Tuesday, October 20, 2015
កម្ពុជាទទួលស្គាល់ពីអត្ថប្រយោជន៍នៃគម្រោង RIA របស់ADBថាបានដើរតួនាទីសំខាន់នៅក្នុងការជួយពង្រឹងការអនុវត្តច្បាប់នៅកម្ពុជា
រាជរដ្ឋាភិបាលកម្ពុជាគាំទ្រគម្រោងស្តីពីការវិភាគផលប៉ះពាល់ នៃលិខិតបទដ្ឋានគតិយុត្ត ដោយទទួលស្គាល់ថាគម្រោងនេះបានជួយគាំទ្រធ្វើឲ្យការអនុវត្តន៍ច្បាប់ របស់កម្ពុជាកាន់តែមានភាពប្រសើរឡើង មានតម្លាភាព និងបានរួមចំណែកដល់ការកាត់បន្ថយអំពើពុករលួយ។
ជំនួបរវាងឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ជាមួយលោក Kelly Bird នាយកផ្នែកគ្រប់គ្រងសាធារណផ្នែកហិរញ្ញវត្ថុ និងពាណិជ្ជកម្មរបស់ធនាគារអភិវឌ្ឍន៍អាស៊ី (ADB)ប្រចាំតំបន់អាស៊ីអាគ្នេយ៍ ដែលធ្វើឡើងនៅវិមានមិត្តភាពទីស្តីការគណរដ្ឋមន្ត្រី កាលពីល្ងាចថ្ងៃទី១៩ តុលា ភាគីទាំងពីរបានពិភាក្សាគ្នាលើការងារសំខាន់ទាក់ទងនឹងគម្រោង RIA គឺគម្រោងសម្រាប់ធ្វើការវិភាគលើផលប៉ះពាល់នៃលិខិតបទដ្ឋានគតិយុត្ត។
គម្រោងវិភាគផលប៉ះពាល់លើផ្នែកលិខិតបទដ្ឋានគតិយុត្តនេះ គឺជាគម្រោងរបស់ធនាគារអភិវឌ្ឍន៍អាស៊ី (ADB) ជួយដល់ក្រុមប្រឹក្សាសេដ្ឋកិច្ច សង្គម និងវប្បធម៌នៃរាជរដ្ឋាភិបាលកម្ពុជា ដែលផ្តោតពិសេសលើការធ្វើការងារមកលើផ្នែកច្បាប់ ដើម្បីធ្វើឲ្យប្រាកដថាលិខិតបទដ្ឋានគតិយុត្ត ដែលបានដាក់ចេញទៅនោះ គឺទទួលបាននូវផលប្រយោជន៍ក្នុងការបម្រើឲ្យរាជរដ្ឋាភិបាល ដើម្បីកុំឲ្យមានកុំហុសឆ្គងណាមួយកើតឡើង។
គួរបញ្ជាក់ដែរថា ក្នុងពេលកន្លងមក ក្រុមអ្នកជំនាញរបស់ធនាគារអភិវឌ្ឍន៏អាស៊ី បានធ្វើការជាមួយ ក្រុមប្រឹក្សាសេដ្ឋកិច្ច សង្គមនិងវប្បធម៌កម្ពុជា ដោយបានវាយតម្លៃមកលើការអនុវត្តន៍លិខិតបទដ្ឋានគតិយុត្ត នៅកម្ពុជាកន្លងមកនោះគឺបានប្រព្រឹត្តទៅយ៉ាងល្អ។ កម្មវិធីវាយតម្លៃលើផលប៉ះពាល់ នៃលិខិតបទដ្ឋានគតិយុត្តរបស់ADB នេះបានចាប់ផ្តើមអនុវត្តន៏ចាប់តាំងពីឆ្នាំ២០១០ ដោយបានអនុវត្តន៏លើក្រសួងស្ថាប័នរដ្ឋចំនួន៧។ នៅក្នុងជំហានដំបូងនោះ គម្រោងកម្មវិធី RIA នេះ មានទឹកប្រាក់ប្រមាណជាង១០ម៉ឺនដុល្លារសហរដ្ឋអាមេរិក ហើយសម្រាប់ដំណាក់កាលទី២ មានទឹកប្រាក់ប្រមាណជាង២លានដុល្លារសម្រាប់ជួយកម្មវិធីគម្រោងនេះ។
