សាលារាជធា​នីភ្នំពេញជូន​ដំណឹង​ស្តី​ពីការ​គូស​គំនូស​ចរាចរ​ណ៍​ថ្មីលើម​ហា​វិថីមួយ​ចំនួន​ក្នុង​រាជ​ធានី​ភ្នំពេញ

យោងតាមសេចក្តីជូនដំណឹងរបស់​សាលារាជធានីភ្នំពេញ   ​​និងក្រសួងសាធារណការ និងដឹកជញ្ជូន  ​កាលពីរសៀលថ្ងៃទី១៩ ​​​​​ខែមេសា ​​​ ​​ឆ្នាំ២០១៦បានឲ្យដឹងថា  ដើម្បីលើកកម្ពស់ សោភ័ណភាព និងដើម្បីរៀបចំ​សណ្តាប់ធ្នាប់ចរាចរណ៍តាម​ដងផ្លូវក្នុងរាជធានីភ្នំពេញ    ឲ្យកាន់តែល្អប្រសើរនៅ​ថ្ងៃ​ទី២១  ​ ​​ខែមេសា  ​​ ឆ្នាំ២០១៦  ​ ​​សាលារាជធានីភ្នំពេញ​សហការជាមួយក្រសួងសាធារណការ និងដឹកជញ្ជូន នឹងចុះអនុវត្តការងារគូសគំនូសចរាចរណ៍ថ្មីលើមហាវិថីចំនួន ០៥ ខ្សែ រួមមាន៖ ១-មហាវិថីម៉ៅសេទុង ចាប់ពីចំណុចប្រសព្វមហាវិថីព្រះនរោត្តម  ​​  ​​​​​ដល់ចំណុចប្រសព្វមហាវិថីសហព័ន្ធរុស្ស៊ី ​​​   ​ ​​​​​​​ជាជំនួយរបស់ក្រុមហ៊ុន ​​ ​​ China  ​​ Road & ​​ Bridge ​​ ​​ Cooperation តាមរយៈក្រសួងសាធារណការ និងដឹកជញ្ជូន។ ២- មហាវិថីព្រះសីហនុ ចាប់ពីចំណុចប្រសព្វមហាវិថីព្រះមុនីរ៉េត ដល់​​ចំណុចប្រសព្វមហាវិថីសុធារស ជាជំនួយរបស់ក្រុមហ៊ុន China Road & Bridge Cooperation តាមរយៈក្រសួងសាធារណការ និងដឹកជញ្ជូន។ ៣- មហាវិថីសហព័ន្ធរុស្ស៊ី ចាប់ពីចំណុច​ប្រសព្វមហាវិថីព្រះនរោត្តម  ​​​ ​​​ ​​​  ​​ដល់រង្វង់មូលចោមចៅ ​​ ​​​ ​​  ​​អនុវត្តដោយក្រុមហ៊ុនដូនពេញ   ​​​​​​ខន​ស្ត្រាក់សិន     ​​​​​​  ​​​​​ជាគម្រោង​របស់រដ្ឋាភិបាលរាជធានីរដ្ឋាភិបាភ្នំពេញ។ ៤- មហាវិថីកម្ពុជាក្រោម ចាប់​ពីចំណុចប្រសព្វ​មហាវិថីព្រះមុនីវង្ស ដល់ស្ពានអាកាស  ​៧មករា  ​​អនុវត្តដោយក្រុមហ៊ុនដូនពេញ   ​​ ​​ខនស្ត្រាក់សិន     ​​​​​ជាគម្រោងរបស់សាលារាជធានីភ្នំពេញ។ ៥- មហាវិថីព្រះនរោត្តម ចាប់ពីរង្វង់មូលវត្តភ្នំ ដល់ស្ពានអាកាសក្បាលថ្នល់     ​​​​​​​អនុវត្តដោយក្រុមហ៊ុន  ​​ដូនពេញ     ​​ខនស្ត្រាក់សិន​   ​​​​​​​ជាគម្រោងរបស់រដ្ឋាភិបាលរាជធានីភ្នំពេញ។

សេច​ក្តីជូនដំណឹង​នេះ​ក៏បានបន្តទៀតថា ដើម្បីបញ្ចៀសបានជាអតិបរមានូវផលប៉ះពាល់នានា និងដើម្បីដោះស្រាយបញ្ហាការកកស្ទះចរាចរណ៍តាមដងផ្លូវ ការអនុត្តគម្រោងខាងលើ   នឹងត្រូវដំណើរការការដ្ឋាននៅវេលាយប់ចាប់ពីម៉ោង    ២១:០០ នាទីយប់   ​​ដល់ម៉ោង

