Friday, November 06, 2015

អង្គប្រជុំគណៈរដ្ឋមន្ត្រីសម្រេចអនុម័ត សេចក្តីព្រាងច្បាប់ស្តីពីសុខភាពសត្វ និងផលិតកម្មសត្វ

យោងតាមសេ​ចក្តីប្រកាស​ព័ត៌មាន ​ស្តីពីលទ្ធផល​នៃសម័យប្រ​ជុំពេញ ​អង្គគណៈរដ្ឋ​មន្ត្រី ថ្ងៃទី ០៦​ ខែ វិច្ឆិកា ​ឆ្នាំ ២០១៥​ បានឲ្យ​ដឹងថា ​កិច្ចប្រជុំពេញ​អង្គគណៈរដ្ឋមន្ត្រី​បានសម្រេច ​អនុម័ត​ លើសេចក្តី​ព្រាងច្បាប់​ស្តីពីសុខភាព​សត្វ និងផលិត​កម្មសត្វ​ ដោយក្នុង​នោះ សេចក្តី​ព្រាង​ច្បាប់​នេះ មាន ​២២ជំពូក​ និង ​១២៥មាត្រា មាន​វិសាលភាព​គ្រប​ដណ្តប់​លើ​វិស័យ​សុខភាព​សត្វ និងផលិតកម្ម​សត្វនៅ​ព្រះ​រាជាណាចក្រកម្ពុជា ដែលក្នុង​នោះព្រះ​រាជា​ណា​ចក្រ​កម្ពុជាកំណត់​ថ្ងៃទី៨ ខែមករា រៀង​រាល់​ឆ្នាំ ជាសត្តទិវា​ជាតិ​រួម​ជាមួយ​នឹងសត្តទិវា​អន្តរជាតិ។

សេចក្តីប្រកាស​ព័ត៌មាន​របស់គណៈរដ្ឋមន្ត្រី​ បានបញ្ជាក់ថា​ ចាប់តាំង​ពី​ប្រទេសកម្ពុជា​ទទួលបាន ឯករាជ្យ ពី​ប្រទេស​បារាំង​ពី​ឆ្នាំ​១៩៥៣ ដល់​ឆ្នាំ១៩៧៥ តាម​​ការ​ស្រាវជ្រាវ​បាន​បង្ហាញ​ថា ផ្នែក​សេវា​ផលិតកម្ម និង​បសុព្យាបាល​ (Service de la Production et de la Santé animale) នៅ​ជំនាន់​នោះ មិន​ទាន់​មាន​ច្បាប់ ឬ​លិខិត​បទដ្ឋាន​គតិយុត្តិ​ដើម្បី​បំពេញតម្រូវការ​សេវាសាធារណៈ​ក្នុង​ផ្នែក​នេះ​នៅឡើយទេ គឺ​មាន​តែ​សេចក្តី​សម្រេច​ប៉ុណ្ណោះ​​​សម្រាប់​យក​មក​ប្រើ​ប្រាស់។ បន្ទាប់​មក​នៅ​ឆ្នាំ១៩៧៩ រហូត​ដល់​បច្ចុប្បន្ន​នេះ​មានៈ (១) អនុ​ក្រឹត្យ​លេខ១៤ ស្តីពីការ​ត្រួត​ពិនិត្យ​អនាម័យ​សត្វ និង​ផលិតផល​មាន​ដើម​កំណើតពី​សត្វ (ឆ្នាំ១៩៨៨)។ (២) អនុក្រឹត្យ​លេខ២៩ ស្តីពីសត្តឃាតដ្ឋាន និង​កន្លែងពិឃាត​សត្វ (ឆ្នាំ១៩៩០)។ (៣) អនុក្រឹត្យ​លេខ២៦ ស្តីពីការ​បង្កើត និង​ការ​គ្រប់​គ្រង​ភ្នាក់​ងារ​សុខភាព​សត្វ​ភូមិ (ឆ្នាំ២០០១) ព្រម​ទាំង​លិខិត​បទដ្ឋាន​គតិយុត្ត​មួយ​ចំនួន​ទៀត។

