ប្រជាពលរដ្ឋ និងយុវជនចំនួន ៣៧០ នាក់ ក្នុងឃុំកុមារាជា ត្រូវក្រុមការងារថ្នាក់ជាតិ​ ចុះមូលដ្ឋានឃុំកុមារាជា ស្រុកបាទី ខេត្តតាកែវ រៀបចំដំណើរទស្សនកិច្ច សិក្សាទៅកាន់ខេត្តព្រះសីហនុ សម្រាប់រយៈពេល ២ថ្ងៃ

នៅថ្ងៃទី២១-២២ ខែកម្ភៈនេះ ក្រោមការដឹកនាំចង្អុលបង្ហាញរបស់ឯកឧត្តម ស្វាយ ស៊ីថា រដ្ឋលេខាធិការទីស្តីការគណៈរដ្ឋមន្ត្រី ឯកឧត្តម ស្វាយ សុវណ្ណរិទ្ធ អនុប្រធានក្រុមការងារថ្នាក់ជាតិ ចុះមូលដ្ឋានឃុំកុមារាជា រួមនិងសមាជិកក្រុមការងារ បានរៀបចំដំណើរទស្សនកិច្ច និងកំសាន្តមួយជូនប្រជាពលរដ្ឋ និងយុវជនសរុបចំនួន ៣៧០ នាក់ ទៅកាន់ខេត្តព្រះសីហនុ។

 នៅក្នុងកម្មវិធីដំណើរទស្សនកិច្ចថ្ងៃទី១ បងប្អូនយុវជន និងប្រជាពលរដ្ឋបានសិក្សាស្វែងយល់អំពីចំការដំណាំដូងប្រេង ចង្វាក់ផលិតកម្មកែច្នៃដូងប្រេង គម្រោងកសិកម្មនានា និងកំពង់ផែឧញ៉ាម៉ុងរបស់ឯកឧត្តម បណ្ឌិត ម៉ុង រិទ្ធី រួចបន្តទៅលេងនៅឆ្នេរអូរឈើទាល និងពិសារភោជនាអាហារពេលល្ងាច ដោយមានដូរតន្ត្រីរាំកំសាន្តរហូតដល់ម៉ោង ១១ យប់។ លុះព្រឹកឡើងថ្ងៃទី២ ក្រុមការងារក៏បានរៀបចំដំណើរទស្សនាកំសាន្តតាមឆ្នេរសមុទ្រ និងរមណីដ្ឋានទឹកធ្លាក់ក្បាលឆាយ រួមនឹងពិសារអាហារថ្ងៃត្រង់នៅទីនោះរហូតដល់ពេលរសៀលទើបវិលត្រឡប់មកឃុំកុមារាជាវិញ។

 នៅក្នុងដំណើរទស្សនកិច្ចនោះ បានបង្កលក្ខណៈឱ្យបងប្អូនប្រជាពលរដ្ឋ យុវជន អាជ្ញាធរមូលដ្ឋាន និងសមាជិកក្រុមការងារថ្នាក់ជាតិទាំងអស់ ក្នុងទិដ្ឋភាពសប្បាយរីករាយបំផុត កាន់តែមានភាពជិតស្និទ្ធ ក្នុងស្មារតីយោគយល់គ្នា និងបានយល់ពីតម្រូវការជាមូលដ្ឋានកាន់តែច្បាស់ថែមទៀត ក្នុងគោលដៅរៀបចំផែនការការងារថ្មី និងរកដំណោះស្រាយរួមគ្នារួមបន្តទៀត ដើម្បីផលប្រយោជន៍ និងការអភិវឌ្ឍនៅតាមសហគមន៍មូលដ្ឋានរបស់បងប្អូន។

 កម្មវិធីដំណើរទស្សនកិច្ចនេះ បានប្រព្រឹត្តទៅប្រកបដោយជោគជ័យ ក៏ដោយសារការជួយជ្រោមជ្រែង ឧបត្ថម្ភគាំទ្រ ដោយសម្ព័ន្ធយុវជនកម្ពុជាឃុំកុមារាជា សហភាពសព័ន្ធយុវជនកម្ពុជា និងយុវជនកាកបាទក្រហមកម្ពុជាថ្នាក់ជាតិផងដែរ៕

ក្រុមជំនួយការសម្តេចតេជោ នាំយកអំណោយចែកជូនប្រជាពលរដ្ឋទីទ័លក្រ នៅខេត្តកំពង់ស្ពឺ ចំនួន១២គ្រួសារ

