សេចក្ដីប្រកាសព័ត៌មាន ស្ដីពី លទ្ធផលនៃសម័យប្រជុំពេញអង្គគណៈរដ្ឋមន្ត្រី ថ្ងៃសុក្រ ១រោច ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២២ ខែតុលា ឆ្នាំ២០២១

 

នៅព្រឹកថ្ងៃសុក្រ ១រោច ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី២២ ខែតុលា ឆ្នាំ២០២១ វេលាម៉ោង៨និង១០នាទីព្រឹក នៅវិមានសន្តិភាព ទីស្ដីការគណៈរដ្ឋមន្ត្រី មានបើកកិច្ចប្រជុំពេញអង្គគណៈរដ្ឋមន្ត្រី  ក្រោមអធិបតីភាពដ៏ខ្ពង់ខ្ពស់បំផុតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីពិនិត្យនិងពិភាក្សាលើ៖ 

១-សេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២២។

២-សេចក្ដីព្រាងច្បាប់ស្ដីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រង ឆ្នាំ២០២០។ 

៣-បញ្ហាផ្សេងៗ៖ សំណើសុំការយល់ព្រមពីគណៈរដ្ឋមន្ត្រី ដើម្បីសុំការអនុម័តពីស្ថាប័ននីតិប្បញ្ញត្តិ លើសេចក្តីព្រាងច្បាប់ស្តីពីការអនុម័តយល់ព្រមលើពិធីសារអាស៊ានស្តីពី ការពង្រឹងយន្តការដោះស្រាយវិវាទ។

ក្រោយពីបានស្ដាប់របាយការណ៍ សម័យប្រជុំពេញអង្គគណៈរដ្ឋមន្ត្រីបានធ្វើការពិភាក្សាផ្លាស់ប្ដូរយោបល់ និងសម្រេចតាមរបៀបវារៈ ដែលមានលទ្ធផលនិងខ្លឹមសារសង្ខេបដូចខាងក្រោម៖

អង្គភាពព័ត៌មាន និងប្រតិកម្មរហ័សបញ្ចេញផ្សាយវីដេអូក្រោមចំណងជើងថា ៖ «គិតត្រូវ សម្រេចចិត្តត្រូវ និងបោះឆ្នោតត្រូវ នាំមកនូវសុខសន្តិភាព និងការអភិវឌ្ឍន៍»ជោគជ័យ

អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី នៅថ្ងៃទី២២ ខែតុលា ឆ្នាំ២០២១នេះ បានបញ្ចេញផ្សាយនូវវីដេអូថ្មីមួយទៀត ក្រោមចំណងជើងថា គិតត្រូវ សម្រេចចិត្តត្រូវ និងបោះឆ្នោតត្រូវ នាំមកនូវសុខសន្តិភាព និងការអភិវឌ្ឍន៍» ដែលវីដេអូនេះ មានរយៈពេលប្រមាណ២០នាទី។

គោលបំណងដ៏ចម្បងនៃការបញ្ចេញផ្សាយវីដេអូនេះ គឺដើម្បីរំលេចជូនសាធារណជន ជាតិ និងអន្តរជាតិ អំពីជោគជ័យ និងសមិទ្ធិផលសំខាន់ៗរបស់រាជរដ្ឋាភិបាលក្រោមការដឹកនាំរបស់ សម្តេចតេជោ ក្នុងរយៈពេលជាង៣ឆ្នាំនៃអាណត្តិទី៦ បន្ទាប់ពីប្រទេសកម្ពុជាបានរៀបចំការបោះឆ្នោតជ្រើសតាំងតំណាងរាស្ត្រ ៦លើក រួចមកហើយក្រោយពីកិច្ចព្រមព្រៀងទីក្រុងប៉ារីសត្រូវបានចុះហត្ថលេខា នៅថ្ងៃទី២៣ ខែតុលា ឆ្នាំ១៩៩១មក ដែលក្នុងនោះ តួអង្គសំខាន់បំផុត ដែលប្រវត្តិសាស្ត្របានកត់ត្រាទុក គឺព្រះរាជតួនាទីរបស់ព្រះមហាក្សត្រ សម្តេចព្រះនរោត្តម សីហនុ ព្រះបរមរតនកោដ្ឋ និងសម្តេចតេជោ ហ៊ុន សែន។ 