បច្ចុប្បន្ននេះ ដោយសា​រតែការ​ខិត​ខំ​ប្រឹង​ប្រែង​យ៉ាងខ្លាំងក្លា​របស់​រាជរដ្ឋាភិបាល បាន​ធ្វើ​ឲ្យ​សង្គម​ជាតិ​ទាំង​មូល​មានការ​វិវឌ្ឍន៍​រីក​ចម្រើន​គួរ​កត់សម្គាល់ ​​ស្រប​​ទៅ​នឹង​អត្រា​កំណើន​របស់​ប្រ​ជា​ជន​​ពី​មួយ​ឆ្នាំ​ទៅ​មួយ​ឆ្នាំ។ តម្រូវការ​សាច់​សត្វ​មានការ​កើន​ឡើង ផលិតកម្ម​សត្វ​កាន់​តែ​មាន​ភាព​ទំនើប ហើយ​គុណភាព​អនាម័យសាច់​ត្រូវ​បាន​លើក​កម្ពស់។ ស្ថិត​ក្នុង​បរិការណ៍​នេះ រាជ​រដ្ឋា​ភិបាល​​បាន​សម្រេច​ធ្វើ​វិសោធនកម្ម​អនុក្រឹត្យ​លេខ១៤ (ឆ្នាំ​១៩៨៨) ស្តីពីការ​ត្រួតពិនិត្យ​អនាម័យ​សត្វ និង​ផលិតផល​មាន​ដើម​កំណើត​ពី​សត្វ (ឆ្នាំ២០០៣) និង​ធ្វើ​វិសោធនកម្ម​អនុ​ក្រឹត្យលេខ ១៦អន​ក្រ.បក ស្តីពីការ​ត្រួតពិនិត្យ​អនាម័យ​សត្វ និងផលិតផល​មាន​ដើម​កំណើត​ពី​សត្វ (ឆ្នាំ២០០៧)។ ប៉ុន្តែ​ ទោះ​បី​ជា​មាន​បទដ្ឋានគតិយុត្ត​មួយ​ចំនួន​ក្នុងការ​អនុវត្ត​ការងារ​ផ្នែកផលិតកម្ម និង​បសុ​ព្យា​បាលក៏ដោយ ក៏​នៅ​មានកម្រិត​ក្នុង​ការ​គ្រប់​គ្រង និង​ការ​បំពេញភារកិច្ចឲ្យ​បាន​សម​ស្រប។


សេចក្តី​ព្រាង​ច្បាប់​ស្តីពី​សុខភាព​សត្វ និង​ផលិតកម្ម​សត្វ គឺជា​សមិទ្ធផល​ថ្មី​មួយ​ទៀត​ក្នុង​ការ​អភិវឌ្ឍន៍​ក្រប​ខណ្ឌគតិយុត្ត​របស់​រាជរដ្ឋាភិបាល ដើម្បី​គាំទ្រ​យុទ្ធ​សាស្ត្រ​ចតុកោណ​ដំណាក់កាល​ទី៣ របស់​រាជរដ្ឋាភិបាល សម្រាប់​នីតិកាល​ទី​៥​នៃ​រដ្ឋ​សភា ដែល​មាន​ចែង​យ៉ាង​ច្បាស់​នៅ​ក្នុង​មុំ​ទី​២ ស្តីពី​ការ​លើកកម្ពស់​ការ​ចិញ្ចឹមសត្វ និង​វារីវប្បកម្ម​នៃចតុកោណ​ទី​១ ស្តីពីការ​លើក​ស្ទួយ​វិស័យ​កសិកម្ម និង​ក្នុង​បរិបទ​ដែល​ព្រះ​រាជាណាចក្រកម្ពុជា ត្រូវ​បំពេញ​ក្នុង​ក្រប​ខណ្ឌ​នៃ​អង្គការ​ពាណិជ្ជ​កម្ម​​ពិភពលោក (WTO) អង្គការ​សុខភាព​សត្វ​ពិភពលោក (OIE) ការ​ធ្វើសមាហរណកម្ម​កម្ពុជា​ជាមួយ​អាស៊ាន និង​បណ្តា​ប្រទេស​ក្នុង​តំបន់​ផង​ដែរ។ សេចក្តីព្រាង​ច្បាប់​ ស្តីពី​សុខ​ភាព និង​ផលិតកម្ម​សត្វ​នេះ​ពិត​ជា​នឹង​រួម​ចំណែក​ផ្តល់​នូវ​អត្ថ​ប្រ​យោជន៍​ជា​ច្រើន​មាន​ជា​អាទិ៍៖ ១. ធ្វើ​ទំនើប​កម្ម​ និង​ភាព​ទាន់​សម័យ​ ការ​ពា​សុខ​ភាព​មនុស្ស​ សត្វ​ សុខុមាលភាព​សត្វ​ និង​ការពា​រ​បរិស្ថាន​ បង្ការ​ទប់​ស្កាត់​ និង​លុប​បំបាត់​ជំងឺ​ឆ្លង​សត្វ​ ការពារ​សុខភាព​សាធារណៈ​ សម្រួល​ពាណិជ្ជកម្ម​សត្វ​ និង​ផលិតផល​សត្វ​ប្រកប​ដោយ​ប្រសិទ្ធ​ភាព។ ២. ​បម្រើ​ឲ្យការ​នាំ​ចេញ​ នាំ​ចូល​ នាំ​ឆ្លងកាត់​ និង​ចរាចរ​ក្នុង​ស្រុក​នូវ​សត្វ​ និង​ផលិត​ផល​សត្វ​ ចំណី​សត្វ​ និង​បសុឱសថ​ប្រព្រឹត្តទៅ​ដោយ​រលូន​ និងស្រប​តាម​បទដ្ឋាន​អន្តរជាតិ ពិសេស​កិច្ច​ព្រមព្រៀង​អនាម័យ​ ឆ្លើយ​តប​នឹង​តម្រូវការរបស់​អង្គ​ការ​ពាណិជ្ជ​កម្ម​ពិភព​លោក​ (WTO) អង្គការ​សុខ​ភាព​សត្វ​ពិភព​លោក OIE៣. លើក​កម្ពស់​ការ​ចិញ្ចឹម​សត្វ​ដើម្បី​ធានា​នូវ​ការ​ផ្គត់​ផ្គង់​ផលិត​សត្វ​ប្រកប​ដោយ​គុណ​ភាព​ និ​ងសុវត្ថភាព​ សម្រាប់​ទី​ផ្សារ​ក្នុង​ស្រុក​ និង​ជំរុញ​ការ​នាំ​ចេញ​។ ៤. ការពារ​ធន​ធាន​សត្វ​ និង​ពូជ​សត្វ​របស់​ជាតិ​ ក៏ដូចជា​ការ​បង្កាត់​ពូជ​តាម​បែប​វិទ្យា​សាស្រ្ត​ទំនើប​ដើម្បី​បង្កើន​សក្តា​នុពល​ផលិតកម្ម​ និង​ការ​ប្រកួត​ប្រជែង។ ៥. ពង្រឹង​ភាព​ជាដៃគូ​រវាង​ផ្នែក​ឯកជន​ផ្នែក​សាធារណៈ​ និង​ការវិនិយោគ​ឧស្សាហកម្ម​ចិញ្ចឹម​សត្វ