ឯកឧត្តមបណ្ឌិតសភាចារ្យ សុខ អាន មានប្រសាសន៏ថា មកដល់ពេលនេះយើងពង្រីកបាន១៩ ក្រសួងស្ថាប័នហើយសម្រាប់ការអនុវត្តគម្រោងនេះ ហើយរាជរដ្ឋាភិបាលនឹងប្តេជ្ញាចិត្តខិតខំធ្វើយ៉ាងណា ឲ្យការអនុវត្តន៏លិខិតបទដ្ឋានគតិយុត្តទាំងឡាយបំរើឲ្យផលប្រយោជន៏ដល់រាជរដ្ឋាភិបាលកម្ពុជា ពិសេសគឺធ្វើឲ្យច្បាប់ទាំងឡាយបានកាន់តែប្រសើរឡើង កាន់តែមានសុក្រឹត្យភាព កាត់បន្ថយអំពើរពុករលួយ និងធ្វើឲ្យមានតម្លាភាព។
ឯកឧត្តមបណ្ឌិតសភាចារ្យ សុខ អាន បានបង្ហាញពីការរីករាយជាមួយការអនុវត្តន៍គម្រោងវាយតម្លៃលើផលប៉ះពាល់លិខិតបទដ្ឋានកតិយុត្តរបស់ក្រុមប្រឹក្សា សេដ្ឋកិច្ច សង្គមកិច្ច និងវប្បធម៌ ដែលសម្រេចបាននូវលទ្ធផល ដ៏ជោគជ័យយ៉ាងត្រចះត្រចង់ជាមួយនិងការ ពេញចិត្តពីធនាគារអភិវឌ្ឍន៍អាស៊ីផងដែរ ។
លោក Kelly Bird លើកឡើងថាធនាគារអភិវឌ្ឍន៍អាស៊ីនៅតែគាំទ្រយ៉ាងពេញលេញទៅលើគម្រោងស្តីពីការវិភាគលើផលប៉ះពាល់ នៃលិខិតវទដ្ឋានគតិយុត្តនេះហើយលោកសន្យាថានិងខិតខំក្នុងការជួយដល់រាជរដ្ឋាភិបាលកម្ពុជាបន្តទៀត៕
សម្តេចតេជោ ហ៊ុន សែន នឹងអញ្ជើញទស្សនកិច្ចផ្លូវការនៅប្រទេសបារាំង
នៅថ្ងៃទី២០ ខែតុលា ឆ្នាំ២០១៥ នេះ ក្រសួងការបរទេស និងសហប្រតិបត្តិការអន្តរជាតិ
បានចេញសេចក្តីជូនព័ត៌មានថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា
នឹងដឹកនាំគណៈប្រតិភូជាន់ខ្ពស់មួយចំនួន ទៅបំពេញទស្សនកិច្ចផ្លូវការនៅសាធារណរដ្ឋបារាំង
ពីថ្ងៃទី២៥ ដល់ទី២៧ ខែតុលា ឆ្នាំ២០១៥ តាមការអញ្ជើញរបស់ ឯកឧត្តម ហ្រ្វង់ស្វ័រ
ហូឡង់ ប្រធានាធិបតីនៃសាធារណៈរដ្ឋបារាំង។
គណៈប្រតិភូអមដំណើររួមមាន ឯកឧត្តមឧបនាយករដ្ឋមន្រ្តី ហោ
ណាំហុង រដ្ឋមន្រ្តីការបរទេស និងសហប្រតិបត្តិការអន្តរជាតិ ឯកឧត្តម ថោង ខុន រដ្ឋមន្រ្តីក្រសួងទេសចរណ៍
ឯកឧត្តម អង្គ វង្សវឌ្ឍានា រដ្ឋមន្រ្តីក្រសួងយុត្តិធម៌ និងសមាជិដទៃទៀតនៃរាជរដ្ឋាភិបាលកម្ពុជា។
នៅក្នុងពេលទស្សនកិច្ចនោះផងដែរ សម្តេចតេជោនាយករដ្ឋមន្រ្តី នឹងជួបចរចាជាផ្លូវការជាមួយឯកឧត្តម
ហ្រ្វង់ស្វ័រ ហូឡង់ និងជួបជាមួយ ឯកឧត្តម ឡូរ៉ង់ ហ្វាប៊ីយូស រដ្ឋមន្រ្តីការបរទេស
និងការអភិវឌ្ឍន៍អន្តរជាតិបារាំង និងធ្វើជាអធិបតីក្នុងពិធី ចុះហត្ថលេខាលើឯកសារមួយចំនួនដូចជាៈ
១. អនុសញ្ញា ស្តីពីបត្យាប័នរវាងរាជរដ្ឋាភិបាលកម្ពុជា និងរដ្ឋាភិបាលនៃសាធារណរដ្ឋបារាំង
២. កិច្ចព្រមព្រៀង ស្តីពីការអនុវត្តគំរោងផ្គត់ផ្គង់ទឹកស្អាតនៅខេត្តសៀមរាប ៣.