០៦: ០០ នាទីព្រឹក ដោយត្រូវចាប់ផ្តើមពីថ្ងៃទី២៣ ខែមេសា ឆ្នាំ២០១៦ ចំពោះមហាវិថីម៉ៅសេទុង និងមហាវិថីព្រះសីហនុ។ ដោយឡែកចំពោះមហាវិថីសហព័ន្ធរុស្ស៊ី មហាវិថីកម្ពុជាក្រោម និងមហាវិថីព្រះនរោត្តម បានចាប់ផ្តើមដំណើរការការដ្ឋានតាំងពីថ្ងៃទី១៩ ខែមេសា ឆ្នាំ២០១៦ នេះតទៅ។

សាលារាជ​ធានីភ្នំពេញក៏​បានអំពាវនាវ​ឲ្យបងប្អូនប្រជា​ពលរដ្ឋ និងសាធារណៈ​ជនទាំងអស់​ចូលរួមសហការ​ជាមួយនិង​សមត្ថកិច្ចពាក់ព័ន្ធ ដោយ​ឈរលើ​ស្មារតី​យោគយល់​អធ្យាស្រ័យ​ខ្ពស់ ចំពោះ​ផល​រំខាននានា​ដែលអាចកើត​មានឡើង ដើម្បីឲ្យដំ​ណើរការនៃការ​អនុវត្តគ​ម្រោងនេះ ប្រព្រឹត្ត​ទៅដោយរលូន ​និងទទួលបាន​លទ្ធផល​ល្អប្រសើរ៕​

ឯកឧ ត្តម សាយ សំអាល់ អនុញ្ញាតឱ្យលោក Jake Brunner ប្រធាន​អង្គការ​​សហភាព​អន្តរជាតិ​ដើម្បី​ការអភិរក្ស​ធម្មជាតិ (IUCN) ចូល​ជួប​សម្តែង​ការគួរសម

ឯកឧត្ត​ម សាយ សំអា​ល់ រដ្ឋមន្ត្រីក្រសួង​​បរិស្ថានបាន​អនុ​ញ្ញាតឱ្យលោក Jake Brunner ប្រធានអ​ង្គ​ការសហភាព​អន្តរ​ជាតិដើម្បី​ការអភិរក្ស​ធម្មជាតិ (IUCN) ប្រចំា​​កម្ពុជា វៀត​ណាម ឡាវ និងភូមា និង​គណៈប្រតិភូចូល​ជួបស​ម្តែងការ​គួរ​សម នៅថ្ងៃទី ២០ ខែមេសា ឆ្នាំ២០១៦ នៅទីស្តីកា​រ​ក្រសួងបរិស្ថាន។

ឯកឧត្តម​រដ្ឋមន្រ្តី សាយ សំអាល់ ក៏បានកោ​តសរ​សើរ​ចំពោះសកម្មភាព​ការងារអ​ភិរក្សដែលអង្គការ IUCN បាននិងកំពុង​អនុវត្ត ដោយបា​ន​សហការ​យ៉ា​ងជិតស្និទ្ធ​ជា​មួ​យនឹងក្រសួង       បរិស្ថា​ន និ​ង​លើ​ក​​​ទឹកចិត្តដល់​អ​ង្គការ IUCN បន្តកិច្ច​​សហការ​លើសកម្ម​ភា​ពអភិរក្សធន​ធាន​ធម្មជាតិ​នេះឱ្យកាន់​តែ​ល្អប្រសើ​របន្ថែមទៀត។ ទន្ទឹមនឹងនេះ​ ឯកឧត្តម​រដ្ឋមន្រ្តី​បានជម្រាបជូន​ដល់គណៈ​ប្រតិភូ ស្តីពីកំណែ​ទម្រ​ង់ថ្មីៗ​របស់រាជរដ្ឋាភិបាល​លើ​ការអភិរក្ស​និងការអភិវឌ្ឍធន​ធាន​ធ​ម្មជាតិ រវាងក្រសួង​​បរិស្ថាន និងក្រ​សួង​កសិកម្ម រុ​ក្ខា​ប្រម៉ាញ់​និងនេសាទ។

នៅក្នុង​ឱកាស​នោះ​ផងដែរ លោក Jake Brunner បាន​ជម្រាបជូន​ពីវឌ្ឍន​​ភាពនៃកិច្ច​សហប្រតិបត្តិកា​រ​លើការងារ​អភិ​រក្សធនធាន​ធម្មជាតិ និងយុទ្ធ​​សាស្រ្តនៃ​ការគ្រ​ប់គ្រង​និងអភិរក្សតំបន់ការពា​រ​ធម្ម​ជាតិ​​​នៅប្រ​ទេសកម្ពុជា រវាងរា​ជរដ្ឋាភិបាល​ក​ម្ពុជា និងអង្គកា​រ IUCN។ លើសពីនេះ លោក Jake Brunner បានជម្រា​ប​ឯកឧត្តម​រដ្ឋម​ន្ត្រី ពីគម្រោង Mekong-W​et ដែល​នឹងត្រូវអនុវត្ត​ក្នុ​ងតំ​បន់​រ៉ាម​សារចំនួន០៣រប​ស់​កម្ពុជា រួមមានតំបន់​រ៉ាមសារព្រែ​ក​ទាល់ តំបន់រ៉ាមសារបឹង​ទន្លេឆ្មារ និ​ងតំបន់រ៉ាម​សារ​កោះកាពិ។ ជាមួ​យគ្នានេះ អង្គការ IUCN នឹងផ្តល់​​ជាជំនួយបច្ចេ​កទេស និងថវិ​ការ​សម្រាប់ដំណើរ​ការនៃការបង្កើត​​ឧទ្យាន​ជាតិសមុទ្រ​នៅកម្ពុ​ជា​នាពេលខា​ងមុខ៕​