រាជរដ្ឋាភិបាលសម្រេច បង្វែរការគ្រប់គ្រងការលក់សំបុត្រចូលទស្សនា តំបន់អង្គរ ពីឯកជន មករដ្ឋវិញ

នៅថ្ងៃទី០៦ ខែវិច្ឆិកា ឆ្នាំ២០១៥នេះ គណៈរដ្ឋមន្រ្តី បានបើកកិច្ចប្រជុំពេញអង្គ ក្រោមអធីបតីភាព សម្តេចតេជោ ហ៊ុន សែន ដោយអង្គប្រជុំនៅព្រឹកនេះ បានសម្រេចបង្កើត គ្រឹះស្ថានសាធារណៈ ដើម្បីគ្រប់គ្រងការលក់សំបុត្រចូលទស្សនា តំបន់អង្គរពីក្រុមហ៊ុន សុខ គង់ វិញហើយ នឹងប្រគល់ឲ្យក្រសួងទេសចរណ៍ និងក្រសួងសេដ្ឋកិច្ច និងហិរញ្ញវត្ថុ ជាអន្តរក្រសួង រៀបចំគណៈកម្មាធិការនេះវិញ
ផ្អែកតា​មសេចក្តីប្រកាស​ព័ត៌មាន​ ស្តីពីលទ្ធផល​នៃសម័យប្រ​ជុំពេញអង្គ​គណៈរដ្ឋមន្ត្រី ​ចេញផ្សាយ នៅរសៀល​ថ្ងៃទី ០៦ ​ខែវិច្ឆិកា ​ឆ្នាំ២០១៥នេះ ​បានបញ្ជាក់ថា ​យោងតាម​សំណើរបស់​ក្រុមហ៊ុន សុខា​អូតែល រាជ​រដ្ឋាភិបាល​បានសម្រេច​បញ្ចប់​កិច្ចសន្យា ​​ស្តីពីការ​ប្រមូល​ចំណូល​ពីការ​លក់​សំបុត្រ​ចូល​ទស្សនា​​អង្គរ ជាមួយ​ក្រុម​ហ៊ុន​សុខា​អូតែល និងបាន​សម្រេច​ប្រគល់​ភារកិច្ច​ជូន​រដ្ឋមន្រ្តី​ក្រសួង​សេដ្ឋកិច្ច​ និង​ហិរញ្ញវត្ថុ សហការជាមួយក្រសួងស្ថាប័ន​ពាក់​ព័ន្ធ ​រៀប​ចំ​​បទដ្ឋានគតិយុត្ត ក្នុង​ការបង្កើត និងការដាក់​ឲ្យ​ដំណើរការសហគ្រាសសាធារណៈ ដែល​គ្រប់​គ្រង​ដោយ​ក្រុម​ប្រឹក្សា​ភិបាល​មួយ ដើម្បីគ្រប់​គ្រង​ការងារ​នេះ។