តាមរយៈបេសកកម្មចុះចែកអំណោយស្បៀងសប្បុរសធម៌ សម្តេចតេជោ ហ៊ុន សែន រៀងរាល់​សប្តាហ៍ ជូនប្រជាពលរដ្ឋទីទ័លក្រនៅមូលដ្ឋាន បានផ្តល់នូវឱកាស​ផ្ទាល់ជាច្រើនដល់​ក្រុមជំនួយ​ការសម្តេចតេជោ ក្នុងការស្វែងយល់ដឹងពីសុខទុក្ខប្រជាពលរដ្ឋមូលដ្ឋានលើគ្រប់វិស័យ ដែល​មាន​ន័យជាការស្ទង់មតិដ៏សំខាន់ ក្នុងការទទួលបានពត៌មានពិតនៅមូលដ្ឋាន​នីមួយៗ។

កាលពីថ្ងៃទី១៥ ខែកុម្ភៈ ឆ្នាំ២០១៦ ក្រុមជំនួយការសម្តេចតេជោ ដឹកនាំដោយ លោក ខាត់ សុគន្ធី អមដំណើរជាមួយដោយ លោក មាស សុគន្ធមុនី សហការជាមួយភ្នាក់ងារស្ម័គ្រចិត្ត​ប្រចាំនៅ​ខេត្តកំពង់ស្ពឺ របស់ " ក្រុមជំនួយការ ដើម្បីប្រជាជន" បានចុះទៅសួរសុខទុក្ខ​បងប្អូន​ប្រជា​ពលរដ្ឋ​​នៅភូមិសង្គ្រាមបូរណ៍ ឃុំទួលអំពិល ស្រុកបរសេដ្ឋ ខេត្តកំពង់ស្ពឺ ដោយនាំយកមក​ជា​មួយ​​នូវ​​ស្បៀង​​​សប្បុរសធម៌សម្តេចតេជោ ចែកជូនគ្រួសារទីទ័លក្រចំនួន១២គ្រួសារ ដែលក្នុង​១​​គ្រួសារៗ ទទួលបាន ៖ អង្ករ ១០គីឡូក្រាម, មីយើង ១កេស, ទឹកស៊ីអ៊ីវ៦ដប និងទឹកត្រី៦ដប។

ក្នុងឱកាសនាំយកអំណោយសប្បុរសធម៌ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជា​ណា​ចក្រកម្ពុជា ចែកជូនប្រជាពលរដ្ឋក្នុងភូមិឃុំខាងលើនេះ លោក ខាត់ សុគន្ធី ជំនួយការ​សម្តេចតេជោ បានពាំនាំនូវការផ្តាំផ្ញើសួរសុខទុក្ខពី សម្តេចតេជោ ហ៊ុន សែន ដែលសម្តេច​ជារដ្ឋបុរសមានព្រហ្មវិហារធម៌ ប្រកបដោយទឹកចិត្តស្រឡាញ់ប្រជាជន និងតែងតែគិតគូរ​ដល់ការលំបាករបស់ប្រជាពលរដ្ឋ ហើយសមិទ្ធផលដ៏មហាសាល ដែលសម្តេចតេជោ ហ៊ុន សែន បានសម្រេចជូនជាតិ និងប្រជាជនកម្ពុជាគឺសន្តិភាព។ ដើម្បីគុណតម្លៃនេះ សម្តេចតេជោ ហ៊ុន សែន បានផ្តាំផ្ញើដល់ប្រជាពលរដ្ឋគ្រប់រូប គ្រប់និន្នាការ ត្រូវរួមគ្នាការពារថែរក្សាសន្តិភាព​នេះឲ្យ​ឋិតឋេរ ពោលគឺប្រជាជាតិយើង ត្រូវដើរចៀសឲ្យឆ្ងាយពីគន្លងអតីតកាល ជាពិសេស កុំជឿតាម​ការ​​ញុះញុង អុចអាល បញ្ឆេះកំហឹងផ្ទៃក្នុងប្រជាជាតិខ្មែរ ពីសំណាក់ក្រុមឃោសនានយោបាយ​បែបទុច្ចរិត​ ព្រោះកម្ពុជាត្រូវការរបបប្រជាធិបតេយ្យសេរីពហុបក្ស តែមិនអាចអនុញ្ញាតឲ្យជនណា ឬក្រុមណាមួយ ជ្រកកោនដើម្បីបំផ្លាញសន្តិភាពជាតិយើងបានជាដាច់ខាត។