ទោះបីរយៈពេល៣០ឆ្នាំបានកន្លងផុតទៅហើយក៏ដោយ តែស្មារតីនិងគោលការណ៍នៃកិច្ចព្រមព្រៀងសន្តិភាពទីក្រុងប៉ារីស ត្រូវបានដាក់បញ្ចូលនៅក្នុងរដ្ឋធម្មនុញ្ញនៃព្រះរាជាណាចក្រកម្ពុជា នៅក្រោយការបោះឆ្នោតឆ្នាំ១៩៩៣មកម្លេះ ហើយកិច្ចព្រមព្រៀងនេះក៏អស់សុពលភាពផងដែរនៅពេលដែលរដ្ឋាភិបាលថ្មីមួយត្រូវបានបង្កើតឡើង។ចាប់តាំងពីពេលនោះមក កម្ពុជានៅតែប្រកាន់យកដោយឥតងាករេនូវការជ្រើសរើសមេដឹកនាំប្រទេសតាមបែបប្រជាធិបតេយ្យ សេរី ពហុបក្ស ស្របតាមរដ្ឋធម្មនុញ្ញដែលជាច្បាប់កំពូលរបស់ជាតិ។

រាជរដ្ឋាភិបាលនៅតែបន្តប្រកាន់ខ្ជាប់នូវគោលការណ៍ប្រជាធិបតេយ្យ សេរី ពហុបក្ស និងការគោរពសិទ្ធិមនុស្សដោយឥតងាករេ។ គោលនយោបាយចាក់វ៉ាក់សាំងជូនប្រជាពលរដ្ឋឲ្យបានចំនួនច្រើនលើសលប់ដើម្បីបង្កើតបានភាពស៊ាំនៅក្នុងសហគមន៍ ក៏ជាផ្នែកមួយនៃការអនុវត្តនូវការគោរពសិទ្ធិរស់រានមានជីវិតដែលជាសិទ្ធិដ៏សំខាន់បំផុត និងមិនអាចខ្វះបានក្នុងចំណោមសិទ្ធិផ្សេងៗទៀតនៃសិទ្ធិមនុស្ស។ ទន្ទឹមនឹងនោះ នយោបាយចាក់វ៉ាក់សាំងជូនប្រជាពលរដ្ឋក៏ជាផ្នែកមួយនៃការបន្តអនុវត្តលទ្ធិប្រជាធិបតេយ្យសេរីនេះដែរ ពីព្រោះភាពស៊ាំក្នុងសហគមន៍ អាចអនុញ្ញាតឲ្យពលរដ្ឋចេញទៅបោះឆ្នោតដើម្បីជ្រើសរើសក្រុមប្រឹក្សាឃុំ-សង្កាត់នៅឆ្នាំ២០២២  និងការបោះឆ្នោតជ្រើសរើសតំណាងរាស្ត្រនៅឆ្នាំ២០២៣ តាមការកំណត់នៃរដ្ឋធម្មនុញ្ញ។ ភាពស៊ាំក្នុងសហគមន៍នេះទៀតសោត ក៏បានអនុញ្ញាតឲ្យគ្រប់គណបក្សនយោបាយស្របច្បាប់ទាំងអស់ អាចធ្វើសកម្មភាពនយោបាយរបស់ខ្លួនក្នុងយុទ្ធនាការឃោសនារកសម្លេងឆ្នោតប្រកបដោយភាពសេរី ក្នុងស្មារតីប្រកួតប្រជែងដោយ តម្លាភាពនិងយុត្តិធម៌។

ក្នុងរយៈពេលជាង ៣ឆ្នាំកន្លងមកនេះ ប្រទេសជាតិយើងបានឆ្លងកាត់ការលំបាក និងឧបសគ្គជាច្រើនដែលបង្កឡើងដោយគ្រោះធម្មជាតិ ការញុះញង់បង្កភាពវឹកវរ ចលាចលបំបែកបំបាក់សង្គម ការប៉ុនប៉ងផ្តួលរំលំរដ្ឋអំណាចស្របច្បាប់ពីសំណាក់ពួកជនក្បត់ជាតិដែលជាកូនអុកបរទេស និងជាពិសេសការផ្ទុះឡើង និងការឆ្លងរាតត្បាតនៃជម្ងឺកូវីដ-១៩ ទាំងប្រភេទចាស់និងថ្មី ។ល។ និង។ល។ ប៉ុន្តែ ទោះជាយ៉ាងនេះក៏ដោយ  ក៏រាជរដ្ឋាភិបាលដឹកនាំដោយគណបក្សប្រជាជនកម្ពុជា នៅតែអាចឈរជើងយ៉ាងរឹងមាំដើម្បីឈរពាំងការពារសន្តិភាព ស្ថិរភាពនយោបាយ ការពារប្រជាធិតេយ្យ សេរីពហុបក្ស ការគោរពសិទ្ធមនុស្ស និងរបបរាជានិយមអាស្រ័យធម្មនុញ្ញ ជាពិសេសគឺការពារអាយុជីវិតប្រជាពលរដ្ឋពីរោគរាតត្បាតដ៏កាចសាហាវបានដោយប្រសិទ្ធភាព។ ហើយអ្វីៗដែលអាចសំរេចបានទាំងនេះ ក៏ដោយសារតែបងប្អូនប្រជាពលរដ្ឋបាន «គិតត្រូវ និងសំរេចចិត្តត្រូវ ក្នុងការបោះឆ្នោតជូនសម្តេចតេជោ ហ៊ុន សែន ឲ្យបន្តដឹកនាំរាជរដ្ឋាភិបាលដើម្បីរក្សាសុខសន្តិភាព សុខមាលភាព សុវត្តិភាព និងការអភិវឌ្ឍន៍»៕

