៉ះពាល់ដល់សុខភាពអាយុជីវិតប្រជាជន និងសេដ្ឋកិច្ចសង្គមយ៉ាងធ្ងន់ធ្ងរ។ បច្ចុប្បន្ននៅតាមបណ្ដាប្រទេសក្នុងពិភពលោក បាននឹងកំពុងយកចិត្តទុកដាក់យ៉ាងខ្លាំង ក្នុងការប្រយុទ្ធប្រឆាំងនិងបង្ការទប់ស្កាត់ ជំងឺដ៏កាចសាហាវនេះ។ សម្រាប់កម្ពុជាយើង ប្រមុខរាជរដ្ឋាភិបាល ដែលមានលោកនាយករដ្ឋមន្ត្រី ហ៊ុន សែន ជាប្រមុខដឹកនាំ តែងតែបានយកចិត្តទុកដាក់ ជំរុញដាក់ចេញនូវវិធានការនានា ដើម្បីអនុវត្តន៍ ក្នុងការបង្ការទប់ស្កាត់ជំងឺនេះ ពិសេសការជម្រុញចាក់វ៉ាក់សាំងជូនប្រជាជន តាមគោលការណ៍ស្ម័គ្រចិត្ត មិនបង់ថ្លៃ និងមិនរើសអើង សំដៅផ្ដល់ភាពសាំក្នុងសហគមន៍ ដើម្បីដំណើរការបើកប្រទេស និងជំរុញការស្ដារ និងអភិវឌ្ឍសេដ្ឋកិច្ចលើគ្រប់វិស័យឡើងវិញ។
ក្នុងនាមរដ្ឋបាលខេត្ត លោកអភិបាលក៏បានថ្លែងអំណរគុណ និងកោតសរសើរចំពោះស្ថាប័នស្នងការដ្ឋាននគរបាលខេត្ត ដែលជាម្ចាស់អំណោយ និងបានចាត់ទុកអំណោយទាំងអស់នេះ ពិតជាសំខាន់ក្នុងស្មារតី និងកាយវិការមនុស្សធម៌ដ៏ប្រពៃ ដើម្បីរួចចំណែកជាមួយរដ្ឋបាលខេត្តពោធិ៍សាត់ ដែលកំពុងមានតម្រូវការចាំបាច់ សម្រាប់ជួយដល់ប្រជាពលរដ្ឋ ដែលងាយរងគ្រោះ និងរងផលប៉ះពាល់ដោយជំងឺកូវីដ១៩។
ក្នុងដដែលនោះលោក ជាវ តាយ ក៏បានដឹកនាំអភិបាលរងខេត្ត មន្ទីរជំនាញ និងអភិបាលក្រុងស្រុក ចូលរួមក្នុងកិច្ចប្រជុំបន្ទាន់មួយ ជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ពាក់ព័ន្ធនឹងវិធានការការពារ ក្នុងការប្រារព្ធពិធីបុណ្យសព សម្រាប់អ្នកជំងឺកូវីដ១៩ ដើម្បីការពារមិនឱ្យចម្លងដល់គ្រួសារសព និងអ្នកចូលរួមពិធី តាមរយៈប្រព័ន្ធនិម្មិត Zoom នៅសាលប្រជុំ Video Conferenceផងដែរ៕
កោះកុង៖ លោក អ៊ុក ភ័ក្រ្តា អភិបាលរង នៃគណៈអភិបាលខេត្តកោះកុង និងសហការី បានចុះជួបសំណេះសំណាល និងនាំយកគ្រឿងឧបភោគបរិភោគ និងថវិកា ១លានរៀល សម្រាប់កុមារកំព្រា ៩នាក់ និងអ្នកមើលថែកុមារ ២០ម៉ឺនរៀល (ម្នាក់) ក្នុងមណ្ឌលកុមារកំព្រាខេត្តកោះកុង។ ក្នុងនោះលោកអភិបាលរងខេត្តក៏បានឧបត្ថម្ភថវិកា ដើម្បីសាងសង់សំយាបដំបូលអគារស្នាក់នៅរបស់កុមារ ដើម្បីការពារភ្លៀងសាច និងការពារក្តៅផងដែរ។