ផ្អែកលើមូលដ្ឋានសន្តិភាព កម្ពុជាមានឱកាសកសាងប្រទេសជាជំហានៗ ឆ្ពោះទៅវឌ្ឍនភាព និងសុខដុមរមនា ចៀសផុតពីគ្រោះថ្នាក់ និងមហន្តរាយនៃសង្គ្រាមជាថ្មីម្តងទៀត។ ម៉្យាងវិញ​ទៀតក្រោមការដឹកនាំរបស់ សម្តេចតេជោ ហ៊ុន សែន គឺយើងគ្រប់គ្នាត្រូវរួមគ្នាកសាងសង្គមមួយ​មានការគោរពគ្នាទៅវិញទៅមក ដែលជាកត្តាគន្លឹះមួយក្នុងការធានាដល់សន្តិភាព ដោយ​បដិសេធ​​ចំពោះឥរិយាបទបែប " នាម៉ឺននិយម និងស្តេចក្រាញ់និយម" ដែលជាដើមចមនាំឲ្យមាន​គម្លាតរវាង "រាស្ត្រ និង មន្ត្រីរដ្ឋ" ដែលជាឥរិយាបទផ្ទុយពីវត្ថុបំណងពិតរបស់សម្តេចតេជោ ហ៊ុន សែន នាយករដ្ឋមន្ត្រីរបស់ប្រជាជាតិកម្ពុជាយើង។

សូមបញ្ជាក់ថា ការសំណេះសំណាលនេះ ប្រព្រឹត្តទៅប្រកបដោយភាពល្អូកល្អឺន រីករាយ ទំនុកចិត្ត និងគ្មានការរើសអើងពណ៌សម្បុរនយោបាយ ហើយមានភាពស្និទ្ធស្នាលស្មើមុខគ្នា ដោយគ្មានឥរិយាបទក្រអឺតក្រទម។ តាមរយៈនេះ បានផ្តល់នូវការយល់ចិត្តគ្នា ហើយប្រជា​ពលរដ្ឋ​បានសម្តែងនូវសេចក្តីស្រឡាញ់ និងអរគុណដល់សម្តេចតេជោ ហ៊ុន សែន។ បេសកកម្ម​របស់ក្រុមជំនួយការសម្តេចតេជោ បានប្រកាន់យកនូវគំរូរបស់សម្តេចតេជោ ហ៊ុន សែន ក្នុងភាព​ស្និទ្ធស្នាល និងសាមញ្ញជាមួយមហាជន ប្រកបដោយលក្ខណៈជាភាតរៈ រួមរស់ក្នុងសហគមន៍​ជាតិកម្ពុជាតែមួយ។ បេសកកម្មនេះ គឺផ្តោតសំខាន់ លើការលើកស្ទួយនូវការយល់អំពី​សេចក្តី​ស្រឡាញ់ រវាងសម្តេចនាយករដ្ឋមន្ត្រី និងប្រជាជនមូលដ្ឋាន ព្រមទាំងក្នុងគោលដៅ​ពង្រឹង​ទំនាក់ទំនង​ជិតស្និទ្ធរវាងប្រជាពលរដ្ឋមូលដ្ឋាន ប្រកបដោយប្រសិទ្ធភាពស្របតាមគំរូដ៏ប្រពៃ​របស់​សម្តេចប្រមុខរាជរដ្ឋាភិបាល៕

ប្រជាពល​រដ្ឋនៅក្នុង​តំបន់​អភិវឌ្ឍន៍​ភូមិថ្លុក​ត្រាច​ និង​អន្លង់ជ្រៃ មានផ្ទះ​ថ្មី មានទឹក​ធ្វើស្រែ ក្រោមការ​យកចិត្តទុក​ដាក់​របស់​សម្តេច​ប្រធាន​រដ្ឋសភា

ផ្ទះប៉ិត ដែលជារចនាបទផ្ទះរបស់ខ្មែរ បានសាងសង់យ៉ាងស្អាត ត្រង់ជួរនៅក្នុងតំបន់អភិវឌ្ឍន៍ ភូមិអន្លង់ជ្រៃ និងភូមិផ្លុកត្រាច ក្នុងឃុំកក់ ខេត្តត្បូងឃ្មុំ ប្របនឹងប្រឡាយទឹក ដែលជាដង្ហើមនៃកសិកម្ម។ នេះជាមុខមាត់ថ្មី របស់ខេត្តត្បូងឃ្មុំ ក្រោមការយកចិត្តទុកដាក់ របស់សម្តេចអគ្គមហាពញាក្រី ហេង សំរិន ប្រធានរដ្ឋសភា។ និយាយជារួម សម្តេច បានសាងសង់ផ្ទះ ហេដ្ឋារចនាសម្ព័ន្ធ មាន សាលារៀន វត្តអារាម មណ្ឌលសុខភាព និងប្រឡាយទឹក សម្រាប់លើកកម្ពស់ជីវភាពប្រជាពលរដ្ឋ នៅទីនោះតំាងពីឆ្នាំ២០០៦មក។ ពលរដ្ឋកំពុងសប្បាយរីករាយ រស់នៅក្នុងជីវភាពល្អប្រសើរជាមួយសមិទ្ធិផល ដែលជាអំណោយរបស់សម្តេច ។

