ប្រសាសន៍សំខាន់ៗរបស់សម្តេចតេជោ ហ៊ុន សែន ថ្លែងក្នុងឱកាសពិធីប្រគល់-ទទួលពហុកីឡដ្ឋានមរតកតេជោ

(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និង លោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេស នៃសាធារណរដ្ឋប្រជាមានិតចិន បានអញ្ជើញធ្វើជាអធិបតីក្នុងពិធីប្រគល់-ទទួលជាផ្លូវការនូវពហុកីឡដ្ឋានជាតិមរតកតេជោ នៅរសៀល ថ្ងៃទី១២ ខែកញ្ញា ឆ្នាំ២០២១នេះ។

 

នៅក្នុងពិធីនេះសម្តេចតេជោ ហ៊ុន សែន ក៏បានថ្លែងសុន្ទរថាប្រមាណជិត១ម៉ោង។ ខាងក្រោមនេះជាប្រសាសន៍សំខាន់ៗរបស់សម្តេចតេជោ៖

* សម្តេចតេជោ ហ៊ុន សែន សម្តែងនូវក្តីសោមនស្សរីករាយ ដែលចូលរួមជាមួយ លោក វ៉ាង យី ក្នុងពិធីប្រគល់ និងទទួល ពហុកីឡដ្ឋានជាតិមរតកតេជោ ដែលជាជំនួយរបស់ចិន មកប្រទេសកម្ពុជា

* សម្តេចតេជោ ហ៊ុន សែន បានថ្លែងថា សមិទ្ធផលនេះ កើតឡើងដោយសារកិច្ចខិតខំប្រឹងប្រែងរបស់ទំនាក់ទំនងកម្ពុជាចិន

* សម្តេចតេជោ ហ៊ុន សែន ថ្លែងថា យើងមិននឹកស្មានថា ដោយសារទំនាក់ទំនងដែកថែបកម្ពុជាចិន នឹងទទួលបានសមិទ្ធផលដ៏អស្ចារ្យនេះទេ

* សម្តេចតេជោ ហ៊ុន សែន ថ្លែងថា ប្រសិនបើគ្មានការជួយជ្រោមជ្រែងពីមិត្តចិននោះទេ យើងប្រហែលជាគ្មានពហុកីឡដ្ឋានជាតិមរតកតេជោនោះទេ

* សម្តេចតេជោ ហ៊ុន សែន ថ្លែងថា ថ្ងៃនេះយើងមានមោទនភាព ដែលមិនមែនត្រឹមខ្ញុំជាអ្នកផ្តួចផ្តើម និងស្វះស្វែងរកជាមួយដៃគូ ឯកឧត្តម ប្រធានាធិបតី ស៊ី ជិនពីង នោះទេ ប៉ុន្តែជាមោទនភាពប្រជាជនខ្មែរ ដែលទទួលបានជំនួយពហុកីឡដ្ឋានជាតិមរតកតេជោ

* សម្តេចតេជោ ហ៊ុន សែន ថ្លែងអំណរគុណដល់ក្រុមហ៊ុនវិស្វករ និងអ្នកជំនាញទាំងឡាយ ដែលបានចូលរួមកសាងពហុកីឡដ្ឋានជាតិមរតកតេជោនេះឡើង

* សម្តេចតេជោ ហ៊ុន សែន ប្រាប់ លោក វ៉ាង យី ថាសម្តេចតែងជួបហូបបាយជាមួយកីឡាករកីឡាការិនីជារៀងរាល់ឆ្នាំ ប៉ុន្តែអកុសលដោយសារកូវីដ ទើបឆ្នាំ២០២០ និង២០២១ មិនទាន់បានជួបគ្នានៅឡើយ

* សម្តេចតេជោ ហ៊ុន សែន ថ្លែងអំណរគុណសម្តេចពិជ័យសេនា ទៀ បាញ់ និង លោក ថោង ខុន ដែលតែងផ្តល់គំនិត និងចុះពិនិត្យមើលការសាងសង់ពហុកីឡដ្ឋាននេះ

* សម្តេចតេជោ ហ៊ុន សែន សង្ឃឹមថា នៅពេលសម្ពោធពហុកីឡដ្ឋានជាតិមរតកតេជោ នៅថ្ងៃខាងមុខ នឹងមានថ្នាក់ដឹកនាំចិនចូលរួម

* សម្តេចតេជោ ចាត់ទុកថា ពហុកីឡដ្ឋានជាតិមរតកតេជោ ជាសមិទ្ធផលដើមរដូវ នៃទំនាក់ទំនងដែកថែប ដែលផ្តល់ដោយ ប្រធានាធិបតីចិន ស៊ី ជិនពីង