កិច្ចព្រមព្រៀងស្តីពីការសាងសង់សាលាបណ្តុះបណ្តាលជាតិជំនាញទេសចរណ៍ និងឧស្សាហកម្ម
សណ្ឋាគារនៅភ្នំពេញនិងខេត្តព្រះសីហនុ ៤. កិច្ចព្រមព្រៀងស្តីពីការតភ្ជាប់
និងចែកចាយបណ្តាញអគ្គីសនីថ្មី នៅខេត្តកំពង់ចាម ក្រចេះ និងកោះកុង ៥. កិច្ចព្រមព្រៀងស្តីពីការប្តូរបញ្ញើវត្ថុសិល្បៈ
៦. កិច្ចព្រមព្រៀងស្តីពីកម្មវិធីអភិវឌ្ឍន៍វិស័យអប់រំ បណ្តុះបណ្តាលបច្ចេកទេស និងវិជ្ជាជីវៈ។
ក្រៅពីនេះ សម្តេចតេជោ ហ៊ុន សែន នឹងជួបសំណេះសំណាលជាមួយនិស្សិត
និងជនរួមជាតិកម្ពុជាពីគ្រប់ ទីកន្លែងក្នុងប្រទេសបារាំង នៅទីក្រុងប៉ារីសផងដែរ។
សម្តេចតេជោនាយករដ្ឋមន្រ្តីជួបពិភាក្សាការងារជាមួយអនុរដ្ឋមន្រ្តីវៀតណាម
សម្តេចតេជោនាយករដ្ឋមន្ត្រី ហ៊ុន សែន ជួបពិភាក្សាការងារជាមួយអនុរដ្ឋមន្រ្តីការពារជាតិវៀតណាម
ឯ.ឧ. ង្វៀន ជីវិញ [Quyen Chivinh] នៅវិមានសន្តិភាព
នារសៀលថ្ងៃទី១៩ ខែតុលានេះ ដើម្បីស្វែងយល់ពីលទ្ធផល នៃជំនួបវិស័យការពារជាតិរវាងប្រទេសកម្ពុជា
និងវៀតណាមដែលត្រូវបានរៀបចំធ្វើនៅកម្ពុជាកន្លងមកនេះ ដែលចាត់ទុកជាកិច្ចសន្ទនាកំរិតនយោបាយមួយរវាង
ថ្នាក់អនុរដ្ឋមន្រ្តី និងរដ្ឋមន្រ្តីការពារជាតិ នៃប្រទេសទាំង២។
ឯ.ឧ. ង្វៀន ជីវិញ បានជំរាបជូនសម្តេចតេជោថា ក្នុងជំនួបវិស័យការពារជាតិកំរិតខ្ពស់លើកទី១
រវាងប្រទេសកម្ពុជា និងវៀតណាមនេះ គណៈប្រតិភូប្រទេសទាំង២ បានពិភាក្សា និងផ្លាស់ប្តូរ
យោបល់គ្នាពីការវិវត្តន៍វិស័យការពារជាតិ ទាំងទ្វេភាគី ក្នុងតំបន់ និងអន្តរជាតិ។
ឯ.ឧ. ង្វៀនជីវិញ ក៏បានស្នើសុំឲ្យប្រមុខរាជរដ្ឋាភិបាលកម្ពុជា
បន្តយកចិត្តទុកដាក់លើវិស័យយោធា នៃប្រទេសទាំង២ កម្ពុជា-វៀតណាម ដោយប្រទេសទាំង២បានឯកភាពគ្នាលើកិច្ចសហប្រតិបត្តិការ
ទាំងវិស័យនយោបាយ សន្តិសុខ និងវិស័យការពារជាតិ។
ដូចគ្នានេះ សម្តេចតេជោ ក៏ចង់អោយបង្កើននូវកិច្ចសហប្រតិបត្តិការការពារជាតិរវាងប្រទេសទាំង២
ឲ្យបានជិតស្និទ្ធថែមទៀត ដោយមើលឃើញថាស្ថានភាពនយោបាយអន្តរជាតិ ជាពិសេសក្នុងតំបន់