អាជ្ញាធរជាតិអប្សរាធ្វើការបំភ្លឺការភ័ន្តច្រឡំផ្សេងៗពាក់ព័ន្ធស្ពានបុរាណ ”ស្ពានរលុះ” នៅខេត្តសៀមរាប

កាលពីថ្ងៃទី១៩ ខែមេសា ឆ្នាំ២០១៦ នៅលើបណ្តាញទំនាក់ទំនងសង្គម Facebook របស់​លោក ខៀវ ធី ដែលជាមគ្គុទ្ទេសក៍ទេសចរណ៍នៅតំបន់អង្គរ បានផ្សាយព័ត៌មានថា គាត់មាន​ការឆ្ងល់ហេតុអ្វីបានជាក្រុមហ៊ុនវាយកូនហ្គោលរបស់ថៃ មានសិទ្ធិសាង​សង់លើតំបន់ស្ពាន​បុ​រាណ​​នៅខាងលិចទីរួមស្រុកខេត្តសៀមរាប។ សារនេះត្រូវបានចែកចាយតគ្នា និងមានការ​បញ្ចេញ​យោបល់ជាច្រើនពីសំណាក់សាធារណជនដែលធ្វើឲ្យមានការភ័ន្តច្រឡំផ្សេងៗ។

ដើម្បីឲ្យសាធារណជនបានជ្រាបច្បាស់ពីបញ្ហានេះ អាជ្ញាធរជាតិអប្សរាសូម​ធ្វើការបំភ្លឺ​ដូច​ខាង​ក្រោម ៖

១. ទីតាំងស្ពានបុរាណដែលលោក ខៀវ ធី បាន​ផ្សព្វផ្សាយនេះមានឈ្មោះថា ស្ពានរលុះ មាន​ទីតាំងស្ថិតនៅទិសពាយ័ព្យនៃបារាយណ៍ទឹកថ្លា ក្នុងភូមិរលុះ ឃុំល្វា ស្រុកពួក ខេត្តសៀមរាប ខាងលិចទីប្រជុំជនស្រុកពួក ប្រមាណ៤គីឡូម៉ែត្រ ដែលទីនេះជាតំបន់​ការពារ​ស្ថានីយ៍បុរាណ​ស្ថិតនៅក្រៅតំបន់ឧទ្យានអង្គរ។ ម្យ៉ាងទៀត ដោយសារតែទីតាំងនេះស្ថិតជាមួយនឹង​ទីតាំង​ក្រុម​ហ៊ុនវាយកូនហ្គោល នាំឲ្យមានការយល់ច្រលំថាទីនេះគ្រប់គ្រងដោយឯកជន តែតាមពិត​ទី​នេះជា​តំបន់អភិរក្សបេតិកភណ្ឌជាតិដែលក្រុមហ៊ុនមិនអាចរំលោភបំពានបានឡើយ។

២.ស្ថានភាពបច្ចុប្បន្ន ស្ពាននេះទទួលបាននូវការថែទាំ និងអភិរក្សយ៉ាងល្អដោយមិនមាន​ការ​រំ​លោ​ភ​បំពានទេ។ ថ្វីត្បិតតែស្ពាននេះ ស្ថិតនៅក្នុងតំបន់ទីលានវាយកូនហ្គោល តែយើងបាន​កំ​ណត់​តំបន់ការពារយ៉ាងច្បាស់លាស់ ស្របតាមច្បាប់ស្តីពី កិច្ចការពារបេតិកភណ្ឌរបស់ជាតិ ព្រម​​​​ទាំង​បានដាក់ស្លាកសញ្ញាដោយរៀបរាប់ ពីប្រវត្តិស្ពាន និងការអភិរក្សស្ពាន​បុរាណនេះ​។