* សម្តេចតេជោ ហ៊ុន សែន រំលឹកថា ទំនាក់ទំនងកម្ពុជាចិន កើតឡើងដោយការត្រួសត្រាយផ្លូវរបស់ ព្រះមហាវីរក្សត្រ និងមេដឹកនាំចិនជំនាន់មុន

* សម្តេចតេជោ ហ៊ុន សែន ថ្លែងថា កម្ពុជាបន្តអនុវត្តនយោបាយចិនតែមួយ

* សម្តេចតេជោ ហ៊ុន សែន បញ្ជាក់ថា មិត្តភាពដែកថែបកម្ពុជាចិន គឺមានន័យថាមិត្តទុកចិត្តគ្នា បន្ថែមលើដៃគូយុទ្ធសាស្រ្តគ្រប់ជ្រុងជ្រោយ

* សម្តេចតេជោ ហ៊ុន សែន បញ្ជាក់អំពីមូលហេតុដែលជ្រើសរើសគំរូពហុកីឡដ្ឋានជាតិមរតកតេជោ ជារូបសំពៅ

* សម្តេចតេជោ ហ៊ុន សែន បានរំលឹកជាថ្មីនូវប្រសាសន៍របស់ សម្តេចដែលចោទសួរថា បើខ្ញុំមិនពឹងចិន តើឱ្យខ្ញុំពឹងនរណា?

* សម្តេចតេជោ ហ៊ុន សែន ចោទសួរថា តើខ្ញុំមានកំហុសទេ ដែលខ្ញុំទៅទំនាក់ទំនងជាមួយចិន ហើយបានសមិទ្ធផលទាំងនេះ

* សម្តេចតេជោ ហ៊ុន សែន បានថ្លែងថា គ្រាន់តែផ្លូវមានរហូតដល់២៦០០គីឡូម៉ែត្រ ដែលចិនបានជួយ

* សម្តេចតេជោ ហ៊ុន សែន ចោទសួរថា ឥឡូវនេះ បើចិនមិនជួយទេ តើអ្នកទាំងអស់គ្នាបានចាក់វ៉ាក់សាំងហើយឬនៅ? ដោយក្នុងនោះមានទាំងកីឡាករ និងអ្នកសារព័ត៌មានដែលបានចាក់ដូសទី៣ហើយ

* សម្តេចតេជោ ហ៊ុន សែន បញ្ជាក់ថា កម្ពុជាមិនដែលទាត់ចោលជំនួយអ្នកណាទាំងអស់ ហើយក៏មិនដែលយកនរណាធ្វើជាសត្រូវដែរ ប៉ុន្តែបញ្ហាគឺនៅត្រង់ថាអត់មានអ្នកជួយ

* សម្តេចតេជោ ហ៊ុន សែន ថ្លែងថា នៅយប់នេះការចាក់វ៉ាក់សាំងនៅកម្ពុជាអាចឡើងដល់១១.៥លាននាក់

* សម្តេចតេជោ ហ៊ុន សែន ប្រកាសថា នៅលើពិភពលោក គឺកម្ពុជាតែមួយគត់ដែលមានវ៉ាក់សាំងស្រោចក្នុងរាជធានី (តាមសារព័ត៌មានអូស្រ្តាលី) ដែលពេលនេះសូម្បីតែក្រុងប៉េកាំង ក៏មិនទាន់មានការចាក់ស្រោចដូចភ្នំពេញដែរ

* សម្តេចតេជោ ហ៊ុន សែន ថ្លែងថា បើសិនជាខ្ញុំទាក់ទងចិន ទទួលបានជំនួយហើយមានកំហុស សូមអស់លោកបង្ហាញទឡ្ហីករណ៍ឱ្យបានត្រឹមត្រូវ

* សម្តេចតេជោ ហ៊ុន សែន បានថ្លែងថា ប្រទេសចិនបានជួយសាងសង់ស្ពានចំនួន៧ហើយ ដោយកំពុងត្រៀមសម្រាប់ស្ពានទី៨ ថែមទៀត

* សម្តេចតេជោ ហ៊ុន សែន បានថ្លែងថា នៅពេលបន្តិចទៀតនេះ កម្ពុជា-ចិន នឹងចុះហត្ថលេខាលើជំនួយ២៧០លានដុល្លារអាមេរិកថេមទៀត

* សម្តេចតេជោ ហ៊ុន សែន ថ្លែងថា មានមនុស្សមួយចំនួនមើលមកកម្ពុជា ក្នុងក្រសែភ្នែកមិនត្រឹមត្រូវ