សូមគោរពអញ្ជើញទស្សនាវីដេអូដូចតទៅ៖

វេទិកាពិគ្រោះយោបល់រៀបចំឡើង ដើម្បីឆ្លើយតបនឹងចក្ខុវិស័យ គោលដៅ គោលបំណង និងយុទ្ធសាស្ត្រ អភិវឌ្ឍន៍រយៈពេល ៥ឆ្នាំ របស់រដ្ឋបាលខេត្តកោះកុង

កោះកុង ៖ លោក អ៊ុក ភ័ក្ត្រា អភិបាលរងខេត្តកោះកុង នៅថ្ងៃទី២២ ខែតុលា ឆ្នាំ២០២១ នេះ បានអញ្ជើញជាអធិបតីក្នុងពិធីបើកវេទិកាពិគ្រោះយោបល់ ស្ដីពីការកសាងកម្មវិធីវិនិយោគបីឆ្នាំរំកិល(២០២២-២០២៤)ខេត្ត និងផ្សព្វផ្សាយសិក្ខាសាលាសមាហរណកម្ម កម្មវិធីវិនិយោគបីឆ្នាំរំកិល(២០២២-២០២៤) នៅថ្នាក់ក្រុង ស្រុក របស់ខេត្តកោះកុង។

លោកអភិបាលរងខេត្ត បានលើកឡើងថា ការរៀបចំវេទិកាពិគ្រោះយោបល់នេះ គឺដើម្បីជាប្រយោជន៍ដល់ការតាមដានត្រួតពិនិត្យ និងបង្ហាញពីវឌ្ឍនភាពឆ្នាំ២០២១នេះ ក្នុងការឆ្លើយតបនឹង ចក្ខុវិស័យ គោលដៅ គោលបំណង និងយុទ្ធសាស្ត្រ អភិវឌ្ឍន៍រយៈពេល ៥ឆ្នាំខេត្ត (២០២០-២០២៤) ដែរឬទេ? វេទិកាពិគ្រោះយោបល់នេះ នឹងបង្ហាញជូននៅលទ្ធផលនៃការអនុវត្តគម្រោងនានារបស់រដ្ឋបាលខេត្ត វិស័យពាក់ព័ន្ធនានាក្នុងខេត្ត ។ វេទិកាពិគ្រោះយោបល់ និងផ្សព្វផ្សាយ ដំណើរការរៀបចំសិក្ខាសាលាសមាហរណកម្ម កម្មវិធីវិនិយោគបីឆ្នាំ រំកិល(២០២២-២០២៤) របស់រដ្ឋបាលខេត្ត ក្រុង ស្រុក និងឃុំ សង្កាត់ ដែលត្រូវបានអនុវត្តប្រកបដោយតម្លាភាព មានការចូលរួម មានសង្គតិភាព ពិសេសគឺពង្រឹងការអនុវត្តនូវគោលការណ៍ ទាំង៩ចំនុច និងវប្បធម៌ប្រជាធិបតេយ្យក្នុងដំណើរការប្រព្រឹត្តទៅនៃការរៀបចំ និងកសាងកម្មវិធីវិនិយោគបីឆ្នាំរំកិលរបស់បណ្ដារដ្ឋបាលថ្នាក់ក្រោមជាតិ។ 

នេះជាឱកាសមួយដ៏វិសេសវិសាលបំផុតដែលរដ្ឋបាលខេត្ត បានរៀបចំវេទិកាពិគ្រោះយោបល់នេះឡើងក្នុងគោលបំណង

-ពិនិត្យ និងកែសម្រួល សេចក្តីព្រាងកម្មវិធីវិនិយោគ៣ឆ្នាំរំកិល(២០២២-២០២៤)