នាឳកាសនេះ លោកអភិបាលរងបាននាំប្រសាសន៍ផ្តាំផ្ញើរបស់លោកអភិបាលខេត្ត ដល់ក្មួយៗ ប្អូនៗ កុមារកំព្រារ ត្រូវប្រឹងប្រែងរៀនសូត្រ រៀបចំខ្លួនឲ្យក្លាយជាមនុស្សល្អ និងចូលរួមជួយដល់សង្គម និងប្រទេសជាតិនាថ្ងៃអនាគត។ ក្នុងនោះរដ្ឋបាលខេត្ត នឹងនៅតែបន្តគាំទ្រជួយដោះស្រាយរាល់បញ្ហាដែលកើតមាននៅក្នុងមណ្ឌលកុមារកំព្រាខេត្តកោះកុង។
សម្ភារដែលមានឧបត្ថម្ភមាន ៖ អង្ករ២បាវ ទឹកសុទ្ធ ១០យួរ សាច់គោងៀតម២កេស និងម៉ាស់ ១កេសធំ (២៥០០ម៉ាស់)៕
កោះកុង៖នៅថ្ងៃទី២១ ខែតុលា ឆ្នាំ២០២១ លោក អ៊ុក សុតា នាយករង រដ្ឋបាលសាលាខេត្តកោះកុង និងជាប្រធានក្រុមការងារមន្ត្រីបង្គោលព័ត៌មានវិទ្យាខេត្ត បានសម្របសម្រួល បើកវគ្គបណ្តុះបណ្តាល ស្តីពីការគ្រប់គ្រង និងប្រើប្រាស់កម្មវិធី Zoom។
នាឱកាសនោះ លោក អ៊ុក សុតា បានលើកឡើងថា ក្នុងបរិបថកូវីដ-១៩ មន្ត្រីរាជការត្រូវអនុវត្តការងារតាមតួនាទី ភារកិច្ចរបស់ខ្លួន ហើយបច្ចុប្បន្នដោយសារការរីករាលដាលជំងឺកូវីដ-១៩ ដូច្នេះតម្រូវឱ្យការប្រជុំតាមប្រព័ន្ធ អនឡាញ ពិតជាត្រូវការចាំបាច់។
លោកបានបន្តថា ដោយមានការគាំទ្រពីសំណាក់លោកអភិបាលខេត្ត ក្រុមការងារព័ត៍មានវិទ្យាខេត្ត បានលើកយកកម្មវិធី Zoom ដើម្បីងាយស្រួល ក្នុងការរៀបចំកិច្ចប្រជុំនានានៅតាមមន្ទីរ អង្គភាព ហើយកិច្ចការនេះ អភិបាលខេត្ត បានយកចិត្តទុកដាក់បំផុត និងធ្វើយ៉ាងណាឱ្យក្រុមការងារធ្វើបទបង្ហាញ ដែលអាចយកទៅអនុវត្តការងារនៅមន្ទីរ អង្គភាព បានល្អប្រសើរ ងាយស្រួល រហ័ស ទាន់ពេលវេលា និងចំណាយតិច។
ជាមួយគ្នាលោកក៏បានសំណូមពរសមាជិកទាំងអស់យកចិត្តទុកដាក់ ស្តាប់បទបង្ហាញ ដើម្បីទទួលបានចំណេះដឹងថ្មីនេះ ក្រោយពីបញ្ចប់វគ្គបណ្តុះបណ្តាលនេះ សង្ឃឹមថាលោក លោកស្រី ជាមន្ត្រីជំនាញបន្តយកចិត្តទុកដាក់ ក្នុងការរៀបចំកិច្ចប្រជុំជូនថ្នាក់ដឹកនាំ និងរៀបចំព័ត៌មាន របស់អង្គភាពឱ្យបានគ្រប់ជ្រុងជ្រោយ និងទាន់ពេលវេលាផងដែរ៕
ព្រះសីហនុ៖ នៅថ្ងៃទី២១ ខែតុលា ឆ្នាំ២០២១ លោក គួច ចំរើន អភិបាល នៃគណៈអភិបាលខេត្តព្រះសីហនុ និងលោក សូ ជុងហួរ សមាជិកក្រុមប្រឹក្សាខេត្តព្រះសីហនុ បានអញ្ជើញចូលរួមក្នុងកិច្ចប្រជុំលើកទី១៩ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ក្រោមអធិបតីភាពលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ តាមរយៈប្រព័ន្ធវិដេអូ Zoom Meeting ៕