* សម្តេចតេជោ ហ៊ុន សែន ថ្លែងថា កម្ពុជាប្រកាន់គោលនយោបាយសន្តិសហវិជ្ចមាន យើងធ្វើមិត្តជាមួយប្រទេសទាំងអស់ មិនយកប្រទេសណាមួយធ្វើជាសត្រូវ លើកលែងតែភេរវករប៉ុណ្ណោះ

* សម្តេចតេជោ ហ៊ុន សែន ថ្លែងថា ទំនាក់ទំនងល្អរវាងកម្ពុជា-ចិន ត្រូវបានកសាងដោយ សម្តេចឪ និងមេដឹកនាំចិនជំនាន់មុន ហើយបន្តដោយអ្នកបន្តវេនជំនាន់នេះ

* សម្តេចតេជោ ហ៊ុន សែន ថ្លែងអំណរគុណដល់ លោកប្រធានាធិបតីចិន ស៊ី ជិនពីង និងថ្នាក់ដឹកនាំចិន ដែលតាំងគាំទ្រដល់គម្រោងអភិវឌ្ឍប្រទេសកម្ពុជា

* សម្តេចតេជោ ហ៊ុន សែន ថ្លែងថា មុនចូលកម្មវិធីប្រគល់ និងទទួលនេះ មានមន្រ្តីក្រសួងព័ត៌មានម្នាក់ រកឃើញមានផ្ទុកកូវីដ១៩ ប៉ុន្តែគេមានសភាពស្រាល សឹងតែមិនដឹងខ្លួនផង នេះដោយសារតែការទទួលបានវ៉ាក់សាំង

* សម្តេចតេជោ ថ្លែងថា មិត្តល្អគឺជួយគ្នាក្នុងគ្រាអាសន្ននេះឯង បើមានអាសន្នរត់ចោលគ្នា តើធ្វើជាមិត្តល្អនឹងគ្នាយ៉ាងម៉េច?

* សម្តេចតេជោ បានរំលឹកអំពីទស្សនកិច្ចរបស់សម្តេច ទៅកាន់ប្រទេសចិន កាលពីឆ្នាំ២០១៩ អំឡុងពេលចិនចាប់ផ្តើមផ្ទុះ រីករាលដាលជំងឺកូវីដ១៩ ដើម្បីបង្ហាញពីសាមគ្គីភាព ក្នុងពេលចិនកំពុងមានអាសន្ន

* សម្តេចតេជោ ហ៊ុន សែន ថ្លែងថា តើយើងខាតបង់អ្វី ដែលយើងកសាងមិត្តចិន ១៤០០លាននាក់ ខណៈប្រទេសយើងមានតែ១៦លាននាក់

* សម្តេចតេជោ ហ៊ុន សែន បញ្ជាក់ថា សម្តេចធ្វើការជាមួយមេដឹកនាំចិនតាំងពីអាយុក្មេងជាងចិន ឥឡូវអាយុច្រើនជាងចិនវិញហើយ

* សម្តេចតេជោ ហ៊ុន សែន កោតសរសើរចិនថា ជាប្រទេសធំ តែមិនប្រកាន់ទំនាក់ទំនងជាមួយប្រទេសតូច ដែលសម្តេចសូមសម្តែងនូវការគោរព

* សម្តេចតេជោ ហ៊ុន សែន បានថ្លែងថា តាំងពីដើមមក កម្ពុជាបានស្នើចិន ជាអ្នកជួយថែទាំព្រះរាជសុខភាពរបស់ព្រះមហាក្សត្រ និងសម្តេចម៉ែ

* សម្តេចតេជោ ហ៊ុន សែន ប្រកាសយកពហុកីឡដ្ឋានជាតិមរតកតេជោ ជាកន្លែងប្រកួតវគ្គផ្តាច់ព្រ័ត្រ បន្ទាប់ពីមានការប្រកួតជម្រើសតាមតំបន់រួច

* សម្តេចតេជោ ហ៊ុន សែន ប្រកាសយកពហុកីឡដ្ឋានជាតិមរតកតេជោ ជាកន្លែងប្រកួតវគ្គផ្តាច់ព្រ័ត្រ នៅក្នុងប្រទេស បន្ទាប់ពីមានការប្រកួតជម្រើសតាមតំបន់រួច

* សម្តេចតេជោ ថ្លែងថា ពេលនេះយើងបានប្រែក្លាយជាអតីតតំបន់សមរភូមិ ទៅជាតំបន់អភិវឌ្ឍហើយ ដូច្នេះសន្តិភាពរបស់យើង ត្រូវតែថែទាំ

