សម្តេច​តេជោ ហ៊ុន សែន លើកម្រាល​ព្រំ នៃបូ​រី​ញូវយ៉ក​ ,​ ផលិត​​ដោយ​​អង្គភាព​​ព័ត៌មាន​ និង​ប្រតិកម្ម​រហ័ស​ នៃ​ទីស្ដីការ​គណៈរដ្ឋមន្ត្រី

លោកនាយករដ្ឋមន្រ្តី ហ៊ុន សែន ថ្លែងថា ការវាស់ដីឱ្យដើរនៅអាមេរិក មិនមែនជាការរើសអើងទេ តែជាការការពារសុវត្ថិភាពប្រមុខរដ្ឋនៃប្រទេសមួយ

ឆ្លើយតបនឹងការលើកឡើងថា លោកនាយករដ្ឋមន្ត្រី ហ៊ុន សែន ត្រូវបានអាមេរិកវាស់ដីឱ្យដើរ នៅពេលលោកទៅដល់ទឹកដីសហរដ្ឋអាមេរិកនោះ លោកនាយករដ្ឋមន្រ្តី ហ៊ុន សែន បានបញ្ជាក់ថា នេះគឺជាការទទួលខុសត្រូវរបស់អាមេរិក ចំពោះសុខសុវត្ថិភាពរបស់លោក។ លោកនាយករដ្ឋមន្ត្រី បានរំលឹកថា សម្រាប់ប្រធានាធិបតីអាមេរិកជំនាន់លោក អូបាម៉ា វិញ នៅពេលមកកម្ពុជា យើងក៏វាស់ដីឱ្យដើរដូចគ្នា។

លោកនាយករដ្ឋមន្ត្រី ហ៊ុន សែន បានលើកឡើងថា យើងទទួលខុសត្រូវខ្ពស់ ទៅលើសុវត្ថិភាពរបស់ថ្នាក់ដឹកនាំប្រទេសគេ ពេលមកប្រទេសយើង។ លោកថា ពេលលោកប្រធានាធិបតីអាមេរិក អូបាម៉ា មកកម្ពុជាយើងមើលតាំងពីជណ្តើរឡើង រហូតទៅដល់ទីកន្លែងដែលគាត់ចតរថយន្ត ត្រូវធ្វើវាំងននបាំងព្រោះមិនដឹងថា លោក អូបាម៉ា ជិះឡានមួយណានោះទេ? ដូចនេះពេលដែលលោកប្រធានាធិបតីសហរដ្ឋអាមេរិក អូបាម៉ា មកកម្ពុជា ក៏យើងវាស់ដីឱ្យអូបាម៉ាដើរដែរ។

លោកបានថ្លែងដូចនេះ នៅថ្ងៃទី៣០ ខែកញ្ញា ឆ្នាំ២០១៨ ម៉ោងនៅប្រទេសកម្ពុជា ក្នុងឱកាសអញ្ជើញជួបសំណេះសំណាលសួរសុខទុក្ខបងប្អូនពលរដ្ឋខ្មែរ-អាមេរិកាំង រស់នៅក្នុងសហរដ្ឋអាមេរិក និងបងប្អូនខ្មែរមកពីប្រទេសកាណាដា នៅទីក្រុងញូវយ៉ក សហរដ្ឋអាមេរិក សរុបប្រមាណចំនួនជាង ២ពាន់នាក់។

លោកនាយករដ្ឋមន្រ្តី ហ៊ុន សែន បានបញ្ជាក់ថា ត្រឹមត្រូវណាស់ ដែលអាមេរិកវាស់ដីឱ្យលោកដើរ គឺវាស្របទៅនឹងរដ្ឋអធិបតេយ្យរបស់គេ ព្រោះលោកមិនមែនជាពលរដ្ឋអាមេរិកនោះទេ លោកជាជនជាតិមួយផ្សេង ហើយជាមេដឹកនាំនៃជាតិសាសន៍មួយផ្សេង ដែលនេះជាការទទួលខុសត្រូវរបស់សហរដ្ឋអាមេរិកចំពោះសុខសុវត្ថិភាពរបស់លោក។ ចំពោះការលើកឡើងបែបនេះ លោកក៏សូមអបអរសាទរចំពោះការយល់ដឹង អំពីអធិបតេយ្យ ហើយជាពិសេសយល់ដឹងអំពីភាពជាអ្នកដឹកនាំ៕

លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូមកដល់កម្ពុជាវិញ ក្រោយបញ្ចប់បេសកកម្មដោយជោគជ័យលើទឹកដីអាមេរិក

លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូជាន់ខ្ពស់រាជរដ្ឋាភិបាលកម្ពុជា ត្រឡប់មកដល់កម្ពុជាវិញហើយ នៅវេលាម៉ោង៣ និង៤៥នាទី ថ្ងៃទី១ ខែតុលា ឆ្នាំ២០១៨នេះ ក្រោយបញ្ចប់បេសកកម្មប្រកបដោយជោគជ័យ នៅលើទឹកដីសហរដ្ឋាអាមេរិក។