ជាក់ស្តែងនៅព្រឹកថ្ងៃទី២១ ខែកុម្ភៈ ឆ្នាំ២០១៦នេះ ផ្ទះចំនួន ៨១ខ្នងបន្ថែមទៀត បានសម្ពោធនិងប្រគល់ជូនប្រជាពលរដ្ឋ នៅក្រោមអធិបតីភាពដ៏ខ្ពង់ខ្ពស់ សម្តេចប្រធានរដ្ឋសភា និងលោកជំទាវផ្ទាល់តែម្តង ក្រោមស្នាមញញឹម និងក្តីសង្ឃឹម របស់ប្រជាពលរដ្ឋ។

នៅពិធីប្រគល់ និងសម្ពោធផ្ទះថ្មី ជូនប្រជាពលរដ្ឋ នាព្រឹកមិញនេះ ក៏មានវត្តមានចូលរួម ពីសំណាក់ ថ្នាក់ដឹកនាំស្ថាប័នសំខាន់ៗ នៃព្រះរាជាណាចក្រកម្ពុជាផងដែរ ក្នុងនោះមាន វត្តមានរបស់ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា ឯកឧត្តមបណ្ឌិត ងួន ញ៉ិល អនុប្រធានទី២ នៃរដ្ឋសភា ឯកឧត្តម លោកជំទាវ សមាជិក សមាជិកា រដ្ឋសភា ព្រឹទ្ធសភា រាជរដ្ឋាភិបាល យ៉ាងច្រើនកុះករ។

ឯកឧត្តម ប្រាជ្ញ ច័ន្ទ អភិបាលនៃគណៈអភិបាលខេត្តត្បូងឃ្មុំ បានមានប្រសាសន៍លើកឡើងនៅក្នុងឱកាសនោះថា ចាប់តំាងពីឆ្នាំ២០០៦ មក ភូមិអន្លង់ជ្រៃ និងភូមិថ្លុកត្រាច ស្ថិតនៅក្នុងឃុំកក់ ស្រុកពញាក្រែកនេះ បានផ្លាស់ប្តូរមុខមាត់ ជាលំដាប់ ក្នុងនោះ ជីវភាពពលរដ្ឋមានការរីកចម្រើន តាមរយៈ លទ្ធភាពធ្វើកសិកម្មបានយ៉ាងងាយស្រួល ដោយសារប្រឡាយទឹក អាងស្តុកទឹក ដែលជាអំណោយដ៏ថ្លៃថ្លា របស់សម្តេច អគ្គមហាពញាចក្រី ហេង សំរិន។

ឯកឧត្តម បានគូសបញ្ជាក់ថា ក្រៅពីប្រឡាយទឹក មណ្ឌលសុខភាព ផ្ទះដ៏ស្រស់ស្អាត ជាសំណង់ថ្មី ធ្វើពីថ្ម ត្រូវបានសម្តេចសាងសង់ ចែកជូនប្រជាពលរដ្ឋជាបន្តបន្ទាប់ ដោយនៅលើកទី១ មានផ្ទះ ចំនួន៩៥ខ្នង។ បន្ទាប់មកនៅឆ្នាំ២០១៣ សម្តេចបាន ប្រគល់ផ្ទះ ចំនួន១៦ខ្នងទៀតជូនពលរដ្ឋទៀត និងនៅឆ្នាំ២០១៤ ១០ខ្នង បន្ថែមទៀត ហើយនៅថ្ងៃទី២១ ខែកុម្ភៈឆ្នាំ២០១៦នេះ ផ្ទះចំនួន៨១ខ្នង ទៀត ត្រូវសម្តេចចែកជូនប្រជាពលរដ្ឋ នៅឱកាសនេះ។

មានប្រសាសន៍នៅក្នុងឱកាស ដែលពលរដ្ឋសប្បាយរីករាយនោះ សម្តេចអគ្គមហាពញាចក្រី ហេង សំរិន បានពាំនាំនូវការផ្តាំផ្ញើ សាកសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ផងដែរ ដោយសម្តេចបានគូសបញ្ជាក់ថា នៅគ្រប់កាលៈទេសសៈ ប្រមុខរាជរដ្ឋាភិបាល តែងតែយកចិត្តទុកដាក់ គិតគូរដល់ការរស់នៅរបស់ប្រជាពលរដ្ឋជានិច្ច។