អាស៊ីប៉ាស៊ីហ្វិក កំពុងស្ថិតក្នុងស្ថានភាពក្តៅ។ ទន្ទឹមនេះ សម្តេចតេជោ ហ៊ុន
សែន ក៏បានលើក ឡើងថា ជាក់ស្តែងកិច្ចសហប្រតិបត្តិការវិស័យការពារជាតិរវាងកម្ពុជានិងវៀតណាម
គឺមិនត្រឹមតែ ថ្នាក់ជាតិនោះទេ គឺមានរវាងភូមិភាគនិងភូមិភាគនៃប្រទសទាំង២ផងដែរ
ដើម្បីផ្លាស់ប្តូរព័ត៌មាន និងយល់ដឹងពីគ្នា។
យោងតាមការជំរាបជូនរបស់ ឯ.ឧ. ង្វៀន ជីវិញ ក្នុងជំនួបជាមួយសម្តេចតេជោនេះ
បញ្ជាក់ថាជំនួបវិស័យយោធាកំរិតនយោបាយនេះ នឹងត្រូវធ្វើជាលើកទី២នៅក្នុងប្រទេសវៀតណាមវិញម្តង
នៅឆ្នាំក្រោយ។
លោកនាយករដ្ឋមន្ត្រី ហ៊ុន សែន ថ្វាយសារលិខិតថ្លែងអំណរព្រះគុណសម្តេចម៉ែ
លោកនាយករដ្ឋមន្ត្រី ហ៊ុន សែន នៅរសៀលថ្ងៃទី២០ ខែតុលា ឆ្នាំ២០១៥នេះ បានក្រាបបង្គំទួលថ្វាយលិខិតមួយច្បាប់ចំពោះសម្តេចព្រះមហាក្សត្រីយ៍ នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល បន្ទាប់ពីអង្គសម្តេចម៉ែទ្រង់សព្វព្រះរាជហរទ័យប្រោសព្រះរាជទាននូវការអបអរសាទរ និងប្រទានព្រះសព្ទសាធុការពរបវរសួស្តីមង្គលវិបុលសុខ មហាប្រសើរចំពោះលោក ហ៊ុន សែន ក្នុងឱកាសដែលលោក ហ៊ុន សែន បានទទួលសញ្ញាបត្រកិត្តិយស ផ្នែកអក្សរសាស្ត្រ ពីសាកលវិទ្យាល័យក្វាងស៊ី នៃសាធារណរដ្ឋប្រជាមានិតចិន នាថ្ងៃទី១៥ ខែតុលា ឆ្នាំ២០១៥ថ្មីៗនេះ។
លោក ហ៊ុន សែន បានទូលថ្វាយសម្តេចម៉ែនៅក្នុងសារលិខិតថា « តបចំពោះព្រះរាជហរទ័យទុកដាក់ដ៏ខ្ពង់ខ្ពស់បំផុត និងព្រះថោមវាទកថា ( ពាក្យសរសើរ) ដ៏មានអត្ថរសក្បោះក្បាយ ព្រមទាំងពាក្យពេចន៍ព្រះពរជ័យប្រកបដោយអត្ថន័យជ្រាលជ្រៅឧត្តុង្គឧត្តម ខណៈនេះទូលព្រះបង្គំជាខ្ញុំនិងភរិយា សូមលំឱនកាយវាចាថ្លែងនូវការគោរពកោតស្ញប់ស្ញែងដោយសុទ្ធចិត្តបំផុត ថ្វាយអង្គសម្តេចម៉ែ ជាអម្ចាស់ » ព្រមទាំងចាត់ទុកថា កិត្តិយសដែលលោក បានទទួលក្នុងឱកាសនេះ ក៏ដូចមុនៗ គឺជាកិត្តិយស កិត្យានុភាព នៃព្រះរាជាណាចក្រកម្ពុជា ព្រមទាំងប្រជានុរាស្ត្រ ជាកូន ជាចៅ ចៅទួត ចៅលួតរបស់អង្គសម្តេចម៉ែទូទាំងប្រទេសផងដែរ៕