សហគ្រាស​សាធារណៈ​នេះ ​គ្រោង​នឹង​ចាប់​ផ្តើម​ដំណើរ​ការ​ការងាររបស់ខ្លួន នៅ​ដើម​ខែ​មករា ឆ្នាំ២០១៦ ខាងមុខ​​តទៅ។ ម្យ៉ាងវិញទៀត បុគ្គលិកទាំងអស់របស់ក្រុមហ៊ុន ដែល​កំពុង​បម្រើ​ការងារ​ផ្នែក​ប្រមូលចំណូលនេះ នឹង​បន្ត​ការ​ងារ​របស់ខ្លួន​ដដែល ​ក្រោមការគ្រប់​គ្រងរបស់ សហគ្រាស​សាធារណៈនេះ​៕


សម្តេចតេជោ ស្នើឲ្យភាគីពាក់ព័ន្ធយកចិត្តទុកដាក់បន្ថែម ចំពោះការធ្លាក់ចុះនូវអត្រាបំបៅកូនដោយទឹកដោះម្តាយ

នាយក​រដ្ឋមន្ត្រីនៃ​ព្រះរាជាណាចក្រ​កម្ពុជា ​បានសំដែង​ការព្រួយបារម្ភ ​អំពីការធ្លាក់​ចុះនូវអត្រា បំបៅ​កូនដោយ​ទឹកដោះម្តាយ ​ក្នុងរយៈពេលប៉ុ​ន្មានឆ្នាំចុង​ក្រោយនេះ។ ​ផ្អែកតាមសារ​ របស់សម្តេចតេជោ​ ហ៊ុនសែន ​ក្នុងឱកាស​ទិវាជាតិអាហារ​រូបត្ថម្ភលើកទី​ ២ នៅថ្ងៃ​ទី០៦ ខែវិច្ឆិកា ​ឆ្នាំ២០១៥នេះ ​បានបញ្ជាក់ថា ​«ថ្វីត្បិត​រាជរដ្ឋាភិបាល ​បានដាក់ចេញ​នូវវិធាន​ការជាច្រើន ​ដើម្បីលើកកម្ពស់​ ការបំបៅ​កូនដោយ​ទឹកដោះម្តាយ ​តែអត្រាស្រ្តីបំ​បៅកូនដោយ​ទឹកដោះម្តាយ​ មានការថយចុះគួរឱ្យកត់​សម្គាល់ ​បើយោងតាម​របាយការណ៍​អង្កេតសុខភាព ​និងប្រជាសាស្រ្តឆ្នាំ២០១៤»​។

យោងតាម​របាយការណ៍​ប្រជាសាស្ត្រ ​ដែលបាន​លើកឡើងក្នុង ​ទិវាជាតិ​អាហាររូបត្ថម្ភ ​លើកទី២ ​បានបង្ហាញថា៖ ​អត្រាបំបៅ​កូនដោយ​ទឹកដោះម្តាយ​តែមួយមុខគត់សម្រាប់កុមារអាយុពី០-៦ខែដំបូង ​បានធ្លាក់​ចុះពី ៧៣,៥% ​ក្នុងឆ្នាំ២០១០ ​មកត្រឹម​ ៦៥% ​ក្នុងឆ្នាំ២០១៤។ ​បន្ថែមពី​លើនេះការបន្ត​បំបៅកូនដោយ​ទឹកដោះម្តាយ​សម្រាប់កុមារ​អាយុពី ១​២ដល់១៥ខែ ​ក៏មានការ​ធ្លាក់ចុះផងដែរ​។