៣.ប្រវត្តិសង្ខេបរាជធានីអង្គរជាមជ្ឈមណ្ឌលកណ្តាល​នៃអាណាចក្រអង្គរ ដែលបុរីផ្សេងៗ​នៃ​អារ្យ​​ធម៌នេះ បានភ្ជាប់ខ្លួនជាមួយមជ្ឈមណ្ឌលកណ្តាល តាមរយៈបណ្តាញ​គមនាគមន៍​ជា​ច្រើន​។ នៅតាមផ្លូវនីមួយៗ យើងតែងឃើញមានសាលាសំណាក់ហោបន់នៃមន្ទីរពេទ្យ និង​សំណង់​រក្សា​ទឹក​នៅអមសងខាង។ ចុងសតវត្សទី១២ ព្រះបាទជ័យវរ្ម័នទី៧ បានស្ថាបនាក្រុងអង្គរធំ ដោយ​រក្សាទុកឈ្មោះដើម យសោធរ ដដែល។ រាជធានីយសោធរថ្មីនេះ មានថ្នល់ទទឹង និង​បណ្តោយ​ថ្ងៃ ដែលចេញពីក្រុងឆ្ពោះទៅទិសទាំង៤ តាមលំនាំការរៀបចំក្រុង។ ថ្នល់បណ្តោយ​ថ្ងៃ​ឆ្ពោះទៅទិសខាងលិច កាត់តាមខ្លោងទ្វារតាកាវភ្ជាប់ទៅថ្នល់បារាយណ៍ទឹកថ្លា។ នៅជ្រុង​ពាយ័ព្យ​នៃបារាយណ៍ទឹកថ្លា មានថ្នល់មួយខ្សែរត់ទៅទិសខាងលិច ដោយរត់ងាក​ទៅ​ទិស​ខាង​ជើង​បន្តិច។ យោងតាមសិលាចារឹកស្តុកកក់ធំ ដែនដីនៅខាងលិចរាជធានីយសោធរ បាន​ចែក​ជា​​មណ្ឌលរដ្ឋបាលជាច្រើន។ ទំនាក់ទំនងរវាងរាជធានី និងមណ្ឌលទាំងនោះ ប្រាកដ​ជាដើរ​តាម​ផ្លូវចេញពីជ្រុងពាយ័ព្យទំនប់ក្រៀមឈ្មោះ “ស្ពានរលុះ” បារាយណ៍ទឹកថ្លានេះឯង។ ថ្នល់​នេះ​​រត់​កាត់តាមស្ថានីយមួយ អ្នកស្រុកហៅថា កំពែងព្រះស្រុក ដែលមានកំពែងសាងពីថ្ម​បាយ​ក្រៀម​និងមានគូទឹកព័ទ្ធជុំវិញ។

៤.កិច្ចអន្តរាគមន៍របស់អាជ្ញាធរជាតិអប្សរា អ្នកជំនាញផ្នែកបុរាណ​វិទ្យា​ របស់អាជ្ញាធរជាតិ​អប្សរា​បានចុះធ្វើការសិក្សា នៅទីតាំងស្ថានីយ៍បុរាណដែលស្ថិតនៅ​ក្នុងទីតាំងរៀបចំសាងសង់​ទី​លាន​វាយកូនហ្គោលនេះ នៅថ្ងៃទី២៥ ខែកញ្ញា ដល់ថ្ងៃទី៥ ខែវិច្ឆិកា ឆ្នាំ២០០៥ ដើម្បីស្វែង​យល់​ពី​តម្លៃស្ថាបត្យកម្មសំណង់ស្ពានបុរាណ ថ្នល់បុរាណ និងទួលប្រាសាទដែលមាននៅក្នុង​បរិ​វេណ​​ទីលានវាយកូនហ្គោលនេះ ព្រមទាំងវាយតម្លៃពីផលប៉ះពាល់ នៃគម្រោង​អភិវឌ្ឍន៍​ចំ​ពោះ​​​ស្ថានីយ៍បុរាណវិទ្យាទាំងនេះ ដើម្បីកំណត់ផែនការ ការពារសំណង់បេតិកភណ្ឌ សំ​ណល់​​បុរាណ​វិទ្យា និងទេសភាពវប្បធម៌។ ការធ្វើអន្តរាគមន៍ផ្នែកបុរាណវិទ្យានៅទីនេះ គឺដើម្បី​សង្គ្រោះ​​លើកតម្លៃ និងអភិរក្សមត៌កបេតិកភណ្ឌជាតិ។