* សម្តេចតេជោ ហ៊ុន សែន ប្រកាសថា សម្តេចទើបទទួលបានមេដាយមាសសន្តិភាពពិភពលោក World Summit Peace អមជាមួយទឹកប្រាក់១លានដុល្លារ ហើយថវិកានេះនឹងត្រូវយកទៅកសាងផ្ទះអតីតយុទ្ធជន

* សម្តេចតេជោ ហ៊ុន សែន ប្រកាសជាថ្មីថា កម្ពុជាបន្តស្វាគមន៍ប្រទេសទាំងអស់ ដែលបរិច្ចាគវ៉ាក់សាំង៌ឱ្យកម្ពុជា ទាំងតាមយន្តការខូវ៉ាក់ ទ្វេភាគី ឬពហុភាគី

* សម្តេចតេជោ ហ៊ុន សែន បានថ្លែងថា យើងត្រូវរៀន និងរស់នៅជាមួយកូវីដ១៩ ច្រើនឆ្នាំបន្តទៀត ដោយតម្រូវឱ្យរស់នៅតាមបែបគន្លងថ្មី

* សម្តេចតេជោ ហ៊ុន សែន ផ្តល់ឱ្យកម្មករ កម្មការិនី ពហុកីឡដ្ឋានជាតិមរតកតេជោ នូវថវិកាម្នាក់១០ម៉ឹនរៀល

* សម្តេចតេជោ ជូនពរទំនាក់ទំនងកម្ពុជា-ចិន ឋិតឋេរជាអមតៈ

* សម្តេចតេជោ ហ៊ុន សែន បានបញ្ចប់សុន្ទរកថា នៅវេលាម៉ោង៥៖៣០នាទី ថ្ងៃទី១២ ខែកញ្ញា ឆ្នាំ២០២១នេះ៕

ដោយ៖ Fresh News

ផ្សាយបន្តផ្ទាល់ពិសេស៖ សម្តេចអគ្គមហាសេនាបតីតេជោ ហ៊ុន សែន និង ឯកឧត្តម វ៉ាង យី អញ្ជើញជាអធិបតីក្នុងពិធីប្រគល់ និង ទទួលវិមានកីឡដ្ឋាន នៃពហុកីឡដ្ឋានជាតិមរតកតេជោ

 

 ផ្សាយបន្តផ្ទាល់ពិសេស៖ សម្តេចអគ្គមហាសេនាបតីតេជោ ហ៊ុន សែន និង ឯកឧត្តម វ៉ាង យី អញ្ជើញជាអធិបតីក្នុងពិធីប្រគល់ និង ទទួលវិមានកីឡដ្ឋាន នៃពហុកីឡដ្ឋានជាតិមរតកតេជោ ជាជំនួយហិរញ្ញប្បទានឥតសំណងរបស់សាធារណរដ្ឋប្រជាមានិតចិន រសៀល ថ្ងៃអាទិត្យ ៦ កើត ខែភទ្របទ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី១២ ខែកញ្ញា ឆ្នាំ២០២១

សម្តេចតេជោ ហ៊ុន សែន៖ «ភាពជាម្ចាស់ប្រទេស» គឺជាគន្លឹះឈានឆ្ពោះទៅរកជោគជ័យ និងសន្តិភាពពេញលេញ ប្រកបដោយនិរន្តរភាព

(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានថ្លែងថា ប្រទេសដទៃមិនអាចមកដើរតួជំនួសក្នុងការកសាងសន្តិភាពបានឡើយ ហើយមានតែ «ភាពជាម្ចាស់ប្រទេស» ប៉ុណ្ណោះ គឺជាគន្លឹះឈានឆ្ពោះទៅរកជោគជ័យ និងសន្តិភាពពេញលេញ ប្រកបដោយនិរន្តរភាព។ សម្តេចតេជោ បានថ្លែងបែបនេះក្នុងពេលចូលរួមក្នុងមហាសន្និបាត នៃក្តីសង្ឃឹមលើកទី៧ ក្រោមប្រធានបទស្តីពី សន្តិភាពនៅតំបន់អាស៊ីប៉ាស៊ីហ្វិក នៅព្រឹកថ្ងៃទី១២ ខែកញ្ញា ឆ្នាំ២០២១នេះ។