-ពិគ្រោះនិងផ្តល់យោបល់លើការរៀបចំតារាងនានាពង្រីកកិច្ចសហការគ្នារវាងរដ្ឋបាលខេត្ត ជាមួយរដ្ឋបាលក្រុង ស្រុក និងភាគីពាក់ព័ន្ឋនានា

-កៀរគរធនធាន សម្រាប់គាំទ្រគម្រោងវិនិយោគដែលស្នើឡើងដោយរដ្ឋបាលខេត្ត និងរដ្ឋបាល ក្រុង ស្រុក សម្របសម្រួល និងពិភាក្សាគ្នា រវាងគម្រោងនៃកម្មវិធីវិនិយោគខេត្ត ជាមួយនិងគម្រោងនៃកម្មវិធី វិនិយោគក្រុង ស្រុក គម្រោងនៃកម្មវិធីវិនិយោគឃុំ សង្កាត់ និងគម្រោងរបស់បណ្តា អង្គការជាតិ អន្តរជាតិ និងវិស័យឯកជន។

សមិទ្ធផល វឌ្ឍនភាពការរីកចម្រើននៃការអភិវឌ្ឍន៍ខេត្តយើងនេះ ពិតជាបានរួមចំណែក យ៉ាងសកម្ម ពីសំណាក់ មន្ត្រីរាជការ គ្រប់លំដាប់ថ្នាក់ពីប្រជាពលរដ្ឋទូទៅ និងគ្រប់ភាគីពាក់ព័ន្ធនានាក្នុងខេត្ត ទាំងនេះសបញ្ជាក់ឲ្យឃើញច្បាស់នូវសាមគ្គីភាពយ៉ាងរឹងមាំ ល្អរវាងប្រជាពលរដ្ឋ និងអាជ្ញាធរគ្រប់ លំដាប់ថ្នាក់ ជាពិសេសវិស័យឯកជន សប្បុរជននានា ដែលបានរួមសហការ កសាងស្ថាបនាអភិវឌ្ឍន៍មូលដ្ឋាន និងសង្គមជាតិ របស់យើងឲ្យកាន់តែរឹងមាំ ដើម្បីបង្កើន ការងារប្រាក់ចំណូល លើកកម្ពស់ ជីវភាពរស់នៅ និង កាត់បន្ថយការធ្វើចំណាកស្រុក ដើម្បីរួមចំណែកក្នុងការកាត់បន្ថយភាពក្រីក្រ របស់រាជរដ្ឋាភិបាលកម្ពុជា។ 

ក្នុងន័យនេះ លោក លោកស្រី អ្នកចូលរួមទាំងអស់ត្រូវ ចូលរួមអោយបានជាប់លាប់ តាមរយៈការចូលរួមពិភាក្សា ផ្តល់យោបល់ ផ្តល់ធាតុចូល ព្រមទាំងស្វែងយល់ពីការរៀបចំផែនការអភិវឌ្ឍន៍ និងកម្មវិធីវិនិយោគបីឆ្នាំរំកិលប្រចាំឆ្នាំ របស់រដ្ឋបាលថ្នាក់ក្រោមជាតិ នីមួយៗ ។ ក្នុងនាមអាជ្ញាធរខេត្ត នូវតែមានជំនឿជឿជាក់យ៉ាងមុតមាំ ចំពោះចំណាត់ការប្រកបដោយ ភាពប្រាកដនិយមរបស់រាជរដ្ឋាភិបាល ជាពិសេសការអនុវត្តយ៉ាងជោគជ័យនូវ វិធានការបង្ការទប់ស្កាត់ ការរីករាលដាលនៃជំងឺកូវីដ-១៩ ការដោះស្រាយបញ្ហាសង្គមផ្សេងៗ ក្នុងអំឡុងនៃការរីករាលដាលនៃជំងឺ កូវីដ-១៩ជាដើម បើទោះបីជាវិបត្តិជំងឺកូវីដ-១៩ ធ្វើអោយប៉ះពាល់ដល់ដំណើរការអភិវឌ្ឍន៍ប្រទេស ក៏ដូចជាខេត្តក៏ដោយ ធ្វើអោយចំនួនគ្រួសារក្រីក្រ មានការកើនឡើងគួរអោយកត់សម្គាល់។ 