សម្តេចតេជោ ​បានលើកឡើង​ក្នុងសារថា​ បច្ចុប្បន្ន​កុមារអាយុក្រោ​ម៥ឆ្នាំ ​ម្នាក់ក្នុង​ចំណោម បីនាក់​នៅកម្ពុជា ​មានសភាព​ក្រិសក្រិន ​(កម្ពស់ទាប​ធៀបនឹងអាយុ) ​ម្នាក់ក្នុងចំណោម​បួននាក់ មាន​ទម្ងន់មិន​គ្រប់គីឡូ ​(ស្គមខ្លាំង​ធៀបនឹងអាយុ)​ ហើយម្នាក់​ក្នុងចំណោម​ដប់នាក់​ បានទទួលរង ​ឥទ្ធិពលបញ្ហា​កង្វះអាហាររូបត្ថម្ភ​ស្រួចស្រាវ ​ធ្ងន់ធ្ងរជាលក្ខខណ្ឌ​មួយគំរាមកំហែង ​ដល់ជីវិតកុមារ​ ដែលតម្រូវ​ឲ្យមានការព្យាបាល​ជាបន្ទាន់។ ​ជាទូទៅកត្តា​ដែលរួមចំណែក​ធ្វើឲ្យកុមារ​មានបញ្ហា ​កង្វះអាហារ​រូបត្ថម្ភ ​រួមមាន៖ ​ការថយចុះ​នូវការអនុវត្ត​ការបំបៅកូន​ដោយទឹកដោះ​ម្តាយ ទៅតាម​អនុសាសន៍​ដែលបាន​ណែនាំ ​និងការផ្តល់អាហា​របន្ថែមមិនបាន​គ្រប់គ្រាន់ដល់​កុមារ។

លើសពីនេះ ​ក្នុងឱកាស​ទិវាជាតិអា​ហារូបត្ថម្ភ​លើកទី ​សម្តេចតេជោនាយក​រដ្ឋមន្ត្រី ​ក៏បានអំពាវនាវ​ឱ្យភាគីពាក់​ព័ន្ធទាំងអស់ ​ដែលកំពុង​ធ្វើការលើ​ផ្នែកគាំពារមាតានិងទារក ​សន្តិសុខស្បៀង ​និងអាហារូបត្ថម្ភ​ ឱ្យបន្តកិច្ច​ប្រឹងប្រែង ​និងសកម្មភាព ​ដើម្បី៖ ​១-បង្កើនកិច្ចសហប្រតិបត្តិការ​ឱ្យកាន់តែរឹងមាំដើម្បីធានាឱ្យ​បាននូវអាហារ​រូបត្ថម្ភសម្រាប់មាតានិងកុមារ​ ដែលក្នុងនោះកា​របំបៅកូនដោយ​ទឹកដោះម្តាយគឺជាការ​វិនិយោគដ៏ប្រ​សើរបំផុត ​ដើម្បីកាត់បន្ថយបញ្ហាកង្វះ​អាហារូបត្ថម្ភ​, ២-បន្តយុទ្ធនាការ​អប់រំផ្សព្វផ្សាយ ​អំពីសារៈសំខាន់នៃការបំបៅកូនដោយទឹក​ដោះ​ម្តាយ ទាំងនៅ​ថ្នាក់ជាតិនិង​ថ្នាក់ក្រោមជាតិ,​ ៣-បន្តផ្តល់​សេវា សុខភាព ​និងយកចិត្តទុកដាក់​ថែទាំមាតានិងទារកតាម​រយៈការពង្រីក​បន្ថែមមន្ទីរពេទ្យ ​និងសហគមន៍ ស្រ​ឡាញ់ទារក​នៅទូទាំង​ប្រទេសកម្ពុជា,​ ៥-ប្រព័ន្ធ​ផ្សព្វផ្សាយរដ្ឋ ​និងឯកជនត្រូវបន្តផ្សព្វ​ផ្សាយ និង​បង្កើតកម្មវិធី​ផ្សេងៗឱ្យសកម្ម​ពាក់ព័ន្ធនឹងអាហារូបត្ថម្ភ ​និងការបំបៅកូនដោយទឹក​ដោះម្តាយប្រកបដោយ​អត្ថន័យ ​និងខ្លឹមសារអប់រំ​