ដោយចង្អុលបង្ហាញអំពីព្រឹត្តិការណ៍នយោបាយនៅប្រទេសអាហ្វហ្គានីស្ថាន កាលពីពេលថ្មីៗនេះ សម្តេចតេជោ បានរំលឹកអំពីប្រវត្តិប្រទេសកម្ពុជា កាលពី៤៥ឆ្នាំមុន ដែលមានលក្ខណៈស្រដៀងគ្នានឹងអាហ្វហ្គានីស្ថាននាពេលបច្ចុប្បន្ន។ សម្តេចបានបញ្ជាក់ថា ព្រឹត្តិការណ៍នេះ គឺជាការរំលឹកយ៉ាងក្រៀមក្រំ និងជូរចត់ទៅដល់រឿងរ៉ាវ ដែលបានកើតឡើងនៅក្នុងប្រទេសកម្ពុជា កាលពីថ្ងៃទី១៧ ខែមេសា ឆ្នាំ១៩៧៥ ដែលនៅពេលនោះ ខ្មែរក្រហម បានចូលកាន់កាប់ទីក្រុងភ្នំពេញ ដែលនេះគឺជាស្ថានភាពដ៏សោកសៅបំផុត ដែលកម្ពុជា និងប្រជាជនកម្ពុជា ចងចាំពីភាពខ្លោចផ្សា និងប្តេជ្ញាបញ្ចៀសព្រឹត្តិការណ៍ស្រដៀងគ្នានេះ មិនឱ្យកើតឡើងម្ដងទៀតឡើយ ។

សម្តេចបានមើលឃើញថា ទិដ្ឋភាពភូមិសាស្ត្រនយោបាយនៅតំបន់អាស៊ីប៉ាស៊ីហ្វិក កំពុងប្រែប្រួលយ៉ាងឆាប់រហ័ស ព្រមជាមួយនឹងការប្រែប្រួលតុល្យភាពអំណាចសកល និងការប្រកួតប្រជែងភូមិសាស្ត្រនយោបាយដែលកាន់តែស្មុគស្មាញ ស្រួចស្រាល និងគ្រោះថ្នាក់បំផុត ។ ជាអកុសល នៅក្នុងកម្រិតណាមួយនោះ ខ្សែបន្ទាត់ភូមិសាស្ត្រនយោបាយត្រូវបានគូសវាសឡើងរួចទៅហើយ ដែលការណ៍នេះអាចនឹងរុញច្រានឱ្យមានការកើតឡើងនូវនិន្នាការបន្ទច់បង្អាក់មិនប្រក្រតីនោះគឺ រដ្ឋតូចៗកំពុងស្ថិតនៅក្រោមសម្ពាធឱ្យធ្វើការជ្រើសរើសភាគីម្ខាងៗ ដែលផ្ទុយពីឆន្ទៈ និងផលប្រយោជន៍ជាតិរបស់ខ្លួន ។

សម្តេចគូសបញ្ជាក់ថា៖ «តាមរយៈបទពិសោធដែលស្តែងចេញពីការវិវត្តនៃស្ថានការណ៍នយោបាយនៅប្រទេសអាហ្គានីស្ថាន និងទីកន្លែងផ្សេងៗទៀត យើងអាចយល់ច្បាស់បានថា មានតែភាគីពាក់ព័ន្ធនៅ ក្នុងប្រទេសមានជម្លោះតែប៉ុណ្ណោះ ដែលអាចចូលរួមចំណែកកសាងសន្តិភាព និងប្រទេសជាតិបាន។ ប្រទេសដទៃមិនអាចមកដើរតួជំនួសក្នុងការកសាងនេះបានឡើយ ។ ក្នុងន័យនេះ ខ្ញុំសូមគូសបញ្ជាក់ថា “ភាពជាម្ចាស់ប្រទេស” គឺជាគន្លឹះឈានឆ្ពោះទៅរកជោគជ័យ និងសន្តិភាពពេញលេញ ប្រកបដោយនិរន្តរភាព។ និយាយមួយបែបទៀតបានថា, ប្រទេសដទៃមិនអាចមកបណ្តុះគុណតម្លៃ និងប្រព័ន្ធនយោបាយឱ្យប្រទេសណាមួយបាននោះឡើយ ដោយសារមូលដ្ឋានគ្រឹះសំខាន់ទាំងនេះត្រូវការការរីកលូតលាស់ជាលំដាប់លំដោយ ស្របទៅតាមបរិបទនយោបាយ, សេដ្ឋកិច្ច, សង្គមកិច្ច និងវប្បធម៌របស់ប្រទេសនីមួយៗ»។