កម្ពុជា នឹងបើកវេទិកាសេដ្ឋកិច្ចពិភពលោក នៅទីក្រុងភ្នំពេញ ក្នុងឆ្នាំ២០១៧
តាមរយៈជំនួបរវាងសម្តេចតេជោ នាយករដ្ឋមន្ត្រី ហ៊ុន សែន នៅវិមានសន្តិភាព នារសៀលថ្ងៃទី១៩ ខែតុលា នេះ លោក ហ្វីលីព រ៉ូសស្លឺរ(Philipp Roesler) នាយកគ្រប់គ្រង និងជាសមាជិកក្រុមប្រឹក្សាភិបាល នៃវេទិកាសេដ្ឋកិច្ចពិភពលោក បានបញ្ជាក់ថា វេទិកាសេដ្ឋកិច្ច ពិភពលោកស្តីពីអាស៊ីបូព៌ានៅឆ្នាំ២០១៧ គ្រោងនឹងធ្វើនៅទីក្រុងភ្នំពេញ ព្រោះនៅចុងឆ្នាំ២០១៦ វេទិកានេះនឹងធ្វើនៅប្រទេសម៉ាឡេស៊ី។
លោក ហ្វីលីព បានមើលឃើញថា កំណើនសេដ្ឋកិច្ចរបស់ កម្ពុជាមានល្បឿនថេរ ជាពិសេសក្នុងរយៈពេល២ទសវត្សចុងក្រោយនេះ ដែលត្រូវបានគេ មើលឃើញថាកម្ពុជាមានសេដ្ឋកិច្ចយ៉ាងល្អប្រសើរ ប្រកបដោយសន្តិភាព សន្តិសុខ ដែលនេះជាកត្តាដែលអាចបើកវេទិកាពិភពលោកដ៏ធំនេះបាននៅកម្ពុជា៕
ក្នុងជំនួបនេះដែរ គណៈប្រតិភូ និងសម្តេចតេជោ ក៏បានសំណេះសំណាលជុំវិញការងារ នៃវេទិកាសេដ្ឋកិច្ចពិភពលោក ដែលកន្លងមកសម្តេចតេជោនាយករដ្ឋមន្ត្រីក៏ធ្លាប់បានចូលរួមនៅក្នុង វេទិកានេះដែរនៅទីក្រុងហ្សាការតា ប្រទេសឥណ្ឌូនេស៊ី ហើយសម្តេចតេជោក៏ធ្លាប់បានជួបជា មួយលោក ហ្វីលីព រ៉ូសស្លឺរ ផងដែរ។
លោក ហ្វីលីព រ៉ូសស្លឺរ បានបញ្ជាក់ពីគោលបំណង សំខាន់នៅក្នុងឆ្នាំ២០១៦ ខាងមុខនេះ ដែលនឹងមានរៀបចំវេទិកាសេដ្ឋកិច្ចថ្នាក់តំបន់មួយនៅ រាជធានីភ្នំពេញ ក្នុងនោះមានការចូលរួម នៃប្រទេសកម្ពុជា វៀតណាម ឡាវ មីយ៉ាន់ម៉ា ដែលនេះគឺជាការលើកកំពស់កិត្តិយសរបស់យើង ពាក់ព័ន្ធនឹងបញ្ហាសេដ្ឋកិច្ចក្នុងតំបន់ ជាពិសេសនៅពេលដែលប្រទេសទាំងអស់ នឹងចូលក្នុងសហគមសេដ្ឋកិច្ចអាស៊ាន នៅចុង ឆ្នាំ២០១៥នេះ។
ទន្ទឹមនេះ លោក រ៉សស្លឺរ បានសន្យាថានឹងខិតខំសហការ ជាមួយកម្ពុជាលើកិច្ចការនេះ ។
អបអរសាទរទិវាសន្តិភាព ២៣ តុលា ខួបទី ២៤