សម្តេចតេជោ ផ្ញើសារ៦ចំណុច ដើម្បីលើកម្ពស់អនាម័យជនបទលើកទី៦

យោងតាម​សារលិខិត​ សម្តេចតេជោ ​ហ៊ុន សែន ​នាយករដ្ឋមន្ត្រី ​នៃព្រះរាជាណាច​ក្រកម្ពុជា ​ក្នុងឱកាសអបអរសាទរ​ទិវាជាតិ​លើកកម្ពស់​អនាម័យជនបទ ​លើកទី៦ ​ចុះថ្ងៃទី ​០២ ខែវិច្ឆិកា ​ឆ្នាំ២០១៥ ​បានមានប្រសាសន៍ថា ​ថ្ងៃទី១៣ ​ខែវិច្ឆិកា ​ឆ្នាំ២០១៥ គឺជា​ថ្ងៃដ៏សំខាន់មួយ ​សម្រាប់ព្រះរាជា​ណាចក្រកម្ពុជា​យើង ក្នុង​ការប្រារព្ធ «ទិវាជាតិលើក​កម្ពស់អនាម័យ​ជនបទ​ លើកទី៦» ​សម្តេចតេជោ ​បានលើកឡើងថា ​រាជរដ្ឋាភិបាល​កម្ពុជា តែង​បានទទួល​ស្គាល់ អំ​ពីភាពចាំបាច់ ​នៃការលើក​កម្ពស់អនាម័យ​ជនបទ ​ដោយក្នុងគោលន​យោបាយជាតិ ស្តីពីការផ្គត់ផ្គង់​ទឹកស្អាត ​និងអនាម័យ​បានកំណត់នូវច​ក្ខុវិស័យយ៉ាង​ច្បាស់លាស់ថា «នៅឆ្នាំ២០២៥ ប្រជាជនគ្រប់រូប​នៅសហគមន៍ជនបទ​ ត្រូវមានការ​ផ្គត់ផ្គង់ទឹកស្អាត ​និងអនាម័យ​គ្រប់គ្រាន់​ ព្រមទាំងរស់​នៅក្នុងបរិស្ថានដែល​មានអនាម័យ​ប្រកបដោយ​និរន្តរភាព»
សម្តេចតេជោ ​ហ៊ុន សែន​ ការរៀបចំ​ប្រារព្ធទិវានេះ​ ក្នុងគោល​បំណងបន្តជំរុញ​ និងយកចិត្ត ទុក​ដាក់កាន់តែខ្ពស់​បន្ថែមទៀត​ ក្នុងការបំផុស​ការយល់ដឹង​ ការផ្សព្វផ្សាយ​ជូនដល់បងប្អូន​ ប្រជាជន ក្នុង​ការរួមគ្នាលើក​កម្ពស់អនាម័យ​ជនបទ​ ដែលជាមូល​ដ្ឋានសំខាន់​មួយនៃការលើក​ តម្កើងសុខុមាល​ភាពសង្គម​ និងសេដ្ឋកិច្ច​ជាតិរបស់យើង​។
សម្តេចតេជោ​ បានបញ្ជាក់ថា​ ជាការពិត​ការអភិវឌ្ឍន៍​ប្រទេសជាតិ​ឲ្យរីកចំរើនបាន​ លុះត្រាតែ យើង​ខិតខំអភិវឌ្ឍ​ធនធានមនុស្ស​ឲ្យមានចំណេះដឹង​ ចំណេះធ្វើ ​កាយសម្បទា​មាំមួនប្រកប ដោយ​សីលធម៌រស់​នៅល្អ​ ចេះរួមរស់ជា​មួយគ្នា និងចេះ​ស្រឡាញ់សុខ​សន្តិភាពជាដើម។​ ក្នុងន័យនេះ​ ការលើក​កម្ពស់អនាម័យ​ គឺជាមូល​ដ្ឋានស្នូល​ ដោយសាតែការ​លើកកម្ពស់​ អនាម័យនេះមានទំនាក់​ទំនង មិន​អាចកាត់ផ្តាច់​បានអំពីវិស័យ​ផ្សេងៗទៀត​ រក្នុងការអភិវឌ្ឍន៍​ ប្រទេសជាតិ​ ហើយក៏ជាកិច្ចកា​រដែលមាន​លក្ខណៈអន្តរវិស័យ​ និងការទទួល​ខុសត្រូវរួមគ្នា​។