សម្តេចបានបន្ថែមថា ជាក់ស្តែង កម្ពុជា គឺជាឧទាហរណ៍គំរូមួយ ដែលគួរពិចារណាយកបទពិសោធ។ សន្តិភាព ពេញលេញដែលយើងទទួលបាននាពេលនេះ គឺត្រូវបានកសាងឡើងដោយមានការចូលរួមពីភាគីពាក់ព័ន្ធទាំងអស់នៅក្នុងប្រទេស ។ សម្តេចបញ្ជាក់ទៀតថា នាដើមទសវត្សរ៍ឆ្នាំ ១៩៩០ កម្ពុជាមិនអាចសម្រេចបានសន្តិភាពពេញលេញនោះទេ បើទោះបីជាសហគមន៍អន្តរជាតិបានចំណាយថវិកា អស់ប្រមាណ ២ពាន់លានដុល្លារអាមេរិក។

«សង្គ្រាមនៅតែបន្តអូសបន្លាយរហូតដល់ខែធ្នូ ឆ្នាំ១៩៩៨ ទើបកម្ពុជាអាចឈានទៅសម្រេចបានសន្តិភាពពេញលេញ បន្ទាប់ពីបានអនុវត្តនយោបាយឈ្នះ-ឈ្នះ ដើម្បីស្វែងរកដំណោះស្រាយនយោបាយរួមមួយក្នុងចំណោមជាតិសាសន៍របស់យើង។ ក្នុងន័យនេះ, ខ្ញុំសូមគូសបញ្ជាក់ជាថ្មីម្ដងទៀតថា យើងត្រូវតែមាន “ភាពជាម្ចាស់ប្រទេស” នៅក្នុងការកសាងសន្តិភាព និងការកសាងប្រទេសជាតិនៅក្រោយជម្លោះ»។ នេះបើតាមសម្តេចតេជោ៕

សុន្ទរកថា សម្តេចតេជោ ហ៊ុន សែន ថ្លែងក្នុងមហាសន្និបាតនៃក្តីសង្ឃឹមពិភពលោក លើកទី៧៖ ស្ថាប័នស្រាវជ្រាវ ឆ្នាំ២០២២ ក្រោមប្រធានបទ សន្តិភាពនៅតំបន់អាស៊ីប៉ាស៊ីហ្វិក

សុន្ទរកថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ថ្លែងក្នុងមហាសន្និបាតនៃក្តីសង្ឃឹមពិភពលោក លើកទី៧៖ ស្ថាប័នស្រាវជ្រាវ ឆ្នាំ២០២២ ក្រោមប្រធានបទ សន្តិភាពនៅតំបន់អាស៊ីប៉ាស៊ីហ្វិក

ថ្ងៃទី១២ ខែកញ្ញា ឆ្នាំ២០២១ តាមប្រព័ន្ធវីដេអូ

Remark by Samdech Akka Moha Sena Patei Hun Sen Prime Minister of the kingdom of Cambodia at the 7^th World Rally of Hope: Think-Tank 2022, Under the Theme “Peace in the Asia-Pacific”
September 12, 2021, via Video Conference. 

ប្រវត្តិ​សង្ខេប​របស់លោក វ៉ាង យី​ ​ទីប្រឹក្សារដ្ឋ និងរដ្ឋមន្ត្រីក្រសួងការបរទេ​ស​ចិន

 (ប៉េកាំង​)៖ លោក វ៉ាង យី (Wang Yi) កើត​នៅ​ថ្ងៃទី​១៩ ខែតុលា ឆ្នាំ​១៩៥៣ មុន​នឹង​បាន​ក្លាយ​ជាទីប្រឹក្សារដ្ឋ និង​ប្រមុខ​ការទូត​កំពូល​របស់​ចិន លោក​ធ្លាប់​បាន​កាន់​តំណែង​សំខាន់ៗជាច្រើន​រួច​មក​ហើយ​ដូចជា អនុ​រដ្ឋមន្ត្រីការបរទេស​, ឯកអគ្គរដ្ឋទូត​ចិន​ប្រចាំ​ប្រទេស​ជប៉ុន និងនាយក​នៃ​ការិយា​ល័យកិច្ចការកោះ​តៃវ៉ាន់​ជាដើ​ម​។