ក្នុងអំឡុងពេលកូវីដ-១៩នេះ រាជរដ្ឋាភិបាល នៅតែអនុវត្តគោលនយោបាយគាំពារសង្គមជួយឧបត្ថម្ភកម្មករនិយោជិត ដែលរងផលប៉ះពាល់ក្នុងពេលព្យួរការងារ គ្រួសារជួបការលំបាកបងប្អូនអតីតយុទ្ធជន និងពិការមានជីវភាពខ្វះខាត ស្ត្រីមានផ្ទៃពោះ និង កុមារក្រោមអាយុ២ឆ្នាំ ជាពិសេសគ្រួសារដែលជួបការលំបាកបញ្ហា សេដ្ឋកិច្ចក្នុងពេលកូវីដ-១៩ យើងសង្ឃឹមថាជីវភាពរស់នៅ ក៏ដូចជាចំណូល របស់ប្រជាពលរដ្ឋ នឹងមានភាពប្រសើរឡើងតាមរយៈការដាក់ចេញយន្តការបន្ទាន់នានា ក្នុងកម្មវិធីវិនិយោគបីឆ្នាំ រំកិល២០២២-២០២៤ របស់ខេត្ត សំដៅធ្វើយ៉ាងណាជួយសម្រាលបន្ទុកជីវភាពរស់នៅរបស់ប្រជាពលរដ្ឋនឹងថយចុះវិញនៅក្រោយភាពស្ងប់ស្ងាត់នៃជំងឺកូវីដ-១៩ បានធូរស្រាលនាពេលខាងមុននេះ៕

រដ្ឋបាលខេត្តកំពង់ឆ្នាំង ប្រារព្ធពិធីសូត្រមន្តអង្គកឋិនទានសាមគ្គី ដើម្បីដង្ហែទៅកាន់វត្តទួលសទ្ធាសត្ថារាម ហៅវត្តតាអ៊នភ្នំយោង

កំពង់ឆ្នាំង៖ នារសៀលថ្ងៃទី២១ ខែតុលា ឆ្នាំ២០២១ រដ្ឋបាលខេត្តកំពង់ឆ្នាំង បានប្រារព្ធពិធីសូត្រមន្តអង្គកឋិនទានសាមគ្គី ដើម្បីដង្ហែទៅវេប្រគេនព្រះសង្ឃដែលគង់ចាំព្រះវស្សាអស់កាលត្រីមាស នៅវត្តទួលសទ្ធាសត្ថារាម (ហៅ វត្តតាអ៊នភ្នំយោង) ស្ថិតនៅក្នុងភូមិទី៧ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង ក្រោមវត្តមានដ៏ខ្ពង់ខ្ពស់លោកស្រី មាន សំអាន ប្រធានគណៈកម្មការទី៨ នៃរដ្ឋសភា និងស្វាមី លោក ឡុង ឈុនឡៃ ប្រធានក្រុមប្រឹក្សាខេត្ត និងលោកស្រី លោក ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង និងលោកស្រី ព្រមទាំងមានការចូលរួមពីសមាជិកក្រុមប្រឹក្សាខេត្ត អភិបាលរងខេត្ត នាយក នាយករងរដ្ឋបាលសាលាខេត្ត ព្រមទាំងថ្នាក់ដឹកនាំមន្ទីរ អង្គភាព ជុំវិញខេត្ត ផងដែរ។

ពិធីបុណ្យត្រូវបានប្រារព្ធឡើងទៅតាមកន្លងប្រពៃណីដោយថ្នាក់ដឹកនាំ រួមនឹងមន្ត្រីរាជការបានអុជធូបទានដើម្បីឧទ្ទិសកុសលផលបុណ្យ ព្រមទាំងធ្វើបទនមស្សកា ព្រះរតនត្រ័យ និមន្តព្រះសង្ឃចម្រើនព្រះបរិត្ត និងសម្តែងធម្មទេសនា។ 

សូមបញ្ជាក់÷ អង្គកឋិនត្រូវបានដង្ហែចេញយកវេប្រគេនព្រះសង្ឃគង់ចាំព្រះវស្សាអស់កាលត្រីមាសនៅវត្តទួលសទ្ធាសត្ថារាម( ហៅវត្តតាអ៊នភ្នំយោង ) នៅវេលាម៉ោង ៨.០០ព្រឹកថ្ងៃទី២២ ខែតុលា ឆ្នាំ២០២១ ជាកិច្ចបង្ហើយបុណ្យ៕

ពិធីសម្ពោធដាក់ឲ្យប្រើប្រាស់អាគារសិក្សាថ្មីមួយខ្នង នៃសាលាបឋមសិក្សាវាលកន្សែង

ក្រចេះ ÷ នៅថ្ងៃទី២២ ខែតុលា ឆ្នាំ២០២១ លោក ភឹម ភីរ៉ា អភិបាលរងខេត្ត តំណាងលោក វ៉ា ថន អភិបាលខេត្តក្រចេះ បានអញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់អាគារសិក្សាថ្មីមួយខ្នង មាន៦បន្ទប់ នៃសាលាបឋមសិក្សាវាលកន្សែង ស្ថិតនៅភូមិវាលកន្សែង ឃុំកំពង់ដំរី ស្រុកឆ្លូង ខេត្តក្រចេះ ក្រោមជំនួយឧបត្ថម្ភរបស់អង្គការឆាលហ្វានកម្ពុជា និងទីភ្នាក់ងារសហប្រតិបត្តិការអន្តរជាតិកូរ៉េខាងត្បូង (KOICA)។