គួររំលឹកថា លោកនាយករដ្ឋមន្ត្រី ហ៊ុន សែន បានអញ្ជើញដឹកនាំគណៈប្រតិភូ ហោះចេញពីប្រទេសកម្ពុជាទៅទីក្រុងញូវយ៉ក សហរដ្ឋអាមេរិក កាលពីថ្ងៃទី២៧ ខែកញ្ញា ឆ្នាំ២០១៨ ដើម្បីចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជាជាតិ។

នៅលើទឹកដីអាមេរិក លោកនាយករដ្ឋមន្ត្រី ហ៊ុន សែន បានឡើងថ្លែងសេចក្តីថ្លែងការណ៍នៅទីស្នាក់ការអង្គការសហប្រជាជាតិ ដោយបានលើកបង្ហាញពីវឌ្ឍនភាពរបស់ជាតិកម្ពុជា បញ្ហាបោះឆ្នោត រួមនិងបញ្ហាប្រឈមរបស់ពិភពលោកផងដែរ។ ក្នុងសេចក្តីថ្លែងការណ៍នោះ លោកនាយករដ្ឋមន្ត្រី បានគូសរំលេចសំខាន់លើបញ្ហាសិទ្ធិមនុស្ស និងលទ្ធិប្រជាធិបតេយ្យនាពេលបច្ចុប្បន្ន ដែលត្រូវបានប្រទេសមហាអំណាចមួយចំនួន យកធ្វើជាខែល ដើម្បីជ្រៀតជ្រែកកិច្ចការផ្ទៃក្នុងរបស់ប្រទេសដទៃ។
ក្រៅពីការថ្លែងនូវសេចក្តីថ្លែងការណ៍ក្នុងនាមជាប្រទេសសមាជិក របស់អង្គការសហប្រជាជាតិហើយនោះ លោកនាយករដ្ឋមន្ត្រី ហ៊ុន សែន ក៏បានជួបសំណេះសំណាលទ្វេភាគីជាមួយនាយករដ្ឋមន្ត្រីនេប៉ាល់, នាយករដ្ឋមន្ត្រីប៊ុលហ្ការី, ក្រុមប្រឹក្សាធុរកិច្ចសហរដ្ឋអាមេរិក-អាស៊ាន និងអគ្គលេខាធិការអង្គការសហប្រជាជាតិផងដែរ។

បើទោះបីការបំពេញបេសកកម្មលើទឹកដីអាមេរិកនាពេលនេះ មានសភាពមមាញឹកយ៉ាងណាក្តី តែដោយសារក្តីនឹករលឹកចំពោះបងប្អូនខ្មែរអាមេរិកនោះ លោកនាយករដ្ឋមន្ត្រី ហ៊ុន សែន ក៏បានឆ្លៀតជួបសំណេះសំណាលដោយផ្ទាល់ ជាមួយបងប្អូនខ្មែរប្រមាណជាង ២ពាន់នាក់ ទាំងយប់ផងដែរ។ កាយវិការមេដឹកនាំដែលតែងតែយកចិត្តទុកដាក់ចំពោះខ្មែរ នៅគ្រប់ទីកន្លែងរបស់លោកនាយករដ្ឋមន្ត្រី ហ៊ុន សែន ទទួលបានការស្វាគមន៍ គោរពស្រឡាញ់ និងគាំទ្រយ៉ាងក្លៀវក្លាពីសំណាក់ខ្មែរនៅអាមេរិកនោះ។

ក្នុងជំនួបនោះលោកនាយករដ្ឋមន្ត្រី ហ៊ុន សែន បានលើកបង្ហាញពីការវិវឌ្ឍន៍របស់ជាតិ ទាំងការងារសេដ្ឋកិច្ច សង្គម និងនយោបាយ។ ជាពិសេសលោកបានរំលឹកពីការតាំងចិត្ត និងគោលនយោបាយអាទិភាពមួយចំនួន របស់រាជរដ្ឋាភិបាលអាណត្តិថ្មី ដែលកំពុងយកចិត្តទុកដាក់ជំរុញការអភិវឌ្ឍជាតិឲ្យកាន់តែរីកចម្រើន។

ជារួមមកដំណើរបេសកកម្មរបស់លោក លើទឹកដីសហរដ្ឋអាមេរិក ត្រូវបានគេមើលឃើញថា ជាការលើកកិត្តិនាម និងកិត្តិស័ព្ទរបស់ជាតិនៅលើឆាកអន្តរជាតិ ហើយក៏ត្រូវបានគេចាត់ទុកជាដំណើរមួយដែលនាំមកនូវកិត្តិយស និងមោទនភាពខ្ពស់សម្រាប់ជាតិកម្ពុជាទាំងមូលផងដែរ៕