បុរសដែល​មាន​ស្រុកកំណើត​នៅ​ទីក្រុង​ប៉េកាំង​រូបនេះ បាន​បញ្ចប់​ថ្នាក់​វិទ្យាល័យ​នៅ​ពី​ខែ​កញ្ញា ឆ្នាំ១៩៦៩ ដែល​កាលណោះ លោក​ត្រូវបាន​គេ​បញ្ជូន​ទៅ​កាន់​ភាគ​ឦសាន​ប្រទេស​ចិន ដើម្បី​ទទួល​ការហ្វឹកហ្វឺន​ជំនាញ​នៅ​ឯ​ក្រុមហ៊ុន​វិស្វកម្ម​យោធា​នៃ​ភាគ​ឦសាន ក្នុង​ខេត្ត​ហៃ​ឡុង​ជាំ​ង ដែល​មាន​រយៈពេលរហូតដល់​ទៅ៨​ឆ្នាំ​ឯណោះ​។​

​នៅ​ខែ​ធ្នូ ឆ្នាំ​១៩៧៧ លោក​បាន​ត្រឡប់​មក​កាន់​ទីក្រុង​ប៉េកាំង​វិញ ដើម្បី​ទទួល​ការសិក្សា​ស្វែងយល់​បន្ត នៅឯ​នាយកដ្ឋាន​ភាសា​អាស៊ី និង​អាហ្វ្រិក នៃ​ទីក្រុង​ប៉េកាំង (BISU) ហើយ​លោក​ក៏​បាន​បញ្ចប់​បរិញ្ញាប័ត្រ​ភាសា​ជប៉ុន នៅ​ខែ​កុម្ភៈ ឆ្នាំ​១៩៨២​ថែម​ទៀត​។ ដោយឡែក​ភរិយា​របស់​លោក វ៉ាង យី គឺជា​កូនស្រី​របស់​លោក Qian Jaidong ដែល​ជា​រដ្ឋមន្ត្រី​ការបរទេស​របស់​អតីត​រដ្ឋាភិបាល​ចិន​ដឹកនាំដោយ​លោក ជូ អេង​ឡាយ (Zhou Enlai)​។​

​នៅ​ខែ​កញ្ញា ឆ្នាំ​១៩៨៩ លោក វ៉ាង ត្រូវ​បាន​រដ្ឋាភិបាល​ចិន​បញ្ជូន​ឲ្យទៅ​ធ្វើ​ការងារ​នៅ​ស្ថានទូត​ចិន​ប្រចាំ ទីក្រុង​តូ​ក្យូប្រទេស​ជប៉ុន ដែល​មាន​អាណត្តិ ៥​ឆ្នាំ ហើយ​លោក​ក៏​បាន​ត្រឡប់​មក​កាន់​ប្រទេស​ចិន​វិញ នៅ​ខែ​មីនា ឆ្នាំ​១៩៩៤​។ ក្រោយពី​ធ្វើ​ការបំពេញ​ទស្សនកិច្ច និង​សិក្សា​បន្ថែម​នៅ​ក្រៅ​ប្រទេស​រួមទាំង សហរដ្ឋ​អាមេរិក​ផង​ដែរ ពី​ឆ្នាំ១៩៩៤ ដល់ ១៩៩៩ លោក វ៉ាង ក៏​ត្រូវបាន​តែងតាំង​ជា​អនុ​រដ្ឋមន្ត្រីការបរទេស​ចិន​នៅ​ខែ​កុម្ភៈ ឆ្នាំ​២០០១​។​

​នៅ​ខែ​កញ្ញា ឆ្នាំ​២០០៤ លោក​ត្រូវបាន​តែងតាំង​ជា​ឯកអគ្គរដ្ឋទូត​ចិន​ប្រចាំ​ទីក្រុង​តូ​ក្យូ ប្រទេស​ជប៉ុនតែម្តង ដោយ​បាន​កាន់​តំណែងរ​ហូត​ដល់​ខែ​កញ្ញា ឆ្នាំ​២០០៧​។ នៅ​ខែ​មិថុនា ឆ្នាំ​២០០៨ លោក វ៉ាង យី បាន​ជំនួស​តំណែង​លោក ជិន យុន​លីន ក្លាយជា​នាយក​នៃ​ការិយាល័យ​កិច្ចកា​រកោះ​តៃវ៉ាន់ ដែល​ស្ថិតនៅក្រោម​ក្រុមប្រឹក្សារដ្ឋ​នៃ​សា​ធាណ​រដ្ឋ​ប្រជាមានិត​ចិន​។​