សូមបញ្ជាក់ថា អាគារសិក្សាថ្មីនេះ បានធ្វើពិធីបញ្ចុះបឋមសិលាសាងសង់កាលពីថ្ងៃទី៧ ខែកក្កដា ឆ្នាំ២០២០ និងដាក់សម្ពោធឲ្យប្រើប្រាស់នាថ្ងៃនេះ។

ក្នុងពិធីនោះ លោក ភឹម ភីរ៉ា បានពាំនាំនូវការសួរសុខទុក្ខ និងផ្តាំផ្ញើពីសំណាក់លោកអភិបាលខេត្ត ជូនបងប្អូនប្រជាពលរដ្ឋ លោកគ្រូ អ្នកគ្រូ សិស្សានុសិស្សទាំងអស់ជួយជម្រុញកូនចៅឲ្យខិតខំរៀនសូត្រទោះបីដោយផ្ទាល់ ឬតាមការបង្រៀនពីចំងាយ(អនឡាញ) ក៏ដោយ និងចូលរួមការពារជំងឺកូវីដ-១៩ ដោយរក្សាឲ្យបាន ៣កុំ និង៣ការពារ ព្រមទាំងចាក់វ៉ាក់សាំងការពារឲ្យបានគ្រប់ៗគ្នា៕

ពិធីបើកវគ្គបណ្តុះបណ្តាល ស្តីពីការពិនិត្យបញ្ជីឈ្មោះ និងការចុះឈ្មោះបោះឆ្នោត២០២១

កោះកុង៖  ថ្ងៃព្រហស្បតិ៍ ទី២១ ខែតុលា ឆ្នាំ២០២១ លោក សំឃិត វៀន អភិបាលរង នៃគណៈអភិបាលខេត្តកោះកុង បានអញ្ជើញជាអធិបតី ក្នុងពិធីបើកវគ្គបណ្តុះបណ្តាល ស្តីពីការពិនិត្យបញ្ជីឈ្មោះ និងការចុះឈ្មោះបោះឆ្នោត២០២១ ជូនក្រុមប្រឹក្សាឃុំ ស្មៀនឃុំ និងប៉ុស្តិ៍រដ្ឋបាលឃុំ សម្រាប់ស្រុកថ្មបាំង និងស្រុកកោះកុង។ 

លោកអភិបាលរង បានលើកឡើងថា វគ្គបណ្តុះបណ្តាលស្តីពីនីតិវិធីនៃការស្នើសុំ និងការចេញលិខិតបញ្ជាក់ទីលំនៅក្នុងឃុំ សង្កាត់ និងបែបបទ និងនីតិវិធី នៃការស្នើសុំ និងលិខិតអនុញ្ញាតឱ្យស្នាក់នៅបណ្ដោះអាសន្ន បែបបទ និងនីតិវិធីនៃការស្នើសុំ និងការចេញឯកសារបញ្ជាក់អត្តសញ្ញាណបម្រើឱ្យការចុះឈ្មោះបោះឆ្នោត និងការដាក់ ការទទួល និងដោះស្រាយពាក្យបណ្ដឹង សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ពិតជាមានសារៈសំខាន់សម្រាប់អាជ្ញាធរក្រុង ស្រុក ឃុំ សង្កាត់ ដែលត្រូវយកចិត្តទុកដាក់ខ្ពស់បំផុត ដើម្បីជំរុញឱ្យដំណើរការចុះឈ្មោះបោះឆ្នោត បានសមស្របទៅនឹងកាលបរិច្ឆេទដែលបានកំណត់ដោយច្បាប់ នឹងឈានទៅដល់ការបោះឆ្នោតប្រកបដោយភាពត្រឹមត្រូវ និងយុត្តិធម៌នាពេលខាងមុខ៕

សម្តេចតេជោ ហ៊ុន សែន ថ្លែងសារផ្ញើជូនជនរួមជាតិ ពាក់ព័ន្ធស្ថានភាពទូទៅនៅកម្ពុជា ជាពិសេសបញ្ហាកូវីដ១៩ មុនកិច្ចប្រជុំគណៈរដ្ឋមន្រ្តី នាព្រឹកថ្ងៃទី២២ ខែតុលា ឆ្នាំ២០២១