បន្ទាប់ពីកិច្ចអន្តរាគមន៍ ​របស់អាជ្ញាធរជាតិ​អប្សរា ភាគីក្រុមហ៊ុនបានឯកភាព​ទាំងស្រុង​ចំពោះ​ការ​​អភិរក្សស្ពានរលុះនេះ ដោយបានចូលរួមគ្រប់សកម្មភាពក្នុងការងារស្រាវជ្រាវ ធ្វើកំណាយ​បុរាណវិទ្យា និងការធ្វើសម្រង់ប្លង់ ទម្រង់រូបរាងដើមរបស់ស្ពាន ដើម្បីចងក្រងជាឯកសារ ក៏​ដូច​ជាការរៀបចំជួសជុល លើកតម្លៃ និងបង្ហាញដល់សាធារណជនឲ្យបានស្ពាល់​នូវស្ថានីយ៍​បុរាណ​​ដ៏មានតម្លៃនេះ។ ម្យ៉ាងទៀតចំពោះការរៀបចំនានាត្រូវបានរក្សាទុកជាតំបន់ការពារ ដែល​​​មានចំងាយយ៉ាងតិច១៥ម៉ែតពីបរិវេណខាងក្រៅនៃស្ពាន ហើយរហូតដល់បច្ចុប្បន្ន ស្ពាន​នេះ​​​​ ក៏មិនមានការរំលោភបំពានបំផ្លិចបំផ្លាញដែរពោលគឺមានការអភិរក្សបានយ៉ាងល្អពី​ ស្ថាប័ន​​​​អាជ្ញាធរជាតិអប្សរា៕

ប្រភព៖ អាជ្ញាធរជាតិអប្សរា

រដ្ឋមន្រ្ដីក្រសួងសាធារណការប្រកាសថានឹងរៀបចំដាក់ម៉ាស៊ីនសម្រាប់ធ្វើប័ណ្ណ បើកបរជូនប្រជាពលរដ្ឋ នៅផ្សារទំនើបអ៊ីអន

រដ្ឋមន្រ្ដីក្រសួង​សាធារណការ​​និងដឹកជញ្ជូនបាន​ប្រកាសថា ក្រសួងនឹង​រៀបចំបើក​​ដំណើរ ការដាក់ម៉ាស៊ីន​បោះពុម្ពធ្វើ​ប័ណ្ណបើកបរនៅ​ក្នុងផ្សារទំនើបអ៊ីអន ដើម្បីផ្ដល់ ភាពងាយ​​ស្រួល​ដល់ប្រជាពលរដ្ឋមន្រ្ដី​រាជការ ដែលត្រូវការប្ដូរប័ណ្ណ ឬការសុំធ្វើ​ប័ណ្ណបើកបរថ្មី ឱ្យកាន់​តែ​ងាយ​ស្រួល និងឆាប់រហ័ស។ ក្នុងកិច្ចប្រជុំរវាង​​ក្រសួងសាធារណការ និងដឹកជញ្ជូន ជាមួយ​សាលា​រាជធានីភ្នំពេញ កាលពីរសៀល​ថ្ងៃទី១៩ ខែមេសា ឆ្នាំ២០១៦ ឯកឧត្តម ស៊ុន ចាន់ថុល ទេស​រដ្ឋម​ន្រ្ដី រដ្ឋមន្រ្ដី​ក្រសួងសាធារណការ​​​និងដឹកជញ្ជូន បានមានប្រសាសន៍ថា ការបើក​​ពង្រីកកន្លែង ធ្វើប័ណ្ណថ្មីនេះ ដើម្បីផ្តល់ឱកាសឱ្យ​ប្រជា​ពលរដ្ឋមកចុះបញ្ជី តាមប្រព័ន្ធអនឡាញ​សម្រាប់ការ ស្នើសុំធ្វើប័ណ្ណ​បើកបរម៉ូតូ រថយន្ដថ្មី ឬប្ដូរប័ណ្ណបើកបរ ការសុំធ្វើស្លាកលេខ ម៉ូតូ និងរថយន្ដជាដើម ដើម្បីកាត់បន្ថយការចំណាយក្រៅផ្លូវការ កាត់បន្ថយ ពេលវេលារង់ចាំ។ ឯកឧត្តមរដ្ឋមន្រ្ដីបាន​បញ្ជាក់ថា ការដាក់ម៉ាស៊ីនបោះពុម្ពប័ណ្ណបើកបរ​នៅផ្សារទំនើបនេះ គឺជាការបង្ខិតសេវាឱ្យ ទៅកាន់តែ ជិតប្រជាពលរដ្ឋ ពិសេសការទទួលបាននូវសេវាកាន់តែរហ័ស ស្របពេលប្រជាពលរដ្ឋមកដើរ លេងកម្សាន្ដនៅថ្ងៃឈប់សម្រាក ក៏អាចឆ្លៀតពេល មកប្តូរប័ណ្ណបើកបររបស់ខ្លួនបាន ផងដែរ។