សម្តេចអគ្គមហាពញាចក្រី ហេង សំរិន បានលើកឡើងថា ផ្តើមពីបាត ដៃទទេ នៅឆ្នាំ១៩៧៩ រហូតមកដល់ពេលនេះ កម្ពុជាបានកសាង សមិទ្ធិផលជាច្រើនលើគ្រប់វិស័យ ក្រោមការដឹកនាំ ដ៏ឈ្លាសវៃ របស់ប្រមុខរាជរដ្ឋាភិបាលកម្ពុជា។ សម្តេច មានប្រសាសន៍បន្តថា នៅពេលណាប្រទេសជាតិមាន សុខសន្តិភាព ស្ថិរភាព នោះការ អភិវឌ្ឍ ប្រាកដជាមានជាមិនខាន ដូចនៅពេល នេះជាដើម។

ឆ្លៀតឱកាសនោះ សម្តេចបានស្នើសុំដល់ប្រជាពលរដ្ឋ ដែល ទទួលបានសមិទ្ធិផលនានាពេលនេះ ត្រូវខិតខំប្រកបរបរចិញ្ចឹមជីវិត ពីព្រោះថានៅពេលនេះ តំបន់អភិវឌ្ឍន៍របស់សម្តេចមានទាំងផ្ទះ មានទំាងទឹក ដែលជាប្រភពសំខាន់ ក្នុងការប្រកបរបរ ចិញ្ចឹមជីវិត ក្នុងកិច្ចការស្រែចម្ការ។

ប្រជាពលរដ្ឋទទួលបានផ្ទះនៅឱកាសនេះ បានសម្តែងក្តីរីករាយ និង បានថ្លែងអំណរគុណយ៉ាងជ្រាលជ្រៅចំពោះ សម្តេចប្រធានរដ្ឋសភា និងលោកជំទាវ ដែលសម្តេចបានលះបង់ទំាងថវិកា កម្លំាងកាយចិត្ត និងពេលវេលា ក្នុងការអភិវឌ្ឍន៍ឃុំកក់នេះ។ ពលរដ្ឋបានលើកឡើងថា បើមិនមានជំនួយរបស់សម្តេចទេ ពួកគាត់មិនមានសង្ឃឹមថា មានផ្ទះស្អាត បំពាក់ដោយសម្ភារៈ នេះ រស់នៅឡើយ។

សូមបញ្ជាក់ថា ផ្ទះដែលសម្តេចប្រធានរដ្ឋសភា សាងសង់ជូន ប្រជាពលរដ្ឋនៅក្នុងភូមិអន្លង់ជ្រៃ និងភូមិថ្លុកត្រាចនេះ ជាផ្ទះថ្ម ខ្ពស់ផុតពីដី ទំហំ៦គុណ៧ម៉ែត្រ។ ប្រជាពលរដ្ឋដែលទទួល បានផ្ទះម្នាក់ បាននិយាយជាមួយទឹកមុខញញឹមថា មានផ្ទះស្អាត រស់នៅហើយ ភូមិគាត់អាចធ្វើស្រែ បានពីរដងក្នុងមួយឆ្នាំទៀត ដោយសារតែប្រឡាយទឹក ដែលសម្តេចសាងសង់ជូនប្រជាពលរដ្ឋ មានទឹកជាប្រចំា។

ប្រជាពលរដ្ឋរស់នៅតំបន់អភិវឌ្ឍន៍សម្តេចអគ្គមហាពញាចក្រី ហេង សំរិន មានជំនឿយ៉ាងមុតមាំថា ក្រោមការយកចិត្តទុកដាក់របស់សម្តេច ជីវភាពរបស់ពួកគាត់ ប្រាកជារីកចម្រើន ជាលំដាប់ ដោយសារគាត់ មានទឹកធ្វើស្រែ កូនមានសាលារៀន ហើយពេលឈឺ មានមន្ទីរពេទ្យ នៅជិតផ្ទះ៕

សម្ដេចតេជោ ហ៊ុន សែន អប់រំប្រជាពលរដ្ឋអោយយល់ដឹងពីគ្រោះថ្នាក់គ្រាប់មីន និងគ្រាប់មិនទាន់ផ្ទុះ ក្នុងរយៈកាលជាង ២០