 

ថ្នាក់ដឹកនាំខេត្តព្រះសីហនុ ចូលរួមក្នុងកិច្ចប្រជុំពេញអង្គគណ:រដ្ឋមន្ត្រី ក្រោមអធិបតីភាព លោកនាយករដ្ឋមន្ត្រី ហ៊ុន សែន តាមរយៈប្រព័ន្ធបញ្ជូនរូបភាព និងសំឡេង ( Video Conference)

ព្រះសីហនុ៖នៅថ្ងៃទី២២ ខែតុលា ឆ្នាំ២០២១ លោក គួច ចំរើន អភិបាល នៃគណៈអភិបាលខេត្តព្រះសីហនុ និងលោក សូ ជុងហួរ សមាជិកក្រុមប្រឹក្សាខេត្តព្រះសីហនុបាន ចូលរួមក្នុងកិច្ចប្រជុំពេញអង្គគណ:រដ្ឋមន្ត្រី ក្រោមអធិបតីភាព លោកនាយករដ្ឋមន្ត្រី ហ៊ុន សែន តាមរយៈប្រព័ន្ធបញ្ជូនរូបភាព និងសំឡេង ( Video Conference) ដោយមានការចូលរួមពីលោក អភិបាលរងខេត្ត នាយករដ្ឋបាលសាលាខេត្ត ស្នងការនគរបាលខេត្ត មេបញ្ជាការកងរាជអាវុធហត្ថខេត្ត មេបញ្ជាការតំបន់ប្រតិបត្តិការសឹករងខេត្ត និងប្រធានមន្ទីរអង្គភាពពាក់ព័ន្ធ។

សូមជម្រាបផងដែរថា របៀបវារៈនៃកិច្ចប្រជុំមានដូចខាងក្រោម ៖

១- សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២

២- សេចក្តីព្រាងច្បាប់ស្តីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ២០២០

៣- បញ្ហាផ្សេងៗ សំណើសុំការយល់ព្រមពីគណៈរដ្ឋមន្រ្តី ដើម្បីសុំការអនុម័តពីស្ថាប័ននីតិប្បញ្ញត្តិលើសេចក្តីព្រាងច្បាប់ស្តីពីការអនុម័តយល់ព្រមលើពិធីសារអាស៊ានស្តីពីការពង្រឹងយន្តការដោះស្រាយវិវាទ៕

ពិធីបិទយុទ្ធនាការចាក់វ៉ាក់សាំការពារជំងឺកូវីដ-១៩ ជូនប្រជាពលរដ្ឋចាប់ពីអាយុ ១៨ឆ្នាំឡើង ក្នុងភូមិសាស្ត្រខេត្តកំពត

កំពត៖ នៅថ្ងៃទី២១ ខែតុលា  ឆ្នាំ ២០២១  នៅសាលាខេត្តកំពត លោក ម៉ៅ ធនិន អភិបាលនៃគណៈអភិបាលខេត្តកំពត និងលោក ជឹង ផល្លា ប្រធានក្រុមប្រឹក្សាខេត្ត រួមជាមួយ អភិបាលរងខេត្ត ស្នងការ មេបញ្ជាការកងកម្លាំងទាំងបីប្រភេទ នាយក នាយករងរដ្ឋបាលសាលាខេត្ត ប្រធានមន្ទីរ អង្គភាពជុំវិញខេត្ត អភិបាលក្រុង ស្រុក លោក លោកស្រីនាយក នាយករងទីចាត់ការ ប្រធាន អនុប្រធានអង្គភាព និងមន្ត្រីរាជការចំណុះសាលាខេត្ត បានអញ្ជើញចូលរួមពិធីបិទយុទ្ធនាការចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋចាប់ពីអាយុ១៨ឆ្នាំឡើង ក្រោមអធិបតីភាពលោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស។

តាមរបាយការណ៍របស់លោក ញា ប៊ុនថន ប្រធានមន្ទីរសុខាភិបាលខេត្ត បានឲ្យដឹងថា គិតត្រឹមថ្ងៃទី១៧ ខែតុលា ឆ្នាំ២០២១ ការចាក់វ៉ាក់សាំងដូសទី១ សម្រេចបានដូចខាងក្រោម៖ 

-ប្រជាពលរដ្ឋដែលមានអាយុចាប់ពី១៨ឆ្នាំឡើង ចាក់វាក់សាំបានចំនួន ៣៤៤,៧៦៣នាក់ ស្មើ ៨៩.០៩ភាគរយ នៃ ផែនការសរុប៣៨៦,៩៤៨នាក់ ។ ក្នុងនោះពុំទាន់បានចាក់ចំនួន ៤២,១៨៥នាក់ ស្មើ ១០.៩១ភាគរយ ។ 