ផ្តើមចេញ​ពីស្មារតី​ និងខ្លឹមសារ​ដូចដែលបាន​គូសបញ្ជាក់មកនេះ​ សម្តេចតេជោ​ នាយករដ្ឋមន្ត្រី បាន​អំពាវនាវនូវ​ចំនុចសំខាន់ៗ៦​យ៉ាង៖ ទី១​. ក្រសួងអភិវឌ្ឍន៍​ជនបទត្រូវបន្ត​ប្រឹងប្រែង​ យកចិត្តទុកដាក់​ខ្ពស់ បណ្តុះឆន្ទៈ​មន្ត្រីប្រតិបត្តិ​ក្នុងការងារ​ នេះឲ្យអនុវត្តការងា​រជាប់ជាប្រចាំ​ ទទួលខុសត្រូវខ្ពស់​ ក្នុងភាពម្ចាស់​ការលើការងារ​លើកម្ពស់​អនាម័យជន​បទនេះ។​ ទី២. ក្រសួង ​អភិវឌ្ឍន៍ជនបទ​ត្រូវបន្តបង្កើន​ ការយកចិត្ត​ទុកដាក់ក្នុង​ការដឹកនាំ​ និងសម្រប​សម្រួលតាម ​គ្រប់ទម្រង់​ គ្រប់រូបភាព​ ដើម្បីកៀរគរធនធាន​ពីវិស័យឯកជន​ អង្គការនានា ​ក្នុងការជំរុញ​ការងារ​ លើកកម្ពស់​អនាម័យ​ និងផ្គត់ផ្គង់​ទឹកជនបទ​ឲ្យកាន់តែ​កើនឡើងជា​លំដាប់។ ​ទី៣. អាជ្ញាធរថ្នាក់​ ក្រោមជាតិ​ត្រូវយកចិត្តទុក​ដាក់ពង្រឹង​យន្តការដឹកនាំ​ និងពិនិត្យ​តាមដានការ​អនុវត្តន៍ផែនការ​ ដែលមាន​ ហើយត្រូវធានា​ឲ្យស្ថានភាព​អនាម័យ​ និងទឹកស្អាត​ជនបទក្នុងខេត្ត​ ស្រុក ឃុំ​ ដែលស្ថិតនៅ​ក្រោមការដឹកនាំ​របស់ខ្លួនមាន​ការប្រែប្រួល​រីកចម្រើនជាប្រចាំ។ ​ទី៤. គ្រប់ក្រសួង​ ស្ថាប័នពាក់ព័ន្ធ​ សូមបង្កើន​ការយកចិត្តទុកដាក់​ចូលរួមដឹកនាំ​ និងគាំទ្រគ្រប់​មធ្យោបាយ​ ដើម្បីលើកស្ទួយ​ការងារលើកកម្ពស់​អនាម័យ​ និងការងារផ្គត់ផ្គង់​ទឹកស្អាតជនបទ​សមស្របទៅ​ តាមអាណត្តិការងារ​របស់ខ្លួន ដោយយក​ចិត្តទុកដាក់ជាពិសេស​លើការបង្កើន​ធនធាន​ កិច្ចសហ​ ប្រតិបត្តិការ​ជាមួយដៃគូអភិវឌ្ឍ​វិស័យឯកជន​ អង្គការមិនមែន​រដ្ឋាភិបាល​ និងសហគមន៍នានា​។ ទី៥. នៅ​តាមគ្រឹះស្ថានសិក្សា​ និងសាលា​ចំណេះដឹងទូទៅ​ទាំងអស់ត្រូ​វបន្តការយក​ចិត្តទុកដាក់​ សាង់សង់​សម្ភារៈរូបវ័ន្តទឹកស្អាត​ និងអនាម័យ​ ការអប់រំជា​មូលដ្ឋាន​ឲ្យសិស្សានុ​សិស្សបានយល់​ ដឹងអំពីផលវិបាក​នៃកង្វះអនាម័យ​ និងមាន​ទម្លាប់ប្រតិបត្តិ​អនាម័យល្អ​ ការហូបស្អាត​ ផឹកស្អាត ​និងរស់នៅស្អាត​ ទាំងនៅក្នុងសាលា​ និងនៅក្នុងគ្រួសារ។​ ទី៦. គ្រប់ក្រុម​គ្រួសារនៅ​ តាមសហគមន៍​ ត្រូវយកចិត្តទុកដាក់​ទទួលខុស​ត្រូវសង់បង្គន់​ អនាម័យ​សម្រាប់ប្រើប្រាស់ ​ក្នុងគ្រួសារ​ ដើម្បីរួមចំណែក​ធ្វើឲ្យភូមិ​ ឃុំ និងស្រុក​របស់ខ្លួន​ ប្រែក្លាយ​ជាសហគមន៍​ ដែលបញ្ឈប់កា​របន្ទោបង់ពាសវាល​ពាសកាល​ទាំងស្រុង​ ដែលប្រការនេះ​និងរួមចំណែក​ ក្នុងការអភិវឌ្ឍន៍​ បង្កើតនូវសេចក្តី​ថ្លៃថ្នូរក្នុងគ្រួសារ​ និងសហគមន៍​៕