ការពន្យល់បកស្រាយអំពីការខិតខំប្រឹងប្រែងរបស់ សម្តេច តេជោ ហ៊ុន សែន និង អតីតព្រះមហាវីរៈក្សត្រ សម្តេចព្រះ នរោត្តម សីហនុ ក្នុងការស្វែងរកដំណោះស្រាយ សន្តិភាព និងការបញ្ចប់សង្រ្គាមទាំងស្រុង នៅកម្ពុជាចាប់តាំងពី ឆ្នាំ ១៩៨៧ ដែល ប្រជាពលរដ្ឋខ្មែរទូទាំងប្រទេសចងចាំជានិច្ចនូវបូជនីយកិច្ចដ៏ឧត្តុង្គឧត្តមរបស់ប្រមុខ ដឹកនាំកម្ពុជា៕
លោក ហ៊ុន សែន បានចាត់ទុកទិសដៅនយោបាយបក្សប្រឆាំង គឺនាំអន្តរាយដល់ប្រទេសជាតិ
លោកនាយករដ្ឋមន្ត្រី ហ៊ុន សែន បានបង្ហោះផ្សាយនូវសារនយោបាយដ៏សំខាន់១នៅថ្ងៃទី២០
ខែតុលា ឆ្នាំ២០១៥នេះ ក្នុងបណ្តាញផ្សព្វផ្សាយសង្គមហ្វេសប៊ុកផ្ទាល់ខ្លួន ឈ្មោះ
Samdech Hun Sen,Cambodian Prime Minister ដែលដាក់ចំណងជើងថាទិសដៅនយោបាយបក្សប្រឆាំង
គឺនាំអន្តរាយដល់ប្រទេសជាតិ។
ខាងក្រោមនេះ គឺជាខ្លឹមសារទាំងស្រុងនៃសារនយោបាយរបស់លោក
ហ៊ុន សែន៖
« ទិសដៅនយោបាយបក្សប្រឆាំង គឺនាំអន្តរាយដល់ប្រទេសជាតិ»
ដូចសាធារណៈជនបានដឹងស្រាប់ហើយថា គណបក្សប្រឆាំងតែងតែឃោសនាភ្ជាប់ជាមួយផ្នត់គំនិតចងគំនំ
និងចង់ផ្តួលរំលំ ដែលធ្វើអោយបាក់បែកដល់ការបង្រួបបង្រួមជាតិ សន្តិភាព និង ចុងក្រោយអាចឈានទៅរកសង្រ្គាមដែលផ្តើមចេញដោយបក្សប្រឆាំងខ្លួនឯងតែម្តង
ក្នុងចំណោមសមាជិកអ្នកគាំទ្ររបស់ខ្លួន។ តើមូលហេតុអ្វីបានជាដូច្នោះ?
ចំណុចឃោសនាគ្រោះថ្នាក់ធំៗមួយចំនួនរបស់បក្សប្រឆាំងដូចជា
នៅពេលដែលគណបក្សប្រឆាំងជាប់ឆ្នោត គឺគណបក្សប្រឆាំងនឹងបង្កើតតុលាការកាត់ទោសអ្នករកស៊ីខុសច្បាប់។
អញ្ចឹងអ្នករកស៊ីមានបាននៅកម្ពុជាសព្វថ្ងៃគឺសុទ្ឋតែជាអ្នករកស៊ីខុសច្បាប់? ហើយបើខុសច្បាប់ ចុះម៉្តេចមិនប្តឹងទៅតុលាការនៅពេលនេះតែម្តង? អញ្ចឹងនៅពេលដែលបក្សខ្លួនជាប់ឆ្នោតគឺនឹងបង្កើតច្បាប់និងអ្វីៗថ្មីទាំងអស់
រួមទាំងរចនាម្ព័ន្ឋក្រសួងមន្ទីរ តួនាទីមុខតំណែងរបស់មន្រ្តីរាជការដូចជា កងទ័ពជាតិ
និងនគរបាលជាតិជាដើម ។ល។ តើអាចទៅរួចទេ? ហើយនឹងមានអ្វីកើតឡើងនៅពេលសភាពការណ៍ផ្លាស់ប្តូរច្របូកច្របល់កើតឡើង?