​រហូតមកដល់​ថ្ងៃ​ទី​១៦ ខែ​មីនា ឆ្នាំ​២០១៣ ក្រោយ​ការ​ឡើងកាន់​តំណែង​រប​ស់លោក​ប្រធានាធិបតី​ចិន ស៊ី ជិន​ពីង លោក វ៉ាង ត្រូវបាន​តែងតាំង​ជា​ផ្លូវការ ក្លាយជា​រដ្ឋមន្ត្រី​ការបរទេស​ចិន ដោយ​មាន​ការគាំទ្រ​ពីសភា​ប្រជាជន​ចិន​។ ឆ្នាំ២០១៨ លោកទទួលបានមុខងារបន្ថែមជាទីប្រឹក្សារដ្ឋចិន។ លោកក៏ជាសមាជិកគណៈកម្មាធិការ មជ្ឈិមលើកទី១៧ រហូតដល់លើកទី១៩ នៃគណបក្សកុម្មុយនិស្ដចិនផងដែរ។

លោក វ៉ាង មកដល់អាកាសយានដ្ឋានអន្តរជាតិភ្នំពេញ នៅម៉ោងប្រមាណ១១ព្រឹកថ្ងៃទី១២ ខែកញ្ញា ឆ្នាំ២០២១ ដើម្បីមកបំពេញទស្សនកិច្ចនៅកម្ពុជា រយៈពេល២ថ្ងៃ តាមការអញ្ជើញរបស់រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិកម្ពុជា។

នៅក្នុងអំឡុងពេលទស្សនកិច្ចថ្ងៃទី១២-១៣ ខែកញ្ញា ឆ្នាំ២០២១ លោក វ៉ាង យី អញ្ជើញចូលជួបសម្តែងការគួរសមចំពោះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និង មានអាហារការងារពេលព្រឹកជាមួយឧបនាយករដ្ឋមន្រ្តី ហោ ណាំហុង។ លោកក៏នឹងអញ្ជើញមានជំនួបទ្វេភាគីជាមួយ លោកឧបនាយករដ្ឋមន្ត្រី ប្រាក់ សុខុន ដើម្បីពិភាក្សាលើទិដ្ឋភាពផ្សេងៗ នៃកិច្ចសហប្រតិបត្តិការទ្វេភាគី រួមមាន ការប្រយុទ្ធប្រឆាំងនឹងជំងឺកូវីដ-១៩ ពាណិជ្ជកម្ម និងការវិនិយោគ ការអប់រំ សន្តិសុខនិងការពារជាតិ ព្រមទាំងបញ្ហាតំបន់ និងអន្តរជាតិដែលជាប្រយោជន៍ និងកង្វល់រួមផងដែរ។

សម្តេចតេជោ ហ៊ុន សែន និងលោក វ៉ាង យី នឹងអញ្ជើញធ្វើជាអធិបតីក្នុងពិធីប្រគល់-ទទួលជាផ្លូវការនូវពហុកីឡដ្ឋានជាតិមរតកតេជោ ដែលនឹងក្លាយជាទីតាំងសំខាន់សម្រាប់ រៀបចំការប្រកួតកីឡាអាស៊ីអាគ្នេយ៍ នៅឆ្នាំ២០២៣ ដែលកម្ពុជានឹងត្រូវធ្វើជាម្ចាស់ផ្ទះ ហើយដែលក្នុងឱកាសនោះ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ ឆ្នាំ២០២៣ (CAMSOC) និងលោក ថោង ខុន រដ្ឋមន្រ្តីក្រសួងទេសចរណ៍ និងជាអនុប្រធាន CAMSOC ក៏នឹងមានវត្តមានផងដែរ។ សម្តេចតេជោនាយករដ្ឋមន្ត្រី ហ៊ុន សែន និងលោក វ៉ាង យី ក៏នឹងអញ្ជើញធ្វើជាសាក្សី និងអធិបតី ក្នុងពិធីចុះហត្ថលេខាលើឯកសារទ្វេភាគីដ៏សំខាន់មួយចំនួនផងដែរ៕

សម្តេចតេជោអញ្ជើញជាអធិបតីថ្លែងសុន្ទរកថាគន្លឹះ ក្នុងមហាសន្និបាត នៃក្តីសង្ឃឹមលើកទី៧ ក្រោមប្រធានបទស្តីពី «សន្និភាពនៅតំបន់អាសុីប៉ាសុីហ្វីក»

 សម្តេចតេជោអញ្ជើញជាអធិបតីថ្លែងសុន្ទរកថាគន្លឹះ ក្នុងមហាសន្និបាត នៃក្តីសង្ឃឹមលើកទី៧ ក្រោមប្រធានបទស្តីពី «សន្និភាពនៅតំបន់អាសុីប៉ាសុីហ្វីក» 

ថ្ងៃអាទិត្យ ៦ កើត ខែភទ្របទ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី១២ ខែកញ្ញា ឆ្នាំ២០២១