ពិធី​សម្ពោធ​ដាក់​ឱ្យ​ប្រើ​ប្រាស់​ជា​ផ្លូវ​ការ​គម្រោង​ការ​ពារ​ទឹក​ជំនន់ និងកែ​លំអ​ប្រព័ន្ធ​ប្រឡាយ-លូ ក្នុង​រាជធា​នីភ្នំពេញ​ជំហាន​ទី៣ ក្រោម​អធិប​តីភាព​ដ៏ខ្ពង់​ខ្ពស់​បំផុត​សម្តេ​ចអគ្គ​មហា​សេនា​បតី​តេជោ ហ៊ុន សែន នាយក​រដ្ឋមន្រ្តី នៃព្រះ​រាជាណា​ចក្រ​កម្ពុជា

សារលិខិតសម្តេចអគ្គមហាសេនាបតីតេជោ ហ៊ុន សែន ថ្លែងក្នុងឱកាសទិវាជាតិអាហារូបត្ថម្ភលើកទី២ ក្រោមប្រធានបទ«ការបំបៅកូនដោយទឹកដោះម្តាយ គឺជាការវិនិយោគដ៏ប្រសើរបំផុតសម្រាប់ជីវិតកូនអ្នក»





សារលិខិតសម្តេចអគ្គមហាសេនាបតីតេជោ ហ៊ុន សែន ក្នុងឱកាសអបអរសាទរទិវាជាតិលើកកម្ពស់អនាម័យជនបទលើកទី៦





សម្តេចតេជោ អនុញ្ញាតឲ្យលេខាមជ្ឈិមបក្សវៀតណាម ចូលជួបសម្តែងការគួរសម និងពិភាក្សាការងារ

សម្តេចតេជោ ​ហ៊ុន សែន ​នាយករដ្ឋ​មន្ត្រី នៃ​ព្រះរាជាណា​ចក្រកម្ពុជា ​នៅរសៀល​ថ្ងៃទី៥​ ខែវិច្ឆិកា ឆ្នាំ២០១៥ ​បានអនុញ្ញាតឲ្យ ​លោកជំទាវ​ ហា ទីគាត​ (Ha Thi Khiet) ​លេខាមជ្ឈិមបក្ស ​និងជាប្រធាន​គណៈចលនា​មហាជន​មជ្ឈិមបក្សវៀត​ណាម ចូលជួប​សម្តែងការ​គួរសម ​និងពិភាក្សា​ការងារ​ នាវិមានសន្តិភាព​។
តាម​ប្រសាសន៍​ ឯកឧត្តម​ អ៊ាង សុផល្លែត​ ជំនួយការផ្ទាល់​សម្តេចនាយក​រដ្ឋមន្ត្រី ​បានឲ្យដឹងថា ជំនួប​រយៈពេល១​ម៉ោងកន្លះនេះ​ ភាគីទាំងពីរ​ បានពិភាក្សា ​និងផ្លាស់ប្តូរយោបល់​ជាច្រើន ​លើការងារ​មនុស្សធម៌ ​ក្នុងនោះលោក​ជំទាវលេខា​មជ្ឈិមបក្សវៀត​ណាម បាន​ជម្រាបជូន ​សម្តេចតេជោនាយ​ករដ្ឋមន្ត្រី ​អំពីផ្លែផ្កានៃជំនួប​ជាមួយ ​លោកជំទាវ​ឧបនាយករដ្ឋមន្រ្តី ​រដ្ឋមន្ត្រី​ក្រសួងទំនាក់ទំនង​ រដ្ឋសភា ​ព្រឹទ្ធសភា ​និងអធិការៈកិច្ច​នាពេលកន្លងមក​។
នៅក្នុងជំនួប​ដដែលនេះ ​សម្តេចតេជោ​នាយករដ្ឋមន្ត្រី ​បានវាយតម្លៃខ្ពស់ ​និងលើកទឹក​ចិត្ត ឲ្យបន្តកិច្ច​សហការរវាងគ្នា ​និងគ្នាបន្តទៀត។ ​ពាក់ព័ន្ធនឹង​ការងារមនុស្ស​ធម៌នេះ ស​ម្តេចបាន មានប្រសាសន៍ថា ​គប្បីមានការ​ជួយសម្រួល​ឲ្យប្រជាជន ​ដែលរស់នៅ​តាមព្រំដែន ​ដែលត្រូវ ទៅ​ព្យាបាលជំងឺ​បន្ទាន់នោះ ​អាចធ្វើការឆ្លង​កាត់ពីប្រទេស​មួយ ទៅប្រទេស​មួយ ដើម្បី​ទទួល ការព្យាបាល។ ​ក្រៅពីការងារ​មនុស្សធម៌ ​សម្តេចក៏បាន​លើកទឹកចិត្ត​ ធ្វើយ៉ាងណាជួយ​ជម្រុញ ឲ្យមាន​កិច្ចសហប្រតិបត្តិការ​ លើវិស័យ​សេដ្ឋកិច្ច ​ពាណិជ្ជកម្ម ​និងការវិនិយោគ​ផងដែរ៕