ឆ្នាំកន្លងមកនេះកម្ពុជាបានធ្វើការខិតខំប្រឹងប្រែងយ៉ាងខ្លាំងក្នុងការដោះមីន និងគ្រាប់មិនទាន់ផ្ទុះដែលនៅសល់ពីសម័យសង្គ្រាម។
យោងតាមទំព័រហ្វេសប៊ុករបស់សម្ដេច តេជោ ហ៊ុន សែន ដែលមានឈ្មោះថា Samdech  Hun Sen, Cambodian Prime Minister ចុះផ្សាយថ្ងៃទី២៣ ខែកុម្ភៈ ឆ្នាំ២០១៦ បានបង្ហោះសារអំពាវនាវឲ្យដល់បងប្អូនប្រជាពលរដ្ឋប្រុងប្រយ័ត្នចំពោះគ្រាប់មីន និងគ្រាប់មិនទាន់ផ្ទុះ។

សម្ដេចតេជោ ហ៊ុន សែន បានសរសេរថា កម្ពុជាបានចាប់ផ្ដើមបោសសំអាតគ្រាប់មីនជាលក្ខណៈមនុស្សធម៌ និងជាបន្ទាន់នៅឆ្នាំ១៩៩២ ដើម្បីធានាសុវត្ថិភាព និងផ្ដល់ដីបង្កបង្កើនផលសម្រាប់ការធ្វើមាតុភូមិនិវត្ដន៍របស់ប្រជាជនភៀសសឹកមកពីតាមព្រំដែនកម្ពុជា-ថៃ។ ទន្ទឹមនិងនោះ គឺរំដោះដីជូនប្រជាពលរដ្ឋទូទៅធ្វើស្រែចំការ រៀបចំភូមិដ្ឋាន ផ្លូវថ្នល់សាលារៀន វត្ដអារាមដើម្បីជីវិតរស់នៅដ៏សុខសាន្ដរបស់ប្រជាជន និងដើម្បីរដ្ឋាភិបាលមានឱកាសកសាងហេដ្ឋារចនាសម្ព័ន្ធជាសារវន្ដនានារបស់ជាតិ។

សម្ដេចតេជោ ហ៊ុន សែន បានសរសេរបន្ថែមថា ចាប់តាំងពីឆ្នំ ១៩៩៥ មក រាជរដ្ឋាភិបាលកម្ពុជា បានរៀបចំទិវាយល់ដឹងអំពីមីននៅថ្ងៃទី២៤ កុម្ភៈ ដើម្បីអប់រំប្រជាពលរដ្ឋអោយយល់ដឹងពីគ្រោះថ្នាក់មីន និងគ្រាប់មិនទាន់ផ្ទុះ ព្រមទាំងវិធានការសង្គ្រោះជនរងគ្រោះដោយសារមីន។ សូមប្រជាពលរដ្ឋចូលរួមទាំងអស់គ្នា ដើម្បីចៀសវាងគ្រោះថ្នាក់នេះ។

សម្ដេចតេជោ ហ៊ុន សែន អំពាវនាវឲ្យគ្រប់ស្ថាប័ន និងដៃគូពាក់ព័ន្ធ ជាពិសេសអាជ្ញាធរដែនដី ត្រូវតែយកចិត្ដទុកដាក់ពិនិត្យតាមដានសកម្មភាព និងគ្រប់បញ្ហាដែលកើតមានឡើងនៅក្នុងទឹកដីភូមិសាស្ដ្ររបស់ខ្លួន ដែលបានបង្ករគ្រោះថ្នាក់មកលើប្រជាពលរដ្ឋដោយសារគ្រាប់មីននិងគ្រាប់មិនទាន់ផ្ទុះ។ ត្រូវធ្វើសកម្មភាពអប់រំប្រជាពលរដ្ឋអោយយល់ដឹងចេះ ការពារខ្លួន និងដោះស្រាយជាបន្ទាន់នូវសំំណូមពររបស់ប្រជាពលរដ្ឋ។ ចំពោះបងប្អូនប្រជាពលរដ្ឋ យុវជន និងសិស្សានុសិស្ស សូមប្រយ័ត្ននិងកុំប៉ះពាល់គ្រាប់មីន និងគ្រាប់មិនទាន់ផ្ទុះដែលអាចបណ្តាលអោយមានគ្រោះថ្នាក់៕

សម្ដេចក្រឡាហោម ស ខេង អំពាវនាវឲ្យប្រជាពលរដ្ឋគ្រប់ឋានៈ និងគ្រប់មជ្ឈដ្ឋាន បង្កើនការប្រុងប្រយ័ត្នអគ្គិភ័យដែលបង្កដោយចរន្តអគ្គីសនី