-កុមារ និងយុវវ័យ អាយុចាប់ពី១២ឆ្នាំ ដល់ក្រោម១៨ឆ្នាំ ចាក់បានចំនួន៦៦,១០៩នាក់ ស្មើ ៨៤.០០ភាគរយ នៃផែនការសរុប៧៨,៧០០នាក់ ។ ក្នុងនោះអ្នកមិនទាន់បានចាក់ ចំនួន១២,៥៩១នាក់ ស្មើ ១៦.០០ភាគរយ ។

-កុមារ អាយុចាប់ពី៦ឆ្នាំ ដល់ក្រោម១២ឆ្នាំ ចាក់បាន ចំនួន៧៧,២០៥នាក់ ស្មើ ១១០.៨២ភាគរយ នៃផែនការ សរុប៦៩៦៦៨នាក់ ។ លើសផែនការ ចំនួន ៧៥៣៧ នាក់ ស្មើ ១០.៨២ភាគរយ ។ 

-ជារួមប្រជាជនអាយុចាប់ពី១២ឆ្នាំឡើង បានចាក់វ៉ាក់សាំងដូសទី១រួច ចំនួន៤១០,៨៧២នាក់ ស្មើ៨៨.២៤ភាគ រយ នៃផែនការសរុប៤៦៥,៦៤៨ នាក់ ក្នុងនោះអ្នកពុំទាន់ បានចាក់ចំនួន៥៤,៧៧៦នាក់ ស្មើ១១.៧៦ភាគរយ (ស្ត្រីមានផ្ទៃពោះ ពលករចំណាកស្រុក ប្រជាពលរដ្ឋមានធុរៈផ្សេងៗ ក្នុងពេលយុទ្ធនាការ និងអ្នកជំងឺដែលមិនអាចចាក់បាន) ។

មានប្រសាសន៍ ក្នុងឱកាសនោះ លោកស្រី ឱ វណ្ណឌីន បានបញ្ជាក់ថា ក្រោមការយកចិត្តទុកដាក់ខ្ពស់បំផុតរបស់សលោកនាយករដ្ឋមន្ត្រី ហ៊ុន សែន បានស្វះស្វែងរកវ៉ាក់សាំងមកចាក់ជូនប្រជាពលរដ្ឋដោយឥតគិតថ្លៃ រហូតក្លាយជាប្រទេសឈានមុខ លើការចាក់វ៉ាក់សាំងជូនប្រជាពលរដ្ឋបានច្រើនជាងគេ។ ជាមួយលទ្ធផលចាក់វ៉ាក់សាំងគួរជាទីមោទននេះ យើងក៏មិនត្រូវភ្លេចអំពីការអនុវត្តតាមវិធានសុខាភិបាលនានា ព្រោះថាវ៉ាក់សាំងអាចជួយកាត់បន្ថយភាពធ្ងន់ធ្ងរនៃជំងឺ ការចូលសំរាកមន្ទីរពេទ្យ និងអត្រាមរណៈភាព ប៉ុន្តែមេរោគកូវីដ ១៩ ដ៏កាចសាហាវនេះ នៅតែមានឱកាសឆ្លងចូលមកក្នុងខ្លួនយើង ហើយយើងក៏អាចជាភ្នាក់ងារចម្លងមេរោគនេះទៅអ្នកដទៃ និងមនុស្សជុំវិញខ្លួន ។

លោកស្រី បានអំពាវនាវដល់ប្រជាពលរដ្ឋទាំងអស់ សូមយកចិត្តទុកដាក់អនុវត្តតាមប្រសាសន៍ណែនាំរបស់ប្រមុខរាជរដ្ឋាភិបាល គឺអនុវត្តវិធាន៣ការពារ និង៣កុំ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ដ៏កាចសាហាវនេះ។ ជាកិច្ចបញ្ចប់លោកស្រីបានប្រកាសបិទយុទ្ធនាការចាក់វ៉ាក់សាំងកូវីដ-១៩ ជូនប្រជាពលរដ្ឋដែលមានអាយុចាប់ពី១៨ឆ្នាំឡើង និងប្រកាសបិទការផ្តល់ថវិកាជូនដល់ប្រជាពលរដ្ឋដែលមានអាយុពី១០០ឆ្នាំឡើងទៅក្នុងខេត្តកំពតចាប់ពីថ្ងៃនេះតទៅដែរ៕