ឯកឧត្តម វ៉ា ស៊ីមសុរិយា អ្នកនាំ ពាក្យ​ក្រសួងសាធារណការ និងដឹកជញ្ជូន បាន បញ្ជាក់​ឱ្យដឹង នាព្រឹកថ្ងៃទី២០ ខែមេសា ឆ្នាំ២០១៦នេះថា ការរៀបចំដាក់ម៉ាស៊ីនបោះពុម្ព ផលិតប័ណ្ណបើកបរយានយន្ដ នេះ គឺជាគំនិតផ្ដួច ផ្ដើមរបស់រដ្ឋមន្រ្ដីថ្មីក្រសួងសាធារណការ ដោយមិនទាន់អាចបង្ហាញលំអិតអំពីប្រសិទ្ធភាព តម្រូវការ និងរយៈពេលរង់ចាំរបស់ប្រជា ពលរដ្ឋ ដើម្បីទទួលបានប័ណ្ណ បើកបរ។

ឯកឧត្តមបញ្ជាក់ថា ការចាប់ផ្ដើមដំណើរការ​ទៅលើសេវាកម្មថ្មីនេះ ក្រសួងសាធារណការ នឹងប្រគល់សិទ្ធិ ជូនសាលារាជធានីភ្នំពេញ និងមន្ទីរសាធារណការ និងដឹកជញ្ចូន​រាជធានីភ្នំពេញ ដើម្បីរៀបចំអនុវត្តន៍នាពេល ខាងមុខនេះ។ លោក ព្រាប កុល នាយកអង្គការតម្លាភាពកម្ពុជា បានស្វាគមន៍ចំពោះគំនិតផ្ដួចផ្ដើម របស់រដ្ឋមន្រ្ដីថ្មី ក្រសួងសាធារណការ និងដឹកជញ្ជូនក្នុងការរៀបចំប្រព័ន្ធគ្រប់គ្រងធ្វើប្រតិភូកម្ម និងផ្ទេរការងារទៅថ្នាក់ក្រោមជាតិ ឬដាក់កន្លែងធ្វើការងារនៅតាមទីសាធារណៈ ដើម្បីឱ្យប្រជា ពលរដ្ឋងាយស្រួលក្នុងការមកទទួលសេវាកាន់ តែឆាប់រហ័ស កាត់បន្ថយការចំណាយថវិកា និងពេលវេលា។ ជាមួយគ្នានេះ គម្រោងរៀបចំដាក់ឱ្យដំណើរការ ម៉ាស៊ីនបោះពុម្ព សម្រាប់ប្ដូរប័ណ្ណ បើកបរយានយន្ដនៅផ្សារទំនើបអ៊ីអននេះ គឺជាផ្នែកមួយនៃការធ្វើកំណែ ទម្រង់លើវិស័យ សាធារណការ និងដឹកជញ្ជូន ដែលបានកំណត់រយៈពេល១០០ថ្ងៃ បន្ទាប់ពីក្រសួងនេះ ផ្លាស់ប្ដូររដ្ឋមន្ត្រីថ្មីចូលកាន់តំណែង។

សូមបញ្ជាក់ថា ក្នុងកិច្ចប្រជុំរវាងក្រសួងសាធារណការ និងដឹកជញ្ជូនជាមួយសាលា រាជធានីភ្នំពេញ ភាគីទាំងពីរសម្រេចបានលទ្ធផលជាច្រើនចំណុចដូចជា កាត់បន្ថយពេលវេលា ផ្តល់សេវាសាធារណៈ ជូនប្រជាពលរដ្ឋ ដូចជាការធ្វើប័ណ្ណបើកបរ ការលក់ផ្តាច់ ការត្រួតពិនិត្យឆៀក ឬការធ្វើស្លាកលេខ ជាដើម ហើយក៏មានការពិភាក្សា ដើម្បីផ្លាស់ប្តូរកិច្ចការមួយចំនួនទៅជាប្រព័ន្ធបច្ចេកវិទ្យាទំនើប៕

សម្តេច​តេជោ ហ៊ុន សែន ផ្ញើ​លិខិត​​អបអរ​សាទ ជូនចំ​ពោះ​ឯក​ឧត្តមបណ្ឌិត ថងលូន ស៊ីសូលីត នាយក​​រដ្ឋមន្រ្តី នៃសា​ធារណ​​រដ្ឋប្រជាធិ​ប​តេយ​ប្រជាមានិត​ឡាវ

សម្តេច ហេង សំរិន ចាត់ទុកកិច្ច​ប្រជុំប្រធា​នសភាអាស៊ី-អឺរ៉ុប នៅរុស្ស៊ីមានសារៈ​សំខាន់ ក្នុងការថែរក្សា​សន្តិសុខ សេដ្ឋកិច្ច បរិស្ថាន ក្នុងតំបន់ និងពិភពលោក

សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា បានអញ្ជើញ ​ចូលរួមកិច្ចប្រជុំប្រធានសភាអាស៊ី-អឺរ៉ុប​ នៅទីក្រុង ម៉ូស្គូ ប្រទេសរុស្ស៊ី នៅថ្ងៃទី១៩ ខែមេសា ឆ្នាំ២០១៦នេះ ដោយមានប្រធានស្ថាប័ននីតិប្បញ្ញតិ្តមកពីតំបន់អាស៊ី និងអឺរ៉ុប ចំនួន១៩ប្រទេសចូលរួម។ នេះជាកិច្ចប្រជុំលើកដំបូង របស់ថ្នាក់ដឹកនាំសភាតំបន់ទំាងពីរ ក្រោមការផ្តួចផ្តើមរបស់សភាឌូម៉ាសហព័ន្ធរុស្ស៊ី និងរដ្ឋសភានៃសាធារណរដ្ឋកូរ៉េ ដើម្បី ពង្រឹងកិច្ចសហប្រតិបត្តិការស្ថាប័នសភាទំាងពីរតំបន់ ក្នុងការថែរក្សាសន្តិភាព ស្ថិរភាពនៅក្នុងតំបន់ និងពិភពលោក។
ក្នុងកិច្ចប្រជុំនោះ សម្តេចអគ្គមហាពញាចក្រី ហេង សំរិន បានលើកឡើងពីសារៈសំខាន់នៃកិច្ចប្រជុំនេះ ដោយសម្តេចបានចាត់ទុកថា នេះជា ព្រឹត្តិការណ៍ប្រវត្តិសាស្រ្តដំបូងដែលថ្នាក់ដឹកនាំសភាពីតំបន់អាស៊ី និងអឺរ៉ុប បានអង្គុយពិភាក្សាគ្នា ដើម្បីផ្លាស់ប្តូរយោបល់ ទស្សនៈ ក្នុងគោលបំណង បង្កើតនូវយន្តការសហប្រតិបត្តិការរួមគ្នារវាងស្ថាប័ននីតិប្បញ្ញត្តិ សំដៅពង្រឹង និងពង្រីកភាពជាដៃគូរ លើកស្ទួយស្ថិរភាព សន្តិសុខ សេដ្ឋកិច្ច វប្បធម៌ និងកិច្ចការពារបរិស្ថាន របស់ពិភពលោក។
សម្តេចប្រធានរដ្ឋសភា បានគូសបញ្ជាក់ថា “កិច្ចសហប្រតិបត្តិការរួម និងភាពជាដៃគូរ ជាកត្តាសំខាន់ និងចាំបាច់ក្នុងការដោះស្រាយបញ្ហារួម នៃតំបន់ ទាំងពីរ ពីព្រោះនៅពេលមានយន្តការសហប្រតិបត្តិការ រួមវានឹងជួយអោយតំបន់ទាំងពីរកាន់តែខិតជិតគ្នា និងមានសក្តានុពលកាន់​តែខ្លាំងដែល ធានាបាននូវកំណើនសេដ្ឋកិច្ចប្រកបដោយចីរភាព មានការផ្លាស់ប្តូរ ស្វែងយល់ពីវប្បធម៌រវាងប្រជាជន និងអំណោយផលដល់កិច្ចការពារបរិស្ថាន “ ។
សូមបញ្ជាក់ថា កិច្ចប្រជុំលើកដំបូងនៃប្រធានសភាតំបន់អាស៊ី-អឺរុប នាពេលនេះ ក្រោមប្រធានបទ ស្តីពីកិច្ចសហប្រតិបត្តិការអន្តរសភា ដើម្បី ភាពរុងរឿងរបស់ប្រទេសអាស៊ី-អឺរ៉ុប នាសតវត្សរ៍ទី២១ ដោយផ្តោតការពិភាក្សាទៅលើវិស័យសេដ្ឋកិច្ច វប្បធម៌ និងបរិស្ថាន។ ឯកឧត្តម សើហ្គេ ណារីសស្គីន ប្រធានសភាឌូម៉ាសហព័ន្ធរុស្ស៊ី និង ឯកឧត្តម ជុង អ៊ុយវ៉ា ប្រធានរដ្ឋសភាសាធារណរដ្ឋកូរ៉េ ជាអ្នកដឹកនាំកិច្ចប្រជុំ ដោយមាន ប្រតិភូសភាជាថ្នាក់ដឹកនាំស្ថាប័ននីតិប្បញ្ញត្តិ មកពីប្រទេសចំនួន​១៩ បានចូលរួម ។
កិច្ចប្រជុំ បានពិភាក្សា និងបានឯកភាពទស្សនៈរួម លើអនាគតនៃតំបន់អាស៊ី និងអឺរ៉ុប ដោយធ្វើយ៉ាងណាត្រូវជំរុញការពារសន្តិភាព យុត្តិធម៌សង្គម កិច្ចសហប្រតិបត្តិការ ការផ្តល់តម្លៃ ការផ្តល់កាលានុវត្តភាពស្មើៗគ្នា ជាមួយនឹងសិទ្ធិសេរីភាពសម្រាប់ប្រជាពលរដ្ឋក្នុងតំបន់ ព្រមទាំងការ     ផ្តល់ទស្សនៈរួមពាក់ព័ន្ធគោលបំណង និងគោលការណ៍ដែលមានចែងក្នុងធម្មនុញ្ញអង្គការសហប្រជាជាតិ ។
កិច្ចប្រជុំដែលមានរយៈពេលពីរថ្ងៃ គឺថ្ងៃទី១៩ និង២០ មេសានេះ ក៏បានលើកឡើងពីសារៈសំខាន់នៃតំបន់អាស៊ី និងអឺរ៉ុប សម្រាប់ការងារពាណិជ្ជកម្ម គឺអាស៊ីនិងអឺរ៉ុបជាប៉ូល សុខដុមនីយកម្មពិភពលោក ជាពិសេសអំពីសារៈសំខាន់ និងផលប្រយោជន៍នៃស្ថាប័ននីតិប្បញ្ញត្តិក្នុងការពិភា​ក្សា​សម្រាប់ លើកកំពស់កិច្ចសហប្រតិបត្តិការ ពហុភាគី លើវិស័យនយោបាយ សេដ្ឋកិច្ច ច្បាប់ និងមនុស្សធម៌ កិច្ចការពារបរិស្ថាន ។
ក្រៅពីនេះ នៅមានបញ្ហាជាច្រើនទៀត ដែលកិច្ចប្រជុំបានលើកមកពិភាក្សាផងដែរ ក្នុងនោះ បានយកចិត្តទុកដាក់ចំពោះការគំាទ្រលើការងារច្បាប់ ដោយបង្កើតជាទម្រង់ ការងារនីតិកម្មទាក់ទងនឹងតម្រូវការសេដ្ឋកិច្ច សង្គមកិច្ច មនុស្សធម៌ និងវប្បធម៌ក្នុងចំណោមប្រទសក្នុងតំបន់ទាំងពីរ និងការ ផ្តោតលើការការពារអ្នកវិនិយោគទៅវិញទៅមក ការចល័តទំនិញ តាមព្រំដែន ទំនើបកម្មបច្ចេកទេសតាមស្តង់ដារ និងសម្របសម្រួលឲ្យមាន សេវាកម្មទីផ្សារ ពីគ្នាទៅវិញទៅមក ។
អង្គប្រជុំបានផ្តល់សារៈសំខាន់ នៃការជួយគ្នាទៅវិញទៅមក លើការត្រួតពិនិត្យការអនុវត្តកម្មវិធី សហប្រតិបត្តិការគម្រោង សេចក្តីសម្រេច កិច្ចព្រមព្រៀងដែលបានធ្វើរួមគ្នាកន្លងមក និង ពង្រឹងក្រុមមិត្តភាពសភា និងលេខាធិការដ្ឋានសភាប្រទេសក្នុងតំបន់អាស៊ី និងអឺរុប ផងដែរ៕