ថ្លែងក្នុងទិវាជាតិបង្ការ និងពន្លត់អគ្គិភ័យ ថ្ងៃទី២២ ខែកុម្ភៈ ឆ្នាំ២០១៦ សម្តេចក្រឡាហោមស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអំពាវនាវឲ្យប្រជាពលរដ្ឋបង្កើនការប្រុងប្រយ័ត្នអគ្គិភ័យ ខណៈបញ្ហាចរន្តអគ្គីសនីនេះ បានកើតឡើងច្រើនជាងគេ។

នៅក្នុងការប្រារព្ធទិវាជាតិលើកទី១ ស្តីពីការបង្ការ និងពន្លត់អគ្គិភ័យ នៅមជ្ឈមណ្ឌលពិពណ៌កោះពេជ្រ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអំពាវនាវឲ្យប្រជាពលរដ្ឋត្រូវពិនិត្យប្រព័ន្ធខែ្សតភ្ជាប់ចរន្តអគ្គិសនីនៅក្នុងគេហដ្ឋានរបស់ខ្លួន ប្រសិនបើយល់ថាខែ្សបណ្តាញចរន្តអគ្គិសនីមិនត្រឹមត្រូវតាមប្រព័ន្ធបច្ចេកទេស ត្រូវកាត់ផ្តាច់ ឬត្រូវផ្លាស់ប្តូរចេញ ដើម្បីជៀសវាងបញ្ហាដែលបណ្តាលឲ្យឆ្លងចរន្ត តុស្សសេចរន្តអគ្គីសនីនៅក្នុងផ្ទះ ។

ជាមួយគ្នានេះ សម្តេចក្រឡាហោម ស ខេង ក៏បានអំពាវនាវឲ្យស្ថាប័នរដ្ឋ ឯកជន និងអាជ្ញាធរដែនដីគ្រប់ជាន់ថ្នាក់ ត្រូវបង្កើនចាត់វិធានការអប់រំណែនាំ ដល់ប្រជាពលរដ្ឋក្នុងដែនសមត្ថកិច្ចរបស់ខ្លួន ដើម្បីឲ្យបណ្តាម្ចាស់គេហដ្ឋាន ផ្ទះសំណាក់ សណ្ឋាគារជាដើមឲ្យមានការប្រុងប្រយ័ត្ន គ្រប់ពេលចំពោះដើមចមដែលអាចបង្កឲ្យកើតមានអគ្គិភ័យ ដូចជា ភ្លើងចង្ក្រាន ភ្លើងចង្កៀង ភ្លើងទៀន ធូប  ភ្លើងព្រៃ បារី រំសេវជាតិផ្ទុះ ប្រេងឥន្ធនៈ ឧស្ម័នចំហេះ សារធាតុគីមី ដែលជាវត្ថុងាយឆេះ ។

របាយការណ៍អគ្គស្នងការរងនគរបាលជាតិ ឯកឧត្តម ឧត្តមសេនីយ៍ឯក សួស អង្គារ៍ បានបញ្ជាក់ថា ឆ្នាំ២០១៥ នៅទូទាំងប្រទេស មានអគ្គិភ័យបានកើតឡើងកើនដល់១៥% ធៀបនឹងឆ្នាំ២០១៤ ពោលគឺឆ្នាំ២០១៥ មានអគ្គិភ័យឆាបឆេះកើតឡើងក្នុងចំណោម៥៩០លើកនោះ បានបណ្តាលឲ្យមនុស្សស្លាប់ ៣៥នាក់ របួស២៨នាក់ ឆេះផ្ទះ៥៩៥ខ្នង ឆេះតូបផ្សារ ៤២១តូប ឃ្លាំងស្តុក២ យានដ្ឋាន២ ក្លឹបកម្សាន្ត១ រថយន្ត១៨គ្រឿង គោយន្ត១០គ្រឿង ។

សម្រាប់ការឆាបឆេះបង្កដោយកត្តាឆ្លងចរន្តអគ្គិសនី៤៧.៦២% កត្តាធ្វេសប្រហែសចំនួនជិត២៨% និងឆេះដោយកត្តាផ្សេងៗ រួមមានឆេះបង្កដោយភ្លើងធូប គ្រឿងផ្ទុះ ចង្រ្កាន ដុតសំរាម ផ្សាដែក និងគ្រោះថ្នាក់ចរាចរណ៍ជាដើម មានប្រមាណ២៤% ។