មួយវិញទៀត គឺបក្សប្រឆាំងតែងតែឃោសនាអូសទាញអ្នកគាំទ្រដោយសន្យាថា
អ្នកដែលមានមុខងារតួនាទីសព្វថ្ងៃ គឺមិនផ្លាស់ប្តូរចេញទេអោយតែគាំទ្របក្សខ្លួន ចំណែកឯអ្នកគាំទ្រថ្មីៗ
បើបក្សឈ្នះឆ្នោតគឺនឹងបានទទួលតំណែងតួនាទីជាមិនខាន។ ពលរដ្ឋដែលចង់បានបុណ្យសក្តិគឺពិតជាបានចំណាយទុន
ដោយលក់សព្វលក់គ្រប់យកមកជួយបក្ស។
ឧបមារថាបក្សប្រឆាំងឈ្នះពិតមែន បើតាមការសន្យា
គឺអ្នកចាស់មិនដក រីឯអ្នកថ្មីក៏ចូលមិនបាន។ តើពេលនោះនឹងមានអ្វីកើតឡើង? មន្រ្តីរាជការ និងអ្នកគាំទ្រដែលអស់លុយកាក់មួយចំនួនធំប្រាកដជាមិនព្រមទេ
អំពើហឹង្សា ការបះបោរនឹងកើតមានឡើងដែលឈានទៅរកសង្រ្គាមដណ្តើមអំណាចបុណ្យសក្តិ ដែលកើតចេញពីការសន្យារបស់បក្សប្រឆាំងខ្លួនឯង។
សូមប្រជាពលរដ្ឋ មន្រ្តីរាជការ និងយុវជនដែលកំពុងលង់ខ្លួនអស់លុយកាក់នឹងការសន្យាអូសទាញអោយមានការផ្លាស់ប្តូរ
ដែលអាចឈានទៅរកសង្រ្គាម និងការបែកបាក់ត្រូវពិចារណា។ ការឃោសនារបស់បក្សប្រឆាំងសព្វថ្ងៃគឺគ្មានអ្វីខុសពីការឃោសនារបស់ខ្មែរក្រហមឡើយ
ដែលមុននឹងបានកាន់កាប់អំណាចគឺខ្មែរក្រហមបានឃោសនាថានឹងកាត់ទោសមន្រ្តីរាជរបស់អតីតរដ្ឋាភិបាលពីមុនចំនួន៧
នាក់ ដោយចោទថាពួកគេក្បត់ជាតិ។ តែក្រោយពីគេក្តាប់អំណាចពេញដៃហើយ គឺខ្មែរក្រហមបានចោទប្រកាន់ពលរដ្ឋខ្លួនឯងសុទ្ឋតែជាខ្មាំង
និងជនក្បត់ជាតិទាំងអស់ដែលខ្មែរក្រហមបានសម្លាប់ចោលអស់៣លាននាក់។
សូមបងប្អូនពិចារណា ព្រោះសន្តិភាពសំខាន់ណាស់
យើងខិតខំប្រឹងប្រែងយូរណាស់ទម្រាំបានសន្តិភាពពេញលេញមកទល់សព្វថ្ងៃ។ សម្តេចតេជោ
ហ៊ុន សែន ប្រធានគណបក្សប្រជាជន ប្តេជ្ញាថែរក្សាការពារសុខសន្តិភាពជូនពលរដ្ឋខ្មែរ
មិនអោយមានជនណាមកបំផ្លិចបំផ្លាញបានឡើយ៕
Subscribe to:
Posts (Atom)