រាជ​រដ្ឋាភិបាល​កម្ពុជា ចេញ​សារាចរ​ណែនាំ ស្តីពី​ការគ្រប់​គ្រង​​រថយន្ត​នាំចូល​​ដោយ​ពន្ធអាករ​​ជា​បន្ទុក​របស់​រដ្ឋនិង​ការកត់​ត្រា​ក្នុង​បញ្ជី​សារពើ​​ភណ្ឌ​ទ្រព្យ​សម្បត្តិ​រដ្ឋ

លោកជំទាវ បាន ស្រីមុំ ចាត់កម្លាំង​ក្រុម​ការងារ ចុះសិក្សា​ទីតាំង ជីកអណ្តូងទឹក​ចំនួន០៤ ជូន​ប្រជាពលរដ្ឋ ដែល​កំពុងខ្វះ​ទឹកប្រើប្រាស់

ដោយមើលឃើញមានកង្វះទឹកនិងតម្រូវប្រើប្រាស់ទឹកប្រចាំថ្ងៃរបស់ប្រជាពលរដ្ឋ នារដូវក្តៅនេះ នៅព្រឹកថ្ងៃទី២០ខែមេសាឆ្នាំ២០១៦នេះ លោកម៉ី វុទ្ធារ៉ា ក្នុងនាមលោកជំទាវ បាន ស្រីមុំ អ្នកតំណាងរាស្ត្រមណ្ឌលប៉ៃលិន និងជាប្រធានសាខាកាកបាទក្រហមកម្ពុជាខេត្ត បានដឹកនាំក្រុមការងារ ចុះសិក្សាទីតាំងអណ្តូងចំនួន៤ទៀត បន្ទាប់ពីបានខួងអណ្តូង២រួច ដែលជាអំណោយដ៏ថ្លៃថ្លាសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា តាមរយៈលោកជំទាវ បាន ស្រីមុំដែលទីតាំង២ស្ថិតក្នុងភូមិសួស្តី និង២ទីតាំងទៀតស្ថិតក្នុងភូមិព្រៃមង្គល សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។