ឯកឧត្តម សួស អង្គារ៍ បន្តថា នៅដើមឆ្នាំ២០១៦នេះដែរ នៅរាជធានីភ្នំពេញបានកើតឡើងចំនួន២ករណី បំផ្លាញឃ្លាំងស្តុក១ រថយន្ត៥គ្រឿង ម៉ូតូ៤គ្រឿង ផ្ទះសំបែង៩៧ខ្នង។
ជាវិធានការត្រៀមបង្ការ ឯកឧត្តម សួស អង្គារ៍ បញ្ជាក់ថាបច្ចុប្បន្ននគរបាលជាតិមានរថយន្ត១២៨គ្រឿង ដាក់ពង្រាយនៅលើគោលដៅពន្លត់អគ្គិភ័យចំនួន ៤៣គោលដៅ មានរថយន្តរបស់បណ្តាស្ថាប័នរដ្ឋ២៥គ្រឿង មានស្ថានីយ៍ពន្លត់អគ្គិភ័យ ១១គោលដៅ មានរថយន្តពន្លត់អគ្គិភ័យរបស់ក្រុមហ៊ុនឯកជន ៥៧ គ្រឿង លើស្ថានីយ៍ពន្លត់២៧គោលដៅ ។ រាជរដ្ឋាភិបាល កម្ពុជាគ្រោងនឹងបន្ថែមរថយន្តពន្លត់អគ្គិភ័យរដ្ឋ នាឆ្នាំខាងមុខប្រមាណ២០០គ្រឿងបន្ថែមទៀតផងដែរ ៕

ឧបនាយករដ្ឋមន្រ្តី ហោ ណាំហុង និងអញ្ជើញប្រជុំថ្នាក់រដ្ឋមន្រ្តីការបរទេសអាស៊ាននៅឡាវ នាថ្ងៃទី ២៦ ដល់ថ្ងៃទី ២៧ ខែកុម្ភៈ នេះ

យោងតាមសេចក្តីជូនព័ត៌មានរបស់ ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី ២៣ ខែកុម្ភៈ ឆ្នាំ ២០១៦នេះ បានឲ្យដឹងថា ឯកឧត្តមឧបនាយករដ្ឋមន្រ្តី ថុងលូន ស៊ីស៊ូលីត ( Thongloun SISOULITH ) រដ្ឋមន្រ្តីការបរទេសនៃសាធារណរដ្ឋប្រជាធិបតេយ្យប្រជាមានិតឡាវ ជាមួយ ឯកឧត្តមឧបនាយករដ្ឋមន្រ្តី ហោ ណាំហុង រដ្ឋមន្រ្តីក្រសួងការបរទេស  និងសហប្រតិបត្តិការអន្តរជាតិ នឹងដឹកនាំគណៈប្រតិភូអញ្ជើញទៅចូលរួមកិច្ចប្រជុំចង្អៀតថ្នាក់រដ្ឋមន្រ្តី ការបរទេសអាស៊ាន (The ASEAN Foreign Minister Retreat ) ដែលនិងប្រព្រឹត្តនៅព្រឹកថ្ងៃទី ២៦ ដល់ថ្ងៃទី ២៧ ខែកុម្ភៈ ឆ្នាំ២០១៦ នៅទីក្រុងវៀងច័ន្ទ ប្រទេសឡាវ នៃសាធារណរដ្ឋប្រជាធិបតេយ្យប្រជាមានិតឡាវ។
សេចក្តីជូនព័ត៌មានបានឲ្យដឹងថា កិច្ចប្រជុំចង្អៀតថ្នាក់រដ្ឋមន្រ្តីការបរទេសអាស៊ាន នឹងពិភាក្សាអំពីការពង្រឹង សហគមន៍អាស៊ាន ដែលក្នុងនោះរួមមាន ការអនុវត្តន៍ផែនការលំអិត នៃសហគមន៍សន្តិសុខ-នយោបាយអាស៊ាន២០២៥ ចក្ខុវិស័យសហគមន៍អាស៊ាន២០២៥ និងផែនការលំអិតរបស់សហគមន៍ទាំង៣ ទំនាក់ទំនងអន្តរជាតិ និងតួនាទីស្នូលរបស់ អាស៊ាននៅក្នុងនិម្មាបនកម្មតំបន់ ហើយក៏នឹងមានការផ្លាស់ប្តូរទស្សនៈអំពីបញ្ហាតំបន់ និងអន្តរជាតិ។
ប្រភពដដែលបន្តឲ្យដឹងថា ក្នុងឱកាសអញ្ជើញចូលរួមកិច្ចប្រជុំនៅទីក្រុងវៀងច័ន្ទ ប្រទេសឡាវនេះ ឧបនាយករដ្ឋមន្រ្តី ហោ ណាំហុង ក៏នឹងជួបពិភាក្សាទ្វេភាគីជាមួយ លោក វីវៀន បាឡាក់គ្រីសណាន់(Vivan Balakrishana) រដ្ឋមន្រ្តីការបរទេសសឹង្ហបុរីផងដែរ៕